Khaolo ea Leshome le Motso o Mong

Jehova o Batla Hore Batho ba Fumane Bophelo—Uena?

1, 2. (a) Seo Jonase a ileng a se etsa ha a utloa qeto ea Jehova mabapi le Ninive se re ruta’ng? (b) Ke hobane’ng ha re lokela ho hlahloba mohau oa Molimo le tsela eo a talimang bophelo ka eona?

JEHOVA o ne a thabile, empa moprofeta Jonase eena o ne a sa thaba. Molimo o ne a hauhetse batho ba likete-kete a bile a qenehetse bophelo ba bona. Jonase eena a ka be a ba tlohetse ba timetsoa! Jehova o ile a khetha ho tšoarela bao e kileng ea e-ba lira tsa sechaba sa hae le ho ba pholosa.

² Joalokaha re bona mohlaleng oa Jonase, ka linako tse ling batho ba ka ’na ba thatafalloa ho utloisisa hore na mamello ea Molimo e pharaletse hakae le ho bontša hore joaloka Eena, le bona ba lakatsa hore batho ba fumane bophelo. Ho Jonase, qeto ea Jehova ea ho pholosa Baninive e ne e ‘sa khahlise ho hang, ’me o ile a tuka ke bohale.’ Na ebe mohlomong Jonase o ne a amehile haholo ka maikutlo a hae ho feta ho bontša mohau le ho pholosa batho? Mohlomong o ne a nahana hore haeba Baninive ba ka qeneheloa, seo se ne se tla mo tlosa seriti. (Jonase 4:1, 10, 11) Ho thoe’ng ka mehleng ea rōna, ha letsatsi la Jehova la kahlolo le ntse le atamela ka potlako? U ka ’na ua botsa: ‘Nka ithuta ho ananela ho tšoarela ha Molimo ka ho tebileng haholoanyane joang, hona nka thusa bafosi ba bakileng hore ba rue molemo ka ho feletseng moseng oa hae joang? E, ke joang le ’na nka bontšang hore joaloka Molimo, ke lakatsa hore batho ba fumane bophelo?’

HO BONTŠA TOKA LE MOHAU KA SEPHEO SA HO PHOLOSA BATHO

 3. Na toka ea Molimo le mohau oa hae lia hanyetsana? Hlalosa.

³ Ba bang ba lumela hore khafetsa libuka tsena tse 12 tsa boprofeta li bua ka tsela eo Molimo a ileng a halefela sechaba sa hae ka eona, a se otla, a ba a phethisa toka. Ba ka ’na ba botsa: ‘Na Jehova ha a na mohau? Na o batla ho pholosa batho?’ Bonneteng, toka ea Molimo le mohau oa hae ha li hanyetsane, ho e-na le hoo, li sebetsa ’moho ho pholosa batho. Toka le mohau ke litšobotsi tse peli tsa botho ba hae bo phethahetseng hantle. (Pesaleme ea 103:6; 112:4; 116:5) Molimo o bontša mohau ho ba ratang ho loka ka hore a felise bobe bo bakiloeng ke ba khopo. Bona ke bopaki ba toka ea hae e phethahetseng. Ka lehlakoreng le leng, kaha Jehova o tletse toka, ka mohau oa hae o nahanela mefokolo ea batho ba sa phethahalang. Ka mantsoe a mang: o phethisa kahlolo ha ho hlokahala, ’me o bontša mohau ha ho khoneha. Melaetseng ea baprofeta bana, u tla fumana lipolelo tse ngata tse pakang hore o bonahatsa litšobotsi tsena ka teka-tekano e phethahetseng, e leng se bontšang hore Molimo o batla hore batho ba fumane bophelo. A re ke re hlahlobeng sena ’me ha re ntse re etsa joalo re fumane lithuto tseo re ka li sebelisang ka ho toba kajeno.

