Khaolo ea 9
Khotso le Tšireletseho Lefatšeng Lohle—Tšepo e Nang le ’Nete
1, 2. Ke maemo afe a profetiloeng ka Bibeleng, a tla etsa hore lefatše lee e be sebaka se nyakallisang ka ho fetisisa ho phela ho sona?
LEFATŠE lena e ka ba sebaka se monate le se thahasellisang ka ho fetisisa seo ho ka pheloang ho sona haeba kannete maemo a khotso le a tšireletseho a busa hohle. Le hoja le le hole le hoo hona joale, Bibele e profeta hore lefatše le tla fetoha lehae le babatsehang leo ho lona lelapa la motho le tla thabela bophelo ka ho feletseng.
2 Hantle-ntle Bibele e tšepisa eng? Re ka tiisa joang hore hoo ho tla phethahatsoa?
Motheo o Tiileng Bakeng sa Tšepo
3, 4. (a) Re ithuta eng ho tšepahaleng hoa melao ea motheo e laolang bokahohle? (b) Moetsi oa melao eo ke mang, ’me kahoo ke eng hape eo re nang le lebaka le letle la ho bea tšepo ea rōna ho eona?
3 Bokahohle bo laoloa ke melao eitseng ea motheo. Boholo ba eona ha re nahane le ka eona. Ho chaba le ho likela hoa letsatsi, likarolo tsa khoeli, le linako tsa selemo lia tla li be li ikele ka mokhoa o tlatsetsang botsitsong ba bophelo ba batho. Batho ba etsa lialmanaka ’me ba rera liketso tsa bona lilemo pele ho nako. Baa tseba hore ho tsamaea hoa letsatsi, khoeli, le mafatše a potolohang letsatsi hoa tšepahala. Re ka ithuta eng ho see?
4 Moetsi oa melao eo o tšepahala ka ho feletseng. Re ka itšetleha ka seo a se buang le seo a se etsang. Ke ka lebitso la hae, joaloka ’Mōpi oa leholimo le lefatše, Bibele e tšepisang tsamaiso e ncha ea ho loka. (Esaia 45:18, 19) Bophelong ba rōna ba letsatsi le letsatsi, hangata re itšetleha ka tekanyo eitseng ka batho ba bang—ba tlisang lijo ’marakeng, ba tlisang poso, le metsoalle e haufi-ufi. Na joale ha ho utloahale hore, re ka bea tšepo e kholoanyane ho Molimo le ho phethahaleng ho tiileng hoa litšepiso tsa oona?—Esaia 55:10, 11.
5. Ho haelloa ke sepheo leha e le sefe sa boithati ho seo Molimo o se tšepisitseng ho re nea tumelo joang?
5 Le hoja hangata litšepiso tsa batho li sa tšepahale, litšepiso tsa Molimo li tšepahala ka ho feletseng ’me li molemong oa rōna, e seng oa oona. Le hoja Molimo o sa hloke letho ho rōna, o thabisoa ke ba lumelang ho oona hobane ba o rata le litsela tsa oona tse lokileng.—Pesaleme ea 50:10-12, 14.
6. Bibele e re thusa hore re be le tumelo ea mofuta ofe?
6 Hape, Bibele e ipiletsa monahanong oa rōna. Ha e hloke tumelo e sefofu kapa e se nang mabaka. Ha e le hantle, e hlalosa tumelo ea ’nete e le “tšepiso e tiileng ea lintho tse lebeletsoeng, . . . pontšo e kholisang ea tse sa bonoeng.” (Ba-Heberu 11:1) Ka Bibeleng, Molimo o re nea motheo o tiileng oa tumelo. Ho utloahala hoa motheo oo ho hlaka haholoanyane ha re ntse re hōla tsebong ea Lentsoe la Molimo ’me re bona ’nete ea lona e sebetsa bophelong ba rōna le phethahatsong ea boprofeta ba lona.—Pesaleme ea 34:8-10.
