Thuto 42

E Ruta Bamameli ba Hao

Ke eng seo u lokelang ho se etsa?

Fetisa tsebo ka tsela e susumetsang monahano le e sieang bamameli ba hao ba e-na le boikutlo ba hore ba ithutile ho hong habohlokoa.

Ke Hobane’ng ha e le ea Bohlokoa?

Haeba u bolella batho lintho tseo ba seng ba li tseba, ho ka ’na ha etsahala hore u se ke ua hapa tlhokomelo ea bona ka nako e telele.

HO ETSA hore nehelano ea hao e be e rutang bamameli ba hao ha ho bolele feela ho bua ka taba e itseng ea bohlokoa. Ipotse: ‘Ke hobane’ng ha bamameli baa ba lokela ho utloa taba ee? Ke eng eo nka e buang e tla etsa hore bamameli ba ikutloe hore ba hlile ba ruile molemo puisanong ee?’

Sekolong, haeba u abetsoe ho etsa pontšo mabapi le kamoo ho ka pakeloang motho e mong kateng, mong’a ntlo ke eena eo e tla ba momameli. Maemong a mang, ho ka ’na ha etsahala hore u bue le phutheho kaofela.

Seo Bamameli ba Hao ba se Tsebang. Ipotse, ‘Ke eng seo bamameli ba se tsebang ka taba ee?’ Seo e lokela ho ba motheo oa puo ea hao. Haeba u bua le phutheho e nang le Bakreste ba bangata ba hōlileng tsebong, u se ke ua pheta lintho tsa motheo feela, tseo bongata ba bona ba li tsebang. Hōlisa linnete tsena tsa motheo. Ho hlakile hore haeba ho boetse ho e-na le batho ba bangata ba sa tsoa thahasella, u lokela ho nahanela litlhoko tsa lihlopha tsena ka bobeli.

Fetola lebelo la nehelano ea hao ho ea ka seo bamameli ba hao ba se tsebang. Haeba u kenyelletsa lintlha tse itseng tseo mohlomong bongata bo li tloaetseng, li akaretse kapelenyana. Empa u bue butle ha u nehelana ka mehopolo eo ho ka etsahalang hore ebe e mecha ho karolo e khōlō ea bamameli ba hao e le hore ba tsebe ho e utloisisa ka ho hlaka.

Se Tla Ruta. Ho ruta hase kamehla ho bolelang ho bua ntho e itseng e ncha. Libui tse ling li khona ho hlalosa linnete tse itseng tse tloaelehileng ka tsela e bonolo hoo ba bangata har’a bamameli ba ka li utloisisang hantle ka lekhetlo la pele.

Tšebeletsong ea tšimo, ha hoa lekana ho bolela ntho e itseng e hlahileng litabeng ho bontša hore re phela mehleng ea qetello. Sebelisa Bibele ho bontša hore na ketsahalo eo e bolela’ng. Sena se tla fana ka thuto ea sebele ho mong’a ntlo. Ka ho tšoanang, ha u bua ka boitsebiso bo itseng bo mabapi le molao oa tlhaho kapa bo mabapi le bophelo ba lijalo kapa ba liphoofolo, pakane ea hao ha ea lokela hore e be ho hlahisa taba e itseng e hlollang ea saense eo mong’a ntlo a qalang ho e utloa. Ho e-na le hoo, pakane ea hao e lokela hore e be ho kopanya bopaki ba tlhaho le seo Bibele e se bolelang ho bontša hore ho na le ’Mōpi ea re ratang. Sena se tla thusa mong’a ntlo ho talima litaba ka pono e ncha.

Ho nehelana ka taba e itseng ho bamameli ba seng ba e utloile ka makhetlo-khetlo e ka ba phephetso. Empa hore u be mosuoe ea atlehang, u lokela ho ithuta tsela ea ho etsa sena ka katleho. U ka se etsa joang?

Ho etsa lipatlisiso ho tla u thusa. Ho e-na le ho akarelletsa feela lintlha tse itlelang kelellong puong ea hao, sebelisa lithulusi tsa ho etsa lipatlisiso tse tšohliloeng leqepheng la 33 ho ea ho la 38. Hopola litlhahiso tse fanoeng moo mabapi le lipakane tseo u lokelang ho loanela ho li finyella. Ha u ntse u etsa lipatlisiso, u ka ’na ua fumana hore ho na le ketsahalo e itseng e sa tloaelehang ea histori e amanang le taba ea hao ka ho toba. Kapa mohlomong u ka fumana tlaleho e sa tsoa fanoa litabeng e tla hlakisa ntlha eo u rerileng ho e tšohla.

