Ho Thusa Batho Hore ba Atamele Haufi le Jehova

“Ha ho le ea mong ea tlang ho Ntate haese ka ’na.”—JOHANNE 14:6.

 1. Jesu ea tsositsoeng o ile a fana ka taelo efe ho barutuoa ba hae, ’me phello e bile efe ha Lipaki tsa Jehova li mamela taelo eo?

JESU KRESTE o ile a laela balateli ba hae hore ba ‘etse batho ba lichaba tsohle barutuoa, ba ba kolobetse ka lebitso la Ntate le la Mora le la moea o halalelang.’ (Matheu 28:19) Lilemong tse leshome tse fetileng, Lipaki tsa Jehova li thusitse batho ba fetang limilione tse tharo hore ba tle ho Molimo, ka nako e loketseng li ba kolobetsa e le pontšo ea boinehelo ba bona ba ho etsa thato ea hae. Re thaba hakaakang hore ebe re ba thusa hore ba atamele haufi le Molimo!—Jakobo 4:8.

 2. Le hoja ho kolobetsoa ba bangata, ho ’nile ha etsahala eng?

² Leha ho le joalo, linaheng tse ling moo barutuoa ba bangata ba bacha ba kolobelitsoeng teng, ha hoa ba le keketseho e lumellanang ea palo ea bahoeletsi ba ’Muso. Ke ’nete hore ho lokela hore ho nahaneloe ba shoeleng, ka karolelano ea 1 lekholong ea batho ba shoang selemo le selemo. Leha ho le joalo, lilemong tse seng kae tse fetileng, ba bangata ba khelohile ka mabaka a itseng. Hobane’ng? Sehlooho sena le se latelang li tla hlahloba hore na batho ba huleloa haufi le Jehova joang, le mabaka a etsang hore ba bang ba khelohe.

Morero oa ho Bolela ha Rōna

 3. (a) Thōmo e fuoeng barutuoa ba Jesu e lumellana joang le ea lengeloi le boletsoeng ho Tšenolo 14:6? (b) Ke tsela efe e ipakileng e le e atlehang ea ho tsosa thahasello ea batho molaetseng oa ’Muso, empa bothata bo teng ke bofe?

³ “Nakong [ena] ea bofelo,” barutuoa ba Jesu ba ronngoe hore ba bolele “tsebo ea ’nete” mabapi le “litaba tsena tse molemo tsa ’muso.” (Daniele 12:4, NW; Matheu 24:14) Thōmo ea bona e lumellana le ea lengeloi le neng “le e-na le litaba tse molemo tse sa feleng ho li bolela e le litaba tse nyakallisang ho ba lulang lefatšeng, le ho sechaba se seng le se seng le moloko o mong le o mong le leleme le leng le le leng le sehlopha se seng le se seng sa batho.” (Tšenolo 14:6) Lefatšeng lena le amehileng haholo ka litaba tsa lona, ka kakaretso tsela e atlehang ka ho fetisisa ea ho etsa hore batho ba be le thahasello ’Musong oa Molimo le ho ba thusa hore ba atamele haufi le Jehova ke ka ho ba bolella ka tšepo ea bophelo bo sa feleng paradeiseng lefatšeng. Le hoja sena se utloahala, ba kopanelang le batho ba Molimo hobane feela ba batla ho kena Paradeising ha baa tsepamisa maoto a bona tseleng e patisaneng e isang bophelong.—Matheu 7:13, 14.

 4. Ho latela Jesu le lengeloi le fofang sebakeng, morero oa mosebetsi oa rōna oa ho bolela ke ofe?

⁴ Jesu o ile a re: “Sena se bolela bophelo bo sa feleng, ho tsoela pele ba ithuisa tsebo ka uena, Molimo eo e leng eena feela oa ’nete, le ka eo u mo romileng, Jesu Kreste.” (Johanne 17:3) Lengeloi le fofang sebakeng le phatlalatsa “litaba tse molemo tse sa feleng,” ’me le bolella ba lulang lefatšeng: “Tšabang Molimo ’me le mo tlotlise, hobane hora ea ho ahlola ha hae e fihlile, ’me kahoo le rapele Ea entseng leholimo le lefatše le leoatle le liliba tsa metsi.” (Tšenolo 14:7) Ka hona, morero o ka sehloohong oa ho bolela ha rōna litaba tse molemo ke ho thusa batho hore ba atamele haufi le Jehova ka Jesu Kreste.

