Khaolao ea 15

O Ile “a Susumetsoa ke Khauho”

1-3. (a) Jesu o etsa’ng ha banna ba babeli ba mekōpa-kōpa ba foufetseng ba mo kōpa hore a ba thuse? (b) Poleloana e reng “a susumelitsoe ke khauho” e bolela’ng? (Bona mongolo o botlaaseng ba leqephe.)

BANNA ba babeli ba foufetseng ba lutse ka thōko ho tsela, haufi le Jeriko. Ba ea moo letsatsi le chabang le le likelang, ebe ba batla sebaka seo batho ba fetang ho sona ka bongata, ’me ba qele chelete. Empa kajeno ba mothating oa ho etsahalloa ke taba e ’ngoe e ikhethang e tlil’o fetola bophelo ba bona.

² Ka tšohanyetso, banna bao ba mekōpa-kōpa ba utloa lerata. Kaha ha ba bone se etsahalang, e mong oa bona oa botsa hore na ho etsahala’ng, ’me ba re ho eena: “Jesu Monazaretha oa feta!” Jesu o etela Jerusalema ka lekhetlo la ho qetela. Empa ha a mong; bongata bo mo setse morao. Ha banna bao ba mekōpa-kōpa ba utloa hore na ke mang ea fetang, baa hoeletsa ba re: “Morena, re hauhele, Mora oa Davida!” Bongata bo khutsisa banna bao ba mekōpa-kōpa ka ho teneha, empa banna bao baa qophella. Ba hana ho khutsa.

³ Jesu o utloa mohoo oa bona ka har’a lerata leo la bongata. O etsa’ng? O na le lintho tse ngata tse mo imetseng kelellong le maikutlong. O saletsoe ke nako e ka etsang beke feela a ntse a phela. Oa tseba hore o il’o hlokofatsoa a be a bolaoe ka sehlōhō Jerusalema. Leha ho le joalo, ha a iphapanyetse mehoo eo e phehellang. Oa ema o re banna bao ba ntseng ba hooa ba tlisoe ho eena. Ba mo kōpa ka tieo, ba re: “Morena, mahlo a rōna a ke a bulehe.” “A susumelitsoe ke khauho,” Jesu o ama mahlo a bona, ’me mahlo a bona aa tutuboloha.a Hang-hang ba latela Jesu.—Luka 18:35-43; Matheu 20:29-34.

 4. Jesu o ile a phethahatsa boprofeta bo neng bo re o tla “utloela ea tlaase bohloko” joang?

⁴ Sena ha sea etsahala hanngoe feela. Jesu o ile a susumelletseha ho bontša qenehelo ka makhetlo-khetlo le hona e le maemong a mangata a sa tšoaneng. Boprofeta ba Bibele bo ne bo boletse esale pele hore o ne a tla “utloela ea tlaase bohloko.” (Pesaleme ea 72:13) Tumellanong le mantsoe ao, Jesu o ne a nahanela maikutlo a ba bang. O ne a ithaopela ho thusa batho. O ne a susumetsoa ke qenehelo ha a le boboleling. A re boneng kamoo Likosepele li senolang qenehelo e bonolo e neng e susumetsa seo Jesu a neng a se bua le seo a neng a se etsa ebe re hlahloba kamoo re ka bontšang qenehelo e tšoanang kateng.

O ne a Nahanela Maikutlo a ba Bang

5, 6. Ke mehlala efe e bontšang hore Jesu e ne e le motho ea nang le kutloelo-bohloko?

⁵ Jesu o ne a e-na le kutloelo-bohloko e tebileng. O ne a utloisisa tsela eo ba mahlomoleng ba ikutloang ka eona a bile a ba utloela bohloko. Le hoja a ne a sa hlaheloe ke lintho tsohle tse neng li ba hlahela, pelong ea hae o ne a utloa bohloko boo ba bo utloang. (Baheberu 4:15) Ha a ne a folisa mosali e mong ea qetileng lilemo tse 12 a e-na le bothata ba phallo ea mali, o ile a hlalosa hore o tšoeroe ke “boloetse bo bohloko,” kahoo o ne a elelloa hore bothata boo bo mo baketse matšoenyeho le mahlomola ka ho tebileng. (Mareka 5:25-34) Ha a bona Maria le ba nang le eena ba llela Lazaro ea shoeleng, mesarelo ea bona e ile ea mo ama ka ho teba hoo a ileng a khathatseha. Le hoja Jesu a ne a tseba hore o tlil’o tsosa Lazaro, o ile a utloa bohloko hoo a ileng a sekisa meokho.—Johanne 11:33, 35.

