Lithuto Tse Tsoang Mangolong: Malakia 1:1–4:6
Morena oa ’Nete o Tla ho Tla Ahlola
“HA HO thuse letho ho sebeletsa Molimo!” (Malakia 3:14) Boikutlo bo joalo ba ho belaela bo ile ba phahamisoa ke batho ba Molimo ha Malakia a ne a profeta lekholong la bohlano la lilemo B.C.E. Hobane’ng? Hobane ho ne ho rena maemo a utloisang bohloko Juda, haholo-holo har’a baprista. Morero oa bona o moholo oa boithati e ne e le ho ithuisa. Ka mokhoa o tobileng le o matla, Malakia o ile a pepesa baikaketsi bao ba baeta-pele ba bolumeli ’me a lemosa hore Morena oa ’nete o tla ho tla ahlola.—Malakia 1:6-8; 2:6-9; 3:1.
Boprofeta ba Malakia bo phethahala mehleng ea rōna. Ka hona, re etsa hantle ha re nahana ka lithuto tseo bo re tšoaretseng tsona.
Ho Nyelisa Lebitso la Molimo
Jehova o lebelletse hore batho ba hae ba mo nehe se molemohali. Pele Molimo o bontšitse lerato la oona ho batho ba oona. Leha ho le joalo, baprista ba nyelisa lebitso la oona ka ho amohela ho batho liphoofolo tsa mahlabelo tse sefofu, tse kulang, le tse hlotsang. Jehova ha a khahlisoe ke baprista ba iphepang kapa menehelo e fokolang ea matsoho a bona. Empa ho sa tsotellehe seo ba se etsang, ‘lebitso la [Jehova] ke le tšabehang har’a lichaba.’—1:1-14.
Bao e leng baruti ba na le boikarabelo bo boima. (Jakobo 3:1) Baprista ba “khopisitse ba bangata ka molao.” Joang? Ka ho hlōleha ho ruta batho molao oa Molimo le ka ho bontša leeme. Jehova o ba halefetse ka ho nepahetseng, hobane “melomo ea moprista e tšoanetse ho boloka tsebo, molao o tle o baloe molomong oa hae.”—2:1-9.
Jehova ha a iphapanye ba sa hlompheng litokisetso tsa lenyalo. Ho fapana le molao oa Molimo, banna ba Juda ba ne ba inketse basali ba balichaba. (Deuteronoma 7:3, 4) Ba ne ba entse basali ba bocha ba bona ka bolotsana ka ho ba hlala. Jehova o “hloile hlalo,” ho lemosa Malakia.—2:10-17.
Kahlolo le ho Hloekisa
Jehova ha a lumelle liphoso ka ho sa feleng. “Morena oa [’nete]” o tla tempeleng ea hae, a e-na le “lengeloi [“lenģosa,” NW] la selekane.” O ne a tla ho tla hlatsoa le ho hloekisa bara ba Levi. Jehova e tla ba paki e akofang mabapi le baloi, bafebi, ba hlapanyang ka leshano, balotsana le bahatelli.—3:1-5.
Ba hanelang Jehova ka linyehelo tsa bona ba iketsa mafutsana. Jehova ha a fetohe. Haeba batho ba khelohileng ba khutlela ho eena, ka mohau o tla khutlela ho bona. Ba ’nile ba qhekella Molimo ka ho hana ho ntša karolo ea leshome le menehelo. Empa haeba ba ne ba ntša karolo ea leshome, Jehova o tšepisa “hlohonolofatso ka tekanyo e fetisang!” Ba tla latsoa melemo e sa feleng.—3:6-12
Mahlo a Jehova a talimme batho ba hae. Molimo o tsekisa ba buileng mantsoe a mabe khahlanong le eena. Empa ho fapana le moo, o mamela ka tsebe e lethoethoe ba mo tšabang. “Buka ea khopotso” e tla ngolloa ba “hlokomelang lebitso la Jehova.” Batho ba hae ba tla bona phapang mahareng a ba lokileng le ba khopo.—3:13-18.
Letsatsi la Jehova Lea Tla!
Letsatsi la Jehova le tla bolela timetso e felletseng ho balotsana. Letsatsi la Jehova lea tla, ’me balotsana ba tla qetoa joaloka matlakala a chesoang seboping. Ba tla qetoa, ho ke ke ha sala “motso, kapa lekala.” Ha e le ba tšabang lebitso la Jehova, ba tla thabela melemo ea “letsatsi la ho loka.” Pele letsatsi lena le tšabehang le fihla, Jehova o tla romella Elia ho etsa mosebetsi oa nchafatso.—4:1-6.