Karolo eo re e Phethang Mosebetsing oa Jehova

 5. Ke lipolelo life tsa Pauluse le tsa Jesu tse bontšang hore re etsa mosebetsi oa Jehova, eseng oa rōna?

⁵ Ha moapostola Pauluse a ngolla Bakreste-’moho le eena ba tlotsitsoeng, o bua ka “bosebeletsi ba poelano” ’me o re Molimo o boelanya batho le eena mothehong oa sehlabelo sa thekollo sa Jesu Kreste. Pauluse o re ho “joalokaha eka Molimo o ne a etsa kōpo e tiileng ka rōna,” le hore “re le baemeli ba Kreste rea kōpa: ‘Boelanang le Molimo.’” Ke khopolo e thobang pelo hakaakang! Ebang re “manģosa a emeng bakeng sa Kreste” kapa re baemeli ba nang le tšepo ea lefatšeng, le ka mohla ha rea lokela ho lebala hore mosebetsi ona ke oa Jehova, hase oa rōna. (2 Bakorinthe 5:18-20) Ha e le hantle ke Molimo ea hulang batho le ho ruta ba tlang ho Kreste. Jesu o itse: “Ha ho motho ea ka tlang ho ’na ntle leha Ntate, ea nthomileng, a mo hula; ’me ka sebele ke tla mo tsosa ka letsatsi la ho qetela. Ho ngoliloe Baprofeteng, ‘’Me kaofela ba tla rutoa ke Jehova.’ E mong le e mong ea utloileng ho Ntate le ea ithutileng o tla ho ’na.”—Johanne 6:44, 45.

 6. Ke ka tsela efe Jehova a sisinyang lichaba e le selelekela, ’me ka nako e tšoanang, ke bo-mang ba fumanang tšireletso ka ‘tlung’ ea hae ea borapeli?

⁶ Jehova o hula batho le ho ba bulela “monyako oa tumelo” joang matsatsing aa a ho qetela? (Liketso 14:27, NW, mongolo o botlaaseng ba leqephe; 2 Timothea 3:1) Tsela e ka sehloohong ke ka ho bolela ha Lipaki tsa hae molaetsa oa hae oa poloko le oa kahlolo khahlanong le tsamaiso ena e khopo ea lintho. (Esaia 43:12; 61:1, 2) Boboleli bona ba lefatše ka bophara bo sisinya lichaba—selelekela sa kahlolo e tlang ea timetso haufinyane. Ka nako e tšoanang, batho ba “bohlokoa” mahlong a Molimo ba ntšoa tsamaisong ena ’me ba fumana tšireletso ka har’a “ntlo” ea hae ea borapeli ba ’nete. Ka hona, Jehova o phethahatsa mantsoe a hae a boprofeta bo tlalehiloeng ho Haggai: “Ke tla sisinya lichaba tsohle, ’me lintho tse lakatsehang tsa lichaba tsohle li tla kena; ’me ke tla tlatsa ntlo ena ka khanya.”—Haggai 2:6, 7, NW, mongolo o botlaaseng ba leqephe; Tšenolo 7:9, 15.

 7.Jehova o bula lipelo tsa batho le ho ba hulela haufi le eena le ho Mora oa hae joang?

⁷ Jehova o bula lipelo tsa batho bana ba tšabang Molimo—“lintho tse khethiloeng hantle ka ho fetisisa tsa lichaba tsohle”—e le hore li ka ‘ela hloko lintho tse ntseng li buuoa’ ke Lipaki tsa hae. (Haggai 2:7, Jewish Publication Society; Liketso 16:14) Joaloka lekholong la pele la lilemo, ka linako tse ling Jehova o sebelisa mangeloi a hae hore a lebise Lipaki ho batho ba tšepahalang ba kōpileng thuso ho eena. (Liketso 8:26-31) Ha batho ba ithuta ka litokisetso tse babatsehang tseo Molimo a li entseng bakeng sa bona ka Mora oa hae, Jesu Kreste, lerato la Jehova le ba hulela haufi le eena. (1 Johanne 4:9, 10) E, Molimo o hulela batho ho eena le ho Mora oa hae ka “mosa o lerato” oa Hae, kapa “lerato le tšepahalang.”—Jeremia 31:3, NW, mongolo o botlaaseng ba leqephe.