⁶ Ketsahalong e ’ngoe, molepera o ile a tla ho Jesu a mo kōpa ka tieo, a re: “Haeba feela u batla, u ka ntlhoekisa.” Jesu ea neng a phethahetse ’me ho se mohla a kileng a kula, o ile a etsa joang? O ile a utloela molepera eo bohloko. Ha e le hantle, o ile a “susumetsoa ke khauho.” (Mareka 1:40-42) A ntan’o etsa ntho e ’ngoe e sa tloaelehang. O ne a tseba hantle hore ho ea ka Molao balepera ba ne ba sa hloeka ’me ba sa lokela ho itsoakanya le batho ba bang. (Levitike 13:45, 46) Jesu o ne a bile a e-na le matla a ho folisa monna eo a ntse a le thōko le eena. (Matheu 8:5-13) Leha ho le joalo, o ile a khetha ho otlolla letsoho le ho ama molepera eo, a re: “Kea batla. Hloeka.” Hang-hang lepera la fola. Jesu o ile a bonahatsa kutloelo-bohloko ka tsela e mosa hakaakang!

 7. Ke’ng e ka re thusang ho hlaolela kutloelo-bohloko, hona tšobotsi ee e ka bontšoa joang?

⁷ Kaha re Bakreste, re khothalletsoa ho etsisa Jesu tabeng ea ho bontša kutloelo-bohloko. Bibele e re phehella hore re bontše “ho utloelana bohloko.”b (1 Petrose 3:8) Re ka ’na ra thatafalloa ho utloisisa tsela eo batho ba kulang ba tšoeroeng ke maloetse a sa foleng kapa ba tetebetseng maikutlo ba ikutloang ka eona—haholo haeba rōna ha re e-s’o ka re e-ba boemong bo bohloko joalo. Empa u hopole hore kutloelo-bohloko ha e tlisoe ke ho feta boemong bo tšoanang le ba motho e mong. Jesu o ne a utloela batho ba kulang bohloko le hoja ho se mohla eena a kileng a kula. Joale re ka hlaolela kutloelo-bohloko joang? Ka ho mamela re sa fele pelo ha ba mahlomoleng ba re phetlela sefuba ba re bolella kamoo ba ikutloang kateng. Re ka ’na ra ipotsa, ‘Haeba ke ne ke le boemong boo ba bona, ke ne ke tla ikutloa joang?’ (1 Bakorinthe 12:26) Haeba re itloaelitse ho nahanela maikutlo a ba bang, re tla khona ho ‘bua ka mokhoa o tšelisang le meea e tepeletseng maikutlo.’ (1 Bathesalonika 5:14) Ka linako tse ling, motho a ka ’na a se ke a bontša kutloelo-bohloko ka seo a se buang feela empa a ka e bontša le ka meokho. Baroma 12:15 e re, “Llang le batho ba llang.”

8, 9. Jesu o ile a bontša ho nahanela maikutlo a ba bang joang?

⁸ Jesu o ne a nahanela ba bang, a etsa lintho ka tsela e bontšang hore o nahanela maikutlo a bona. Nahana ka lekhetlo le leng ha monna e mong ea neng a sa utloe litsebeng a bile a sa khone ho bua hantle a ne a tlisoa ho Jesu. Kamoo ho bonahalang kateng, Jesu o ile a hlokomela hore monna enoa ha aa phutholoha eaba o etsa ntho eo a neng a sa atise ho e etsa ha a folisa ba bang: ‘O ile a tlosa monna eo ho bongata.’ Eaba o mo folisa ka lenyele hōle le bongata bo mo shebileng.—Mareka 7:31-35.

