Ho rutoa ho etsa thato ea Jehova
“Nthute ho etsa thato ea hao, hobane u Molimo oa ka.”—PESALEME EA 143:10, NW.
1, 2. (a) Re lokela ho rutoa neng, hona e le ka pono efe ea sebele? (b) Ke hobane’ng ha ho rutoa ke Jehova e le habohlokoa hakaale?
LETSATSI le leng le le leng leo motho a phelang ka lona a bileng a leng sehlahlo, a ka rutoa ho hong ho molemo. Seo ke ’nete tabeng ea hao, ’me ke ’nete le ka ba bang. Empa ho etsahala’ng lefung? Ho ke ke ha etsahala hore ho be le ntho eo motho a ka e rutoang kapa eo a ka ithutang eona boemong boo. Bibele ka ho hlaka e bolela hore bafu “ha ba tsebe letho leha le le leng.” Ha ho na tsebo Sheole, lebitla le tloaelehileng la moloko oa batho. (Moeklesia 9:5, 10) Na see se bolela hore ho rutoa ha rōna, re eketsa tsebo, ke halefeela? Seo se itšetlehile ka seo re se rutoang le kamoo re sebelisang tsebo eo kateng.
2 Haeba re rutoa lintho tsa lefatše feela, ha re na bokamoso bo tšoarellang. Leha ho le joalo, hoa thabisa hore ebe batho ba limilione lichabeng tsohle ba rutoa thato ea Molimo ka tebello ea bophelo bo sa feleng. Motheo oa tšepo ena ke ho rutoa ke Jehova, Mohloli oa tsebo e fanang ka bophelo.—Pesaleme ea 94:9-12.
3. (a) Ke hobane’ng ha ho ka boleloa hore Jesu e ne e le seithuti sa pele sa Molimo? (b) Re na le kholiseho efe ea hore batho ba tla rutoa ke Jehova, hona ka phello efe?
3 Mora oa Molimo oa letsibolo, e le seithuti sa Hae sa pele, o ile a rutoa ho etsa thato ea Ntat’ae. (Liproverbia 8:22-30; Johanne 8:28) Jesu le eena o ile a bontša hore limiriade tsa batho li ne li tla rutoa ke Ntate oa hae. Litebello tsa rōna ba ithutang ho Molimo ke life? Jesu o itse: “Ho ngoliloe Baprofeteng, ‘’Me kaofela ba tla rutoa ke Jehova.’ E mong le e mong ea utloileng ho Ntate le ea ithutileng o tla ho ’na. . . . Kannete-nete ke re ho lōna, Ea lumelang o na le bophelo bo sa feleng.”—Johanne 6:45-47.
4. Batho ba limilione ba angoa joang ke thuto ea bomolimo, ’me ba na le litebello life?
4 Jesu o ne a qotsa ho Esaia 54:13, e neng e lebisitsoe ho mosali oa Molimo oa tšoantšetso, Sione ea leholimo. Boprofeta boo bo sebetsa ka ho khethehileng ho bara ba hae, barutuoa ba Jesu Kreste ba tsoetsoeng ka moea ba 144 000. Masala a bara bao ba moea a sehlahlo kajeno, a etella pele lenaneo la ho ruta la lefatše lohle. Ka lebaka leo, ba bang ba limilione ba etsang “bongata bo boholo” le bona ba fumana molemo ka ho rutoa ke Jehova. Ba na le tebello e ikhethang ea ho ithuta ntle le hore lefu le etse hore tokisetso eo e khaotse. Joang? Ha e le hantle, ba moleng oa ho pholoha ‘matšoenyeho a maholo’ a atamelang ka potlako le ho thabela bophelo bo sa feleng lefatšeng la paradeise.—Tšenolo 7:9, 10, 13-17.
Khatiso e Khōloanyane e ho Etsoeng ha Thato ea Molimo
5. (a) Temana ea selemo ea 1997 ke efe? (b) Re lokela ho ikutloa joang ka ho ba teng libokeng tsa Bokreste?
