Kamoo re Lokelang ho Atamela “Ea Utloang Thapelo”
“Uena Ea Utloang thapelo, batho ba nama eohle ba tla tla ho uena.”—PESALEME EA 65:2.
1. Ke’ng se etsang hore batho ba se ke ba tšoana le libōpuoa tse ling tsa lefatše, hona see se re bulela monyetla ofe?
HAR’A libōpuoa tsohle tse phelang tse likete-kete tsa lefatše, ke batho feela ba ka rapelang ’Mōpi. Ke batho feela ba lemohang hore ba na le tlhoko ea moea le ba lakatsang hore ba e khotsofatse. Sena se re bulela monyetla o babatsehang oa ho ba le kamano ea botho le Ntate oa rōna oa leholimo.
2. Sebe se ile sa baka liphello life tse bohloko kamanong ea motho le ’Mōpi oa hae?
2 Molimo o ile a bōpa motho a e-na le matla a ho buisana le Moetsi oa hae. Adama le Eva ba ne ba bōpiloe ba se na sebe. Kahoo, ba ne ba ka atamela Molimo ka bolokolohi joalokaha ngoana a atamela ntat’ae. Leha ho le joalo, Adama le Eva ba ile ba lahleheloa ke tokelo eo ka lebaka la ho etsa sebe. Ba ile ba hlompholla Molimo ’me ba lahleheloa ke kamano e haufi eo ba neng ba e-na le eona le eena. (Genese 3:8-13, 17-24) Na seo se bolela hore bana ba Adama ba sa phethahalang ba ke ke ba hlola ba buisana le Molimo? Che, Jehova o ntse a ba lumella hore ba mo atamele, empa hafeela ba finyella lintho tse itseng tseo a li hlokang. Ebe ke life lintho tseo?
Lintho Tse Hlokahalang Hore re Atamele Molimo
3. Batho ba baetsalibe ba lokela ho atamela Molimo joang, hona ke mohlala ofe o bontšang see?
3 Ketsahalo e amang bara ba babeli ba Adama e re thusa ho bona hore na ke eng seo Molimo a se hlokang ho motho ea sa phethahalang ea lakatsang ho Mo atamela. Kaine le Abele ba ile ba leka ho atamela Molimo ka ho mo etsetsa mahlabelo. Nyehelo ea Abele e ile ea amoheloa empa ea Kaine ha ea ka ea amoheloa. (Genese 4:3-5) Phapang e ne e le hokae? Baheberu 11:4 e re: “Ka tumelo Abele o ile a nyehela ho Molimo sehlabelo sa bohlokoa bo boholo ho feta Kaine, e leng tumelo eo ka eona a ileng a pakoa hore o ne a lokile.” Ka hona, ho hlakile hore tumelo ea hlokahala hore motho a khone ho atamela Molimo. Ntho e ’ngoe e hlokahalang e bonoa mantsoeng ao Jehova a ileng a a bolella Kaine: “Haeba u fetoha hore u etse se molemo, na ho phahamisoa ho ke ke ha e-ba teng?” Ka sebele Kaine o ne a ka atamela Molimo haeba a ne a fetohile hore a etse se molemo. Leha ho le joalo, Kaine o ile a hana keletso ea Molimo, a bolaea Abele ’me a qetella e le molahloa. (Genese 4:7-12) Kahoo, qalong ea histori ea motho, ho ile ha totobatsoa bohlokoa ba ho atamela Molimo ka tumelo hammoho le ho etsa mesebetsi e metle.
4. Re lokela ho lemoha eng mabapi le ho atamela Molimo?
4 Haeba re batla ho atamela Molimo, ke habohlokoa hore re lemohe boemo ba boetsalibe boo re leng ho bona. Batho bohle ke baetsalibe, ’me sebe se re sitisa ho atamela Molimo. Moprofeta Jeremia o ile a ngola tjena mabapi le Baiseraele: “Re sitiloe . . . U thibile ka leru hore u se ke ua atameloa, hore thapelo e se ke ea feta.” (Lillo Tsa Jeremia 3:42, 44) Leha ho le joalo, ho pholletsa le histori ea batho Molimo o ’nile a bontša hore o ikemiselitse ho amohela lithapelo tsa ba mo atamelang ka tumelo le ka boikutlo bo nepahetseng ba pelo, ’me ba boloka litaelo tsa hae. (Pesaleme ea 119:145) Ba bang ba bona ke bafe, hona re ka ithuta eng lithapelong tsa bona?
