Khaolo ea 10
Na U Rata ho Toba ’Nete Bophelong ba Hao?
1, 2. (a) ’Nete e ka re tsoela molemo joang? (b) U lumela hore mohloli oa sebele oo khotso ea ’nete le tšireletseho li tla tsoa ho oona ke ofe?
HO TSEBA ’nete ke hoa bohlokoa haholo. Ha e sebelisoa ka bohlale, e ka u sireletsa kotsing kapa tahlehelong ’me ea tlatsetsa thabong ea hao le tšireletsehong ea hao. Ho joalo haholo mabapi le ’nete e buang ka se tlelang moloko ona.
2 Leseling la se fanoeng bukeng ena, u ka ’na ua lumela hore motho a ke ke a tlisa khotso ea ’nete le tšireletseho. U ka ’na ua hlokomela hore seo Bibele e se buang ke ’nete—hore ke Molimo feela, ka ’Muso oa oona, o ka rarollang mathata a talimaneng le batho. Joale, na e ke ke ea e-ba bohlale ho bōpa tsela eo u phelang ka eona tumellanong le seo joale u tsebang hore ke ’nete? (Jakobo 1:22) Hoo ho akarelletsa eng?
3. Liphetoho tseo motho a tlamehang ho li etsa bophelong ba hae haeba a batla ho phela Tsamaisong e Ncha ea Molimo ke tsa bohlokoa hakae?
3 Bibele e thathamisa litekanyetso tse itseng tse tlamehang ho khahlametsoa ke bao Molimo o tlang ho ba amohela e le karolo ea Tsamaiso e Ncha ea oona ea ho loka. Litekanyetso tsena li hloka liphetoho hona joale bophelong ba e mong le e mong ea batlang ho phela ka nako eo. Ke ’nete, ponong ea botho, hase e mong le e mong eo ho nkoang hore tsela eo a phelang ka eona hona joale e mpe. Leha ho le joalo, ho fetohela litekanyetsong tsa Bibele ho akarelletsa pono e ncha ho hang bophelong. Ke ka lebaka leo Ba-Roma 12:2 e reng: “Le se ke la ipapisa le lefatše lena, le mpe le fetohe ka nchafalo ea kelello ea lōna, le tle le lemohe ho ratoang ke Molimo, hore na ke hofe, ho molemo, ho khahlehang, ho phethehileng.”
4. Haeba re tla fela re ‘tsamaee tseleng ea ’nete,’ re tlameha ho lekanyetsa se nepahetseng le se fosahetseng motheong ofe?
4 Phetoho e joalo e tla ama hore na re lekanyetsa ho nepahetseng le ho fosahetseng joang. Mohlomong nakong e fetileng re ne re itšetlehile ka maikutlo a ba bang kapa re ipeetse litekanyetso tsa rōna. Empa joale re hlokomela hore, ka liphello tse kotsi, ke pono eona ena e entseng hore Adama le Eva ba latole Molimo hore hase Morena oa bona. Haeba re batla ho amoheleha ho Molimo, re tlameha ho sheba ho oona bakeng sa litekanyetso tsa ’nete tsa se nepahetseng le se fosahetseng. Litekanyetso tseo li fumaneha habonolo Lentsoeng la Molimo, Bibele. Joalokaha Pesaleme ea 119:151 e re: ‘Litaelo tsa hae kaofela ke ’nete.’ Ka baka leo, ho lumellana le tsona ho bolela ‘ho tsamaea tseleng ea ’nete.’ (Pesaleme ea 86:11) Na seo hase sona seo u batlang ho se etsa?
Bohlokoa ba Keletso le Taeo
5. (a) Haeba re tla etsa liphetoho bophelong ba rōna, ke ’nete efe ka rōna ka borōna eo re tlamehang ho tobana le eona? (b) Ke eng e atisang ho thibela motho ho lumela phoso, hona ka phello efe?