 4. Ke bopaki bofe bo bontšang hore Molimo o batla hore batho ba fumane bophelo?

⁴ Moprofeta Joele o ile a bolela molaetsa oa nyatso, leha ho le joalo, o ile a boela a tiisa hore Molimo “o mosa ’me o mohau, o lieha ho halefa ’me o tletse mosa o lerato.” (Joele 2:13) Lilemong tse ka bang lekholo hamorao, lilemong tsa bo-700 B.C.E., Mikea o ile a hatisa kamoo re hlokang tšoarelo ea Jehova kateng. Ka mor’a hore a botse potso e reng, “Ke mang Molimo ea kang uena?” Mikea o ile a hlalosa Jehova ka tsela ena: “Ka sebele a ke ke a tšoarella bohaleng ba hae ka ho sa feleng, etsoe o thabela mosa o lerato. O tla boela a re bontše mohau.” (Mikea 7:18, 19) Joalokaha re ka bona tlalehong ea Jonase e buang ka Baninive, Molimo o ikemiselitse hore a boele a hlahlobe qeto ea hae ea ho otla batho ba mo halefisitseng haeba ba bontša ho ikoahlaea ka ho etsa mesebetsi e tšoanelang pako.

 5. Ke lintlha life tse u thabisang ka ho fetisisa tse bontšang hore Molimo o mohau le hore o rata ho pholosa batho? (Bona le lebokose le reng “Ba Ile ba Itlhahisa.”)

⁵ Ha re phele mehleng ea baprofeta ba 12. Leha ho le joalo, na ha re ananele lipontšo tse joalo tsa hore Jehova o mohau le hore o rata ho pholosa batho? Haeba u ikutloa ka tsela ena, hoo ho ka matlafatsa kamano ea hao le Molimo ’me ha etsa hore u rate ho thusa ba bang hore ba fumane bophelo. Le hoja kajeno batho ba bangata ba etsa lintho tse mpe, re kholisehile hore Molimo “ha a lakatse hore leha e le mang a timetsoe empa o lakatsa hore bohle ba fihle pakong.” (2 Petrose 3:9) Mantsoe a mofuthu ao Hosea a ileng a a bua ha a boetse a amohela mosali oa hae oa mofebi ke mohlala o bontšang takatso eo ea Jehova. Jehova o ile a “bua le pelo” ea sechaba sa hae. Molimo o ne a sa tlameha ho se tšoarela, empa o ne a ikemiselitse ho etsa joalo “ka boithatelo.” (Hosea 1:2; 2:13, 14; 3:1-5; 14:4) Na ua tseba hore na ke ka lebaka la’ng ha boikutlo ba Molimo le ho tšoarela ha hae e le tsa bohlokoa hakaale? Hobane ke taba ea lefu le bophelo. U ka bona bopaki bo eketsehileng ba hore Molimo o mohau le hore o lakatsa hore batho ba fumane bophelo ha u sheba phutheho ea Bokreste, e etsang mosebetsi oo le uena u kentseng letsoho ho oona.

HO THUSA BATHO HORE BA FUMANE BOPHELO

 6. Tsela e ka sehloohong eo ka eona Molimo a bontšang hore o lakatsa hore batho ba fumane bophelo ke efe?

⁶ Ke hobane’ng ha u kopanela tšebeletsong ea boboleli? Lebaka le leng le ka sehloohong ke hore u ka khona ho thusa ba bang hore ba tsebe Molimo oa ’nete. Taba ea bohlokoa eo u lokelang ho e tseba ka Jehova ke ena: O fana ka litemoso tse hlakileng pele a fana ka kotlo. Sena se bontša hore o hauhela batho ba hae, ha a batle hore ba timele, ho e-na le hoo, o batla hore ba fumane bophelo. Baprofeta ba 12 ba ile ba tsebisa bafosi hore Molimo o ne a ba fa monyetla oa hore ba fetole mekhoa ea bona ’me ba pheme bohale ba hae bo lokileng. Kajeno, le rōna re etsa mosebetsi o tšoanang le oo. Joaloka Mokreste, u na le tokelo ea ho phatlalatsa temoso ea letsatsi le tlang la Molimo la phetetso. Ha u ntse u etsa mosebetsi ona, qoba moea leha e le ofe oa boiphetetso, oa ho batla ho bona ha batho ba sa amoheleng molaetsa “ba fumana se ba tšoanelang.” Lula u hopola hore lebaka le leholo leo ka lona u bolelang litaba tse molemo ke hore ba bang ba ka kena tseleng e isang bophelong.—Joele 3:9-12; Sofonia 2:3; Matheu 7:13, 14.

