Re ka Arabela ka Tsela e se Nang Boithati Joang Leratong la Molimo?
“Ha e le moo Molimo a re ratile joalo, le rōna re tšoanetse ho ratana.”—1 JOHANNE 4:11, “BPN.”
1, 2. Ho hlokahala eng hore re arabele ka tsela e se nang boithati lipontšong tsa lerato la Molimo?
JEHOVA ke mothofatso oa lerato. Ka sebele, sehloohong se ka pele, re bone kamoo lipontšo tsa lerato la hae li hlileng li leng ngata ka teng. Re boetse re hlokometse kamoo Moshe, Davida, le Jesu Kreste ba ileng ba arabela ka tsela e se nang boithati ka teng lipontšong tseo tsa lerato. Na e mong le e mong oa Lipaki tsa Jehova ha aa lokela ho etsa ho tšoanang? Ka sebele o lokela ho etsa ho tšoanang!
2 Ho hlokahala eng hore re tle re khone ho arabela ka tsela e se nang boithati lipontšong tsa lerato la Molimo? Tabeng ea pele, re tlameha ho o fa sebaka sa pele bophelong ba rōna, re o rate ka pelo tsa rōna, ka liphefumolohi tsa rōna, ka mehopolo ea rōna, le ka matla a rōna ’ohle. (Mareka 12:29, 30, NW) Sena se bolela hore re tsamaisoe ke Molimo, re be le kamano ea botho e mofuthu le Jehova. Na re laba-labela ho buisana le Ntate oa rōna oa leholimo ka thapelo? Na re rapela ka mehla esita le ho tiisetsa thapelong? Kapa na re etsa lithapelo tsa rōna re potlakile, ka linako tse ling re bile re phathahana haholo hore re ka rapela? (Ba-Roma 12:12; 1 Ba-Thessalonika 5:17) Na re lebisa tlhokomelo ho Jehova, re fa eena le mokhatlo oa hae o hlophisitsoeng tlotla bakeng sa seo e ka ’nang eaba re se finyelletse? (1 Ba-Korinthe 3:7; 4:7) Na ka sebele re ikutloa kamoo mopesaleme a neng a ikutloa ka teng? Mabapi le Molimo, o ile a re: “Ke u rorisa hasupa ka letsatsi.”—Pesaleme ea 119:164.
3. Ha re kopana hammoho ho thabela botsoalle, re ka bontša joang hore re arabela ka tsela e se nang boithati leratong la Molimo?
3 Hore na re arabela ka tsela e se nang boithati leratong la Molimo kapa che ho ka senoloa hantle ha re kopana hammoho bakeng sa ho thabela nako e monate ea botsoalle. Na ka nako eo moqoqo oa rōna o likoloha litabeng tsa lefatše kapa linthong tsa moea? Hase hore re tlameha ho ba le thuto e tebileng ea Bibele ka linako tsohle ha re e-na le Bakreste-’moho. Empa ka sebele re ka fumana lintho tse ling tse thahasellisang tsa moea tseo re ka li akarelletsang moqoqong oa rōna. Ho thoe’ng ka liphihlelo tsa tšimo, ho buisana ka temana ea Bibele eo re e ratang haholo, ho pheta kamoo re ithutileng ’nete ka teng, kapa ho bua ka bopaki ba tlhokomelo e lerato ea Molimo le tlhohonolofatso ea oona?
4. Re lokela ho talima litaba joang haeba re nyahame ka lebaka la tokelo e itseng ea tšebeletso?
4 Boemo bo bong bo ka senolang tekanyo ea kananelo ea rōna bakeng sa lerato la Molimo ke haeba re hlokomolohuoa tabeng ea tokelo e itseng ea tšebeletso ka hare ho mokhatlo o hlophisitsoeng oa Jehova. Re itšoara joang? Haeba re amehile haholo-holo ka ho tlotlisa Jehova, re tla lumela hore mohlomong Molimo o tla tlotlisoa ka ho tšoanang ke mang kapa mang ea fuoeng tokelo eo e khethehileng ea tšebeletso. (Bapisa le Luka 9:48.) Empa haeba re amehile ka ho tlōlisang ka molemo o tlang ho rōna kapa ka botumo ba rōna, re tla tepelletsoa ke hore re hlokomolohiloe, ho latela kamoo re nahanang ka teng. Re lokela ho hopola hore Jehova oa re rata ’me e ka ’na eaba oa tseba hore hajoale re ka hlōleha ho jara mojaro oa boikarabelo bo itseng ba puso ea Molimo. E ka ’na eaba o ntse a re hlohonolofatsa ka ho enneng ka litsela tse ling, ’me lipontšo tse joalo tsa lerato la hae li lokela ho re thusa ho boloka botsitso ba rōna ba moea.—Liproverbia 10:22.
