Ho Boloka Khotso le Bohloeki ka Phuthehong

SELEMO le selemo batho ba likete ba phethahatsa boprofeta ba Bibele ka ho phallela ntlong ea Jehova ea borapeli bo hloekileng. (Mik. 4:​1, 2) Ka sebele re thabela ho ba amohela ka ‘phuthehong ea Molimo’! (Lik. 20:​28) Ba ananela monyetla oa ho sebeletsa Jehova le rona le ho thabela ho ba har’a batho ba Molimo ba hloekileng le ba nang le khotso. Re thusoa ke moea o halalelang oa Molimo le keletso e bohlale e fumanoang Lentsoeng la hae hore re boloke khotso le bohloeki ka phuthehong.​—Pes. 119:​105; Zak. 4:6.

² Ha re sebelisa melao-motheo ea Bibele, re apara “botho bo bocha.” (Bakol. 3:​10) Re hlokomoloha liqabang le liphapang tse nyenyane. Ha re talima litaba joaloka Jehova, re tla qoba mekhoa e mebe ea lefatše lena e ka re arohanyang, ’me re sebetse hammoho re le bara ba motho.​—Lik. 10:​34, 35.

³ Leha ho le joalo, nako le nako ho hlaha mathata a ka senyang khotso le bonngoe ka phuthehong. A bakoa ke eng? Hangata a bakoa ke ho se sebelise keletso ea Bibele. Re ntse re lokela ho loantša mekhoa eo re e tloaetseng joaloka batho ba sa phethahalang. Ha ho le ea mong oa rona ea se nang sebe. (1 Joh. 1:​10) Motho e mong a ka ’na a etsa ntho e ka silafatsang phutheho. Re ka ’na ra khopisa motho e mong ka mantsoe a rona a sa nahaneleng, kapa ra khopisoa ke seo motho e mong a se buileng kapa a se entseng. (Bar. 3:​23) Joale re ka etsa’ng ho lokisa litaba?

⁴ Kaha Jehova o lerato, o ile a hla a bona esale pele hore na mathata ana a ka rarolloa joang. O sebelisa Lentsoe la hae ho re fa likeletso. Balisa ba lerato ba phutheho, e leng baholo, ba tla re thusa. Ha re sebelisa keletso ea bona e tsoang Mangolong, re ka tsosolosa likamano tse ntle le batho ba bang ’me ra lula re amoheleha ho Jehova. Haeba re lauoa kapa re khalemeloa ka lebaka la ho etsa phoso e itseng, re ka kholiseha hore khalemelo e joalo e bontša hore Ntate oa rona ea leholimong oa re rata.​—Liprov. 3:​11, 12; Baheb. 12:6.

⁵ Ka linako tse ling ho ka ’na ha hlaha liqabang kapa mathata a manyenyane pakeng tsa batho ba ka har’a phutheho. Li lokela ho rarolloa ka potlako ka lerato la bara ba motho. (Baef. 4:​26; Bafil. 2:​2-4; Bakol. 3:​12-14) Mathata a mangata a ka senyang kamano ea hao le Mokreste-’moho le uena a ka rarolloa ka ho sebelisa keletso ea moapostola Petrose ea hore re “bontšane lerato le matla haholo, hobane lerato le koahela libe tse ngata haholo.” (1 Pet. 4:8) Bibele e re: “Kaofela re khoptjoa hangata.” (Jak. 3:2) Ha re sebelisa Molao oa Khauta, re etsa ba bang lintho tsohle tseo re batlang hore ba re etse tsona, re tla ba tšoarela re be re ba leballe.​—Mat. 6:​14, 15; 7:12.

⁶ Haeba u hlokomela hore motho e mong o ile a khopisoa ke seo u se buileng kapa seo u se entseng, u lokela ho lokisa litaba kapele. U hopole hore kamano ea hao le Jehova ea ameha. Jesu o ile a eletsa barutuoa ba hae a re: “Joale, haeba u tlisa mpho ea hao aletareng ’me u hopola hore mor’eno o na le ho hong khahlanong le uena, u siee mpho ea hao moo ka pel’a aletare, ’me u tlohe; etsa khotso le mor’eno pele, ’me joale, ha u khutlile, u nyehele mpho ea hao.” (Mat. 5:​23, 24) Mohlomong ho bile le ho se utloisisane. Haeba ho joalo, le se ke la khaotsa ho buisana. Puisano e ntle pakeng tsa bohle ka phuthehong e thusa haholo hore ho qojoe ho se utloisisane le hore ho rarolloe mathata a bakoang ke ho se phethahale.