 7. (a) Ke hobane’ng ha e le habohlokoa ho kopanela mosebetsing oa ho paka? (b) Ho nahana ka tsela eo Jehova a ikutloang ka eona ho ka re thusa joang?

⁷ Nako le nako ha u bolela linnete tsa Bibele malapeng a batho, sekolong, mosebetsing kapa leha e le kae, u thusa motho eo ho hlokahalang hore a fumane mohau o tsoang ho Molimo le tšoarelo ka potlako. (Hosea 11:3, 4) Ke ’nete hore u ka ’na ua fumana batho ba sa thahaselle molaetsa oo. Leha ho le joalo, haeba u mamella ho sa tsotellehe boemo bona, u etsisa Molimo oa rōna ea mohau, eo ha a sebelisa Zakaria, a ileng a re ho sechaba sa Hae se sa mameleng: “Ka kōpo, khutlang litseleng tsa lōna tse mpe le mesebetsing ea lōna e mebe.” (Zakaria 1:4) Ke mang ea tsebang hore na ke batho ba bakae ba ka amohelang molaetsa ha u ba bolella ka mohau oa Molimo ’me u ba bontša tsela e isang bophelong? Hape, leka hore u lule u hopola hore u bolela litaba tse molemo hobane Jehova o batla hore batho ba fumane bophelo, ’me le uena u batla hore ba bo fumane.

 8. Ke hobane’ng ha e le ho khothatsang ho hopola kamoo ba bang ba ileng ba amohela mohau oa Molimo kateng?

⁸ U ka khothatsoa ke ho hopola taba ena: Haesale ho ntse ho e-na le batho ba amohelang molaetsa oa Molimo. Ke ka lebaka leo Hosea a neng a ka bua ka ba ileng ba hlokomela hore “litsela tsa Jehova li lokile.” Moprofeta eo o ile a eketsa ka ho re: “Ba lokileng ke bona ba tla tsamaea ho tsona.” (Hosea 14:9) Lilemong tse makholo tse fetileng, ba bangata ba ’nile ba susumelletseha hore ba amohele memo ena ea Molimo e reng: “Khutlelang ho ’na ka lipelo tsohle tsa lōna.” (Joele 2:12) Mantsoe ana a ne a tobisitsoe ho batho ba neng ba tseba Jehova, empa a boetse a bontša kamoo Molimo a amehang kateng ka bao e leng hona ba ithutang ka eena. E, Molimo o sa ntsane a tšepa hore batho ba ka khona ho soabela liphoso tsa bona tse fetileng, ba bake, ba fetohe ’me ba etse se nepahetseng. Sena se ba bulela monyetla oa ho pholoha.—1 Timothea 4:16.

 9. Seo Baninive ba ileng ba se etsa se bontša hore ho hlokahala eng?

⁹ Ho na le ntlha e ’ngoe tabeng ea ha Jehova a tšoarela Baninive. Re bala hore ha batho ba utloa ka kahlolo eo ea Molimo e neng e ntse e atamela ka potlako, ba ile ba e nka ka botebo, ’me “ba qala ho beha tumelo ho Molimo.” (Jonase 3:5) Hore ba tsoele pele ba phela, ho ne ho hlokahala hore ba be le tumelo, eseng feela hore ba tšabe kahlolo. Kaha Jehova o hlile o lakatsa hore batho ba bake le hore ba bontše ka liketso hore ba na le tumelo, o re file monyetla oa ho bolela litaba tse molemo e le hore re thuse batho hore ba ikhethele. Phello e tla ba efe? Re bala sena ka Baninive: “Molimo oa ’nete a bona mesebetsi ea bona, hore ba ne ba khutlile litseleng tsa bona tse mpe; kahoo Molimo oa ’nete a ikutloa a soabile ka lebaka la tlokotsi eo a neng a buile hore o tla ba bakela eona; ’me ha aa ka a e baka.” (Jonase 3:10) Jehova a ke ke a thetsoa ke mantsoe feela kapa liketso tsa ho phetha molao feela. E tlameha ebe Baninive ba ne ba hlile ba tiile ha ba bontša hore ba ikoahlaela liketso tsa bona. Molimo o ne a bona hore ba ne ba fetohile e le kannete; ba ne ba bontšitse pako ea sebele e tsamaeang le tumelo.

