“Khotso ea Molimo” e ke e Lebele Pelo ea Hao
“Jehova a retelletse sefahleho sa hae ho uena, ’me a u fe khotso!”—NUMERE 6:26.
1. Nakoana pele Pauluse a e-shoa, o ile a ngolla Timothea eng, ’me seo se ne se senola eng?
KA SELEMO sa 65 C.E., moapostola Pauluse e ne e le motšoaruoa Roma. Le hoja haufinyane a ne a tla shoa ka sehlōhō a bolaoa ke ’molai oa Moroma, Pauluse o ne a le khotsong. Sena se bonahala mantsoeng ao a a ngolletseng motsoalle oa hae e mocha Timothea, ha a ne a re: “Ke loanne ntoa e molemo, ke titimile ka qeta sebaka, ke bolokile tumelo. Ho setseng e se e le ho amohela moqhaka oa ho loka oo ke o behetsoeng, oo Morena, moahloli ea lokileng, a tlang ho ’nea oona ka letsatsi lela.”—2 Timothea 4:7, 8.
2. Ke eng e neng e lebetse pelo ea Pauluse ho pholletsa le bophelo ba hae bo tletseng liketsahalo tse sa tloaelehang, ho fihlela lefung la hae?
2 Ke joang Pauluse a neng a ka ba le khutso e joalo leha a ne a talimane le lefu? Ke hobane pelo ea hae e ne e lebetsoe ke “khotso ea Molimo, e fetisang kutloisiso eohle.” (Ba-Filippi 4:7) Khotso eona ena e ne e mo sirelelitse lilemong tsohle tse tletseng liketsahalo tsa bohlokoa ho tloha pejana ha a sokolohela Bokresteng. E ne e ile ea mo tšehetsa ha a hlaseloa ke lihlopha tsa mahoohoo, ha a kentsoe literonkong, ha a shapuoa, le ha a tlepetsoa ka majoe. E ne e mo matlafalitse ha a loana le bokoenehi le litšusumetso tsa Bojode. ’Me e ne e mo thusitse hore a loane le matla a sa bonahaleng a bademona. Ka ho hlakileng, e ile ea mo matlafatsa ho fihlela qetellong.—2 Ba-Korinthe 10:4, 5; 11:21-27; Ba-Efese 6:11, 12.
3. Ho phahama lipotso life mabapi le khotso ea Molimo?
3 Pauluse o ile a fumana khotso ee e le tšusumetso e matla hakaakang! Na rōna kajeno re ka ithuta hore na khotso ee ke eng? Na e tla lebela lipelo tsa rōna le ho re matlafatsa ha re ntse re “loana ntoa e ntle ea tumelo” ‘linakong tsee tse boima, tse mahlonoko tseo ho leng thata ho sebetsana le tsona’?—1 Timothea 6:12; 2 Timothea 3:1, NW.
Ho ba Khotsong le Molimo—Kamoo ho Lahlehileng ka Teng
4. Meelelo e meng ea lentsoe “khotso” ka Bibeleng ke efe?
4 Ka Bibeleng lentsoe “khotso” le na le meelelo e mengata. Meelelo e latelang ke e meng ea eona, joalokaha e thathamisitsoe ho The New International Dictionary of New Testament Theology: “Ka Testamenteng ea Khale kaofela, [sha·lohmʹ] (khotso) e akaretsa boiketlo ka kutloisiso e pharalletseng haholo ea lentsoe leo (Baahl. 19:20); katleho (Pes. 73:3), esita le ha ho buuoa ka batho ba se nang bomolimo; bophelo bo botle ba ’mele (Esa. 57:18, 19]; Pes. 38:3); khotsofalo . . . (Gen. 15:15 jj.); likamano tse ntle pakeng tsa lichaba le batho ( . . . Baahl. 4:17; 1 Likron. 12:17, 18); poloko ( . . . Jer. 29:11; bapisa le Jer. 14:13).” Ho ba le likamano tsa khotso le Jehova ke habohlokoa ka ho fetisisa, kaha ka ntle ho tsona khotso efe kapa efe e ’ngoe e finyelletsoeng esita le tlas’a maemo a molemohali ke ea nakoana le e lekanyelitsoeng.—2 Ba-Korinthe 13:11.
