Jehova o Hloile Tsela ea Bolotsana
‘Le se ke la sebetsana ka bolotsana.’—MALAKIA 2:10.
1. Molimo o hloka eng ho rōna e le hore re tle re fumane bophelo bo sa feleng?
NA U batla bophelo bo sa feleng? Haeba u na le tumelo tšepisong eo e ka Bibeleng, mohlomong u tla re, ‘Ho hlakile hore nka bo thabela.’ Empa haeba u batla hore Molimo a u hauhele ka bophelo bo sa feleng lefatšeng la hae le lecha, ho tla hlokahala hore u finyelle litlhokahalo tsa hae. (Moeklesia 12:13; Johanne 17:3) Na ke ntho e sa utloahaleng hore batho ba sa phethahalang ba lebelloe ho finyella litlhokahalo tseo? Che, hobane Jehova o fana ka khothatso ena: “Ke khahliloe ke mosa o lerato, eseng sehlabelo; le tsebo ea Molimo ho e-na le linyehelo tse feletseng tsa secheso.” (Hosea 6:6) Kahoo, esita le batho ba fosang ba ka finyella litlhokahalo tsa Molimo.
2. Baiseraele ba bangata ba ile ba sebetsa Jehova ka bolotsana joang?
2 Empa, hase bohle ba batlang ho etsa thato ea Jehova. Hosea o senola hore esita le Baiseraele ba bangata ba ne ba sa batle ho etsa thato ea Jehova. Ba ne ba lumetse e le sechaba hore ba kena selekaneng kapa tumellanong ea ho mamela melao ea Molimo. (Exoda 24:1-8) Empa, kapele feela, ba ne ba ‘tlōla selekane’ seo ka ho tlōla melao ea hae. Kahoo, Jehova o ile a bolela hore Baiseraele bao ‘ba mo sebelitse ka bolotsana.’ (Hosea 6:7) Batho ba bangata ba entse joalo ho tloha ka nako eo. Empa Jehova o hloile tsela ea bolotsana, ebang bo etsetsoa eena kapa ba mo ratang le ba mo sebeletsang.
3. Ho tla sekasekoa eng thutong ee?
3 Hosea e ne e se eena moprofeta feela ea ileng a totobatsa pono ea Molimo mabapi le bolotsana, e leng pono eo ho hlokahalang hore re be le eona haeba re batla ho thabela bophelo. Sehloohong se fetileng, re sekasekile karolo e khōlō ea molaetsa oa Malakia oa boprofeta, re qala ka khaolo ea pele ea buka ea hae. Joale, a re reteleheleng khaolong ea bobeli ea buka eo ’me re bone kamoo pono ea Molimo mabapi le bolotsana e eloang hloko ka ho eketsehileng kateng. Le hoja Malakia a ne a tšohla boemo bo neng bo le teng har’a batho ba Molimo lilemo tse mashome ka mor’a ho khutla botlamuoeng Babylona, khaolo ena ea bobeli e na le moelelo oa sebele ho rōna kajeno.
Baprista ba Molato
4. Jehova o ile a lemosa baprista eng?
4 Khaolo ea 2 e qala ka khalemelo ea Jehova ho baprista ba Bajuda ka lebaka la ho kheloha litsela tsa hae tse lokileng. Haeba ba ne ba sa ele hloko keletso ea hae ’me ba lokise litsela tsa bona, joang kapa joang ba ne ba tla tleloa ke liphello tse bohloko. Hlokomela litemana tse peli tse qalang, li re: “‘Taelo ena e ea ho lōna, baprista. Haeba le sa mamele, ’me haeba le sa ho behe pelong hore le tlotlise lebitso la ka,’ ho boletse Jehova oa mabotho, ‘ka sebele le ’na ke tla romela thohako holim’a lōna, ’me ke tla rohaka litlhohonolofatso tsa lōna.’” Hoja baprista ba ne ba rutile batho ho boloka melao ea Molimo ’me ba e bolokile, ba ka be ba fumane tlhohonolofatso. Empa kaha ba ne ba hlokomolohile thato ea Molimo, ho ne ho tla tla thohako, bomalimabe. Esita le litlhohonolofatso tseo baprista ba neng ba ka li phatlalatsa, li ne li tla fetoha thohako.
5, 6. (a) Ke hobane’ng ha baprista ba ne ba le molato ka ho khetheha? (b) Jehova o ile a bontša joang hore o nyelisa baprista?
