Ke Hobane’ng ha re Lokela ho Tlaleha se Fosahetseng?
BA BANG Afrika Bophirimela ba bolela hore, “Ea phahlang makunutu e ba sera sa batho.” Ke se ileng sa etsahalla Olu ha a ne a qosa moholoane oa hae ka hore o robala le khaitseli ea bona. Moholoane oa hae o ile a kharuma: “U leshano uena!” Joale o ile a khakhatha Olu, a mo leleka lapeng ’me a chesa liaparo tsohle tsa Olu. Batho ba motse ba ne ba tšehetsa moholoane oa Olu. A se a sa amohelehe motseng, Olu o ile a tlameha ho tloha. Ke feela ka mor’a hore ho hlokomeloe hore khaitseli eo ea bona e ithoetse moo batho ba ileng ba lemoha hore Olu o ne a bua ’nete. Moholoane oa hae o ile a ipolela melato ’me Olu a boela a amoheloa hape. Lintho li ne li ka ’na tsa se ke tsa tsamaea joalo. Olu a ka be a bolailoe.
Ka ho hlakileng, batho ba sa rateng Jehova ha ba hlile ha ba rate taba ea hore liphoso tsa bona li utolloe. Tšekamelo ea motho oa moetsalibe ke ho hana khalemelo le ho khopisoa ke motho leha e le ofe ea fanang ka eona. (Bapisa le Johanne 7:7.) Hase feela ba bangata ba khutsang joaloka majoe tabeng ea ho senola liphoso tsa ba bang ho batho ba nang le matla a ho ba khalemela.
Ho Ananela Bohlokoa ba Khalemelo
Leha ho le joalo, ho na le boikutlo bo fapaneng har’a batho ba Jehova malebana le khalemelo. Banna le basali ba tšabang Molimo ba ananela ka botebo tokisetso eo Jehova a e entseng ea ho thusa ba fosang ka hare ho phutheho ea Bokreste. Ba nka taeo e joalo e le pontšo ea mosa oa hae o lerato.—Baheberu 12:6-11.
Mohlala oa sena o ka bonoa ho se ileng sa etsahala bophelong ba Morena Davida. Le hoja e ne e le motho ea lokileng ho tloha bocheng ba hae, ho na le nako eo ka eona a ileng a oela phosong e tebileng. Pele, o ile a feba. Joale, ha a leka ho koahela phoso ea hae, o ile a lokisetsa hore monna oa mosali eo a bolaoe. Empa Jehova o ile a senola sebe sa Davida ho moprofeta Nathane, eo ka sebete a ileng a toba Davida mabapi le taba ena. A sebelisa papiso e matla, Nathane o ile a botsa Davida hore na ho etsoe’ng ka monna ea ruileng ea neng a e-na le mohlape oa linku, empa a nka konyana e le ’ngoe feela ea mofutsana, phoofotsoana ea hae eo ho eena e neng e le letlotlo, ’me a e hlaba bakeng sa ho thentha motsoalle oa hae. Davida eo e neng e kile ea e-ba molisana, o ile a loloma ke bohale. O ile a re: “Motho ea entseng hoo o lokeloa ke lefu.” Joale Nathane o ile a sebelisa papiso eo ho Davida, a re: “Motho eo ke uena!”—2 Samuele 12:1-7.
Davida ha aa ka a halefela Nathane; leha e le hona hore o ile a leka ho ikemela kapa hona ho leka ho mo qosa. Ho e-na le hoo, khalemelo e matla ea Nathane e ile ea etsa hore letsoalo la hae le sebetse ka botebo. A utloile bohloko bo tebileng, Davida o ile a ipolela: “Ke sitetsoe Jehova.”—2 Samuele 12:13.
Ho pepesa ha Nathane sebe sa Davida a sebelisa khalemelo ea bomolimo, ho ile ha hlahisa litholoana tse ntle. Le hoja Davida a sa ka a qobisoa liphello tsa phoso ea hae, o ile a baka ’me a boelana le Jehova. Davida o ile a ikutloa joang ka khalemelo eo? O ngotse: “Ho molemo ha ke otloa ke ea lokileng, ke khalemeloa ke eena; hoo ke ole eo hlooho ea ka e ke keng ea e hana.”—Pesaleme ea 141:5, BPN.
Le mehleng ena ea rōna, bahlanka ba Jehova ba ka ’na ba kopanela phosong e tebileng, esita le ba ’nileng ba tšepahala ka lilemo tse ngata. Ba bangata ba hlokomela hore baholo ba ka ba thusa, ba etsa qeto ea ho ba atamela bakeng sa thuso. (Jakobo 5:13-16) Empa ka linako tse ling mofosi a ka ’na a leka ho koahela sebe sa hae, joalokaha Morena Davida a ile a etsa. Re lokela ho etsa’ng haeba ho etsahala hore re tsebe ka phoso e tebileng ka phuthehong?
