Na U Haha Lehlabatheng Kapa Lefikeng?

NA U thabela ho bala Bibele? Na u bile u ipha nako ea ho ithuta eona kamehla le e mong oa Lipaki Tsa Jehova? Haeba ho joalo, ntle ho pelaelo u ikutloa hore tsebo eo u e fumaneng e u thusitse ho utloisisa haholoanyane hore na ke hobane’ng ha lefatše le aparetsoe ke mathata. (Tšenolo 12:9, 12) Ho phaella moo, litemana tse ngata tsa Bibele li u tšelisitse linakong tse bohloko, hape li u file tšepo bakeng sa nako e tlang.​—Pesaleme ea 145:14; 147:3; 2 Petrose 3:13.

Ho fumana tsebo e nepahetseng ea Bibele ke bohato ba bohlokoa bakeng sa ba batlang ho ba balateli ba Kreste. Empa na bohato boo ke bona feela bo hlokahalang? Che. E le hore motho a lule e le Mokreste oa ’nete​—haholo-holo ha tumelo ea hae e lekoa—​seithuti sa Bibele se lokela ho nka bohato bo bong hape ba bohlokoa. Ke bofe? Ho fumana karabo, a re hlahlobeng ka bokhutšoanyane Thuto ea Thabeng, e leng puo e ileng ea fanoa ke Jesu thabeng ea Galilea.​—Matheu 5:1, 2.

Matlo a Mabeli aa Lekoa

Na ua tseba hore na Jesu o ile a re’ng Thutong ea Thabeng? U ka fumana puo ena e tsebahalang Likosepeleng tsa Matheu le Luka. (Matheu 5:1–7:29; Luka 6:20-49) Ho nka metsotso 20 feela ho bala thuto eo kaofela. Empa thutong eo ho qotsitsoe Mangolo a Seheberu ka makhetlo a ka holimo ho 20 ’me ho na le lipapiso tse ka holimo ho 50. Papiso e ’ngoe​—e buang ka kaho ea matlo a mabeli—​ea ikhetha hobane Jesu o ile a e sebelisa ha a phethela puo ea hae. Haeba u utloisisa bohlokoa ba eona, seo se tla u thusa ho lula u tiile joaloka molateli oa Kreste ho sa tsotellehe liteko le ha e le life tsa tumelo tseo u ka tobanang le tsona.

Jesu o ile a re: “E mong le e mong ea utloang lipolelo tsena tsa ka ’me a li phetha o tla tšoantšoa le monna ea masene, ea ileng a haha ntlo ea hae holim’a lefika. Pula ea tšoloha le meroallo ea tla ’me meea ea foka eaba e otla ntlo eo, empa ha ea ka ea heleha, kaha e ne e thehiloe holim’a lefika. Ho feta moo, e mong le e mong ea utloang lipolelo tsena tsa ka ’me a sa li phethe o tla tšoantšoa le monna oa leoatla, ea ileng a haha ntlo ea hae holim’a lehlabathe. Pula ea tšoloha le meroallo ea tla ’me meea ea foka eaba e otla ntlo eo ’me ea heleha, ’me ho oa ha eona ea e-ba ho hoholo.”​—Matheu 7:24-27.

Monna “ea Ileng a Cheka ’me a ea Tlaase Botebong”

Jesu o ile a ruta barutuoa ba hae ’nete efe ea bohlokoa ha a ba bolella papiso ee ea lihahi tse peli? Ho fumana karabo, hlahloba mantsoe a Jesu ka hloko. Ke eng seo u se hlokomelang ka matlo ao a mabeli? Ka bobeli a ile a oeloa ke likoluoa tse tšoanang. Ho ka etsahala hore matlo ao a ne a shebahala ka ho tšoana. Ho ka etsahala hore a ne a hahiloe sebakeng se le seng—mohlomong a ne a bile a bapile. Leha ho le joalo, e ’ngoe e ne e hahiloe lehlabatheng ’me e ’ngoe e hahiloe lefikeng. Ho ne ho ka ba joalo joang? Hobane joalokaha ho bontšitsoe Kosepeleng ea Luka, monna ea masene o ile “a cheka ’me a ea tlaase botebong” e le hore a fihle letlapeng. (Luka 6:48) Ka lebaka leo, ntlo ea monna ea masene e ile ea ema e tiile.

Jesu o ne a batla ho totobatsa ntlha efe? Ha Jesu a bolela papiso eo, o ne a sa totobatse ponahalo ea matlo ao kapa sebaka seo a hahiloeng ho sona kapa matla a boemo ba leholimo, empa o ne a totobatsa se entsoeng ke lihahi tseo. Monna e mong o ile a cheka ho ea tlaase empa e mong ha aa ka a etsa joalo. U ka tšoana le monna ea masene joang ’me ua cheka ho ea tlaase? Jesu ka boeena o ile a akaretsa se boleloang ke papiso eo ka ho re: “Joale, ke hobane’ng ha le mpitsa ‘Morena! Morena!’ empa le sa etse lintho tseo ke li buang? E mong le e mong ea tlang ho ’na ’me a utloa mantsoe a ka ’me a a phetha, ke tla le bontša hore na o joaloka mang: O joaloka monna . . . ea ileng a cheka ’me a ea tlaase botebong eaba o beha motheo holim’a lefika.”​—Luka 6:46-48.

Ha e le hantle ha motho a mamela lithuto tsa Bibele feela kapa a e bala a le lapeng ho tšoana le ha a haha ntlo lehlabatheng—ha ho hlokahale hore a cheke. Empa ho sebelisa lithuto tsa Kreste kapa ho li phetha ho hloka boikitlaetso. Ho hlokahala hore motho a cheke ho ea tlaase e le hore a fihle letlapeng.

