Jesu—Bophelo le Tšebeletso tsa Hae

Lentsoe la Molimo le Utloahala Lekhetlo la Boraro

HA A ntse a le tempeleng, Jesu o ne a ntse a sisimoha ke lefu leo a tlamehang ho talimana le lona haufinyane. Kameho ea hae e ka sehloohong ke hore na botumo ba Ntate oa hae bo tla ameha joang, kahoo oa rapela: “Ntate, tlotlisa lebitso la hao!”

Nakong eo, lentsoe le matla le tsoa leholimong, le re: “Ke se ke le tlotlisitse, ’me ke tla ’ne ke le tlotlise!”

Letšoele le emeng haufi le tsielehile. Ba bang ba qala ho re: “Lengeloi le buile le eena.” Ba bang ba bolela hore le lumile. Empa, ka sebele ke Jehova Molimo ea buileng! Leha ho le joalo, lena hase lekhetlo la pele ha ho ne ho utluoa lentsoe la Molimo mabapi le Jesu.

Ha Jesu a ne a kolobetsoa, lilemo tse tharo le halofo pejana, Johanne Mokolobetsi o ne a utloe Molimo o re ka Jesu: “Enoa ke Mora oa ka ea ratoang, eo ke khahlisoang ke eena.” Hape, ka nako e ’ngoe ka Paseka ea pejana, ha Jesu a ne a bonahala ka mokhoa o khanyang ho bona, Jakobo, Johanne, le Petrose ba ile ba utloa ha Molimo o phatlalatsa: “Enoa ke Mora oa ka ea ratoang, eo ke khahlisoang ke eena; mo utloeng!” ’Me joale, ka lekhetlo la boraro, ka la 10 Nisane, matsatsi a mane pele ho lefu la Jesu, batho ba boetse ba utloa lentsoe la Molimo. Empa lekhetlong lena Jehova o bua hore matšoele a ka utloa!

Jesu oa hlalosa: “Lentsoe leo ha lea etsetsoa ’na, empa le etselitsoe lōna.” Le fana ka tiiso ea hore e hlile Jesu ke Mora oa Molimo, Messia ea tšepisitsoeng. Jesu o tsoela pele: “Joale, e se e le kahlolo ea lefatše lena; joale, morena oa lefatše lena o tla lelekeloa ntle.” Ka sebele, tsela ea bophelo ba Jesu e tšepahalang, e tiisa hore Satane Diabolose, morena oa lefatše lena, o tšoanela ho “lelekeloa ntle,” ho bolaoa.

Ha a supa liphello tsa lefu la hae le atamelang, Jesu o re: “’Me ’na, etlare hobane ke nyolloe lefatšeng, ke tla hulela batho bohle ho ’na.” Leha e le ka tsela efe lefu la hae hase ho hlōloa, hobane ka lona, o tla hulela ba bang ho eena e le hore ba ka thabela bophelo bo sa feleng.

Empa letšoele lea ipelaetsa: “Rōna re utloile ka molao hore Kreste o tla ba teng ka ho sa feleng, ’me uena, u bolela joang hobane e ka khona Mor’a motho a nyolloe na? Mor’a motho eo ke mang?”

Ho sa tsotellehe bopaki bohle, ho akarelletsa le ho utloa lentsoe la Molimo, ba bangata ha ba lumele hore Jesu ke Mor’a motho oa ’nete, Messia ea tšepisitsoeng. Leha ho le joalo, joalokaha a ile a etsa likhoeling tse tšeletseng pejana Moketeng oa Metlotloane, Jesu o boetse o bua ka eena e le “leseli” ’me o khothalletsa bamameli ba hae: “Ha le sa ntse le e-na le leseli, lumelang ho leseli, le tle le fetohe bana ba leseli.” Ka mor’a ho bolela taba tsena, Jesu oa tsamaea ’me oa ipata, ka ho totobetseng e le hobane bophelo ba hae bo ne bo le kotsing.

Ho haelloa ke tumelo ha Bajode ho Jesu, ho phethahatsa mantsoe a Esaia ka ‘ho foufatsoa ha mahlo a batho, ’me lipelo tsa bona li thatafatsoa, e le hore ba se ke ba sokoloha, ’me ba folisoe.’ Ka pono Esaia o ile a bona makhotla a leholimo a Jehova, ho akarelletsa le Jesu khanyeng ea hae ea pele e e-ba motho hammoho le Jehova. Empa, phethahatsong ea se ngotsoeng ke Esaia, ka manganga Bajode ba hana bopaki ba hore Enoa ke Molopolli oa bona ea tšepisitsoeng.

Ka lehlakoreng le leng, ha e le hantle ba bangata le har’a babusi (bao ka ho hlakileng e leng litho tsa lekhotla le phahameng la Bajode, Sanhedrin) ba lumela ho Jesu. Ba babeli ba babusi bana ke Nikodema le Josefa oa Arimathea. Empa, ha e le hona joale, babusi bao ha ba bolele tumelo ea bona, ka baka la ho tšaba ho tlosoa litulong tsa bona synagogeng. Ba joalo ba lahleheloa hakaakang!

Jesu o tsoela pele ho hlokomelisa: “Ea lumelang ho ’na, ha a lumele ho ’na, empa o lumela ho ea nthomileng. Ea ntalimang, o talima ea nthomileng. . . . Ekare ha e mong a utloa mantsoe a ka, ’me a sa lumele, ’na ha ke mo ahlole; hobane ha kea tla ho ahlola lefatše, empa e le ho pholosa lefatše. . . . Lentsoe leo ke le buileng, ke lona le tla mo ahlola ka letsatsi la bofelo.”

Lerato la Jehova bakeng sa lefatše la batho le mo susumellelitse ho romela Jesu e le hore ba lumelang ho eena ba ka bolokeha. Hore na batho baa bolokeha kapa che ho tla reroa ke hore na ba utloa lintho tseo Molimo o li laetseng Jesu hore a li bue. Kahlolo e tla ba ka “letsatsi la bofelo,” nakong ea Puso ea Kreste ea Lilemo tse Sekete.

Jesu o qetella ka ho re: “Ha kea ka ka bolela ke iqalla tsa ka, empa Ntate ea nthomileng ke eena ea ’neileng taelo ea see ke tla se bolela, le ea mokhoa oo ke tla se bolela ka oona. ’Me kea tseba hobane taelo ea hae ke bophelo bo sa feleng; ’me joale, see ke se bolelang, ke se bolela joalo ka ha Ntate a mpoleletse sona.” Johanne 12:28-50; 19:38, 39; Mattheu 3:17; 17:5; Esaia 6:1, 8-10.

◆ Ke liketsahalong life tse tharo moo lentsoe la Molimo le utluoeng mabapi le Jesu?

◆ Moprofeta Esaia o ile a bona khanya ea Jesu joang?

◆ Babusi ba neng ba lumetse ho Jesu ke bo-mang, empa ke hobane’ng ha ba sa bolele ka eena?

◆ “Letsatsi la bofelo” ke eng, hona batho ba tla ahloloa ka mokhoa ofe nakong eo?