Bolokang Bonngoe Matsatsing Ana a ho Qetela
“Le itšoare ka mokhoa o tšoanelang litaba tse molemo . . . , le eme le tiile ka moea o le mong, ka soule e le ’ngoe le loana le bapile ka mahlakore bakeng sa tumelo ea litaba tse molemo.”—BAFILIPPI 1:27.
1. Ke phapang efe e teng pakeng tsa Lipaki tsa Jehova le lefatše?
ANA ke ‘matsatsi a ho qetela.’ Ntle ho pelaelo, “linako tse mahlonoko tseo ho leng thata ho sebetsana le tsona” li teng. (2 Timothea 3:1-5) ‘Nakong ena ea bofelo,’ ka merusu ea eona mokhatlong oa batho, Lipaki tsa Jehova li hlahella e le tse arohileng ka ho totobetseng ka lebaka la khotso ea tsona le bonngoe. (Daniele 12:4) Empa motho ka mong eo e leng setho sa lelapa la barapeli ba Jehova la lefatše lohle o biletsoa ho sebetsa ka thata ho boloka bonngoe bona.
2. Pauluse o ile a re’ng mabapi le ho boloka bonngoe, ’me re tla tšohla potso efe?
2 Moapostola Pauluse o ile a eletsa Bakreste-’moho le eena hore ba boloke bonngoe. O ile a ngola: “Le itšoare ka mokhoa o tšoanelang litaba tse molemo tse mabapi le Kreste, e le hore, ebang kea tla ’me kea le bona kapa ke ba sieo, nka utloa ka lintho tse le amang, hore le eme le tiile ka moea o le mong, ka soule e le ’ngoe le loana le bapile ka mahlakore bakeng sa tumelo ea litaba tse molemo, ’me ho hang le sa tšosoe ke bahanyetsi ba lōna. Ntho eona ena ke bopaki ba timetso bakeng sa bona, empa ba poloko bakeng sa lōna; ’me pontšo ena e tsoa ho Molimo.” (Bafilippi 1:27, 28) Mantsoe a Pauluse ka ho hlakileng a bontša hore re tlameha ho sebetsa hammoho re le Bakreste. Ka hona, he, ke’ng se tla re thusa ho boloka bonngoe ba rōna ba Bokreste linakong tsee tse lekang?
Sebetsang Tumellanong le Thato ea Molimo
3. Balichaba ba pele ba sa bollang e ile ea e-ba balateli ba Kreste neng hona joang?
3 Tsela e ’ngoe ea ho boloka bonngoe ba rōna ke ka ho sebetsa tumellanong le thato ea Molimo ka linako tsohle. Sena se ka ’na sa hloka hore re lokise monahano oa rōna. Nahana ka barutuoa ba pele ba Jesu Kreste ba Bajuda. Ha moapostola Petrose a ne a qala ho bolela ho Balichaba ba sa bollang ka 36 C.E., Molimo o ile a tšollela moea o halalelang ho batho bana ba lichaba ’me ba ile ba kolobetsoa. (Liketso, khaolo ea 10) Ho fihlela ka nako eo, balateli ba Jesu Kreste e ne e le feela Bajuda, batho ba neng ba sokolohetse Tsamaisong ea Bolumeli ea Sejuda le Basamaria.—Liketso 8:4-8, 26-38.
4. Ka mor’a ho hlalosa se neng se etsahetse ka Kornele, Petrose o ile a re’ng, ’me see se ile sa hlahisa teko efe bakeng sa barutuoa ba Jesu ba Bajuda?
4 Ha baapostola le barab’abo rōna ba bang Jerusalema ba ne ba utloa ka tšokoloho ea Kornele le Balichaba ba bang, ba ile ba thahasella ho utloa tlaleho ea Petrose. Ka mor’a ho hlalosa se neng se etsahetse mabapi le Kornele le Balichaba ba bang ba lumelang, moapostola enoa o ile a phetha ka mantsoe ana: “Ka hona, haeba Molimo a ile a ba [Balichaba bao ba lumelang] fa mpho e tšoanang e sa lefelloeng [ea moea o halalelang] joalokaha a ile a re fa le rōna [Bajuda] ba lumetseng ho Morena Jesu Kreste, ’na ke ne ke le mang hore nka khona ho sitisa Molimo?” (Liketso 11:1-17) Sena se ile sa hlahisa teko bakeng sa balateli ba Jesu Kreste ba Bajuda. Na ba ne ba tla sebetsa tumellanong le thato ea Molimo ’me ba amohele Balichaba ba lumelang e le barapeli-’moho le bona? Kapa na bonngoe ba bahlanka ba Jehova ba lefatšeng bo ne bo tla behoa kotsing?