5, 6. Re ka ithuta eng boitekong ba Abrahama ba ho atamela Molimo?
5 E mong oa batho bao ke Abrahama. Kaha Molimo o ne a bitsa Abrahama “motsoalle oa ka,” o ile a amohela boiteko ba hae ba ho mo atamela. (Esaia 41:8) Re ka ithuta’ng boitekong ba Abrahama ba ho atamela Molimo? Mopatriareka enoa ea tšepahalang o ile a botsa Jehova mabapi le mojalefa, a re: “U tla mpha eng, ha e le moo ke se na ngoana?” (Genese 15:2, 3; 17:18) Ketsahalong e ’ngoe, o ile a bontša kamoo a neng a amehile kateng ka hore na ho ne ho tla pholoha bo-mang ha Molimo a ahlola ba khopo Sodoma le Gomora. (Genese 18:23-33) Abrahama o bile a etsa thapeli molemong oa ba bang. (Genese 20:7, 17) Hape, joaloka Abele, ka linako tse ling Abrahama o ne a atamela Molimo ka ho etsetsa Jehova nyehelo.—Genese 22:9-14.
6 Liketsahalong tsena tsohle, Abrahama o ne a ikutloa a lokolohile hore a bue le Jehova. Leha ho le joalo, ho bua ha hae ka bolokolohi ho ne ho tsamaea le hore a talime boemo ba hae ka boikokobetso ha a bapisoa le ’Mōpi oa hae. Hlokomela mantsoe a hae a bontšang tlhompho, a fumanoang ho Genese 18:27: “Ka kōpo, bona! ke ikhethetse ho bua le Jehova, athe ke lerōle le molora.” Ke boikutlo bo botle hakaakang boo re lokelang ho bo etsisa!
7. Ke lintho life tseo bapatriareka ba ileng ba li rapella ho Jehova?
7 Bapatriareka ba ile ba rapella lintho tse sa tšoaneng, ’me Jehova o ile a ba utloa ka mokhoa o amohelehang. Jakobo o ile a etsa kano ka ho rapela. Ka mor’a ho kōpa hore Molimo a mo tšehetse, o ile a tšepisa ka tieo a re: “Ntho e ’ngoe le e ’ngoe eo u tla mpha eona ruri ke tla u fa karolo ea eona ea leshome.” (Genese 28:20-22) Hamorao, ha Jakobo a ne a le mothating oa ho kopana le mor’abo, o ile a kōpa Jehova ka tieo hore a mo sireletse, a re: “Kea u rapela, ntopolle letsohong la mor’eso, letsohong la Esau, hobane [kea mo] tšaba.” (Genese 32:9-12) Mopatriareka Jobo o ile a atamela Jehova molemong oa lelapa la hae, a le etsetsa mahlabelo. Ha metsoalle e meraro ea Jobo e ne e etsa sebe ka seo e se buileng, Jobo o ile a e rapella ’me “Jehova a amohela sefahleho sa Jobo.” (Jobo 1:5; 42:7-9) Litlaleho tsena li re thusa ho lemoha lintho tseo re ka li rapellang ho Jehova. Hape rea bona hore Jehova o ikemiselitse ho amohela lithapelo tsa ba mo atamelang ka mokhoa o loketseng.
Selekaneng sa Molao
8. Tlas’a selekane sa Molao, litaba li ne li hlahisoa ho Jehova joang ka thapelo molemong oa sechaba?
8 Ka mor’a hore Jehova a lopolle sechaba sa Iseraele Egepeta, o ile a se fa selekane sa Molao. Molao o ne o bolela tokisetso ea ho atamela Molimo ka baprista ba neng ba behiloe. Balevi ba bang ba ne ba abetsoe hore e be baprista molemong oa sechaba. Ha ho ne ho e-ba le litaba tsa bohlokoa sechabeng, moemeli oa sechaba—eo ka linako tse ling e neng e e-ba morena kapa moprofeta—o ne a rapela Molimo mabapi le taba eo. (1 Samuele 8:21, 22; 14:36-41; Jeremia 42:1-3) Ka mohlala, ha ho ne ho neheloa tempele, Morena Solomone o ile a atamela Jehova ’me a etsa thapelo e tlohang botebong ba pelo. Ka mor’a moo, Jehova o ile a bontša hore o amohetse thapelo ea Solomone ka hore a tlatse tempele ka khanya ea Hae a be a re: “Litsebe tsa ka li [tla mamelisisa] thapelo sebakeng sena.”—2 Likronike 6:12–7:3, 15.
