Pono Ea Bibele

Molimo o Hloile Tlhalo ea Mofuta Ofe?

MOSALI e mong oa Mokreste eo monna oa hae a neng a sa ka a tšepahala o ile a ngola: “Mathata a ileng a tsamaisana le tlhalo ea ka a ne a le mangata. Nako ea ho itloaetsa boemo ha e bonolo. Ke ile ka tlameha ho itloaetsa boemo eseng feela kelellong empa le maemong a lichelete haesita le moeeng. Ke ne ke ipotsa hore na Jehova o tla hlohonolofatsa qeto ea ka, ke tseba hore Mangolo a re o hloile tlhalo. Ke ne ke lula ke tšoenyehile ka hona.”

Ha lenyalo le fela, mathata ’ona ha a fele. Hang-hang ho hlaha mofuta o mocha oa mathata. Maikutlo—khatello ea maikutlo, bolutu, le ho ikutloa motho a le molato—a itlhahelang ka tšohanyetso. Lintoa tsa ho hōlisa bana tse lokelang ho loanoa. Mora kapa morali ea llelang ’Mè kapa Ntate oa hae. Mathata a lichelete a hlahisang khatello. Ho leka ho sebetsana ka katleho le maemo a katamelano e haufi-ufi a lumelloang lenyalong feela.

Ho boetse ho lokela ho nahanoa ka pono ea Molimo. Bibele e re Molimo ‘o hloile tlhalo.’ (Malakia 2:16) Na mantsoe aa a bolela hore Molimo o hloile tlhalo eohle? Ka hona, na Mokreste o lokela ho ikutloa a le molato ka ho batla tlhalo ha molekane e mong a sa tšepahala? Bakeng sa ho fumana likarabo, a re shebeng maemo a mehleng ea Malakia a ileng a susumetsa Molimo hore a re o hloile tlhalo.

“Le se ke la Etsa ka Bolotsana”

Malakia o ile a profeta ka mor’a 443 B.C.E., hoo e ka bang lilemo tse lekholo ka mor’a hore batšoaruoa ba Bajode ba khutle Babylona. Ho ne ho hlahile maemo a tepeletsang Juda, haholo-holo har’a baprista. (Malakia 2:7-9) Litloaelo tse kang ho bua leshano, bofebe, ho qhekella, le khatello li ne li tloaelehile har’a Baiseraele ka kakaretso. (Malakia 3:5) Maemo ana a ne a phahamisa lipelaelo tse ngata hoo ba bang ba ileng ba etsa qeto: “Ha ho thuse letho ho sebeletsa Molimo!”—Malakia 3:14.

Bobolu ba bolumeli le ba boitšoaro mehleng ea Malakia bo ile ba boela ba bonahatsoa ka tlhompho e fokotsehang bakeng sa lenyalo. Banna ba bangata ba Baiseraele ba ne ba hlala basali ba bocha ba bona, mohlomong e le hore ba nyale basali ba bacha ba bahetene. Aletare ea Jehova e ile ea tlala meokho ea basali ba qheletsoeng ka thōko ba neng ba tla sehalalelisisong ho tla lla le ho tla feheloa ka pel’a Molimo.—Malakia 2:13-15.

Jehova Molimo o ile a ikutloa joang ka tlhalo e joalo? O ile a lemosa tjena ka Malakia: “Iponeleng hle meeeng ea lōna; u se ke ua etsa ka bolotsana ho mosali oa bocha ba hao. Hobane ke hloile hlalo, ho bolela Jehova, Molimo oa Iseraele . . . Iponeleng hle meeeng ea lōna, le se ke la etsa ka bolotsana.” (Malakia 2:15, 16) Ho latela Theological Wordbook of the Old Testament, lentsoe la Seheberu le fetoletsoeng e le ‘ho etsa ka bolotsana’ le bolela “ho etsa ka mano, (ho etsa ka) ho se tšepahale.” Ho Pesaleme ea 59:5 (NW), mofuta oa leetsi le tšoanang o fetoletsoe e le “mahlabaphio.”