10. Maemo a mang ao ho ’ona Jehova a ileng a pholosa batho ke afe?

¹⁰ Ha rea lokela ho nahana hore ke Baninive feela bao Jehova a neng a thahasella ho ba pholosa. Ha Jerusalema e timetsoa ka 607 B.C.E.—ka mor’a tšebeletso ea Obadia, Nahume le Habakuke—Jehova o ile a pholosa Jeremia ea mo mamelang le sehlopha sa bo-mphato ba hae ba tšepahalang. (Jeremia 39:16-18) Baprofeta ba Molimo ba ile ba bolela esale pele hore masala a bakileng a ne a tla khutlela Babylona ’me a tsosolose borapeli bo hloekileng. (Mikea 7:8-10; Sofonia 3:10-20) Boprofeta boo bo phethahetse ka tsela e khōlō kajeno. Ka mor’a Ntoa ea I ea Lefatše, Bakreste ba tlotsitsoeng, bao ba bangata ba bona ba neng ba se ba hlokomolohile borapeli ba ’nete, ba ile ba boela ba cheseha mosebetsing oa bona ’me Jehova a boela a ba amohela, ba e-na le tšepo ea bophelo. Le kajeno, batho ba “lichaba tse ngata” ba ntse ba “kopanngoa le Jehova.” (Zakaria 2:11) Ba na le tšepo ea ho pholoha bofelo ba tsamaiso ena ea lintho bo ntseng bo atamela. Kahoo, tšebeletso ea hao ea boboleli hase feela ketso e bontšang hore ua mamela le eo u e etsang hobane Bakreste ba laetsoe hore ba e etse. Ebile ha e etsoe feela ho phethahatsa boprofeta. (Matheu 24:14; 28:19, 20) Sepheo sa tšebeletso ea hao ea boboleli ke ho thusa batho hore ba ithute ka Jehova, ba bontše tumelo ’me ba fumane bophelo.

BA KHUTLELANG HO JEHOVA BA FUMANA BOPHELO

11, 12. Mohau oa Molimo o ka ruisa bao e kileng ea e-ba barapeli ba hae molemo joang?

¹¹ Jehova o thahasella ba sa tsoa amohela ’nete ’me o batla hore ba fumane bophelo, leha ho le joalo, ha a lebale ba seng ba ntse ba mo sebeletsa. Le rōna re lokela ho ba thahasella ’me re batle hore ba tsoele pele tseleng ea bophelo. Re ka bontša joang ka litsela tse tobileng hore rea ba thahasella?

¹² E ka ’na eaba u tseba ba bang ba ileng ba ithuta ka Jehova, ba bontša tumelo ho eena ’me ba e-ba mafolofolo borapeling ba ’nete empa hona joale ba se ba sa mo sebeletse. Melaetsa ea Jehova eo a e fetisitseng ka baprofeta ba 12 e bontša hore o ne a ikemiselitse ho hauhela bao e kileng ea e-ba karolo ea batho ba hae empa ba sa ka ba tšoarella borapeling ba ’nete. Le kajeno hoa tšoana, esita le haeba batho bao ba ile ba hoholeha kapa ba suthela hōle, kapa ba entse phoso e ’ngoe e itseng ’me ho hlokahala hore ba bake. (Baheberu 2:1; 3:12) Le hoja mohlomong ba sa thaba ha ba le thōko le Jehova, ba ka ’na ba thatafalloa ho khutla. Molimo o ipiletsa ho bona, joalokaha mantsoe a moprofeta oa hae a bontša: “Sena ke seo Jehova oa mabotho a se boletseng: ‘Khutlelang ho ’na,’ ho bolela Jehova oa mabotho, ‘’me ke tla khutlela ho lōna,’ ho boletse Jehova oa mabotho.” (Zakaria 1:3) Mantsoe a Hosea a khothatsa hakaakang! O re: “Lōna Baiseraele, le khutlele ho Jehova Molimo oa lōna, etsoe le khopiloe phosong ea lōna. Inkeleng mantsoe ’me le khutlele ho Jehova. E-reng ho eena, kaofela ha lōna, ‘E se eka u ka tšoarela phoso; ’me u amohele se molemo.’” E, esita le ba entseng liphoso tse tebileng empa ba khutletse ho Molimo ba bakile e le kannete, ba ne ba ka tšoareloa, ’me ba boela ba hlaphoheloa ka ho feletseng. (Hosea 6:1; 14:1, 2; Pesaleme ea 103:8-10) Ho ne ho le joalo mehleng ea baprofeta, ’me ho ntse ho le joalo le mehleng ea rōna.

