Lipotso tse Tsoang ho Babali

◼ Na Jesu o ne a bua ka Judase ha a re ho Pilato: “Ka baka leo, ea ’neetseng uena o na le sebe se fetisang”?—Johanne 19:11.

Ha ho bonahale eka mona Jesu o ne a bua ka Judase kapa motho leha e le ofe e mong. Banna ba bangatanyana ba molato ba ne ba ameha liketsahalong tse ileng tsa kolekela hore Jesu a hlahe ka pel’a Pilato ha esita le ho tobana le lefu.

Ka ho loketseng Judase o tla pele mohopolong kahobane moapostola eo ea silafetseng o ile a fetoha lehlaba-phio. (Johanne 6:64, 71; 12:4-6) Judase o ile a kopana le baprista ba baholo, ba neng ba batla ho ‘bolaea’ Jesu. Ba ile ba lefa Judase lichelete tsa silevera tse 30 ho mo eka. (Luka 22:2-6) Ka ho sa belaetseng, Judase o ne a e-na le sebe se seholo tabeng ea lefu la Jesu.

Empa hase Judase feela ea ileng a etsa hore Jesu a bolaoe. Moprista e moholo Kaiafa o ne a hlohlellelitse batho ba bang hore ba bolaee Jesu. (Johanne 11:49, 50) Mattheu o pheta hore hang ha “baprista ba baholo le lekhotla lohle” ba ahlotse Jesu, ba ile ba sebetsa e le sehlopha. “Baprista bohle ba baholo le baholo ba sechaba ba rera Jesu ho ’molaea. Eitse hobane ba mo tlame, ba ea le eena, ba mo neela Ponse Pilato, ’musisi.” (Mattheu 26:59-65; 27:1, 2) Ho feta moo, kamor’a hore Pilato a fumane Jesu a se na molato, “bongata” ba kōpa hore Barabbase a lokolloe. Ka ho fapaneng, ka Jesu ba hooa: “A thakhisoe.”—Mattheu 27:20-23; Johanne 18:40.

Ka hona, haele hantle Jesu o ne a sa bue ka motho a le mong ea khethehileng ha a ne a re ho Pilato: “Ea ’neetseng uena o na le sebe se fetisang.” (Johanne 19:11) Le hoja Judase, “mor’a timelo,” a jara ka ho khetheha molato o moholo, ba bang ba bangata ba bile le karolo molatong oa sebe sa ho bolaea Jesu. (Johanne 17:12) Ke ka hona ka letsatsi la Pentekonta moapostola Petrose a ileng a bolella Bajode hore ba bakele sebe sa bona se seholo khahlanong le Mora oa Molimo. (Liketso 2:36-38) Bajode bano e ne e le karolo ea sechaba se inehetseng ho Molimo oa Jesu, Jehova. Ba ne ba e-na le boprofeta bo neng bo khetholla Jesu e le Messia. ’Me ba bangata ba bona ba ne ba bone mehlolo ea Jesu. Ka hona ka sebele ba ne ba le molato oa sebe haholoanyane ho feta molaoli eo e neng e se Mojode ea ileng a tsebahatsa Jesu a se na molato.—Johanne 18:38.

◼ Ke hobane’ng ha Jehova a ile a bolella Ezekiele hore sefahleho sa hae se tla thatafatsoa, joale ka lifahleho tsa Bajode?

Ezekiele e ne e le moprofeta oa Molimo, ea neng a sebelelitse har’a Bajode ba neng ba isitsoe botlamuoeng Babylona. Ka ho hlakileng batlamuoa ba ne ba nahana hore Jehova ka tsela e itseng o tla potlaka ho ba pholosa hobane e ne e le sechaba sa hae se khethiloeng. Ha ba ka ba amohela ’nete ea hore se ba oetseng holimo e bile hobane ba ne ba sa tšoaneloe ke mosa oa hae.

Kahoo ha Jehova a laela Ezekiele ho ‘bua le bona ka mantsoe a hae’ e ne e se kabelo e bonolo. Ha Molimo o lokisetsa moprofeta, o ile oa hlokomelisa hore “ba tla hana ho u mamela, hobane ba hana ho mamela ’na; etsoe bohle ba ntlo ea Iseraele ke ba thatafalitseng lifahleho, ba satalalitseng lipelo.”—Ezekiele 3:4, 7.

Ntlheng ena Molimo o ile oa bolella Ezekiele: “Bona, ke thatafatsa sefahleho sa hao, joale ka lifahleho tsa bona; ke satalatsa phatla ea hao, joale ka phatla tsa bona. Ke thatafatsa phatla ea hao joale ka daemane. Le ho feta lehakoe, u se ke ua ba tšaba, u se ke ua tepella ka baka la bona, etsoe e le ntlo ea bahanyetsi.”—Ezekiele 3:8, 9.

Batho ba ne ba le manganga ’me ba tletse borabele. (Ezekiele 2:6) Na ba ne ba tla tseba ho amohela moromuoa oa Molimo? Che. Kaha Ezekiele a ne a e-na le tšehetso ea Molimo, o ne a ke ke a e-ba bonolo ho feta kamoo ba neng ba le kateng. Lehakoe ke lejoe le thata haholo, le thata ho feta tšepe. Haeba Bajode ba manganga, ba sa arabeleng ba ne ba tšoana le lehakoe, Ezekiele o ne a tla ba joalo. Ho feta moo, o ne a lokela ho tšoana le daemane, e ’ngoe ea lirafshoa tse thata ka ho fetisisa, e thata hoo e ka sebelisoang ho ngoapa esita le lehakoe.—Jeremia 17:1, 2.

Sena bonneteng hase bolele hore batho ba Molimo kajeno ba Iokela ho ikuka e le ba thata, ba sa ameheng ka maikutlo a ba bang, kapa ba sa tsotelleng ho etsa seo ba ikutloang hore se nepahetse. Hlokomela seo moapostola Petrose a phehelletseng hore se etsoe mabapi le maikutlo a batho: “Bohle le be le khopolo e le ’ngoe, le hauhelane, le ratane le baena, le be le mohau, le be le mosa; le se ke la phetetsa bobe ka bobe.”—1 Petrose 3:8, 9.

Lerato bakeng sa batho ba bang le boetse ke motheo oa tšusumetso ea rōna ho abelana le ba bang litaba tse molemo tsa ’Muso. (Mattheu 9:36-38) Empa ha re thulana le phapang, ho latoloa, kapa khanyetso e tobileng, re ke ke ra khaotsa ho bolela molaetsa oa Molimo mehleng ea rōna. Seo se kopanyeIletsa ho bolela hore kapele o tla “iphetetsa ho ba sa tsebeng Molimo, le ho ba sa utloeng evangeli ea Jesu Kreste, Morena oa rōna.” (2 Ba-Thessalonika 1:6-9) Ha rea lokela ho tšosoa kapa ho tšaba. Ka tsela ena re ka ba thata joaloka daemane joaloka ha Ezekiele a ne a lokela ho ba joalo.