Hopola Melao-motheo ea Bokreste

HA NGOANA a qala ho ea sekolong, tse ling tsa lintho tsa pele tseo a ithutang tsona ke ho bala le ho ngola. Lithuto tsena tsa bohlokoa li mo koetlisetsa boitsebiso bo tsoetseng pele haholoanyane, bo kang lithuto tsa tulisano, mahlale, le lipuo. Haeba ngoana a sitoa ho fumana tsebo e feletseng ea ho bala le ho ngola, thuto eohle ea hae ka moso e ka ameha hampe.

Ho ithuta hore na Molimo o ka rapeloa joang ho batla ho tšoana le hoo. Ha re ithuta Bibele, re fumana hore ho na le linnete tsa motheo tse ngata, kapa melao-motheo, tseo re lokelang ho li nepa hantle. Hang ha re tseba tsena, re ka tsoela pele ho ea litabeng tse tebileng haholoanyane. Leha ho le joalo, haeba re sa utloisise ka ho feletseng melao-motheo ena e qalang kapa re sa e lumele ka ho feletseng, borapeli ba rōna bo tla be bo fosahetse. Re ke ke ra khona ho etsa liqeto tse nang le kelello, ’me tumelo ea rōna e tla sisinngoa habonolo.

Ha ho thata ho utloisisa melao-motheo ea mantlha ea Bibele. (Bona lethathama la eona.) Leha ho le joalo, hase hore ke lipolelo feela tse tloaelehileng kapa litaba tse thahaselloang hobane li fana ka bohlale. Ke linnete tse phelang, tsa bohlokoa, ’me Bakreste ba bohlale ba ithuta ho li rata. Jehova o re: “Mamelisisa taba tsa ka, u sekehele lipolelo tsa ka tsebe. Li se ke tsa tloha pel’a mahlo a hao, u ’ne u li boloke ka pelong. Hobane ho ba li fumaneng ke bophelo, ke boiketlo ba ’mele oohle oa bona.”—Liproverbia 4:20-22; Ezekiele 18:19, 20, 23.

Leha ho le joalo, ho sa tsotellehe bohlokoa ba melao-motheo ena, Jesu o lemositse hore ke ba seng ba kae feela ba neng ba tla e tseba ’me ba phele ka eona. O itse: “Monyako oa bophelo o patisane, le tsela e eang teng e tšesane, ’me ba e fumanang ha ba bakae.” (Mattheu 7:14) Hona ha ho bakoe ke hore melao-motheo ena e patiloe ka tsela e ’ngoe e itseng. Jehova o batla hore banna le basali ba phele ka eona ’me ka hona ba je lefa la bophelo. (2 Petrose 3:9) O entse hore bohlale, tsebo, le temoho li tlalehoe ka Bibeleng, e ka fumanehang ka ho pharaletseng ho bohle. Hape Lipaki tsa hae li khothaletsa baahisani ba tsona hore ba batle boitsebiso bona bo fanang ka bophelo. Ha e le hantle, ka tsela ena, “bohlale bo meketsa kantle.” (Liproverbia 1:20; 2:1-9) Empa ho na le matla a mang a sebetsang.

Satane o foufalitse mahlo a karolo e khōlō ea batho hore a se bone melao-motheo ea ’nete. (2 Ba-Korinthe 4:4) Ho phaella moo, moea oa motho oa boitaolo o etsa hore a ikhethele ho tsamaea ka tsela ea hae ho fapana le ho batla tataiso ho Matla a Phahameng haholoanyane. Mehleng ea moapostola Pauluse, esita le ba bang ba neng ba ithutile melao-motheo ea mantlha ba ile ba boela ba felloa ke pono ka eona. Kahoo, o ngotse: “Le sa ntse le tšoaneloa ke ho rutoa litaba tsa bonyenyane, tseo taba tsa Molimo li qaloang ka tsona.”—Ba-Heberu 5:12.

