Lebaka Leo ka Lona re Hlokang Tsebo e Nepahetseng
“Ke ka lebaka leo le rōna, ho tloha mohla re utloileng ka eona, re sa kang ra phetsa ho le rapella le ho kōpa hore le ka tlala tsebo e nepahetseng ea thato ea hae ka bohlale bohle le kutloisiso ea moea.”—BA-KOLOSSE 1:9, “NW.”
1. Fana ka mohlala o bontšang phapang pakeng tsa tsebo e akaretsang le e nepahetseng.
E BATLA e le e mong le e mong ea tsebang hore na oache ke eng, empa ke ba bangata hakae ba tsebang hore na e sebetsa joang? U ka ’na ua ba le tsebo e akaretsang, empa na u ka e tsekolla, ua e lokisa, eaba u e kopanya hape? Ka sebele moetsi oa lioache a ka ho etsa. Hobane’ng? Hobane o na le tsebo e nepahetseng, e batsi ea hore na oache e sebetsa joang. ’Me oo ke mohlala o bontšang phapang pakeng tsa tsebo e akaretsang le e nepahetseng ea taba.
2. Ke phapang efe e teng pakeng tsa mefuta e ’meli ea tsebo eo u e hlokometseng bolumeling?
2 Batho ba limillione ba na le tsebo e akaretsang ka Molimo. Ba bolela hore ba lumela ho Molimo, le hoja hangata liketso tsa bona li shanofatsa polelo eo. Ka linako tse ling moromuoa e mong o ne a ee a botse mong’a ntlo: “Joaloka Mok’hatholike, e tlameha e be u lumela ho Molimo, na ha ho joalo?” ’Me a supa maholimong, karabelo e ne e ee e be: “Koana, ke lumela hore e tlameha e be ho na le ho hong mono.” Na u ne u tla bitsa hoo tsebo le kutloisiso e nepahetseng ka Molimo? Le hanyenyane. ’Me hangata phello ea tsebo e lerootho joalo ke hore boitšoaro ba ba ipolelang e le Bakreste hase ba Bokreste. (Bapisa le Tite 1:16.) Phello e ba boemo bo tšoanang le boo Pauluse a bo hlalositseng: “Feela joalokaha ba sa ka ba amohela ho lumela ho Molimo ka tsebo e nepahetseng, Molimo o ba neheletse boemo bo sa amoheleheng ba kelello.”—Ba-Roma 1:28, NW.
3. Phello e ba efe ha batho ba latola tsebo e nepahetseng ea thato ea Molimo?
3 Ho hloka tsebo e nepahetseng ho ile ha fella ka eng lekholong la pele la lilemo? Batho ba ne ba etsa “tse sa tšoanelang. Ba tletse bokhopo bohle, le bootsoa, le lonya, le takatso ea moruo, le bolotsana, ba tletse mohono, le polao, le khang, le thetso, le manganga. Ke basebi, ke baetselletsi, ke ba hloeang Molimo, ke barohaki, le baikhantši, ke baikhohomosi, ke ba qapang limpe, ke ba sa utloeng baholo ba bona. Ba thotofetse, ha ba na molomo o tšepehang, ha ba na lerato la hlaho, ba na le bohale bo sa tapeng, ha ba na ho utloela ba bang bohloko.” Ho hloka tsebo e nepahetseng ha bona ho ne ho bolela hore lipelo tsa bona li ne li sa susumelletsehe liketsong tse lokileng.—Ba-Roma 1:28-31; Liproverbia 2:2, 10.
Phapang ke Efe?
4, 5. Ho latela litsebi tsa Segerike, liphapang tse ling ke life pakeng tsa gnoʹsis le e·piʹgno·sis?
4 Phapang ena e pakeng tsa tsebo e akaretsang le e nepahetseng e bontšoa ka Mangolong a Segerike. Segerike sa pele se bua ka gnoʹsis, tsebo, le e·piʹgno·sis, tsebo e nepahetseng. Ho latela setsebi sa Segerike W. E. Vine, tsebo ea pele e bolela “haholo-holo ho batla ho tseba, phuputso, patlisiso,” haholo-holo ea ’nete ea moea moelelong oa Mangolo.
