Jesu Bophelo le Tšebeletso tsa Hae

Jesu le ’Musi e Mocha oa Morui

HA JESU a phunyeletsa setereke sa Perea a lebile Jerusalema, mohlankana e mong o-oa mo mathela ’me o khumama ka mangole ka pel’a hae. Monna eo o bitsoa ’musi, mohlomong ho bolelang hore o tšoere boemo bo phahameng synagogeng ea sebaka seo kapa esita le hore ke setho sa Lekhotla le Phahameng la Bajode. Hape, o ruile haholo. O-oa botsa, “Moruti ea molemo, ke tla etsa’ng ke tle ke rue lefa la bophelo bo sa feleng?”

Jesu o-oa arabela, “U mpiletsa’ng ea molemo? Ha ho ea molemo ha e se a le mong, e leng Molimo.” Mohlomong mohlankana enoa o sebelisa “molemo” e le tlotla, kahoo Jesu o mo tsebisa hore tlotla e joalo ke ea Molimo feela.

Jesu o tsoela pele, “Empa ha u rata ho kena bophelong, u boloke melao.”

Monna eo o-oa botsa, “Efe?”

A bolela e mehlano ea melao e leshome, Jesu o-oa arabela: “E reng: U se ke ua bolaea, u se ke ua feba, u se ke ua utsoa, u se ke ua bea bopaki ba bohata, u hlonephe ntat’ao le ’m’ao.” ’Me a phaella ka molao oo e bileng e leng oa bohlokoahali, Jesu o re: “U rate oa heno joalo ka ha u ithata.”

Monna eo o arabela ka tieo eohle, “Ke e bolokile kaofela e sa le bonyenyaneng ba ka ho fihlela joale; na ke sa hloka’ng?”

Ha a mametse kōpo ea monna eo e matla, e tiileng, Jesu a utloa a mo rata. Empa Jesu o lemoha ho khomarela ha hae maruo a lintho tse bonahalang, ’me kahoo o bontša tlhoko ea hae: “U sa hloka ntho e le ’ngoe: Rekisa ka lintho tsa hao tsohle, ’me u li abele bafumanehi ’me u tla ba le letlotlo leholimong; u ntano tla, u ntatele.”

Jesu oa shebella, ntle ho pelaelo e le ka qenehelo, ha monna a phahama ’me a furalla a soabile haholo. Leruo la hae le mo foufaletsa bohlokoa ba letlotlo la ’nete. Jesu oa hlomoha, “Ho thata hakakang ho ba nang le maruo ho kena ’musong oa Molimo!”

Mantsoe a Jesu a makatsa barutuoa. Empa ba makala le ho feta ha a tsoela pele ho bolela molao o akaretsang: “Ho ka ba bonolo hore kamele e kene ka lesoba la lemao, ho e-na le hore morui a kene ’musong oa Molimo.”

Barutuoa ba batla ho tseba, “Ho ka bolokeha mang?”

A ba talimile ka ho toba, Jesu oa arabela: “Ke ntho e sitang batho, empa ha e site Molimo; hobane Molimo tsohle o ka li etsa.”

Ha a hlokomela hore ba entse khetho e fapaneng haholo ho ea ’musi e mocha oa morui, Petrose o re: “Bona, rōna re tlohetse tsohle, ’me re u latetse.” Kahoo o-oa botsa: “Re tla ba le eng ka hona?”

Jesu oa tšepisa, “Nchafalong ea tsohle, mohla Mor’a motho a lulang teroneng ea khanya ea hae, lōna ba ntatetseng, le tla lula le lōna literoneng tse leshome le metso e ’meli, le ahlole meloko ea Iseraele e leshome le metso e ’meli.” E, Jesu o bontša hore ho tla ba le nchafalo ea maemo lefatšeng e le hore lintho li ka ba joalokaha li ne li le tšimong ea Edene. ’Me Petrose le barutuoa ba bang ba tla fumana moputso oa ho busa le Kreste holim’a Paradeise ena ea lefatše lohle. Ka sebele, moputso o hlollang joalo o tšoaneloa ke boitelo leha e le bofe!

Leha ho le joalo, esita le hona joale ho na le meputso, joalokaha Jesu a hlalosa ka tieo: “Ha ho motho ea ka tlohelang ntlo, kapa banab’abo, leha e le bo-khaitselie, kapa ntat’ae, leha e le ’m’ae, kapa bana, leha e le masimo, ka baka la ka le la Evangeli, ea ke keng a neoa halekholo, joale, mehleng ena, matlo, le banab’abo, le likhaitseli, le bo-’m’ae, le bana, le masimo, hammoho le lihloriso; ’me mehleng e tla tla, a neoe bophelo bo sa feleng.”

Joalokaha Jesu a tšepisa, hohle lefatšeng moo barutuoa ba hae ba eang, ba thabela kamano le Bakreste ’moho le bona e haufi-ufi le ea bohlokoa haholoanyane ho feta e thabeloang le litho tsa lelapa hantle. ’Musi e mocha oa morui ho bonahala a lahleheloa moputsong ona le oane oa bophelo bo sa feleng ka bobeli ’Musong oa Molimo oa leholimo.

Ka morao ho moo Jesu oa phaella: “Empa ba bangata ba pele e tla ba ba morao, ’me ba morao e tla ba ba pele.” O bolela eng?

O bolela hore batho ba bangata bao e leng ba “pele” ho thabeleng litokelo tsa bolumeli, joaloka ’musi e mocha oa morui, ba ke ke ba kena ’Musong. E tla ba ba “morao.” Empa ba bangata, ho akarelletsa barutuoa ba Jesu ba ikokobelitseng, ba khelloang fatše ke Bafarisi ba iketsang ba lokileng e le ba “morao”—e le batho ba naha, kapa ‛am ha·’aʹrets—e tla ba ba “pele.” Ho ba ha bona ba “pele” ho bolela hore ba tla fumana tokelo ea ho ba babusi hammoho le Kreste ’Musong. Mareka 10:17-31; Mattheu 19:16-30; Luka 18:18-30.

◆ Ka ho totobetseng, ’musi e mocha oa morui ke ’musi oa mofuta ofe?

◆ Ke hobane’ng ha Jesu a hana ho bitsoa ea molemo?

◆ Ke joang phihlelo ea ’musi e mocha e bontšang kotsi ea ho ba morui?

◆ Ke meputso efe eo Jesu a e tšepisang balateli ba hae?

◆ Ke joang ba pele e bang ba morao, ’me ba morao e bang ba pele?