Na u Lokela ho Rapela Jesu?

BATHO ba bang ba nahana hore ho rapela Jesu ho loketse. Jeremane ba bangata ba ile ba rutoa esale bana hore pele ba e-ja ba lokela ho phutha matsoho a bona le ho leboha Jesu Kreste.

Ho ea ka Bibele, ka sebele Jesu o lutse boemong bo phahameng haholo leholimong. Leha ho le joalo, na seo se bolela hore re lokela ho mo rapela? Mohlomong u har’a bao, ka lebaka la ho rata Jesu, ba lebisang lithapelo ho eena, empa ke eng seo Jesu ka boeena a se nahanang ka lithapelo tse joalo?

Taba ea pele, ke hobane’ng ha ho phahamisoa lipotso tsena? Hobane Bibele e re Jehova Molimo ke “Ea utloang merapelo.” Kahoo, ha ho makatse, hore bahlanka ba Molimo ba mehleng ea boholo-holo, joaloka Baiseraele, ba ile ba rapela Jehova Molimo, ea Matla ’Ohle feela.—Pesaleme ea 5:1, 2; 65:2.

Na lintho li ile tsa fetoha ha Jesu, Mora oa Molimo, a e-tla lefatšeng ho tla lopolla moloko oa batho sebeng le lefung? Che, lithapelo li ne li ntse li lebisoa ho Jehova. Ha a le lefatšeng Jesu ka boeena o ile a rapela Ntate oa hae oa leholimo khafetsa, ’me o ile a ruta ba bang ho etsa ka ho tšoanang. Nahana feela ka thapelo ea mohlala, eo ka linako tse ling e bitsoang Thapelo ea Morena kapa ea Ntat’a Rōna, e leng e ’ngoe ea lithapelo tse tsebahalang haholo lefatšeng. Jesu ha aa ka a re ruta hore re mo rapele; o ile a re fa mohlala ona: “Ntat’a rōna ea maholimong, lebitso la hao le halaletsoe.”—Mattheu 6:6, 9; 26:39, 42, Bibele Phetolelo e Ncha.

Joale a re talimeng taba ena ka botlalo ka ho hlahloba seo thapelo e hlileng e leng sona.

Thapelo ke Eng?

Thapelo e ’ngoe le e ’ngoe ke mofuta oa borapeli. The World Book Encyclopedia e tiisa sena, ha e re: “Thapelo ke mofuta oa borapeli oo ho oona motho a ka fanang ka boinehelo, teboho, boipolelo, kapa thapeli ho Molimo.”

Ka nako e ’ngoe Jesu o ile a re: “Ho ngoliloe, ‘Jehova Molimo oa hao ke eena eo u tlamehang ho mo rapela, ’me ke ho eena a ’notši moo u tlamehang ho fana ka tšebeletso e halalelang.’” Jesu o ne a tšoarelletse ’neteng ea motheo ea hore borapeli—le lithapelo ka ho tšoanang—li lokela ho lebisoa ho Ntate oa hae a ’notši, Jehova Molimo.—Luka 4:8, NW; 6:12.

Ho Lumela Jesu Lithapelong tsa Rōna

Jesu o ile a shoa e le sehlabelo sa thekollo bakeng sa moloko oa batho, o ile a tsosoa ke Molimo, ’me o ile a phahamisetsoa boemong bo phahameng. Joalokaha e ka ’na eaba u ile ua nahana, sena sohle se ile sa tlisa phetoho mabapi le lithapelo tse amohelehang. Ka tsela efe?

Moapostola Pauluse o hlalosa tšusumetso e khōlō eo boemo ba Jesu bo nang le eona thapelong ka tsela e latelang: “Ke ka baka leo Molimo o mo phahamisitseng ka ho fetisa, ’me o mo neile lebitso le holim’a mabitso ’ohle; hore lebitsong [ka lebitso, NW] la Jesu, mangole ’ohle a ba maholimong, le lefatšeng, le ka tlaase ho lefatše, a khumame; ’me maleme ’ohle a bolele hore Jesu Kreste ke Morena, e be tlotliso ea Molimo Ntate.”—Ba-Filippi 2:9-11.

