U se ke Ua Ithetsa ka Monahano oa Bohata

KA MOR’A hore Eva a je sefate se neng se thibetsoe, Molimo o ile a mo botsa a re: “U entse’ng?” Eva o ile a araba a re: “Noha—e nthetsitse kahoo ke jele.” (Gen. 3:13) Satane, e leng noha e bolotsana e ileng ea etsa hore a se mamele Molimo, hamorao o ile a bitsoa “noha ea pele, . . . e khelosang lefatše lohle leo ho ahiloeng ho lona.”—Tšen. 12:9.

Tlaleho ena ea Genese e bontša hore Satane ke motho ea qapang mashano e le hore a ka khelosa batho ba sa falimehang. Ha e le hantle, Eva o ile a inehela leqhekeng la hae la ho mo thetsa. Leha ho le joalo, ha rea lokela ho nahana hore Satane ke eena feela ea ka re khelosang. Bibele e boetse e re lemosa mabapi le kotsi ea ho ‘ithetsa ka monahano oa bohata.’—Jak. 1:22.

Taba ea hore re ka ithetsa e ka ’na ea bonahala e sa utloahale kapa ebile e le e ke keng ea etsahala. Leha ho le joalo, ho hlakile hore Molimo o fane ka temoso eo ka morero. Kahoo re tla be re etsa hantle haeba re nahana hore na re ka ithetsa joang le hore na ke monahano ofe oa bohata o ka re khelosang. Mohlala o thehiloeng Mangolong o ka re thusa.

Batho ba Ileng ba Ithetsa

Hoo e ka bang ka selemo sa 537 B.C.E., Cyruse e Moholo oa Persia o ile a ntša taelo ea hore Bajuda ba neng ba le kholehong Babylona ba khutlele Jerusalema ’me ba tsosolose tempele. (Esdr. 1:1, 2) Selemong se latelang, ho latela morero oa Jehova, batho ba ile ba rala motheo oa tempele e ncha. Batho ba neng ba khutlile ba ile ba thaba ba ba ba rorisa Jehova ka hore ebe o ne a hlohonolofalitse karolo ena e qalang ea mosebetsi ona oa bohlokoa. (Esdr. 3:8, 10, 11) Empa ho e-s’o ee kae, mosebetsi oa bona oa tsosoloso o ile oa hanyetsoa ’me batho ba ile ba nyahama. (Esdr. 4:4) Ka mor’a lilemo tse ka bang 15 ba khutlile, ba boholong Persia ba ile ba thibela mosebetsi oohle oa kaho o neng o etsoa Jerusalema. E le ho tiisa thibelo eo, ba boholong sebakeng seo ba ile ba fihla Jerusalema ’me “ba thibela [Bajuda] ka lihlomo.”—Esdr. 4:21-24.

Ha Bajuda ba ne ba tobane le tšitiso ena e khōlō, ba ile ba ithetsa ka monahano oa bohata. Ba ile ba ipolella ba re, “Nako ha e e-s’o fihle, nako ea hore ntlo ea Jehova e hahuoe.” (Hag. 1:2) Ba ile ba etsa qeto ea hore Molimo o ne a sa batle hore tempele e hahuoe hang-hang. Ho e-na le hore ba batle tsela ea ho phetha thato ea hae, ba ile ba nyahlatsa mosebetsi o halalelang eaba ba phathahana ka ho ntlafatsa matlo a bona. Moprofeta oa Molimo e leng Hagai o ile a ba botsa a sa hlathe koana le koana a re: “Na ke nako ea hore le lule matlong a lōna a manehiloeng ka mapolanka, ha ntlo ena [tempele ea Jehova] e le lesupi?”—Hag. 1:4.

Na u hlokomela seo re ithutang sona mohlaleng oo? Ho ba le pono e sa lokang ka nako eo merero ea Molimo e halalelang e tlang ka eona, ho ka etsa hore re hlokomolohe bohlokoa ba mesebetsi ea moea eaba re phathahana ka lithahasello tsa rōna. Ka mohlala, a re re u letetse baeti. Ha u ntse u emetse hore ba fihle seo se ka etsa hore u phathahane haholo ha u ntse u etsa mesebetsi e hlokahalang ea lelapa. Leha ho le joalo, ha nako e ntse e e-ea u fumana molaetsa oa hore baeti ba tla lieha ho fihla. Na u tla tlohella ho etsa litokisetso?

