Pono ea Bibele

Re Lokela ho Rapela Molimo Joang?

HO BUA le Ea Matla ’Ohle le ho mo bolella tsela eo re ikutloang ka eona botebong ba pelo, ke tlotla e khōlō. Leha ho le joalo, batho ba bangata ha baa kholiseha ka hore na ba lokela ho rapela joang, ’me ba bang ba batla ho ntlafatsa tsela eo ba rapelang ka eona. Kamoo ho bonahalang kateng, ba bang ba balateli ba pele ba Jesu Kreste ba ne ba amehile ka boleng ba lithapelo tsa bona. E mong oa bona o ile a re ho eena: “Morena, re rute ho rapela.” (Luka 11:1) Jesu o ile a arabela kōpo eo ka ho etsa thapelo ea mohlala, eo hangata e bitsoang Thapelo ea Morena kapa Ntat’a Rōna ea Maholimong. Thapelo ena e monate e bileng e le bonolo, ha e re thuse ho bua le Molimo ka tsela e amohelehang feela, empa e boetse e re thusa ho utloisisa molaetsa o ka sehloohong oa Bibele.

Thapelo ea Mohlala ea Jesu

Jesu o itse: “Joale, le rapele ka tsela ena: ‘Ntat’a rōna ea maholimong, lebitso la hao le ke le halaletsoe. ’Muso oa hao o ke o tle. Thato ea hao e ke e etsahale lefatšeng, joalokaha e etsahala leholimong. Re fe kajeno bohobe ba rōna ba letsatsi lena; ’me u re tšoarele melato ea rōna, joalokaha le rōna re tšoaretse ba nang le melato ho rōna. U se ke ua re kenya molekong, empa u re lopolle ho ea khopo.’”—Matheu 6:9-13.

Hlokomela hore Jesu o itse: “Joale, le rapele ka tsela ena.” Ke hobane’ng ha a ile a cho joalo? Jesu o ne a sa batle hore barutuoa ba hae ba pheta-phete mantsoe a hae kapa ba a bue ka hlooho. Ha e le hantle, o ne a sa tsoa nyatsa mokhoa oo. (Matheu 6:7) Ho e-na le hoo, thapelo ea hae e re ruta hore na ke lintho life tse lokelang ho tla pele—tseo e leng tsa bohlokoa ho Molimo e seng feela ho rōna. E le hore re utloisise hore na lintho tseo tse tlang pele ke life, re lokela ho utloisisa se boleloang ke mantsoe a Jesu. Kahoo, a re hlahlobeng mantsoe a hae ntlha ka ’ngoe.

Thapelo ea Mohlala ea Hlalosoa

“Ntat’a rōna ea maholimong, lebitso la hao le ke le halaletsoe.” Ke ka nepo Jesu a bitsitseng Molimo “Ntate” hobane O lerato ebile Oa re sireletsa, ka tsela eo ntate ea molemo a etsang ka eona. O boetse o na le lebitso le mo khethollang—e leng Jehova—le sa lokelang ho ferekanngoa le litlotla tsa hae tse ngata tse kang, Ea Matla ’Ohle, Molimo le Morena.a (Pesaleme ea 83:18) Leha ho le joalo, ke hobane’ng ha lebitso la Molimo, le amang tsela eo a tsejoang ka eona le lokela ho halaletsoa? Hobane le ile la nyelisoa le ho silafatsoa.

Batho ba bang ba beha Molimo molato ka mathata a ba hlahelang, le hoja e ka ’na eaba a bakiloe ke phoso e entsoeng ke batho kapa e le taba ea hore ba sebakeng se fosahetseng ka nako e fosahetseng. (Liproverbia 19:3; Moeklesia 9:11) Ba bang ba qositse Molimo ka hore ke eena ea bakang likoluoa tsa tlhaho. Empa Bibele e re: “Molimo a ke ke a lekoa ka lintho tse mpe kapa hona hore o leka leha e le mang ka tsona.” (Jakobo 1:13) Hape, malumeli a mangata a ruta hore Molimo o otla batho ba babe ka ho ba hlokofatsa ka ho sa feleng mollong oa lihele, e leng thuto eo ntle ho pelaelo e nyelisang Molimo ea lerato. (Jeremia 19:5; 1 Johanne 4:8) Baroma 6:23 e re: “Moputso oo sebe se o lefang ke lefu,” eseng tlhokofatso e sa feleng!b

“’Muso oa hao o ke o tle.” ’Muso oa Molimo ke puso ea borena eo Jesu Kreste, e leng Morena oa eona. Haufinyane o tla laola lefatše lohle. Daniele 7:14 e re: ‘O fuoe bobusi le ho hlompheha le ’muso. ’Muso oa Molimo o ‘tla tla’ ha o kenella litabeng tsa batho, o tla silakanya mebuso eohle e o hanyetsang ’me o buse lefatše lohle.—Daniele 2:44.