5 Ke hobane’ng ha baprista ba ne ba le molato ka ho khetheha? Temana ea 7 e fana ka lebaka le leng le hlakileng: “Molomo oa moprista ke oona o lokelang ho boloka tsebo, ’me batho ba lokela ho batla molao molomong oa hae; kaha ke lenģosa la Jehova oa mabotho.” Lilemo tse fetang sekete pejana, melao ea Molimo e neng e filoe Baiseraele ka Moshe e ne e bolela hore baprista ba na le mosebetsi oa ho ‘ruta bara ba Iseraele melao eohle ea tsamaiso eo Jehova a neng a e boletse.’ (Levitike 10:11) Ka masoabi, hamorao, mongoli oa 2 Likronike 15:3 o ile a tlaleha hore “ka matsatsi a mangata Baiseraele ba ne ba se na Molimo oa ’nete ebile ba se na moprista ea rutang ’me ba se na Molao.”
6 Mehleng ea Malakia, lekholong la bohlano la lilemo B.C.E., boemo ba baprista bo ne bo ntse bo tšoana. Ba ne ba hlōloa ho ruta batho Molao oa Molimo. Kahoo, baprista bao ba ne ba tšoanela ho ikarabella. Hlokomela mantsoe a matla ao Jehova a a tobisang ho bona. Malakia 2:3 e re: “Ke tla hasanya bolokoe lifahlehong tsa lōna, bolokoe ba mekete ea lōna.” Ke khalemelo e matla hakaakang! Bolokoe ba liphoofolo tsa mahlabelo bo ne bo lokela ho ntšetsoa ka ntle ho liahelo ’me bo chesoe. (Levitike 16:27) Empa ha Jehova a ba bolella hore ho e-na le hoo ba ne ba tla hasoa ka bolokoe lifahlehong, hoo ho bontša ka ho hlaka hore o ne a nyelisa le ho lahla mahlabelo a bona le ba a nyehelang.
7. Ke hobane’ng ha Jehova a ne a halefetse mesuoe ea Molao?
7 Makholo a lilemo pele ho mehla ea Malakia, Jehova o ne a file Balevi kabelo ea ho hlokomela tabernakele ’me hamorao esita le tempele le tšebeletso e halalelang. E ne e le mesuoe sechabeng sa Iseraele. Ho phethahatsa ha bona kabelo ea bona ho ne ho tla bolela bophelo le khotso bakeng sa bona le bakeng sa sechaba. (Numere 3:5-8) Leha ho le joalo, Balevi ba ile ba felloa ke tšabo ea Molimo eo ba neng ba e-na le eona pele. Kahoo, Jehova o ile a re ho bona: “Le khelohile tseleng. Le entse hore ba bangata ba khoptjoe molaong. Le sentse selekane sa Levi . . . Le [ne le] sa boloke litsela tsa ka.” (Malakia 2:8, 9) Ka hore baprista ba hlōlehe ho ruta ’nete le ka mohlala oa bona o mobe, ba ile ba khelosa Baiseraele ba bangata, kahoo Jehova o ne a ba halefetse ka nepo.
Ho Boloka Litekanyetso Tsa Molimo
8. Na ke ntho e boima ho lebella hore batho ba boloke litekanyetso tsa Molimo? Hlalosa.
8 Re se ke ra nahana hore baprista bao ba ne ba lokela ho qeneheloa le hore ba ka be ba ile ba tšoareloa hobane e ne e le batho feela ba sa phethahalang ’me ba ne ba ke ke ba lebelloa ho boloka litekanyetso tsa Molimo. ’Nete ke hore batho ba ka boloka litaelo tsa Molimo, etsoe Jehova ha aa lebella hore ba etse seo ba ke keng ba se khona. Ho ka etsahala hore ebe baprista ba bang nakong eo ba hlile ba boloka litekanyetso tsa Molimo, ’me ha ho pelaelo hore Jesu, “moprista ea phahameng,” ea ileng a tla hamorao, o ile a li boloka. (Baheberu 3:1) Ka eena, kannete ho ne ho ka thoe: “Molao oa ’nete o bile molomong oa hae, ’me ha ho na ho se loke ho neng ho tla fumanoa molomong oa hae. O tsamaile le ’na ka khotso le ka ho loka, ’me o khutlisitse ba bangata phosong.”—Malakia 2:6.
