Khaolo ea Leshome

Etsa Hore Bophelo ba Lelapa la Hao e be bo Thabisang Molimo

 1. Ke hobane’ng ha ka kakaretso Lipaki Tsa Jehova li e-na le malapa a thabileng?

LIPAKI TSA JEHOVA li tsebahala ka ho ba le malapa a thabileng. Moprofesa Bryan Wilson oa Univesithi ea Oxford o ile a re ha a ngola: “Lipaki li fana ka keletso e sebetsang linthong tse ngata . . . tse kang litaba tsa lenyalo, tsa boitšoaro, tsa ho hōlisa bana le tse ling tse amang bophelo ba letsatsi le letsatsi. [Li] ka thusa haholo ka keletso ea tsona e utloahalang e thehiloeng Bibeleng e Halalelang le eo e leng karolo ea mokhoa oo li phelang ka oona.” Ha ho pelaelo hore le uena u ithutile lintho tse ngata Lentsoeng la Molimo mabapi le kamoo u ka thabelang bophelo bo monate ba lelapa kateng.

 2. (a) U hlokometse’ng ka malapa lefatšeng kajeno? (b) Ke libuka life tsa Bibele tseo re tla li hlahloba e le hore re fumane tataiso ka bophelo ba lelapa?

² Ha letsatsi la Jehova le ntse le atamela, Satane o hlasela malapa ka ho khethehileng. Kahoo, batho ba bangata ha ba sa tšepa litho tsa malapa a bona, joalokaha ho ne ho le joalo mehleng ea Mikea. O ile a re ha a ngola: “Le se ke la beha tumelo ea lōna ho bo-mphato ba lōna. . . . Lebela ho buleha ha molomo oa hao ho mosali ea robalang sefubeng sa hao. Etsoe mora o nyelisa ntate; morali o ema khahlanong le ’m’ae; ngoetsi khahlanong le ’mè matsale oa eona; lira tsa motho ke batho ba ntlo ea hae.” (Mikea 7:5, 6) U phela lefatšeng leo ho lona malapa a ntseng a qhalana, leha ho le joalo u entse boiteko bo matla ba hore u se ke ua hahlameloa ke moea oo. Sena se entse hore lelapa la hao e be le thabileng haholoanyane le hore e be le khahlisang Molimo haholoanyane. Mohlomong u sebelisitse mangolo a kang Deuteronoma 6:5-9; Baefese 5:22–6:4; le Bakolose 3:18-21. Leha ho le joalo, na u kile ua nahana hore libuka tsa baprofeta ba 12 li ka u fa keletso mabapi le bophelo bo monate ba lelapa? Khaolong ena, re tla ithuta mehlala e seng mekae ea keletso e joalo e hlahang libukeng tsena. Leha ho le joalo, u se ke ua fella ka ho ithuta lintlha tse mabapi le keletso eo feela. Leka ho sebelisa mehlala ena hore u bone lintho tse ling tseo u ka ithutang tsona libukeng tsena. Qetellong ea khaolo ena, ho boletsoe mangolo a mang a tla u thusa hore u etse sena, u bone lintho tse ling tseo u ka ithutang tsona libukeng tsena tse 12.

“O HLOILE TLHALO”

3, 4. (a) Kajeno batho ba bangata ba leka ho rarolla mathata a bona a lenyalo joang? (b) Ke boikutlo bofe bo soabisang mabapi le lenyalo bo neng bo le teng mehleng ea Malakia?

³ Hoa utloahala hore pele, re lokela ho nahana ka maqhama a kopantseng monna le mosali. Ho tla fihlela haufinyane tjena, batho ba bangata ba ne ba sa nke tlhalo e le tsela e bonolo ea ho rarolla mathata a lenyalo. Hangata ho ne ho e-ba thata ho hlala molekane; lilemong tsa bo-1800, motho o ne a lokela ho lumelloa ke Paramente hore a hlale molekane oa hae Engelane. Sena se ne se sireletsa malapa hore a se ke a qhalana. Leha ho le joalo, mehleng ena lintho li fetohile. Encyclopædia Britannica e re: “Linaheng tse ngata tlhalo e eketsehile haholo ho tloha ka Ntoa ea II ea Lefatše . . . Tsela eo batho ba ikutloang ka eona ka tlhalo e fetohile haholo . . . ’me ho bonahala mokhoa ona e se e le kobo-anela.” Tlhalo e se e jele setsi esita le linaheng tse kang Korea, moo lilemong tse ka bang leshome tse fetileng, e neng e sa amoheloe. Kajeno, linaheng tse ngata batho ba lumela hore balekane ba ka ’na ba hlalana haeba lenyalo la bona le e-na le mathata.