13. Re na le mabaka afe a ho bontša mohau ho bao Molimo a ba tšoaretseng?

¹³ Leha ho le joalo, see se lokela ho ama Bakreste ba ntseng ba le tseleng e isang bophelong bo sa feleng joang? Re ka bontša joang hore re talima ba bang ka tsela eo Jehova a ba talimang ka eona? Jehova o lebeletse hore re bontše mohau ho batho ba sa tsoa amohela ’nete le ba seng ba khaolitse ho mo sebeletsa. Molimo o ile a sebelisa Hosea hore a bolele seo A se batlang ho rōna: “Etsoe ke khahliloe ke mosa o lerato, eseng sehlabelo.” Tumellanong le mantsoe ana, Jesu Kreste o ile a beha taba tjena: “Joale, e-eang, ’me le ithute hore na sena se bolela eng, ‘Ke batla mohau, eseng sehlabelo.’” (Hosea 6:6; Matheu 9:13) Ke habohlokoa hore re bontše mohau oo e le hore re lule re e-na le kamano e ntle le Molimo. Hlokomela kamoo moapostola Pauluse a ileng a bontša kateng hore ha re tšoarela re etsisa Molimo: “Le bontšane mosa, le be le qenehelo e bonolo, le tšoarelane ka bolokolohi feela joalokaha Molimo le eena ka Kreste a ile a le tšoarela ka bolokolohi. Ka hona, le be baetsisi ba Molimo, joaloka bana ba ratoang, ’me le tsoele pele ho tsamaea leratong.” (Baefese 4:32–5:2) Na u etsisa Molimo ntlheng ee?

14, 15. Boikutlo ba rōna ka ho tšoarela ha Jehova bo ka ’na ba lekoa tlas’a maemo afe?

¹⁴ Ho thoe’ng haeba mor’abo rōna ea re sitetsoeng ka ho tebileng a sa bontša pako a ba a lokela ho lelekoa ka phuthehong? Seo se ile sa etsahala lekholong la pele la lilemo; Bakreste ba ileng ba fetoha baetsalibe ba sa bakeng ba ile ba tlameha ho khaoloa. Haeba sena se ile sa etsahala ha baapostola ba Jesu ba sa le teng, hase mohlolo hore ebe ka linako tse ling sea etsahala kajeno. Ha ho e-ba joalo, ba ntseng ba tšepahala ka phuthehong ba amohela tataiso ea Bibele ea hore ba se ke ba ikopanya le motho ea khaotsoeng. Botšepehi ba bona ho Jehova bo ka thusa mofosi hore a hlokomele hore phoso ea hae e tebile ’me a ka ’na a susumelletseha hore a bake. Ka Bibeleng re bala hore monna e mong ea ileng a khaoloa Korinthe, hamorao o ile a baka ’me a fetoha, eaba o khutlisetsoa ka phuthehong. (1 Bakorinthe 5:11-13; 2 Bakorinthe 2:5-8) U ikutloa joang ha seo se etsahala kajeno, hona u ka bontša joang hore u rata hore ba bang ba fumane bophelo?

¹⁵ E ka ’na eaba mofosi ea bakileng o soabile ’me o nyahame, ho hlokahala hore a kholisoe hore Molimo oa mo rata esita le barab’abo baa mo rata ’me ba batla hore a fumane bophelo. Hlokomela kamoo ka lerato Molimo a ileng a khothatsa sechaba sa hae sa boholo-holo se neng se ikemiselitse ho baka: “Ke tla u lebeletsa ka botšepehi; ’me ka sebele u tla tseba Jehova.” (Hosea 2:20) Kaha Molimo o ikutloa joalo, re lokela ho bontša hore re lumellana le eo Zakaria a mo hlalosang e le Molimo ea ‘bontšang mohau.’—Zakaria 10:6.