Ho Rata ho Loka, Ho Hloea ho Hloka Molao
5. Lipontšo tsa lerato la Molimo li lokela ho ba le phello efe boitšoarong ba rōna?
5 Lipontšo tsa lerato la Molimo ho rōna li lokela ho re susumelletsa ho etsisa Kreste ka ho rata ho loka le ho hloea ho hloka molao. (Ba-Heberu 1:9, NW) Ke ’nete hore re ke ke ra etsa sena ka ho phethahetseng joalokaha Jesu a ile a etsa. Empa, re ka iketsetsa pakane ea hore re be ba halalelang, ba tšepahalang, le ba bolokang molao ka hohle kamoo re ka khonang re ntse re le boemong ba rōna ba ho se phethahale. Hore re etse sena, ha rea lokela feela ho hōlisa lerato la ho loka le lintho tse molemo empa hape re lokela ho hlaolela ho hloea, ho nena, ho nyonya se sebe. Joalokaha moapostola Pauluse a boletse: “Nyonya se sebe, khomarela se molemo.” (Ba-Roma 12:9, NW) “Nyonya” ke lentsoe le matla haholo, le bolelang “ho talima ka mokhoa oa ho nena ka ho felletseng.”—Webster’s New Collegiate Dictionary.
6. Ke eng se tla re thusa ho itebela khahlanong le liteko tseo lefatše, nama ea rōna ea boetsalibe, le Diabolose ba li tlisang tseleng ea rōna?
6 Ke eng se tla re thusa ho itebela khahlanong le liteko tseo lefatše, nama ea rōna ea boetsalibe, le Diabolose ba li tlisang tseleng ea rōna? Botšepehi ho Jehova Molimo. O ipiletsa ho rōna: “Mora oa ka, hlalefa, u nthabise pelo, ’me ke tla ba le puo ho fetola ba nkomanyang.” (Liproverbia 27:11) E, botšepehi ho Jehova bo tla re susumelletsa ho nka tsela e bohlale ea ho hloea seo a se hloileng. Ho feta moo, ho sa tsotellehe hore na ho tlōla o mong oa melao ea Molimo ho ka bonahala ho thabisa kapa ho susumetsa hakae, re tlameha ho lula re ipolella hore ho etsa joalo ha ho putse. (Ba-Galata 6:7, 8) Pelo ea motho e mano, e-ea qhekella, e-ea thetsa, joalokaha re hopotsoa ho Jeremia 17:9. Pelo ea Mokreste e rata lintho tse molemo, tse ntle, le tse hloekileng. Empa ka linako tse ling litšekamelo tsa boetsalibe li e susumelletsa ho lakatsa se sebe. Joaloka lipelo tsa Baiseraele ba neng ba rapela Jehova empa ba ntse ba bolokile ‘nģalo tsa bona tse liphahameng’ tsa borapeli ba litšoantšo, ka ho tšoanang lipelo tsa rōna li ka ba le boithati ’me tsa re qhekella. (1 Marena 22:43, 44; Deuteronoma 12:2) Lipelo tsa rōna tse sa phethahalang li ka ’na tsa leka ho fumana mabaka ao li ikemelang ka ’ona ha li re isa tekong. Li ka ’na tsa leka ho nyenyefatsa ho teba ha phoso eo re tobaneng le teko ea ho e etsa. Kapa lipelo tsa rōna li ka leka ho re kholisa hore kotlo leha e le efe e tla ba feela ea nakoana.
