Ke Mang ea Tla re Arohanya le Lerato la Molimo?
“Ha e le rōna, rea rata, hobane o ile a re rata pele.”—1 JOHANNE 4:19.
1, 2. (a) Ke hobane’ng ha ho le bohlokoa ho rōna ho tseba hore rea ratoa? (b) Ke mang eo re hlokang lerato la hae ho feta bohle?
HO TSEBA hore ua ratoa ho bohlokoa hakae ho uena? Ho tloha ha batho e le masea ho fihlela e le batho ba baholo, baa thaba ha ba bontšoa lerato. Na u kile ua bona lesea le sikiloeng ka lerato ke ’m’a lona? Hangata, ho sa tsotellehe se etsahalang haufi le lona, ha lesea le sheba ka har’a mahlo a ’m’a lona a tletseng pososelo, le ikutloa le phutholohile, le e-na le khotso ha le sikiloe ke ’mè ea le ratang. Kapa na u sa hopola hore na u ne u le joang ha u le lilemong tsa bocha, e leng lilemo tseo ka linako tse ling e bang lilemo tsa pherekano? (1 Bathesalonika 2:7) Ho ka etsahala hore ka linako tse ling u ne u sa tsebe seo u se batlang kapa u bile u sa utloisise kamoo u ikutloang kateng, leha ho le joalo ho bile bohlokoa hakaakang ho tseba hore ntat’ao le ’m’ao baa u rata! Na ha hoa ka ha thusa ho tseba hore u ka ba atamela ka bothata leha e le bofe kapa potso leha e le efe? Ka sebele, bophelong, e ’ngoe ea lintho tseo re li hlokang ka ho fetisisa ke ho tseba hore rea ratoa. Lerato le joalo le re kholisa hore re ba bohlokoa.
2 Ka sebele lerato la batsoali le nang le mamello le phetha karolo ea bohlokoa khōlong e loketseng le teka-tekanong. Leha ho le joalo, ho kholiseha hore Ntate oa rōna oa leholimo, Jehova, oa re rata ke habohlokoa ka ho fetisisa bakeng sa hore re atlehe moeeng le maikutlong. Ho ka etsahala hore babali ba bang ba makasine ena ha baa ka ba e-ba le batsoali ba ileng ba ba hlokomela hantle. Haeba u e mong oa bona, u se ke ua nyahama. Esita le haeba lerato la botsoali le ne le le sieo kapa le sa lekana, lerato le tšepahalang la Molimo le le nkela sebaka.
3. Jehova o kholisitse sechaba sa hae ka lerato la hae ho sona joang?
3 Ka moprofeta oa hae Esaia, Jehova o ile a bontša hore ’mè a ka “lebala” lesea la hae le anyang, empa eena o ne a ke ke a lebala sechaba sa hae. (Esaia 49:15) Ka ho tšoanang, ka kholiseho Davida o ile a re: “Haeba Ntate le ’Mè ba ne ba ka ntlohela, Jehova o ne a tla nthola.” (Pesaleme ea 27:10) Ho kholisa hakaakang! Ho sa tsotellehe maemo ao u leng ho ’ona, haeba u inehetse ho Jehova Molimo, kamehla u lokela ho hopola hore lerato leo a u ratang ka lona le feta la motho leha e le ofe!
Ipoloke Leratong la Molimo
4. Bakreste ba lekholong la pele la lilemo ba ile ba tiisetsoa lerato la Molimo joang?
4 U qalile ho tseba lerato la Jehova neng? Mohlomong phihlelo ea hao e batlile e tšoana le ea Bakreste ba lekholong la pele la lilemo. Khaolo ea 5 ea lengolo la Pauluse ho Baroma e hlalosa ka bokhabane kamoo baetsalibe, ba kileng ba arohanngoa le Molimo, ba ileng ba tseba lerato la Jehova kateng. Temaneng ea 5, rea bala: “Lerato la Molimo le tšolletsoe ka lipelong tsa rōna ka moea o halalelang, oo re ileng ra o fuoa.” Temaneng ea 8, Pauluse oa eketsa: “Molimo o buella lerato la hae ho rōna ka hore, ha re sa ntse re le baetsalibe, Kreste o ile a re shoela.”