7. Ha re hlahloba litšepiso tsa Bibele tsa mahlohonolo a kamoso ha rea lokela ho lebella hore ho re hloke eng?
7 Litšepiso tsa Bibele tsa mahlohonolo a kamoso li fetela ka nģane ho seo motho a ka ratang ho fana ka sona. Empa litšepiso tseo ha li re hloke hore re lumele lintho tse hananang le phihlelo ea botho. Leha e le hore li hanana le litakatso tse tloaelehileng tsa botho. Nahana ka a mang a mahlohonolo ana a maholo ’me u bone hore na hona ke ’nete joang.
Lefatše le Fetoha Lehae la Tšimo
8, 9. (a) Lentsoe “paradeise” le lokela ho fetisetsa khopolo efe likelellong tsa rōna? (b) Na ntho e joalo e kile ea e-ba teng lefatšeng? (c) Ke eng e bontšang hore ke morero oa Molimo hore Paradeise e be lefatšeng ka bophara?
8 Lentsoe “paradeise” le tsoa mantsoeng a tšoanang a neng a sebelisoa mehleng ea boholo-holo (par·desʹ ka Seheberu; pai·ri·daeʹza ka Sepersia; pa·raʹdei·sos ka Segerike), mantsoe a neng a sebelisoa ho hlalosa lintho tse neng li hlile li le teng lefatšeng ka nako eo. Mantsoe ana kaofela a na le mohopolo oa sehlooho oa serapa se setle sa lifate le lipalesa kapa serapa se kang sa lifate le lipalesa. Joaloka mehleng ea boholo-holo, le kajeno, ho na le libaka tse ngata tse joalo, tse ling tsa tsona e le lirapa tse khōlō haholo tsa lifate le lipalesa. ’Me motho ka tlhaho o laba-labela botle ba tsona. Bibele e tšepisa hore ho tla letsatsi leo ka lona lefatše lena lohle e tlang ho ba serapa se joalo sa lifate le lipalesa kapa paradeise!
9 Ha Molimo o bōpa batho ba babeli ba pele o ile oa ba nea tšimo ea Edene, lebitso le bolelang “Paradeise ea Thabo,” hore ebe lehae la bona. Empa Paradeise e ne e sa lokela ho lekanyetsoa sebakeng se le seng feela. Molimo oa re ho bona: “Ngatafalang, le ate, le tlale lefatšeng, le rene holim’a lona.” (Genese 1:28; 2:8, 9) Hona ho ne ho tla akarelletsa ho atolosetsa meeli ea Paradeise lipheletsong tsa lefatše, e leng morero o boletsoeng oa Molimo o sa kang oa felisoa ka ho se utloe hoa Adama le Eva. Jesu Kreste ka boeena o bontšitse tšepo morerong ona ha a tšepisa monna ea ileng a shoela ka thōko ho eena hore o tla ba le monyetla oa ho phela Paradeiseng e joalo ea lefatše. (Luka 23:39-43) Hona ho tla etsahala joang?
10. Ho latela Tšenolo 11:18, Molimo o tšepisa ho tlosa litšitiso life tsa Paradeise?
10 “Mahlomoleng a maholo” a tlang Molimo o tla tlosa litšitiso tsohle tsa Paradeise ea oona e tlang ea lefatše ka ho “senya ba senyang lefatše.” (Tšenolo 11:18) Kahoo Molimo o tla etsa seo mebuso ea batho e ke keng ea se etsa le ka mohla. O tla tlosa bohle bao ka boithati ba silafatsang lefatše ho khotsofatsa meharo ea khoebo, bohle ba loanang lintoa tse senyang, le bohle ba sebelisang lefatše hampe ka lebaka la ho haelloa ke tlhompho bakeng sa limpho tse ngata-ngata tseo Molimo o faneng ka tsona.
11. (a) Ke ketsahalo efe ea histori e bontšang hore ho tsosolosoa hoa Paradeise lefatšeng ha ho hanane le phihlelo ea botho? (b) Hona ho tiisa tumelo ea rōna tlhohonolofatsong efe e tšepisitsoeng?
