Ho se ke ha E-ba le ea Bolisang Mekhoa ea Lōna e Metle

“Le se ke la lahleha: litloaelano tse mpe li bolisa mekhoa e metle.”—1 BA-KORINTHE 15:33.

 1, 2. (a) Moapostola Pauluse o ne a na le maikutlo afe mabapi le Bakreste ba Korinthe, hona hobane’ng? (b) Ke keletso efe e khethehileng eo re tla e hlahlobisisa?

LERATO la botsoali ke boikutlo bo hlollang hakaakang! Le susumelletsa batsoali ho itela bakeng sa bana ba bona, ho ba ruta le ho ba eletsa. Moapostola Pauluse e ne e se ntate oa bana ka tlhaho, empa o ile a ngolla Bakreste ba Korinthe: “Le hoja le ka ba le baruti ba likete tse leshome ho Kreste, ka sebele ha le na bo-ntate ba bangata; hobane ho Kreste Jesu ke fetohile ntate oa lōna ka litaba tse molemo.”—1 Ba-Korinthe 4:15, NW.

² Pejana, Pauluse o ne a ile a etela Korinthe, moo a ileng a bolela har’a Bajode le Bagerike. O ile a thusa ho theha phutheho e Korinthe. Lengolong le leng Pauluse o ile a tšoantša tlhokomelo ea hae le ea ’mè ea anyesang, empa o ne a tšoana le ntate ho Bakorinthe. (1 Ba-Thessalonika 2:7) Joalokaha ntate ea lerato ea nang le bana ka tlhaho a etsa, Pauluse o ile a eletsa bana ba hae ba moea. E ka ’na eaba ha u e-s’o etele lithako tsa Korinthe, empa leha ho le joalo u ka fumana molemo keletsong ena e kang ea ntate e neng e lebisitsoe ho Bakreste ba moo: “Le se ke la lahleha: litloaelano tse mpe li bolisa mekhoa e metle.” (1 Ba-Korinthe 15:33) Ke hobane’ng ha Pauluse a ile a ngolla Bakorinthe seo? Re ka sebelisa keletso eo joang?

Keletso Bakeng sa Bona le Rōna

 3, 4. Re tseba eng ka Korinthe ea lekholo la pele la lilemo le baahi ba eona?

³ Lekholong la pele la lilemo, setsebi sa jeokrafi sa Mogerike Strabo se ile sa ngola: “Korinthe e bitsoa e ‘ruileng’ ka lebaka la khoebo ea eona, kaha e sebakeng sa Isthmus ’me e laola likou tse peli, eo e ’ngoe ea tsona e lebang ka ho toba Asia, ’me e ’ngoe Italy; ’me hoo ho etsa ho fapanyetsana ha thepa ho tsoa linaheng tseo tse peli ho be bobebe.” Lilemo tse ling le tse ling tse peli Lipapali tsa Isthmus tse tummeng li ne li tlisa matšoele a maholo Korinthe.

⁴ Batho ba lulang motseng ona oo e neng e le setsi sa taolo ea ’muso le borapeli ba Aphrodite bo amehileng ka ho khotsofatsa feela litakatso tsa nama ba ne ba le joang? Moprofesa T. S. Evans o ile a hlalosa: “Palo ea baahi mohlomong [e ne] e ka ba ho ka etsang 400 000. E ne e le sechaba se nang le thuto e phahameng, empa se boitšoaro bo hlephileng, bo bileng bo nyonyehang. . . . Baahi ba Bagerike ba Achaïa ba ne ba tsejoa ka menahano e sa phomoleng ea ho batla tsebo ’me ba lula ba laba-labela ka cheseho lintho tse ncha. . . . Tumelo ea bona ea hore boikitlaetso ba motho ka mong ke ba bohlokoa tšebetsong e ne e ka hlohlelletsa bokhelohi habonolo.”

 5. Ke kotsi efe eo baena ba Korinthe ba neng ba talimane le eona?

⁵ Hamorao esita le phutheho e ile ea aroloa ke ba bang ba neng ba ntse ba na le tšekamelo ea ho nahana lintho ka boithati. (1 Ba-Korinthe 1:10-31; 3:2-9) Bothata bo boholo e ne e le hore ba bang ba ne ba re: “Tsoho ea bafu ha e eo.” (1 Ba-Korinthe 15:12, NW; 2 Timothea 2:16-18) Ho sa tsotellehe tumelo ea bona e nepahetseng (kapa tumelo e sa nepahalang), Pauluse o ne a lokela ho ba tšoaea phoso ka bopaki bo hlakileng ba hore Kreste o ne a ile a “tsoha bafung.” Kahoo, Bakreste ba ne ba ka tšepa hore Molimo o tla ba fa ‘tlhōlo ka Morena oa rōna Jesu Kreste.’ (1 Ba-Korinthe 15:20, 51-57) Haeba u ne u le teng moo, na u ne u ka ba kotsing?