5 Ka 1997, liphuthehong tse ka holimo ho 80 000 lefatšeng ka bophara, Lipaki tsa Jehova kamehla li tla hopola mantsoe a qalang a Pesaleme ea 143:10 (NW): “Nthute ho etsa thato ea hao.” Eo e tla ba temana ea selemo ea 1997. Mantsoe ao, ao ka ho hlaka a fanyehiloeng Holong ea ’Muso, a tla sebeletsa e le khopotso ea hore sebaka se hlaheletseng sa ho fumana thuto ea bomolimo ke libokeng tsa phutheho, moo re ka kopanelang lenaneong le tsoelang pele la thuto. Ha re kopana le barab’abo rōna libokeng re rutoa ke Morupeli e Moholo oa rōna, re ka ikutloa joaloka mopesaleme, ea ileng a ngola: “Ka thaba ha ba itse ho ’na: A re eeng ka tlung ea Jehova!”—Pesaleme ea 122:1; Esaia 30:20.
6. Ho ea ka mantsoe a Davida, re lumela eng?
6 E, re lakatsa ho rutoa ho etsa thato ea Molimo ho e-na le ho rutoa ho etsa thato ea sera sa rōna Diabolose kapa thato ea batho ba sa phethahalang. Ka hona, joaloka Davida, re lumela hore Molimo eo re mo rapelang le ho mo sebeletsa o teng: “Hobane u Molimo oa ka. Moea oa hao o molemo; a o ke o nketelle pele naheng ea ho loka.” (Pesaleme ea 143:10, NW) Ho e-na le ho batla ho itsoakanya le mahata, Davida o ne a khetha ho ba moo borapeli ba Jehova bo neng bo sebelisoa teng. (Pesaleme ea 26:4-6) Kaha o ne a e-na le moea oa Molimo bakeng sa ho tsamaisa mehato ea hae, Davida o ne a ka tsamaea litseleng tsa ho loka.—Pesaleme ea 17:5; 23:3.
7. Moea oa Molimo o ’nile oa sebetsa joang phuthehong ea Bokreste?
7 Davida e Moholoanyane, Jesu Kreste, o ile a tiisetsa baapostola hore moea o halalelang o ne o tla ba ruta lintho tsohle ’me o ba hopotse lintho tsohle tseo a neng a ba boleletse tsona. (Johanne 14:26) Ho tloha ka Pentekonta ho ea pele, mohato ka mohato Jehova o ’nile a senola “lintho tse tebileng tsa Molimo” tse ka Lentsoeng la hae le ngotsoeng. (1 Bakorinthe 2:10-13) Sena o se entse ka mocha o bonahalang oo Jesu a ileng a o bitsa “lekhoba le tšepahalang le le masene.” Le fana ka lijo tsa moea tse hlahlojoang lenaneong le rutang la liphutheho tsa batho ba Molimo lefatšeng ka bophara.—Matheu 24:45-47.
Re Rutoa Thato ea Jehova Libokeng Tsa Rōna
8. Ke hobane’ng ha ho kopanela Thutong ea Molula-Qhooa e le habohlokoa hakaale?
8 Boitsebiso bo Thutong ea Molula-Qhooa ea phutheho ea beke le beke hangata bo sebetsana le tšebeliso ea melao-motheo ea Bibele. Ka sebele sena se re thusa ho sebetsana ka katleho le matšoenyeho a bophelo. Lithutong tse ling linnete tsa moea tse tebileng kapa boprofeta ba Bibele lia hlahlojoa. Re rutoa hakaakang lithutong tse joalo! Linaheng tse ngata Liholo tsa ’Muso li tlala tsoete! libokeng tsena. Empa linaheng tse ’maloa, palo ea ba bang teng libokeng e theohile. U nahana hore ke hobane’ng? Na ho ka etsahala hore ba bang ba lumella mosebetsi oa boipheliso ho kena-kenana le ho bokana ha bona hammoho kamehla ho ‘susumelletsana leratong le mesebetsing e metle’? Kapa ho ka etsahala hore ebe lihora tse ngata li sebelisoa boithabisong kapa ho shebelleng thelevishene, e leng ho etsang hore ho bonahale eka kemiso ea bona e tletse haholo hoo ba sa khoneng ho ea libokeng tsohle? Hopola taelo e bululetsoeng e ho Baheberu 10:23-25. Na ho bokana hammoho bakeng sa thuto ea bomolimo hase habohlokoa haholoanyane hona joale kaha re “bona letsatsi le ntse le atamela”?