⁴ Tlhalo e ne e atile har’a Bajuda mehleng ea Malakia, lilemong tsa bo-400 B.C.E. Malakia o ile a re ho bona: “Jehova o fane ka bopaki pakeng tsa hao le mosali oa bocha ba hao, eo u sebetsaneng le eena ka bolotsana.” Kahobane banna ba ne ba sebetsana ka bolotsana le basali ba bona, aletare ea Jehova e ne e tletse meokho ka lebaka la ‘ho lla le ho feheloa’ ha basali ba lahliloeng. Baprista ba fosahetseng ba ne ba lumella sehlōhō se joalo!—Malakia 2:13, 14.

 5. (a) Jehova o ikutloa joang ka tlhalo? (b) Ke hobane’ng ha ho etsetsa molekane oa hao oa lenyalo bolotsana e le phoso e tebileng hakaale?

⁵ Jehova o ne a ikutloa joang ka boikutlo bo soabisang bo neng bo le teng mehleng ea Malakia ka lenyalo? Malakia o ile a re ha a ngola: “‘O hloile tlhalo’ ho boletse Jehova Molimo oa Iseraele.” Hape o ile a tiisa hore Jehova ‘ha aa fetoha.’ (Malakia 2:16; 3:6) Na u elelloa se boleloang ke mangolo aa? Nakong e fetileng, Molimo o ne a ile a bontša hore o hloile tlhalo. (Genese 2:18, 24) Le mehleng ea Malakia o ne a ntse a ikutloa ka tsela e tšoanang. ’Me o sa ntsane a ikutloa joalo le kajeno. Batho ba bang ba ka ’na ba etsa qeto ea ho qhala manyalo a bona kahobane feela ba sa khotsofalla balekane ba bona. Le hoja lipelo tsa bona li ka ba bolotsana, Jehova oa li hlahloba. (Jeremia 17:9, 10) O lemoha bomenemene leha e le bofe kapa morero o lonya oa hore motho a hlale molekane oa hae, ho sa tsotellehe hore na motho eo o leka ho lokafatsa tlhalo hakae. Ka sebele “lintho tsohle li hlobotse ’me li pepesitsoe phatlalatsa mahlong a eo re nang le boikarabello ho eena.”—Baheberu 4:13.

 6. (a) Ho talima tlhalo ka tsela eo Jehova a e talimang ka eona ho ka u thusa joang? (b) Ha Jesu a ne a fana ka keletso e mabapi le tlhalo, taba ea bohlokoa eo a neng a e hatisa e ne e le efe?

⁶ Mohlomong lenyalo la hao ha le mothating oa ho qhalana, leha ho le joalo, u lokela ho tsoela pele u nahana ka tsela eo Jehova a talimang lenyalo ka eona. Ha ho motho ea phethahetseng, ke ka lebaka leo re ka lebellang hore ho be le mathata le ho se lumellane lenyalong. Leha ho le joalo, na u tla nahana hore ho hlala molekane oa hao ke eona tsela e bonolo ea ho tsoa mathateng? Na ha le qabane u tla bolela hore ho ka ba molemo hore le hlalane? Ba bangata ba entse joalo, empa pono ea Molimo ka lenyalo ke hore batho ba leke ka matla haholoanyane ho etsa hore lenyalo la bona le atlehe. Ke ’nete hore Jesu Kreste o ile a re ho na le lebaka le le leng feela le amohelehang la tlhalo—e leng bohlola, bo kopanyelletsang mekhoa eohle ea ho kopanela liphate kantle ho lenyalo. Leha ho le joalo, ha Jesu a bua mantsoe aa, taba ea bohlokoa eo a neng a e hatisa e ne e le efe? O ile a re ho bamameli ba hae: “Seo Molimo a se kopantseng hammoho jokong ho se ke ha e-ba le motho ea se arolang.” Ha ho pelaelo hore Jesu o ne a tšehetsa molao oa Jehova o sa fetoheng, oo Malakia a neng a ile a bua ka oona lilemong tse ka bang 450 pele ho moo.—Matheu 19:3-9.