⁷ Ka linako tse ling, balebeli ba ka ’na ba bona ho le molemo ho eletsa motho e le hore a nahane ka tsela e nepahetseng. Hase kamehla sena se leng bonolo. Moapostola Pauluse o ile a ngolla Bakreste ba Galatia a re: “Barab’eso, esita le hoja motho a nka mohato o fosahetseng pele a o hlokomela, lona ba nang le litšoaneleho tsa moea le leke ho khutlisetsa motho ea joalo tseleng ka moea o bonolo.”​—Bagal. 6:1.

⁸ Ha balebeli ba hlokomela mohlape, ba ka sireletsa phutheho linthong tse ka senyang kamano ea eona le Molimo ’me seo se ka etsa hore ho se ke ha e-ba le mathata a tebileng hamorao. Baholo ba leka ka matla ho etsa lintho tumellanong le seo Jehova a ileng a se bua ka moprofeta Esaia, ha a re: “[E mong le e mong] e tla ba sebaka sa ho ipatela moea le sebaka sa ho ipatela pula e nang ka sefefo, joaloka melapo ea metsi naheng e se nang metsi, joaloka moriti oa lefika le leholo naheng e phophothehileng.”​—Esa. 32:2.

⁹ Moapostola Pauluse o ile a lemosa ka ba bang ba neng ba ka ba le tšusumetso e mpe ka phuthehong, a re: “Re le fa litaelo . . . hore le tlohe ho mor’abo lona e mong le e mong ea tsamaeang ka mokhoa o sa laoleheng eseng ho ea ka neano eo le e amohetseng ho rona.” O ile a boela a hlakisa polelo eo ha a re: “Haeba leha e le mang a sa mamele lentsoe la rona ka lengolo lena, le lule le mo tšoaile, le khaotse ho tloaelana le eena, e le hore a ka hlajoa ke lihlong. Leha ho le joalo le se ke la mo nka e le sera, empa le tsoele pele ho mo eletsa joaloka mor’abo lona.”​—2 Bathes. 3:​6, 14, 15.

¹⁰ Ka linako tse ling, le hoja motho a sa etsa sebe se ka etsang hore a lelekoe ka phuthehong, a ka bontša hore ha a ikokobeletse melao e tataisang Bakreste. Sena se ka akarelletsa lintho tse kang botsoa bo khopisang, ho tšoaea-tšoaea liphoso, kapa bohlasoa. Mohlomong o “kena-kenana le se sa [mo] ameng.” (2 Bathes. 3:​11) Mohlomong o qhekella ba bang kapa o ithabisa ka tsela eo ho totobetseng hore e fosahetse. Boitšoaro bona bo bobe bo ka senya phutheho lebitso ’me ho ka etsahala hore bo fetele ho Bakreste ba bang.

¹¹ Baholo ba tla leka ho thusa motho ea sa laoleheng ka hore ba mo eletse ka Mangolo. Leha ho le joalo, haeba motho eo a tsoela pele ho se natse melao-motheo ea Bibele le hoja a elelitsoe hangata, baholo ba ka ’na ba etsa qeto ea hore ho behoe puo e lemosang phutheho. Ba tla nahana ka hloko pele ba etsa qeto ea hore na ebe boemo boo bo bobe ebile bo tšoenya ba bang hoo ho hlokahalang hore ho fanoe ka puo e lemosang. Sebui se tla fana ka keletso e mabapi le boitšoaro bo joalo, empa se ke ke sa bolela lebitso la motho ea amehang. Leha ho le joalo, ba tsebang hore na ho buuoa ka mang, ba tla qoba ho tloaelana le eena, le hoja ba tla tsoela pele ho etsa lintho tse ling tse amanang le phutheho le eena, ’me ba ‘mo eletse joaloka mor’abo bona.’

¹² Re na le tšepo ea hore kameho e lerato le khato e tiileng ea Bakreste ba bang e tla thusa ea sa laoleheng hore a soabele litsela tsa hae ’me e mo susumelletse hore a bake. Ha ho totobetse hore o tlohetse mekhoa ea hae ea ho se laolehe, ha ho sa hlokahala hore a tšoaroe joaloka motho ea tšoauoeng.