⁹ Jesu o ile a bontša ho nahanela ho tšoanang ha batho ba mo tlisetsa monna e mong ea foufetseng ’me ba mo kōpa hore a mo folise. Jesu o ile “a tšoara monna ea foufetseng ka letsoho” a “mo isa ka ntle ho motsana.” A ntan’o folisa monna eo butle-butle. Mohlomong sena se ile sa fa monna eo nako ea hore kelello le mahlo a bone lintho tse ngata tse khanyang tseo a qalang ho li bona butle-butle. (Mareka 8:22-26) Ruri Jesu o ile a bontša ho nahanela ho hokaakang!

10. Re ka bontša ho nahanela maikutlo a ba bang ka litsela life?

¹⁰ Kaha re balateli ba Jesu, ho hlokahala hore re bontše ho nahanela maikutlo a ba bang. Kahoo re ela hloko seo re se buang, re ntse re hopola hore ho ipuela feela motho a sa nahane ho ka utloisa ba bang bohloko. (Liproverbia 12:18; 18:21) Bakreste ba nahanelang maikutlo a batho ba bang ha ba sebelise puo e hlabang, e nyenyefatsang le e somang. (Baefese 4:31) Baholo, le ka bontša ho nahanela maikutlo a ba bang joang? Ha le fana ka keletso, sebelisang mantsoe a mosa, le siele momameli seriti. (Bagalata 6:1) Batsoali, le ka nahanela maikutlo a bana ba lōna joang? Ha le fana ka taeo, lekang ho fana ka eona ka tsela e sa tl’o hlabisa bana lihlong ho sa hlokahale.—Bakolose 3:21.

O ne a Ithaopela ho Thusa ba Bang

11, 12. Ke litlaleho life tsa Bibele tse bontšang hore Jesu o ne a sa emele hore a be a kōpuoe pele a bontša qenehelo?

¹¹ Hase kamehla Jesu a neng a emela hore a be a kōpuoe pele a bontša qenehelo. Etsoe qenehelo ke tšobotsi e susumelletsang motho ho nka khato ho thusa ka tsela e itseng. Kahoo ha ho makatse hore ebe qenehelo e bonolo e ile ea susumelletsa Jesu hore a ithaopele ho thusa ba bang. Ka mohlala, ha bongata bo qeta matsatsi a mararo bo e-na le eena, bo se na lijo, ha ho motho ea ileng a tlameha ho bolella Jesu hore batho ba lapile kapa hona ho mo khothalletsa hore a etse ho hong ka taba eo. Tlaleho e re: “Jesu a bitsetsa barutuoa ba hae ho eena ’me a re: ‘Ke hauhela bongata bona, hobane e se e le matsatsi a mararo bo lutse le ’na ’me ha bo na letho leo bo le jang; ’me ha ke batle hore bo tsamaee bo lapile. Ho ka etsahala hore bo felloe ke matla tseleng.’” A ntan’o fepa bongata boo ka mohlolo, e le eena ea ithaopileng.—Matheu 15:32-38.

¹² Ak’u nahane ka ketsahalo ena e ’ngoe. Ka 31 C.E. ha Jesu a ne a le haufi le motse oa Naine, o ile a bona boemo bo bong bo sithabetsang. Batho ba ne ba tsoa motseng ba kolokile ba ea mabitleng, mohlomong leralleng le leng le haufi le moo, ho ea pata “mora ea tsoetsoeng a ’notši oa . . . mohlolohali.” Na u ka inahanela bohloko boo ’mè eo a neng a bo utloile? O ne a le mothating oa ho pata mora oa hae ea ’notši ’me o ne a se na monna eo a ka jarisanang bohloko boo le eena. Har’a batho bohle ba neng ba le mokolokong oo, Jesu o ile a “bona” mohlolohali eo joale a neng a se a bile a se na ngoana. Seo a ileng a se bona se ile sa mo ama—ha e le hantle, o ile “a mo hauhela.” Ha ho motho ea ileng a mo kōpa hore a etse ho itseng. Boikutlo bo tebileng ba qenehelo bo ile ba mo susumelletsa hore a ithaope. Kahoo o ile a ‘atamela a ama mojaro oa mofu,’ eaba o tsosa mohlankana eo bafung. Ho ile ha etsahala’ng ka mor’a moo? Jesu ha aa ka a re mohlankana eo a kene letšoeleng le tsamaeang le Eena. Ho e-na le hoo, Jesu o ile a “mo fa ’m’ae,” a boela a ba kopanya hore e be lelapa ’me a netefatsa hore ho na le motho ea tla hlokomela mohlolohali eo.—Luka 7:11-15.