5. Baapostola le barab’abo rōna ba bang ba ile ba arabela joang tabeng ea hore Molimo o ne a file Balichaba pako, ’me re ka ithuta eng boikutlong boo?
5 Tlaleho ena e re: “Joale ha ba [baapostola le barab’abo rōna ba bang] utloa lintho tsena, ba inehela ntle ho khang, ’me ba tlotlisa Molimo, ba re: ‘Joale, he, Molimo o nehile le batho ba lichaba pako ka morero oa bophelo.’” (Liketso 11:18) Maikutlo ao a ile a boloka le ho khothalletsa bonngoe ba balateli ba Jesu. Ka nako e khutšoanyane feela, mosebetsi oa ho bolela o ile oa tsoela pele har’a Balichaba kapa batho ba lichaba, ’me tlhohonolofatso ea Jehova e ile ea e-ba mesebetsing e joalo. Ka borōna re lokela ho lumela ha ho kōptjoa tšebelisano ea rōna mabapi le ho thehoa ha phutheho e ncha kapa ha ho etsoa tokiso e itseng ea puso ea Molimo tlas’a tataiso ea moea o halalelang oa Molimo. Tšebelisano ea rōna ea pelo eohle e tla thabisa Jehova ’me e tla re thusa ho boloka bonngoe ba rōna matsatsing ana a ho qetela.
Khomarela ’Nete
6. ’Nete e na le phello efe bonngoeng ba barapeli ba Jehova?
6 Re le karolo ea lelapa la barapeli ba Jehova, re boloka bonngoe hobane kaofela ha rōna re “rutoa ke Jehova” ’me re tšoarella ka tieo ’neteng ea hae e senotsoeng. (Johanne 6:45; Pesaleme ea 43:3) Kaha lithuto tsa rōna li thehiloe Lentsoeng la Molimo, kaofela ha rōna re bua ka tumellano. Ka thabo re amohela lijo tsa moea tseo Jehova a entseng hore li fumanehe ka “lekhoba le tšepahalang le le masene.” (Matheu 24:45-47) Thuto e joalo e tšoanang e re thusa ho boloka bonngoe ba rōna lefatšeng ka bophara.
7. Haeba ka bomong re e-na le bothata ba ho utloisisa ntlha e itseng, re lokela ho etsa’ng, ’me ha rea lokela ho etsa’ng?
7 Ho thoe’ng haeba ka bomong re e-na le bothata ba ho utloisisa kapa ho amohela ntlha e itseng? Re lokela ho rapella bohlale le ho etsa lipatlisiso ka Mangolong le ho lingoliloeng tsa Bokreste. (Liproverbia 2:4, 5; Jakobo 1:5-8) Ho buisana le moholo ho ka ’na ha thusa. Haeba ntlha eo e sa ntse e ke ke ea utloisisoa, ho ka ’na ha e-ba molemo ho se amehe ka ho tlōlisang ka eona. Mohlomong boitsebiso bo eketsehileng tabeng eo bo tla hatisoa, ebe joale kutloisiso ea rōna ea atolosoa. Leha ho le joalo, e ne e tla ba phoso ho leka ho kholisa ba bang ka phuthehong hore ba amohele pono ea rōna e fapaneng. Sena e ne e tla ba ho jala karohano, e seng ho sebeletsa ho boloka bonngoe. Ho molemo hakaakang ho “tsoela pele ho tsamaea ’neteng” le ho khothalletsa ba bang ho etsa joalo!—3 Johanne 4.