9. (a) Seboka sa Tšebeletso se ka re hlomella joang bakeng sa tšebeletso? (b) Boikutlo ba rōna e lokela ho ba bofe ka ho paka?
9 Boikarabelo bo bong bo ka sehloohong ke ba ho sebeletsa joaloka basebeletsi ba Molimo. Seboka sa Tšebeletso se lokiselitsoe ho re ruta kamoo re ka finyellang sena ka katleho. Re ithuta kamoo re ka atamelang batho, seo re ka se buang, bohato boo re lokelang ho bo nka ha ho e-na le karabelo e ntle, esita le seo re ka se etsang ha batho ba hana molaetsa oa rōna. (Luka 10:1-11) Ha ho ntse ho buisanoa ka mekhoa e atlehang ebile e bontšoa lipontšong libokeng tsena tsa beke le beke, re ba ba loketseng haholoanyane ho finyella batho eseng feela ha re ea ka ntlo le ntlo empa le ha re bolela literateng, moo ho pakoang likoloi, lipalangoeng tsa sechaba, liemelong tsa lifofane, libakeng tsa khoebo kapa likolong. Tumellanong le kōpo ea rōna, “Nthute ho etsa thato ea hao,” re tla batla ho sebelisa monyetla o mong le o mong ho etsa joalokaha Monghali oa rōna a ile a phehella: “Leseli la lōna a le khanye ka pel’a batho, e le hore ba ka . . . tlotlisa Ntate oa lōna ea leng maholimong.”—Matheu 5:16.
10. Re ka thusa ‘ba tšoanelehang’ e le kannete joang?
10 Libokeng tse joalo tsa phutheho, re boetse re rutoa ho etsa ba bang barutuoa. Hang ha ho fumanoe ea bontšang thahasello kapa ho tsamaisitsoe lingoliloeng, sepheo sa rōna sa ho etsa maeto a ho boela ke ho qalisa lithuto tsa mahae tsa Bibele. Ho ea bohōleng bo itseng, sena se tšoana le ha barutuoa ba ‘lula le ba tšoanelehang’ e le hore ba ka ba ruta lintho tseo Jesu a neng a ba laetse tsona. (Matheu 10:11; 28:19, 20) Kaha re na le lithuso tse ntle haholo, tse kang buka ea Tsebo e Isang Bophelong bo sa Feleng, ka sebele re hlomeletsoe hamolemo bakeng sa ho phetha bosebeletsi ba rōna ka botlalo. (2 Timothea 4:5) Ha u ntse u e-ba teng Sebokeng sa Tšebeletso le Sekolong sa Tšebeletso sa Puso ea Molimo beke le beke, leka ka matla ho utloisisa ebe u sebelisa lintlha tse thusang tse tla u susumelletsa ho ba e mong oa basebeletsi ba Molimo ba tšoanelehang ka ho lekaneng, ba etsang thato ea hae.—2 Bakorinthe 3:3, 5; 4:1, 2.