Jehova o Hula Bo-mang?

 8. Ke batho ba mofuta ofe bao Jehova a ba hulang?

⁸ Jehova o hulela ho eena le ho Mora oa hae batho ba Mo batlang. (Liketso 17:27) Bana ba akarelletsa batho “ba feheloang, ba bobolang ka baka la manyala ’ohle a etsoang” Bokreste-’mōtoaneng, ’me ha e le hantle, manyala a etsoang lefatšeng lohle. (Ezekiele 9:4) Ba ‘ela hloko tlhoko ea bona ea moea.’ (Matheu 5:3) Ka sebele, ke ba “bonolo [“ba ikokobelitseng,” mongolo o botlaaseng ba leqephe] ba lefatše,” ba tla aha paradeiseng lefatšeng ka ho sa feleng.—Sofonia 2:3, NW.

 9. Jehova a ka bona joang haeba batho ‘ba e-na le tšekamelo e nepahetseng bakeng sa bophelo bo sa feleng,’ hona o ba hula joang?

⁹ Jehova a ka bona seo pelo ea motho e leng sona. Morena Davida o ile a bolella mora oa hae Solomone: “Jehova o botsisisa lipelo tsohle, ’me o lekola merero eohle le mehopolo eohle. Ekare ha u mo batla, o tla fumanoa ke uena.” (1 Likronike 28:9) Motheong oa boemo ba pelo ea motho le moea oa hae, kapa boikutlo boo a nang le bona, Jehova a ka bona hore na ke motho ea ka arabelang hantle kapa che litokisetsong tsa bomolimo bakeng sa tšoarelo ea libe le tšepo ea bophelo bo sa feleng tsamaisong e ncha ea Molimo ea ho loka. (2 Petrose 3:13) Ka Lentsoe la hae le boleloang le ho rutoa ke Lipaki tsa hae, Jehova o hulela ho eena le ho Mora oa hae ‘bohle ba nang le tšekamelo e nepahetseng bakeng sa bophelo bo sa feleng’ ’me bana ‘e ba balumeli.’—Liketso 13:48.

10.Ke eng se bontšang hore ho hula ha Jehova ba bang e mpa a sa hule ba bang ha ho amane le taba ea ho rereloa bokamoso esale pele?

¹⁰ Na ho hulela ha Jehova batho ba bang ho eena ’me a sa hule ba bang ho tsamaea le mokhoa o itseng oa ho rereloa bokamoso esale pele? Le hanyenyane! Ho hula ha Molimo batho ho itšetlehile ka takatso eo ba nang le eona. O hlompha tokelo eo ba nang le eona ea ho iketsetsa khetho. Jehova o beha ka pel’a batho kajeno khetho e tšoanang le eo a ileng a e beha ka pel’a Baiseraele lilemong tse 3 000 tse fetileng, ha Moshe a ne a re: “Kajeno ke beile pel’a hao bophelo le molemo, lefu le bobe. . . . Kajeno, ke bitsa leholimo le lefatše hore e be lipaki ho lōna. Ke beile pel’a hao bophelo le lefu, lehlohonolo le thohako. Ikhethele bophelo, u tle u phele, uena, le litloholo tsa hao; u tle u rate Jehova, Molimo oa hao, u utloe lentsoe la hae, ’me u mo khomarele; hobane ke eena bophelo ba hao, le bolelele ba matsatsi a hao.”—Deuteronoma 30:15-20.