Ho feta moo, Jesu o lemositse: “Tsatsing leo, ba bangata ba tla re ho ’na: Morena, Morena, na ha rea ka ra profeta ka lebitso la hao na? Na ha rea ka ra leleka bademona ka lebitso la hao na? Na ha rea ka ra etsa mehlolo e mengata ka lebitso la hao na? Mohlang oo, ke tla ba bolella pepeneneng, ke re: Ha kea ka ka le tseba le mehla; ntloheleng, lōna ba sebetsang bokhopo.” (Mattheu 7:22, 23) Ke hobane’ng ha batho ba nahanang hore ba sebeletsa Jesu ba iphumana ba latoloa? Hobane “mehlolo e mengata” eo ba e entseng ha ea theoa melao-motheong ea Bibele. Ho tšoana le haeba ba ne ba ka leka ho ithuta histori kapa mahlale ba sa ka ba ithuta ho bala pele. Mesebetsi ea bona e fosahetse, ha ea theoa ’neteng. Kahoo, ke “ba sebetsang bokhopo.”

Na Borapeli Ba Hao Boa Amoheleha?

Na re ka kholiseha hore ha ho mohla Jesu a tla re ho rōna, ‘Tlohang ho ’na, lōna ba sebelitseng bokhopo’? E, haeba borapeli ba rōna bo theiloe ka ho feletseng melao-motheong ea Bibele. Ho ka ba joalo haeba ka hloko re hlahloba Bibele, haholo-holo mantsoe a Jesu. Jesu o tsamaile tseleng e tšesane, e patisaneng ea bophelo—ha e le hantle, e ne e le “tsela, le ’nete, le bophelo.” (Johanne 14:6) Haeba re sebelisa lipolelo tsa hae ’me re latela ka hloko mehlaleng ea hae, re tla be re le tseleng e tšoanang.—Johanne 6:68; 1 Petrose 2:21.

Balateli ba Jesu ba haufi-ufi le bona ba tsamaile ka tsela eo e tšesane, e patisaneng ea bophelo. Kahoo, ha a e-shoa Jesu o ile a siea matsohong a bona mosebetsi oa ho ruta ba bang ho rapela Molimo. O ile a boela a lemosa hore o ne a tla khutla ’me o ne a lebeletse hore ba mo nee tlaleho ea hore na ba ile ba itšoara joang bosieong ba hae.—Mattheu 24:46; 25:14-23; 28:19, 20.

Qetellong, lenane la ba ipolelang hore ba latela Kreste la phahama ho fihlela e e-ba makholo a limillione. Empa mabakeng a mangata, borapeli ba matšoele ana a mangata bo ne bo sa theoa melao-motheong ea Bibele. Ka hona, ha Jesu a hlomamisoa e le Morena oa leholimo ka 1914 ’me a ‘fihla’ ho batla tlaleho ho ba ipolelang hore ke balateli ba hae, o ile a fumana eng? Ba limillione ba neng ba ipolela hore ke Bakreste ba ne ba kenelletse ntoeng e sisimosang ka ho fetisisa historing ea batho ho tla fihlela ka nako eo.

E, karolo e khōlō ea “Bakreste” e ne e itšoere ka tsela e neng e hanana ka ho feletseng le melao-motheo ea mantlha ea Bibele. Leha ho le joalo, ho ne ho e-na le sehlopha sa Bakreste ba ’nete se neng se leka ka matla ho latela melao-motheo ea bomolimo ’me hape se e ruta motho ofe kapa ofe ea neng a tla mamela lefatšeng leo le neng le hlanya ke ntoa. Bana ba ile ba bokelloa hammoho, ’me ka mor’a nako bongata bo boholo ba batho ba nang le monahano o tšoanang ba ikopanya le bona. (Mattheu 24:31; Tšenolo 7:4, 9, 10) Ba sa ntsane ba latela melao-motheo e fanang ka bophelo, ba bolella ba bang merero e meholo ea Molimo, ba kopane ’moho e le mohlape o le mong, ’me ba leka ka matla ho ipapisa le “ho ratoang ke Molimo.”—Ba-Roma 12:2.

Molao-motheo oa Bohlokoa oa Mangolo

Hona ha hoa ka ha e-ba bonolo. Ntho e ’ngoe, Bakreste bana ba ile ba lokela ho loana le litšekamelo tsa bona tsa ho se phethahale, tsa boetsalibe. Hape ba lokela ho phela lefatšeng leo ka ho feletseng le hanyetsang litekanyetso le melao-motheo tseo ba lekang ho phela ka tsona. Ha e le hantle, moapostola Johanne o itse: “Lefatše lohle le rapaletse ka tlase ho e mobe.” (1 Johanne 5:19) Ke kahoo, kajeno barapeli ba ’nete ba Molimo ba lokela ho lula ba hopotse molao-motheo oa bohlokoahali o hlalositsoeng ke Jesu: “[Bakreste] hase ba lefatše.”—Johanne 17:16.