11 Lefatše lohle joale le tla tlōkōma ke botle. Joale moea, metsi, le naha, li tla hlaphoheloa le ho hloeka. Tsosoloso ena ea Paradeise hase ntho eo motho a ka sitoang ho e lumela, kapa hona hore e hanana le phihlelo ea botho. Lilemong tse fetileng tse makholo-kholo, ha sechaba sa Iseraele se khutla botlamuoeng Babylona, Jehova Molimo o ile a se tsosolosetsa naheng ea habo sona, eo ka nako eo e neng e le lesupi. Empa, ka lebaka la ho hlohonolofatsoa ke Molimo, le mosebetsi oa sona, naha ea potlakela ho ntlafala hoo batho ba ahisaneng le bona ba neng ba ka tsota: “Le fetohile le ka tšimo ea Edene!” Hape la bea haholo, le tlosa tšoso leha e le efe ea tlala le ho lapa. (Ezekiele 36:29, 30, 35; Esaia 35:1, 2; 55:13) Seo Molimo o ileng oa se etsa ka nako eo, se bontšitse hanyenyane feela seo o sa ntsaneng o tla se etsa lefatšeng lohle ho phethahatsa litšepiso tsa oona. Batho bohle ba nkoang e le ba tšoanelehang hore ba ka phela ka nako eo, ba tla thabela menyaka e lokiselitsoeng ke Molimo ea bophelo Paradeiseng.—Pesaleme ea 67:6, 7; Esaia 25:6.
Qetello ea Bofuma le Bokhoba ba Moruo
12. Ke maemo afe a moruo le a mosebetsi a tlamehang ho phekoloa haeba re tla thabela bophelo ka sebele?
12 Bofuma le bokhoba litsamaisong tsa sechaba tsa moruo ke lintho tse tsebisahalang lefatšeng ka bophara. Paradeise e ne e ke ke ea thabeloa ka sebele haeba ba limillione ba ne ba tla ’ne ba sehle ho kolla ntsi hanong kapa ba sebetsa mosebetsi o tenang o etsang motho karoloana e sa ikutloeng ea mochine o moholo.
13-15. (a) Ke hokae moo re fumanang mohlala oa histori o re bontšang hore na thato ea Molimo ke efe bakeng sa motho ntlheng ee? (b) Tokisetso eo e ile ea tlatsetsa joang tšireletsehong le ho thabeleng bophelo tsa motho ka mong le lelapa?
13 Thato ea Molimo bakeng sa motho ntlheng ena e bonoa ka tsela eo o ileng oa tsamaisa litaba tse joalo Iseraeleng ea boholo-holo. Moo, lelapa ka leng le ne le amohela sebaka e le lefa. (Baahloli 2:6) Le hoja lefa lena le ne le ka ’na la rekisoa, ’me batho ka bomong ba ne ba ka ’na ba ithekisa bohlankeng haeba ba oela melatong, Jehova o ne a ntse a entse litokisetso tsa ho sireletsa hore batho ba se ipokelle ka libaka tse ngata kapa ba be bohlankeng ba nako e telele. Joang?
14 Ka litokisetso tsa moruo Molaong oo a o fileng batho ba oona. Selemo sa bosupa sa bohlanka e ne e le ‘selemo sa teselo’ ha Moiseraele ofe kapa ofe ea bokhobeng a tlameha ho lokolloa. Hape, selemo se seng le se seng sa bo50 e ne e le selemo sa “Jubile” bakeng sa sechaba sohle, selemo sa ho “tumisa tokoloho” ho baahi bohle ba eona. (Deuteronoma 15:1-9; Levitike 25:10) Joale sebaka leha e le sefe sa lefa se neng se rekisitsoe se ne se khutlisetsoa ho mong a sona. Bohle ba bohlankeng ba ne ba lokolloa, le haeba mohlomong lilemo tse supileng li e-s’o ho fete. E ne e le nako ea hore malapa a kopane hape ka thabo le ea ho qalisa bophelo bo bocha moruong. Kahoo, ho ne ho se libaka tse ka rekisetsoang ruri. Ho rekisoa hoa tsona, ha e le hantle, e ne e le kalimo feela e tla fela ka selemo sa Jubile, haeba nako e bile telele.—Levitike 25:8-24.