16. Re lokela ho ikutloa joang ha motho a khutlisetsoa ka phuthehong?

¹⁶ Molimo o batla hore batho ba fumane bophelo, kahoo, oa thaba ha moetsalibe a baka kapa mohlanka oa hae eo pele a neng a sa kopanele tšebeletsong a boetse a qala ho cheseha.a (Luka 5:32) Ha Pauluse a bua ka monna ea khutliselitsoeng ka phuthehong, ea boletsoeng pejana, o ile a eletsa phutheho hore e mo tšoarele e be e mo khothatse, e mo tsebise hore ka sebele ea mo rata, a re: “Khalemelo ena e matla e fanoeng ke bongata e lekane bakeng sa motho ea joalo, e le hore . . . le ka mo tšoarela ka mosa le ho mo tšelisa, e le hore ka tsela e itseng motho ea joalo a se ke a sithabetsoa ke ho hlomoha ka ho fetisisa. Ka hona ke le eletsa hore le tiise lerato la lōna bakeng sa hae.” (2 Bakorinthe 2:6-8) Hopola hore Hosea o ile a qotsa mantsoe a Jehova ha a re ho bao e kileng ea e-ba baetsalibe: “Ke tla folisa ho se tšepahale ha bona. Ke tla ba rata ka boithatelo ba ka.” (Hosea 14:4) Na re tla etsisa Jehova, re thabele ho kenya letsoho pholisong e joalo ’me re ba thuse ho fumana bophelo bo sa feleng boo e ka bo tlisang?

17, 18. Ka lerato re ka thusa ba khutletseng ho Jehova kapa litho tsa lelapa la motho ea khaotsoeng joang?

¹⁷ Jehova o bontša ka ho hlaka hore o tšoara batho ba khutlang ka tsela e nang le seriti, o ba nka e le batho bao a ba ratang ka ho feletseng, feela joalokaha le Hosea a sa ka a tsila-tsila ho amohela mosali oa hae ea kileng a hloka botšepehi. Ha Jehova a bua ka tsela eo a neng a tšoara bahlanka ba hae ka eona, o re: “[Ke ile] ka ba joaloka ba tlosang joko mehlahareng ea bona, ’me ka bonolo ka tlisetsa e mong le e mong lijo.” (Hosea 11:4) Lerato leo ka lona Jehova a hulang batho baa ba khutlang le khothatsa hakaakang! Re ka mo etsisa ka hore re se ke ra tiisa melala kapa ra hloka botsoalle ha re kopana le ea hlomohileng ka tsela ea bomolimo le ea bakileng e le kannete. Hafeela a amohetsoe hape ka phuthehong, ho e-na le ho mo jara ka pelo kapa ho hlonama ka lebaka la libe tsa hae tsa nakong e fetileng, re lokela ho bua le eena ka tsela e tšelisang neng le neng ha ho hlokahala.—1 Bathesalonika 5:14.

¹⁸ Na u ka nahana ka litsela tse ling tsa ho etsisa Jehova tabeng ea ha motho a khaotsoe ka phuthehong? Haeba motho ea itseng a ile a tlosoa ka phuthehong, na re ka thusa litho tse tšepahalang tsa lelapa la hae, mohlomong molekane ea tšepahalang le bana ba hae? E ka ’na eaba ba thatafalloa ho ba teng libokeng le tšebeletsong kamehla. Na re tla ba tšehetsa ka tsela e khethehileng kaha e ka ’na eaba ba hloka tšehetso e joalo? Tsela e ’ngoe ea ho bontša mohau ke ho sebelisa “mantsoe a molemo, mantsoe a tšelisang,” ka hore re qalise moqoqo o khothatsang le batho ba joalo ba tšepahalang. (Zakaria 1:13) Ho na le menyetla e mengata ea ho etsa sena pele ho liboka le ka mor’a tsona, ha re le ’moho tšebeletsong kapa ka linako tse ling. Ke basebetsi-’moho le rōna, litho tse ratehang tsa phutheho tse sa lokelang ho ikutloa eka lia koekoetloa kapa li qheleloa ka thōko. Maemong a mang, bana ba motsoali ea khaotsoeng ke bona feela ba lekang ho sebeletsa Jehova. Ruri re batla hore ba fumane bophelo. Re ka bontša seo joang?