5. Ho tlile joang hore u ananele boholo ba lerato la Molimo?
5 Ka tsela e tšoanang, ha u ne u bolelloa ’nete ea Lentsoe la Molimo ’me u qala ho bontša tumelo, moea o halalelang oa Jehova o ile oa qala ho sebetsa ka pelong ea hao. Ka tsela ena u ile ua qala ho ananela boholo ba seo Jehova a se entseng ka ho romela Mora oa hae ea ratoang hore a u shoele. Kahoo Jehova o ile a u thusa hore u elelloe kamoo a hlileng a ratang batho kateng. Ha u lemoha hore le hoja u tsoetsoe u le moetsalibe ea arohantsoeng le eena, Jehova o ne a buletse batho tsela ea hore ho boleloe hore ba lokile ’me ba e-na le monyetla oa ho phela ka ho sa feleng, na seo ha sea ka sa ama pelo ea hao? Na ha ua ka ua ikutloa u rata Jehova?—Baroma 5:10.
6. Ke hobane’ng ha ka linako tse ling re ka ikutloa eka re hōle le Jehova?
6 Kahobane u hutsoe ke lerato la Ntate oa hao oa leholimo ’me u fetotse bophelo ba hao hore bo amohelehe ho eena, u ile ua nehela bophelo ba hao ho Molimo. Hona joale u thabela ho ba le khotso le Molimo. Leha ho le joalo, na ka linako tse ling u ikutloa eka u hōle le Jehova? Sena se ka re etsahalla bohle. Empa kamehla u hopole hore Molimo ha a fetohe. Lerato la hae ha le fele ebile ha le fetohe joaloka letsatsi, leo ho seng mohla le khaotsang ho chabisa mahlaseli a lona a mofuthu lefatšeng. (Malakia 3:6; Jakobo 1:17) Ka lehlakoreng le leng, re ka fetoha—le haeba ke ka nakoana. Ha lefatše le ntse le potoloha, halofo ea polanete ena e koaheloa ke botšo. Ka ho tšoanang, haeba re furalla Molimo, le haeba ke hanyenyane, re ka ’na ra hlokomela hore kamano ea rōna le eena ha e sa le matla. Re ka etsa eng ho lokisa boemo boo?
7. Ho itlhahloba ho ka re thusa joang hore re lule leratong la Molimo?
7 Haeba re lemoha hore re arohile leratong la Molimo ka tsela e itseng, re lokela ho ipotsa: ‘Na ke bontša ho haelloa ke kananelo bakeng sa lerato la Molimo? Na ka tsela e itseng ke furaletse Molimo ea phelang le ea lerato, ’me ke bontšitse ka litsela tse sa tšoaneng hore tumelo ea ka ea fokola? Na ke behile kelello ea ka “linthong tsa nama,” ho e-na le “linthong tsa moea”?’ (Baroma 8:5-8; Baheberu 3:12) Haeba re ikarotse ho Jehova, re ka nka mehato ea ho lokisa litaba, hore re khutlele kamanong e haufi, le e mofuthu le eena. Jakobo oa re phehella: “Atamelang ho Molimo, ’me o tla atamela ho lōna.” (Jakobo 4:8) Ela hloko mantsoe a Juda: “Baratuoa, ka ho ikaha tumelong ea lōna e halalelang ka ho fetisisa, le ho rapela ka moea o halalelang, le ipoloke leratong la Molimo.”—Juda 20, 21.
