Jesu Bophelo le Tšebeletso tsa Hae

Lithuto Tsa Tlhalo le ho Rata Bana

JESU le barutuoa ba hae ba tseleng ea bona ho ea Jerusalema ho ea ba teng Pasekeng ea 33 C.E. Ba tšela Nōka ea Jordane ’me ba nka tsela e fetang seterekeng sa Perea. Jesu o ne a le Perea libekeng tse ’maloa pejana, empa joale o ile a bitsetsoa Judea hobane motsoalle oa hae Lazaro o ne a kula. Ha a sa ntsane a le Perea, Jesu o ile a bua le Bafarisi ka tlhalo, ’me hona joale ba phahamisa taba hape.

Har’a Bafarisi ho na le maikutlo a sa tšoaneng ka tlhalo. Moshe o itse mosali o ne a ka hlaloa ka baka la “taba e mpe ho eena.” Ba bang ba lumela hore sena se bolela feela tabeng ea ho hloka bohloeki. Empa ba bang ba nka “taba e mpe” e akarelletsa litlōlo tse nyenyane haholo. Kahoo, ba rerile ho leka Jesu, Bafarisi baa botsa: “Hleka motho o lumeletsoe ho hlala mosali oa hae ka baka la eng le eng na?” Ba kholisehile hore eng kapa eng eo Jesu a e buang e tla ’meha bothateng ho Bafarisi ba nang le pono e fapaneng.

Jesu o sebetsana le potso eo ka bohlale bo boholo, a sa ipiletse maikutlong leha e le afe a batho, empa a khutlela morao qalong ha ho theoa lenyalo. O-oa botsa, “Na ha lea ka la bala hobane ea ba entseng tšimolohong, o ba entse e le e motona le e motšehali, a re: Ka baka leo, monna o tla tlohela ntat’ae le ’m’ae, a khomarele mosali oa hae, ’me ba babeli e tla ba nama e le ’ngoe feela? Ha ho le joalo, ha ba sa hlola ba e-ba babeli, empa e le nama e le ’ngoe feela. Ke moo ke reng: Seo Molimo o se kopantseng hammoho, se se ke sa aroloa ke motho.”

Jesu o bontša hore morero oa Molimo oa mathomo ke hore balekane ba lenyalo ba khomarelane, hore ba se ke ba hlalana. Haeba ho le joalo, Bafarisi baa araba, “Moshe eena o laetse ke’ng ho nea mosali lengolo la hlalo, le ho mo hlala?”

Jesu o-oa arabela, “Moshe o le lumeletse ho hlala basali ba lōna ka baka la bothata ba lipelo tsa lōna; empa tšimolohong, ho no ho se joalo.” E, ha Molimo o ne o thea tekanyetso ea ’nete bakeng sa lenyalo tšimong ea Edene, ha oa ka oa etsa tokisetso ea tlhalo.

Jesu o tsoela pele ho bolella Bafarisi: “’Me ke re ho lōna: E mong le e mong ea hlalang mosali oa hae, ha e se ka baka la bofebe [por·neiʹa, ka Segerike], a nyala e mong, oa feba.” Ka hona o bontša hore por·neiʹa, eo e leng boitšoaro bo bobe ba botona le botšehali bo tebileng, ke oona feela motheo o amoheloang ke Molimo bakeng sa tlhalo.

Ba hlokomela hore lenyalo e lokela ho ba kopano ea ka mehla ka motheo ona feela oa tlhalo, barutuoa ba susumelletseha ho re: “Ha taba tsa monna le mosali li lutse joalo, ha ho molemo ho nyala.” Ha ho na pelaelo hore motho ea batlang ho nyala o lokela ho nka ka ho teba tlamahano ea nako eohle ea lenyalo!

Jesu o tsoela pele ho bua ka bosoha. O hlalosa hore bashanyana ba bang ba tsoaloa e le maqhalaha, ba ke ke ba kena lenyalong ka baka la ho se hōle botoneng. Ba bang ba entsoe maqhalaha ke batho, ka sehlōhō ba holofatsoa lithong tsa botona. Qetellong, ba bang ba hatella takatso ea ho nyala le ho thabela likamano tsa botona le botšehali e le hore ba ka inehela ka botlalo litabeng tse amanang le ’Muso oa maholimo. Jesu o phethela ka ho re, “Ea ka etsetsang [bosoha] sebaka a bo etsetse sebaka.”—NW.

Batho joale ba qala ho tlisa bana ba bona ba banyenyane ho Jesu. Leha ho le joalo, barutuoa ba omanya bana ’me ba leka ho ba tebela, ntle ho pelaelo ba batla ho sireletsa Jesu khatellong e sa hlokahaleng. Empa Jesu o re: “Lesang bana ba tle ho ’na, ’me le se ke la ba thibela; hobane ’muso oa Molimo ke oa ba joalo ka bona. Ka ’nete ke re ho lōna: E mong le e mong ea sa amoheleng ’muso oa Molimo joalo ka ngoana, a ke ke a kena teng.”

Ke lithuto tse ntle hakaakang tseo Jesu a fanang ka tsona mona! Hore re tle re amohele ’Muso oa Molimo, re tlameha ho etsisa boikokobetso le ho ruteha ha bana. Empa mohlala oa Jesu o boetse o bontša kamoo ho leng bohlokoa kateng, haholo-holo ho batsoali, ho qeta nako le bana ba bona. Jesu joale o bontša lerato la hae ho bana ka ho ba sika le ho ba hlohonolofatsa. Mattheu 19:1-15; Deuteronoma 24:1; Luka 16:18; Mareka 10:1-16; Luka 18:15-17.

◆ Ke pono efe e fapaneng eo Bafarisi ba nang le eona ka tlhalo, ’me joale ba leka ho leka Jesu joang?

◆ Jesu o sebetsana joang le boiteko ba Bafarisi ba ho mo leka, hona o fana ka eng e le oona motheo feela bakeng sa tlhalo?

◆ Ke hobane’ng ha barutuoa ba Jesu ba re ha ho molemo ho nyala, hona Jesu o fana ka khothalletso efe?

◆ Ke eng seo Jesu a re rutang sona ka ho sebelisana ha hae le bana ba banyenyane?