5. Khotso ea pele ea pōpo ea Molimo e ile ea senngoa joang?
5 Qalong, pōpo eohle e ne e le boemong bo felletseng ba khotso kamanong le Jehova. Ka ho utloahalang, Molimo o ile oa bolela hore mesebetsi eohle ea oona ea pōpo e metle haholo. Ka sebele, mangeloi a leholimo a ile a hooa ka nyakallo ha a e bona. (Genese 1:31; Jobo 38:4-7) Leha ho le joalo, ka masoabi khotso eo e akaretsang ha ea ka ea tšoarella. E ile ea senngoa ha sebōpuoa sa moea seo hona joale se tsejoang e le Satane se thetsa sebōpuoa se secha ka ho fetisisa har’a libōpuoa tse bohlale tsa Molimo, Eva, hore se se ke sa utloa Molimo. Monna oa Eva, Adama, o ile a mo latela, ’me kaha ka kakaretso ho ne ho se ho e-na le bafetoheli ba bararo, ho ile ha ba le pherekano bokahohleng.—Genese 3:1-6.
6. Ho lahleheloa ke khotso le Molimo ho ile ha tlisetsa batho eng?
6 Ho lahleheloa ke khotso eo ba neng ba e-na le eona le Molimo ho ile ha tlisa tlokotsi ho Adama le Eva, bao joale butle-butle ’mele ea bona e ileng ea ’na ea felloa ke matla ’me qetellong ba shoa. Ho e-na le hore Adama a thabele khotso Paradeiseng, o ile a lokela ho sehla mobung o sa lokisoang o neng o le ka ntle ho Edene hore a fepe lelapa la hae le neng le ntse le hōla. Ho fapana le hore Eva a tsoale moloko oa batho o phethahetseng a khotsofetse, o ile a hlahisa bana ba sa phethahalang ka bohloko le ka mahlomola. Ho lahleheloa ke khotso eo batho ba neng ba e-na le eona le Molimo ho ile ha hlahisa mōna le pefo har’a batho. Kaine o ile a bolaea ngoan’abo Abele, ’me ka nako ea Moroallo, lefatše lohle le ne le se le tletse pefo. (Genese 3:7–4:16; 5:5; 6:11, 12, NW) Ha batsoali ba rōna ba pele ba e-shoa, ka sebele ha baa ka ba theohela mabitleng a bona “ka khotso,” ba khotsofetse joaloka Abrahama ea ileng a shoa makholo a mangata a lilemo hamorao.—Genese 15:15.
7. (a) Molimo o ile oa bolela boprofeta bofe bo neng bo supa ho tsosolosoa ha khotso e felletseng? (b) Sera sa Molimo, Satane, se ile sa ba le tšusumetso e matla hakae?
7 Re fumana moo ho buuoang ka bora ka lekhetlo la pele ka Bibeleng ka mor’a hore Adama le Eva ba lahleheloe ke khotso. Molimo o ile oa bua le Satane ’me oa re: “Ke tla bea hloeano [“bōra,” BPN] mahareng a hao le mosali, le mahareng a peō ea hao le peō ea hae; peo eo e tla u khoba hloho, ’me u tla e lōma serethe.” (Genese 3:15) Ha nako e ntse e e-ea, tšusumetso ea Satane e ile ea ’na ea hōla ho ea bohōleng ba hore moapostola Johanne a re: “Lefatše lohle le rapaletse ka tlase ho e mobe.” (1 Johanne 5:19) Ka sebele lefatše le tlas’a Satane ha le khotsong le Molimo. Ka hona, ka nepo morutuoa Jakobo o ile a lemosa Bakreste: “Na ha le tsebe hore ho etsa setsoalle le lefatše ke bōra ho Molimo?”—Jakobo 4:4, BPN.
Ho ba le Khotso Lefatšeng le Tletseng Lehloeo
8, 9. Ka mor’a hore Adama a etse sebe, batho ba ne ba ka ba khotsong le Molimo joang?