¹³ Ha re tšoarela ba bang ha ba re sitetsoe, seo ha se bolele hore ha re tsotelle liphoso tsa bona kapa rea li amohela. Hase liphoso tsohle tseo re li etsang ka lebaka la ho se phethahale ke kahoo liphoso tse kholo li sa lokelang ho tlolisoa mahlo. (Lev. 19:​17; Pes. 141:5) Ho latela selekane sa Molao ho ne ho nkoa hore libe tse ling li tebile ho feta tse ling ’me ho joalo le ka phuthehong kajeno.​—1 Joh. 5:​16, 17.

¹⁴ Jesu o ile a hlalosa hore na Bakreste ba lokela ho etsa’ng haeba ho e-ba le qabang e tebileng lipakeng tsa bona. Hlokomela mehato ena eo a e thathamisitseng: “Haeba mor’eno a etsa sebe, [1] e-ea u totobatse phoso ea hae pakeng tsa hao le eena le le bang. Haeba a u mamela, u ruile mor’eno. Empa haeba a sa mamele, [2] u nke a le mong kapa ba bang ba babeli, e le hore taba e ’ngoe le e ’ngoe e ka tiisoa ka melomo ea lipaki tse peli kapa tse tharo. Haeba a sa ba mamele, [3] u bue le phutheho. Haeba a sa mamele le phutheho, ho uena a be feela joaloka motho oa lichaba le joaloka ’mokelli oa lekhetho.”​—Mat. 18:​15-17.

¹⁵ Ho ea ka papiso eo Jesu a ileng a e etsa ka mor’a sena ho Matheu 18:​23-35, ho bonahala eka se seng sa libe tseo ho buuoang ka tsona ho Matheu 18:​15-17, se amana le ho etsa bolotsana litabeng tsa lichelete le thepa kapa ho hloleha ho lefa chelete e alimiloeng. Mohlomong ke ho etselletsa motho kapa ho mo senya lebitso.

¹⁶ Haeba u e-na le bopaki ba hore motho e mong ka phuthehong o u sentse lebitso, u se ke oa potlakela ho ea ho baholo, u ba kopa hore ba kene lipakeng tsa lona. Joalokaha Jesu a elelitse, qala ka ho bua le eo u tletlebang ka eena. Leka ho rarolla bothata pakeng tsa lona le le babeli feela. U hopole hore Jesu ha aa ka a re ‘e-ea hanngoe feela, u totobatse phoso ea hae.’ Ka lebaka leo, haeba qalong a sa lumele hore o phoso ’me a sa kope tšoarelo, ho ka ’na ha e-ba molemo ho nahana ka ho ea ho eena hape. Haeba taba e ka rarolloa ka tsela ena, ka sebele ea entseng sebe o tla ananela hore ebe ha oa bolella ba bang sebe sa hae kapa oa mo senya lebitso ka phuthehong. U tla be “u ruile mor’eno.”

¹⁷ Haeba ea entseng phoso a amohela molato, a kopa tšoarelo ’me a lokisa litaba, ha ho hlokahale hore taba ena e fetele pele. Le hoja sebe seo se ne se feteletse, phoso ea mofuta ona e ka rarolloa ke batho ba amehang.

¹⁸ Haeba u sa khone ho rua mor’eno ka ho totobatsa phoso ea hae “pakeng tsa hao le eena le le bang,” joale u ka etsa kamoo Jesu a boletseng kateng​—‘nka a le mong kapa ba babeli’ ’me u bue le mor’eno hape. Bao u tsamaeang le bona ba lokela ho ba le sepheo se tšoanang le sa hao. Ho ka ba molemo ha e ka ba lipaki tse boneng se etsahetseng, empa haeba ho se na motho ea boneng, u ka ’na oa kopa motho a le mong kapa ba babeli hore a be teng ha le buisana. Ho ka etsahala hore ebe ba kile ba sebetsana le bothata bo kang boo ’me ba ka ’na ba khona ho fumana hore na se etsahetseng se fela se fosahetse kapa che. Baholo ba khethoang ho ba lipaki ha ba emele phutheho, kaha sehlopha sa baholo ha sea ba abela ka ho toba hore ba sebetse taba ena.