Ha u ntse u hlahloba boitsebiso boo, susumetsa monahano oa hao ka ho botsa lipotso tse kang eng? hobane’ng? neng? hokae? mang? le joang? Ka mohlala: Ke hobane’ng ha see e le ’nete? Nka se tiisa joang? Ke litumelo life tse tloaelehileng tse thatafaletsang ba bang ho utloisisa ’nete ee ea Bibele? Ke hobane’ng ha see e le sa bohlokoa? See se lokela ho ama bophelo ba motho joang? Ke mohlala ofe o bontšang molemo oa ho se sebelisa? ’Nete ee ea Bibele e senola eng ka botho ba Jehova? Ho itšetlehile ka boitsebiso boo u bo tšohlang, u ka ’na ua botsa: See se etsahetse neng? Re ka sebelisa boitsebiso boo joang kajeno ka tsela e sebetsang? U ka ’na ua phelisa nehelano ea hao ka ho botsa tse ling tsa lipotso tse joalo le ho li arabela ha u fana ka puo.

Puo ea hao e ka ’na ea hloka hore u sebelise mangolo ao bamameli ba hao ba a tloaetseng. Ke eng seo u ka se etsang hore e be a rutang ha u a sebelisa? U se ke ua a bala feela; a hlalose.

Ho tšohla temana e tloaelehileng e ka ba ho rutang haholoanyane haeba u arola temana likarolo tse peli, u qoolla likarolo tse amanang le sehlooho sa puo ea hao le ho li hlalosa. Hlokomela kamoo sena se ka etsoang kateng ka temana e kang Mikea 6:8 ho Phetolelo ea Lefatše le Lecha. “Toka” ke eng? Ho tšohloa tekanyetso ea mang ea toka? U ka bontša joang se boleloang ke “ho sebelisa toka”? Kapa se boleloang ke hore “u rate mosa”? Boinyenyefatso ke eng? U ka sebelisa boitsebiso boo ho motho ea hōlileng joang? Ho hlakile hore boitsebiso boo u tla bo sebelisa bo lokela ho laoloa ke lintho tse kang sehlooho sa hao, pakane ea hao, bamameli ba hao le nako.

Hangata ho molemo ho sebelisa mantsoe a bonolo ha u hlalosa mantsoe. Batho ba bang baa hlolloa ha ba ithuta se boleloang ke “’muso” oo ho buuoang ka oona ho Matheu 6:10. Ho hopotsoa tlhaloso ea lentsoe ho ka thusa le motho eo e leng khale e le Mokreste hore a utloisise hantle seo temana e hlileng e se bolelang. Sena sea hlaka ha re bala 2 Petrose 1:5-8 re ntoo hlalosa litšobotsi tse sa tšoaneng tse boletsoeng litemaneng tseo: tumelo, bokhabane, tsebo, boitšoaro, mamello, boinehelo ba bomolimo, boikutlo bo mofuthu ba bara ba motho le lerato. Ha ho sebelisitsoe mantsoe a nang le moelelo o tšoanang tabeng e tšoanang, ho a hlalosa ho ka thusa ho bontša phapang pakeng tsa ’ona. Ho joalo le ka mantsoe a kang bohlale, tsebo, temoho le kutloisiso, a sebelisitsoeng ho Liproverbia 2:1-6.

Bamameli ba hao ba ka ho fumana e le ho rutang haeba u beha mabaka ka temana. Batho ba bangata baa makala ha ba hlokomela ka lekhetlo la pele hore liphetolelong tse ling tsa Bibele ho Genese 2:7, ho thoe Adama ke moea o phelang le hore ho ea ka Ezekiele 18:4, meea ea shoa. Ka lekhetlo le leng, Jesu o ile a makatsa Basaduse ha a ne a qotsa Exoda 3:6, eo ba neng ba bolela hore baa e lumela eaba o e sebelisa tabeng ea tsoho ea bafu.—Luka 20:37, 38.

Ka linako tse ling ho beha leseling ho bua ka taba e potolohileng lengolo, maemo a bileng teng ha le ne le ngoloa le ho tseba hore na ho bua mang kapa hore na ho buuoa le mang. Bafarisi ba ne ba tseba Pesaleme ea 110 hantle. Leha ho le joalo, Jesu o ile a lebisa tlhokomelo ea bona ntlheng ea bohlokoa e fumanoang temaneng ea pele. O ile a botsa: “‘Le nahana joang ka Kreste? Ke mora oa mang?’ Ba re ho eena: ‘Oa Davida.’ A re ho bona: ‘Joale, ho tla joang hore Davida ka pululelo a mo bitse “Morena,” ha a re, “Jehova o itse ho Moren’a ka: ‘Lula ka letsohong la ka le letona ho fihlela ke beha lira tsa hao tlas’a maoto a hao’”? Ka hona, haeba Davida a mo bitsa “Morena,” ke mora oa hae joang?’” (Mat. 22:41-45) Ha u beha mabaka ka Mangolo joalokaha Jesu a entse, u tla thusa batho ho bala Lentsoe la Molimo ka kelo-hloko e khōlō.