8 Morao koana Edene, ha Molimo o ne o bolela lentsoe “bōra” ka lekhetlo la pele, o ile oa boela oa bolela esale pele kamoo khotso e felletseng e neng e tla busetsoa ka teng pōpong. Peō e tšepisitsoeng ea mosali oa Molimo e ne e tla khoba hlooho ea mosenyi oa pele oa khotso. Ho tloha Edene ho ea pele, ba ileng ba bontša tumelo tšepisong eo ba ile ba thabela likamano tsa khotso le Molimo. Ho Abrahama, hona ho ile ha fetoha setsoalle.—2 Likronike 20:7; Jakobo 2:23.
9 Mehleng ea Moshe, Jehova o ile a bōpa bana ba Iseraele, setloholo sa Abrahama, ho ba etsa sechaba. O ile a tšepisa ho fa sechaba sena khotso ea hae, joalokaha ho bonoa tlhohonolofatsong eo Aarone, moprista ea phahameng, a ileng a e phatlalatsa holim’a sona: “Jehova a u hlohonolofatse, ’me a u boloke! Jehova a u khantšetse sefahleho sa hae, ’me a u hauhele! Jehova a retelletse sefahleho sa hae ho uena, ’me a u fe khotso!” (Numere 6:24-26) Khotso ea Jehova e ne e tla tlisa meputso e enneng, empa e ne e tla fanoa ho itšetlehiloe ka maemo a itseng.
10, 11. Tabeng ea Iseraele, ho ba khotsong le Molimo ho ne ho itšetlehile ka eng, hona ho ne ho tla tlisa eng?
10 Jehova o ile a bolella sechaba: “Ekare ha le latela litaelo tsa ka, ’me le boloka melao ea ka, le ea ka eona, ke tla le fa lipula ka nako ea tsona; lefatše le tla hlahisa lijo tsa lona, ’me lifate tsa naha li tla bea litholoana tsa tsona. Ke tla etsa khotso naheng ea lōna; le tla robala ho se motho ea le tšosang; ke tla felisa libatana tse harolang ’me lerumo le ke ke la feta ka naha ea lōna. Ke tla itsamaela har’a lōna, ke be Molimo oa lōna, lōna le be sechaba sa ka.” (Levitike 26:3, 4, 6, 12) Iseraele e ne e ka ba le khotso hobane e ne e sireletsehile lireng tsa eona, e na le nala ea lintho tse bonahalang, le kamano e haufi le Jehova. Empa sena se ne se tla itšetleha ka hore e khomarele Molao oa Jehova.—Pesaleme ea 119:165.
11 Historing eohle ea sechaba seo, ka sebele Baiseraele ba neng ba leka ka botšepehi ho boloka litaelo tsa Jehova ba ne ba thabela ho ba khotsong le eena, ’me hangata seo se ne se tlisa mahlohonolo a mang a mangata. Lilemong tse qalang tsa puso ea Morena Salomone, ho ba khotsong le Molimo ho ile ha tlisa katleho ea lintho tse bonahalang hammoho le ho phomola lintoeng pakeng tsa Iseraele le baahisani ba eona. Ha Bibele e hlalosa nako eo, e re: “Ba-Juda le ba-Iseraele, ho tloha Dane ho isa Beerseba, ba ne ba lutse ba iketlile, e mong le e mong tlas’a morara oa hae le tlas’a feiga ea hae, ka matsatsi ’ohle a Salomone.” (1 Marena 4:25) Esita leha ho ne ho e-ba le khohlano pakeng tsa bona le linaha tsa boahisani, Baiseraele ba tšepahalang ba ne ba ntse ba na le khotso eo e neng e hlile e le eona ea bohlokoa, ho ba khotsong le Molimo. Ka hona, Morena Davida, mohlabani ea tsebahalang, o ile a ngola: “Ke sekama ka khotso, ke be ke ithoballe ka khotso, hobane, Jehova, ke uena u ’notši ea nkhahisang boiketlong.”—Pesaleme ea 4:8.