8. Ke boikutlo bofe bo nepahetseng mabapi le ’nete?
8 Lekholong la pele la lilemo, Pauluse o ile a re: “Hona joale re bona ka setšoantšo se lerootho ka seipone sa tšepe, empa ka nako eo e tla ba ka lifahleho tse talimaneng. Hona joale ke tseba ka mokhoa o sa fellang, empa ka nako eo ke tla tseba ka mokhoa o nepahetseng esita le joalokaha ke tsejoa ka mokhoa o nepahetseng.” (1 Bakorinthe 13:12) Le hoja Bakreste ba pele ba ne ba sa bone makolopetso ’ohle, ba ile ba lula ba kopane. Hona joale re na le kutloisiso e hlakileng haholoanyane ea morero oa Jehova le Lentsoe la hae la ’nete. Ka lebaka leo, a re leboheng ka ’nete eo re e amohetseng ka “lekhoba le tšepahalang.” ’Me a re leboheng hore ebe Jehova o re tataisitse ka mokhatlo oa hae o hlophisitsoeng. Le hoja re sa ka ra ba le tsebo e lekanang le ena ka linako tsohle, ha rea ka ra lapa kapa ho nyoroa moeeng. Ho e-na le hoo, Molisa oa rōna, Jehova, o entse hore re lule re kopane ’me o re hlokometse hamolemo.—Pesaleme ea 23:1-3.
Sebelisa Leleme ka Nepo!
9. Leleme le ka sebelisoa joang ho khothalletsa bonngoe?
9 Ho sebelisa leleme ho khothatsa ba bang ke tsela ea bohlokoa ea ho khothalletsa bonngoe le moea oa kameho ea bara ba motho. Lengolo le ileng la rarolla bothata bo mabapi le lebollo, joalokaha le ile la romeloa ke sehlopha se busang sa lekholo la pele la lilemo, e bile mohloli oa khothatso. Ka mor’a ho le bala, barutuoa ba Balichaba Antioke ba ile ba “thabela khothatso eo.” Judase le Silase, ba neng ba rometsoe ba e-tsoa Jerusalema ka lengolo lena, “ba khothatsa barab’abo rōna ka lipuo tse ngata ’me ba ba matlafatsa.” Ntle ho pelaelo, boteng ba Pauluse le Barnabase le bona bo ile ba khothatsa le ho matlafatsa balumeli-’moho le bona Antioke. (Liketso 15:1-3, 23-32) Re ka etsa se batlang se tšoana le seo ha re bokana bakeng sa liboka tsa Bokreste ’me “re khothatsana” ka ho ba teng le ka litlhaloso tse hahang.—Baheberu 10:24, 25.
10. Ho boloka bonngoe, ke’ng se ka ’nang sa tlameha ho etsoa haeba ho e-ba le litlhapa?
10 Leha ho le joalo, tšebeliso e mpe ea leleme e ka sokela bonngoe ba rōna. Morutuoa Jakobo o ile a ngola: “Leleme ke setho se senyenyane ’me leha ho le joalo le ithorisa haholo. Bonang! Ho hlokahala mollo o monyenyane hakaakang ho chesa moru o moholo haholo!” (Jakobo 3:5) Jehova o hloile ba bakang qabang. (Liproverbia 6:16-19) Puo e joalo e ka baka karohano. Ka hona, he, ho thoe’ng haeba ho e-ba le litlhapa, ke hore, ho hlasela motho e mong ka mantsoe kapa ho mo rohaka? Baholo ba tla leka ho thusa mofosi. Leha ho le joalo, motho ea litlhapa ea sa bakeng o lokela ho khaoloa e le hore khotso ea phutheho, taolo le bonngoe li ka bolokoa. Etsoe Pauluse o ile a ngola: “Le khaotse ho itsoakanya hammoho le mang kapa mang ea bitsoang mor’abo rōna eo e leng . . . ea litlhapa . . . , esita le ho ja le se ke la ja le motho ea joalo.”—1 Bakorinthe 5:11.
11. Ke hobane’ng ha boikokobetso e le ba bohlokoa haeba re buile ntho e ’ngoe e bakileng tsitsipano lipakeng tsa rōna le molumeli-’moho le rōna?
11 Ho laola leleme ho re thusa ho boloka bonngoe. (Jakobo 3:10-18) Empa nka hore ntho e itseng eo re e buileng e bakile tsitsipano pakeng tsa rōna le Mokreste-’moho le rōna. Na e ne e ke ke ea e-ba ho loketseng ho nka bohato ba pele ho etsa khotso le mor’abo rōna, re kōpa tšoarelo haeba ho hlokahala? (Matheu 5:23, 24) ’Nete ke hore sena se hloka boikokobetso kapa ho ikokobetsa kelellong, empa Petrose o ile a ngola: “Itlameng ka ho ikokobetsa kelellong e mong ho e mong, hobane Molimo o hanyetsa ba ikhohomosang, empa o fana ka mosa o sa tšoanelang ho ba ikokobelitseng.” (1 Petrose 5:5) Boikokobetso bo tla re susumelletsa ho ‘phehella khotso’ le barab’abo rōna, ho lumela liphoso tsa rōna le ho kōpa tšoarelo ka ho loketseng. Sena se thusa ho boloka bonngoe ba lelapa la Jehova.—1 Petrose 3:10, 11.