“Thato ea hao e ke e etsahale lefatšeng, joalokaha e etsahala leholimong.” Tlas’a puso ea ’Muso, batho bohle ba tla etsa thato ea Molimo. Ka lebaka leo, khotso ea ’nete e tla rena ’me batho bohle ba tla rapela Molimo tumellanong le ’nete. Bolumeli ba bohata le lipolotiki tse bakang likarohano li ke ke tsa hlola li e-ba teng. Ha e bua ka tsela ea tšoantšetso, Tšenolo 21:3, 4 e re: “Tente ea Molimo” e tla ba ho “moloko oa batho, o tla hlakola meokho eohle mahlong a bona, lefu ha le sa tla hlola le e-ba teng, ’me ho siama kapa ho bokolla kapa bohloko ha li sa tla hlola li e-ba teng. Lintho tsa pele li fetile.”

“Re fe kajeno bohobe ba rōna ba letsatsi lena.” Ha a se a buile ka lintho tse lokelang ho tla pele, e leng lebitso la Molimo le ’Muso oa hae, joale Jesu o bua ka lintho tseo re li hlokang. Mantsoe a hae a re bontša hore re lokela ho qoba ho batla lintho tse fetang tseo re li hlokang ‘letsatsing lena.’ Ho e-na le hoo, re lokela ho mamela keletso e fumanoang lengolong la Liproverbia 30:8 e reng: “U se ke ua mpha bofutsana kapa maruo. E-re ke je lijo tseo ke li behetsoeng.”

“Re tšoarele melato ea rōna, joalokaha le rōna re tšoaretse ba nang le melato ho rōna.” Mona lentsoe “melato,” le bolela “libe.”c Kaofela ha rōna re tlameha ho mamela Molimo. Leha ho le joalo, ha re sa mo mamele, kapa re etsa libe, ho tšoana le ha re eketsa melato ea rōna. Empa, Jehova o ikemiselitse ho re tšoarela melato eo haeba ka mosa le rōna re tšoarela ba re sitetsoeng.—Matheu 18:21-35.

“U se ke ua re kenya molekong, empa u re lopolle ho ea khopo.” “Ea khopo” ke Satane Diabolose, eo hape a bitsoang “Moleki.” (Matheu 4:3) Kaha nama ea rōna e sa phethahalang ea fokola, re hloka thuso ea Molimo e le hore re hanele Satane hammoho le batho bao a ba sebelisang.—Mareka 14:38.

Ese eka thapelo ea mohlala ea Jesu e ka u thusa hore u ntlafatse lithapelo tsa hao, mohlomong ka hore u behe lintho tse tlang pele sebakeng sa pele. Empa thapelo ea mohlala ea Jesu e re thusa joang ho utloisisa molaetsa o ka sehloohong oa Bibele? Tumellanong le mantsoe a Jesu, sehlooho sa Bibele ke ho khalaletso ha lebitso le halalelang la Molimo, ho felisoa ha bobe bohle le hore ’Muso oa Molimo o tlise puso e nang le khotso lefatšeng. Ka sebele, re fumana matlotlo a mangata a moea thapelong ea mohlala ea Jesu!

[Mongolo o botlaaseng ba leqephe]

NA U KILE UA IPOTSA?

● Jesu o ne a bolela’ng ha a re: “Joale, le rapele ka tsela ena”?—Matheu 6:9.

● Ka tsela e tloaelehileng, ke lintho life tseo re lokelang ho li rapella pele?—Matheu 6:9, 10.

● “Melato ea rōna” ke eng, hona ke hobane’ng ha re lokela ho tšoarela batho ba re siteloang?—Matheu 6:12.

[Setšoantšo se leqepheng la 13]

Thapelo ea mohlala ea Jesu e ka u thusa hore u etelletse pele lintho tseo e leng tsa bohlokoa ho Molimo, e seng feela tseo e leng tsa bohlokoa ho uena