Ho Fetoha ha Maemo ha ho Ame Lerato la Molimo
8. Ke liphetoho life tse ka hlahang ka tšohanyetso bophelong ba rōna?
8 Ho na le lintho tse ngata tse ka fetolang bophelo ba rōna tsamaisong ena ea lintho. Morena Solomone o ile a hlokomela hore “bohle [re] hlaheloa ke nako le ketsahalo e sa lebelloang.” (Moeklesia 9:11) Ka ho panya ha leihlo feela bophelo ba rōna bo ka fetoha ka ho feletseng. Kajeno re ikutloa re phela hantle, hosane re ka ’na ra ikutloa re kula haholo. Kajeno re ea mosebetsing oa boipheliso o bonahalang o tsitsitse, hosane re feletsoe ke mosebetsi. Motho eo u mo ratang a ka shoa ka tšohanyetso. Naheng e ’ngoe Bakreste ba ka ba khotsong ka nakoana, eaba ka tšohanyetso ho qaleha mahloriso a mabifi. Mohlomong re qosoa ka bohata, ’me ka lebaka leo re bontšoa leeme. E, bophelo ha boa tsitsa kapa hona ho sireletseha ka ho feletseng.—Jakobo 4:13-15.
9. Ke hobane’ng ha ho ka ba molemo ho hlahloba karolo ea Baroma khaolo ea 8?
9 Ha re hlaheloa ke lintho tse bohloko, re ka ’na ra qala ho ikutloa eka ha re na mang-oee, mohlomong re bile re nahana hore Molimo o fokolitse lerato la hae ho rōna. Kaha bohle re ka etsahalloa ke lintho tse joalo, re tla be re etsa hantle ha re nahana ka hloko mantsoe a tšelisang haholo a moapostola Pauluse a tlalehiloeng ho Baroma khaolo ea 8. Mantsoe ana a ne a ngoletsoe Bakreste ba tlotsitsoeng ka moea. Leha ho le joalo, linthong tsa motheo a boetse a sebetsa ho ba linku tse ling, bao ho boletsoeng hore ba lokile e le metsoalle ea Molimo, joaloka Abrahama oa mehleng ea pele ho Bokreste.—Baroma 4:20-22; Jakobo 2:21-23.
10, 11. (a) Ka linako tse ling lira li qosa batho ba Molimo ka eng? (b) Ke hobane’ng ha liqoso tse joalo li sa tšoenye Bakreste hakaalo?
10 Bala Baroma 8:31-34. Pauluse oa botsa: “Haeba Molimo a eme le rōna, ke mang ea tla ba khahlanong le rōna?” Ke ’nete hore Satane le lefatše la hae le khopo ba khahlanong le rōna. Lira li ka ’na tsa re qosa ka bohata, esita le makhotleng a naha. Batsoali ba bang ba Bakreste ba ’nile ba qosoa ka hore ba hloile bana ba bona kahobane ba hanne ha ba phekoloa ka mekhoa e tlōlang molao oa Molimo kapa ka ho ba hanela ho kopanela meketeng ea bohetene. (Liketso 15:28, 29; 2 Bakorinthe 6:14-16) Bakreste ba bang ba tšepahalang ba qositsoe ka bohata hore ba hlohlelletsa bofetoheli kahobane ba ke ke ba bolaea batho ba bang ntoeng kapa ba kena lipolotiking. (Johanne 17:16) Bahanyetsi ba bang ba jetse mashano a senyang Lipaki tsa Jehova lebitso mecheng ea litaba, esita le ho li qosa ka bohata hore ke sehlopha se kotsi sa bokhelohi.
11 Empa u se ke ua lebala hore mehleng ea baapostola, ho ne ho thoe: “Mabapi le lequloana lena rea tseba hore hohle ho buuoa hampe ka lona.” (Liketso 28:22) Liqoso tsa bohata li re tšoenya ka eng? Ke Molimo ea bolelang hore Bakreste ba ’nete ba lokile, motheong oa tumelo ea bona sehlabelong sa Kreste. Ke hobane’ng ha Jehova a ka khaotsa ho rata barapeli ba hae ka mor’a ho ba fa mpho ea bohlokoa ka ho fetisisa—e leng Mora oa hae ea ratoang? (1 Johanne 4:10) Kaha joale Kreste o tsositsoe bafung ’me o behiloe letsohong le letona la Molimo, ke moemeli ea mafolofolo oa Bakreste. Ke mang eo ka nepo a ka hanyetsang ha Kreste a emela balateli ba hae kapa eo ka katleho a ka belaellang ha Molimo a re bahlanka ba hae ba tšepahalang ke ba bohlokoa? Ha a eo!—Esaia 50:8, 9; Baheberu 4:15, 16.
