Lipotso Tse Tsoang Ho Babali

Bakreste ba ka etsa lintho tse itseng hore ba itšireletse. Empa ba tlameha ho etsa seo ba ipapisitse le likeletso tsa Bibele. Bibele ha e re khothalletse ho sebelisa lithunya ho itšireletsa. Lintlha tse latelang li tla re thusa ho etsa qeto e nepahetseng:

Bophelo ba motho boa halalela ho Jehova. Mopesaleme Davida o ile a re Jehova ke “mohloli oa bophelo.” (Pes. 36:9) Kahoo, haeba Mokreste a khetha ho itšireletsa le ho sireletsa thepa ea hae, o tla etsa joalo ka tsela eo a tla qoba ho bolaea motho e mong le hore a be molato oa mali.—Deut. 22:8; Pes. 51:14.    

Ke ’nete hore motho a ka bolaea e mong ka ntho efe kapa efe. Empa sethunya se etsa hore ho be bonolo ho bolaea motho, ebang o ikemiselitse kapa che.a Ho feta moo, senokoane ka bosona se tla se tšohile. Empa ha se hlokomela hore lehlatsipa le na le sethunya, boemo bo ka mpefala hoo e mong a ka bolaoang.

Le hoja Jesu Kreste a ile a re balateli ba hae ba nke lisabole bosiung ba ho qetela a le lefatšeng, o ne a sa bolele hore ba itšireletse. (Luka 22:36, 38) Kahoo, Jesu o ile a re ba tlise sabole hobane a batla ho ba ruta hore ba se ke ba iphetetsa leha ba se ba hlasetsoe. (Luka 22:52) Ka mor’a hore Petrose a khaole tsebe ea mohlanka oa moprista e moholo ka sabole, Jesu Kreste o ile a mo laela a re: “Khutlisetsa sabole ea hao sebakeng sa eona.” Ka mor’a moo, o ile a bua mantsoe ana ho Petrose ao le mehleng ena balateli ba Jesu ba a mamelang: “Bohle ba nkang sabole ba tla timela ka sabole.”—Mat. 26:51, 52.

Barapeli ba Molimo ba etsa lintho tumellanong le Mikea 4:3. Ba “tea lisabole tsa bona hore e be mehoma le marumo a bona hore e be likere tse faolang limela.” Mantsoe ana a lumellana le keletso ena eo moapostola Pauluse a faneng ka eona e reng: “Ho se ke ha e-ba le eo le busetsang bobe ka bobe ho eena. . . . Haeba ho khoneha, ho fihlela moo ho itšetlehileng ka lōna, le be le khotso le batho bohle.” (Bar. 12:17, 18) Pauluse o ile a fela a phelela mantsoe ao. Le hoja a ile a kopana le mathata a mangata, a akarelletsang ‘likotsi tsa masholu a litseleng,’ ha aa ka a nka hore ho itšireletsa ho molemo ho feta ho mamela likeletso tsa Bibele. (2 Bakor. 11:26) Ho e-na le hoo, o ile a tšepa Molimo le likeletso tse ka Bibeleng tse mo thusitseng hore a be le bohlale “bo molemo ho feta lisebelisoa tsa ntoa.”—Moek. 9:18.

Bakreste ba nka bophelo bo le bohlokoa ho feta lintho tseo ba nang le tsona. “Bophelo . . . ha bo hlahe linthong tseo [motho] a nang le tsona.” (Luka 12:15) Kahoo, haeba senokoane se na le sethunya ’me se hana ho u mamela leha u se buisa hantle, ke bohlale ho mamela keletso ea Jesu e reng: “Ea u amohang seaparo sa hao sa ka ntle, u se ke ua mo hanela esita le ka seaparo sa ka tlaase,” ke hore u ka mo fa ntho leha e le efe eo a batlang ho e nka. (Luka 6:29; Mat. 5:39, 40)b Ntho e molemo le ho feta eo re ka e etsang ke hore re qobe “pontšo ea mponeng ea mokhoa oa [rona] oa boipheliso” ’me re be le khotso le baahisani bohle ba rona. Ha re etsa joalo, menyetla ea hore re hlaseloe ke masholu e tla fokola haholo.—1 Joh. 2:16; Liprov. 18:10.

Bakreste ba nahanela matsoalo a batho ba bang. (Bar. 14:21) Haeba Bakreste-’moho le rona ba ka tseba hore re itšireletsa khahlanong le batho ka sethunya, ba ka haroha matsoalo kapa ba khopeha. Ha re rata Bakreste-’moho le rona, re tla ba nahanela ho e-na le hore re inahane borona feela, esita le haeba molao o re lumella ho ba le sethunya.—1 Bakor. 10:32, 33; 13:4, 5.

Bakreste ba lokela ho beha mohlala o motle. (2 Bakor. 4:2; 1 Pet. 5:2, 3) Haeba Mokreste a fuoe keletso e tsoang ka Bibeleng mabapi le ho sebelisa sethunya empa a khetha ho tsoela pele ho se sebelisetsa ho itšireletsa khahlanong le batho, ha a nkoe a beha mohlala o motle. Kahoo, Mokreste eo, hammoho le ea sebelisang sethunya hobane a le mosebetsing, ba ke ke ba tšoaneleha ho fumana boikarabelo leha e le bofe ka phuthehong. Ho ka ba molemo hore a batle mosebetsi o mong ntle le oo.c

Ke ’nete hore Mokreste o lokela ho iketsetsa qeto ea hore na o itšireletsa joang, o sireletsa ba lelapa la hae le thepa ea hae joang le hore na o khetha mosebetsi ofe. Empa likeletso tseo Jehova a re fileng tsona ka Bibeleng lia bontša hore oa re rata le hore o bohlale. Kahoo, Bakreste ba nang le kamano e ntle le Jehova ha ba sebelise sethunya ho itšireletsa khahlanong le batho hobane ba mamela likeletso tse tsoang ka Bibeleng. Baa tseba hore Jehova o tla ba sireletsa hafeela ba mo tšepa ’me ba etsa lintho tumellanong le lintho tseo ba ithutang tsona Bibeleng.—Pes. 97:10; Liprov. 1:33; 2:6, 7.