5 Ho latela setsebi sa Segerike Thayer, e·piʹgno·sis e bolela “tsebo e qaqileng le e nepahetseng.” ’Me ha e le sebopehong sa ketso, e bolela “ho tloaelana ka ho felletseng le, ho tseba ka ho felletseng; ho tseba ka mokhoa o nepahetseng, ho tseba hantle.” W. E. Vine o bolela hore e·piʹgno·sis “e bontša tsebo e hlakileng kapa e felletseng, kutloisiso, khopolo.” O phaella ka hore e senola “tsebo e felletseng haholoanyane kapa e felletseng, ho kenella ho hoholoanyane ha setsebi nthong e tsejoang, ka hona ho se susumetsa ka matla haholoanyane.” (Mongolo o tšekaletseng ke oa rōna.) Joalokaha re tla bona, polelo ena ea ho qetela ke ea bohlokoa haholo ho Mokreste.
6. Ke lingoli life tsa Bibele tse sebelisang mantsoe a emelang “tsebo” le “tsebo e nepahetseng,” ’me ke hobane’ng ha tsebo e nepahetseng e le ea bohlokoa?
6 Ke lingoli tse peli feela tsa Bibele tse sebelisang lentsoe la Segerike e·piʹgno·sis. Ke Pauluse le Petrose, ba sebelisang lentsoe leo ka makhetlo a 20 ka kakaretso.a Ntle le Luka, hape ke bona feela ba sebelisang lentsoe gnoʹsis, Pauluse o le sebelisa ka makhetlo a 23 ’me Petrose ka makhetlo a 4. Ka hona mangolo a bona ke tataiso ea bohlokoahali mabapi le bohlokoa ba tsebo e nepahetseng mabapi le ho bolokeha. Joalokaha Pauluse a bolelletse Timothea: “Sena se molemo ’me sea amoheleha mahlong a ’Moloki oa rōna, Molimo, eo thato ea hae e leng hore batho ba mefuta eohle ba lokela ho bolokeha ’me ba tle tsebong e nepahetseng ea ’nete.”—1 Timothea 2:3, 4, NW.
Lebaka Leo ka Lona Tsebo e Nepahetseng e Leng ea Bohlokoa
7. (a) Hore e tle e be le molemo, tsebo e tlameha ho re ama joang? (b) Ke kotsi efe e teng haeba re hlokomoloha tsebo?
7 Ka hona, ho fumana tsebo e nepahetseng ea ’nete kamoo e rutoang ka teng ka Bibeleng ke senotlolo sa ho bolokeha. Leha ho le joalo, tsebo eo e tlameha ho finyella pelong, setsing sa tšusumetso. E ke ke ea lula e le bohlale kapa thuto e sa sebelisoeng. Ho feta moo, hang ha e se e fumanoe, tsebo ea ’nete e lokela ho sebelisoa le ho nchafatsoa. Hobane’ng? Hobane mohopolo, joaloka mosifa o sa sebelisoeng, o ka ’na oa fokola ’me oa felloa ke litšobotsi tsa bohlokoa, e leng boemo bo ka etsang hore re hlokomolohe bomoea ba rōna habobebe ’me re qale ho suthela thōko le ho thekesela tumelong ea rōna. Re ka ’na ra khoehlisa tseleng eo re tšoereng “tsebo ea Molimo” ka eona. Ka potlako, ho thekesela hona ho ka ’na ha bontšoa ke matla a botsoa a ho nahana esita le boitšoaro boo e seng ba Bokreste.—Liproverbia 2:5; Ba-Heberu 2:1.
8. Salomone o ile a bona molemo ofe ho bohlale le tsebo?
8 Ka hona, re ananela hore na ke hobane’ng ha Salomone, ha a sa ntsane a tšepahala, a ne a nka bohlale, kutloisiso, le matla a ho nahana e le tsa bohlokoa hakana. O ngotse: “Hobane bohlale bo tla kena pelong ea hao, tsebo e khahlise moea oa hao; masene [“matla a ho nahana,” NW] a u lebele, kutloisiso e u boloke; ho u phemisa tsela ea bobe.”b (Liproverbia 2:10-12) Mantsoe ana a fana ka maikutlo a hore re tlameha ho hlaolela takatso e matla ea tsebo e nepahetseng, e ka amang pelo le moea ka booona. Ho feta moo, ke motheo oa matla a matle a ho nahana. ’Me ke hobane’ng ha see e le sa bohlokoa hakaale kajeno?