9. Ho ne ho hlokahala eng hore Jehova a atameloe ka mokhoa o tšoanelehang sehalalelong?
9 Molaong oo Jehova a ileng a o fa Baiseraele, o ile a akarelletsa ntho e neng e hlokahala hore batho ba mo atamele ka mokhoa o tšoanelehang sehalalelong. E ne e le efe eona eo? Hoseng ho hong le ho hong le mantsiboea a mang le a mang, ho ne ho hlokahala hore moprista ea phahameng a chese libano tse nkhang hamonate ka pel’a Jehova, ho kopanyeletsa le hore a etse mahlabelo a liphoofolo. Hamorao, baprista ba tlaasana le bona ba ne ba etsa tšebeletso ena, ntle le ka Letsatsi la ho Koahela Libe. Haeba moprista a ne a sa bontše tlhompho ka ho etsa lintho tseo, Jehova o ne a ke ke a khahloa ke tšebeletso ea hae.—Exoda 30:7, 8; 2 Likronike 13:11.
10, 11. Re na le bopaki bofe ba hore Jehova o ne a amohela lithapelo tse etsoang ke batho ka bomong?
10 Iseraele ea boholo-holo, na ho atamela Molimo ho ne ho khoneha feela ka baemeli ba khethiloeng? Che, Mangolo a bontša hore Jehova o ne a khahloa ke lithapelo tseo batho ba li etsang e le batho ka bomong. Ha Solomone a ne a rapela ha ho neheloa tempele, o ile a kōpa Jehova ka tieo a re: “Thapelo leha e le efe, kōpo leha e le efe ea mohau e ka etsoang ke motho leha e le ofe kapa sechaba sohle sa hao sa Iseraele, . . . ha a otlollela liatla ntlong ena, joale e se eka u ka utloa u le maholimong.” (2 Likronike 6:29, 30) Tlaleho ea Luka e re bolella hore ha Zakaria, e leng ntat’a Johanne Mokolobetsi, a ne a nyehela libano ka sehalalelong, letšoele la barapeli ba Jehova leo e neng e se baprista le ne “le ntse le rapela ka ntle.” Ho hlakile hore batho ba ne ba tloaetse ho bokana ka ntle ho sehalalelo ba rapela ha ho ntse ho nyeheloa libano ho Jehova aletareng ea khauta.—Luka 1:8-10.
11 Kahoo, ha batho ba ne ba atamela Jehova ka mokhoa o tšoanetseng, o ne a thabela ho amohela likōpo tsa bona tse matla tse neng li etsoa ke ba emetseng sechaba ka kakaretso le tse neng li etsoa ke batho ka bomong ba neng ba batla ho mo atamela ka bobona. Kajeno ha re sa le tlas’a selekane sa Molao. Leha ho le joalo, re ka ithuta lithuto tsa bohlokoa mabapi le thapelo mekhoeng eo Baiseraele ba boholo-holo ba neng ba atamela Molimo ka eona.
Tlas’a Tokisetso ea Bokreste
12. Ho entsoe tokisetso efe ea hore Bakreste ba atamele Jehova?
12 Hona joale re phela tlas’a tokisetso ea Bokreste. Ha ho sa na tempele ea sebele eo ho eona baprista ba emelang batho bohle ba Molimo kapa eo re ka shebang ho eona ha re rapela Molimo. Leha ho le joalo, Jehova o ntse a e-na le tokisetso eo a re etselitseng eona ea hore re mo atamele. Ke efe? Ka 29 C.E., ha Kreste a ne a tlotsoa a bile a behoa hore e be Moprista ea Phahameng, tempele ea moea e ile ea qala ho sebetsa.a Tempele ena ea moea e ne e le tokisetso e ncha ea ho atamela Jehova ka ho mo rapela motheong oa sehlabelo sa poelano sa Jesu Kreste.—Baheberu 9:11, 12.