12, 13. (a) Ke maemo afe kapa liketsahalo life tse ke keng tsa re arohanya le lerato la Molimo? (b) Sepheo sa Diabolose ke sefe ha a re bakela mathata? (c) Ke hobane’ng ha Bakreste ba hlōla ka ho feletseng?
12 Bala Baroma 8:35-37. Ntle le rōna ka borōna, na ho na le motho e mong kapa ntho e ’ngoe e ka re arohanyang le lerato la Jehova le Mora oa hae, Kreste Jesu? Satane a ka ’na a sebelisa mahlahana a hae a lefatšeng ho bakela Bakreste likhathatso tse ngata. Lekholong le fetileng la lilemo, bara le barali babo rōna ba bangata ba Bakreste ba ’nile ba hlorisoa ka mabifi linaheng tse ngata. Libakeng tse ling kajeno, letsatsi le leng le le leng barab’abo rōna ba tobana le mathata a moruo. Ba bang baa lapa kapa ba hlobotse. Diabolose o baka maemo aa a thata ka sepheo sefe? Bonyane, sepheo se seng sa hae ke ho thibela borapeli ba ’nete ba Jehova. Satane o batla hore re lumele hore lerato la Molimo le tapile. Leha ho le joalo, na ke ’nete?
13 Joaloka Pauluse ea ileng a qotsa Pesaleme ea 44:22, re ithutile Lentsoe la Molimo le ngotsoeng. Rea utloisisa hore rōna “linku” tsa Molimo, re hlaheloa ke lintho tsena ka lebaka la lebitso la hae. Ho ameha ho halaletsa lebitso la Molimo le ho tlosa qoso bobusing ba hae ba bokahohleng. Molimo o lumelletse liteko ka lebaka la litseko tsena tsa bohlokoa, eseng hobane a se a sa re rate. Ho sa tsotellehe hore na maemo a bakang matšoenyeho e ka ba afe, re tiisetsoa hore lerato la Molimo bakeng sa batho ba hae, ho kopanyelletsa le e mong le e mong oa rōna, ha lea fetoha. Ntho leha e le efe eo re ka e mamellang e bonahalang e le ho hlōloa, e tla fetoha ho hlōla haeba re boloka botšepehi. Re matlafatsoa le ho tiisoa ke ho kholiseha hore lerato la Molimo ha le fele.
14. Ke hobane’ng ha Pauluse a ne a kholisehile ka lerato la Molimo ho sa tsotellehe mathata ao Bakreste ba ka tobanang le ’ona?
14 Bala Baroma 8:38, 39. Ke eng e ileng ea kholisa Pauluse hore ha ho letho le ka arohanyang Bakreste le lerato la Molimo? Ha ho pelaelo hore lintho tse ileng tsa hlahela Pauluse ha a ntse a le tšebeletsong li ile tsa tiisa kholiseho ea hae hore mathata a ke ke a ama lerato la Molimo ho rōna. (2 Bakorinthe 11:23-27; Bafilipi 4:13) Hape, Pauluse o ne a tseba morero oa Jehova oa ka ho sa feleng le kamoo a ileng a sebelisana kateng le sechaba sa Hae nakong e fetileng. Na lefu le ka hlōla lerato la Molimo ho ba mo sebelelitseng ka botšepehi? Le ke ke! Ba joalo ba tšepahalang ba shoang, ba tla lula ba phela khopolong ea Molimo e phethahetseng, ’me o tla ba tsosa ka nako e loketseng.—Luka 20:37, 38; 1 Bakorinthe 15:22-26.