Ha sebui se bolela nako eo buka e itseng ea Bibele e ngotsoeng ka eona kapa nako eo ketsahalo e itseng e etsahetseng ka eona, se lokela ho hlalosa le maemo a neng a le teng ka nako eo. Ka tsela eo, bamameli ba tla utloisisa ka ho hlaka bohlokoa ba buka eo kapa ketsahalo eo.

Ho bapisa ho ka thusa ho etsa hore seo u se buang e be se rutang haholoanyane. U ka ’na ua bontša phapang pakeng tsa maikutlo a tloaelehileng le seo Bibele e se bolelang ka taba e tšoanang. Kapa u ka ’na ua bapisa litlaleho tse peli tse tšoanang tsa Bibele. Na ho na le phapang? Hobane’ng? Re ithuta eng ho tsona? Ho etsa joalo ho ka etsa hore bamameli ba hao ba be le pono e ncha ka taba eo.

Haeba u abetsoe ho bua ka tšobotsi e itseng ea tšebeletso ea Bokreste, u ka entša nehelano ea hao ka hore u qale ka ho etsa kakaretso. Bua ka se lokelang ho etsoa, le lebaka leo se lokelang ho etsoa ka lona le kamoo se amanang kateng le lipakane tsohle tsa rōna joaloka Lipaki tsa Jehova. Joale hlalosa hore na mosebetsi oo o lokela ho etsoa hokae, neng hona joang.

Ho thoe’ng haeba puo ea hao e hloka hore u bue ka tse ling tsa “lintho tse tebileng tsa Molimo”? (1 Bakor. 2:10) Haeba u qala ka ho qoolla likarolo tse ka sehloohong tsa taba le ho li hlalosa, ho tla ba bonolo ho utloisisa makolopetso. ’Me haeba u phetha ka ho akaretsa boitsebiso ba hao ka bokhutšoanyane, u tla siea bamameli ba hao ba ikutloa ba khotsofetse hore ka sebele ho na le seo ba ithutileng sona.

Keletso Mabapi le Bophelo ba Bokreste. Bamameli ba hao ba tla rua molemo haholo haeba u ba thusa ho bona kamoo boitsebiso ba puo ea hao bo sebetsang kateng bophelong ba bona. Ha u ntse u hlahloba mangolo a leng boitsebisong boo u bo abetsoeng, ipotse, ‘Ke hobane’ng ha boitsebiso boo bo ile ba bolokoa ka Mangolong ho fihlela mehleng ea rōna?’ (Bar. 15:4; 1 Bakor. 10:11) Nahana ka maemo a bophelo ao bamameli ba hao ba talimanang le ’ona. Nahana ka maemo ao ho ea ka keletso le melao-motheo ea Mangolo. Puong ea hao, beha mabaka ka Mangolo ho bontša kamoo a ka thusang motho ho sebetsana ka bohlale le maemo a joalo. Qoba lipolelo tse hlahlathelang. Bua ka maikutlo le liketso tse tobileng.

Qalong, sebelisa tlhahiso e le ’ngoe kapa tse peli tse ka holimo puong eo u e lokisetsang. Ha u ntse u fumana phihlelo, sebelisa litlhahiso tse eketsehileng. Ka mor’a nako e itseng u tla hlokomela hore bamameli ba hao ba lebella ka thabo ho mamela lipuo tsa hao, ba kholisehile hore ba tla utloa ho hong ho tla ba ruisa molemo ka sebele.

KAMOO U KA HO ETSANG KATENG

Nahana ka seo bamameli ba hao ba seng ba se tseba ka taba ea hao.

Laola lebelo leo u nehelang boitsebiso ka lona—potlaka lintlheng tse tsebahalang haholo, bua butle lintlheng tse ncha.

U se ke ua bolela lintlha feela; tšohla moelelo kapa molemo oa tsona.

Susumetsa monahano oa hao ka ho botsa: Eng? Hobane’ng? Neng? Hokae? Mang? Joang?

Iphe nako ea ho beha mabaka ka Mangolo; u qaqise likarolo tse khethehileng tsa ’ona.

Sebelisa mokhoa oa ho bapisa lintho le oa ho bontša phapang ea tsona.

Kopanyelletsa le kakaretso e khutšoanyane ea boitsebiso ba hao.

Bontša kamoo ho ka sebelisoang boitsebiso boo kateng ho rarolla mathata le ho etsa liqeto.

BOITLHAKISO: (1) Etsa lipatlisiso bakeng sa ho fumana karolo e rutang ea lengolo le tloaelehileng, le kang Matheu 24:14 kapa Johanne 17:3. (2) Bala Liproverbia 8:30, 31 le Johanne 5:20. Ho thuisa ka kamano e pakeng tsa Jehova Molimo le Kreste Jesu, joalokaha ho hlalositsoe litemaneng tseo, ho ka u thusa joang hore u sebelise litemana tseo ho ruisa lelapa molemo?