 6. Keletso ea Pauluse e ho 1 Ba-Korinthe 15:33 e ne e na le sepheo sefe ka ho khetheha?

⁶ Ha Pauluse a ntse a fana ka bopaki bo tiileng ba hore bafu ba tla tsosoa, o ile a ba bolella: “Le se ke la lahleha: litloaelano tse mpe li bolisa mekhoa e metle.” Sepheo sa keletso eo se ne se ama ba kopanelang le phutheho ba sa lumeleng thuto ea tsoho. Na ba ne ba mpa feela ba sa kholiseha ka ntlha eo ba neng ba sa e utloisise? (Bapisa le Luka 24:38.) Che. Pauluse o ile a ngola hore ‘ba bang har’a lōna ba bolela hore ha ho tsoho,’ kahoo ba neng ba ameha ba ne ba bonahatsa ho se lumele, ba sekametse bokoenehing. Pauluse o ne a hlokomela hantle hore ba ka bolisa mekhoa e metle le menahano ea ba bang.—Liketso 20:30; 2 Petrose 2:1.

 7. Boemo bo bong boo re ka sebelisang 1 Ba-Korinthe 15:33 ho bona ke bofe?

⁷ Re ka sebelisa temoso ea Pauluse joang mabapi le litloaelano? O ne a sa bolele hore ha rea lokela ho thusa e mong ka phuthehong ea fumanang bothata ba ho utloisisa temana ea Bibele kapa thuto. Ka sebele, Juda 22, 23 e re phehella ho fana ka thuso e mohau ho bao ka botšepehi ba nang le lipelaelo tse joalo. (Jakobo 5:19, 20) Leha ho le joalo, keletso ea Pauluse e kang ea ntate ka sebele e lokela ho sebetsa haeba motho a tsoela pele ho iphapanyetsa seo re se tsebang e le ’nete ea Bibele kapa a tsoela pele ho bua ka tsela e belaelang kapa e fosahetseng. Re lokela ho itebela khahlanong le ho ba le litloaelano le motho ea joalo. Ka ho hlakileng, haeba motho ehlile e e-ba mokoenehi, balisa ba moea ba tla nka bohato ho sireletsa mohlape.—2 Timothea 2:16-18; Tite 3:10, 11.

 8. Pono e leka-lekaneng ke efe ha motho e mong a sa lumellane le thuto ea Bibele?

⁸ Re ka boela ra sebelisa mantsoe a Pauluse a kang a ntate a ho 1 Ba-Korinthe 15:33 mabapi le ba ka ntle ho phutheho ba buellang lithuto tsa bohata. Re ka ba le litloaelano le bona joang? Ho ka etsahala haeba re sa khetholle pakeng tsa ba ka thusoang ho ithuta ’nete le ba mpang ba pheha khang e le ho khothalletsa thuto ea bohata. Ka mohlala, mosebetsing oa rōna oa ho paka, re ka kopana le motho ea sa lumeleng ntlha e itseng empa a bonahala a ikemiselitse ho e tšohla ho tsoela pele. (Liketso 17:32-34) Hoo e le hona ha hoa lokela ho baka bothata, hobane ka thabo re hlalosa ’nete ea Bibele ho mang kapa mang eo ka sebele a batlang ho tseba ’nete e joalo, ebile re khutlela ho fana ka bopaki bo kholisang. (1 Petrose 3:15) Leha ho le joalo, ba bang e ka ’na eaba ha ba hlile ha ba thahaselle ho fumana ’nete ea Bibele.