Motheo o Molemonyana oa Khotso
12. Qetellong Iseraele e ile ea lahla khotso eo e neng e e-na le eona le Molimo joang?
12 Qetellong, Peō e neng e tla tsosolosa khotso e felletseng e ile ea fihla e le motho, Jesu, ’me ha a tsoaloa mangeloi a ile a bina: “Khanya e be ho Molimo maholimong a holimo, khotso e be lefatšeng ho batho bao o khahloang ke bona.” (Luka 2:14) Jesu o ile a hlahela Iseraele, empa le hoja sechaba seo sohle se ne se le tlas’a selekane sa Molimo, se ile sa mo lahla ’me sa nehelana ka eena ho Baroma hore a bolaoe. Nakoana pele Jesu a e-shoa, o ile a llela Jerusalema, a re: “Jo! hoja ebe le uena u tsebile, le ka tsatsi lena la hao, tse ka beng li u hlahisetsa khotso! Empa joale li patetsoe mahlo a hao.” (Luka 19:42; Johanne 1:11) Ka baka la ho lahla Jesu, Iseraele e ile ea lahleheloa ke khotso eo e neng e e-na le eona le Molimo ka ho felletseng.
13. Jehova o ile a thea tsela efe e ncha e le hore motho a ka ba le khotso le Eena?
13 Leha ho le joalo, merero ea Molimo ha ea ka ea nyopa. Jesu o ile a tsosoa bafung ’me a hlahisa molemo oa bophelo ba hae bo phethahetseng ho Jehova e le topollo bakeng sa batho ba lipelo li ntle. (Ba-Heberu 9:11-14) Sehlabelo sa Jesu se ile sa fetoha tsela e ncha le e molemonyana ea hore batho—Baiseraele ba tlhaho le Balichaba—ba be le khotso le Molimo. Lengolong la hae le neng le ea ho Bakreste ba Roma Pauluse o ile a re: “Re boelantsoe le Molimo ka lefu la Mora oa hae, ha re ne re sa ntse re le lira tsa Molimo.” (Ba-Roma 5:10, BPN) Lekholong la pele la lilemo, ba ileng ba bōpa khotso ka tsela ena ba ile ba tlotsoa ka moea o halalelang hore e be bara ba Molimo bao o ikhethetseng bona ka molao le litho tsa sechaba se secha sa moea se bitsoang “Iseraele oa Molimo.”—Ba-Galata 6:16; Johanne 1:12, 13; 2 Ba-Korinthe 1:21, 22; 1 Petrose 2:9.
14, 15. Hlalosa hore na “khotso ea Molimo” ke eng, le hore na e sireletsa Bakreste joang esita leha ba hlaseloa ke lehloeo la Satane.
14 Baiseraele bana ba bacha ba moea ba ne ba tla hlouoa ke Satane le lefatše la hae. (Johanne 17:14) Leha ho le joalo, ba ne ba tla ba le “khotso ea Molimo Ntate le ea Kreste Jesu, Morena oa rōna.” (2 Timothea 1:2, BPN) Jesu o ile a ba bolella: “Ke le boleletse taba tseo, hore le be le khotso ho ’na. Le tla ba le mahlomola lefatšeng; le mpe le bete lipelo; ke hlōtse lefatše.”—Johanne 16:33.
15 Khotso ena ke eona e ileng ea thusa Pauluse le Bakreste-’moho le eena ho mamella ho sa tsotellehe mathata ’ohle ao ba neng ba talimana le ’ona. E bonahatsa kamano e nang le khutso le kutloano le Molimo e fumanehang ka sehlabelo sa Jesu. E fa motho ea nang le eona khotso ea kelello e nang le khutso ha a hlokomela kameho ea Jehova. Ngoana ea sikiloeng ke ntat’ae ea lerato o ba le boikutlo bona boo ba khotso, kholiseho e se nang pelaelo ea hore o hlokometsoe ke motho e mong ea mo tsotellang. Pauluse o ile a khothalletsa Bafilippi: “Le se ke la belaella letho; empa nthong tsohle seo le se batlang, le ke le se tsebise Molimo ka thapelo le ka kōpo e nang le teboho. ’Me khotso ea Molimo, e fetisang kutloisiso eohle, e tla boloka lipelo tsa lōna le mehopolo ea lōna ho Jesu Kreste.”—Ba-Filippi 4:6, 7.