7. Ke hobane’ng ha re tlameha ho itebela khahlanong le ho lakatsa se sebe?
7 Ka lebaka la kananelo bakeng sa lerato la Molimo, re tlameha ho itebela khahlanong le ho lakatsa se sebe, joaloka ho ba le tšekamelo ea boitšoaro bo bobe ba botona le botšehali, ho sa tsotellehe hore na re masoha kapa re lenyalong. Ka makhetlo a mangata, se ileng sa qala e le ho bonya ho bonahalang ho se na kotsi ea letho se ’nile sa fella ka hore Bakreste ba babeli ba amehe haholo maikutlong e mong ka e mong hoo ba ileng ba etsa sebe ’me ba khaoloa. Esita le baholo, ba lokelang ho ba mehlala e se nang ho nyatsuoa ho mohlape, ba ’nile ba oela tlokotsing litabeng tsena!—Bapisa le 1 Marena 15:4, 5.
8. Moapostola Pauluse o re fa mohlala ofe o fanang ka temoso, ’me bothata bo joalo bo ka tšoantšoa joang?
8 Nahana ka moapostola Pauluse, ea ileng a hlohonolofatsoa ka lipono le matla a phahametseng a tlhaho le ka mpho ea pululelo ea Molimo. E le hore a atlehe ntoeng ea hae khahlanong le litšekamelo tsa boetsalibe, o ile a tlameha ho thapisa—e, ho otla ka thata—’mele oa hae. Na re ka khotsofalla ho etsa se ka tlaase ho seo? (Ba-Roma 7:15-25; 1 Ba-Korinthe 9:27, NW) Ho tšoana le hoja re le ka seketsoaneng se tsamaisoang ka masokoana nōkeng e phallang ka potlako ’me metsi a re kharameletsa phororong ea nōka ena. E le ho phema koluoa, re tlameha ho tsamaisa seketsoana ka masokoana ka matla hore se lebe moo metsi ao a phallang ka matla a hlahang teng. Ho ka ’na ha bonahala eka ha re etse tsoelo-pele e kaalo, empa hafeela re ntse re tsoela pele ho ikitlaetsa ka matla, re ke ke ra ea oela phororong eo eaba rea timela. Ka sebele, lipontšo tsa lerato la Jehova Molimo ho rōna li lokela ho etsa hore re ikitlaetse ka matla hore re tšepahale ho eena ka ho hloea ho hloka molao le ho rata ho loka.
Bontša Lerato la Boena
9. Moapostola Johanne o fana ka keletso efe mabapi le ho rata baena ba rōna?
9 Lipontšo tsa lerato la Molimo li boetse li lokela ho re susumelletsa ho rata baena ba rōna joalokaha Jesu Kreste a rata barutuoa ba hae. (Johanne 13:1) Ka ho loketseng haholo, moapostola Johanne o re: “Seo lerato le leng sona ke sena: hase hore ke rōna ba ratileng Molimo, empa ke eena ea re ratileng, a ba a romela Mora oa hae, hore e be nyehelo ka baka la libe tsa rōna. Baratuoa, ha e le moo Molimo a re ratile joalo, le rōna re tšoanetse ho ratana.” (1 Johanne 4:10, 11, BPN) Ha e le hantle, Jesu o ile a bolela hore tsela eo balateli ba hae ba ’nete ba ka tsejoang ka eona ke ka lerato leo ba nang le lona har’a bona.—Johanne 13:34, 35.
10, 11. Litsela tse ling tseo re ka bontšang lerato la boena ka tsona ke life?
10 Rea tseba hore Bakreste ba lokela ho bontša lerato la boena. Empa ke ho loketseng hore re ikhopotse litsela tse sa tšoaneng tseo ka tsona re ka bontšang lerato lena le kang la Kreste e mong ho e mong. Lerato le joalo le tla re thusa ho se natse liphapang tsa merabe, bochaba, thuto, mokhoa oa bophelo ba sechaba, le boemo ba moruo. Ho feta moo, lerato la boena le tla re susumelletsa ho kopana hammoho libokeng. Haeba kannete re rata baena ba rōna, re ke ke ra lumella boemo bo bobe ba leholimo kapa ho kula ho honyenyane ’meleng hore li re amohe thabo ea ho kopana le bona le ho kopanela ho khothatsaneng. (Ba-Roma 1:11, 12) Ho feta moo, lerato la boena le tla etsa hore re lokisetse hantle bakeng sa liboka tsa rōna le ho nka karolo ka mafolo-folo ho tsona e le hore re ka susumelletsana leratong le mesebetsing e metle.—Ba-Heberu 10:23-25.