¹⁹ Haeba taba ena e sa loke ka mor’a ho leka ho e sebetsa ka makhetlo a ’maloa ’me u ikutloa hore u ke ke oa e tlohela, u lokela ho e tlalehela balebeli ba phutheho hobane u buile le eena le le babeli oa ba oa bua le eena u e-na le motho a le mong kapa ba babeli. Hopola hore le bona ba batla ho boloka khotso le bohloeki ka phuthehong. Ha u se u ile ho baholo, u lokela ho siea taba eo matsohong a bona ’me u tšepe Jehova. Le ka mohla u se ke oa lumella boitšoaro ba motho e mong hore bo u khopise kapa bo etse hore u hloke thabo tšebeletsong ea Jehova.​—Pes. 119:​165.

²⁰ Balisa ba mohlape ba tla etsa lipatlisiso. Haeba ho totobetse hore motho eo o u sitetsoe ka ho tebileng ebile ha a bontše pako kapa ha a ikemisetsa ho lokisa boemo, ho ka ’na ha hlokahala hore komiti ea boahloli e leleke mofosi eo ka phuthehong. Ka tsela ena e sireletsa mohlape le bohloeki ba phutheho.​—Mat. 18:17.

²¹ Libe tse tebileng tse kang boitšoaro bo bobe ba ho kopanela likobo, bofebe, bosodoma, ho nyefola, bokoenehi, borapeli ba litšoantšo le tse ling tse feteletseng tsa mofuta oo, li lokela ho sebetsoa ke komiti. (1 Bakor. 6:​9, 10; Bagal. 5:​19-21) Kaha bohloeki ba phutheho bo kotsing, libe tse tebileng joalo li lokela ho tlaleheloa baholo ’me li sebetsoe ke bona. (1 Bakor. 5:6; Jak. 5:​14, 15) Batho ba bang ba ka ’na ba ea ho baholo ho ea bolela sebe seo ba se entseng kapa ho tlaleha seo ba se tsebang ka phoso ea ba bang. (Lev. 5:1; Jak. 5:​16) Ho sa tsotellehe hore na ho tlile joang hore baholo ba tsebe ka sebe se tebileng se entsoeng ke paki e kolobelitsoeng, baholo ba babeli ba lokela ho etsa lipatlisiso. Haeba ho fumanoa hore tlaleho eo ke ’nete le hore ho na le bopaki ba hore ehlile ho entsoe sebe se tebileng, sehlopha sa baholo se tla khetha komiti ea boahloli eo bonyane e entsoeng ka baholo ba bararo hore e sebetse taba ena.

²² Baholo ba lebela mohlape ka hloko, ba batla ho o sireletsa linthong tse ka senyang kamano ea oona le Molimo. Ba boetse ba leka ho sebelisa Lentsoe la Molimo ka bohlale ho khalemela moetsalibe le hore ba matlafatse tumelo ea hae. (Juda 21-23) Sena se tumellanong le litaelo tseo moapostola Pauluse a ileng a li fa Timothea, ha a ne a ngola a re: “Ke u laela ka tieo ka pel’a Molimo le Kreste Jesu, ea reretsoeng ho ahlola ba phelang le bafu, . . . U khalemele, u nyatse ka matla, u eletse, ka tiisetso eohle le tsebo ea ho ruta.” (2 Tim. 4:​1, 2) Ho etsa sena ho ka ’na ha hloka nako e ngata, empa ke karolo ea mosebetsi o boima oa baholo. Phutheho e ananela mosebetsi oa bona ’me e nka hore “ba tšoaneloa ke tlhompho e habeli.”​—1 Tim. 5:17.

²³ Ha ho e-na le bopaki ba hore motho o molato, balebeli ba leka ka matla ho mo thusa hore a boele a be le kamano e ntle le Molimo. Haeba a bakile e le kannete ’me a ka thusoa, o tla khalemelloa lekunutung kapa ka pel’a batho ba faneng ka bopaki, ’me sena e tla ba taeo ho eena se be se etse hore ba tsebang ka taba ena ba qobe ho etsa phoso e tšoanang. (2 Sam. 12:​13; 1 Tim. 5:​20) Haeba mofosi a khalemetsoe ke komiti ea boahloli, o beheloa lithibelo. Kahoo mofosi a ka thusoa hore a ‘otlolle litsela bakeng sa maoto a hae’ ka mor’a moo. (Baheb. 12:​13) Ha ka mor’a nako e itseng ho bonahala hore mofosi o hatela pele hantle, lithibelo li tla tlosoa.