15 Sena sohle sa tlatsetsa botsitsong ba moruo oa sechaba le tšireletsehong le khotsong ea lelapa ka leng. Ha melao ena e ne e bolokoa, sechaba se ne se thibeloa hore se ka oela sebopehong se bohloko seo re se bonang kajeno linaheng tse ngata hakana moo borui bo fetisisang le bofuma bo fetisisang li khemang hammoho. Melemo ho motho ka mong e ne e matlafatsa sechaba, hobane ho ne ho se bao ho hlokahalang hore ba be fatše ’me ba thumakanngoe ke maemo a mabe a moruo. Joalokaha ho tlalehiloe nakong ea puso ea Morena Salomone, “Ba-Juda le ba-Iseraele, . . . ba ne ba lutse ba iketlile, e mong le e mong tlas’a morara oa hae le tlas’a feiga ea hae.” (1 Marena 4:25) Kajeno ba bangata ba ke ke ba sebelisa litalenta tsohle tsa bona le boikhathatso bohle ba bona hobane ba tšoasitsoe litsamaisong tsa moruo tse ba qobellang ho sebeletsa litakatso tsa ba seng ba kae kapa mohlomong tsa motho a le mong feela. Tlas’a melao ea Molimo, motho ea mahlaha-hlaha o ne a thusoa hore a tlatsetse ka bohlale ba hae boiketlong le thabong tsa bohle. Hona ho re nea pontšo ea boikutlo ba ho tšoaneleha hoa botho le ba ho ba le seriti tseo ba fumanang bophelo Tsamaisong e Ncha ea Molimo ba tlang ho li thabela.
16. Mabapi le maemo a bophelo le boemo ba motho ba moruo, ’Muso oa Molimo o tla lokisetsa eng bakeng sa bafo bohle ba oona?
16 Lefatšeng ka bophara ho tla phethahatsoa ka ho babatsehang boprofeta ba Mikea 4:3, 4. Batho ba ratang khotso ba phelang tlas’a puso ea ho loka ea Molimo ba tla “lula e mong le e mong ka tlas’a feiga ea hae le ka tlas’a morara oa hae, ho se ea ba tšosang, hobane molomo oa Jehova oa makhotla o boletse.” Ha ho lea mong ho bafo ba ’Muso oa Molimo ea tla phela mek’huk’hung kapa “litakaneng” tse petetsaneng. Ba tla ba le litša tsa bona le matlo a bona. (Esaia 65:21, 22) Morena, Kreste Jesu, khale a tšepisitse hore ‘ba bonolo ba tla ja lefa la lefatše,’ ’me o “neiloe borena bohle leholimong le lefatšeng” ho bona hore hona hoa etsahala.—Mattheu 5:5; 28:18.
Bophelo le ho Phela Hantle ’Meleng Halelele
17-19. (a) Ke eng e bontšang hore ho phela hantle ’meleng le ho phela halelele ke litakatso tsa tlhaho tsa batho? (b) Ke linnete life ka bophelo ba motho le ka limela tse etsang hore nako e khutšoaane e pheloang ke motho e bonahale e makatsa? (c) Boko ba motho bo na le eng e bontšang hore hoa utloahala ho lumela hore motho o ne a etselitsoe ho phela ka ho sa feleng?
17 Leha ho le joalo, ha ho le bo bong ba maemo ana a matle, bo ka etsang hore bophelo e be bo nang le khotso le tšireletseho kannete hafeela ho kula, botsofali, le lefu li sirile bokamoso. Na ke ho sa utloahaleng kapa ke ho hananang le phihlelo ea tlhaho ea botho ho tšepa hore ho tla lokolohuoa linthong tsee tse tepeletsang? Ka sebele ha ho hanane le tlhaho ea motho ho batla sena, hobane batho ba ’nile ba qeta bophelo bohle ba bona le chelete e ngata ba leka ho se finyella.