Leha ho le joalo, hopola hore Hagai le Zakaria ba ile ba thusa Bajuda hore ba utloisise hore Jehova o ne a ntse a batla hore tempele e hahuoe ntle ho tšenyo ea nako. Hagai o ile a ba phehella a re: “Le be matla, lōna batho bohle ba naha, . . . ’me le sebetse.” (Hag. 2:4) Ho ne ho hlokahala hore ba ntšetse pele mosebetsi, ba kholisehile hore moea oa Molimo o ne o tla ba tšehetsa. (Zak. 4:6, 7) Na mohlala oo o ka re thusa hore re qobe ho fihlela liqeto tse fosahetseng mabapi le letsatsi la Jehova?—1 Bakor. 10:11.

Ho Nahana ka Tsela e Hlaphohetsoeng ho E-na le ho ba le Monahano oa Bohata

Lengolong la moapostola Petrose la bobeli, o ile a bua ka kemiso ea Jehova ea ho tlisa “maholimo a macha le lefatše le lecha.” (2 Pet. 3:13) O ile a bolela hore basomi ba bang ba ne ba tsosa lipelaelo mabapi le hore na Molimo o ne a tla ke a kenelle litabeng tsa batho kapa che. Ka phoso ba ne ba pheha khang ea hore ha ho letho le neng le tla etsahala, ba re “lintho tsohle [li ne] li tsoela pele hantle feela joaloka ho tloha tšimolohong ea pōpo.” (2 Pet. 3:4) Petrose o ne a batla ho thibela menahano e joalo ea bohata. O ile a ngola a re: ‘Ka khopotso ke tsosa matla a lōna a hlakileng a ho nahana.’ O ile a hopotsa Bakreste-’moho le eena hore basomi bao ba ne ba fositse. Pele ho moo Molimo o ne a ile a kenella litabeng tsa batho ka hore a tlise moroallo o ileng oa timetsa lefatše lohle.—2 Pet. 3:1, 5-7.

Ka 520 B.C.E. Hagai o ile a fana ka keletso e tšoanang ho Bajuda ba neng ba nyahame ba bile ba le monyebe. O ile a ba eletsa a re: “Behang lipelo tsa lōna litseleng tsa lōna.” (Hag. 1:5) E le hore a tsose matla a bona a ho nahana, o ile a hopotsa barapeli-’moho le eena ka merero le litšepiso tsa Molimo mabapi le batho ba Hae. (Hag. 1:8; 2:4, 5) Hang ka mor’a hore a ba khothatse joalo, mosebetsi oa kaho o ile oa boela oa qala—ho sa tsotellehe lithibelo tsa molao. Bahanyetsi ba ile ba boela ba leka ho nyopisa mosebetsi oa ho haha, empa ba ile ba hlōleha. Thibelo e ile ea tlosoa, ’me tempele e ile ea phethoa ka lilemo tse hlano.—Esdr. 6:14, 15; Hag. 1:14, 15.

Ho Beha Lipelo Tsa Rōna Litseleng Tsa Rōna

Na u nahana hore ha mathata a hlaha re ka nyahama joaloka Bajuda ba mehleng ea Hagai? Haeba seo se etsahala, re ka ’na ra thatafalloa hore re lule re chesehela ho bolela litaba tse molemo. Empa ke eng e ka ’nang ea re nyahamisa? Ha e le hantle, re ka ’na ra sotleha ka lebaka la ho hloka toka ha tsamaiso ena ea lintho. Nahana ka Habakuke, ea ileng a botsa a re: “Ke tla hoeletsa halelele hakae ho uena ho kōpa thuso pefong, ’me u sa pholose?” (Hab. 1:2) Ka lebaka la seo ba bang ba ka ’nang ba nka hore ke tieho, Mokreste a ka ’na a lebala hore nako e se e lekane motinyane ebe ho e-na le hoo o hahamalla ho phela bophelo bo mabothobotho. Na u bona eka seo se ka u etsahalla? Haeba re ne re ka latela monahano oa mofuta oo, re ne re tla be re ithetsa. Ruri ke habohlokoa haholo hore re mamele keletso ea Mangolo ea hore ‘re behe lipelo tsa rōna litseleng tsa rōna’ le hore re ‘tsose matla a rōna a hlakileng a ho nahana’! Re ka ’na ra ipotsa, ‘Na taba ea hore tsamaiso ee e khopo ea lintho e nkile nako e telele ho feta eo ke neng ke e lebeletse e lokela ho ’makatsa?’