5 Haeba motho a tla etsa liphetoho bophelong ba hae, o tlameha ho bona hore hoa hlokahala ho etsa joalo. Bibele e re, ‘ha ho motho ea sa sitoeng.’ (1 Marena 8:46) Leha ho le joalo, batho ba bangata ha ba utloisise ho lumela liphoso. Hobane’ng? Boikhohomoso bo ema tseleng ea bona. Ho e-na le hore ka boikokobetso ba amohele liphoso tsa bona, hangata ba jarisa batho ba bang molato. Hona ho mpefatsa bothata feela.
6. Taeo re lokela ho e batla mohloling ofe, hona hobane’ng?
6 Bothata bo boholo ka ho tšoanang ke hore ha rea phethahala ’me hase kamehla re lemohang tsela e loketseng e ka nkuoang. Re ka ba ra thetsoa ke ho nahana hore tsela e kotsi e lokile. (Liproverbia 16:25) Ka hona re hloka taeo e tsoang mohloling o phahametseng motho haeba ka mokhoa o tsitsitseng re tla nka bohato ka lithahasello tse molemo ka ho fetisisa tsa rōna le tsa batho ba bang. Liproverbia 3:11 e tsebahatsa Mohloli oo: “Mora oa ka, u se ke ua nyelisa taeo ea Jehova.”
7. (a) Taeo e tsoang ho Jehova e fihla ho rōna joang? (b) Ho amohela hoa rōna taeo e joalo le ho e sebelisa ho bontša eng ka rōna?
7 Jehova o fana ka taeo joang? Ka Lentsoe la hae, Bibele e Halalelang. Ka hona, ha re bala Bibele kapa ha molumeli oa habo rōna a re hlokomelisa ka keletso ea eona, ’me re ithuta hore ka tsela eitseng ha re finyelle se hlokoang, re amohela taeo ea Molimo. Ka ho amohela taeo eo e le e nepahetseng ’me re etsa ho hong ka eona, re paka hore re tobana le ’nete. Re amohela tokelo ea Molimo ea ho re tsamaisa ’me re bontša hore re batho ba mofuta oo o o batlang Tsamaisong e Ncha ea oona. E, bophelo ba rōna bo itšetlehile ka ho utloa taeo ea bomolimo!—Liproverbia 4:13.
8. (a) Ke hobane’ng ha re tla be re intša kotsi haeba re ikaketsa joaloka ba amohelang taeo empa ha e le hantle re sa fetola litsela tsa rōna? (b) Ke hobane’ng ha ho tšelisa ho tseba hore Jehova o-oa re bona kae le kae moo re leng teng?
8 Ka sebele, haeba re tla rua molemo taeong ea Molimo, re tlameha ho tšepahala ho rōna ka borōna. Ho ke ke hoa re tsoela molemo haeba re ikaketsa ha re talimiloe ke ba bang, e le hore feela re khutlele litseleng tsa rōna tsa pele ha batho ba sa re bone. Ho iketsa baikaketsi ho ne ho tla senya matsoalo a rōna feela. ’Me le hoja batho ba ka ’na ba re sheba ka ho re ananela, re ke ke ra thetsa ’Mōpi. Liproverbia 15:3 e-ea re bolella: “Mahlo a Jehova a linģalong tsohle, a qamaka ba babe le ba batle.” Ho tseba hore Jehova Molimo o shebelletse ho lokela ho re thibela ho etsa phoso. Le teng, re ka khothatsoa ke tiiso ea hore o shebile ka mohau “ba batle.”
“E Mong le e Mong a Bolele ’Nete ho oa Habo”
9. (a) Tabeng ea ho bua ’nete, ke eng e amohelehang e loketse lefatšeng? Hobane’ng? (b) Kahoo, haeba motho a tla ‘lesa ho ipapisa le lefatše lena,’ ho hlokahala phetoho efe?
