Lipotso tse Tsoang ho Babali
◼ Ho ea ka mantsoe a Jesu ho Johanne 15:15, na Bakreste ba loketse ho italima e le “bahlanka,” kapa na re ka italima re le “metsoalle” ea hae?
Re lokela ho italima re le bahlanka le metsoalle. Ho fumana lebaka, a re boneng seo Jesu a se boleletseng baapostola ba hae ba tšepahalang bosiung ba ho qetela a e-na le bona:
“Ha ho motho ea nang le lerato le fetang la ea tellang metsoalle ea hae bophelo ba hae. Lōna le tla ba metsoalle ea ka, ha le etsa tsohle tsee ke le laelang tsona. Ha ke sa tla le bitsa bahlanka, kahobane mohlanka ha a tsebe se etsoang ke morena oa hae; ke le bitsitse metsoalle, kahobane ke le tsebisitse tsohle tsee ke li utloileng ho Ntate.”—Johanne 15:13-15.
Pele, ke’ng seo Jesu a neng a se halala ha a re baapostola ba hae ba tšepahalang e ne e le bahlanka? O ne a sa bolele hore ke bahlanka ka kutloisiso ea hore batho bohle ke bana ba Adama ’me ba tsoetsoe ba sa phethahala, kahoo ba bohlankeng ba sebe. (Johanne 8:34; Ba-Roma 5:18, 19; 6:16; 7:14) Joaloka Bakreste ho tloha nakong eo, baapostola ba kile ba e-ba bohlankeng ba sebe ka tsela eo, empa sehlabelo sa Jesu se ne se tla fana ka pheko kapa ho ba lokolla. (1 Petrose 1:18, 19; Ba-Galata 4:5) Leha ho le joalo, ha ba ka ba lokoloha ka ho feletseng. Joalokaha moapostola Pauluse a ngotse hamorao, ba “rekiloe ka theko,” e leng mali a Jesu, kahoo ba fetohile bahlanka ba Molimo le ba Kreste.—1 Ba-Korinthe 6:20; 7:22, 23.
Ho Johanne 15:15 Jesu o ne a sa bolele hore baapostola ba tšepahalang bao haufinyane ba neng ba tla amohela moea o halalelang le ho ba Bakreste ba tlotsitsoeng e ne e sa hlole e le bahlanka. (Bapisa Johanne 15:20.) Ho hlakile hore, bohlanka ba bona ho Molimo ka Kreste hase bo hatellang le bo bolaeang. Ke bo lerato le bo fanang ka bophelo. (2 Timothea 4:8; Tite 1:1, 2) Mokreste eo ka thabo a amohelang bohlokoa ba mali a Kreste ’me a fetoha mohlanka oa Molimo o tla talimana le lefu feela ka ho sa feleng ha hamorao a nyelisa sehlabelo seo’me a inehela sebeng, a fetoha mohlanka oa sona hape. (Ba-Galata 1:10; 4:8, 9; Ba-Heberu 6:4-6) Ka lebaka leo, barutuoa ba Jesu ba tla tsoela pele ho ba bahlanka ba Molimo le Kreste, empa ba ne ba tela ho ba bahlanka feela. Hobane’ng?
Nakong eo Jesu le baapostola ba ne ba utloisisa hore, ka tsela e tloaelehileng ea kamano ea mohlanka le monghali, ‘mohlanka ake ke a tseba seo monghali oa hae a se etsang.’ Ka tloaelo, monghali oa motho o ne a ke ke a buisana le mohlanka ea rekiloeng, kapa ho mo senolela maikutlo a hae.
Leha ho le joalo, re ka bona mantsoeng a Jesu hore e ne le ho fapaneng ka baapostola. O itse: “Ha ke sa tla le bitsa bahlanka, kahobane mohlanka ha a tsebe se etsoang ke morena oa hae; ke le bitsitse metsoalle, kahobane ke le tsebisitse tsohle tseo ke li utloileng ho Ntate.” (Johanne 15:15) E, joalokaha ho etsahetse mahareng a metsoalle e ratanang, Jesu o ba senoletse boitsebiso bohle le kutloisiso tseo e neng e le lekunutu. (Mattheu 13:10-12; 1 Ba-Korinthe 2:14-16) Le hoja e ne e sa ntse e le basebeletsi, kapa bahlanka ba Molimo ka Jesu, baapostola ba ne ba thabela botsoalle bo haufi bo ba tšoaileng e le metsoalle e tšepahalang. (Bapisa Pesaleme ea 25:14.) Le rōna re lokelaho italima joalo. Ke tokelo e hlollang hakaakang ho ba le Marena leholimong a re tšoarang joaloka metsoalle e tšepahalang le e hlonephehang bakeng sa litaba tsa lekunutu!