‘MOSHANYANA EA SE NANG NTATE O BONTŠOA MOHAU’

19. Sofonia o ile a thusa motho ea ka bapisoang le “moshanyana ea se nang ntate” joang moeeng?

¹⁹ U ka fumana mohlala oa ho thusa ba bang tšebeletsong ea Sofonia, ea ileng a sebeletsa lilemong tsa bo-600 B.C.E. E ka ’na eaba e ne e le setho sa lelapa la borena la Juda, mohlomong e le ngoan’abo Morena Josiase ka malapa. Ntate oa morena o ne a bolailoe, e leng ho ileng ha tlama Josiase ea lilemo li robeli hore e be morena. O ne a thulane le mosebetsi o boima: Sechaba se ne se tetebetse borapeling ba litšoantšo le mekhoeng e nyonyehang. (Sofonia 3:1-7) Josiase e monyenyane o ne a hloka tataiso e bohlale le keletso e utloahalang hore a buse sechaba seo se sa mameleng. Jehova o ile a sebelisa Sofonia le baprofeta ba bang ho fana ka tataiso e bohlale, joalokaha ho boletsoe likhaolong tse qalang bukeng ena. Taba ea bohlokoa ke hore le hoja Jehova a ile a sebelisa moprofeta oa hae ho khalemela “likhosana” tsa Juda, ha Aa ka a nyatsa morena ka boeena. (Sofonia 1:8; 3:3) Mohlomong sena se bontša hore Morena Josiase e monyenyane o ne a se a ntse a bontšitse hore o rata borapeli bo hloekileng. Ha ho pelaelo hore keletso ea moprofeta e ile ea thusa Josiase hore a ikemisetse haholoanyane hore a tlose borapeli bo litšila Juda.

20. Ho koetlisoa moeeng ho ka thusa ba “se nang ntate” joang ka phuthehong?

²⁰ Ho ameha ha Sofonia ka Josiase ho re bontša hore Jehova o amehile ka bacha ba hlokang thuso, ba ka hlaseloang habobebe, ba kang bana ba motsoali ea khaotsoeng. Hosea o ile a re: “Ke ka [Molimo] moshanyana ea se nang ntate a bontšoang mohau.” (Hosea 14:3) Na u tseba bashanyana le banana leha e le bafe ba bang ba “se nang ntate” ba hlokang ho koetlisoa moeeng le ho tataisoa bophelong? Mohlomong ke bana bao batsoali ba bona e seng Bakreste ba ’nete, bana ba leng lapeng la motsoali a le mong, kapa bacha bao e leng bona feela ba sebeletsang Jehova malapeng abo bona. Hangata, hore na bacha ba joalo ba lula haufi hakae le phutheho le hore na ba tsoela pele hakae moeeng ho itšetlehile ka hore na ho na le motho ea ba koetlisang moeeng kapa che. Bashanyana ba bangata ba “se nang ntate” ba hōlile ea e-ba batho ba baholo ba butsoitseng hantle, ba ratang lintho tsa moea, ka mor’a hore Bakreste ba hōlileng moeeng ka phuthehong ba ba bontše lerato.—Pesaleme ea 82:3.

21. Bakreste ba hōlileng moeeng ba ka thusa bacha joang?

²¹ Ka mohlala, ’mè ea se nang molekane a ka rua molemo haeba Bakreste ba hōlileng moeeng ba thahasella bana ba hae. (Jakobo 1:27) Ha balebeli le ba bang ba ntse ba bontša hore ba hlompha bohlooho ba bile ba itšoara ka tsela e hlomphehang le e loketseng, ba ka thusa litho tsa malapa a hlokang ho thusoa moeeng. Mohlomong uena le molekane oa hao kapa le lelapa la hao le ka qeta nako e itseng le e-na le moshanyana kapa ngoanana ea se nang ntate. Na u ka bontša mosa ho bacha bao e ka ’nang eaba ba jeoa ke bolutu? E ka ’na eaba ba hloka motho ea ka ba utloelang bohloko le eo ba ka mo phetlelang sefuba, e leng seo u ka ba thusang ka sona ha u tsamaea le bona tšebeletsong ea boboleli. Ha ho pelaelo hore u maphathaphathe, kahoo, ho thusa mocha ea joalo khafetsa ka nako e telele, ho ka “leka bonnete ba lerato la [hao].” (2 Bakorinthe 8:8) Boiteko ba hao bo tla bontša hore u thahasella hore ba bang ba fumane bophelo.