11. Ba bang ba bontšitse tumelo joang mantsoeng a fumanoang ho Matheu 6:33?
11 Ke thato ea Molimo hore re ‘’ne re tsoele pele re batla ’muso pele le ho loka ha hae.’ (Matheu 6:33) Ipotse, ‘Ke ne ke tla sebelisa molao-motheo oo joang haeba litlhoko tsa mosebetsi oa ka [kapa oa molekane oa ka] oa boipheliso li ne li kena-kenana le ho kopanela libokeng?’ Ba bangata ba hōlileng moeeng ba ne ba tla nka bohato ba ho bua le bahiri ba bona ka taba ena. Mosebeletsi e mong oa nako e tletseng o ile a tsebisa mohiri oa hae hore o batla ho ba sieo mosebetsing ka nako e itseng beke le beke e le hore a ka ba teng libokeng tsa phutheho. O ile a mo lumella. Empa ka lebaka la ho laba-labela ho tseba hore na ho etsahala’ng libokeng, o ile a kōpa ho ba teng. Ha a le moo o ile a utloa ho etsoa tsebiso mabapi le kopano ea setereke e atamelang. Ka lebaka leo, mohiri enoa o ile a lokisetsa ho qeta letsatsi lohle kopanong eo. U ithuta’ng mohlaleng oo?
Ho Rutoa Thato ea Jehova ke Batsoali ba Tšabang Molimo
12. Batsoali ba Bakreste ba lokela ho etsa’ng ka mamello le ka tieo hore bana ba rutoe thato ea Jehova?
12 Empa liboka tsa phutheho le likopano hase tsona feela litokisetso tsa ho rutoa ho etsa thato ea Molimo. Batsoali ba tšabang Molimo ba laeloa ho koetlisa, ho laea le ho hōlisa bana ba bona hore ba rorise Jehova le ho etsa thato ea hae. (Pesaleme ea 148:12, 13; Liproverbia 22:6, 15) Ho etsa sena ho hloka hore re ise “bana” ba rōna libokeng moo ba ka ‘utloang, ’me ba ithuta,’ empa ho thoe’ng ka ho ba ruta mangolo a halalelang lapeng? (Deuteronoma 31:12; 2 Timothea 3:15) Malapa a mangata ka khothalo a qalile mananeo a lithuto tsa lelapa tsa Bibele tsa kamehla, feela hore ka mor’a nako e khutšoanyane a li tlohele li thekesele kapa li khaotse. Na u kile ua ba le phihlelo e joalo? Na u tla etsa qeto ea hore khothalletso ea ho ba le thuto e joalo ea kamehla ha ea nepahala kapa hore boemo ba lelapa la hao bo khethehile hoo e ke keng ea sebetsa ho bona? Ho sa tsotellehe hore na boemo ke bofe, lōna batsoali ka kōpo hlahlobang lihlooho tsena tse molemo “Lefa la Rōna le Enneng la Moea” le “Moputso oa ho Phehella” ho Molula-Qhooa oa August 1, 1995.
13. Malapa a ka fumana molemo joang ka ho hlahloba temana ea letsatsi?
13 Malapa a khothalletsoa ho itloaetsa ho hlahloba temana ea letsatsi ho Ho Hlahlobisisa Mangolo Kamehla. Ho bala temana feela le litlhaloso ho molemo, empa ho buisana ka temana le ho e sebelisa ho molemo haholoanyane. Ka mohlala, haeba litho tsa lelapa li hlahloba Baefese 5:15-17, li ka buisana ka tsela eo ka eona li ka ‘rekang nako e loketseng’ bakeng sa thuto ea botho, ho kopanela mofuteng o itseng oa tšebeletso ea nako e tletseng le ho hlokomela likabelo tse ling tsa puso ea Molimo. E, puisano ea lelapa ea temana ea letsatsi e ka etsa hore motho kapa ba bangata ba “tsoele pele ho lemoha [ka botlalo haholoanyane] seo thato ea Jehova e leng sona.”