Ke Boikarabelo ba Mang?
Ha baholo ba tseba ka phoso e tebileng, ba atamela motho ea amehang bakeng sa ho mo fa thuso e hlokahalang le khalemelo. Ke boikarabelo ba baholo ho hlahloba ka mokhoa oa boahloli bafosi ba joalo ba ka har’a phutheho ea Bokreste. Ba falimehetse bomoea ba eona, baa thusa le ho eletsa motho leha e le mang ea nkang tsela e booatla kapa e fosahetseng.—1 Bakorinthe 5:12, 13; 2 Timothea 4:2; 1 Petrose 5:1, 2.
Empa ho thoe’ng haeba u se moholo empa ho etsahala hore u tsebe ka phoso e itseng e tebileng ea Mokreste e mong? Tataiso e fumaneha Molaong oo Jehova a ileng a o fa sechaba sa Iseraele. Molao o ne o bontša hore haeba motho e ne e le paki ea liketso tsa bokoenehi, bojela-thōko, polao, kapa litlōlo tse ling tse tebileng tsa molao, e ne e le boikarabelo ba hae ho li tlaleha le ho fana ka bopaki ba seo a se tsebang. Levitike 5:1 ea bolela: ‘Ekare ha motho, e leng paki e hlapantšitsoeng ka molao, a entse sebe ka ho se bolele see a se boneng ka mahlo, leha e le see a se tsebang, o tla jara molato oa hae.’—Bapisa le Deuteronoma 13:6-8; Esthere 6:2; Liproverbia 29:24.
Le hoja ba se tlas’a Molao oa Moshe, kajeno Bakreste ba ka tataisoa ke melao-motheo e o tšehetsang. (Pesaleme ea 19:7, 8) Ka hona, u lokela ho etsa’ng haeba u tseba ka phoso e tebileng ea Mokreste-’moho le uena?
Ho Sebetsa Taba
Pele ho tsohle, ke ntho ea bohlokoa ho ba le lebaka le utloahalang la ho lumela hore phoso e tebileng e fela e entsoe. Monna ea bohlale o ile a re: “U se be paki e tsoang mohaeno ntle ho lebaka, polelo tse thetsang, li se tsoe molomong oa hao.”—Liproverbia 24:28, BPN.
U ka ’na ua etsa qeto ea ho ea ka ho toba ho baholo. Hase phoso ho etsa joalo. Leha ho le joalo, hangata tsela e lerato ka ho fetisisa ke ea ho buisana le motho ea amehang. Mohlomong litaba ha li joalokaha ho bonahala eka li joalo. Kapa mohlomong boemo bo se bo ntse bo sebetsoa ke baholo. Buisana ka bonolo le motho eo ka taba ena. Haeba ho ntse ho e-na le mabaka a ho lumela hore o fela a entse phoso e tebileng, mo khothalletse hore a buisane le baholo ho kōpa thuso, ’me u mo hlalosetse hore na ke bohlale hakae ho etsa joalo. U se ke ua bolella ba bang taba ena, kaha seo e tla ba lesebo.
Haeba motho eo a sa itlalehe ka pel’a baholo ka mor’a nako e itseng e lekaneng, joale u lokela ho tlaleha. Joale moholo a le mong kapa ba babeli ba tla bua taba le motho ea soloang. Ho hlokahala hore baholo ba “batlisise taba ena ka hloko” e le ho bona haeba phoso e fela e entsoe. Haeba e entsoe, ba tla sebetsa taba ho latela tataiso e fanoeng ke Mangolo.—Deuteronoma 13:12-14, BPN.
Bonyane ho hlokahala lipaki tse peli bakeng sa ho tiisa hore phoso e fela e entsoe. (Johanne 8:17; Baheberu 10:28) Haeba motho eo a hana hore o entse phoso ’me paki e le uena u le mong, taba e tla tloheloa matsohong a Jehova. (1 Timothea 5:19, 24, 25) Sena se etsoa ho tsejoa hore ho Jehova, lintho tsohle li “pepesitsoe phatlalatsa,” le hore haeba motho eo a fela a le molato, qetellong a ke ke a “phema kotlo ea” libe tsa hae.—Baheberu 4:13; Numere 32:23, BPN.
