‘Se Tletse Mabitso a Bonyefoli’
BUKA ea Bibele ea Tšenolo e hlalosa pono ea “sebata se ’mala oa sekarelata, se tletseng mabitso a bonyefoli.” Se ba teng ka nakoana, ’me se kena sekoting seo se nyolohang ho sona hamorao. (Tšenolo 17:3, 8) Khafetsa, maqephe a makasine ona a khethollotse sebata sena le Selekane sa Lichaba qalong, ’me hamorao le mohlahlami oa sona, Machaba a Kopaneng. Empa ke hobane’ng ha ho thoe sebata se ’mala oa sekarelata ‘se tletse mabitso a bonyefoli’?
Moralo oa pele oa Selekane sa Selekane sa Lichaba, o theiloeng morerong o kopanetsoeng oa Manyesemane le Maamerika, o ile oa phatlalatsoa ka la 14 Tlhakola, 1919. Letsatsi le latelang, khatisong e nang le sehlooho se reng “Selekane sa Khotso,” The Times ea London e ile ea re: “Ke lebaka la ho ba motlōtlō ka nepo ho hlokomela Selekane seo e leng mosebetsi o moholo oa banna ba Manyesemane. . . . Re nka monyetla ka hore ke tokomane ea bohlokoahali ea machaba e kileng ea phatlalatsoa.” George Thayer, mosebeletsi oa First Congregational Church ea Cincinnati, United States, o o hlalositse e le “phatlalatso e ikhethang ka ho fetisisa ea thato le takatso ea batho ba lefatše ba leseling e kileng ea ngoloa pampiring.” Thoriso e ile ea boetse ea tsoa sebakeng sa khatiso sa lipuo lisele. Koranta ea Sefora L’Homme Libre e boletse, “Hase Bibele, empa o boemong ba ho ba ho fetang hoo, kaha ha ho Bibele, leha e le Moevangeli ofe kapa ofe ea kileng a thibela batho ho bolaeana. Likhopolo li fetoha ntho tsa sebele.” Koranta ea Sefora Victoire e o hlalositse e le “boiteko bo boholohali ba sehlopha bo kileng ba etsoa ho tloha tšimolohong ea lefatše bakeng sa ho thea matla a ho nahana le toka lefatšeng.”
Ka mor’a ho theoa ha Selekane sa Lichaba, Molaoli Jan Smuts, e mong oa baemeli ba Brithani tumellanong eo, o ile a ngola: “Selekane sena ke e ’ngoe ea litokomane tse khōlō tsa histori ea motho tse ka nahanoang. . . . Se tlameha ho atleha, hobane ha ho tsela e ’ngoe bakeng sa bokamoso ba tsoelo-pele. . . . Ka bonngoe batho ba sa leng ka ntle ho selekane seo ba tla salla morao khatelo-peleng ena eo tlas’a eona moloko oa batho o tlang ho hatela pele ho isang ho hlōleng ha mekhatlo ea khotso le katleho.”
Litebello tsohle tse joalo li ile tsa pakoa e le tsa bohata ha Ntoa ea II ea Lefatše e qhoma ka 1939. Selekane seo se ile sa hlōleha. E ne e mpa e le mokhatlo oa batho o entsoeng ka batho ba sa phethahalang. Ho joalo le ka mohlahlami oa sona, Machaba a Kopaneng. Leha ho le joalo, ka letsatsi leo Selekane sa Machaba a Kopaneng se neng se tekeneloa, bohlophisi ho The New York Times bo ile ba se bitsa “sefate sa khotso” ’me ba re, “Ho tsoetsoe tšepo e khōlō . . . Ho ka ’na ha etsahala lintho tse khōlō.” Ka ho tšoanang, baeta-pele ba likereke ba bitsitse Machaba a Kopaneng “tšepo feela” bakeng sa khotso le “tšepo ea ho qetela.”
Ho lebisa lintho tseo e leng ’Muso oa Molimo feela o tla li finyella ho mekhatlo ea batho ke bonyefoli. Ka hona, Bibele e profeta hore ka mor’a ho ba teng ka nako e khutšoaane, Machaba a Kopaneng a tla “ea tahlehong.” Ke puso ea leholimo e phethahetseng ea Molimo feela e ka tlisang khotso ea ka mehla ho batho.—Tšenolo 17:11, 12; Esaia 9:6, 7; Daniele 2:44.