11. Baiseraele ba ne ba lokela ho khetha bophelo joang?

¹¹ Hlokomela hore Baiseraele ba ne ba tlameha ho khetha bophelo ‘ka ho rata Jehova, ka ho mamela lentsoe la hae le ho mo khomarela.’ Ha mantsoe ao a ne a buuoa, batho ba Iseraele ba ne ba e-s’o rue lefa la Naha e Tšepisitsoeng. Ba ne ba le Mahoatateng a Moabe, ba itokisetsa ho tšela Nōka ea Jordane le ho kena Kanana. Le hoja e ne e le ntho e utloahalang ho bona ho nahana ka naha ‘e ntle le e khōlō e kollang lebese le linotši’ eo ba neng ba le haufi le ho e fumana, ho phethahala ha litoro tsa bona ho ne ho itšetlehile ka lerato la bona ho Jehova, ho mamela lentsoe la hae le ho mo khomarela. (Exoda 3:8) Moshe o ile a hlakisa sena ha a re: “Haeba u tla mamela litaelo tsa Jehova Molimo oa hao, tseo ke u laelang tsona kajeno, hore u rate Jehova Molimo oa hao, u tsamaee litseleng tsa hae le ho boloka litaelo tsa hae le litaelo tsa hae tse hlomamisitsoeng le liqeto tsa hae tsa boahloli, joale u tla tsoela pele u phela ’me u ngatafale, ’me Jehova Molimo oa hao o tla u hlohonolofatsa naheng eo u eang ho e rua.”—Deuteronoma 30:16, NW.

12. Mohlala oa Baiseraele o lokela ho re ruta eng ka mosebetsi oa rōna oa ho bolela le oa ho ruta?

¹² Na se boletsoeng kaholimo ha sea lokela ho re ruta ho itseng ka mosebetsi oa rōna oa ho bolela le oa ho ruta nakong ee ea bofelo? Re nahana ka lefatše le tlang la Paradeise ebile re bua ka lona tšebeletsong ea rōna. Empa ebang ke rōna kapa barutuoa ba rōna, re ke ke ra bona phethahatso ea tšepiso eo haeba re sebeletsa Molimo ka mabaka a boithati. Joaloka Baiseraele, rōna hammoho le bao re ba rutang re lokela ho ‘rata Jehova, re mamele lentsoe la hae le ho mo khomarela.’ Haeba re hopola sena ha re le tšebeletsong ea rōna, ha e le hantle re tla be re sebelisana le Molimo ho huleleng batho haufi le eena.

Basebetsi-’moho le Molimo

13, 14. (a) Ho latela 1 Bakorinthe 3:5-9, re ba basebetsi-’moho le Molimo joang? (b) Tlotla e lokela ho lebisoa ho mang bakeng sa keketseho leha e le efe e teng, hona hobane’ng?

¹³ Pauluse o ile a tšoantša ho sebelisana le Molimo ka ho bua ka ho lema tšimo. O ngotse: “Joale, Apolose ke eng? E, Pauluse ke eng? Basebeletsi bao ka bona le ileng la ba balumeli, esita le joalokaha Morena a ile a neha e mong le e mong. Ke ile ka lema, Apolose a nosetsa, empa Molimo a ’na a hōlisa; e leng hore leha e le ea lemang hase letho kapa ea nosetsang, empa Molimo ea hōlisang ke letho. Joale ea lemang le ea nosetsang ke ntho e le ’ngoe, empa motho e mong le e mong o tla amohela moputso oa hae ho ea ka mosebetsi oa hae. Etsoe re basebetsi-’moho le Molimo. Lōna le tšimo ea Molimo e lengoang.”—1 Bakorinthe 3:5-9.

¹⁴ Re le basebetsi-’moho le Molimo, re lokela ho lema ka botšepehi “lentsoe la ’muso” lipelong tsa batho, ebe joale re nosetsa thahasello leha e le efe e bontšitsoeng ke batho bao re etsang maeto a ho boela a lokiselitsoeng hantle ho bona, le lithuto tsa Bibele. Haeba mobu, e leng pelo, o le motle, Jehova o tla phetha karolo ea hae ka ho etsa hore peō ea ’nete ea Bibele e hōle ho ba semela se behang litholoana. (Matheu 13:19, 23) O tla hulela motho eo haufi le eena le ho Mora oa hae. Joale, ha tsohle li phethehile, keketseho leha e le efe palong ea baboleli ba ’Muso e tla ba ka lebaka la mosebetsi oo Jehova a o etsang lipelong tsa batho, a hōlisa peō ea ’nete le ho atametsa ba joalo ho eena le ho Mora oa hae.