Empa a re re motho eo o hana molato ’me ke uena u le mong ea ka fanang ka bopaki. Na joale u ka qosoa ka hore u sentse motho eo lebitso? Che, ntle le haeba u ne u ile ua sebela ba bang ba sa ameheng taba ena. Hase ho senya motho lebitso ho tlaleha maemo a amang phutheho ho ba nang le matla le boikarabelo ba ho lebela le ho lokisa litaba. Ha e le hantle, ho tumellanong le takatso ea rōna ea ho etsa se nepahetseng kamehla le ho lula re tšepahala.—Bapisa le Luka 1:74, 75.
Ho Boloka Phutheho e Halalela
Lebaka le leng la ho tlaleha phoso ke hore hoo ho boloka phutheho e hloekile. Jehova ke Molimo ea hloekileng, ke Molimo ea halalelang. O batla hore bohle ba mo rapelang ba hloeke moeeng le boitšoarong. Lentsoe la hae le bululetsoeng lea eletsa: “Joaloka bana ba mamelang, le khaotse ho ba ka sebōpeho sa litakatso tseo le neng le e-na le tsona pele ho hlokeng tsebo ha lōna, empa, tumellanong le Mohalaleli ea le bitsitseng, le lōna ka bolōna le fele le be ba halalelang boitšoarong bohle ba lōna, hobane ho ngoliloe: ‘Le lokela ho halalela, hobane kea halalela.’” (1 Petrose 1:14-16) Batho ba etsang lintho tse litšila kapa liphoso ba ka silafatsa phutheho eohle le ho etsa hore e se amohelehe ho Jehova, ntle le haeba ho nkoa khato ea ho ba khalemela kapa ho ba tlosa.—Bapisa le Joshua, khaolo ea 7.
Mangolo a moapostola Pauluse a neng a e-ea phuthehong ea Bakreste ba Korinthe a bontša hore na ke joang ho tlaleha phoso ho ileng ha hloekisa batho ba Molimo moo. Pauluse o ile a ngola lengolong la hae la pele: “Ha e le hantle bohlola bo tlalehoa har’a lōna, ’me bohlola bo joalo e se bo teng leha e le har’a lichaba, hore monna ea itseng o na le mosali oa ntate oa hae.”—1 Bakorinthe 5:1.
Bibele ha e re bolelle hore na moapostola o ne a ile a tlaleheloa ke mang. Mohlomong Pauluse o ile a utloa boemo boo ka Setefanase, Fortunatase le Akaikase, ba neng ba tlohile Korinthe ho tla Efese moo Pauluse a neng a lula teng. Pauluse o ne a boetse a fumane lengolo le tsoang ho Bakreste ba phutheho ea Korinthe le neng le mo botsa lintho tse itseng. Ho sa tsotellehe hore na mohloli e ne e le ofe, hang ha boemo bo tlalehiloe ho Pauluse ke lipaki tse ka tšeptjoang, o ile a khona ho fana ka tataiso tabeng eo. O ile a ngola: “Tlosang motho eo ea khopo har’a lona.” Monna eo o ile a lelekoa phuthehong.—1 Bakorinthe 5:13; 16:17, 18.
Na taelo ea Pauluse e ile ea ba le liphello tse molemo? Ka sebele ho bile joalo! Ho latela bopaki bo fanoeng, mofosi o ile a hlaphoheloa. Lengolong la hae la bobeli le eang ho Bakorinthe, Pauluse o ile a khothalletsa phutheho eo hore e ‘tšoarele ka mosa le ho tšelisa’ monna eo ea bakileng. (2 Bakorinthe 2:6-8) Ka hona, ho tlaleha phoso ho ile ha lebisa ketsong e ileng ea hloekisa phutheho le ho etsa hore motho eo ea neng a sentse kamano ea hae le Molimo a boele a amohelehe hape ho Molimo.
Re fumana mohlala o mong hape lengolong la pele la Pauluse le neng le e-ea ho Bakreste ba phutheho ea Korinthe. Lekhetlong lena moapostola o bolela lipaki tse ileng tsa mo tlalehela taba. O ngotse: “Ke ile ka senoleloa mabapi le lōna, barab’eso, ke ba ntlo ea Kloe, hore ho hloka kutloano ho teng har’a lōna.” (1 Bakorinthe 1:11) Pauluse o ne a tseba hore ho hloka kutloano hona, hammoho le ho fa batho tlhompho e sa tšoanelang, ho ne ho bakile maikutlo a bokhelohi a neng a ka ’na a senya bonngoe ba phutheho. Kahoo, ka lebaka la ho ameha ka ho teba ka boiketlo ba moea ba balumeli-’moho le eena ba moo, Pauluse o ile a nka bohato ka potlako ’me a ngolla phutheho eo ho fana ka keletso e lokisang boemo.