Jehova ha a qobelle batho hore ba mo sebeletse, empa ho hlokahala hore ba khethang ho etsa joalo ba etse liqeto tse itseng tse tebileng. Ka mohlala, ho hlokahala hore ba talimane le ’nete ea hore le ka mohla ba ke ke ba ratoa lefatšeng lena. (Mattheu 24:9) Morutuoa Jakobo o lemositse: “Ea phehellang ho iketsa motsoalle oa lefatše o ipea sera ho Molimo.” (Jakobo 4:4) Hape moapostola Pauluse o itse: “Kopano ke efe ea ho loka le bokhopo?” ’me “Ea lumetseng o na le kabelo efe le ea sa lumelang?” Eaba o qotsa mantsoe a Jehova: “Tsoang har’a bona, ’me le ikhethe, . . . le se ke la ama sesila.”—2 Ba-Korinthe 6:14-17; Ba-Efese 5:11.

Re ka ‘ikhetha’ joang? Ke ’nete hore e ke ke ea e-ba ka ho tloha ka mokhoa oa sebele lefatšeng. Empa re ka qoba ‘ho sikara joko e le ’ngoe le ba sa lumelang.’ Re ka qoba ‘litloaelano tse mpe, tse bolisang mekhoa e metle.’ (1 Ba-Korinthe 15:33) Hape re ka ikarola moeeng oa lefatše lena, moea oa ho ipatla, ho se tšepahale, lerato la lintho tse bonahalang, le ho etelletsa ho lelekisa menyaka. (2 Timothea 3:1-5) Tiisetso e thabisang e neoa ba ikarolang joalo litakatsong tsa lefatše lena: “Ea etsang thato ea Molimo, o hlola ka ho sa feleng.”—1 Johanne 2:15-17.

Ba Latelang Melao-motheo ea Mantlha

Na kajeno ho ka etsahala hore motho a latele melao-motheo ea Bibele ’me a tsamaee tseleng e tšesane e eang bophelong? E, esita le bana ba ka ho etsa. Ka mohlala, bana ba babeli ba banyenyane ba Brazil ba ne ba itšoere hantle haholo sekolong hoo tichere ea bona e ileng ea kōpa ’mè oa bona hore a tle a tl’o hlalosa hore na ke hobane’ng ha ba ne ba le joalo. ’Mè oa bona o ile a hlalosa hore ke hobane ba ne ba latela melao-motheo ea Bibele mabapi le ho utloa batsoali le ba bang ba boholong. (Ba-Efese 6:1-3) Ha sekolo se koaloa, ba ile ba neoa monyetla oa ho hlalosetsa sehlopha kaofela melemo e tlisoang ke tsela e joalo ea bomolimo.

Jesu o boletse molao-motheo o reng: “Bophelo ba motho bo ke ke ba tsoa bongateng ba lintho tseo a li ruileng, leha li mo atetse haholo.” (Luka 12:15) Motho e mong oa ngaka ea atlehileng haholo mosebetsing oa hae Japane o ile a ithuta sena, ’me, ho ileng ha makatsa basebetsi-’moho le eena, o ile a ho sebelisa. O ile a siea mosebetsi oa hae o mo fang chelete e ngata ’me a ea motseng o mong o monyenyane moo a neng a ka thusa batho ba motse oo moeeng. Ho tela melemo ea lintho tse bonahalang tjena ha hoa ka ha mo amoha thabo ea hae. Ho fapana le hoo, eena le mosali oa hae joale ba fumana thabo e kholoanyane ka ho tlisetsa ba bang Lentsoe la bophelo.

Bibele e re: “Letahoa le lenyolo-nyolo ba ipakela bofuma.” (Liproverbia 23:21) Ena ke temoso e hlakileng khahlanong le bokhoba ba lithethefatsi. Re boetse re lemosoa khahlanong le tšebeliso e ’mpe ea lithethefatsi: “Mesebetsi ea nama e pepeneneng: Ke . . . ho rapela melimo ea bohata, boloi [phar·ma·kiʹa, “tšebeliso ea lithethefatsi” Segerikeng sa pele-pele].” (Ba-Galata 5:19, 20) Ho phaella moo, moapostola Pauluse oa phehella: “A re ke re itlhatsoeng litšila tsohle tsa nama le tsa moea.”—2 Ba-Korinthe 7:1.