9 Le hoja kajeno batho ba bangata ba sa ipolele hore ba latela Bibele ka thata-thata, ha ba inke ba sa tšepahale. Empa ke ba bakae ba buang ’nete ka mokhoa o tsitsitseng? Batho ba bangata ba tloaetse ho pata ’nete kapa hore ba bue feela seo ba lumelang hore se tla phetha litakatso tsa bona. Le hoja hona ho talingoa e le ho loketseng lefatšeng, ha ho ho etse ho nepahetseng. Lefatše la batho le ikarotseng ho Molimo “le rapaletse ka tlase ho e mobe.” “E mobe” eo, Satane Diabolose, ke “raleshano.” Leshano le qalile ka eena. (1 Johanne 5:19; Johanne 8:44, TLP) Ka hona, motho ha aa lokela ho makala ha a fumana hore ho hlokahala hore a etse phetoho e khōlō tabeng ea ho ba le ’nete haeba a tla tlohela ho “ipapisa le lefatše lena.”
10. Lebili le tšabehang la ho se tšepahale le sebetsa khahlanong le khotso ea ’nete le tšireletseho joang?
10 Ho na le lebaka le letle la ho tšepahala. Ha ho letho le senyang khotso le tšireletseho ho feta ho hlōleha ho tšepahala ka linako tsohle—lapeng, mosebetsing kapa khoebong, boikhathollong, le likamanong tsa boahisani. Ha batho ba sa phelele seo ba se buileng, ha ba thetsa kapa ba qhekella, ha ho ea ruang molemo. Mahlatsipa a ho se tšepahale a atisa ho hlonama le ho tlala khalefo. Ntle ho khatello maikutlong le kelellong, ho se tšepahale ho ka baka kotsi ’meleng le lona lefu. Ka mohlala, mosebetsi o entsoeng hampe, thepa e seng ntle, le lipolelo tsa bohata li tlatselitse likotsing tse mpe ka ho fetisisa. Motho ea nahanang hore o rua molemo ka ho se tšepahale hoa hae, o boetse o lahleheloa ka ho se tšepahale hoa ba bang. Le eena, o lefella thepa le litšebeletso haboima hobane basebetsi le bareki baa utsoa. Kahoo, ho se tšepahale ho etsa lebili le tšabehang. Ha batho ba eketsehileng ba etsana hampe, ho ata ho tsieleha, pefo, ho ntšana likotsi, le oona mafu.
11. Jehova o ikutloa joang ka ho se tšepahale le leshano?
11 Ha ho talingoa litholoana tse mpe joalo, ha ho makatse hore har’a lintho tseo ‘Jehova a li hloileng’ ke leshano, boeki, litekanyetso tsa bohata le sekala sa bohata. (Liproverbia 6:16-19; 20:23) Ba itloaelitseng leshano ba ke ke ba ba le kabelo ho hang mahlohonolong ao Molimo o a boloketseng ba o ratang. (Tšenolo 21:8) Na hona hase hoo re ka ho lebellang ho Molimo o lokileng? Haeba Molimo o ne o tla tsoela pele ho mamella ba ratang ho rua ka thetso ka ho qhekella ba ahisaneng le bona, motho o ne a ka ikutloa a sireletsehile joang Tsamaisong e Ncha ea Oona?
12, 13. (a) Bibele ka boeona e re’ng ka puo ea ’nete? (b) Ho tšepahala hoa rōna ho na le matla afe tabeng ea hore na re ka sebeletsa Jehova re le Lipaki tsa hae kapa che?
12 Ka baka leo, Bibele ha e-ea lokela ho nkoa habobebe ha e laela hore: “Bolelang ’nete e mong le e mong ho oa habo.” (Zakaria 8:16; Ba-Efese 4:25) Ka litšepiso kapa litumellano, “E,” ea rōna e lokela ho ba E, le “Che” ea rōna e be Che. (Jakobo 5:12) Haeba re batla ho emela “Jehova, Molimo oa ’nete” re tlameha ho tsitsa tabeng ea ho bua ’nete. (Pesaleme ea 31:5) Haeba motho a sa bolele ’nete, a ke ke a hlomphuoa ke Molimo kapa batho ba bang. Leha e le hore a ka emela Molimo joaloka e mong oa lipaki tsa Oona. Mopesaleme o itse: “Molimo o re ho molotsana: U etsa’ng, ha u bolela melao ea ka? Molomo oa hao o bolela selekane sa ka ke’ng . . . U lokollela molomo oa hao bobe, leleme la hao le loha thetso.”—Pesaleme ea 50:16, 19.