13. Re ka etsisa Jesu joang tabeng ea ho ithaopela ho thusa ba hlokang?

¹³ Re ka etsisa mohlala oa Jesu joang? Ke ’nete hore re ke ke ra hlahisa lijo ka tsela ea mohlolo kapa hona ho tsosa bafu. Empa re ka etsisa Jesu ka ho ithaopela ho thusa ba hlokang. Molumeli-’moho le rōna a ka ’na a kena mathateng a tebileng a lichelete kapa a lahleheloa ke mosebetsi. (1 Johanne 3:17) Ntlo ea mohlolohali ea itseng e ka ’na ea hloka ho lokisoa ka potlako. (Jakobo 1:27) E ka ’na eaba re tseba lelapa le itseng le shoetsoeng le hlokang matšeliso kapa thuso ka tsela e itseng. (1 Bathesalonika 5:11) Ha ho hlokahala thuso e itseng, ha rea lokela ho emela hore re be re kōpuoe pele re ka fana ka thuso e joalo. (Liproverbia 3:27) Qenehelo e tla re susumelletsa hore re ithaopele ho thusa ka tsela e loketseng, ho ea kamoo maemo a rōna a re lumellang kateng. U se ke ua lebala hore ho etsa ketso e itseng e mosa kapa ho tšelisa ka mantsoe a seng makae a tsoang pelong ho ka bonahatsa qenehelo ka tsela e matlahali.—Bakolose 3:12.

Qenehelo e ne e mo Susumelletsa ho Bolela

14. Ke hobane’ng ha Jesu a ile a etelletsa pele mosebetsi oa ho bolela litaba tse molemo?

¹⁴ Joalokaha re bone Karolong ea 2 ea buka ena, Jesu o ile a beha mohlala o ikhethang tabeng ea ho bolela litaba tse molemo. O ile a re: “Ke tla bolela litaba tse molemo tsa ’muso oa Molimo . . . hobane ke rometsoe sena.” (Luka 4:43) Ke hobane’ng ha a ile a etelletsa pele mosebetsi oo? Lebaka le ka sehloohong ke lerato leo a ratang Molimo ka lona. Empa ho na le lebaka le leng le neng le susumetsa Jesu: Qenehelo e tsoang botebong ba pelo e ne e mo susumelletsa hore a nke bohato ba ho fa ba bang seo ba se hlokang moeeng. Litseleng tsohle tseo a neng a bontša qenehelo ka tsona, e neng e hlile e ikhetha e ne e le ea ho fepa batho ba lapileng moeeng. A re ke re hlahlobeng liketsahalo tse peli tse senolang kamoo Jesu a neng a talima batho bao a neng a ba pakela kateng. Ho hlahloba seo ho tla re thusa ho sekaseka sepheo seo re kopanelang tšebeletsong ea phatlalatsa ka sona.

15, 16. Hlalosa liketsahalo tse peli tse senolang kamoo Jesu a neng a talima batho bao a neng a ba pakela kateng.