9. Lira tse ling tsa bomoea ba Bakreste ke life?
9 Re phela “matsatsing a ho qetela” ha, joalokaha Pauluse a profetile, ho “tlile linako tsa khatello” kapa “nako ea likhathatso.” (2 Timothea 3:1, Revised Standard Version; The New English Bible) Ho ntse ho e-ba thata haholoanyane ho boloka botšepehi ba rōna ba Bokreste lefatšeng lena le hlephileng boitšoarong. Melao ea boitšoaro, melao-motheo, le litekanyetso tsa Bokreste lia tšehuoa e bile lia nyelisoa. Tumelo ea Lipaki tsa Jehova e hlaseloa ka mahlakore ’ohle—ke baruti ba Bokreste-’mōtoana ba hloileng molaetsa oa ’Muso oo re o tsamaisang ka ntlo le ntlo, ke bakoenehi ba sebelisanang ’moho le baruti ba Bokreste-’mōtoana, ke ba boholong litabeng tsa bongaka ba batlang ho re qobella litšelo tsa mali hammoho le bana ba rōna, ke bo-ramahlale ba reng Molimo ha o eo ba latolang tumelo ho Molimo le pōpo, le ba lekang ho re qobella ho sekisetsa ho se nke lehlakore ha rōna. Khanyetso ena eohle e kopantsoe hammoho ke Satane, morena oa lefifi le ho hloka tsebo, sera sa tsebo e nepahetseng.—2 Ba-Korinthe 4:3-6; Ba-Efese 4:17, 18; 6:11, 12.
10. Ke likhatello life tse ka ’nang tsa bokellana khahlanong le rōna, ’me re hloka eng hore re li loantše?
10 Likhatello li ka ’na tsa bokellana bophelong ba letsatsi le letsatsi ho susumelletsa Mokreste ho etsa seo ba bang ba se etsang, e-bang ke ho sebelisa lithethefatsi, ho noa ka mokhoa o tlōtseng, ho etsa boitšoaro bo bobe le pefo, ho utsoa, ho bua leshano, ho qhekella, ho tsoa sekolong, kapa ho batla feela bophelo ba monyaka oa boikhabi. Ke ka lebaka leo tsebo e nepahetseng e leng ea bohlokoa. Tsebo e felletseng haholoanyane ea Lentsoe la Molimo le morero oa oona e ka susumetsa monahano oa rōna le liketso tsa rōna ka tsela e molemo ka matla haholoanyane.—Ba-Roma 12:1, 2.
Mora ea Lehlasoa oa Kajeno
11, 12. Ke phihlelo efe ea sebele e bontšang booatla ba ho latola tsebo e nepahetseng ea ’nete?
11 Re ka ’na ra etsa mohlala oa sena ka phihlelo ea sebele ea mohlankana eo, ha a ne a ka ba lilemo li 14 ’me e se e le Mokreste ea kolobelitsoeng, lerato la hae bakeng sa ’nete le ileng la lekoa. Joaloka bacha ba bangata, o ne a rata lipapali, haholo-holo bolo ea maoto. Empa ho ne ho e-na le bothata. Sekolo sa habo se ne se bapala bolo ea maoto ka bosiu bo le bong le boo phutheho e bang le liboka tsa eona ka bona. Bomoea ba hae bo ne bo se matla ka ho lekaneng hore a ka lekanya ka nepo molemo oa nakoana oa bolo ea maoto ha o bapisoa le molemo o sa feleng oa ho ba teng libokeng tsa Bokreste le ’m’ae eo e neng e le mohlolohali le moen’ae le khaitseli’ae. Kahoo o ile a khaotsa ho etsa lintho ka tsebo e nepahetseng ’me a etsa qeto ea ho tsoa ’neteng. Qetellong, o ile a khaoloa. Hamorao, o ile a ea tšebeletsong ea sesole, moo a ileng a kenella lithethefatsing.
12 Ka 1986, ha mohlankana enoa a lokolloa sesoleng, o ile a hlaphoheloa, ’me o ile a ngola lengolo le eang ho motsoalle oa lelapa ea neng a ile a sebeletsa komiting ea boahloli e ileng ea mo khaola. Ho lona o ile a re: “Ke thabile hore e be ke khona ho u bolella litaba tse ling tsa bohlokoa: Ke khutletse ’neteng. . . . Ke hlokometse seo moapostola Pauluse a se boletseng ho 2 Ba-Korinthe 4:4, hore ho na le molimo oa tsamaiso ena ea lintho o foufatsang kelello. Ka nako e telele, ke ne ke le sefofu sa moea se sa boneng lintho tse neng li etsahala ka thōko ho ’na. Ha ke furalla ’nete, ke ne ke sa tsebe hore na ke ikisa kotsing e kaakang. Empa ha nako e ntse e feta, ’me ke leboha Jehova Molimo, ke khonne ho ananela ka ho hlaka hore ke ne ke fositse tseleng ea ka e mpe ea boitšoaro.”—Bapisa le Luka 15:11-24.