18 Kahoo, tšepo ea ho phela hantle ’meleng le ho phela halelele ke e utloahalang. Ho hlileng ho sa utloahaleng ke hona: Hang feela ha batho ba fihla lilemong tseo ho tsona ba qalang ho rua tsebo, phihlelo, le matla a ho etsa lintho tsa bohlokoa, ba qala ho tsofala, ’me qetellong baa shoa. Empa, ho na le lifate tse phelang lilemo tse likete! Ke hobane’ng ha motho, ea entsoeng ka setšoantšo sa Molimo, a phela karoloana feela ea nako e pheloang ke limela tse itseng tse seng bohlale? Ka ho utloahalang, na a ke ke a phela halelele haholo ho feta moo?
19 Ho litsebi tsa botsofali, e ntse e le pharela e khōlō hore na bo etsahala joang. Pharela e ’ngoe ke ’nete ea hore boko ba motho bo etselitsoe hore bo nke boitsebiso bo bongata haholo. Joalokaha sengoli ho tsa mahlale se itse, boko bo “ka khona ho jara ka ho phethahetseng thuto leha e le efe le mohopolo leha e le ofe tseo batho ba ka li kenyang ho bona—le hona e le ka makhetlo a libillione ho feta moo.”55 Hoo ho bolela hore boko ba hao ha bo khone ho jara feela boima leha e le bofe boo u ka bo jarisang bona bophelong ba lilemo tse 70 kapa tse 80 empa hape le ka makhetlo a mang a likete tse limillione ho feta moo! Hase feela motho a nyoreloang tsebo hakana-kana, takatso e kana-kana ea ho ithuta ho etsa le ho finyella lintho. Leha ho le joalo o thibeloa ke bophelo ba hae bo bokhutšoaane. Na hoa utloahala hore matla a maholo a boko ba motho a be teng e be leha ho le joalo ha ho sebelisoe leha e le karoloana e nyenyane feela ea matla a bona? Na ha ho utloahale haholoanyane ho fihlela qeto ea hore, joalokaha Bibele e bolela, Jehova o entse motho hore a phele ka ho sa feleng lefatšeng ’me a mo nea boko bo tšoanelang morero oo ka ho babatsehang?
20. Bibele e re’ng eo Molimo o tšepisitseng hore o tla e etsetsa batho mabapi le liphello tsa sebe, ho akarelletsa le lefu?
20 Bibele e bontša hore tšimolohong motho o ne a e-na le monyetla oa ho phela ka ho sa feleng, oa mpa oa mo lahlehela ka lebaka la borabele: “Sebe se kene lefatšeng ka motho a le mong [Adama], ’me lefu le kene ka sebe, ka mokhoa o joalo lefu le aparetse batho bohle, kahobane ba sitiloe bohle.” (Ba-Roma 5:12) Empa Bibele e boetse e na le tšepiso ea Molimo ea hore Paradeiseng e tsosolositsoeng, “lefu ha le sa tla hlola le e-ba teng; ’me ha ho sa tla ba masoabi, leha e le ho bokolla, kapa bohloko.” (Tšenolo 21:3, 4; bapisa 7:16, 17.) E bolela hore bophelo bo sa feleng, bo lokolohileng liphellong tsa sebe, ke morero oa Molimo bakeng sa batho. (Ba-Roma 5:21; 6:23) Ho feta mona, e tšepisa hore mahlohonolo a Tsamaiso e Ncha ea Molimo a tla bulehela ba libillione ba shoeleng nakong e fetileng. Joang? Ka tsoho e tlang ho horula lebitla le tloaelehileng la batho. Jesu ka tšepo o profetile: “Nako ea tla, eo bohle ba mabitleng ba tla utloa lentsoe la hae; ’me ba tla tsoa ho ’ona.”—Johanne 5:28, 29.