13. Mabapi le thapelo, tempele e neng e le Jerusalema e ne e tšoana ka tsela efe le tempele ea moea?
13 Likarolo tse ngata tsa tempele e neng e le Jerusalema, ka nepo li tšoantšetsa litokisetso tsa tempele ea moea, ho akarelletsa le tse amanang le thapelo. (Baheberu 9:1-10) Ka mohlala, ke eng se neng se emeloa ke libano tse neng li nyeheloa hoseng le mantsiboea, aletareng ea libano e neng e le karolong e Halalelang ea tempele? Ho ea ka buka ea Tšenolo, “libano li bolela lithapelo tsa bahalaleli.” (Tšenolo 5:8; 8:3, 4) Davida o ile a bululeloa hore a ngole tjena: “E se eka thapelo ea ka e ka lokisoa joaloka libano ka pel’a hao.” (Pesaleme ea 141:2) Kahoo, tokisetsong ea Bokreste, ka nepo libano tse lephoka le monate li emela lithapelo le lithoriso tseo Jehova a li amohelang.—1 Bathesalonika 3:10.
14, 15. Ho ka thoe’ng ka boiteko ba ho atamela Jehova bo etsoang ke (a) Bakreste ba tlotsitsoeng? (b) “linku tse ling”?
14 Ke bo-mang ba ka atamelang Molimo tempeleng ee ea moea? Tempeleng ea sebele, baprista le Balevi ba ne ba e-na le tokelo ea ho sebeletsa lebaleng le ka hare, empa ke baprista feela ba neng ba ka kena ka Sehalalelong. Bakreste ba tlotsitsoeng ba nang le tšepo ea ho ea leholimong ba boemong bo ikhethang ba moea bo neng bo tšoantšetsoa ke lebala le ka hare le Sehalalelo, e leng boemo bo etsang hore ba rapele Molimo ba be ba mo rorise.
15 Ho thoe’ng ka ba nang le tšepo ea ho phela lefatšeng, e leng “linku tse ling”? (Johanne 10:16) Moprofeta Esaia o ile a bolela hore batho ba lichaba tse ngata ba ne ba tla rapela Jehova “karolong e qetellang ea matsatsi.” (Esaia 2:2, 3) Hape o ile a ngola hore “basele” ba ne ba tla ikamahanya le Jehova. Ha Molimo a bontša hore o ikemiselitse ho amohela boiteko ba bona ba ho mo atamela, o ile a re: “Ke tla . . . [etsa] hore ba thabe ka har’a ntlo ea ka ea thapelo.” (Esaia 56:6, 7) Tšenolo 7:9-15 e fana ka lintlha tse ling tse qaqileng, e hlalosa “bongata bo boholo” bo tsoang “lichabeng tsohle” bo bokanang hore bo rapele Molimo “bosiu le motšehare” ha bo ntse bo eme lebaleng le ka ntle la tempele ea moea. Ho khothatsa hakaakang ho tseba hore bahlanka bohle ba Molimo ba kajeno ba ka mo atamela ka bolokolohi ba kholisehile ka botlalo hore oa ba utloa!
Ke Lithapelo Life Tse Amoheloang?
16. Re ka ithuta eng ho Bakreste ba lekholong la pele la lilemo mabapi le thapelo?
16 Bakreste ba lekholong la pele la lilemo e ne e le batho ba rapelang. Ba ne ba rapella lintho life? Baholo ba Bakreste ba ne ba kōpa tataiso ha ba khetha banna ba etsang mesebetsi e amanang le tlhophiso. (Liketso 1:24, 25; 6:5, 6) Epafrase o ile a rapella balumeli-’moho le eena. (Bakolose 4:12) Litho tsa phutheho e neng e le Jerusalema li ile tsa rapella Petrose ha a ne a le chankaneng. (Liketso 12:5) Bakreste ba pele ba ile ba kōpa hore Molimo a ba fe sebete ha ba ne ba tobane le khanyetso, ba re: “Jehova, lebisa tlhokomelo litšokelong tsa bona, ’me u etse hore makhoba a hao a ’ne a bolele lentsoe la hao ka sebete sohle.” (Liketso 4:23-30) Morutuoa Jakobo o ile a phehella Bakreste hore ba rapelle bohlale ho Molimo ha ba le tekong. (Jakobo 1:5) Na u kopanyelletsa litaba tse joalo ha u etsa likōpo tse matla ho Jehova?