11 Ho thoe’ng ka ho thusa baena ba rōna tšebeletsong ea tšimo? Ho hlokomelehile hore hangata baholo le bahlanka ba sebeletsang ba kopanela tšebeletsong ea ntlo le ntlo ba sebetsa hammoho ka bobona kapa ka bomong ha, ka ho rera ho fokolang, ba ne ba ka mema bahoeletsi ba ’Muso ba hlokang ho thusoa tšebeletsong hore ba tsoe le bona. Ho bontša lerato ka tsela ena ho tla etsa hore tšebeletso ea tšimo ea baholo le bahlanka ba sebeletsang e be e putsang haholo. ’Me ho ka thoe’ng ka ho tsamaea le mohoeletsi e mocha ha u ea thutong ea lehae ea Bibele?—Ba-Roma 15:1, 2.
12. Re lokela ho utloisisa 1 Johanne 3:16-18 joang?
12 Lerato le tla boela le re susumelletse hore re thuse baena ba rōna bao e ka ’nang eaba ka sebele ba hloka lintho tse bonahalang. Moapostola Johanne o ngotse: “Moo re tsebileng lerato, ke ha Jesu a re teletse bophelo [“sephefumolohi,” NW] ba hae; le rōna re tšoanetse ho tella banab’abo rōna bophelo ba rōna. Empa motho ha a na le lintho tsa bophelo ba lefatše, ’me a bona ngoan’abo a hloka, ’me a mo koalla pelo ea hae, lerato la Molimo le lutse joang ho eena? Bana ba ka, re se ke ra rata ka lipolelo le ka leleme, e mpe e be ka ketso le ka ’nete.” (1 Johanne 3:16-18) Mohlomong hona joale ho ke ke ha thoe re tele liphefumolohi tsa rōna molemong oa bona, empa ka linako tse ling re ba le menyetla ea ho bontša lerato ho bona ka litsela tse ling, eseng feela ka polelo kapa ka leleme empa hape le ka liketso. Ha ho letho le phoso ka ho rata baena ba rōna ka polelo, empa ha re batle hore lerato la rōna le felle mona ha ba hloka lintho tse bonahalang. Polelo ea Jesu ea hore “ho na le thabo e eketsehileng ho faneng ho feta ho fuoeng” e boetse e sebetsa le ho faneng ka thuso ea lintho tse bonahalang.—Liketso 20:35, NW.
13. (a) Tse ling tsa linnete tsa motheo tseo re ithutileng tsona ka thuso ea mokhatlo o hlophisitsoeng o bonahalang oa Jehova ke life? (b) Charles Taze Russell o ile a phahamisa ntlha efe e matla?