13. Haeba kannete ba baka, ba bang ba oeleng tseleng ba ka ’na ba fumana phello efe e molemo? (2 Timothea 2:24-26)
13 Mohlankana enoa o khutletse tseleng ea tsebo e nepahetseng. Joale o khona “ho tsamaea ka mokhoa o tšoanelang Jehova ka sepheo sa ho mo khahlisa ka ho felletseng.” Hape a ka “tsoela pele ho beha litholoana mosebetsing o mong le o mong o motle le ho eketsa tsebo e nepahetseng ea Molimo” ha a ntse a tsoela pele ho kopanela le phutheho ea Bokreste. ’Me o boetse o fetohile tlhohonolofatso e khathollang hakaakang ho lelapa labo ka ho fetoha molateli oa Kreste hape! Na u tseba mehlala e tšoanang?—Ba-Kolosse 1:9, 10, NW; Mattheu 11:28-30, TLP.
Liphello Tse Bohloko Tsa ho Itlhokomoloha Moeeng
14. (a) Ho qoba ho oa, re tlameha ho etsa’ng? (b) Ho etsahetse’ng ka Bakreste ba bang?
14 Re ka ithuta thuto efe phihlelong ee le tse ling tse tšoanang? Hore hang ha re fumane tsebo e nepahetseng ea ’nete, ho hlokahala hore ka mehla re nchafatse mecha ea phepelo ea moea ea kelello e le hore re se ke ra oa. Meliko ea rōna ea moea e ka ’na ea fokola haeba re hlokomoloha thuto ea botho le ea lelapa, liboka tsa Bokreste le tšebeletso. Joale ho ka ’na ha etsahala eng? Mokreste ea kileng a ba matla a ka ’na a suthela thōko le tumelo, mohlomong a ba a oela boitšoarong bo fosahetseng, bo kang boitšoaro bo bobe, kapa a oela tseleng e thellang ea lipelaelo le boitsebiso bo fosahetseng ho kena bokoenehing. (Ba-Heberu 2:1; 3:12; 6:11, 12) Ka booatla, ba bang ba bile ba khutletse lithutong tsa Babylona tsa Boraro-bo-bong le ho se shoe ha moea!
15. Petrose o ile a fana ka temoso efe mabapi le ho oa?
15 Ruri mantsoe a Petrose a loketse: “Hobane ha ba ne ba se ba balehetse litšila tsa lefatše, ke ho tseba Jesu Kreste, Morena le ’Moloki oa rōna, ’me ba boetse ba itšoasitse ho tsona, ’me ba hlōtsoe ke tsona, taba tsa bona tsa qetello li mpe ho fetisa tsa pele. Hobane ho no ho ka fetisa ka molemo ho bona hore ba se ke ba tseba tsela ea ho loka, ho e-na le hore ba khelohe molao o halalelang oo ba o neiloeng, ha ba se ba o tsebile. Empa ba hlahetsoe ke taba ea setšoantšo sa ’nete se reng: Ntja e khutletse mahlatseng a eona, ’me kolobe, hobane e hlatsuoe, e boetse e ipitikile seretseng.”—2 Petrose 2:20-22.
16. (a) Ba bang ba khelositsoe joang mehleng ea morao tjee? (b) Ba bang ba khelositsoeng ba oetse liketsong tsa boitšoaro bofe?
16 Hangata ba latolang tsebo e nepahetseng ea ’nete ba khetha tsela ea ho ikhotsofatsa. Ha ba sa amohela boikarabelo ba ho ba teng libokeng tsa ka mehla tsa Bokreste kapa ba ho kopanela tšebeletsong ea ntlo le ntlo. Ba bang ba bile ba khutlela ho tsubeng! Ba bang ba thabela hore ha ho sa hlokahala hore ba hlahelle e le ba fapaneng tsekong ea ho se nke lehlakore ha Bakreste kapa tšebeliso e mpe ea mali. Ke bolokolohi bo bokaakang! Joale ba ka ba ba voutela o mong oa mekha ea lipolotiki ea “sebata.” (Tšenolo 13:1, 7) Ka hona, joaloka meea e sa tsitsang, ba bang ba ile ba ekoa le ho khelosoa tseleng e otlolohileng ea tsebo e nepahetseng ke ‘ba ba tšepisang tokoloho, athe bona ke bahlanka ba ho bola.’—2 Petrose 2:15-19.