Re e-na le boitsebiso bo joalo bo akaretsang, re ka utloisisa hamolemo mantsoe a ho Malakia 2:16: “Ke hloile hlalo.” Jehova o hloile mofuta oa tlhalo o akareletsang ho lahla molekane e mong ntle ho mabaka bakeng sa ho nka e mong. Ka mohlala, monna ea etsang bofebe ebe o hlala molekane oa hae ea se nang molato eo a sa rate kapa a mo qobella hore eo a mo hlale e le hore a ka nyala motho e mong, ka sebele o ne a tla be a etsa ka bolotsana ho mosali oa hae. Tšoaro ena e thetsang, e hlokang botšepehi ho molekane e mong ke sebe se tšabehang mahlong a Molimo. Monna ea nkang lilemo tse molemohali tsa bophelo ba mosali ebe oa mo lahla, mohlomong ka lebaka la hobane a rata mosali e mong e monyenyane, ka sebele ke lehlabaphio.a

Leha ho le joalo, ho thoe’ng ka molekane ea se nang molato ea khethang ho hlala molekane ea entseng bofebe? Na Molimo o hloile le tlhalo e joalo?

Mohlala oa Molimo ka Boeena

Na ka sebele Molimo a ka tseba boikutlo ba ho talimana le qeto ea hore na motho a hlale molekane ea entseng bofebe kapa che? Ka mokhoa oa tšoantšetso, Jehova o ne a inka a nyetse sechaba sa boholo-holo sa Iseraele ka lebaka la selekane sa hae le sona. (Esaia 54:1, 5, 6; 62:1-6; Jeremia 31:31, 32) Joaloka monna, Jehova o ile a tšepahala ka mehla, ha ho mohla a kileng a lebisa thahasello ea hae lichabeng tse ling. (Pesaleme ea 147:19, 20; Amose 3:1, 2) Empa ho thoe’ng ka Iseraele? Sechaba seo se ile sa ipaka e le mosali oa mofuta ofe?

Ka kakaretso sechaba seo se ile sa ipaka se sa tšepahalle selekane, qetellong sa fihlela boemo bo hlalositsoeng thapelong e tlalehiloeng ho Daniele 9:5, 6: “Re sitiloe, re entse bokhopo, re entse ka bolotsana le ka boikhantšo, re khelohile litaelo le likahlolo tsa hao. Ha rea ka ra utloa baprofeta, bahlanka ba hao, ba buileng ka lebitso la hao ho marena a rōna, le ho mahosana a rōna, le ho bo-ntat’a rōna, le ho sechaba kaofela sa naha.” Mahlong a Jehova, ho se tšepahale ho joalo ho ne ho tšoana le ha mosali a etsa bohlola.—Jeremia 3:1.

Ka mor’a lilemo tse makholo tsa mamello le tiisetso, Jehova o ile a etsa joang? Ka ho nka khato e matla ea kahlolo, pele a leleka merabe e ka leboea eaba o leleka e ka boroa naheng ea ’ona a e lelekela botlamuoeng, Jehova, ha e le hantle, o ile a hlala sechaba seo. (Jeremia 3:8; Daniele 9:11, 12) Kahoo ha ho talingoa mohlala oa hae ka boeena, Jehova Molimo a ka hloea joang ha molekane ea se nang molato a khetha ho hlala ea sa tšepahallang kano ea lenyalo?

Lenyalo ke tokisetso e halalelang mahlong a Molimo, ’me ba kenang ho eona ha baa lokela ho nka hanyenyane kano eo ba e entseng. (Ba-Heberu 13:4) Empa haeba molekane oa motho a sa tšepahalla kano ka ho etsa “bohlola,” Molimo o fa ea se nang molato tokelo ea ho etsa qeto ea ho tšoarela kapa ho batla tlhalo. (Mattheu 19:9, NW) Eo ke qeto e thata, eo molekane ea se nang molato a lokelang ho e etsa a le mong. Haeba ea se nang molato a etsa qeto ea ho felisa lenyalo, ha aa lokela ho ikutloa a le molato ka ho batla tlhalo. Hopola hore Jehova ha aa hloea tlhalo eohle, empa mofuta oa tlhalo o akareletsang ho lahla hoo eseng ha mangolo molekane e mong hore motho a nke e mong.b

[Mongolo o botlaaseng ba leqephe]

[Tlhaloso ea Moo Setšoantšo se Nkiloeng Teng e leqepheng la 29]

Historic Costume in Pictures/ Dover Publications, Inc., New York