13 Empa ba bang ba ka ’na ba ipotsa: Na motho a ka ba le ’nete, a tšepahala a ba a ’na a atleha lefatšeng lee? Na a ka ‘tsoella’ haeba a sa etse se etsoang ke ba bang kaofela?
Molimo o Hlokomela ba Sebelisang ’Nete
14. Bibele e re thusa joang ho ananela hore ho bonolo ho phela ntle ho ho se tšepahale?
14 Ho bolela hore motho a ke ke a phela ntle ho hore a etse bolotsana e ka ba ho bolela hore Molimo ha o tsotelle ba o ratang. Empa hona ho hanana le phihlelo ea bahlanka ba Molimo ka lilemo tse likete-kete. (Ba-Heberu 13:5, 6) Mopesaleme Davida o ile a hlokomela: “Nkile ka ba mocha, ’me joale ke tsofetse; empa ha ke e-so ho bone ea lokileng a tloheloa, leha e le litloholo tsa hae li sikila bohobe.” (Pesaleme ea 37:25) Hona ha ho bolele hore batho ba lokileng ha ba fete har’a mathata. Davida ka boeena o ne a ile a qobelloa hore ka nakoana a phele e le mophaphathehi. Empa o ne a e-na le tse hlokahalang bophelong.
15. Jesu o itse’ng ka thahasello ea Molimo ho fumaneng hoa rōna lintho tse bonahalang hore re phele?
15 Borapeli ba ’nete ha bo ipiletse ka lintho tse bonahalang. Leha ho le joalo, Jesu o ile a ruta balateli ba hae hore hoa tšoaneleha ho rapella tlhohonolofatso ea Molimo boitekong ba bona ba ho fumana “bohobe . . . bo lekanang letsatsi.” (Luka 11:2, 3) A hlokomela litlhoko tsa bona bakeng sa bophelo, a tiisetsa barutuoa ba hae hore: “Ntat’a lōna ea maholimong o tseba hoba le hloka lintho tseo tsohle.” Empa a ba phehella: “Le mpe le batle ’muso oa Molimo le ho loka ha oona pele; ’me lintho tseo tsohle le tla li ekeletsoa.” (Mattheu 6:25-34) Na u-ua ho lumela hoo? Haeba ho joalo, u ke ke ua lekoa ke hore u lahle litekanyetso tse lokileng tsa Molimo feela hobane batho ba bang ba li lahla. Ho e-na le hoo, u tla ananela bohlale ba se tlalehiloeng ho 1 Timothea 6:6-8, e reng: “Borapeli, ha bo e-na le ho kholoa ha pelo, ke leruo le leholo. Hobane ha rea ka ra tlisa letho lefatšeng, ’me hoa bonahala hoba re sitoa ho ea le letho, ha re le tlohela. ’Me ha re e-na le lijo le liaparo, a re kholoeng ke tsona.”
16. Ho sebelisa melao-metheo ee ea Mangolo ho ka re sireletsa joang?
16 Ho latela keletso ena ho hloka pono e fapaneng ho hang le se tloaelehileng lefatšeng kajeno. Hona, he, ho boetse ho ameha ho ‘nchafatseng mehopolo ea rōna.’ Ho khotsofalla litlhoko tsa bophelo ho thibela ho etsa telekiso ea chelete le lintho tse bonahalang sepheo se seholo bophelong le ho thibela moleko oa ho ikatlehisa ka batho ba bang ho fumana lintho tsena. (Liproverbia 28:20; Mattheu 6:24; 1 Timothea 6:9, 10) Ba fetolang maruo pakane ea bona mohlomong ba nahana hore a emela tšireletseho le thabo. Empa ho e-na le hoo, ho joalokaha Bibele e bolela, “ea ratang silevera, silevera e ke ke ea mo khorisa; ea ratang ho phela ka nala, le eena a ke ke a hola ka eona.” (Moeklesia 5:10) Ba nang le ho hongata ba batla ho eketsehileng. Hangata ba tela bophelo ba ’mele ea bona le bophelo ba malapa a bona hore ba li fumane. Ho e-na le ho ikutloa ba sireletsehile, ba phela ka tšabo ea ho lahleheloa ke seo ba nang le sona.