22. U ikutloa joang ka taba ea hore ebe Jehova o ameha ka hore ba bang ba fumane bophelo?

²² Ho matlafatsa hakaakang ho nahana kamoo Molimo a thahasellang batho kateng, le kamoo a batlang hore ba fumane bophelo bo sa feleng! A ka mpa a bontša lerato ho ba lokileng le ba mo ratang a ba a ba fa bophelo ho e-na le ho halefela ba khethang ho satalatsa melala le ba sa tšoaneloeng ke bophelo bo sa feleng. Ha re ntse re letetse letsatsi la Jehova ka matla, a re mo etsiseng ka hore re thuse ba bang hore ba kene tseleng e isang bophelong.

[Mongolo o botlaaseng ba leqephe]

NA U LEMOHILE?

• Ke hobane’ng ha u ka rua molemo ka ho hlahloba hore na u ikutloa joang ka mohau le kutloelo-bohloko?—Jonase 4:1, 10, 11.

• Mohau oa Jehova le toka ea hae li sebetsa ’moho joang?—Hosea 2:19; Mikea 7:9.

• Ke lintlha life tse bontšang hore Jehova oa tšoarela tse totobalang mohlaleng oa Baninive?—Jonase 3:5, 9, 10; 4:2.

U KA RUA MOLEMO JOANG?

• Ba entseng libe tse tebileng ba ka rua molemo joang mohaung oa Molimo?—Hosea 3:3; 4:2; 14:4.

• Litsela tse ling tse tobileng tseo ka tsona u ka bontšang mosa o lerato ka phuthehong ke life?—Hosea 11:4; Zakaria 1:13.

• Ke hobane’ng ha e le habohlokoa hore re bontše kutloelo-bohloko ha re thusa ba hlokang thuso?—Sofonia 3:16, 17.

[Lebokose le leqepheng la 141]

BA ILE BA ITLHAHISA

Baprofeta ba 12 ba ile ba beha mohlala o ikhethang oa ho ameha ka bophelo ba batho ba bang. Ho sa tsotellehe boitelo boo ho neng bo hlokahala hore ba bo etse le likotsi le litšokelo tseo ba ileng ba tobana le tsona, ba ile ba fetisa melaetsa ea bona ka botšepehi molemong oa sechaba sa Molimo le molemong oa batho ba bang. Karolong ea mokhatlo oa Molimo o hlophisitsoeng e lefatšeng e lulang e ntse e hōla, ho lula ho hlokahala banna ba hōlileng moeeng ba ikemiselitseng ho sebeletsa e le baholo le bahlanka ba sebeletsang liphuthehong lefatšeng ka bophara. Ho boetse ho hlokahala basebeletsi ba eketsehileng ba nako e tletseng kapele-pele. Na u ka etsisa mohlala oa baprofeta ka hore u ithaope, u sebelise tsebo ea hao le bokhoni ba hao ho etsa mosebetsi oa Molimo ka hare le ka ntle ho phutheho? Eo ke e ’ngoe ea litsela tse molemo ka ho fetisisa tsa ho etsisa Jehova e le hore ba bang ba ka fumana bophelo.

[Setšoantšo se leqepheng la 143]

Ka linako tse ling, esita le bahlanka ba Molimo ba ka ’na ba sitoa ho lemoha hore na mohau oa hae o pharaletse hakae

[Setšoantšo se leqepheng la 146]

U ka thusa batho bao e kileng ea e-ba Bakreste ba chesehang joang hore ba khutlele ho Jehova?

[Setšoantšo se leqepheng la 151]

Na u ka fetoha mokoetlisi ea lerato oa moea oa bacha ba “se nang ntate”?