Jesu o Nka Matla a ho Etsa Mehlolo Kae?

Hang ka mor’a hore Jesu a bue ka tšoarelo ea libe ha a le ha Mofarisi ea bitsoang Simone, o qalella ho ruta seterekeng sa Galilea. O se a e-na le lilemo tse peli a etsa mosebetsi ona ’me ha a tsamaee a le mong. O tsamaea le Baapostola ba 12 le basali ba bang bao a ileng a ba phekola “meea e khopo le maloetse.” (Luka 8:2) Ba bang ba bona ke Maria Magdalena, Susanna le Joanna eo monna oa hae e leng mohlanka oa Morena Heroda Antipase.

Ha Jesu a ntse a tuma haholoanyane, khang e malebana le mosebetsi oa hae e ba e chesang le ho feta. Taba ena e bonahala hantle ha Jesu a phekola monna ea nang le modemona. Monna enoa ha a bone ebile ha a tsebe ho bua empa Jesu oa mo phekola. Joale ha a sa laoloa ke bademona ’me o se a bona ebile o khona ho bua. Batho ba hlolletsoe e le kannete, kahoo ba re: “Na ebe mohlomong enoa ha se eena Mora oa Davida?”​—Matheu 12:23.

Batho ba bangata ba khobokane ntlong eo Jesu a lulang ho eona, kahoo eena le barutuoa ba hae ba sitoa feela le ho ja. Leha ho le joalo, ha se bohle ba nahanang hore Jesu ke “Mora oa Davida.” Ho na le bangoli le Bafarisi ba tlileng mona Galilea ba tloha koana Jerusalema, empa morero oa bona ha se ho tl’o mamela ha Jesu a ruta kapa hona ho mo tšehetsa. Ho fapana le hoo, ba joetsa batho ba re: “O na le Beelzebube” ’me seo se bolela hore “ ’musi oa bademona” ke mphato’a hae. (Mareka 3:​22) Ha beng ka Jesu ba utloela ka moferefere ona, ba batla ho kopana le eena. Ebe ba batla’ng?

Baena ba Jesu ba ntse ba sa lumele hore ke Mor’a Molimo. (Johanne 7:5) Ba tseba Jesu kaha ba hotse le eena Nazaretha empa ba makatsoa ke moferefere ona oo ho bonahalang eka o o bakile. Ba nka hore Jesu o qhomme hlooho kahoo ba re: “O lahlehetsoe ke kelello.”​—Mareka 3:21.

Bopaki bona bo re’ng? Jesu o phekotse monna ea nang le modemona ’me o se a bona, hape o se a khona ho bua. Ha ho na motho ea ka hanyetsang taba ena. Kahoo bangoli le Bafarisi ba leka ho senya Jesu lebitso ka ho mo qosa ka mashano. Ba re: “Motho enoa ha a leleke bademona ha e se ka Beelzebube, ’musi oa bademona.”​—Matheu 12:24.

Jesu o tseba seo bangoli le Bafarisi ba se nahanneng, kahoo o re: “ ’Muso o mong le o mong o arohaneng o fetoha lesupi, le motse o mong le o mong kapa ntlo e arohaneng e ke ke ea ema. Ka tsela e tšoanang, haeba Satane a leleka Satane, o arohane, joale, ’muso oa hae o tla ema joang?”​—Matheu 12:​25, 26.

Taba ena e utloahala hona hoo! Bafarisi baa tseba hore ho na le Bajuda ba itseng ba tloaetseng ho leleka bademona. (Liketso 19:​13) Kahoo Jesu oa ba botsa o re: “Haeba ke leleka bademona ka Beelzebube, bara ba lona ba ba leleka ka mang?” Ka mantsoe a mang, haeba ba qosa Jesu ka taba ena, ba lokela ho qosa bara ba bona ka ntho e tšoanang. Joale o boetse o re: “Empa haeba ke leleka bademona ka moea oa Molimo, ka sebele ’Muso oa Molimo o le fihletse.”​—Matheu 12:​27, 28.

Joale Jesu o etsa mohlala e le ho hlakisa hore ho leleka bademona ke bopaki ba hore o matla ho feta Satane. O re: “Ke joang leha e le mang a ka futuhelang ntlo ea monna ea matla ’me a nka thepa ea hae e nkehang, ntle le hore pele a tlame monna eo ea matla? ’Me joale o tla phahla ntlo ea hae. Ea seng ka lehlakoreng la ka o khahlanong le ’na, ’me ea sa bokelleng le ’na oa hasanya.” (Matheu 12:​29, 30) Ho hlakile hore bangoli le Bafarisi ba khahlanong le Jesu, kahoo ba bontša ka ho hlaka hore ke mahlahana a Satane. Ba hasanya batho hore ba tlohe ho Mor’a Molimo, le hoja mesebetsi ea hae e tšehetsoa ke Jehova.

Jesu o lemosa mahlahana ana a Satane o re: “Bara ba batho ba tla tšoareloa lintho tsohle, ho sa tsotellehe hore na ke libe le linyefolo life tseo ba li etsang ka bonyefoli. Leha ho le joalo, mang kapa mang ea nyefolang moea o halalelang a ke ke a tšoareloa ka ho sa feleng, empa o molato oa sebe se sa feleng.” (Mareka 3:​28, 29) Inahanele feela hore na taba ena e bolela’ng bakeng sa batho bana ba reng Satane ke eena ea fanang ka matla a ho etsa lintho tsena tseo ho hlakileng hore li etsoa ka moea o halalelang oa Molimo!