Kajeno, bara le barali babo rōna ba bangata liphuthehong ho pota lefatše ba sebetsa ka thata ho boloka bohloeki ba phutheho ka hore ka bomong ba lule ba e-na le boemo bo amohelehang ka pel’a Molimo. Ba bang ba mamella mathata hore ba etse joalo; ba bang ba bile ba shoa e le hore ba boloke botšepehi. Ka sebele, ho hlokomoloha ka boomo kapa ho pata phoso ho ne ho tla bontša ho haelloa ke kananelo bakeng sa boiteko bona bohle.
Ho Thusa ba Fosang
Ke hobane’ng ha ba bang ba oetseng sebeng se tebileng ba sa bolelle baholo ba phutheho? Hangata ke kahobane ba sa lemohe melemo ea ho ea ho baholo. Ka phoso, ba bang ba ’nile ba lumela hore haeba ba ipolela, sebe sa bona se tla pepesetsoa phutheho eohle. Ba bang ba ithetsa ka hore ketso ea bona ha e bile ha ea teba hakaalo. Ho sa le joalo, ba bang ba nahana hore ba tla ikenya tseleng hape ntle le thuso ea baholo.
Empa bafosi ba joalo ba hloka thuso e lerato ea baholo ba phutheho. Jakobo o ile a ngola: “Na ho na le mang kapa mang ea kulang har’a lōna? A a bitsetse banna ba baholo ba phutheho ho eena, ’me a ba mo rapelle, ba mo tšasa ka oli ka lebitso la Jehova. ’Me thapelo ea tumelo e tla etsa hore ea sa ikutloeng hantle a fole, ’me Jehova o tla mo tsosa. Hape, haeba a entse libe, o tla tšoareloa.”—Jakobo 5:14, 15.
Ke tokisetso e babatsehang hakaakang ea ho thusa ba fosang hore ba tsosolose bomoea ba bona! Ka ho sebelisa keletso e thobang e tsoang Lentsoeng la Molimo le ka ho ba rapella, baholo ba ka thusa ba kulang moeeng hore ba hlaphoheloe litseleng tsa bona tse fosahetseng. Ka hona, ho e-na le hore ba ikutloe ba nyatsuoe, hangata ba bakang ba ikutloa ba khatholohile ’me ba imolohile ha ba kopane le baholo ba lerato. Mohlankana e mong oa Afrika Bophirimela o ne a kopanetse bohloleng ’me a patile sebe sa hae ka likhoeli tse ’maloa. Ka mor’a hore sebe sa hae se hlahelle, o ile a re ho baholo: “Ekare motho e mong a ka be a ile a mpotsa ka kamano ea ka le ngoanana eo! Ho imolla haholo ho bolela ntho ena.”—Bapisa le Pesaleme ea 32:3-5.
Ketso ea Lerato le Laoloang ke Melao-motheo
Bahlanka ba kolobelitsoeng ba Molimo ba “fetile lefung ho ea bophelong.” (1 Johanne 3:14) Empa, haeba ba etsa sebe se tebileng, ba khutlela tseleng ea lefu. Haeba ba sa thusoe, phoso e ka ’na ea ba thatafatsa pelo, ba se ke ba rata ho baka le ho khutlela borapeling ba Molimo oa ’nete.—Baheberu 10:26-29.
Ho tlaleha phoso ke ketso e bontšang ho ameha ha sebele ka mofosi. Jakobo o ngotse: “Barab’eso, haeba leha e le mang har’a lōna a khelosoa ’neteng ’me e mong a mo khutlisa, le tsebe hore ea khutlisang moetsalibe phosong ea tsela ea hae o tla pholosa soule ea hae lefung ’me o tla koahela libe tse ngata haholo.”—Jakobo 5:19, 20.
Kahoo, ke hobane’ng ha re lokela ho tlaleha se fosahetseng? Hobane ho re tsoela molemo. Bonneteng, ho tlaleha phoso ke ketso ea lerato la Bokreste le laoloang ke melao-motheo le bontšoang ho Molimo, le bontšoang ho phutheho hammoho le ho mofosi. Ha setho se seng le se seng sa phutheho se khomarela litekanyetso tse lokileng tsa Molimo ka botšepehi, Jehova o tla hlohonolofatsa phutheho eohle ka ho enneng. Moapostola Pauluse o ngotse: “[Jehova] o tla le tiisa ho isa bofelong, e le hore le ka ba ba ke keng ba qosoa ka letsatsi la Morena oa rōna Jesu Kreste.”—1 Bakorinthe 1:8.
[Setšoantšo se leqepheng la 26]
Ke ho bontša lerato ho khothalletsa Paki e fositseng hore e bue le baholo
[Setšoantšo se leqepheng la 28]
Baholo ba thusa ba fositseng hore ba boele ba amohelehe ho Molimo