17. (a) Ha motho a bea pelo ea hae ho fumaneng leruo le bonahalang, o hlokomoloha ’nete efe? (b) Ho na le bopaki bofe ba hore ho molemo ho sebelisa melao-metheo ea botšepehi ho fumana tsa bophelo?
17 Motho ea lelekisang leruo ha a tobane le ’nete ea seo Jesu a se boletseng, “bophelo ba motho bo ke ke ba tsoa bongateng ba lintho tseo a li ruileng, leha li mo atetse haholo.” (Luka 12:15) Ho molemo ka ho fetisisa ho bea tumelo matleng a Molimo a ho lokisetsa bahlanka ba oona. Linaheng tse fetang 200 har’a Lipaki tsa Jehova tse limillione, ho na le bopaki bo phelang ba hore Molimo o fela o etsa tokisetso e joalo. Tlas’a puso ea mefuta eohle, le khiro e tšoanelehang ea mefuta eohle, Lipaki tsa merabe eohle le limelo tsohle li khona ho phela bophelo bo thabileng, li fepetsoe ka seo li se hlokang. Tumelo ea tsona matleng a Molimo a ho fana, leha ho bonahala botšepehi bo ba ema hampe, e ile ea putsoa. Li iphumanetse tlhompho ea batho ba bang, ’me hangata ho nkoa tsona bakeng sa mosebetsi hobane batho ba sa ntsane ba batla ho sebelisana le ba tšepahalang. Empa hoa bohlokoa haholo ke hore ba khabane ba thabela letsoalo le hloekileng ka lebaka la botšepehi ba bona.
18, 19. (a) Ke hobane’ng ha batho baa ba fetotse bophelo ba bona ho lumellana le litekanyetso tsa Molimo? (b) Molimo o batla batho ba mofuta ofe hore o ba bolokele ho kena Tsamaisong e Ncha ea oona?
18 Pele e e-ba Lipaki tsa Jehova, ba ne ba nyallana hantle le mokhoa oa lefatše ka tekanyo e khōlō kapa e nyenyane. Empa ho ithuta Bibele le ho tobana le ’nete ea eona ho ile hoa ba etsa hore ba lahle mekhoa e mebe. Joale ba loana ka thata hore ba bonahatse “botšepehi bo botle, ba tle ba hlophise thuto ea Molimo, ’Moloki oa rōna, nthong tsohle.” (Tite 2:10) Ha hoa ba bonolo kamehla ho bona ho tobana le ’nete le ho etsa liphetoho bophelong ba bona. Empa ho rata ’nete ho ba thusitse hore ba nke bohato tumellanong le eona.
19 Na u na le lerato le joalo bakeng sa ’nete? Haeba ho joalo, u motho oa mofuta oo Molimo o mo batlelang ho mo boloka a phela Tsamaisong e Ncha ea oona. Hore u amoheloe ke Molimo, ‘u tlameha ho rapela ka moea le ka ’nete.’ (Johanne 4:24) Hona ho tla u tšoaea u le ea fapaneng le lefatše le u potolohileng. Hape ho na le litsela tse ling tseo u tlamehang ho fapana le lefatše ka tsona haeba u tla khahlisa Jehova. Ke life?
[Setšoantšo se leqepheng la 113]
Na motho a ka ba le ’nete, a tšepahala a ba a tsoella licheleteng lefatšeng lee?