9. Ke bo-mang ba faneng ka ’nete ea Bibele ka botšepehi mehleng ea rōna?
9 Ho fapana le hoo, ka nako e fetang lilemo tse lekholo joale, barab’abo Kreste ba tlotsitsoeng, ba nang le tšepo ea ho phela leholimong, ba sebelelitse e le “boprista bo halalelang, ho nyehela mahlabelo a moea a amohelehang ho Molimo.” (1 Petrose 2:5) Ba etelletse pele ho faneng ka linnete tsa Bibele ho ba bang. Kaha u ithutile linnete tseo ba li rutang, na ha ua rua tsebo ea hore molao oa ’nete o melomong ea bona? Ba thusitse ho sokolla ba bangata phosong ea bolumeli, hoo hona joale ho nang le ba limilione lefatšeng lohle ba ithutileng linnete tsa Bibele le ba nang le tšepo ea bophelo bo sa feleng. Bana le bona ba na le tokelo ea ho ruta ba bang hape ba limilione molao oa ’nete.—Johanne 10:16; Tšenolo 7:9.
Lebaka la ho Hlokomela
10. Ke hobane’ng ha ho hlokahala hore re hlokomele?
10 Leha ho le joalo, ho hlokahala hore re hlokomele. Re ka tloha ra lahleheloa ke thuto e hlakileng ea Malakia 2:1-9. Na re hlokolosi hore ho se loke ho se ke ha fumanoa melomong ea rōna? Ka mohlala, na kannete litho tsa malapa a rōna li ka tšepa seo re se buang? Na bara le barali babo rōna ka phuthehong ba ka tšepa seo re se buang? Ho ka ba bonolo haholo ho ba le mokhoa oa ho bua ka leleme le monate e le hore re se ke ra itsoakelletsa ka mantsoe empa e le hore re thetsa ba bang ka boomo. Kapa motho a ka ’na a fetelletsa kapa a pata litaba tse itseng tsa khoebo. Na Jehova a ke ke a hlokomela seo? ’Me haeba re latela mekhoa e joalo, na a ka amohela mahlabelo a thoriso a tsoang melomong ea rōna?
11. Ke bo-mang bao ho hlokahalang hore ba hlokomele ka ho khetheha?
11 Ha e le ba nang le tokelo ea ho ruta Lentsoe la Molimo ka liphuthehong kajeno, Malakia 2:7 e lokela ho ba temoso ho bona. E bolela hore melomo ea bona ‘ke eona e lokelang ho boloka tsebo ’me batho ba lokela ho batla molao’ melomong ea bona. Boikarabelo bo boholo bo holim’a mesuoe e joalo, hobane Jakobo 3:1 e bontša hore ba “tla amohela kahlolo e boima haholo.” Leha ba lokela ho ruta ka cheseho le ka mafolofolo, ho ruta ha bona ho lokela ho thehoa ka tieo Lentsoeng le ngotsoeng la Molimo le boitsebisong ba mokhatlo o hlophisitsoeng oa Jehova. Ka tsela eo ba tla ‘tšoaneleha ka ho lekaneng ho ruta ba bang.’ Kahoo, baa eletsoa: ‘Etsang sohle se matleng a lōna ho itlhahisa le amoheleha ho Molimo, basebetsi bao ho seng letho leo ba ka hlajoang ke lihlong ka lona, ba tšoarang lentsoe la ’nete ka nepo.’—2 Timothea 2:2, 15.
12. Ba rutang ba lokela ho ba hlokolosi ka eng?
12 Ha re se hlokolosi, re ka ’na ra oela tekong ea ho ikenyetsa pono ea rōna kapa maikutlo ho ruteng ha rōna. Hoo e ka ba kotsi e khōlō ho motho ea nang le maikutlo a matla kapa ea nang le tšekamelo ea ho tšepa liqeto tsa hae esita leha li le khahlanong le se rutoang ke mokhatlo o hlophisitsoeng oa Jehova. Empa Malakia khaolo ea 2 e hatisa hore re lokela ho lebella hore mesuoe ea phutheho e khomarele tsebo e tsoang ho Molimo, eseng maikutlo a botho, a ka ’nang a khopisa linku. Jesu o itse: “Mang kapa mang ea khopisang e mong oa ba banyenyane bana ba behang tumelo ho ’na, ho molemo haholo ho eena hore leloala le kang le sothoang ke esele le leketlisoe molaleng oa hae ’me a tebisoe leoatleng le pharaletseng, le bulehileng.”—Matheu 18:6.
Ho Nyalana le Motho ea sa Lumelang
13, 14. Tsela e ’ngoe ea bolotsana eo Malakia a ileng a hlokomelisa ka eona ke efe?