Lithuto tsa kajeno: Tabeng ea borapeli, Jehova o batla hore batho ba hae ba mo nehe se molemohali. (Bapisa Mattheu 22:37, 38.) Baruti ba Lentsoe la Molimo ba na le boikarabelo ba ho ruta hantle esita le ho etella ba bang pele borapeling ba ’nete. Re etsa hantle ha re hopola hore mahlo a Molimo oa toka a talimme ba hlōlehang ho bontša tlhompho e loketseng bakeng sa lenyalo le ba etsang liphoso. E se e ka ka boikokobetso re ka amohela mokhoa oa ho hloekisa le ho hlatsoa ha Morena oa ’nete ha ka cheseho re ntse re emetse “letsatsi la Jehova, le leholo, le tšabehang.”
[Lebokose le leqepheng la 30]
LITEMANA TSA BIBELE LIA HLAHLOJOA
o 1:10—Baprista ba baithati, ba lapetseng chelete ba ne ba sebeletsa molemong oa ho ithuisa. Ba ne ba batla moputso bakeng sa litšebeletso tse bonolo tsa tempele tse joaloka ho koala menyako le ho hotetsa mollo oa aletare. Ha ho makatse ha Jehova a sa ka a ‘khahloa ke sehlabelo se tsoang matsohong a bona’!
o 1:13—Baprista ba hlokang tumelo ba ile ba talima mahlabelo joaloka mosebetsi o khathatsang, moroalo o boima. Ba ne ba tšoela lintho tsa Jehova tse halalelang. Le ka mohla re se lumelle nyehelo ea rōna ea “mahlabelo a maleme a rōna” e fetohe feela tšoanelo!—Hosea 14:2; Ba-Heberu 13:15.
o 2:13—Banna ba bangata ba Bajode ba ne ba hlala basali ba bocha ba bona, mohlomong ka morero oa ho nyala basali ba bahedene. Aletare ea Jehova e ile ea tlala meokho—ka ho hlakileng e ile ea tlala meokho ea basali ba hlaliloeng ba tlileng tempeleng ho tla tšollela masisa-pelo a bona ka pel’a Molimo.—Malakia 2:11, 14, 16.
o 3:1—“Morena oa [’nete]” ke Jehova Molimo, ’me “lengeloi [“lenģosa,” NW] la selekane” ke Jesu Kreste. Ho phethahala ha pele ha boprofeta bona ho etsahetse ha Jesu a ne a hloekisa tempele. (Mareka 11:15-17) Sena ebile ka mor’a lilemo tse tharo le halofo hoba a tlotsoe joaloka Morena ea Khethiloeng. Ka ho tšoanang, lilemo tse tharo le halofo ka mor’a hore Jesu a beoe teroneng e le Morena ka lehoetla la 1914, o ile a tsamaea le Jehova ho ea tempeleng ea moea ’me a fumana hore batho ba Molimo ba hlile ba hloka ho hloekisoa le ho hlatsuoa.
o 3:2, 3—Mokhoa oa boholo-holo oa ho hloekisa o ne o nka nako e telele. Ka hona, hangata mohloekisi o ne a “lula,” ho fihlela tšepe e mokeli-keli e tšoana le seipone se phatsimang, ’me a khona ho bona setšoantšo sa hae ho eona. Ka ho tšoanang, Jehova o ’nile a tsoela pele ho hloekisa batho ba hae ho fihlela joale, a ba hlatsoa lithuto tse litšila le mekhoa e litšila. Sena se ba thusitse hore ba bontše haholoanyane ho tšoana le eena ka ho nepahetseng.—Ba-Efese 5:1.
o 4:2—Ena ke tlhaloso ea litlhohonolofatso tsa nakong e tlang tse tla thabeloa ke ba tšabang lebitso la Molimo. Ba na le tebello ea ho lula mahlaseling a mohau oa Molimo ha likhathatso tse tšoenyang lelapa la motho ’meleng, kelellong, le maikutlong li felile.—Tšenolo 21:3, 4.
o 4:5—Moprofeta Elia o phetse lilemo tse ka bang 500 pele boprofeta bona bo fanoa. Lekholong la pele la lilemo C.E., Jesu Kreste o ile a tsebahatsa Johanne Mokolobetsi e le mosebetsi-’moho le Elia ea profetiloeng. (Mattheu 11:12-14; Mareka 9:11-13) Leha ho le joalo, “Elia” e ne e lokela ho ba selelekela sa “letsatsi la Jehova,” a bontše phethahatso e khōloanyane nakong ena ea “boteng” ba Kreste.—2 Ba-Thessalonika 2:1, 2 NW.
[Setšoantšo se leqepheng la 31]
Nakong ea tšebeletso ea Jesu ea lefatšeng, o ile a hloekisa tempele. Ka 1918 o ile a tla le Jehova tempeleng ea moea ho tla hloekisa batho ba Molimo