Na mantsoe ‘ka lebitso la Jesu, mangole ’ohle . . . a khumame’ a bolela hore re lokela ho mo rapela? Che. Poleloana ea Segerike e sebelisitsoeng mona “e bolela lebitso leo ka lona ba khumamang, ba bang bonngoeng kateng, leo ho lona bohle (πᾶν γόνυ) ba rapelang ba kopanang. Lebitso leo Jesu a le amohetseng le susumelletsa bohle borapeling bo kopaneng.” (A Grammar of the Idiom of the New Testament, ea G. B. Winer) Ka sebele, hore thapelo e be e amohelehang, e tlameha ho hlahisoa ‘ka lebitso la Jesu,’ empa leha ho le joalo, e lebisoa ho Jehova Molimo ’me e sebeletsa ho mo tlotlisa. Ka lebaka lena, Pauluse o re: “Nthong tsohle seo le se batlang, le ke le se tsebise Molimo ka thapelo le ka kōpo e nang le teboho.” (Mongolo o tšekaletseng ke oa rōna.)—Ba-Filippi 4:6.

Joalokaha tselana e lebisa pakaneng e itseng, ka ho tšoanang Jesu ke “tsela” e lebisang ho Molimo ea Matla ’Ohle. Jesu o ile a ruta baapostola ba hae: “Ke ’na tsela, le ’nete, le bophelo; ha ho motho ea ka tlang ho Ntate, ha e se ka ’na.” (Johanne 14:6) Kahoo, re lokela ho hlahisa lithapelo tsa rōna ho Molimo ka Jesu eseng hore re li tobise ho Jesu ka boeena.a

Ba bang ba ka ’na ba botsa: ‘Empa na Bibele ha e tlalehe hore ka bobeli morutuoa Setefane le moapostola Johanne ba ile ba bua le Jesu a le leholimong?’ Seo ke ’nete. Leha ho le joalo, liketsahalo tsena li ne li sa amane le lithapelo, kaha e mong le e mong ho Setefane le Johanne o ile a bona Jesu ponong ’me a bua le eena ka ho toba. (Liketso 7:56, 59; Tšenolo 1:17-19; 22:20) Hopola hore taba ea ho bua esita le Molimo feela ka boeona ha e bolele thapelo. Adama le Eva ba ile ba bua le Molimo, ba fana ka phephi ka lebaka la sebe sa bona se seholo, ha A ba ahlola ka mor’a sebe sa bona Edene. Ho bua ha bona le eena ka tsela eo e ne e se thapelo. (Genese 3:8-19) Kahoo, e ne e tla ba ho fosahetseng hore re bolele ho bua ha Setefane le ha Johanne le Jesu e le bopaki ba hore e hlile re lokela ho mo rapela.

Ke Joang ho ‘Bitsoang’ Lebitso la Jesu?

Na u na le lipelaelo tse u hoaea-hoaeang, u sa ntse u ho nahana e le ho loketseng ho rapela Jesu? Mosali e mong o ile a ngolla ofisi ea lekala la Mokhatlo oa Watch Tower: “Ka bomalimabe, ke ntse ke e-s’o kholisehe hore Bakreste ba pele ba ne ba sa rapele Jesu.” Mohopolong oa hae o ne a e-na le mantsoe a Pauluse a ho 1 Ba-Korinthe 1:2 (NW), moo a ileng a bolela ka “bohle kae kapa kae ba bitsang lebitso la Morena oa rōna, Jesu Kreste.” Leha ho le joalo, motho o lokela ho hlokomela, hore puong ea pele, polelo ‘ho bitsa’ e ka bolela lintho tse ling ntle ho thapelo.

Ke joang ho neng ho ‘bitsoa’ lebitso la Kreste hohle? Tsela e ’ngoe e ne e le hore balateli ba Jesu oa Nazaretha ba ile ba lumela phatlalatsa hore ke Messia le “’Moloki oa lefatše,” le ho etsa mehlolo e mengata ka lebitso la hae. (1 Johanne 4:14; Liketso 3:6; 19:5) Ka hona, The Interpreter’s Bible e bolela hore poleloana “ho bitsa lebitso la Morena oa rōna . . . ho bolela ho lumela borena ba hae ho e-na le ho mo rapela.”

