Lipotso tse Tsoang ho Babali
◼ “Peō ea Molimo” e boleloang ho Malakia 2:15 (NW) ke eng?
Karolo e ’ngoe ea temana ena e rarahaneng e re: “’Me ho na le e mong ea sa kang a ho etsa, kaha o ne a e-na le karolo e setseng ea moea. ’Me eo o ne a batla eng? Peō ea Molimo.” Ka ho totobetseng “peo” ena e bolela sechaba sa Iseraele, seo ka nako eo temana ena e neng e ngoloa se neng se le kotsing ea ho silafala bolumeling.
Malakia o profetile nakong ea ha boitšoaro ba sechaba bo ne bo senyehile. Banna ba bang ba Baiseraele ba ne ba sa ‘nyale barali ba melimo esele feela’ empa hape ba ne ba hlala basali ba bona ba matsoa-thaka ba Bajode, ‘basali ba bocha ba bona,’ hore mohlomong ba nyale basali ba banyenyane haholoanyane ba bahetene. Leha ho le joalo, hase banna bohle ba Baiseraele ba ileng ba etsa “manyala” ana. (Malakia 2:11, 13, 14; Deuteronoma 7:3, 4) Ka ho hlakileng a bua ka batho ba ileng ba hana ho qhala lilekane tsa bona tsa lenyalo le barapeli bahabo bona ba Jehova, Malakia o ile a ngola: “’Me ho na le e mong ea sa kang a ho etsa, kaha o ne a e-na le karolo e setseng ea moea.”
“Moea” ona ke moea o halalelang oa Molimo, oo a neng a o tšolletse holim’a sechaba sena. Leha ho le joalo, Baiseraele ba sa utloeng ba ne ba hana, ’me kahoo ba soabisa moea oo. (Esaia 63:10; Liketso 7:51-53; bapisa Ba-Efese 4:30.) Bajode ba bang ba ne ba tšepahala melaong ea Molimo, ’me ka kutlo ea bona ba ne ba bolokile ‘ho neng ho setse ha moea oo.’ Barapeli bana ba tšepahalang ba ne ba sa batle monyaka oa bona oa boikhabi. Ka motho ea joalo, Malakia o ngotse: “Eo o ne a batla eng? Peō ea Molimo.” “Peō” ena e ne e le sechaba sa Iseraele ea boholo-holo, seo Malakia a itseng se ne se ‘bōpiloe ke Molimo.’ ‘Pōpo’ ena e etsahetse ha Jehova a kenya Baiseraele selekaneng le eena Thabeng ea Sinai, a ba etsa ‘letlotlo la hae la sebele’ le “sechaba se halalelang.” “Peō” ea ’nete ea Abrahama e neng e tla hlohonolofatsa batho bohle ba lefatše e ne e tla tla ka sechaba sena.—Malakia 2:10; Exoda 19:5, 6; Genese 22:18.
Leha ho le joalo, Baiseraele ba ne ba lokela ho tsoela pele ba hloekile bolumeling ka hore ba se ke ba nyallana le batho ba lichaba tse neng li sa rapele Jehova. Bobe ba batho ba joalo bo ne bo tla ba silafatsa, joalokaha ho ka bonoa boemong ba mehleng ea Esdrase. Baiseraele joale ba ‘nyala barali ba bona [ba lichaba tse ba pota-potileng], ba ba nyalisa le bara ba bona, ’me mofuta [peō] o halalelang oa itsoakanya le lichaba tsa naha tseo.’ (Esdrase 9:2) ‘Bobe bona bona bo boholo’ bo ile ba etsahala mehleng ea Nehemia, ea phetseng mehleng ea Malakia. Banna ba Bajode ba neng ba tšepahala ho Molimo ba bona kotsi e hlakileng ea moea ho bona le ho bana ba tsoetsoeng ka manyalo a joalo. Ho ne ho e-na le kotsi ea ho huleloa thōko le borapeli ba Jehova ke mosali ea neng a sa ineela ho Eena. Nehemia o bile a tlaleha hore har’a Bajode ba neng ba kene manyalong a tsoakaneng, ‘ha ho lea mong oa bana ba bona ea neng a tseba ho bua Sejode.’—Nehemia 13:23-27.
Bajode ba sa tšepahaleng ba ne ba ipatlela monyaka ho sa tsotellehe matla a kotsi a bolumeli sechabeng sa habo bona, “peō ea Molimo.” Hase feela Malakia a ileng a khothatsa: “Iponeleng hle meeeng ea lōna; u se ke ua etsa ka bolotsana ho mosali oa bocha ba hao!” (Malakia 2:15) Bajode ba tšepahalang ba ile ba alosa meea ea bona, kapa boikutlo ba bona e le hore ba ka lula ba tšepahala ho basali ba bona ba Bajode. Banna bana ba ne ba nka bohloeki ba bolumeli ba “sechaba se halalelang” sa bona e le ba bohlokoa haholo. Ba ne ba lakatsa hore bana ba bona ba bale Lentsoe la Molimo ’me ba hōlele ho rata Jehova, ba tlatsetsa matleng a bolumeli a sechaba sena.
Bakreste ba ineetseng kajeno ho hlokahala hore ba bontše masene a tšoanang holim’a meea ea bona, kapa boikutlo bo ba laolang. Haeba ba le lenyalong, batho bana ho hlokahala hore ba qobe ho hlala balekane ba bona ka bolotsana. ’Me Mokreste oa lesooa o lokela ho ela hloko keletso ea moapostola Pauluse ea ho nyala feela “Moreneng,” a kena lenyalong feela le paki e ’ngoe e ineetseng le ho kolobetsoa ea Jehova.—1 Ba-Korinthe 7:39.