²⁴ Haeba komiti ea boahloli e etsa qeto ea hore motho o bakile empa seo a se entseng se tsebahala ka phuthehong kapa motseng kapa haeba ka mabaka a mang baholo ba lumela hore phutheho e lokela ho tsebisoa e le hore e be hlokolosi ha e sebetsana le eena, ho tla etsoa tsebiso e khutšoanyane Sebokeng sa Bophelo le Tšebeletso ea Rona. E lokela ho baleha tjena: “[Lebitso la motho] o khalemetsoe.”

²⁵ Ka linako tse ling, ho ka etsahala hore ebe mofosi o ineheletse bophelo ba boetsalibe ’me ho ke ke ha e-ba bonolo ho mo thusa. Mohlomong komiti ea boahloli ha e bone “mesebetsi e tšoanelang pako” nakong eo e buisanang le eena. (Lik. 26:​20) Komiti e lokela ho etsa’ng boemong bo joalo? E lokela ho leleka mofosi eo ea sa bakeng ka phuthehong, e le hore a se ke a itsoakanya le batho ba Jehova ba hloekileng. Ka tsela eo a ke ke a silafatsa phutheho ka mekhoa ea hae e mebe ’me e tla ba le lebitso le letle e be e hloeke. (Deut. 21:​20, 21; 22:​23, 24) Ha moapostola Pauluse a hlokomela boitšoaro bo hlabisang lihlong ba motho e mong phuthehong ea Korinthe, o ile a eletsa baholo hore ba “nehelane ka motho ea joalo ho Satane . . . e le hore moea [oa phutheho] o ka pholoha.” (1 Bakor. 5:​5, 11-13) Ho phaella moo, Pauluse o ile a bolela hore ba bang ba neng ba khaolitse ho tšepahala ho Jehova mehleng ea baapostola, ba ile ba khaoloa.​—1 Tim. 1:20.

²⁶ Ha komiti ea boahloli e fihlela qeto ea hore mofosi ea sa bakeng o lokela ho khaoloa, e lokela ho mo tsebisa qeto ena ’me e mo bolelle ka ho hlaka hore na o khaoloa ka lebaka lefe la Mangolo. E boetse e tla mo bolella hore haeba a nahana hore kahlolo eo e fosahetse ’me a lakatsa ho etsa boipiletso, a ka etsa joalo ka ho ngola lengolo le bolelang ka ho hlaka mabaka a boipiletso ba hae. O tla fuoa matsatsi a supileng a ho etsa joalo, a qalang ho baloa ho tloha ha a ne a tsebisoa qeto ea komiti. Ha ho amoheloa boipiletso bo joalo bo ngotsoeng, sehlopha sa baholo se lokela ho kopana le molebeli oa potoloho, ea tla khetha baholo ba tla sebeletsa komiting ea boipiletso hore ba mamele nyeoe eo hape. Ba tla etsa ka hohle hore ba tšoare nyeoe ea boipiletso pele ho feta beke ka mor’a hore ho fumanoe lengolo la boipiletso. Ha mofosi a entse boipiletso, tsebiso ea ho mo khaola e tla emisoa ho se hokae. Nakong eo, a ke ke a lumelloa ho araba le ho rapela libokeng kapa ho etsa mesebetsi e itseng ea phutheho.

²⁷ Boipiletso ke ketso e mosa e etsetsoang motho ea qositsoeng ’me bo mo fa monyetla oa hore ho boele ho mameloe litletlebo tsa hae. Kahoo, haeba a sa ee nyeoeng ea boipiletso ka boomo, baholo ba tla etsa tsebiso ea ho mo khaola ka mor’a hore ba leke kahohle ho teana le eena.

²⁸ Haeba mofosi a sa batle ho ipiletsa, komiti ea boahloli e lokela ho mo hlalosetsa bohlokoa ba pako le hore na ke mehato efe eo a ka e nkang e le hore a ka khutlisetsoa ka phuthehong. Sena se ka mo tsoela molemo ebile se bontša mosa ’me se lokela ho etsoa ka tšepo ea hore o tla fetola litsela tsa hae ’me a khutlisetsoe ka phuthehong.​—2 Bakor. 2:​6, 7.