 7. Tumellanong le keletso e bukeng ea Malakia, u ka etsa joang hore maqhama a lenyalo la hao a lule a tiile?

⁷ Joale, ke joang balekane ba Bakreste ba ka lulang ba e-na le maqhama a tiileng a lenyalo? Malakia o ile a ba fa malebela ha a re: “Le itebele mabapi le meea ea lōna, ’me le se ke la sebetsa ka bolotsana.” (Malakia 2:16) Sena se bolela hore re lokela ho lebela tšusumetso e matla eo re nang le eona ka lipelong. Haeba re ‘lebetse meea ea rōna,’ re tla qoba teko ea ho thahasella motho eo e seng molekane oa rōna ka ho feteletseng. (Matheu 5:28) Ka mohlala, ho thoe’ng haeba ka pelong re thabela ha motho eo e seng molekane oa rōna a bonya le rōna kapa a re rorisa ho tlōla? Sena se ka bontša hore ha re sa lebetse meea ea rōna ka ho feletseng. Kahoo, thuto ea bohlokoa eo re e fumanang ho baprofeta ba 12 e tla re thusa hore re be le manyalo a tiileng ke hore re ele hloko ‘meea ea rōna.’

8, 9. Ke hobane’ng ha se etsahetseng pakeng tsa Hosea le Gomere se ngotsoe ka Bibeleng?

⁸ Ha ho pelaelo hore u ikemiselitse ho etsa hore lenyalo la hao le lule le momahane. Leha ho le joalo, u ke ke ua qoba mathata ’ohle. U ka etsa joang hore u sebetsane ka katleho le mathata leha e le afe a ka hlahang, haholo-holo haeba u ikutloa hore molekane oa hao ke eena ea phoso? Hopola taba ea Hosea, e ileng ea boleloa pejana bukeng ena, Khaolong ea 2 le ea 4. Mosali oa hae, Gomere, o ile a fetoha “mosali oa bohlola” ’me a ‘lelekisa ba mo ratang ka takatso e matla.’ Hamorao o ile a lahloa, a sotleha ’me ea e-ba lekhoba. Hosea o ile a lefella Gomere hore a khutle, ’me o ile a khothalletsoa hore a mo rate. Hobane’ng? E le hore a bontše ka ho hlaka se neng se etsahala pakeng tsa Jehova le Baiseraele. Jehova e ne e le “monghali eo e leng monna” oa sechaba sa hae, ’me se ne se tlamahantsoe le eena joaloka mosali oa hae.—Hosea 1:2-9; 2:5-7; 3:1-5; Jeremia 3:14; Esaia 62:4, 5.

⁹ Ho tloha qalong, Baiseraele ba ile ba utloisa Jehova bohloko ka ho latela melimo e meng. (Exoda 32:7-10; Baahloli 8:33; 10:6; Pesaleme ea 78:40, 41; Esaia 63:10) ’Muso o ka leboea oa meloko e leshome ke oona haholo-holo o neng o le molato oa borapeli ba namane. (1 Marena 12:28-30) Ho feta moo, Baiseraele ha baa ka ba itšetleha ka Monghali eo e leng Monna oa bona, Jehova, ho e-na le hoo, ba ile ba tšepa linyatsi tsa bona tsa lipolotiki. Ka lekhetlo le leng ba ile ba matha ka mor’a Assyria joaloka qoaha e manganga e palesitseng. (Hosea 8:9) U ne u tla ikutloa joang haeba molekane oa hao a ne a ka etsa joalo?

10, 11. U ka etsisa Jehova joang ha u thulana le bothata bo itseng lenyalong boo ho bona molekane oa hao a bonahalang e le eena ea phoso?