¹⁵ Ka 31 C.E., ka mor’a ho qeta lilemo tse peli a ikitlaetsa ka matla tšebeletsong, Jesu o ile a etsa ho eketsehileng ka hore ‘a etele metse le metsana eohle’ ea Galilea. Seo a ileng a se bona moo se ile sa mo ama ka ho teba. Moapostola Matheu o re: “Ha a bona bongata a bo hauhela, hobane bo ne bo sohlokehile ’me bo qhalakane joaloka linku tse se nang molisa.” (Matheu 9:35, 36) Jesu o ne a utloela batho ba tloaelehileng bohloko. O ne a lemoha kamoo ba leng boemong bo otlang pelo kateng moeeng. O ne a tseba hore baeta-pele ba bolumeli, bao e neng e lokela ho ba balisa ba bona, ba ne ba ba khahlapetsa ba bile ba ba hlokomolohile ka ho feletseng. Qenehelo e tebileng e ile ea susumelletsa Jesu hore a ikitlaetse ka matla ho finyella batho ka molaetsa oa tšepo. Ntho e ka sehloohong eo ba neng ba e hloka e ne e le litaba tse molemo tsa ’Muso oa Molimo.

¹⁶ Ho ile ha etsahala ntho e batlang e tšoana le eo likhoeli hamorao, ho elella nakong ea Paseka ka 32 C.E. Ka nako eo, Jesu o ile a kena sekepeng le baapostola ba hae ba tšelela ka lehlakoreng le leng la Leoatle la Galilea e le ha ba batla ho ea phomola sebakeng se khutsitseng. Empa bongata ba matha bo iphaphathile ka lebōpo ’me ba fihla pele ho sekepe ka lehlakoreng le leng. Jesu o ile a etsa’ng? “Ha a tsoa, a bona bongata bo boholo, empa a susumetsoa ke khauho bakeng sa bona, hobane bo ne bo le joaloka linku tse se nang molisa. A qala ho bo ruta lintho tse ngata.” (Mareka 6:31-34) Le lekhetlong lena, Jesu o ile “a susumetsoa ke khauho” ka lebaka la boemo bo otlang pelo boo batho ba neng ba le ho bona moeeng. Joaloka “linku tse se nang molisa,” ba ne ba lapile moeeng ’me ba tlameha ho ikhoantlella. Qenehelo ke eona e ileng ea susumelletsa Jesu hore a ba pakele, e ne e se hobane a ne a ikutloa a tlamehile.

17, 18. (a) Ke’ng se re susumelletsang ho kopanela tšebeletsong? (b) Re ka hlaolela qenehelo ho ba bang joang?

¹⁷ Ke’ng se re susumelletsang ho kopanela tšebeletsong re le balateli ba Jesu? Joalokaha re bone Khaolong ea 9 ea buka ena, re fuoe thōmo, kapa boikarabelo ba ho bolela le ho etsa barutuoa. (Matheu 28:19, 20; 1 Bakorinthe 9:16) Empa ha rea lokela ho kopanela mosebetsing ona hobane feela re ikutloa re tlamehile. Ka holimo ho tsohle, lerato leo re ratang Jehova ka lona le re susumelletsa ho bolela litaba tse molemo tsa ’Muso oa hae. Re boetse re bolela hobane re susumetsoa ke ho qenehela ba sa lumeleng seo re se lumelang. (Mareka 12:28-31) Joale re ka hlaolela qenehelo ho ba bang joang?

¹⁸ Re lokela ho talima batho ka tsela eo Jesu a neng a ba talima ka eona—‘ba sohlokehile ’me ba qhalakane joaloka linku tse se nang molisa.’ Ak’u nahane u fumana konyana e lahlehileng e sa tsebe moo e eang teng. Konyana eo e lapile ebile e nyoriloe kaha ha e na molisa ea e isang makhulong a matala le metsing. Na u ne u ke ke ua utloela konyana eo bohloko? Na u ne u sa tl’o etsa sohle se matleng a hao ho e fa metsi le lijo? Konyana eo e tšoana le batho ba bangata ba e-s’o utloe litaba tse molemo. Kaha ba hlokomolohiloe ke balisa ba bolumeli ba bohata, ba lapile ebile ba nyoriloe moeeng ’me ha ba na tšepo ea sebele ka bokamoso. Re na le seo ba se hlokang: lijo tse matlafatsang tsa moea le metsi a khathollang a ’nete e Lentsoeng la Molimo. (Esaia 55:1, 2) Ha re nahana ka seo batho ba re potolohileng ba se hlokang moeeng, re ba utloela bohloko. Haeba re tšoana le Jesu ’me re utloela batho bao bohloko, re tla etsa sohle se matleng a rōna ho ba bolella ka tšepo ea ’Muso.