Kahoo hore na u lula u tiile joaloka molateli oa Kreste kapa che, hoo ho itšetlehile ka hore na u sebelisa seo u se utloang kapa che. Haeba bophelong ba hao ba letsatsi le letsatsi u sebelisa seo u ithutang sona thutong ea Bibele, u tšoana le monna ea masene ea ileng a cheka ho ea tlaase. Kahoo seithuti se seng le se seng sa Bibele se lokela ho ema hanyenyane ’me se ipotse: ‘Na ke moutloi kapa ke mophethi? Na ke mpa feela ke ithuta Bibele le ho e bala kapa na ke latela litaelo tsa Bibele ha ke etsa liqeto?’

Liphello Tsa ho Cheka ho ea Tlaase

Nahana ka mohlala oa José. Batsoali ba hae ba ile ba mo ruta ho hlompha melao ea boitšoaro ea Bibele, empa eena ha ho mohla a kileng a ithuta Lentsoe la Molimo. José o re: “Ha ke tloha lapeng ke ile ka leka ho ba motho ea molemo, empa ke ile ka etsa setsoalle le batho ba babe. Ke ile ka qala ho sebelisa lithethefatsi, ka kenella boitšoarong bo bobe ba ho kopanela liphate ’me ke ne ke lula ke loana le batho kamehla.”

Qetellong José o ile a etsa qeto ea ho fetola bophelo ba hae ’me a bontša hore o ikemiselitse ho ithuta Bibele. José o re: “Ntho eo ha e le hantle e ileng ea ntšusumetsa hore ke fetohe ke ho bala le ho utloisisa Thuto ea Jesu ea Thabeng. Empa ho ile ha nka nako hore ke fetole botho ba ka le tsela eo ke phelang ka eona. Qalong ke ne ke tšaba hore na ‘metsoalle’ ea ka e tla re’ng ka ’na, empa ke ile ka hlōla tšabo eo. Ke ile ka khaotsa ho bua leshano le ho sebelisa puo e litšila ’me ka qala ho ea libokeng tsa Lipaki Tsa Jehova. Ke ile ka ithuta hore joalokaha Jesu a ile a tšepisa, ho phela bophelo bo itekanetseng le ho sebelisa keletso ea Bibele ho hlile ho tlisa thabo e tšoarellang.”​—Matheu 5:3-12.

Liphello e tla ba life haeba u cheka ho ea tlaase e le hore u hahe letlapeng​—ka mantsoe a mang, haeba u ikitlaelletsa ho sebelisa seo u ithutang sona Lentsoeng la Molimo? Jesu o ile a re: “Ha moroallo o hlaha, nōka ea khahlela ntlong eo, empa e ne e se matla ka ho lekaneng ho e sisinya, kahobane e hahiloe hantle.” (Luka 6:48) Ka sebele, haeba u haha hantle ka ho sebelisa seo u ithutang sona, litlokotsi tse kang sefefo li ke ke tsa senya ntlo ea hao ebile li ke ke tsa khona le ho e sisinya. Ao ke matšeliso a makaakang!

Morutuoa Jakobo, eo e neng e le mor’abo Jesu, o bua ka tlhohonolofatso e ’ngoe e ka fumanoang ke liithuti tsa Bibele tseo e seng bautloi feela empa tseo ha e le hantle e leng baphethi ba Lentsoe la Molimo le ngotsoeng. Jakobo o ile a ngola tjena: “Le be baphethi ba lentsoe, eseng bautloi feela . . . Ea nyarelang ka molaong o phethahetseng oa tokoloho le ea phehellang ho oona, motho enoa, kahobane e se moutloi ea lebalang, empa e le moetsi oa mosebetsi, o tla thaba ho o etseng ha hae.”​—Jakobo 1:22-25.

Bao ka sebele ba sebelisang keletso ea Bibele ba hlile baa thaba. Ka lehlakoreng le leng thabo e joalo e fa balateli ba Kreste matla a hore ba lule ba tiile ha ba talimane le litlokotsi tse kang sefefo tse lekang tumelo ea bona le hore na boinehelo ba bona ho Molimo ke ba sebele.

U Tla Etsa Joang?

Ha Jesu a ne a ruta Thuto ea Thabeng, o ile a hatisa hore, e le hore re sebeletse Jehova Molimo re lokela ho khetha pakeng tsa lintho tse fapaneng. Ka mohlala, Jesu o ile a ruta hore motho o na le leihlo le talimileng nģa e le ’ngoe kapa le khopo, hore motho ke lekhoba la Molimo kapa la maruo le hore motho o tsamaea tseleng e moqotetsane kapa e sephara. (Matheu 6:22-24; 7:13, 14) Ha Jesu a qetella papiso ea hae ea lihahi tse peli o ile a fa barutuoa ba hae khetho e ’ngoe hape: Hore na ba etsisa monna ea masene kapa oa leoatla.

Haeba u tsoela pele ho sebelisa seo u ithutang sona thutong ea Bibele ka peIo eohle, u etsa lintho ka masene. Ka sebele, ho cheka ho ea tlaase hore u hahe letlapeng ho tla etsa hore u fumane mahlohonolo hona joale le ka moso.​—Liproverbia 10:25.

[Litšoantšo tse leqepheng la 30]

Ho lula ha rōna re tiile ho itšetlehile ka ho sebelisa seo re ithutang sona