¹⁰ Mehleng ea Hosea, ho ne ho se ho fetile lilemo tse ka holimo ho 700 Baiseraele ba entse selekane le Jehova. Leha ho le joalo, Molimo o ne a ikemiselitse ho ba tšoarela, hafeela ba ka khutlela ho eena. Ho nahanoa hore Hosea o qalile ho profeta pele ho 803 B.C.E., e leng hore Jehova o ile a tsoela pele ho mamella Iseraele ka lilemo tse ling tse ka bang 60 le ho mamella Juda ka lilemo tse ling tse ka bang 200! Ha Jehova a etsa papiso ka boemo ba lelapa la Hosea, o ne a sa ntsane a mema batho ba hae ba entseng selekane le eena hore ba bake. O ne a e-na le mabaka a utloahalang a ho khaola lenyalo la hae le Baiseraele, empa o ile a ’na a romela baprofeta hore ba thuse mosali eo oa hae oa tšoantšetso hore a khutle, ’me o ne a bile a ikemiselitse ho mo lefella.—Hosea 14:1, 2; Amose 2:11.

¹¹ Haeba ho hlaha bothata lenyalong la hao ’me ho bonahala eka molekane oa hao ke eena ea phoso, na u tla etsisa Jehova? Na ke uena ea tla nka mehato ea ho khutlisetsa lenyalo la lōna boemong boo le neng le le ho bona pele? (Bakolose 3:12, 13) Ho etsa sena ho hloka boikokobetso. Jehova o ile a beha mohlala o motle hakaakang ha a sebetsana le Baiseraele! (Pesaleme ea 18:35; 113:5-8) Molimo o ile a ‘bua le lipelo tsa Baiseraele,’ a ba a ba kōpa ka tieo. Joaloka batho ba sa phethahalang, ka sebele re na le lebaka le utloahalang haholoanyane la hore re bue le lipelo tsa balekane ba rōna, re leke ho rarolla mathata le ho hlokomoloha liphoso. Taba ea hore ebe boiteko boo Jehova a ileng a bo etsa bo ile ba atleha ke thuto ea bohlokoa. Masala a sechaba seo a ile a bula lipelo tsa ’ona ha a ntse a le lefeelleng kholehong Babylona, ’me hamorao a ile a khutlela naheng ea habo ’ona, a bitsa Jehova “monna oa Ka.”—Hosea 2:14-16.a

12. Ho nahanisisa ka tsela eo Jehova a ileng a tšoara mosali oa hae oa tšoantšetso ka eona ho ka u tsoela molemo joang lenyalong?

¹² Haeba ho ka hlaha bothata bo tebileng, mohlomong boiteko ba hao bo tiileng ba ho lokisa kamano ea hao le molekane oa hao bo tla atleha. Molimo o ne a ikemiselitse ho tšoarela esita le sebe se tebileng sa bohlola ba moea bo neng bo etsoa ke molekane oa hae oa tšoantšetso. Mathata a mangata a lenyalo har’a Bakreste ba ’nete ha a e-s’o be boemong bo tebileng hakaalo. Mathata a mangata a bakoa ke ho hlabana ka mantsoe. Kahoo, haeba molekane oa hao a u hlabile ka mantsoe, nahana ka seo Hosea le Jehova ba ileng ba tobana le sona. (Liproverbia 12:18) Na see se ke ke sa u thusa hore u mo tšoarele?

13. Re ka ithuta thuto efe tabeng ea hore ebe Jehova o ne a batla hore batho ba hae ba khelohileng ba bake?

¹³ Ho na le ntlha e ’ngoe hape tlalehong ena ea lintho tse etsahetseng khale. Na Molimo o ne a ikemiselitse ho lokisa kamano ea hae le batho ba hae nakong ea ha ba ntse ba etsa bohlola? Ha Molimo a bua le Hosea ka sechaba sena se etsang bohlola, o ile a re: “O lokela ho tlosa bohlola ba hae ka pel’a hae le liketso tsa hae tsa ho feba pakeng tsa matsoele a hae.” (Hosea 2:2) Ho ne ho hlokahala hore sechaba sena se bake ’me se ‘hlahise litholoana tse tšoanelang pako.’ (Matheu 3:8) Kahoo, sheba mefokolo ea hao ho e-na le ho sheba mefokolo ea molekane oa hao. Haeba u foselitse molekane oa hao, ke hobane’ng ha u sa leke ho lokisa kamano ea lōna ka hore u kōpe tšoarelo ka pelo eohle ’me u etse lintho ka tsela e fapaneng? Mohlomong moputso e tla ba hore a u tšoarele.