17. Jehova o amohela lithapelo tsa bo-mang?
17 Molimo ha a amohele lithapelo tsohle. Joale re ka rapela joang re kholisehile hore lithapelo tsa rōna li tla amoheloa? Batho ba nang le tumelo bao Molimo a ileng a ba mamela linakong tsa pele, ba ne ba mo atamela ka botšepehi ebile ba e-na le boikutlo bo nepahetseng lipelong. Ba ne ba bontša tumelo e neng e tsamaea le mesebetsi e metle. Kajeno re ka kholiseha hore Jehova o tla mamela ba mo atamelang ka mokhoa o tšoanang.
18. Ke ntho efe eo ho hlokahalang hore Bakreste ba e etse e le hore lithapelo tsa bona li utluoe?
18 Ho na le ntho e ’ngoe hape e hlokahalang. Moapostola Pauluse o ile a e hlalosa tjena: “Ka eena rōna . . . re na le katamelo ho Ntate ka moea o le mong.” Pauluse o ne a bua ka mang ha a ne a ngola a re, “ka eena”? O ne a bua ka Jesu Kreste. (Baefese 2:13, 18) Ha ho pelaelo hore re ka atamela Ntate ka bolokolohi ka Jesu feela.—Johanne 14:6; 15:16; 16:23, 24.
19. (a) Jehova o ne a khopisoa ke linyehelo tsa libano tse neng li etsoa Iseraele ha ho ne ho etsahala eng? (b) Re ka tiisa joang hore lithapelo tsa rōna li tšoana le libano tse lephoka le monate ho Jehova?
19 Joalokaha ho se ho boletsoe, libano tse neng li nyeheloa ke baprista ba Iseraele li emela lithapelo tse amohelehang tsa bahlanka ba tšepahalang ba Molimo. Leha ho le joalo, ka linako tse ling linyehelo tsa libano tse neng li etsoa ke Baiseraele li ne li khopisa Jehova. Li ne li mo khopisa ha Baiseraele ba ne ba chesa libano ka tempeleng empa ka nako e tšoanang ba inamela litšoantšo tse rapeloang. (Ezekiele 8:10, 11) Ka ho tšoanang kajeno, lithapelo tsa ba ipolelang hore ba sebeletsa Jehova empa ka nako e tšoanang ba etsa liketso tse khahlanong le melao ea hae, li tšoana le monkho o mobe ho eena. (Liproverbia 15:8) Kahoo, a re tsoeleng pele ho boloka likarolo tsohle tsa bophelo ba rōna li hloekile e le hore lithapelo tsa rōna li ka tšoana le libano tse lephoka le monate ho Molimo. Jehova o khahloa ke lithapelo tsa ba latelang litsela tsa hae tse lokileng. (Johanne 9:31) Leha ho le joalo, ho na le lipotso tse ntseng li sala. Re lokela ho rapela joang? Ke eng eo re ka e rapellang? Hona Molimo o araba lithapelo tsa rōna joang? Sehlooho sa rōna se latelang se tla tšohla lipotso tsena le tse ling.
[Mongolo o botlaaseng ba leqephe]
Na U ka Hlalosa?
• Batho ba sa phethahalang ba ka atamela Molimo joang ka mokhoa o tšoanetseng?
• Ha re rapela, re ka etsisa bapatriareka joang?
• Re ithuta eng lithapelong tsa Bakreste ba lekholong la pele la lilemo?
• Lithapelo tsa rōna li tšoana le libano tse lephoka le monate ho Molimo ha re etsa eng?
[Setšoantšo se leqepheng la 23]
Ke hobane’ng ha Molimo a ile a amohela nyehelo ea Abele empa a sa ka a amohela ea Kaine?
[Setšoantšo se leqepheng la 24]
“Ke lerōle le molora”
[Setšoantšo se leqepheng la 25]
“Ruri ke tla u fa karolo ea eona ea leshome”
[Setšoantšo se leqepheng la 26]
Na lithapelo tsa hao li tšoana le libano tse lephoka le monate ho Jehova?