13 Re na le monyetla oa ho bontša lerato ho baena ba rōna ba etelletseng pele ka phuthehong kapa mokhatlong o hlophisitsoeng oa Jehova o bonahalang lefatšeng ka bophara. Sena se kopanyelletsa ho tšepahala ho “mohlanka ea khabane, ea bohlale.” (Mattheu 24:45-47) A re amoheleng ’nete ea hore ho sa tsotellehe hore na re balile Bibele haholo hakae, le ka mohla re ne re ke ke ra ithuta ’nete ka borōna feela. Re ne re ke ke ra fumana ’nete ka Jehova, merero ea hae le litšoaneleho tsa hae, se boleloang ke lebitso la hae le bohlokoa ba lona, ’Muso, topollo ea Jesu, phapang pakeng tsa mokhatlo o hlophisitsoeng oa Molimo le oa Satane, kapa hore na ke ka lebaka la’ng ha Molimo o lumelletse bokhopo. Ho joalo feela kaha ka 1914 mookameli oa pele oa Mokhatlo oa Watch Tower, Charles Taze Russell, a ile a ngola: “Na ha re batho ba hlohonolofalitsoeng, ba thabileng? Na Molimo oa rōna hase o tšepahalang? Haeba ofe kapa ofe a tseba ho hong ho molemonyana, ha a ke a ho sebelise. Haeba bafe kapa bafe ho lōna ba ka fumana ho hong ho molemonyana, re tšepa hore le tla re bolella. Ha re tsebe letho le molemonyana kapa esita le eona halofo feela ea se molemo seo re se fumaneng Lentsoeng la Molimo. . . . Ha ho leleme kapa pene tse ka hlalosang khotso, thabo, le tlhohonolofatso tseo tsebo e hlakileng ea Molimo oa ’nete li li tlisitseng lipelong tsa rōna le bophelong ba rōna. Tlaleho ea Bohlale, Toka, Matla, le Lerato tsa Molimo e khotsofatsa ka ho felletseng litakatso tsa likelello le lipelo tsa rōna. Ha re batle ho fetang hoo. Ha ho letho le eketsehileng le ka lakatsoang ho feta ho etsa hore Tlaleho ena e hlollang e be e hlakileng haholoanyane likelellong tsa rōna.” (The Watch Tower, December 15, 1914, maqephe 377-8) Mantsoe ao a ngotsoeng ka bokhabane ke ’nete hakaakang!
Ho Sebeletsa ba ka Ntle
14. Lipontšo tsa lerato la Molimo li lokela ho re susumelletsa ho itšoara joang ho ba ka ntle?
14 Lipontšo tsa lerato la Molimo tseo re li thabetseng li lokela ho re susumelletsa ho bontša lerato la boahisani ho ba ka ntle ho phutheho. Re ka etsa sena joang? Maemo a ka ’na a bontša hore re ka thusa baahisani ba rōna ka tsela e bonahalang. Empa, habohlokoa ka ho fetisisa, re ka bontša lerato la boahisani ka ho tlisetsa ba bang litaba tse molemo tsa ’Muso oa Molimo le ka ho thusa ba ratang ho loka hore e be barutuoa ba Jesu Kreste. Na re kopanela ka mehla tšebeletsong ee ea phatlalatsa, kapa re e hlokomolohile? Na e se e fetohile mofuta oa tšebeletso oo e leng tloaelo feela kapa ntho eo re e etsang hobane re tlamehile? Kapa a ruri re susumetsoa ke lerato la boahisani? Na re bontša kutloelo-bohloko? Na rea mamella, re emela batho hore ba arabele? Na re khothalletsa beng ba matlo hore ba itlhalose? E, ho e-na le hore ho bue rōna feela, a re lumelleng lerato la boahisani ho re susumelletsa ho mamela le ho ba le lipuisano tse putsang tsa Bibele le batho bao re kopanang le bona tšebeletsong ea rōna.
15. (a) Ke ka baka la’ng ha polelo “bopaki bo sa reroang” e le molemo ho feta “bopaki ba tšohanyetso”? (b) Ke hobane’ng ha u lokela ho sebelisa menyetla ea ho paka ka mokhoa o sa reroang?
15 Na re falimehile ka hohle kamoo re ka khonang ho sebelisa menyetla ea ho paka ka mokhoa o sa reroang? Ho lokela ho hlokomeloe hore bona hase feela bopaki ba tšohanyetso, e leng ho neng ho ka fana ka maikutlo a hore ke tšebetso e sa lokisetsoang kapa eo e seng ea bohlokoa hakaalo. Bopaki bo sa reroang ke ba bohlokoa haholo, ’me lerato ho batho ba bang le tla re susumelletsa ho bula menyetla ea ho kopanela ho bona. Hangata bopaki bo joalo ke bo behang litholoana hakaakang! Ka mohlala, ha moena e mong a ne a ile kopanong ea Lipaki tsa Jehova ka leboea ho Italy, o ile a ea karacheng ho ea kenya lebone la koloi le ka pele. Ha a ntse a letile, o ile a pakela ba haufi le eena ’me a ba fa maqetšoana a ba memelang puong ea Bibele ea phatlalatsa ka Sontaha. Selemo hamorao ha a le kopanong ea machaba Roma, moena eo a neng a sa mo tsebe o ile a mo lumelisa ka mofuthu. Moena enoa e ne e le mang? E ne e le e mong oa banna bane bao a neng a ile a ba neha maqetšoana karacheng selemong se fetileng! Monna eo o ne a ile a ea mamela puo ea phatlalatsa ’me a fana ka lebitso la hae bakeng sa thuto ea Bibele. Hona joale eena le mosali oa hae ke Lipaki tsa Jehova tse inehetseng. Ha ho pelaelo hore bopaki bo sa reroang e ka ba bo putsang haholo!