MOTHEO OA HO LAEA E LOKELA HO BA “LITHAPO TSA LERATO”

14, 15. (a) Ho ea ka Malakia 4:1, ke hobane’ng ha u lokela ho nka boikarabelo ba ho ruta bana ba hao ka botebo? (b) U ka thusa bana ba hao joang hore ba tsebe Jehova?

¹⁴ Tabeng ea bophelo ba lelapa, re ka ithuta ho eketsehileng tseleng eo Jehova a ileng a tšoara Baiseraele ka eona e hlalositsoeng libukeng tsa baprofeta ba 12. Libuka tsena li bontša kamoo u ka thusang bana ba hao kateng. Ha ho potang hore ho hōlisa bana hase papali matsatsing ana. Batsoali ba lokela ho nka boikarabelo ba bona ka ho teba. Rea bala: “‘Letsatsi le tlang le tla . . . timetsa [batho],’ ho boletse Jehova oa mabotho, ‘hoo le ke keng la ba siela leha e le motso kapa lekala.’” (Malakia 4:1) Ka letsatsi leo la ho ikarabella, bana ba banyenyane (makala) ba tla tšoaroa ka tsela e hlokang leeme ho ea kamoo Jehova a bonang batsoali ba bona (metso) ba lokela ho ahloloa kateng, kaha ke bona ba ikarabellang bakeng sa bana ba bona ba banyenyane. (Esaia 37:31) Tsela eo batsoali ba phelang ka eona e ka rera hore na bokamoso ba bana ba bona e tla ba ba mofuta ofe, hore na e tla ba bo atlehileng kapa che. (Hosea 13:16) Haeba lōna batsoali (metso) le sa lule le le boemong bo botle ka pel’a Jehova, ho tla etsahala joang ka bana ba lōna ba banyenyane (makala) ka letsatsi la bohale ba hae? (Sofonia 1:14-18; Baefese 6:4; Bafilipi 2:12) Ka lehlakoreng le leng, haeba ka botšepehi le ikitlaetsa hore Molimo a le amohele, boiteko boo bo ka tsoela bana ba lōna ba banyenyane molemo.—1 Bakorinthe 7:14.

¹⁵ Ka mor’a ho qotsa boprofeta ba Joele bo bontšang hore ho hlokahala hore batho ba ipiletse lebitsong la Jehova, moapostola Pauluse o ile a re ha a ngola: “Ba tla ipiletsa joang ho eo ba sa behang tumelo ho eena? Hape, ba tla beha tumelo joang ho eo ba e-s’o utloele ka eena?” (Baroma 10:14-17; Joele 2:32) Pauluse o ne a bua ka tšebeletso ea rōna ea boboleli, empa u ka sebelisa molao-motheo ona tabeng ea ho ruta bana ba hao. Ba tla beha tumelo ho Jehova joang ba sa utloela ka eena? Na letsatsi le letsatsi u qeta nako e lekaneng u ruta bana ba hao kamoo Jehova a leng molemo kateng, u ba thusa hore ba mo rate ka ho tebileng ba be ba rate tataiso ea hae? Haeba kamehla bana ba utloa ho buuoa ka Jehova ka lapeng, hoo ho ka ba thusa hore ba tsoele pele moeeng.—Deuteronoma 6:7-9.

