KHAOLO EA 20
Phutheho ea Lipaki Tsa Jehova e Hlophisitsoe Joang?
Jehova ke Molimo ea hlophisehileng. (1 Bakorinthe 14:33) Kahoo re ka lebella hore le bahlanka ba hae ba hlophisehe. Phutheho ea Bokreste e hlophisitsoe joang? Re ka etsa’ng hore lintho li tsamaee hantle ka phuthehong?
1. Hlooho ea phutheho ke mang?
‘Kreste ke hlooho ea phutheho.’ (Baefese 5:23) O etella pele mosebetsi oa batho ba Jehova lefatšeng lohle a le leholimong. Jesu o khethile “lekhoba le tšepahalang le le masene,” e leng baholo ba seng bakae ba nang le boiphihlelo ba tsejoang e le Sehlopha se Busang. (Bala Matheu 24:45-47.) Sehlopha se Busang se latela mohlala oa baapostola le banna ba baholo ba neng ba le Jerusalema ka hore se tataise liphutheho lefatšeng lohle. (Liketso 15:2) Empa baholo bana ha se bona baeta-pele ba mokhatlo. Ba tataisoa ke Jehova le Lentsoe la hae ebile ba ikokobelletsa bohlooho ba Jesu.
2. Mosebetsi oa baholo ke ofe?
Baholo ke banna ba Bakreste ba nang le boiphihlelo, ba rutang Lentsoe la Molimo le ba hlokomelang batho ba Jehova ka ho ba thusa le ho ba khothatsa. Ha ba patalloe mosebetsi oo ba o etsang. Empa ba o etsa “ka ho rata, eseng ka lebaka la lerato la leruo la ho se tšepahale, empa ka tabatabelo.” (1 Petrose 5:1, 2) Baholo ba thusoa ke bahlanka ba sebeletsang ’me ha nako e ntse e e-ea, le bona ba ka tšoaneleha hore e be baholo.
Sehlopha se Busang se khetha baholo ba bang hore e be balebeli ba potoloho. Ba etela liphutheho tse fapa-fapaneng ho li tataisa le ho li khothatsa. Ba khetha baholo le bahlanka ba sebeletsang haeba ba e-na le makhabane ao Bibele e reng ba lokela ho ba le ’ona.—1 Timothea 3:1-10, 12; Tite 1:5-9.
3. Paki e ’ngoe le e ’ngoe e na le boikarabelo bofe?
Bohle ba ka phuthehong ‘ba rorisa lebitso la Jehova’ ka ho nka karolo libokeng le ho kenya letsoho mosebetsing oa ho ruta batho Bibele kahohle kamoo ba ka khonang.—Bala Pesaleme ea 148:12, 13.
ITHUTE LINTLHA TSE LING
Ithute hore na Jesu ke moeta-pele ea joang, hore na baholo ba leka ho mo etsisa joang le hore na re ka etsa’ng hore re mamele Jesu le baholo.
4. Jesu ke moeta-pele ea khathollang
Jesu oa re mema. Bala Matheu 11:28-30 ebe le buisana ka potso ena:
Jesu o batla hore re ikutloe joang ka boeta-pele ba hae?
Baholo ba etsisa mohlala oa Jesu joang? Bapala VIDEO.
Bibele e bolela ka ho hlaka hore na baholo ba etse mosebetsi oa bona joang.
Bala Esaia 32:2 le 1 Petrose 5:1-3 ebe le buisana ka lipotso tsena:
Taba ea hore ebe baholo ba etsisa Jesu ka ho khatholla ba bang e etsa hore u ikutloe joang?
Baholo ba etsisa Jesu ka litsela life tse ling?
5. Baholo ba re behela mohlala
Jesu o batla hore baholo ba ikutloe joang ka mosebetsi oa bona? Bapala VIDEO.
Jesu o behela baholo mohlala. Bala Matheu 23:8-12 ebe le buisana ka potso ena:
Ke phapang efe eo u e bonang lipakeng tsa makhabane ao Bibele e reng baholo ba lokela ho ba le ’ona le tsela eo u bonang baeta-pele ba likereke ba itšoara ka eona?
Baholo ba boloka kamano ea bona le Jehova e le matla ’me ba thusa ba malapa a bona hore le bona ba etse joalo
Baholo ba hlokomela batho bohle ka phuthehong
Baholo ba ruta batho Bibele kamehla
Baholo ke mesuoe. Ba boetse ba thusa ka ho hloekisa le ho etsa mesebetsi e meng
6. Re lokela ho sebelisana hantle le baholo
Bibele ea re bolella hore na ke hobane’ng ha ho le bohlokoa ho sebelisana hantle le baholo. Bala Baheberu 13:17 ebe le buisana ka lipotso tsena:
Na ke ntho e utloahalang hore ebe Bibele e re khothaletsa hore re mamele le ho ikokobelletsa ba etellang pele? Ke hobane’ng ha u cho joalo?
Bala Luka 16:10 ebe le buisana ka potso ena:
Ke hobane’ng ha ho le bohlokoa ho mamela baholo esita le linthong tseo ho bonahalang eka li nyenyane?
BATHO BA BANG BA RE: “Ha ho hlokahale hore u be karolo ea bolumeli bo itseng.”
U nahana hore motho a ka fumana melemo efe ka ho sebeletsa Molimo ka phuthehong?
KAKARETSO
Jesu ke hlooho ea phutheho. Re thabela ho sebelisana hantle le baholo ba ikokobeletsang Jesu hobane baa re khatholla ebile ba re behela mohlala o motle.
Re Ithutile’ng?
Hlooho ea phutheho ke mang?
Baholo ba thusa phutheho joang?
Mohlanka e mong le e mong oa Jehova o na le boikarabelo bofe?
BATLA
Bona bopaki bo bontšang hore Sehlopha se Busang le baholo ba rata Bakreste-’moho le bona haholo.
Ithute hore na balebeli ba potoloho ba etsa mosebetsi ofe.
Ithute kamoo basali ba leng bohlokoa kateng ka phuthehong.
“Na Lipaki Tsa Jehova li na le Basali ba Rutang?” (Molula-Qhooa, September 1, 2012)
Bala kamoo baholo ba sebetsang ka thata kateng ho thusa Bakreste-’moho le bona.
“Baholo ba Bakreste—‘Basebetsi-’moho Bakeng sa Thabo ea Rōna’ ” (Molula-Qhooa, January 15, 2013)