19. Re ka etsa’ng ho susumetsa seithuti sa Bibele se tšoanelehang hore se kopanele tšebeletsong ea phatlalatsa?

¹⁹ Re ka thusa ba bang ho latela mohlala oa Jesu joang? A re nke hore re batla ho khothalletsa seithuti sa Bibele se seng se tšoaneleha hore se qalise ho kopanela boboleling ba phatlalatsa. Kapa mohlomong re batla ho thusa motho ea khathetseng moeeng hore a boele a kopanele tšebeletsong ka botlalo. Re ka thusa batho ba joalo joang? Re lokela ho ipiletsa lipelong tsa bona. Hopola hore qalong Jesu o ile “a susumetsoa ke khauho,” a ntan’o ruta batho bao. (Mareka 6:34) Kahoo haeba re ka khona ho ba thusa ho hlaolela qenehelo, lipelo tsa bona li ka ’na tsa ba susumelletsa ho etsisa Jesu ’me ba bolelle ba bang litaba tse molemo. Re ka ’na ra ba botsa: “Ho amohela molaetsa oa ’Muso ho u thusitse joang bophelong? Ho thoe’ng ka batho ba e-s’o utloe molaetsa oo—na le bona ho hlokahala hore ba bolelloe litaba tse molemo? U ka etsa’ng ho ba thusa?” Ha e le hantle, lebaka le matla ka ho fetisisa le susumelletsang batho ho kopanela tšebeletsong ke lerato leo ba ratang Molimo ka lona le takatso ea ho mo sebeletsa.

20. (a) Ho ba molateli oa Jesu ho akarelletsa eng? (b) Re tlil’o tšohla eng khaolong e latelang?

²⁰ Ho ba molateli oa Jesu ha ho bolele feela ho pheta seo a se buileng le ho etsa seo a se entseng. Re lokela ho hlaolela ‘boikutlo ba kelello’ boo a neng a e-na le bona. (Bafilipi 2:5) Kahoo, re ananela hakaakang hore ebe Bibele e re senolela monahano le boikutlo bo neng bo susumetsa seo Jesu a neng a se bua le seo a neng a se etsa! Ha re tseba “kelello ea Kreste,” re tla nolofalloa haholoanyane ho nahanela maikutlo a ba bang le ho bontša qenehelo e tebileng, kahoo re tla tšoara batho ba bang ka tsela eo Jesu a neng a tšoara batho ka kakaretso ka eona. (1 Bakorinthe 2:16) Khaolong e latelang, re tlil’o tšohla litsela tse sa tšoaneng tseo ka tsona Jesu a ileng a bontša balateli ba hae ka ho khetheha hore oa ba rata.

[Mongolo o botlaaseng ba leqephe]

U ka Latela Jesu Joang?

● Jesu o ile a bontša qenehelo joang ha a sebelisa bolaoli ba hae, hona re ka mo etsisa joang?—Matheu 11:28-30.

● Ke hobane’ng ha e le habohlokoa hore re etsise mohlala oa Jesu tabeng ea ho bontša ba bang mohau kapa qenehelo?—Matheu 9:9-13; 23:23.

● Jesu o ile a etsa’ng ho bontša hore o utloisisa tsela eo ba bang ba ikutloang ka eona, hona re ka etsisa mohlala oa hae joang?—Luka 7:36-50.

● Papiso ea Mosamaria ea nang le moea oa boahelani e bontša joang hore qenehelo ke tšobotsi e babatsehang, hona re ka sebelisa thuto ea bohlokoa e rutoang paleng eo joang?—Luka 10:29-37.

[Setšoantšo se leqepheng la 151]

“Morena, mahlo a rōna a ke a bulehe”

[Setšoantšo se leqepheng la 154]

Bontšanang “ho utloelana bohloko”

[Setšoantšo se leqepheng la 157]

Ithaopele ho thusa ba hlokang

[Setšoantšo se leqepheng la 159]

E-ba le qenehelo ha u le boboleling