16. Ho ea ka Mikea 6:3-5, u ka etsisa Jehova joang ha u laea bana ba hao?

¹⁶ Ha bana ba sa ntsane ba le banyenyane haholo, ho ka ’na ha e-ba bonolo ho tla le bona libokeng tsa Bokreste. Leha ho le joalo, ha ba ntse ba hōla, ba qala ho iketsetsa lintho ka tsela ea bona. U lokela ho tšoara bana ba hao joang haeba ka linako tse ling ba bontša moea oa borabele? U ka ithuta ho hong libukeng tsa baprofeta ba 12, ua hlokomela tsela eo Jehova a ileng a tšoara Baiseraele le Bajuda ka eona. (Zakaria 7:11, 12) Ka mohlala, ha u ntse u bala Mikea 6:3-5, hlokomela mokhoa oo Jehova a behang litaba ka oona. Baiseraele ba ne ba fositse; empa Molimo o ile a ’na a ba bitsa “sechaba sa ka.” O ile a ba kōpa ka tieo, a re: “Lōna sechaba sa ka, ka kōpo, hopolang.” Ho e-na le ho ba qosa ka bohale, o ile a leka ho ama lipelo tsa bona. Na u ka etsisa Jehova le ha u laea bana ba hao? Leha ba ka fosa hakae, ba nke e le ba bohlokoa ka lapeng, u se ke ua ba bitsa ka mabitso a ba eisang. Ho e-na le ho ba tšoaea liphoso, ipiletse ho bona ka lerato. Botsa lipotso e le hore u tle u tsebe maikutlo a bona. Leka ho ama lipelo tsa bona e le hore ba ka u phetlela sefuba.—Liproverbia 20:5.

17, 18. (a) Ke eng e lokelang ho u susumelletsa hore u laee bana ba hao? (b) U ka lula u tataisa bana ba hao ka “lithapo tsa lerato” joang?

¹⁷ Ke hobane’ng ha u laea bana ba hao? Batsoali ba bang ba ba laea hobane ba sa batle hore lebitso la lelapa le senyehe. Jehova o ile a bontša lebaka leo a ileng a fana ka taeo ka lona ha a re: “Ka ruta Baefraime ho tsamaea, ka ba sika ka matsoho . . . Ke ’nile ka ba hula ka liropo tsa motho oa lefatše, ka lithapo tsa lerato.” (Hosea 11:3, 4) Tabeng ena, Hosea o tšoantša kamano e pakeng tsa Jehova le Baiseraele le kamano ea ntate le mora. Nahana ka motsoali ea lerato, ea tataisang ngoan’a hae ka lithapo tseo a li tšoereng ka letsoho, a leka ho thusa ngoan’a hae ea ntseng a therekela hore a ithute ho tsamaea. Lithapo tseo li tšehetsa ngoana haeba a ka khoptjoa, lia mo tataisa haeba a kheloha tsela.—Jeremia 31:1-3.

¹⁸ Na u tla bontša lerato le tšoanang le leo Molimo a ileng a le bontša Baiseraele? Khafetsa ba ne ba mo furalla, empa ha aa ka a potlakela ho nyahlatsa lithapo tseo tsa lerato. Ka linako tse ling bana ba ka ’na ba bonahala ba tsoa tseleng ba bile ba khoptjoa ke lintho tse fokolang, empa leka ho etsa hore maqhama a lerato a lule a le teng pakeng tsa hao le bona. Hopola hore Jehova o ne a sa bokotse batho ba hae hoo a neng a hlokomoloha liphoso tsa bona. O ne a sa hlathe koana le koana ha a sebetsana le boemo, o ne a ba laea ka lerato, ’me a ipha nako ea ho ba thusa moo ho hlokahalang. Haeba u hlokomela hore mora kapa morali oa hao o suthela hōle le ’nete, u se ke ua iphapanyetsa seo. Leka ho mo khutlisa, joalokaha eka u mo khutlisa ka lithapo tse mo tataisang, u mo thuse ka lerato nakong ena e thata. Iphe nako ea ho ba le bana ba hao ba nang le bothata. Ha ho na ntho ea bohlokoa ho feta ho qeta nako u e-na le bona!

19. Ke hobane’ng ha u sa lokela ho felloa ke tšepo ka ho laea bana ba hao?

¹⁹ Hosea o ile a bona esale pele hore masala a Baiseraele a ne a tla amohela taeo: “Bara ba Iseraele ba tla khutla ’me ka sebele ba batle Jehova Molimo oa bona, le morena oa bona Davida; ’me ka sebele ba tla tla ba thothomela ho Jehova le ho molemo oa hae karolong e qetellang ea matsatsi.” (Hosea 3:5) E, masala a batho ba Molimo a ile a rua molemo ha a a laea. E-ba le tšepo ea hore ho tla ba joalo le ho bana ba hao. Leka ho bona lintho tse ntle tseo ba li etsang. Bua le bona ka mosa empa hape u khomarele melao-motheo ea Bibele ka tieo. Esita le haeba hona joale ngoana ea tsoileng tseleng a sa amohele taeo ea hao, ho tseba mang, ka letsatsi le leng a ka ’na a hlaphoheloa!