12. Re ka sebelisa leleme joang ho khothalletsa le ho boloka bonngoe ba batho ba Jehova?
12 Re ka ntšetsa pele moea oa lelapa har’a ba ka mokhatlong o hlophisitsoeng oa Jehova haeba re sebelisa maleme a rōna ka nepo. Kaha sena ke seo Pauluse a ileng a se etsa, o ne a ka hopotsa Bathesalonika: “Le tseba hantle kamoo, joalokaha ntate a etsa ho bana ba hae, re ’nileng ra eletsa e mong le e mong oa lōna, le ho le tšelisa le ho le pakela, e le hore le tsoele pele ho tsamaea ka mokhoa o tšoanelang Molimo.” (1 Bathesalonika 2:11, 12) Kaha o behile mohlala o motle tabeng ena, Pauluse o ne a ka phehella Bakreste-’moho le eena ho ‘bua ka mokhoa o tšelisang le lisoule tse tepeletseng maikutlo.’ (1 Bathesalonika 5:14) Nahana hore na re ka etsa molemo o mokaakang ka ho sebelisa maleme a rōna ho tšelisa, ho khothatsa le ho haha ba bang. E, “polelo, ha e boletsoe ka ho tšoaneleha, e monate hakakang!” (Liproverbia 15:23) Ho feta moo, polelo e joalo e thusa ho khothalletsa le ho boloka bonngoe ba batho ba Jehova.
E-ba ea Tšoarelang!
13. Ke hobane’ng ha re lokela ho tšoarela?
13 Ho tšoarela ea re khopisitseng ea kōpileng tšoarelo hoa hlokahala e le hore re ka boloka bonngoe ba Bokreste. ’Me re lokela ho tšoarela hangata hakae? Jesu o ile a bolella Petrose: “Eseng, Ho fihlela makhetlong a supileng, empa, Ho fihlela makhetlong a mashome a supileng a metso e supileng.” (Matheu 18:22) Haeba re sa tšoarele, ha re itsoele molemo. Joang? Ha e le hantle, ho hlonama le ho jara motho ka pelo ho tla re amoha khotso ea kelello. ’Me haeba re tsebahala ka ho ba khopo le ho se tšoarele, re ka ’na ra etsa hore re nenoe. (Liproverbia 11:17) Ho jara motho ka pelo ha ho thabise Molimo ’me ho ka lebisa sebeng se tebileng. (Levitike 19:18) Hopola hore Johanne Mokolobetsi o ile a khaoloa hlooho leanong le reriloeng ke Herodiase ea khopo, ea neng a mo “jere ka pelo.”—Mareka 6:19-28.
14. (a) Matheu 6:14, 15 e re ruta’ng ka tšoarelo? (b) Na kamehla re tlameha ho emela hore motho a kōpe tšoarelo pele re mo tšoarela?
14 Thapelo ea Jesu ea mohlala e akarelletsa le mantsoe ana: “U re tšoarele libe tsa rōna, kaha le rōna ka borōna re tšoarela e mong le e mong ea nang le molato ho rōna.” (Luka 11:4) Haeba re sa tšoarele, re ipeha kotsing ea hore ka letsatsi le leng Jehova Molimo a se ke a hlola a re tšoarela libe tsa rōna, hobane Jesu o itse: “Haeba le tšoarela batho litšito tsa bona, Ntate oa lōna oa leholimo le eena o tla le tšoarela; athe haeba le sa tšoarele batho litšito tsa bona, le Ntate oa lōna ha a na ho tšoarela litšito tsa lōna.” (Matheu 6:14, 15) Ka hona haeba re hlile re batla ho phetha karolo ea rōna ea ho boloka bonngoe lelapeng la Jehova la barapeli, re tla ba ba tšoarelang, mohlomong ka hore feela re lebale khopiso eo e ka ’nang eaba e entsoe ka lebaka la ho se nahane ’me e se na morero o mobe leha e le ofe. Pauluse o itse: “Tsoelang pele le mamellana le ho tšoarelana ka bolokolohi haeba leha e le mang a e-na le sesosa sa pelaelo khahlanong le e mong. Esita le joalokaha Jehova a ile a le tšoarela ka bolokolohi, le etse joalo le lōna.” (Bakolose 3:13) Ha re tšoarela, re thusa ho boloka bonngoe ba bohlokoa ba mokhatlo oa Jehova o hlophisitsoeng.
