Jesu Bophelo le Tšebeletso tsa Hae

Barutuoa Baa Tsekisana ha Lefu la Jesu le Atamela

JESU le barutuoa ba hae ba pel’a Nōka ea Jordane, moo ba tšelang ba tsoa seterekeng sa Perea ho kena Judea. Ba bang ba bangata ba tsamaea le bona ho ea Pasekeng ea 33 C.E., e hōle ka beke feela kapa ho feta.

Jesu o tsamaea ka pel’a barutuoa, ’me ba makaletse boikemisetso ba hae bo sebete. Hopola hore libeke tse seng kae pejana ha Lazaro a shoele ’me Jesu a ne a le haufi le ho tloha Perea ho ea Judea, Thomase o ile a khothatsa ba bang: “A re eeng le rōna, re tle re shoe le eena.” Hape hopola hore ka mor’a hore Jesu a tsose Lazaro, Lekhotla le Phahameng la Bajode le ile la loha mano a ho ’molaea. Ha ho makatse hore e be tšabo e oela barutuoa ha joale ba boetse ba kena Judea.

E le ho ba lokisetsa se larileng ka pele, Jesu o nkela ba 12 lekunutung ’me o-oa ba bolella: “Bonang, re nyolohela Jerusalema, ’me Mor’a motho o tla neeloa baprista ba baholo le bangoli, ’me ba tla mo ahlolela lefu ba mo neele ba-lichaba. Ba tla mo soma, ba mo shape, ba mo tšoele ka mathe, ba ’molaee; ’me o tla be a tsohe ka tsatsi la boraro.”

Lena ke lekhetlo la boraro likhoeling tsa morao-rao leo Jesu a bolelletseng barutuoa ba hae ka lefu la hae le tsoho ea hae. ’Me le hoja ba mo mamela, ha ba utloisise. Mohlomong ke ka lebaka la hore ba lumela tsosolosong ea ’muso oa Iseraele lefatšeng, ’me ba lebelletse ho thabela khanya le tlotla ’musong oa lefatše le Kreste.

Har’a batho ba leetong ba tlanngoeng ke Paseka ke Salome, ’mè oa baapostola Jakobo le Johanne. Jesu o ne a ile a bitsa banna bana “Bara ba sealuma,” ntle ho pelaelo ka baka la boikutlo ba bona bo chesang joaloka mollo. Ka nako e teletsana ba babeli bana ba bile le takatso ea ho batla ho ba ba phahameng ’Musong oa Kreste, ’me ba tsebisitse ’mè oa bona takatso ea bona. Joale o atamela Jesu molemong oa bona, o khumama pel’a hae, ’me o kōpa mohau.

Jesu o-oa botsa, “U batla’ng?”

“Ak’u re, bara bana ba ka ba babeli ba lule ’musong oa hao, e mong letsohong la hao le letona, e mong ho le letšehali.”

Ha a hlokomela mohloli oa kōpo eo, Jesu o re ho Jakobo le Johanne: “Ha le tsebe seo le se kōpang. Na le ka tseba ho noela senoelong seo ke tla noela ho sona?”

Baa arabela, “Re ka tseba.” Le hoja Jesu a ne a sa tsoa ba bolella hore o tobane le mahloriso a tšabehang le ho bolaoa qetellong, ho bonahala ba sa utloisise hore sena ke sona seo a se bolelang ka ‘senoelo’ seo a leng haufi le ho noela ho sona.

Leha ho le joalo, Jesu o-oa ba bolella: “Efela le tla noela senoelong sa ka . . . empa ha e le ho lula letsohong la ka le letona, kapa ho le letšehali, ha ke na ho ho nea motho, ha e se ba ho lokiselitsoeng ke Ntate.”

Ka mor’a nakoana baapostola ba bang ba leshome ba tseba seo Jakobo le Johanne ba se kōpileng, ’me ba halefile. Mohlomong Jakobo le Johanne ba ne ba hlahelletse tsekisanong ea pejana har’a baapostola ea hore na e moholo ke mang. Kōpo ea bona ea hona joale e senola hore ha baa sebelisa keletso eo Jesu a faneng ka eona tabeng ena. Ka ho soabisang, takatso ea bona ea ho ba ba phahameng e ntse e le matla.

Kahoo e le ho sebetsana le khang ena ea morao le lefufa leo e le bakileng, Jesu o bitsetsa ba 12 ’moho. A ba eletsa ka lerato, o re: “Lea tseba hoba marena a lichaba a li busa, ’me baholo ba tsona ba na le puso e thata holim’a tsona. Ho se ke ha e-ba joalo ho lōna; empa mang le mang ea ratang ho ba moholo har’a lōna, e ke e be mohlanka oa lōna; ’me mang le mang ea ratang ho ba oa pele har’a lōna, e be mofo oa lōna.”

Jesu o behile mohlala oo ba lokelang ho o etsisa, joalokaha a hlalosa: “Joale ka Mor’a motho, ea sa kang a tlela ho sebeletsoa, empa e le ho sebeletsa le ho neela bophelo ba hae ho ba topollo ea ba bangata.” Hase feela hore Jesu o sebelelitse ba bang empa o tla etsa joalo ho isa bohōleng ba ho shoela batho! Barutuoa ba hloka boikutlo bo tšoanang bo kang ba Kreste ba ho lakatsa ho sebeletsa ho e-na le ho sebeletsoa le ho ba ea tlaasana ho e-na le ho ba boemong bo phahameng. Mattheu 20:17-28; Mareka 3:17; 9:33-37; 10:32-45; Luka 18:31-34; Johanne 11:16.

◆ Ke hobane’ng ha joale barutuoa ba tšoha?

◆ Jesu o lokisetsa barutuoa ba hae se larileng ka pele joang?

◆ Ke kōpo efe e etsoang ho Jesu, hona baapostola ba bang ba ameha joang?

◆ Jesu o sebetsana joang le bothata bo har’a baapostola ba hae?