14. Deuteronoma 6:6, 7 e bontša hore batsoali e lokela ho ba mesuoe ea mofuta ofe, e leng se hlokang eng?
14 Batsoali e tlameha ho ba mesuoe ea bana ba bona e khothetseng. (Deuteronoma 6:6, 7) Empa hase feela taba ea ho khalemela bana ba bona ka thata kapa ho ba laela ka matla. Hape ho hlokahala hore ntate le ’mè ba mamele, ka tsela eo ba ka khona ho tseba hamolemo se lokelang ho hlalosoa, ho hlakisoa, ho etsetsoa lipapiso kapa ho phetoa. Lelapeng le leng la Bokreste, batsoali ba khothalletsa puisano e bontšang ho lokolohelana ka ho khothalletsa bana ba bona ho botsa lipotso ka lintho tseo ba sa li utloisiseng kapa tseo ba amehileng ka tsona. Kahoo ba ile ba hlokomela hore mora oa bona eo e leng mocha o ne a e-na le bothata ba ho utloisisa hore Jehova ha a na qalo. Batsoali ba ile ba khona ho sebelisa boitsebiso bo tsoang ho lingoliloeng tsa Mokhatlo oa Watch Tower bo bontšang hore ho lumeloa hore nako le sepaka-paka ha li na qetello. Boitsebiso boo bo ile ba sebeletsa e le papiso ea ntlha ena, ’me bo ile ba khotsofatsa mora oa bona. Ka hona nka nako ho araba lipotso tsa bana ba hao ka ho hlaka le ka Mangolo, u ba thuse ho bona hore ho ithuta ho etsa thato ea Molimo ho ka khotsofatsa haholo. Ke’ng hape seo batho ba Molimo—ba bacha le ba hōlileng—ba se rutoang kajeno?
Ho Rutoa ho Rata le ho Loana
15. Bonnete ba lerato la rōna la bara ba motho bo ka lekoa joang?
15 Tumellanong le taelo ea Jesu e ncha, re “rutoa ke Molimo ho ratana.” (1 Bathesalonika 4:9) Ha ho e-na le khutso ’me lintho li tsamaea hantle, re ka ’na ra ikutloa hore re rata barab’abo rōna bohle. Empa ho etsahala’ng ha liphapang tsa botho li hlaha kapa re khopisoa ke seo Mokreste e mong a se buang kapa a se etsang? Mothating ona bonnete ba lerato la rōna bo ka ’na ba behoa tekong. (Bapisa le 2 Bakorinthe 8:8.) Bibele e re ruta ho etsa’ng maemong a joalo? Ntho e ’ngoe ke ho leka ka matla ho bontša lerato ka kutloisiso e feletseng. (1 Petrose 4:8) Ho e-na le ho batla lithahasello tsa rōna ka borōna, ho khopisoa ke mefokolo e sa reng letho kapa ho boloka tlaleho ea se kotsi, re lokela ho sebeletsa ho lumella lerato ho koahela libe tse ngata haholo. (1 Bakorinthe 13:5) Rea tseba hore sena ke thato ea Molimo, hobane ke seo Lentsoe la hae le se rutang.
16. (a) Bakreste ba rutiloe ho loana ntoa ea mofuta ofe? (b) Re hlomeletsoe joang?
16 Le hoja ba bangata ba ke ke ba hokahanya lerato le ntoa, re rutoa ntoa, empa mofuta oa ntoa o ikhethang. Davida o ile a hlokomela ho itšetleha ha hae ka Jehova hore a mo rute mokhoa oa ho loana, le hoja mehleng ea hae seo se ne se akarelletsa ntoa ea sebele khahlanong le lira tsa Iseraele. (1 Samuele 17:45-51; 19:8; 1 Marena 5:3; Pesaleme ea 144:1) Ho thoe’ng ka ntoa ea rōna kajeno? Lihlomo tsa rōna hase tsa nama. (2 Bakorinthe 10:4) Ntoa ea rōna ke ea moea, eo re lokelang ho itlhomella ka lihlomo tsa moea bakeng sa eona. (Baefese 6:10-13) Ka Lentsoe la hae le batho ba hae ba phuthehileng, Jehova o re ruta ho loana ntoa ea moea ka katleho.
17. (a) Diabolose o sebelisa maqheka afe ho re khelosa? (b) Re lokela ho qoba eng ka bohlale?