Ho amohela Kreste le ho bontša tumelo maling a hae a tšolotsoeng, e leng a etsang hore tšoarelo ea libe e khonehe, ho boetse ho bōpa karolo ea ‘ho bitsa lebitso la Morena oa rōna Jesu Kreste.’ (Bapisa Liketso 10:43, NW le 22:16, NW.) ’Me re bitsa lebitso la Jesu ka ho toba neng le neng ha re rapela Molimo ka eena. Kahoo, ha e bontša hore re ka bitsa lebitso la Jesu, Bibele ha e bontše hore re lokela ho mo rapela.—Ba-Efese 5:20; Ba-Kolosse 3:17.

Seo Jesu a ka re Etsetsang Sona

Jesu o ile a tšepisa balateli ba hae ka ho hlaka: “Ekare ha le kōpa ntho ka lebitso la ka, ke tla e etsa.” Na see se hloka hore re mo rapele? Che. Kōpo e lebisoa ho Jehova Molimo—empa e le ka lebitso la Jesu. (Johanne 14:13, 14; 15:16) Re etsa thapeli ho Molimo ea hore Mora oa Hae, Jesu, a sebelise matla a hae a maholo le bolaoli molemong oa rōna.

Jesu o buisana le balateli ba hae ba ’nete joang kajeno? Tlhaloso ea Pauluse ka phutheho ea Bakreste ba tlotsitsoeng e ka ’na ea sebetsa e le mohlala. O ile a e bapisa le ’mele, ’me Jesu Kreste e le hlooho. “Hlooho” e fepela litho tse ling tsa ’mele oa moea ka litlhoko tsa tsona ka tsela ea “manonyeletso le mesifa,” kapa ka mokhoa le litokisetso tsa ho fepela phutheho ea hae ka lijo tsa moea le tataiso. (Ba-Kolosse 2:19, BPN) Ka tsela e tšoanang, mehleng ena Jesu o sebelisa “limpho tsa banna” kapa banna ba tšoanelehang moeeng, ho etella pele ka phuthehong, esita le ho sebelisa khalemelo haeba e hlokahala. Ha ho na tokisetso bakeng sa litho tsa phutheho hore li buisane ka ho toba le Jesu kapa hore li mo rapele, empa ka sebele li ea lokela—e, li ea tlameha—hore li rapele Ntate oa Jesu, Jehova Molimo.—Ba-Efese 4:8-12.

U Hlompha Jesu Joang?

Ke karolo ea bohlokoa hakaakang eo Jesu a e phethang, mabapi le polokeho ea batho! Moapostola Petrose o ile a bolela: “Ha ho poloko ho e mong; hobane ha ho lebitso le leng tlas’a leholimo, leo batho ba le neiloeng, leo re ka bolokehang ka lona.” (Liketso 4:12) Na u hlokomela bohlokoa ba lebitso la Jesu?

Ka ho se lebise lithapelo ho Jesu ka boeena, ha re nyenyefatse boemo ba hae. Ho e-na le hoo, Jesu o tlotlisoa ke ha re rapela ka lebitso la hae. ’Me joalokaha bana ba hlompha batsoali ba bona ka ho ba utloa, re hlompha Jesu Kreste ka ho mamela litaelo tsa hae, haholo-holo molao o mocha oa ho ratana.—Johanne 5:23; 13:34.

Lithapelo tse Amohelehang

Na u lakatsa ho etsa lithapelo tse amohelehang? Kahoo, li tobise ho Jehova Molimo, ’me u etse joalo ka lebitso la Mora oa hae, Jesu. Tseba thato ea Molimo, ’me u etse hore lithapelo tsa hao li bontše kutloisiso eo. (1 Johanne 3:21, 22; 5:14) Fumana matla mantsoeng a Pesaleme ea 66:20: “Molimo a o ke o bokoe kamoo o sa kang oa lahla thapelo ea ka kateng, o sa kang oa ntima mohau oa oona.”

Joalokaha re bone, lithapelo ke mofuta oa borapeli oo e leng oa Molimo ea Matla ’Ohle a ’notši. Ka ho lebisa lithapelo tsohle tsa rōna ho Jehova Molimo, re bontša hore re etse hloko tataiso ea Jesu ea ho rapela: “Ntat’a rōna ea maholimong.”—Mattheu 6:9.

[Mongolo o botlaaseng ba leqephe]