Mosebetsi oa ho Haha o Tla Sala

15. Pauluse o ile a sebelisa papiso efe ho bontša kamoo re ka thusang batho kateng ho hlaolela tumelo?

¹⁵ Ha re ntse re thabela keketseho, ka lipelo tsohle re rata ho bona batho ba tsoela pele ho rata Jehova, ho mamela lentsoe la hae le ho mo khomarela. Re utloa bohloko ha re bona ba bang ba fola kapa ba kheloha. Na ho na le seo re ka se etsang ho thibela see? Papisong e ’ngoe, Pauluse o bontša hore na re ka thusa ba bang joang ho hlaolela tumelo. Oa ngola: “Ha ho motho ea ka behang motheo leha e le ofe o mong ho feta se behiloeng, e leng Jesu Kreste. Joale haeba leha e le mang a haha holim’a motheo oo khauta, silevera, majoe a bohlokoa, thepa ea lehong, furu, litlhaka, mosebetsi oa e mong le e mong o tla bonahala, etsoe letsatsi le tla o bonahatsa, hobane o tla senoloa ka mollo; ’me mollo ka booona o tla paka hore na mosebetsi oa e mong le e mong ke oa mofuta ofe.”—1 Bakorinthe 3:11-13.

16. (a) Lipapiso tse peli tse sebelisitsoeng ke Pauluse li fapana joang morerong oa tsona? (b) Mosebetsi oa rōna oa ho haha o ka fetoha o sa khotsofatseng le o hlōloang ke mollo joang?

¹⁶ Papisong ea Pauluse ea tšimo, khōlo e itšetlehile ka ho lema ho nepahetseng, ho nosetsa kamehla le tlhohonolofatso ea Molimo. Papiso e ’ngoe ea moapostola e totobatsa boikarabelo ba bahlanka ba Bakreste ka seo mosebetsi oa bona o bang sona. Na o hahile motheong o tiileng ka thepa ea boleng bo phahameng? Pauluse oa lemosa: “E mong le e mong a a lule a lebetse hore na o haha joang.” (1 Bakorinthe 3:10) Ha re se re tsositse thahasello ea motho ka ho mo bolella ka tšepo ea bophelo bo sa feleng Paradeiseng, na seo re se rutang se lebisa tlhokomelo feela tsebong ea motheo ea Mangolo, ebe joale ntho e ka sehloohong e ba ho hatella hore na motho eo o lokela ho etsa eng hore a fumane bophelo bo sa feleng? Na thuto ea rōna e ruta see feela: ‘Haeba u batla ho phela ka ho sa feleng Paradeiseng, u lokela ho ithuta, ho ea libokeng le ho kopanela mosebetsing oa boboleli’? Haeba ho joalo, ha re hahe tumelo ea motho eo motheong o tiileng, ’me seo re hahang ka sona se ke ke sa hlōla mollo oa liteko kapa sa tobana ka katleho le liteko ka nako e telele. Ho leka ho hulela batho ho Jehova ka tšepo ea bophelo Paradeiseng ka hore feela ba mo sebeletse ka lilengoana tse seng kae ho tšoana le ho haha ka “thepa ea lehong, furu, litlhaka.”

Ho Haha Lerato Bakeng sa Molimo le Kreste

17, 18. (a) Ke eng se hlokahalang hore tumelo ea motho e tle e be e mamellang? (b) Re ka thusa motho joang hore Kreste a lule ka pelong ea hae?

¹⁷ Bakeng sa hore tumelo e be e mamellang, e lokela ho thehoa kamanong ea botho le Jehova Molimo ka Jesu Kreste. Joaloka batho ba sa phethahalang, re ka finyella kamano e nang le khotso joalo le Molimo ka Mora oa hae feela. (Baroma 5:10) Hopola hore Jesu o itse: “Ha ho le ea mong ea tlang ho Ntate haese ka ’na.” Ho thusa ba bang hore ba hahe tumelo, “ha ho motho ea ka behang motheo leha e le ofe o mong ho feta se behiloeng, e leng Jesu Kreste.” See se akarelletsa eng?—Johanne 14:6; 1 Bakorinthe 3:11.