13 Ho tloha temaneng ea 10 ho ea pele, Malakia khaolo ea 2 e hlokomelisa ka bolotsana ka tsela e hlileng e tobileng. Malakia o lebisa tlhokomelo litseleng tse peli tse amanang, tseo a ileng a sebelisa lentsoe “bolotsana” ho tsona. Tabeng ea pele, hlokomela hore Malakia o ile a etella keletso ea hae pele ka lipotso tsena: “Na kaofela ha rōna ha re na ntate a le mong? Na ha rea bōptjoa ke Molimo a le mong? Ke hobane’ng ha re sebetsana ka bolotsana, ho silafatseng selekane sa baholo-holo ba rōna?” Joale temana ea 11 e phaella ka ho bolela hore tsela ea Baiseraele ea bolotsana e tšoana le ho silafatsa “khalalelo ea Jehova.” Ba ne ba etsa’ng ee e neng e tebile hakaale? Temana ena e khetholla e ’ngoe ea litsela tsena tse fosahetseng, e re: Ba ne ba “ruile morali oa molimo osele joaloka monyaluoa.”
14 Ka mantsoe a mang, Baiseraele ba bang, bao e neng e le karolo ea sechaba se inehetseng ho Jehova, ba ne ba nyalane le batho ba sa mo rapeleng. Litemana tse potolohileng li re thusa ho bona hore na ke hobane’ng ha taba ena e ne e tebile hakana. Temana ea 10 e re ba ne ba e-na le ntate a le mong. Ha ho boleloe Jakobo (ea ileng a boela a rehoa Iseraele), kapa Abrahama kapa esita le Adama. Malakia 1:6 e bontša hore Jehova e ne e le eena “ntate a le mong.” Sechaba sa Iseraele se ne se e-na le kamano le eena, se kopanela selekaneng se entsoeng le baholo-holo ba sona. O mong oa melao ea selekane seo o re: “U se ke ua etsa selekane sa lenyalo le tsona. U se ke ua fana ka morali oa hao ho mora oa hae, ’me u se ke ua nkela mora oa hao morali oa hae.”—Deuteronoma 7:3.
15. (a) Ba bang ba ka leka ho lokafatsa ho nyalana le motho ea sa lumelang joang? (b) Jehova o itlhalosa joang tabeng ea lenyalo?
15 Ba bang kajeno ba ka ’na ba re: ‘Motho eo ke mo ratang oa ikhetha. Mohlomong a ka ’na a amohela borapeli ba ’nete.’ Monahano o joalo o tiisa temoso ena e bululetsoeng, e reng: “Pelo e bolotsana ho feta ntho leha e le efe ’me e tsitlella seo e se batlang.” (Jeremia 17:9) Pono ea Molimo ka ho nyalana le motho ea sa lumelang e hlakisoa ho Malakia 2:12, e reng: “Jehova o tla felisa e mong le e mong ea ho etsang.” Kahoo, Bakreste ba phehelloa ho nyala “feela Moreneng.” (1 Bakorinthe 7:39) Tsamaisong ea lintho ea Bokreste, molumeli ha a ‘felisoe’ ka lebaka la ho nyalana le motho ea sa lumelang. Leha ho le joalo, haeba ea sa lumelang a lula ho se lumeleng ha hae, ho tla etsahala’ng ka eena haufinyane ha Molimo a felisa tsamaiso ee?—Pesaleme ea 37:37, 38.
Ho Tšoara Molekane Hampe
16, 17. Ba bang ba ne ba nka tsela efe ea bolotsana?
16 Joale Malakia o fetela bolotsaneng ba bobeli: ho tšoara molekane hampe, haholo-holo ka ho mo hlala ntle ho mabaka. Temana ea 14 ea khaolo ea 2 e re: “Jehova o fane ka bopaki pakeng tsa hao le mosali oa bocha ba hao, eo u sebetsaneng le eena ka bolotsana, le hoja e le molekane oa hao le mosali oa selekane sa hao.” Ka ho sebetsana ka bolotsana le basali ba bona, banna ba Bajuda ba ile ba etsa hore aletare ea Jehova e ‘koaheloe ke meokho.’ (Malakia 2:13) Banna bao ba ne ba hlala ka mabaka a sa lumelloeng ke molao, ntle ho mabaka ba tlohela basali ba bocha ba bona, mohlomong hore ba nyale basali ba bacha kapa ba bahetene. ’Me baprista ba tletseng bobolu ba ne ba ho lumella! Empa Malakia 2:16 e re: “‘O hloile tlhalo,’ ho boletse Jehova Molimo oa Iseraele.” Hamorao, Jesu o ile a bontša hore boitšoaro bo bobe ke lona lebaka feela la ho hlala le ka lokollang molekane ea seng molato hore a kene lenyalong hape.—Matheu 19:9.