16. Ho ba le khotso le Molimo ho ile ha ama kamano eo Bakreste ba lekholong la pele la lilemo ba neng ba e-na le eona pakeng tsa bona ka bobona joang?
16 Phello e ’ngoe ea hore motho a lahleheloe ke khotso eo a neng a e-na le eona le Molimo ke lehloeo le ho hloka kutloano. Ho Bakreste ba lekholong la pele la lilemo, ho ba le khotso le Molimo ho ile ha ba le phello e fapaneng: ba ne ba e-na le khotso le bonngoe har’a bona, tseo Pauluse a ileng a li bitsa “tlamo ea khotso.” (Ba-Efese 4:3) Ba ne ba e-na le ‘monahano o lumellanang ’me ba phela ka khotso, ’me Molimo oa lerato le khotso o ne o e-na le bona.’ Ho feta moo, ba ne ba bolela “litaba tse molemo tsa khotso,” tseo haholo-holo e neng e le litaba tse molemo tsa poloko ho ‘metsoalle ea khotso,’ e arabelang litabeng tse molemo.—2 Ba-Korinthe 13:11; Liketso 10:36; Luka 10:5, 6, NW.
Selekane sa Khotso
17. Molimo o entse eng le batho ba oona mehleng ea rōna?
17 Na khotso e joalo e ka fumanoa kajeno? E, e ka fumanoa. Ho tloha ha ’Muso oa Molimo o hlongoa tlas’a Jesu Kreste ea tlotlisitsoeng ka 1914, Jehova o ’nile a bokella masala a Iseraele ea Molimo hore a tsoe lefatšeng lena ’me o entse selekane sa khotso le ’ona. Ka hona o ile a phethahatsa tšepiso ea hae e neng e entsoe ka moprofeta Ezekiele: “Ke tla ba etsetsa selekane sa khotso; e tla ba selekane se sa feleng le bona; ke tla ba tiisa, ke ba atise, ’me ke tla bea sehalalelo sa ka har’a bona ka ho sa feleng.” (Ezekiele 37:26) Jehova o ile a etsa selekane sena le Bakreste ba tlotsitsoeng ba bontšang tumelo sehlabelong sa Jesu joaloka baena ba bona ba lekholong la pele la lilemo. Kaha ba hloekisitsoe ho silafala ha moea, ba inehetse ho Ntate oa bona oa leholimo ’me ba loanela ho latela litaelo tsa hae, haholo-holo ka ho etella pele ho boleloa ha litaba tse molemo tsa ’Muso o hlomiloeng oa Molimo lefatšeng ka bophara.—Mattheu 24:14.
18. Ba bang har’a lichaba ba arabetse joang ha ba lemoha hore lebitso la Molimo le holim’a Iseraele ea Molimo?
18 Boprofeta bo tsoela pele: “Tabernakele ea ka e tla ba holim’a bona, ’me ke tla ba Molimo oa bona, bona e be sechaba sa ka. Ke hona lichaba li tla tseba hoba ke ’na Jehova ea halaletsang Iseraele.” (Ezekiele 37:27, 28) Tumellanong le sena, ba makholo a likete, e, ba limillione, ba tsoang har’a “lichaba” ba hlokometse hore lebitso la Jehova le holim’a Iseraele ea Molimo. (Zakaria 8:23) Kaha ba tsoa har’a lichaba tsohle, ba phuthehile hore ba tl’o sebeletsa Jehova hammoho le sechaba seo sa moea, ba etsa “bongata bo boholo ba batho” bo bonoeng esale pele ho Tšenolo. Kaha ba “hlatsoitse liaparo tse telele tsa bona, ba li soeufalitse maling a Konyana,” ba tla phonyoha mahlomola a maholo ’me ba kene lefatšeng le lecha la khotso.—Tšenolo 7:9, 14.