17. Ke kotsi efe e teng bakeng sa ba oang tsebong e nepahetseng ea ’nete?
17 Ntle le hore ba joalo ba bake ’me ba khutlele ’neteng, ba ipepesetsa kahlolo eo Pauluse a e boletseng ka ho hlaka: “Hobane ekare ha re etsa sebe ka boomo, ha re se re filoe tsebo [“tsebo e nepahetseng,” NW] ea ’nete, ha ho sa le sehlabelo se seng sa libe; e se e mpa e le tebello e tšabehang ea kahlolo, le bohale ba mollo o tlang ho ja bahanyetsi.” Ke booatla le ho shebela lintho haufinyane ho hokaakang ho lahla tsebo e nepahetseng ea Jehova Molimo le Kreste Jesu ka baka la lithuto tsa bokoenehi tsa Bokreste-’mōtoana!—Ba-Heberu 6:4-6; 10:26, 27.
Cheseho le Tsebo e Nepahetseng
18. Ho latela Pauluse, ke hobane’ng ha baruti ba Bajode ba ile ba hlōleha ho amohela Kreste?
18 Ka sebele baruti ba Bajode ba mehleng ea Pauluse ba ne ba e-na le tsebo ea Mangolo a Seheberu. Empa na e ne e le tsebo e nepahetseng? Na e ile ea ba hulela ho Kreste joaloka Messia ea tšepisitsoeng? Pauluse o bolela hore ba ne ba tšoarehile haholo ka ho hloma ho loka ha bona ka ho sebelisa Molao hoo ba neng ba sa ikokobeletse “Kreste [eo e leng] qetello ea Molao.” Ka hona Pauluse o ne a ka re ka bona: “Hobane ke ba pakela hore ba na le cheseho bakeng sa Molimo; empa eseng ho latela tsebo e nepahetseng.”—Ba-Roma 10:1-4, NW.
19, 20. (a) Re ka fumana tsebo e nepahetseng joang? (b) Ke lipotso life tse setseng tse lokelang ho arabeloa?
19 Kahoo re ka fumana tsebo ee e nepahetseng joang? Ka thuto ea botho le ho thuisa, hammoho le thapelo le ho ba teng libokeng. Kamoo ho ka boleloang ka teng, sena se bolela ho ‘chacha’ libeteri tsa rōna tsa moea ka mehla. Re ke ke ra itšetleha feela ka tsebo eo re e fumaneng qalong ha re amohela ’nete. Re lokela ho ja re sa khaotse lijo tse tiileng tsa moea, tsebo e nepahetseng, ka thuto ea botho e etsoang ka hloko. Ka hona keletso ea Pauluse e loketse: “Lijo tse tiileng ke tsa banna ba tiileng, e leng bao likelello tsa bona li lemaletseng ho khetha ho hotle le ho hobe, ke ho sebelisoa hona. Ka baka leo, a re feteng litaba tsa thuto ea Kreste tseo ho qaloang ka tsona, ’me re feteleng ho tsa khōlo e tletseng, re se boele ra thea motheo oa ho baka mesebetsing e shoeleng, le oa tumelo ho Molimo . . . ’Me re tla etsa joalo, ha Molimo o re lumella.”—Ba-Heberu 5:14–6:3.
20 Joale lipotso ke tsena, Re na le likofuto life tse ka re thusang ho fumana tsebo e nepahetseng? ’Me ka baka la bophelo ba rōna bo maphatha-phathe, re ka ithuta Lentsoe la Molimo neng? Sehlooho se latelang se tla tšohla litaba tsena le tse ling tse amehang.
[Mongolo o botlaaseng ba leqephe]
a Joalokaha a thathamisitsoe ho Comprehensive Concordance of the New World Translation of the Holy Scriptures, leqephe 17; hape le Filemone 6 (Bona The Kingdom Interlinear Translation of the Greek Scriptures.).
b Ho fumana kutloisiso e molemonyana ea phapang ea moelelo oa mantsoe “tsebo,” “matla a ho nahana,” “bohlale,” le a mang a fumanoang ho Liproverbia, bona Insight on the Scriptures, Moqolo 2, maqephe 180, 1094, 1189, e hatisitsoeng ka Senyesemane ke Watchtower Bible and Tract Society of New York, Inc.
Lipotso Tse Lokelang ho Arabeloa
◻ Phapang ke efe pakeng tsa “tsebo” le “tsebo e nepahetseng”?
◻ Ke hobane’ng ha tsebo e nepahetseng e le ea bohlokoa hakaale matsatsing aa a ho qetela?
◻ Ke joang ba bang ba ka ’nang ba lekoa hore ba oe ’neteng?
◻ Petrose o re fa temoso efe mabapi le ho latola tsebo e nepahetseng?
◻ Re tlameha ho etsa eng ho fumana le ho boloka tsebo e nepahetseng?