21, 22. Ke hobane’ng ha tebello ea ho khutlisetsoa bophelong bo feletseng e se tšepo e feteletseng?
21 Kajeno thuto ea tsa mahlale bongakeng e khona ho hlahisa “lithethefatsi tsa mohlolo” ’me e etsa mesebetsi ea ho buoa e neng e ka bonahala e ke ke ea etsahala le lilemong tse mashome a seng makae tse fetileng. Na re lokela ho belaela hore Ea bōpileng batho a ka etsa lintho tse tsotehang ho feta moo tsa ho phekola? Ka sebele, ’Mōpi o na le matla a ho khutlisetsa batho ba lipelo li lokileng bophelong bo hlasimolohileng, a bile a etsolla le ho tsofala. ’Me hona a ka ho etsa a sa sebelise lithethefatsi, ho buoa, kapa litho tsa maiketsetso. Ka ho nahanela, Molimo o fane ka bopaki ba hore mahlohonolo a joalo hase tšepo e feteletseng.
22 Ha Mora oa oona a le lefatšeng, Molimo o ile oa mo nea matla a hore a etse mesebetsi e meholo ea ho phekola. Mesebetsi ena e re tiisetsa hore ha ho bofokoli, kapa boloetse le kholofalo tse phahametseng matla a Molimo a ho phekola. Ha monna eo nama ea hae e neng e tletse lepera a kōpa Jesu hore a mo phekole, Jesu ka qenehelo a ama monna eo ’me a re: “U ntlafale.” ’Me, joalokaha tlaleho ea histori e bolela, ‘lepera la hae la fola hang.’ (Mattheu 8:2, 3) Jesu o entse lintho tse joalo moo ho bonang lipaki tse ngata, joalokaha rahistori Mattheu a tlaleha: “Matšoele a mangata a tla ho eena, a tlisa lihlotsa, le lifofu, le limumu, le lihole, le ba bang ba bangata; ba ba bea maotong a Jesu, ’me a ba folisa. Eaba bongata boo boa makala, . . . ’me ba rorisa Molimo oa Iseraele.” (Mattheu 15:30, 31) Ipalle tlaleho e ho Johanne 9:1-21 ho bona hore na tlaleho e tsebisahalang ea lipheko tse joalo ke ea ’nete e nang le mabaka le e utloahalang hakae. Bonnete ba liketsahalo tsena bo pakoa ke lipaki tse ngata, ho akarelletsa ngaka, ngaka Luka.—Mareka 7:32-37; Luka 5:12-14, 17-25; 6:6-11; Ba-Kolosse 4:14.
23, 24. Ke hobane’ng ha ho utloahala ho lumela hore bafu ba tla khutlisetsoa bophelong tlas’a ’Muso oa Molimo?
23 Ka mabaka a tšoanang, ha ho hlokahale hore re talime tšepiso ea Bibele e le e ke keng ea lumeloa ha e re “tsoho ea bafu e tla ba teng.” (Liketso 24:15) E se e le lilemo motho a shoele, lentsoe la hae, ponahalo ea hae, le liketso li ka tsosoa ka filimi kapa theipi ea video. Na Ea bōpileng motho, ea tsebang kaheho ea liathomo le likarolo tse nyenyane ka ho fetisisa tsa motho, a ke ke a etsa ho fetang hoo hole? Li-computer tse entsoeng ke motho li ka boloka tsa ba tsa hokahanya boitsebiso bo likoto-koto tse libillione. Empa Molimo o entse bokahohle bo tšosang ka lihlopha tse libillione (likete tsa limillione) tsa linaleli, sehlopha ka seng se e-na le linaleli tse libillione. Hoo ho etsa palo-khōlō ea litrillione, likoatrillione, le ho feta moo! Empa, Pesaleme ea 147:4 e re: “O lekanya palo ea linaleli, o li rea mabitso kaofela”! Ka sebele ho ka ba bonolo bakeng sa Molimo, o nang le mohopolo o moholo hakaalo, hore o hopole botho ba batho ka bomong e le hore o ka ba tsosetsa bophelong.—Jobo 14:13.