Ho tsuba koae le ho sebelisa lithethefatsi tse ling tse etsang motho lekhoba ka ho hlakileng ho khahlanong le melao-motheo ena ea Bibele ’me ka hona ke “bokhopo.” (Mattheu 7:23) Bahlanka bafe kapa bafe ba Molimo ba itšilafatsang ka lintho tse joalo ba tla fumana borapeli ba bona bo sa amohelehe ho Molimo. Kahoo, batho ba baloang ka makholo a mangata a likete ba se ba nkile bohato ba ho khaotsa ho sebelisa lithethefatsi tsena, ka baka leo, ba fumane melemo moeeng le ’meleng. Ke ’nete hore ha ho bonolo ka mehla ho khaohana le mekhoa ena e litšila.

Mohlankana e mong oa Michigan, U.S.A., o ile a ithuta ka Molimo le melao-motheo ea oona ho basebeletsi ba bang ba ileng ba etela moo a lulang teng. O ile a thabela seo a se utloang empa a hlokomela hore mokhoa oo a neng a e-na le oona oa ho tsuba matekoane le koae o ne o sa lumellane le borapeli ba Jehova. O re: “Ha kea ka ka ba le khathatso leha e le efe ea ho lahla lithethefatsi, tseo ke neng ke li thabela. Empa ho ile ha nkuka bonyane likhoeli tse tšeletseng hore ke khaotse ho tsuba lisakarete.” O ile a thusoa ke Bakreste ’moho le eena, le thapelo. Joale, ka ho phela bophelo bo hloekileng bo lumellanang le melao-motheo ea Bibele, o thabela letsoalo le hloekileng, kamano e ntle le Molimo, le botsoalle ba Bokreste. Ha e le hantle, o bolela hore ho fihlela a fetoha Mokreste, ha ho mohla a kileng a tseba hore na motsoalle ke eng.

Ho latela melao-motheo e lokileng kannete ke tsela e bohlale. Hape bohlale bo bohlokoa le ho feta gauda e hloekileng. Inkele tsela ena ka bouena, ’me e tla tlisa thoriso ho Jehova ’me e tla u tlisetsa tlhohonolofatso ea ka ho sa feleng.—Pesaleme ea 19:7, 10; Liproverbia 16:16.

[Lebokose le leqepheng la 27]

Melao-motheo ke linnete tsa mantlha kapa melao ea motheo tseo linnete tse ling kapa melao e meng li ka nkoang ho tsona. Mehlala e meng ke e latelang:

◻ “Rata Morena, Molimo oa hao, ka pelo ea hao eohle, le ka moea oa hao oohle, le ka khopolo ea hao eohle.”—Mattheu 22:37.

◻ “’Me joale, ntho tsohle tseo le ratang hore batho ba le etse tsona, ba etseng tsona le lōna.”—Mattheu 7:12.

◻ “Setsoalle le lefatše ke bōra ho Molimo.”—Jakobo 4:4, “TLP.”

◻ “Leha le e-ja, leha le e-noa, leha le etsa ntho efe le efe, etsang tsohle ho tlotlisa Molimo ka tsona.”—1 Ba-Korinthe 10:31.

◻ “Joale, rōna ba matla, re tšoanetse ho jara mefokolo ea ba fokolang, ’me re se ke ra batla ho khahlisang rōna feela.”—Ba-Roma 15:1.

◻ “A re hlahiseng ka mehla ho Molimo ka eena sehlabelo sa poko, e leng tholoana ea melomo e bolelang lebitso la hae.”—Ba-Heberu 13:15.

◻ “A re lebelaneng, re tle re isane ka cheseho leratong le mesebetsing e metle. Re se ke ra ngala liphutheho tsa rōna.”—Ba-Heberu 10:24, 25.

◻ “Motho a ke ke a phela ke bohobe feela, empa o tla phela le ke polelo tsohle tse tsoang molomong oa Molimo.”—Mattheu 4:4.