15, 16. Pheta tse ling tsa lintho tseo le ka mohla li ke keng tsa etsa hore Molimo a khaotse ho rata bahlanka ba hae ba tšepahalang.
15 Ho sa tsotellehe hore na kajeno bophelo bo ka re tlisetsa litsietsi life—ebang ke kotsi e fokolisang, boloetse bo bolaeang kapa bofutsana—ha ho letho le ka felisang lerato la Molimo ho batho ba hae. Mangeloi a matla, a kang lengeloi le sa mameleng le ileng la fetoha Satane, a ke ke a susumetsa Jehova hore a khaotse ho rata bahlanka ba hae ba inehetseng. (Jobo 2:3) Mebuso e ka thibela bahlanka ba Molimo, ea ba kenya chankaneng, ea ba tšoara hampe ’me ea ba bitsa “melahloa.” (1 Bakorinthe 4:13) Ho hlouoa ke lichaba joalo ntle ho mabaka ho ka susumetsa batho hore ba re fetohele, empa ha ho susumetse ’Musi oa bokahohle hore a re lahle.
16 Joaloka Bakreste, ha ho hlokahale hore re tšohe hore ntho leha e le efe ea tseo Pauluse a reng ke “lintho tse teng hona joale”—e leng liketsahalo le maemo a tsamaiso ena ea lintho—kapa “lintho tse tlang ho tla” nakong e tlang li ka senya kamano ea Molimo le sechaba sa hae. Le hoja makhotla a lefatše le a leholimo a re loantša, lerato la Molimo le tšepahalang le teng ho re matlafatsa. “Bophahamo kapa botebo” li ke ke tsa thibela lerato la Molimo joalokaha Pauluse a hatisitse. E, ha ho letho le ka ’nang la re nyahamisa, kapa la leka ho re susumetsa, le ka re arohanyang le lerato la Molimo; ebile ha ho pōpo e ka senyang kamano ea ’Mōpi le bahlanka ba hae ba tšepahalang. Ha ho mohla lerato la Molimo le felang; le teng ka ho sa feleng.—1 Bakorinthe 13:8.
U se ke Ua Khaotsa ho Ananela Mosa oa Molimo o Lerato
17. (a) Ke hobane’ng ha ho ratoa ke Molimo ho le “molemo ho feta bophelo”? (b) Re bontša joang hore re ananela mosa oa Molimo o lerato?
17 Lerato la Molimo ke la bohlokoa hakae ho uena? Na u ikutloa joaloka Davida, ea ileng a ngola: “Kahobane mosa oa hao o lerato o molemo ho feta bophelo, molomo oa ka o tla u babatsa. Ka hona ke tla u boka ha ke sa ntse ke phela; ke tla phahamisa liatla tsa ka ka lebitso la hao”? (Pesaleme ea 63:3, 4) Na ruri ho na le ntho e molemo eo bophelo lefatšeng lee bo ka re fang eona e fetang ho thabela ho ratoa ke Molimo le ho thabela botsoalle ba hae bo tšepahalang? Ka mohlala, na ho phehella mosebetsi oa boipheliso o nang le chelete e ngata ho molemo ho feta ho ba le khotso ea kelello le thabo e tlisoang ke ho ba le kamano e haufi le Molimo? (Luka 12:15) Bakreste ba bang ba ile ba lokela ho khetha pakeng tsa ho latola Jehova kapa ho bolaoa. Sena se ile sa etsahalla Lipaki tsa Jehova tse ngata likampong tsa mahloriso tsa Nazi Ntoeng ea II ea Lefatše. Ntle ho mekhelo e seng mekae, barab’abo rōna ba Bakreste ba ile ba khetha ho lula leratong la Molimo, ba ikemisetsa ho tobana le lefu haeba ho hlokahala. Bao ka botšepehi ba lulang leratong la hae ba ka kholiseha hore Molimo o tla ba fa bokamoso bo sa feleng, e leng ntho eo lefatše le ke keng la re fa eona. (Mareka 8:34-36) Empa ho ameha se fetang bophelo bo sa feleng.