HLOKOMELA HO TLOAELANA LE BATHO BA BABE!

20. Tabeng ea batho bao ba tloaelanang le bona, ke potso efe eo bacha ba ka fumanang karabo ea eona libukeng tsa baprofeta ba 12?

²⁰ Lōna bana, ke’ng seo le ka ithutang sona baprofeteng ba 12? E ka ’na eaba lengolo leo batsoali ba lōna ba le qotsang hangata ha ba buisana le lōna ke 1 Bakorinthe 15:33 e buang ka ho qoba litloaelano tse mpe. Ba bang ba lōna ba ka ’na ba ipotsa, ‘Empa na ho ba motsoalle oa batho ba sa rapeleng Jehova ho hlile ho hobe hakaalo?’ U ka fumana karabo ea potso ena libukeng tsena tse 12.

21-23. (a) Bacha ba ka ithuta’ng liketsong tsa Baedomo? (b) Metsoalle ea hao ea ’nete ke bo-mang?

²¹ Le hoja libuka tsa baprofeta ba 12 li ne li ngoletsoe batho ba Molimo haholo-holo, buka ea Obadia e ne e ngoletsoe Baedomo, bao ho neng ho thoe ke barab’abo Baiseraele.b (Deuteronoma 2:4) Buka ea Obadia e fapane le boholo ba libuka tse ling tsa baprofeta ba 12 hobane eena o sebelisa seemeli “uena,” ha a bua ka Baedomo. Joale, ak’u nahane ka Baedomo. E ka ba ka 607 B.C.E. ha Jerusalema e lika-likiloe. Le hoja Baedomo ba amana haufi le Jakobo, ba ikopanya le Bababylona! Baedomo baa soma ba re: “E pepeseng! E pepeseng!” (Pesaleme ea 137:7; Obadia 10, 12) Ba rerile ho hapa naha ea Juda. Ba bile ba ja le Bababylona, e leng seo linaheng tsa boholo-holo tsa Bochabela se neng se ka bontša hore ba entse selekane le bona.

²² Hlokomela seo Obadia a se bolelang esale pele ka Baedomo: “Banna [Bababylona] ba leng selekaneng le uena ba u thetsitse bohle. Banna ba leng khotsong le uena ba u hlōtse. Ba jang lijo le uena ba tla beha letlooa ka tlas’a hao joaloka eo ho se nang temoho ho eena.” (Obadia 7) Ha e le hantle, ho ile ha etsahala’ng ka Baedomo, ba ileng ba lahla mor’abo bona Jakobo kherehloa, ’me ba khetha ho ba metsoalle ea Bababylona? Qetellong, Bababylona ba neng ba busoa ke Nabonidus ba ile ba felisa Baedomo. Mehleng ea Malakia, Molimo o ne a entse lithaba tsa Edomo lesupi ’me lefa la hae a le file liphokojoe.—Malakia 1:3.

²³ Joale ak’u nahane ka batho bana ba sa rapeleng Jehova bao u reng ke metsoalle ea hao. Na u hlokometse hore ‘bashanyana [kapa banana] ba leng selekaneng,’ kapa ba entseng maqhama a setsoalle, ba atisa ho thetsana le ho “beha letlooa ka tlas’a” bao ba reng ke metsoalle ea bona? Ha metsoalle eo ea bona e lemoha hore ba e thetsitse, ba re’ng? Ba ka ’na ba bolela hore metsoalle eo ba e thetsitseng e ne e le bo-malumela-tsohle, ba isoang le khongoana-holimo ba sa hlokomele leha ba ntse ba qhekelloa. See se tšoana hakaakang le seo Bababylona ba ileng ba se etsa ho metsoalle ea bona, Baedomo! Na u nahana hore ruri ‘metsoalle’ e joalo e ka ba le taba le uena haeba u kena mathateng? (Obadia 13-16) Ka lehlakoreng le leng, nahana ka Jehova Molimo le batho ba hae kajeno. Jehova o lula a ikemiselitse ho u thusa. O tla u tšehetsa ha u le har’a mathata. Batho ba hae le bona ke ‘metsoalle ea ’nete e lerato ka linako tsohle,’ ba tšoana le motho ea tšepahalang “ea tsoaletsoeng ha ho e-na le mahlomola.”—Liproverbia 17:17.