Bonngoe le Liqeto Tsa Botho
15. Ke’ng se thusang batho ba Jehova ho boloka bonngoe ha ba etsa liqeto tsa botho?
15 Molimo o re entse re le ba lokolohileng ho ikhethela tsela ea ho etsa lintho re bile re e-na le tokelo le boikarabelo ba ho etsa liqeto tsa botho. (Deuteronoma 30:19, 20; Bagalata 6:5) Empa, re khona ho boloka bonngoe ba rōna hobane re iphaphatha le melao le melao-motheo ea Bibele. Re nahana ka eona ha re etsa liqeto tsa botho. (Liketso 5:29; 1 Johanne 5:3) Nka hore ho hlaha bothata bo itseng bo amanang le taba ea ho se jele paate. Re ka etsa qeto ea botho e bontšang tsebo ka ho hopola hore ha re “karolo ea lefatše” le hore re ‘teile liphehla tsa rōna tsa ntoa mehoma.’ (Johanne 17:16; Esaia 2:2-4) Ka ho tšoanang, ha re tlameha ho etsa qeto ea botho mabapi le kamano ea rōna le Naha, re nahana ka seo Bibele e se buang ka ho lefa “lintho tsa Molimo ho Molimo,” ha re ntse re ipehile ka tlas’a “ba phahameng ba nang le matla a ho laela” litabeng tsa lefatše. (Luka 20:25; Baroma 13:1-7; Tite 3:1, 2) E, ho nahana ka melao le melao-motheo ea Bibele ha re etsa liqeto tsa botho ho thusa ho boloka bonngoe ba rōna ba Bokreste.
16. Ke joang re ka thusang ho boloka bonngoe ha re etsa liqeto tseo ho ke keng ha thoe li nepahetse kapa li fosahetse ho ea ka Mangolo? Bontša.
16 Re ka thusa ho boloka bonngoe ba Bokreste esita leha re etsa qeto eo kahohle-hohle e leng ea botho le eo ho ke keng ha thoe e nepahetse kapa e fosahetse ho ea ka Mangolo. Joang? Ka ho bontša kameho e lerato bakeng sa ba bang ba ka ’nang ba angoa ke qeto ea rōna. Ka mohlala: Phuthehong ea Korinthe ea boholo-holo, ho ile ha hlaha bothata mabapi le nama e hlabetsoeng litšoantšo tse rapeloang. Ho hlakile hore Mokreste o ne a ke ke a kopanela moketeng oa borapeli ba litšoantšo. Leha ho le joalo, e ne e se sebe ho ja nama ea mofuta ona e setseng, e ntšitsoeng mali ka ho loketseng e neng e rekisoa ’marakeng oa sechaba. (Liketso 15:28, 29; 1 Bakorinthe 10:25) Leha ho le joalo, matsoalo a Bakreste ba bang a ne a tšoenngoa ke ho jeoa ha nama ena. Ka lebaka leo Pauluse o ile a phehella Bakreste ba bang ho qoba ho ba khopisa. Ha e le hantle, o ile a ngola: “Haeba lijo li etsa hore mor’eso a khoptjoe, le ka mohla ha nka ke ka boela ka ja nama ho hang, e le hore ke se ke ka etsa hore mor’eso a khoptjoe.” (1 Bakorinthe 8:13) Ka hona esita le haeba ho se molao kapa molao-motheo oa Bibele o amehang, ke ho lerato hakaakang ho nahanela ba bang ha re etsa liqeto tsa botho tse ka ’nang tsa ama bonngoe ba lelapa la Molimo!
17. Ho molemo hore re etse’ng ha re tlameha ho etsa liqeto tsa botho?
17 Haeba re sa kholiseha hore na re lokela ho etsa’ng, ho bohlale ho etsa qeto ka tsela e re sieang re e-na le matsoalo a hloekileng, ’me ba bang ba lokela ho hlompha qeto ea rōna. (Baroma 14:10-12) Ho hlakile hore ha re tlameha ho etsa qeto ea botho, re lokela ho batla tataiso ea Jehova ka thapelo. Joaloka mopesaleme, re ka rapela ka kholiseho: “U sekehele tsebe tsa hao ho ’na! . . . Hobane u lefika la ka le qhobosheane ea ka; ’me ka baka la lebitso la hao, u tla mpontša tsela, u ntsamaise ho eona.”—Pesaleme ea 31:1, 3.