Nako eo Bibele e e Profetileng

Ak’u nahane ka mantsoe ao Jesu a ileng a a bua mabapi le qetello ea tsamaiso ena ea lintho. Tlaleho ea Mareka e buang ka boprofeta ba Jesu bo mabapi le matsatsi a ho qetela e bontša hore Jesu o ile a re eletsa ka makhetlo a mangata hore re lule re falimehile. (Mar. 13:33-37) Re fumana temoso e tšoanang tlhalosong ea boprofeta ea letsatsi le leholo la Jehova la Armagedone. (Tšen. 16:14-16) Ke hobane’ng ha re lemosoa ka makhetlo-khetlo hakaale? Likhopotso tse joalo lia hlokahala kaha ka lebaka la ho leta nako e ka bonahalang e le telele haholo, batho ba ba kotsing ea ho lebala hore nako e se e lekane motinyane.

Jesu o ile a etsa papiso e bontšang bohlokoa ba hore re tsoele pele re falimehile ha re ntse re letetse bofelo ba tsamaiso ena ea lintho. O ile a bua ka mong’a ntlo eo ntlo ea hae e neng e qhekelitsoe. A ka be a ile a etsa’ng e le hore a qobe ho utsoetsoa? A ka be a ile a lula a falimehile bosiu bohle. Jesu o ile a phethela papiso ena ka ho re eletsa tjena: “Le itokise, hobane Mor’a motho o tla tla ka hora eo le sa e nahaneng.”—Mat. 24:43, 44.

Papiso eo e bontša bohlokoa ba hore re ikemisetse ho leta, esita le ka nako e teletsana. Ho hang ha rea lokela ho ameha haholo ka hore ebe tsamaiso ena e khopo e ka ’na eaba e tsoetse pele ho feta kamoo re neng re lebeletse kateng. Ha rea lokela ho ithetsa ka monahano oa bohata oa hore ‘Nako ea Jehova ha e e-s’o fihle.’ Monahano o joalo o ne o ka etsa hore cheseho ea rōna ea ho bolela litaba tse molemo tsa ’Muso e tape.—Bar. 12:11.

Hlaola Monahano oa Bohata

Molao-motheo o ho Bagalata 6:7 oa sebetsa tabeng ea monahano oa bohata, ha o re: “Le se ke la thetsoa . . . Leha e le sefe seo motho a se jalang, o tla boela a se kotule.” Haeba tšimo e lula e sa lengoa, ho bonolo hore e tlale lehola. Ka tsela e tšoanang, haeba re sa tsose matla a rōna a hlakileng a ho nahana, monahano oa bohata o ka mela ka likelellong tsa rōna. Ka mohlala, re ka ’na ra ipolella hore, ‘Ha ho pelaelo hore letsatsi la Jehova lea tla—empa eseng hang-hang.’ Ha tsela eo re nahanang ka eona e fetoha joalo seo se ka etsa hore re etse mesebetsi ea ’Muso ka monyebe. Ha nako e ntse e e-ea, re ka ’na ra hlokomoloha kemiso ea rōna ea lintho tsa moea. Ka lebaka leo letsatsi la Jehova le ka tšoana la re hlaha lesumatha.—2 Pet. 3:10.

Leha ho le joalo, monahano oa bohata o ke ke oa mela ka likelellong tsa rōna haeba ka linako tsohle re ipakela e le rōna “thato ea Molimo e molemo le e amohelehang le e phethahetseng.” (Bar. 12:2) Ho bala Lentsoe la Molimo kamehla ke e ’ngoe ea litsela tse molemo tse ka re thusang ho etsa seo. Mangolo a ka matlafatsa kholiseho eo re nang le eona ea hore kamehla Jehova o nka khato ka nako e behiloeng.—Hab. 2:3.

Ha re ithuta, re rapela, re ba teng kamehla libokeng, re bolela litaba tse molemo, re bile etsa liketso tse bontšang mosa le lerato, seo se tla re thusa hore re ‘lule re hopola ho ba teng ha letsatsi la Jehova.’ (2 Pet. 3:11, 12) Jehova o tla hlokomela ho phehella ha rōna. Ha moapostola Pauluse a re hopotsa o re: “A re se keng ra tela ho etsa se setle, kaha ka nako e loketseng re tla kotula haeba re sa khathale.”—Bagal. 6:9.

Ha ho potang hore hona joale hase nako ea ho lumella hore monahano o fosahetseng o re thetse, ebe re nahana hore letsatsi la Jehova le chechiselitsoe morao. Ho e-na le hoo, ke nako ea hore re tiise lipelo tsa rōna, kaha letsatsi la Jehova le atametse.

[Setšoantšo se leqepheng la 4]

Hagai le Zakaria ba ile ba khothalletsa Bajuda hore ba hahe

[Setšoantšo se leqepheng la 5]

Mong’a ntlo o ne a tla etsa’ng haeba a ne a tseba hore lesholu lea tla?