 9. Re lokeka ho arabela joang liphephetsong tse tobisitsoeng tumelong ea rōna?

⁹ Batho ba bangata ba tla pheha khang lihora, libeke, empa e se hobane ba batla ’nete. Ba mpa ba batla ho nyefola tumelo ea e mong ha ka nako e tšoanang ba buella ka boikhantšo thuto ea bona ea Seheberu, Segerike, kapa saense ea ho iphetola ha lintho. Ha Lipaki tse ling li kopana le bona, li ’nile tsa ikutloa li phephelitsoe ’me tsa qetella li bile le litloaelano tse ekelitsoeng tse theiloeng litumelong tsa bolumeli tsa bohata, filosofi, kapa phoso ea saense. Rea hlokomela hore Jesu ha aa ka a lumella hore seo se etsahale ho eena, le hoja a ne a ka hlōla likhang tse pakeng tsa hae le baeta-pele ba bolumeli ba neng ba rutehile Seheberung kapa Segerikeng. Ha Jesu a phephetsoa, o ne a araba ka bokhutšoaane ’me a lebisa tlhokomelo ea hae ho ba ikokobelitseng, linku tsa sebele.—Mattheu 22:41-46; 1 Ba-Korinthe 1:23–2:2.

10. Ke hobane’ng ha ho loketse ho ela hloko bakeng sa Bakreste ba nang le li-computer ’me ba ka khona ho bona melaetsa ea ba bang ea electronic?

¹⁰ Li-computer tsa mehleng ena li butse tsela e lebisang mekhoeng e meng ea litloaelano tse mpe. Lifeme tse ling tsa khoebo li entse hore litho tse ingolisitseng li khone ho romela molaetsa litsamaisong tsa computer hoo batho ba ka khonang ho e fumana ka computer kapa thelefono; ka hona motho a ka ngola molaetsa oo litho tsohle li ka khonang ho o bala. Sena se ’nile sa baka ho bitsoang likhang tsa electronic litabeng tsa bolumeli. Mokreste a ka hoheloa ke likhang tse joalo ’me a ka qeta lihora le mokoenehi kapa le motho e mong ea khaotsoeng phuthehong. Taelo e ho 2 Johanne 9-11 e tiisa keletso ea Pauluse e kang ea ntate ea ho qoba litloaelano tse mpe.a

Qoba ho Lahleha

11. Boemo ba khoebo Korinthe bo ne bo fana ka monyetla ofe?

¹¹ Joalokaha ho boletsoe, Korinthe e ne e le setsi sa khoebo, se nang le mabenkele a mangata le likhoebo. (1 Ba-Korinthe 10:25) Ba bangata ba neng ba tla Lipapaling tsa Isthmus ba ne ba lula litenteng, ’me nakong ea ketsahalo eo bo-rakhoebo ba ne ba rekisa ba le metlotloaneng e ka nkoang kapa ka tlas’a maphephe. (Bapisa le Liketso 18:1-3.) Sena se ne se etsa hore Pauluse a khone ho fumana mosebetsi moo oa ho etsa litente. ’Me o ne a ka sebelisa sebaka sa mosebetsi ho ntšetsa pele litaba tse molemo. Moprofesa J. Murphy-O’Connor oa ngola: “Ho tloha lebenkeleng la ’maraka o phetheselang . . . ho fihla seterateng se tletseng batho Pauluse o ne a e-na le bolokolohi, eseng feela ba ho bua le basebetsi-’moho le bareki, empa hape le bongata bo ka ntle. Ka linako tseo khoebo e fokolang o ne a ka ema monyako ’me a tšoara ka moqoqo bao a neng a nahana hore ba ka mamela . . . Ho thata ho nahana hore botho ba hae bo botle le kholiseho e feletseng li ne li ke ke tsa mo etsa ‘motho ea ikhethang’ tikolohong eo ka potlako, ’me sena se ne se ka hohela batho ba batlang ho tseba se eketsehileng eseng feela bao ho se nang seo ba se etsang, empa esita le ba batlang boitsebiso ka tieo. . . . Basali ba nyetsoeng le basebeletsi ba bona, ba neng ba ile ba utloela ka eena, ba ne ba ka eta ka leqheka la ho ea reka. Linakong tsa khatello, ha mahloriso kapa ho tšoaroa hampe ho fokolang ho hlaha e le tšokelo, balumeli ba ne ba ka itlhahisa e le bareki. Sebaka sa tšebeletso se ne se boetse se etsa hore a kopane le liofisiri tsa ’masepala.”

12, 13. Ke joang 1 Ba-Korinthe 15:33 e ka sebetsang ka ho loketseng sebakeng sa mosebetsi?