17 Ka litsela tse thetsang, tse poteletseng, hangata Diabolose o sebelisa litšusumetso tsa lefatše, bakoenehi le bahanyetsi ba bang ba ’nete ho leka ho re khelosetsa linthong tseo e seng tsa bohlokoa. (1 Timothea 6:3-5, 11; Tite 3:9-11) Ekare oa bona hore o na le monyetla o monyenyane oa ho re hlōla ka tlhaselo e tobileng, ka hona o leka ho re khopa ka ho etsa hore re bue ka lipelaelo tsa rōna tse sa khaotseng le ka likhang tsa rōna tsa booatla, tseo e seng tsa bohlokoa moeeng. Joaloka bahlabani ba hlokolosi, re lokela ho falimehela likotsi tse joalo joalokaha re falimehela litlhaselo tse tobileng.—1 Timothea 1:3, 4.
18. Ho se hlole re iphelela ho hlile ho bolela eng?
18 Ha re khothalletse litakatso tsa batho kapa thato ea lichaba. Jehova o re rutile ka mohlala oa Jesu hore re tlameha ho se hlole re iphelela; ho e-na le hoo, re be le boikutlo ba kelello bo kang boo Kreste Jesu a neng a e-na le bona ’me re phelele ho etsa thato ea Molimo. (2 Bakorinthe 5:14, 15) Ho ka etsahala hore ebe nakong e fetileng re ne re phela bophelo bo feteletseng haholo, ba boitšoaro bo bobe, re senya nako ea bohlokoa. Mekete e lerata, litlhōlisano tsa ho noa le boitšoaro bo bobe li khetholla lefatše lena le khopo. Joale kaha re rutoa ho etsa thato ea Molimo, na ha re lebohe hore ebe re arohile lefatšeng lee le senyehileng? Ka hona a re loaneng ntoa e matla moeeng ho qoba ho ameha mekhoeng ea lefatše e silafatsang.—1 Petrose 4:1-3.
Ho re Ruta ho Itsoela Molemo
19. Ho rutoa thato ea Jehova le ho e etsa ho tla lebisa melemong efe?
19 Ke tlamo hore re hlokomele hore ho rutoa ho etsa thato ea Jehova ho re tsoela molemo o moholo. Ke ho utloahalang hore re tlameha ho phetha karolo ea rōna ka ho tsepamisa mohopolo haholo e le hore re ka ithuta ebe re latela litaelo tse tlang ho rōna ka Mora oa hae esita le ka Lentsoe la hae le batho ba bokaneng. (Esaia 48:17, 18; Baheberu 2:1) Ka ho etsa seo, re tla matlafaletsoa ho ema re tiile linakong tsena tsa litlokotsi ’me re pholohe lifefo tse ka pele. (Matheu 7:24-27) Esita le hona joale, re tla be re khahlisa Molimo ka ho etsa thato ea hae ’me re tla be re tiisa hore lithapelo tsa rōna lia arabeloa. (Johanne 9:31; 1 Johanne 3:22) ’Me re tla latsoa thabo ea sebele.—Johanne 13:17.
20. Ho tla ba molemo ho nahanisisa ka eng ha u ntse u bona temana ea selemo ho pholletsa le 1997?
20 Ho pholletsa le 1997, khafetsa re tla ba le monyetla oa ho bala le ho hlahloba temana ea selemo, Pesaleme ea 143:10 (NW): “Nthute ho etsa thato ea hao.” Ha re ntse re etsa sena, a re sebeliseng menyetla e meng ho nahana ka litokisetso tseo Molimo a re etselitseng tsona tsa hore re rutoe, joalokaha li lokolisitsoe ka holimo. ’Me a re sebeliseng ho nahanisisa ho joalo ka mantsoe ao e le tšusumetso ea ho sebetsa tumellanong le kōpo eo e tiileng, re tseba hore “ea etsang thato ea Molimo o hlola ka ho sa feleng.”—1 Johanne 2:17.
U ne U Tla Araba Joang?
◻ Kajeno ke bo-mang ba rutoang ho etsa thato ea Jehova?
◻ Pesaleme ea 143:10 e lokela ho re ama joang ka 1997?
◻ Re rutoa joang ho etsa thato ea Jehova?
◻ Ho hlokahala eng ho batsoali ba Bakreste tabeng ea ho ruta bana ba bona?