²⁹ Haeba mofosi ea sa bakeng a lokela ho khaoloa, ho etsoa tsebiso e khutšoanyane, e reng feela: “[Lebitso la motho] ha e sa le e mong oa Lipaki Tsa Jehova.” Sena se tla hlokomelisa batho ba tšepahalang ba phutheho hore ba khaotse ho tloaelana le eena.​—1 Bakor. 5:11.

³⁰ Poleloana e reng “ho ikarola” e sebetsa ho motho eo e leng Paki e kolobelitsoeng, empa ka boikhethelo a latola boemo ba hae ba Bokreste ka ho bolela hore ha a sa batla ho nkoa kapa ho tsejoa e le e mong oa Lipaki Tsa Jehova. Ntle ho moo a ka ’na a bontša hore ha e sa le e mong oa Lipaki Tsa Jehova ka liketso tsa hae, tse kang ho ba setho sa mokhatlo oo sepheo sa oona se hanyetsanang le lithuto tsa Bibele se tla ahloloa ke Jehova.​—Esa. 2:4; Tšen. 19:​17-21.

³¹ Moapostola Johanne o ile a bua ka batho ba mehleng ea hae ba ileng ba khaotsa ho sebeletsa Molimo, a re: “Ba ile ba tsoa ho rona, empa e ne e se ba mofuta oa rona; etsoe haeba e ne e bile ba mofuta oa rona, ba ka be ba lutse le rona.”​—1 Joh. 2:19.

³² Ha motho a ikarotse, boemo ba hae ka pel’a Jehova bo fapane hole le ba Mokreste ea seng a sa etse mosebetsi oa boboleli. Ho ka etsahala hore ebe motho eo ha a sa etsa mosebetsi oa boboleli hobane a ne a sa ithute Lentsoe la Molimo letsatsi le le letsatsi. Kapa mohlomong o ile a hlaheloa ke mathata kapa mahloriso eaba o felloa ke cheseho ea ho sebeletsa Jehova. Baholo hammoho le Bakreste ba bang ka phuthehong ba tla tsoela pele ho thusa Mokreste ea seng a sa etse mosebetsi oa boboleli hore a boele a be le kamano e ntle le Molimo.​—Bar. 15:1; 1 Bathes. 5:​14; Baheb. 12:12.

³³ Ka lehlakoreng le leng, ha Mokreste a khetha ho ikarola, ho etsoa tsebiso e khutšoanyane ka phuthehong e reng: “[Lebitso la motho] ha e sa le e mong oa Lipaki Tsa Jehova.” Motho eo o tšoaroa ka tsela e tšoanang le ea motho ea khaotsoeng.

³⁴ Motho ea khaotsoeng kapa ea ikarotseng a ka khutlisetsoa ka phuthehong ha a bontša ka ho hlaka hore o bakile ’me ka mor’a nako e lekaneng a bontša hore o lahlile tsela ea hae ea boetsalibe. O bontša hore o lakatsa ho ba le kamano e ntle le Jehova. Leha ho le joalo, ho itšetlehile ka hore na mofosi o ne a khaotsoe ka lebaka lefe le hore na o ne a itšoere joang ka pel’a komiti ea boahloli, baholo ba lokela ho ba hlokolosi hore ho fete nako e lekaneng, mohlomong likhoeli tse ngata, selemo, kapa ho feta hore motho eo a bontše hore o bakile e le kannete. Ha sehlopha sa baholo se fumana lengolo le tsoang ho mofosi ’me a kopa ho khutlisetsoa ka phuthehong, komiti e khutlisetsang mofosi e tla bua le eena. Komiti e tla hlahlobisisa bopaki ba hore na mesebetsi ea hae e bontša pako ebe e etsa qeto ea hore na e mo khutlisetsa ka phuthehong ka nako eo kapa che.​—Lik. 26:20.

³⁵ Haeba motho ea kopang ho khutlisetsoa ka phuthehong o ne a khaotsoe ke phutheho e ’ngoe, komiti e khutlisetsang mofosi ea phuthehong eo a seng a le ho eona e tla kopana le eena ’me e mamele kopo ea hae. Ka mor’a moo, haeba komiti eo e khutlisetsang mofosi e lumellana le hore a khutlisetsoe e tla buisana le sehlopha sa baholo ba phutheho e ileng ea sebetsa taba tsa hae, e se bolelle maikutlo a eona. Likomiti tse amehang li tla sebetsa hammoho ho tiisa hore li fumane lintlha tsohle e le hore li etse qeto e nepahetseng. Leha ho le joalo, qeto ea ho khutlisetsa motho ka phuthehong e etsoa ke komiti e khutlisetsang mofosi ea phutheho e ileng ea sebetsa taba tseo ho tloha qalong.