¹² Leha ho le joalo, Pauluse e lokela ebe o ile a hlokomela matla a “litloaelano tse mpe” sebakeng sa mosebetsi. Le rōna re lokela ho li hlokomela. Ka ho hlakileng, Pauluse o ile a qotsa boikutlo boo ba bangata ba neng ba e-na le bona: “A re jeng, a re noeng, hobane hosasane re se re ea shoa.” (1 Ba-Korinthe 15:32) Hang-hang ka mor’a seo o ile a fana ka keletso ea hae e kang ea ntate: “Le se ke la lahleha: litloaelano tse mpe li bolisa mekhoa e metle.” Ke joang sebaka sa mosebetsi le ho batla monyaka li ka ’nang tsa amahanngoa le ho hlahisa se ka bang kotsi?

¹³ Bakreste ba batla ho ba botsoalle ho batho ba sebetsang le bona, ’me liphihlelo tse ngata li bontša kamoo sena se ka bang molemo ho bula tsela ea ho fana ka bopaki. Leha ho le joalo, mosebetsi-’moho a ka nka ho ba botsoalle ka tsela e fosahetseng e le ho fetisa memo ea tloaelano e le hore le tle le ithabise hammoho. A ka ntšetsa pele memo feela ea ho ja lijo tsa motšehare ka hore le il’o noa ho hong ka mor’a mosebetsi, kapa ka boikhathollo bo itseng nakong ea mafelo-beke. Motho enoa a ka bonahala a le mosa ’me a lokile, ’me memo e ka bonahala e se na molato. Leha ho le joalo, Pauluse oa re eletsa: “Le se ke la lahleha.”

14. Ke joang Bakreste ba bang ba ’nileng ba lahloa ke litloaelano?

¹⁴ Bakreste ba bang ba ’nile ba lahleha. Butle-butle ba ile ba hōlisa boikutlo bo iketlileng mabapi le ho tloaelana le basebetsi-’moho. Mohlomong bo ile ba hlahisoa ke ho ba le thahasello e tšoanang papaling kapa mosebetsing oa ho ikhatholla. Kapa e ka ’na eaba motho eo eseng Mokreste mosebetsing o mosa haholo ’me oa nahanela, e leng ho ileng ha etsa hore u qete nako e eketsehileng le eo, ebile u rata setsoalle seo ho feta sa ba bang ba ka phuthehong. Tloaelano eo e ka etsa hore u fetoe ke seboka se le seng. E ka bolela hore u ea hae bosiu ’me u senya tloaelo ea ho nka karolo tšebeletsong ea tšimo hoseng. E ka ba le phello ea hore u qetelle u sheba baesekopo kapa video ea mofuta oo Mokreste ka tloaelo a ka e hanang. Re ka ’na ra nahana, ‘Le khale, seo se ke ke sa nketsahalla.’ Empa ba bangata ba lahlehileng e ka ’na eaba ba ne ba arabela joalo. Re lokela ho ipotsa, ‘Ke ikemiselitse hakae ho sebelisa keletso ea Pauluse?’

15. Ke boikutlo bofe bo leka-lekaneng boo re lokelang ho ba le bona mabapi le baahisani?

¹⁵ Seo re sa tsoa se tšohla mabapi le sebaka sa mosebetsi se sebetsa hape le litloaelanong tsa rōna le baahisani. Ka sebele, Bakreste ba Korinthe ea boholo-holo ba ne ba e-na le baahisani. Libakeng tse ling ho tloaelehile ho ba botsoalle haholo le ho tšehetsa baahisani. Libakeng tse thōko ho toropo baahisani ba ka itšetleha ka ba bang ka lebaka la ho ba sebakeng se thōko ho tse ling. Likamano tsa lelapa li matla ka ho khetheha meetlong e meng, ’me seo se etsa hore ho be le limemo tse ngata tsa ho ja ’moho. Ka ho hlakileng, pono e leka-lekaneng ke ea bohlokoa, joalokaha Jesu a bontšitse. (Luka 8:20, 21; Johanne 2:12) Litšebelisanong tsa rōna le baahisani kapa beng ka rōna, na re na le tšekamelo ea ho itšoara joaloka pele re e-ba Bakreste? Ho e-na le hoo, na ha rea lokela ho hlahlobisisa litšebelisano tse joalo hona joale ’me ka likelello tse hlaphohetsoeng re lekole meeli e loketseng?