ANANELA KAMANO EA BOHLOKOA KA HO FETISISA

24, 25. Ntho e ka sehloohong bophelong ba rōna e lokela ho ba efe?

²⁴ E, kamano ea lelapa ke ea bohlokoa ebile re tlameha ho e matlafatsa. Re ka ithuta lithuto tse ngata ka eona libukeng tsa baprofeta ba 12. Re u khothalletsa hore u bale libuka tsena ’me u sebelise mokhoa oo re o sebelisitseng mona e le hore u bone seo u ka ithutang sona ho tsona. Sena se tla u thusa hore u fumane lithuto tse eketsehileng tse tla u thusa ho ntlafatsa bophelo ba lelapa la hao. Leha ho le joalo, na ho ba le lelapa le thabileng ke eona taba ea bohlokoa ka ho fetisisa ho barapeli ba Molimo kajeno?

²⁵ A re hlokomeleng hore ha Joele a bua ka ho tla ha letsatsi la Jehova, o ile a profeta, a re: “Bokellang batho. Halaletsang phutheho. . . . Monyali a tsoe kamoreng ea hae e ka hare, le monyaluoa leqatheng la hae.” (Joele 2:15, 16) E mong le e mong ka lapeng o ne a lokela ho kopana le ba bang hore ba tl’o rapela Jehova. Esita le batho ba sa tsoa nyalana, bao ka tloaelo ba hlokomolohang lintho tse ling hobane ba nahana lintho tse ngata, ba ne ba lokela ho ba teng! Ha ho ntho eo e lokelang ho ba ea bohlokoa ho feta ho phuthehela ho Molimo. Kaha letsatsi la Jehova le atamela ka potlako, ntho ea pele bophelong ba rōna e lokela ho ba hore re be le kamano e ntle le eena. Karolong ea ho qetela ea buka ena, re tla tšohla seo ka thabo re lokelang ho se etsa kajeno.

[Mongolo o botlaaseng ba leqephe]

TLHAHLOBO

• Ke lintho life tseo u ka ithutang tsona ho Malakia 2:16 ha u matlafatsa lelapa la hao?

• Jehova o ile a etsa joang ha mosali oa hae oa tšoantšetso a mo koenehela?—Hosea 3:1-5.

• Motho a ka etsa’ng hore a boloke lenyalo la hae haeba ho bile le phoso e tebileng?—Hosea 2:2.

U KA RUA MOLEMO JOANG?

• U ka rua molemo joang mangolong a latelang?

Hosea 11:3, 4;

Obadia 7;

Mikea 6:3-5;

Malakia 4:1

• Joalokaha re bone mohlala khaolong ena, u ka sebelisa mangolo a latelang joang ho ntlafatsa bophelo ba lelapa la hao?

Hosea 14:4;

Joele 1:3;

Malakia 2:11, 12

[Setšoantšo se leqepheng la 127]

Ha u qabane le molekane oa hao, na u tla nahana hore ho molemo hore le hlalane?

[Setšoantšo se leqepheng la 128]

Taba ea hore ebe Hosea o ile a amohela Gomere hape e re ruta eng ka Jehova?

[Setšoantšo se leqepheng la 130]

Etsisa Jehova ka hore e be uena ea qalisang puisano ea ho rarolla mathata leha e le afe

[Setšoantšo se leqepheng la 133]

Joaloka motsoali, na u etsisa Jehova ka hore u bontše lerato ho bana ba hao?

[Setšoantšo se leqepheng la 136]

Na ba ipitsang metsoalle ea hao ba “beha letlooa ka tlas’a hao”?