17 Nahana ka botebo ka mantsoe a Malakia ’me u bone kamoo a ipiletsang kateng lipelong tsa rōna le moseng oa rōna. O bua ka “molekane oa hao le mosali oa selekane sa hao.” Monna e mong le e mong ea amehang o ne a nyetse molumeli-’moho le eena, mosali oa Moiseraele, a mo khetha e le motsoalle ea ratoang, molekane oa kamehla. Le hoja mohlomong ba ne ba nyalane ba sa le bacha, ho feta ha nako le ho qala ha botsofali li ne li sa senye selekane seo ba neng ba kene ho sona, ke hore, tumellano ea lenyalo.
18. Keletso ea Malakia mabapi le bolotsana e sebetsa ka litsela life kajeno?
18 Keletso e mabapi le maemo ana e sebetsa ka matla a lekanang kajeno. Ho utloisa bohloko hore ba bang ba hlokomoloha taelo ea Molimo ea ho nyala feela Moreneng. Ho boetse hoa soabisa hore ba bang ha ba tsoele pele ho boloka manyalo a bona a tiile. Ho e-na le hoo, ba beha mabaka ebe ba phehella tsela eo Molimo a e hloileng ka ho hlala ntle ho mabaka a Mangolo e le hore ba nyalane le batho ba bang. Ka ho etsa lintho tsena, ba “khathalitse Jehova.” Khale koana mehleng ea Malakia, ba neng ba hlokomoloha keletso ea Molimo ba ne ba bile ba le sebete hoo ba neng ba nka hore pono ea Jehova ha ea loka. Ha e le hantle, ba ne ba re: “Molimo oa toka o hokae?” Monahano oa bona o ne o fapohile hakaakang! A re se keng ra oela lerabeng leo.—Malakia 2:17.
19. Banna le basali ba ka fumana moea oa Molimo joang?
19 Ho hotle ke hore Malakia o bontša hore banna ba bang ba mehleng ea hae ba ne ba sa sebetsane ka bolotsana le basali ba bona. ‘Moea o halalelang oa Molimo o ne o setse ho bona.’ (Temana ea 15) Ho thabisang ke hore mokhatlo o hlophisitsoeng oa Molimo kajeno o tletse banna ba joalo ba ‘abelang basali ba bona tlhompho.’ (1 Petrose 3:7) Ha ba hlekefetse basali ba bona, ha ba tsitlelle mekhoeng e hlephileng ea ho kopanela liphate, ’me ha ba hlompholle basali ba bona ka ho bonya le basali ba bang kapa ka ho shebella litšoantšo tsa bootsoa. Mokhatlo o hlophisitsoeng oa Jehova o boetse o hlohonolofalitsoe ka basali ba bangata ba Bakreste ba tšepahalang ho Molimo le melao ea hae. Banna le basali bana kaofela ba tseba seo Molimo a se hloileng, ’me baa nahana ebile ba etsa lintho ka tšoanelo. Tsoelang pele le tšoana le bona le “mamela Molimo e le ’musi” ’me le ntse le hlohonolofatsoa ka moea oa hae o halalelang.—Liketso 5:29.
20. Ho atamela nako efe bakeng sa moloko oohle oa batho?
20 Haufinyane, Jehova o tla ahlola lefatše lena kaofela. Motho e mong le e mong o tla lokela ho ikarabella ho eena bakeng sa litumelo le liketso tsa hae. “E mong le e mong oa rōna o tla ikarabella ho Molimo.” (Baroma 14:12) Kahoo, potso e utloahalang mona ke ena: Ke mang ea tla pholoha letsatsi la Jehova? Sehloohong sa boraro ebile e le sa ho qetela letotong lena re tla tšohla taba ena.
Na U ka Hlalosa?
• Jehova o ile a khalemela baprista ba Iseraele ka lebaka lefe la bohlokoa?
• Ke hobane’ng ha litekanyetso tsa Molimo li sa phahama haholo hoo batho ba ke keng ba li boloka?
• Ke hobane’ng ha re lokela ho ba hlokolosi ho ruteng ha rōna kajeno?
• Ke mekhoa efe e ’meli eo Jehova a ileng a e nyatsa ka ho khetheha?
[Setšoantšo se leqepheng la 15]
Mehleng ea Malakia baprista ba ile ba khalemelloa ho se ee ka litsela tsa Jehova
[Setšoantšo se leqepheng la 16]
Re lokela ho ba hlokolosi hore re rute litsela tsa Jehova, eseng ho ntšetsa pele lipono tsa rōna
[Setšoantšo se leqepheng la 18]
Jehova o ile a nyatsa Baiseraele ba neng ba hlala basali ba bona ka mabaka a fokolang ’me ba nyala basali ba bahetene
[Setšoantšo se leqepheng la 18]
Bakreste kajeno ba hlompha selekane sa bona sa lenyalo