16. Mantsoe a Jesu a ho Mattheu 13:3, 4 a lokela ho utloisisoa joang?

¹⁶ Jesu o kile a tšoantša lentsoe la ’Muso le peō e ileng ea “oela ka thōko ho tsela, ’me linonyana tsa tla tsa e ja.” (Mattheu 13:3, 4, 19, NW) Nakong eo, mobu o ka thōko ho tsela o ne o e-ba thata kaha batho ba ne ba tsamaea ho oona haholo. Hoa tšoana le ka batho ba bangata. Bophelo ba bona bo tletse baahisani, beng ka bona, le ba bang ba tlang ba bile ba tsamaea, ba ba boloka ba tšoarehile. Sena, kamoo ho leng ka teng, se hatikela mobu oa lipelo tsa bona, se etsa hore o be thata hore peō ea ’nete e mele. Ntho e tšoanang e ka hlahela eo e seng e ntse e le Mokreste.

17. Litloaelano le baahisani le ba bang li ka re susumetsa joang?

¹⁷ Baahisani le beng ka uena ba bang ba lefatše ba ka ’na ba ba le botsoalle ’me ba e-ba le thuso, le hoja ka makhetlo ba sa ka ba bontša thahasello linthong tsa moea haesita le lerato bakeng sa ho loka. (Mareka 10:21, 22; 2 Ba-Korinthe 6:14) Ho ba Bakreste ha rōna ha hoa lokela ho bolela hore re se be le botsoalle, re se bontše boahisani. Jesu o ile a re eletsa ho bontša thahasello ea sebele ho ba bang. (Luka 10:29-37) Empa keletso ea Pauluse e bululetsoe ka ho tšoanang haesita le ho hlokahala bakeng sa ho ba hlokolosi mabapi le litloaelano tsa rōna. Ha re sebelisa keletso e ka pele, re tlameha hore re se ke ra lebala e latelang eo. Ha re sa hopole melao-motheo eo ka bobeli, mekhoa ea rōna e ka ameha. Mekhoa ea hao e joang ha e bapisoa le ea baahisani ba hao kapa beng ka uena tabeng ea botšepehi kapa ho mamela melao ea Cesare? Ka mohlala, ba ka ’na ba ba le boikutlo ba hore ka nako ea lekhetho, ho fana ka litlaleho tse tlaase tsa moputso kapa liphaello tsa khoebo ho lokile, ebile hoa hlokahala bakeng sa ho tsoela pele ba phela. Ba ka u bolella lipono tsa bona ha le inoella kofi kapa nakong ea ketelo e khutšoaane. Seo se ka ama menahano ea hao le mekhoa ea botšepehi joang? (Mareka 12:17; Ba-Roma 12:2) “Le se ke la lahleha: litloaelano tse mpe li bolisa mekhoa e metle.”

Mekhoa ea Bacha

18. Ke hobane’ng ha 1 Ba-Korinthe 15:33 e boetse e sebetsa ho bacha?

¹⁸ Bacha ka ho khetheha ba susumetsoa ke seo ba se bonang le ho se utloa. Na ha u e-s’o hlokomele bana bao boitšisinyo ba bona ba ’mele kapa mekhoa li tšoanang haholo le tsa batsoali ba bona kapa banab’abo bona? Kahoo, ha rea lokela ho makala hore ebe bana ba ka susumetsoa haholo ke bao ba bapalang le bona kapa bao ba kenang sekolo le bona. (Bapisa le Mattheu 11:16, 17.) Haeba mor’a hao kapa morali a e-na le bacha ba buang ka batsoali ba bona ka ho hloka tlhompho, ke hobane’ng u ka nahana hore seo se ke ke sa susumetsa bana ba hao? Ho thoe’ng haeba hangata ba utloa bacha ba bang ba sebelisa puo e sa hloekang? Ho thoe’ng haeba lithaka tsa bona sekolong kapa tikolohong eo le lulang ho eona li ferekanngoa ke mofuta o mocha oa lieta kapa feshene ea mabenyane? Na re lokela ho nahana hore Bakreste ba bacha ba ke ke ba angoa ke tšusumetso e joalo? Na Pauluse o ile a re 1 Ba-Korinthe 15:33 e ama ba seng ba fihletse lilemong tse itseng feela?