Tsoela Pele ho Arabela Leratong la Molimo
16. Ke lipotso life tseo ho leng hotle hore re ipotse tsona?
16 Ka sebele Jehova e bile ea seatla se bulehileng ha a bontša lerato ho libōpuoa tsa hae. Joalokaha re hlokometse, Mangolo a re fa mehlala e metle ea ba ileng ba arabela ka tsela e se nang boithati lipontšong tsa lerato la Molimo. Ka ho loketseng ka ho fetisisa, mopesaleme ea bululetsoeng o ile a khotsa: “Batho a ba ke ba lebohe Jehova bakeng sa mosa oa hae o lerato le bakeng sa mesebetsi ea hae e hlollang ho bara ba batho.” (Pesaleme ea 107:8, 15, 21, 31, NW) Na re ka amohela mosa oa Molimo o sa tšoanelang eaba ha re hlokomele morero oa oona? E se eka le ka mohla seo se ke ke sa etsahala! (2 Ba-Korinthe 6:1, NW) Kahoo e mong le e mong oa rōna ka bomong ha a ke a ipotse: ‘Na ka sebele ke ananela lipontšo tsa lerato la Molimo tseo ke seng ke ile ka li thabela le tseo ka kholiseho ke tšepileng ho tsoela pele ho li thabela nakong e tlang? Na li ntšusumelletsa ho rata Jehova ka pelo ea ka, ka sephefumolohi sa ka, ka khopolo ea ka, le ka matla a ka ’ohle? Na ruri ke tsamaisoa ke Molimo? Na ke rata ho loka ’me ke hloile ho hloka molao? Na ke bontša lerato la boena? Hona ke leka ho tsamaea haufi le mehlala ea Jesu hakae mabapi le tšebeletso ea ka?’
17. Phello e tla ba efe haeba re arabela ka tsela e se nang boithati lipontšong tsa lerato la Jehova Molimo?
17 Ruri, ho na le litsela tse ngata tsa ho bontša teboho ea rōna e tiileng bakeng sa lipontšo tsohle tsa lerato la Molimo tseo re li latsoitseng. Ka ho sebelisa ka ho felletseng menyetla ea ho bontša kananelo e joalo, re tla thabisa pelo ea Ntate oa rōna oa leholimo, re be tlhohonolofatso ho ba bang, ’me rōna ka borōna re fumane thabo, khotso, le khotsofalo. Ka baka leo e se eka re ka tsoela pele ho arabela ka tsela e se nang boithati lipontšong tsa lerato la Molimo.
U ne U Tla Arabela Joang?
◻ Ho hlokahala eng hore re tle re arabele ka tsela e se nang boithati leratong la Molimo?
◻ Re ka itebela joang khahlanong le liteko?
◻ Litsela tse ling tsa ho bontša lerato la boena ke life?
◻ Lipontšo tsa lerato la Jehova li lokela ho re susumelletsa ho itšoara joang ho baahisani ba rōna?
[Setšoantšo se leqepheng la 17]
Re tlameha ho loantša litšekamelo tsa boetsalibe e le hore re qobe tlokotsi
[Setšoantšo se leqepheng la 18]
Baholo ba bontša lerato la boena ka ho sebetsa le ba bang tšebeletsong ea ’Muso
[Setšoantšo se leqepheng la 19]
Charles Taze Russell, mookameli oa pele oa Mokhatlo oa Watch Tower, o ile a hlokomelisa ka khotso, thabo, le tlhohonolofatso tseo e leng Molimo feela o ka fanang ka tsona