³⁶ Ha komiti e khutlisetsang mofosi e kholisehile hore motho ea khaotsoeng kapa ea ikarotseng o bakile e le kannete ’me o lokela ho khutlisetsoa ka phuthehong, tsebiso ea hore o khutliselitsoe e etsoa phuthehong eo litaba tsa hae li ileng tsa sebetsoa teng ho tloha sethathong. Haeba motho eo a se a le phuthehong e ’ngoe, tsebiso e tla etsoa le hona phuthehong eo. E lokela ho baleha tjena: “[Lebitso la motho] o khutliselitsoe ka phuthehong ’me ke e mong oa Lipaki Tsa Jehova.”

³⁷ Baholo ba lokela ho tsebisoa haeba ngoana ea tlaase lilemong ea kolobelitsoeng a entse sebe se tebileng. Ha baholo ba sebetsa litaba tsa libe tse feteletseng tse amang ngoana ea tlaase lilemong, ho molemo hore batsoali ba kolobelitsoeng ba ngoana eo ba be teng. Ba tla leka ho sebelisana le komiti ea boahloli, ba sa leke ho sireletsa ngoana ea fositseng hore a se ke a khalemeloa ka tsela e loketseng. Le hoja ba sebetsa taba ea ngoana, baholo ba tla leka ho mo khalemela le ho mo khutlisetsa tseleng feela joalokaha ba ne ba tla etsa ha e le motho e moholo. Leha ho le joalo, haeba ngoana a sa bake, o lokela ho khaoloa.

³⁸ Baholo ba lokela ho etsa’ng ha bahoeletsi ba sa kolobetsoang ba entse sebe se tebileng? Kaha ha baa kolobetsoa, ba ke ke ba khaoloa hobane ho ka etsahala hore ebe ha ba utloisise melao ea Bibele ka ho feletseng, ’me ha ba eletsoa ka mosa seo se ka ba thusa hore ba “otlolle litsela” tsa bona.​—Baheb. 12:13.

³⁹ Haeba mohoeletsi ea sa kolobetsoang a sa bake ka mor’a hore baholo ba babeli ba kopane le eena ’me ba leke ho mo thusa, ho hlokahala hore ho tsebisoe phutheho. Ho etsoa tsebiso e khutšoanyane, e reng: “[Lebitso la motho] ha e sa le mohoeletsi ea sa kolobetsoang.” Joale phutheho e tla mo talima joaloka batho bao e kopanang le bona tšimong. Le hoja mofosi a sa khaoloa, Bakreste ba ba seli tabeng ea ho tloaelana le eena. (1 Bakor. 15:​33) Ho ke ke ha amoheloa litlaleho tsa tšebeletso ea tšimo tse tsoang ho eena.

⁴⁰ Ha nako e ntse e ea, motho eo a ka ’na a batla ho ba mohoeletsi hape. Kahoo, baholo ba babeli ba tla kopana le eena e le hore ba bone hore na o ntlafalitse kamano ea hae le Molimo. Haeba ho joalo, ho ka etsoa tsebiso e khutšoanyane e reng: “[Lebitso la motho] o boetse o nkoa e le mohoeletsi ea sa kolobetsoang.”

⁴¹ Bohle ba tlang phuthehong ea Molimo ba ka matlafatsoa tumelong ka lithuto tseo Jehova a li lokisetsang barapeli ba hae. Ho phaella moo, Jehova o sebelisa hlooho ea phutheho e leng Kreste ho re hlokomela le ho re sireletsa. (Pes. 23; Esa. 32:​1, 2) Kaha re ka phuthehong ea Molimo e nang le khotso matsatsing ana a ho qetela a tletseng likhathatso, re ikutloa re sireletsehile.

⁴² Ha re boloka phutheho e hloekile ebile e e-na le khotso, batho ba tla elelloa hore bolumeli ba rona ke ba ’nete. (Mat. 5:​16; Jak. 3:​18) Molimo o tla re hlohonolofatsa ka hore re bone ha batho ba bangata ba ithuta ka eena ’me ba tla ka phuthehong.