Jesu Bophelo le Tšebeletso Tsa Hae

Boikokobetso Nakong ea Paseka ea ho Qetela

TLAS’A litaelo tse tsoang ho Jesu, Petrose le Johanne ba se ba fihlile Jerusalema ho tla etsa litokisetso bakeng sa Paseka. Jesu o fihla motšehare oa mantsiboea, kamoo ho bonahalang ka teng a ntse a e-na le baapostola ba bang ba leshome. Letsatsi le se le ea malikelong ha Jesu le sehlopha se tsamaeang le eena ba theoha Thabeng ea Mehloare ’me ba tšela Phula ea Kedrone. Lena ke lekhetlo la ho qetela Jesu a talima motse e le motšehare ho fihlela ka mor’a tsoho ea hae.

Kapele Jesu le sehlopha se tsamaeang le eena ba fihla motseng ’me ba leba lehaeng leo ba tla keteka Paseka ho lona. Ba hloa methati e nyolohelang ntlong e ka holimo e khōlō, moo ba fumanang litokisetso tsohle li se li entsoe bakeng sa mokete oa bona oa lekunutu oa Paseka. Jesu o ne a lebelletse ketsahalo ena ka cheseho, joalokaha a re: “Ke lakalitse haholo ho ja Paseka ena le lōna, ke e-so ho utloe bohloko.”

Ho latela neano, ba kopanelang Pasekeng ba noa linoelo tse ’nè tsa veine. Ka mor’a hore a amohele senoelo seo ho totobetseng hore ke sa boraro, Jesu oa leboha ’me o re: “Se nkeng, le se sielane. Hobane ke re ho lōna: Ha ke sa tla hlola ke e-noa se behoang ke morara, ho tle ho be ho fihle ’muso oa Molimo.”

Neng-neng ha ho ntse ho jeoa lijo, Jesu oa phahama, o behella liaparo tsa hae ka thōko, o nka thaole, ’me o tšela metsi ka mokekeng. Ka tloaelo, motho ea amohelang baeti ke eena ea neng a tla hlokomela hore maoto a moeti a hlatsoitsoe. Empa kaha ketsahalong ena ha ho na motho ea amohelang baeti ea teng, Jesu o hlokomela tšebeletso ena ea botho. Ofe kapa ofe ho baapostola a ka be a inketse monyetla oa ho ho etsa; leha ho le joalo, kamoo ho bonahalang ka teng kaha ho ntse ho e-na le tsekisano e itseng har’a bona, ha ho lea mong ea ho etsang. Joale ba hlabjoa ke lihlong ha Jesu a qala ho ba hlatsoa maoto.

Ha Jesu a tla ho eena, Petrose oa hana: “U ke ke ua ba ua hlatsoa maoto a ka le ka mohla o le mong.”

Jesu o re: “Ekare, ha ke sa u hlatsoe, ha u na kabelo ho ’na.”

Petrose oa arabela: “Morena, a e se be maoto a ka feela, e be le ’ona matsoho le hlooho.”

Jesu oa arabela: “Ea seng a hlatsoitsoe ha a sa na ho hlatsuoa, ha e se maoto feela, ’me etlaba o se a hloekile kahohle. Lona le hloekile, empa e seng bohle.” O rialo hobane oa tseba hore Judase Iskariota o ntse a rera ho mo eka.

Ha Jesu a hlatsoitse maoto a bohle ba 12, ho akarelletsa le maoto a moeki oa hae, Judase, o apara liaparo tsa hae ’me o lula tafoleng hape. Joale oa botsa: “Hleka le utloisisa see ke le entseng sona na! Le mpitsa Moruti le Morena, ’me le bolela hantle, hobane ke eena. ’Me joale, ekare ha ’na, ke leng Morena le Moruti, ke hlatsoitse maoto a lōna, le lōna le tšoanetse ho hlatsoana maoto. Hobane ke le beetse mohlala, hore le etse joalo ka ha ke le entse. Ka ’nete-’nete ke re ho lōna: Mohlanka ha a moholo ho morena oa hae, le leng̀osa ha le leholo ho ea le romileng. Ekare ha le tseba taba tseo, le lehlohonolo ha le li etsa.”

Ke thuto e ntle hakaakang ea tšebeletso ea boikokobetso! Baapostola ha baa lokela ho batla sebaka sa pele, ba nahana hore ba bohlokoa haholo hoo ba bang ba lokelang ho ba sebeletsa ka mehla. Ba lokela ho latela mohlala o behiloeng ke Jesu. Ona hase oa ho hlatsoa maoto ka tloaelo e pheta-phetoang. Che, empa ke oa ho ikemisetsa ho sebeletsa ntle ho khethollo, ho sa tsotellehe hore na mosebetsi e ka ba o tlaase kapa o sa thabiseng hakae. Mattheu 26:20, 21; Mareka 14:17, 18; Luka 22:14-18; 7:44; Johanne 13:1-17.

◆ Ke eng e ikhethang ka ho talima ha Jesu Jerusalema ha a kena ho tla keteka Paseka?

◆ Nakong ea Paseka, ka ho totobetseng Jesu o fetisetsa senoelo sefe ho baapostola ba 12 ka mor’a hore a lebohe?

◆ Ha Jesu a ntse a le lefatšeng ka tloaelo ho ne ho fanoa ka tšebeletso efe ea botho ho baeti, hona ke hobane’ng ha e sa ka ea fanoa nakong ea Paseka e ketekoang ke Jesu le baapostola?

◆ Morero oa Jesu e ne e le ofe ha a etsa tšebeletso e tlaase ea ho hlatsoa baapostola ba hae maoto?