18. Ke hobane’ng ha bophelo bo sa feleng bo lakatseha hakaale?
18 Le hoja ho ke ke ha etsahala hore re phele ka ho sa feleng ntle ho Jehova, leka ho nahana kamoo ho phela ka nako e telele haholo ntle ho ’Mōpi ho ka bang kateng. E ka ba bophelo ba lefeela, bo hlokang morero oa sebele. Jehova o file batho ba hae mosebetsi o khotsofatsang matsatsing ana a ho qetela. Kahoo re ka lebella hore ha Jehova, Moreri e Moholo a fana ka bophelo bo sa feleng, bo tla tlala lintho tse thahasellisang, tsa bohlokoa tseo re ka ithutang tsona le tseo re ka li etsang. (Moeklesia 3:11) Ho sa tsotellehe hore na re tla ithuta hakae lilemong tse tlang tse likete, ha ho mohla re tla utloisisa ka ho feletseng “botebo ba maruo le bohlale le tsebo ea Molimo.”—Baroma 11:33.
Ntate oa U Rata
19. Jesu Kreste o ile a siea barutuoa ba hae ka kholiseho efe?
19 Ka la 14 Nisane, 33 C.E., shoalaneng ea ho qetela a e-na le baapostola ba hae ba tšepahalang ba 11, Jesu o ile a bua lintho tse ngata e le ho ba matlafaletsa se larileng ka pele. Kaofela ba ne ba ile ba khomarela Jesu litekong tsa hae, ’me ba ne ba tseba hore oa ba rata. (Luka 22:28, 30; Johanne 1:16; 13:1) Joale Jesu o ile a ba tiisetsa: “Ntate oa le rata.” (Johanne 16:27) E tlameha ebe mantsoe ao a ile a thusa barutuoa hakaakang hore ba lemohe maikutlo a bonolo ao Ntate oa bona oa leholimo a nang le ’ona ka bona!
20. U ikemiselitse ho etsa eng, hona u ka kholiseha ka eng?
20 Ba bangata ba ntseng ba phela kajeno ba sebelelitse Jehova ka botšepehi ka lilemo tse mashome. Ntle ho pelaelo, pele ho bofelo ba tsamaiso ena e khopo ea lintho, re tla tobana le liteko tse ling tse ngata. Le ka mohla u se ke ua lumella liteko tse joalo kapa matšoenyeho hore li etse hore u belaelle lerato la Molimo le tšepahalang ho uena. Ho hlakile: Jehova oa u rata. (Jakobo 5:11) E se eka e mong le e mong oa rōna a ka tsoela pele a phetha karolo ea hae, a boloka litaelo tsa Molimo ka botšepehi. (Johanne 15:8-10) E se eka re ka sebelisa monyetla o mong le o mong ho rorisa lebitso la hae. Re lokela ho matlafatsa boikemisetso ba rōna ba ho tsoela pele re atamela haufi le Jehova ka thapelo le ho ithuta Lentsoe la hae. Ho sa tsotellehe se ka ’nang sa etsahala hosane, haeba re etsa sohle seo re ka se khonang ho thabisa Jehova, re tla lula re e-na le khotso, re kholisehile ka botlalo ka lerato la hae le sa feleng.—2 Petrose 3:14.
U ka Arabela Joang?
•Hore re lule re e-na le teka-tekano moeeng le maikutlong, re hloka lerato la mang ka ho khetheha?
•Ke lintho life tseo ho seng mohla li tla etsa hore Jehova a khaotse ho rata bahlanka ba hae?
•Ke hobane’ng ha ho ratoa ke Jehova ho le “molemo ho feta bophelo”?
[Litšoantšo tse leqepheng la 13]
Haeba re ikutloa eka re arohile leratong la Molimo, re ka sebeletsa ho lokisa litaba
[Setšoantšo se leqepheng la 15]
Pauluse o ile a utloisisa lebaka leo a neng a hlorisoa ka lona