19. Ke pono efe eo batsoali ba lokelang ho leka ho e kenya baneng ba bona?

¹⁹ Haeba u motsoali, na u hlokomela keletso eo ha u beha mabaka le bana ba hao ’me u etsa liqeto tse ba amang? Mohlomong ho tla thusa ho amohela hore sena ha se bolele hore ke bacha bohle bao bana ba hao ba kopanang le bona tikolohong eo le lulang ho eona kapa sekolong bao eseng batho ba lokileng. Ba bang ba bona e ka ’na ea e-ba ba lokileng le ba hlomphehang, joalokaha baahisani ba hao ba bang, beng ka uena, le batho bao u sebetsang le bona ba le joalo. Leka ho thusa bana ba hao ho bona sena le ho hlokomela hore u leka-lekane tšebelisong ea hao ea keletso ea Pauluse e bohlale, e kang ea ntate ho Bakorinthe. Ha ba hlokomela tsela eo u leka-lekanyang lintho ka eona, ho ka ba thusa ho u etsisa.—Luka 6:40; 2 Timothea 2:22.

20. Bacha, le talimane le phephetso efe?

²⁰ Lōna ba sa ntseng ba le bacha, lekang ho hlokomela kamoo le ka sebelisang keletso e bohlale ea Pauluse, le ntse le tseba hore ke ea bohlokoa ho Mokreste e mong le e mong, e monyenyane kapa e moholo. Sena se tla hloka boiteko bo boholo le boikemisetso, empa hobane’ng u sa ikemisetse ho tobana le phephetso eo? Hlokomela hore hase hore hobane feela u tsebile ba bang ba bacha bao ho tloha bongoaneng ba ke ke ba susumetsa mekhoa ea hao, ba ke ke ba bolisa mekhoa eo u ntseng u e bōpa joaloka mocha oa Mokreste.—Liproverbia 2:1, 10-15.

Mehato e Tobileng ea ho Sireletsa Mekhoa ea Rōna

21. (a) Re na le tlhoko efe mabapi le litloaelano? (b) Ke hobane’ng ha re ka kholiseha hore litloaelano tse ling li ka ba kotsi?

²¹ Bohle re hloka ho tloaelana le ba itseng. Leha ho le joalo, re tlameha ho hlokomela ’nete ea hore litloaelano tsa rōna li ka re susumetsa, hantle kapa hampe. Ho bile joalo ho Adama le ho e mong le e mong ka lilemo tse makholo ho tloha nakong eo. Ka mohlala, Josafate, morena e molemo oa Juda, o ne a thabela kamohelo le tlhohonolofatso e tsoang ho Jehova. Empa ka mor’a hore a lumelle mor’a hae ho nyala morali oa Morena Akabe oa Iseraele, Josafate o ile a qala ho arolelana botsoalle le Akabe. Botsoalle boo bo bobe bo ile ba batla bo qosa Josafate bophelo ba hae. (2 Marena 8:16-18; 2 Likronike 18:1-3, 29-31) Haeba re etsa liqeto tse booatla mabapi le litloaelano tsa rōna, hoo ho ka ba kotsi ka tsela e tšoanang.

22. Re lokela ho ba le boikemisetso bofe?

²² Kahoo, a re nkeng ka ho teba keletso e lerato eo Pauluse a re fang eona ho 1 Ba-Korinthe 15:33. Ao hase mantsoe feela ao e ka bang re a utloile hangata hoo re ka bang ra a pheta ka hlooho. A bonahatsa kameho e kang ea ntate eo Pauluse a neng a e-na le eona bakeng sa baena ba hae le likhaitseli tsa hae ba Korinthe, ’me, ha ho atolosoa, le bakeng sa rōna. ’Me ntle le pelaelo a na le keletso eo Ntate oa rōna oa leholimo a re fang eona hobane a batla hore boiteko ba rōna bo atlehe.—1 Ba-Korinthe 15:58.

[Mongolo o botlaaseng ba leqephe]

Na U sa Hopola?

◻ Pauluse o ile a ngola 1 Ba-Korinthe 15:33 ka lebaka lefe le khethehileng?

◻ Re ka sebelisa keletso ea Pauluse joang sebakeng sa mosebetsi?

◻ Re lokela ho ba le pono efe e leka-lekaneng ka baahisani?

◻ Ke hobane’ng ha 1 Ba-Korinthe 15:33 e le keletso e loketseng ka ho khethehileng bakeng sa bacha?

[Setšoantšo se leqepheng la 17]

Pauluse o ile a sebelisa sebaka sa mosebetsi ho ntšetsa pele litaba tse molemo

[Setšoantšo se leqepheng la 18]

Bacha ba bang ba ka bolisa mekhoa ea hao ea Bokreste