24 Hape, Jehova o fane ka mehlala ea histori ho matlafatsa tumelo ea rōna tšepong e tsotehang joalo. O ile a fa Mora oa hae matla a ho bontša hanyenyane feela seo a tlang ho se etsa haholoanyane nakong ea puso ea hae ea ho loka holim’a lefatše. Jesu o ile a tsosa batho ba ’maloa ba shoeleng, hangata e le moo ho shebelletseng batho ba bangata. Lazaro, eo a ileng a mo tsosa haufi le Jerusalema, e ne e le nako e telele a shoele hoo setopo sa hae se neng se se se qalile ho bola. Ka sebele tšepo ea tsoho e na le motheo o utloahalang.—Luka 7:11-17; 8:40-42, 49-56; Johanne 11:38-44.
Matla a Lefatše a ho Jara Baahi ba Bakaalo
25, 26. Ha bafu ba tsosoa, sebaka se tla fumaneha hokae bakeng sa hore e mong le e mong a phele?
25 Na lefatše lee le ka fana ka sebaka sa bolulo bo mofuthu bakeng sa baahi ba kang ba tla ba teng ka tsoho ea bafu? Ho nkile lilemo tse 5 000 hore baahi ba lefatše ba be billione mathoasong a bo-1800. Kajeno, ba ka ba libillione tse hlano.
26 Ka lebaka leo, ba phelang kajeno ke karolo e kholoanyane ea palo-khōlō ea batho ba kileng ba phela. Ba bang ba hakanya hore baahi ba bileng teng historing eohle ea motho e ka ba batho ba 15 000 000 000. Sebaka se mobu sa lefatše se feta lihekthare tse 15 000 000 000 (liakere tse 36 000 000 000). Sebaka seo se ka lumella motho a le mong a be le sebaka se fetang hekthare (liakere tse 2). Sena se ke ke sa fana feela ka sebaka sa ho lema lijo empa hape se ka fana ka sebaka bakeng sa meru, lithaba, le libaka tse ling tse bohehang—Paradeise e sa petetsoe ntle ho mabaka. Joale, hape, Bibele e bontša hore hase bohle ba phelang hona joale ba tla pholoha e be ba phela Tsamaisong eo e Ncha. Ka sebele, Jesu o itse, “Monyako oa timelo o hebe-hebe, le tsela e eang teng e phatlaletse, ’me ba kenang teng ba bangata.” O boetse a hlokomela hore ha timetso ea lefatše e e-tla, ba sa etseng thato ea Jehova ba tla “ea bohlokong bo sa feleng.”—Mattheu 7:13; 25:46.
27. Na lefatše le ka bea lijo tse lekaneng bakeng sa batho bao bohle?
27 Empa na lefatše le ka bea lijo tse lekaneng bakeng sa batho ba bangata hakaalo? Bo-ramahlale ba bolela hore le tlas’a maemo a hona joale, le ka ho etsa. Tlaleho ea Toronto Star e ile ea hlokomela: “Ho latela Mokhatlo oa Machaba a Kopaneng oa Lijo le Temo lefatšeng lohle hona joale ho lengoa lijo-thollo tse lekaneng ho fepa ka letsatsi motho e mong le e mong litekanyetso tsa matla tse tsoang lijong tse 3 000, e leng . . . hoo e ka bang karolo ea 50 lekholong ka holimo ho se amohelehang hona joale.”56 Ha e le bakeng sa kamoso, e hlalositse hore le tlas’a maemo a kajeno, ho ka ba le lijo tse lekaneng ho khotsofatsa litlhoko tsa baahi ba menang ba kajeno habeli. Hape, re tlameha ho hopola hore Jehova o tla tsamaisa batho ba hae hore ba sebelise matla a lefatše a temo ka tšoanelo, hobane Pesaleme ea 72:16 e re tiisetsa hore: “Nala ea mabele e tla ba teng lefatšeng holim’a lithaba, liqoapi tsa oona li hoase.”