19. Batho ba Molimo ba thabela khotso ea mofuta ofe kajeno?
19 Iseraele ea Molimo le bongata bo boholo ba batho ba le hammoho ba thabela khotso ea moea e tšoanang le khotso e neng e thabeloa ke Iseraele tlas’a Morena Salomone. Mabapi le bona, Mikea o ile a profeta: “Ka lisabole tsa bona ba tla tea mehoma, ka marumo a bona ba tee lisekele; sechaba se seng se ke ke sa hlola se tsohela sechaba se seng ka lerumo, ha ba sa tla hlola ba ithuta ntoa. Ba tla lula e mong le e mong ka tlas’a feiga ea hae le ka tlas’a morara oa hae, ho se ea ba tšosang.” (Mikea 4:3, 4; Esaia 2:2-4) Tumellanong le sena, ba furalletse ntoa le khohlano, ka tšoantšetso ba entse lisabole tsa bona mehoma ’me marumo a bona ba a entse lisekele. Ka hona, ba thabela boena bo nang le khotso har’a sehlopha sohle sa bona sa machaba, ho sa tsotellehe moloko oa bona, puo, morabe, kapa boemo ba sechaba. ’Me ba thabela tiiso ea tlhokomelo e sireletsehileng ea Jehova e holim’a bona. ‘Ha ho motho ea ba tšosang.’ Kannete, ‘Jehova o nehile batho ba hae matla. Jehova o hlohonolofalitse batho ba hae ka khotso.’—Pesaleme ea 29:11.
20, 21. (a) Ke hobane’ng ha re tlameha ho sebeletsa ho boloka khotso eo re nang le eona le Molimo? (b) Re ka re’ng mabapi le boiteko ba Satane ba ho senya khotso ea batho ba Molimo?
20 Leha ho le joalo, joaloka lekholong la pele la lilemo C.E., khotso ea bahlanka ba Molimo e tsositse lehloeo la Satane. Kaha o lahletsoe ntle a tsoa leholimong ka mor’a ho hlongoa ha ’Muso oa Molimo ka 1914, ho tloha ka nako eo Satane o ’nile a loantša “masala a leloko la [mosali].” (Tšenolo 12:17) Esita le mehleng ea hae, Pauluse o ile a lemosa: “Ntoa ea rōna ha e loane le nama le mali, empa e loana . . . le meea e bolotsana e sebakeng sa leholimo.” (Ba-Efese 6:12) Kaha joale Satane o lahletsoe lefatšeng, temoso eo e potlakile.
21 Satane o ’nile a sebelisa maqiti ’ohle ao a ka a khonang ka boiteko ba ho senya khotso ea batho ba Molimo, empa o ’nile a hlōleha. Morao koana ka 1919, ba neng ba loanela ho sebeletsa Molimo ka botšepehi ba ne ba e-s’o fihle ho 10 000. Kajeno, ho na le ba ka holimo ho limillione tse ’nè ba hlōlang lefatše ka tumelo ea bona. (1 Johanne 5:4) Ho bana, ho ba le khotso le Molimo le ho ba le khotso lipakeng tsa bona ka bobona ke ntho ea sebele, ha ba ntse ba mamelletse lehloeo la Satane le peō ea hae. Empa ka baka la lehloeo lena, leha re nahana ka ho se phethahale ha rōna le “linako tse mahlonoko tseo ho leng thata ho sebetsana le tsona” tseo re phelang ho tsona, ho hlokahala hore re sebetse ka matla hore re boloke khotso ea rōna. (2 Timothea 3:1, NW) Re tla bona hore na sena se akarelletsa eng sehloohong se latelang.
Na U ka Hlalosa?
◻ Ke hobane’ng ha qalong motho a ile a lahleheloa ke khotso eo a neng a e-na le eona le Molimo?
◻ Tabeng ea Iseraele, ho ba le khotso le Molimo ho ne ho itšetlehile ka eng?
◻ Kajeno ho ba le khotso le Molimo ho theiloe holim’a eng?
◻ “Khotso ea Molimo” e lebelang lipelo tsa rōna ke eng?
◻ Mahlohonolo a eketsehileng ao re a thabelang haeba re e-na le khotso le Molimo ke afe?