Boloka Bonngoe ba Bokreste Kamehla
18. Pauluse o ile a bontša bonngoe ba phutheho ea Bokreste joang?
18 Ho 1 Bakorinthe khaolo ea 12, Pauluse o ile a sebelisa ’mele oa motho ho bontša bonngoe ba phutheho ea Bokreste. O ile a hatisa ho itšetleha ha setho se seng ka se seng le bohlokoa ba setho ka seng. Pauluse o ile a botsa: “Haeba tsohle e ne e le setho se le seng, ’mele o ne o tla ba hokae? Empa joale ke litho tse ngata, empa leha ho le joalo ke ’mele o le mong. Leihlo le ke ke la re ho letsoho: ‘Ha ke u hloke’; kapa, hape, hlooho e ke ke ea re ho maoto: ‘Ha ke le hloke.’” (1 Bakorinthe 12:19-21) Ka ho tšoanang, hase bohle ba etsang mesebetsi e tšoanang ka lelapeng la barapeli ba Jehova. Empa, re kopane, ’me rea hlokana.
19. Re ka rua molemo joang litokisetsong tsa Molimo tsa moea, ’me mor’abo rōna e mong ea hōlileng o ile a re’ng mabapi le see?
19 Joalokaha ’mele o hloka lijo, tlhokomelo le tataiso, re hloka litokisetso tsa moea tseo Molimo a re fang tsona ka Lentsoe la hae, moea oa hae le mokhatlo oa hae o hlophisitsoeng. Ho rua molemo litokisetsong tsena, re tlameha ho ba karolo ea lelapa la Jehova la lefatšeng. Ka mor’a lilemo tse ngata a le tšebeletsong ea Molimo, mor’abo rōna e mong o ile a ngola: “Ke leboha hakaakang hore ebe ke phetse tumellanong le tsebo ea merero ea Jehova ho tloha mehleng eo ea khale pele ho 1914 ha tsohle li ne li sa hlaka hakaalo . . . ho fihlela kajeno ha ’nete e khanya joaloka letsatsi la motšehare o moholo. Haeba ho e-na le se bileng bohlokoa haholo ho ’na, e bile taba ea ho tsoela pele ho ba haufi le mokhatlo oa Jehova o hlophisitsoeng o bonahalang. Phihlelo ea ka ea pele-pele e nthutile hore na ho tšepa monahano oa batho ke booatla bo bokaakang. Hang ha kelello ea ka e entse qeto ntlheng eo, ke ile ka ikemisetsa ho lula haufi le mokhatlo o hlophisitsoeng o tšepahalang. Ke joang hape motho a ka fumanang mohau oa Jehova le tlhohonolofatso?”
20. Re lokela ho ba ba ikemiselitseng ho etsa’ng ka bonngoe ba rōna re le batho ba Jehova?
20 Jehova o ntšitse batho ba hae lefifing la lefatše le karohanong. (1 Petrose 2:9) O re tlisitse bonngoeng bo hlohonolofalitsoeng le eena le balumeli-’moho le rōna. Bonngoe bona bo tla ba teng tsamaisong e ncha ea lintho eo hona joale e leng haufi haholo. Ka lebaka leo, matsatsing ana a ho qetela a mahlonoko, a re tsoeleng pele ho ‘ikapesa lerato’ ’me re etse ntho e ’ngoe le e ’ngoe eo re ka e etsang ho khothalletsa le ho boloka bonngoe ba rōna ba bohlokoa.—Bakolose 3:14.
U ne U Tla Araba Joang?
◻ Ke hobane’ng ha ho etsa thato ea Molimo le ho khomarela ’nete ho re thusa ho boloka bonngoe?
◻ Bonngoe bo amana joang le tšebeliso e loketseng ea leleme?
◻ Ho ameha eng tabeng ea ho ba ea tšoarelang?
◻ Re ka boloka bonngoe joang ha re etsa liqeto tsa botho?
◻ Ke hobane’ng ha re lokela ho boloka bonngoe ba Bokreste?
[Setšoantšo se leqepheng la 16]
Feela joalokaha molisa enoa a boloka mohlape oa hae o le hammoho, ka tsela e joalo, Jehova o re boloka re kopane
[Litšoantšo tse leqepheng la 18]
Ka ho kōpa tšoarelo ka boikokobetso ha re bakile likhopiso, re thusa ho hōlisa bonngoe