28. Ke hobane’ng ha ho se kotsi ea hore ha batho ba phela ka ho sa feleng, kamorao ho nako lefatše le ka tlala ka ho fetisisa?
28 Re lokela ho hlokomela hore na morero oa Molimo ke ofe, joalokaha o boleletsoe batho ba babeli ba pele tšimolohong. Ba ile ba bolelloa hore ba ‘tlale lefatšeng, ba rene holim’a lona,’ ba atolose meeli ea Edene ho isa pheletsong tsa lefatše. (Genese 1:28) Ka ho hlakileng, hona ho bolela ho tlatsa lefatše ka tekanyo e loketseng, e seng ho le tlatsa batho ho tlōla. Hoo ho ne ho tla ’ne ho lumelle hore lefatše le ‘ruiloeng’ e be serapa sa lifate le lipalesa joaloka lehae la pele la motho le neng le tšoana le serapa sa lifate le lipalesa. Kahoo, taelo ena ea bomolimo e bontša hore ka nako e loketseng ea Molimo le ka tsela ea oona, keketseho ea baahi e ne e tla laoloa.
Motheo oa ’Nete oa Khotso e Tšoarellang
29. Likamano tsa motho le batho ba bang li na le phello efe thabong ea hae?
29 Leha ho le joalo, le tikoloho e ntle, nala ea lintho tse bonahalang, mosebetsi o thahasellisang, le bophelo bo botle ba ’mele li ne li ke ke tsa u tiisetsa thabo ea kamehla. Ba bangata kajeno ba na le lintho tsena empa leha ho le joalo ha baa thaba. Hobane’ng? Ka lebaka la batho ba ba potolohileng bao e ka ’nang eaba ke baithati, ba likomang, baikaketsi, kapa ba lehloeo. Thabo e tšoarellang Tsamaisong e Ncha ea Molimo e tla tla haholo ka lebaka la phetoho ea lefatše ka bophara ea boikutlo ba batho. Lerato la bona le tlhompho ea bona ho Molimo le takatso ea bona ea ho phethahatsa merero ea oona li tla tlisa nala ea moea. Ntle ho seo, nala ea lintho tse bonahalang e fetoha e sa khotsofatseng le e feela.
30. Re tseba joang hore ba phelang Tsamaisong e Ncha ea Molimo e tla ba feela batho ba tlatsetsang khotsong le tšireletsehong ea ba bang?
30 E, ke nyakallo ea sebele ho ba har’a batho ba mosa, ba ikokobelitseng le ba botsoalle—batho bao ka sebele u ka ba tšepang le ho ba rata, ba ikutloang ka ho tšoanang ka uena. (Pesaleme ea 133:1; Liproverbia 15:17) Lerato la Molimo ke lona le tiisang ho rata moahelani ka sebele, le le tla etsa hore bophelo e be bo nyakallisang Tsamaisong e Ncha ea Oona ea ho loka. Bohle bao Molimo o tla ba hauhela ka bophelo bo sa feleng, ba tla be ba pakile lerato la bona bakeng sa oona le bakeng sa batho ba bang. Ka baahelani ba joalo, metsoalle, le balekane ba mosebetsi, u tla tseba ho thabela khotso ea ’nete le tšireletseho le thabo e tšoarellang.—1 Johanne 4:7, 8, 20, 21.
31. Haeba kannete re batla ho phela Tsamaisong e Ncha ea Molimo, re lokela ho etsa eng hona joale?
31 Kannete, u bulehetsoe ke tebello e khōlō joalo! Kahoo, tsela e bohlale ke hore u fumane hore na ho hlokoa eng hore u e amohele. Joale ke nako ea hore u tlise bophelo ba hao tumellanong le se hlokoang ke Molimo bakeng sa ba tla bolokoa “mahlomoleng a maholo” a tlang.—2 Petrose 3:11-13.
[Setšoantšo se leqepheng la 98]
Letsatsi le haufi la ha lefatše lohle le tla fetoleloa paradeiseng