¹⁸ Ho haha holim’a Kreste e le eena motheo ho bolela ho ruta ka tsela eo seithuti sa Bibele se tla khona ho hlaolela ho ba le lerato le tebileng bakeng sa Jesu ka tsebo e feletseng ea karolo eo A e phethang e le Molopolli, Hlooho ea phutheho, Moprista ea Phahameng ea lerato le Morena ea busang. (Daniele 7:13, 14; Matheu 20:28; Bakolose 1:18-20; Baheberu 4:14-16) Ho bolela ho etsa Jesu motho oa sebele ho bona hoo a batlang a lula ka lipelong tsa bona. Ha re ba rapella, thapelo ea rōna e lokela ho ba joaloka kōpo e matla ea Pauluse ha a rapella Bakreste ba Efese. O ile a ngola: “Ke khumamela Ntate, . . . e le hore a ka le neha . . . hore Kreste a lule ka tumelo ea lona lipelong tsa lona ka lerato; e le hore le ka mela ka metso le ho tsepama motheong.”—Baefese 3:14-17.

19. Phello ea ho haha lerato bakeng sa Kreste ka lipelong tsa liithuti tsa rōna tsa Bibele e lokela ho ba efe, empa re lokela ho ruta eng?

¹⁹ Haeba re haha ka tsela eo lerato la Kreste le tlang ho hōla lipelong tsa liithuti tsa rōna ka eona, ho hlakile hore sena se tla haha lerato ho Jehova Molimo. Lerato la Jesu, maikutlo a hae le kutloelo-bohloko ea hae ke pontšo e tšepahalang ea litšoaneleho tsa Jehova. (Matheu 11:28-30; Mareka 6:30-34; Johanne 15:13, 14; Bakolose 1:15; Baheberu 1:3) Kahoo, ha batho ba tseba Jesu ’me ba mo rata, ba tla tseba Jehova ’me ba mo rate.a (1 Johanne 4:14, 16, 19) Re tlameha ho ruta liithuti tsa Bibele hore Jehova ke eena ea lokiselitseng tsohle tseo Kreste a li etselitseng moloko oa batho le hore ka lebaka leo re tlameha ho Mo leboha, ho mo rorisa le ho mo rapela joalokaha e le “Molimo o bolokang.”—Pesaleme ea 68:19, 20; Esaia 12:2-5; Johanne 3:16; 5:19.

20. (a) Re ka thusa batho joang hore ba atamele haufi-ufi le Molimo le ho Mora oa hae? (b) Sehloohong se latelang ho tla tšohloa eng?

²⁰ Joaloka basebetsi-’moho le Molimo, a re thuseng batho ho atamela haufi le eena le ho Mora oa hae, re ba thuse ho hlaolela lerato le tumelo lipelong tsa bona. Ka tsela eo, Jehova e tla ba oa sebele ho bona. (Johanne 7:28) Ka Kreste, ba tla khona ho theha kamano e haufi-ufi le Molimo, ’me ba tla mo rata le ho mo khomarela. Ba ke ke ba ipehela meeli ea nako tšebeletsong ea bona e susumetsoang ke lerato, ba bontša tumelo ea hore litšepiso tse hlollang tsa Jehova li tla phethahala ka nako ea hae e loketseng. (Lillo tsa Jeremia 3:24-26; Baheberu 11:6) Leha ho le joalo, ha re ntse re thusa ba bang hore ba hlaolele ho ba le tumelo, tšepo le lerato, le rōna re lokela ho haha tumelo ea rōna e le hore e be joaloka sekepe se tiileng se khonang ho tsitsa lifefong tse matla. Sena se tla tšohloa sehloohong se latelang.

[Mongolo o botlaaseng ba leqephe]

Bakeng sa Tlhahlobo

◻ Hangata re tsosa thahasello ea batho molaetseng oa ’Muso joang, empa ho na le kotsi efe?

◻ Ke batho ba mofuta ofe bao Jehova a ba hulelang ho eena le ho Mora oa hae?

◻ Ho kena ha Iseraele Naheng e Tšepisitsoeng ho ne ho itšetlehile ka eng, hona re ka ithuta eng ho see?

◻ Re phetha karolo efe ho thuseng batho hore ba atamele haufi le Jehova le ho Mora oa hae?

[Setšoantšo se leqepheng la 10]

Le hoja re atolosetsa ho batho tšepo ea bophelo bo sa feleng Paradeiseng, morero oa rōna o ka sehloohong ke ho ba hulela ho Jehova

[Litšoantšo tse leqepheng la 13]

Maeto a rōna a ho boela e ka ba a atlehang haholo haeba re lokisetsa hantle