Na u sa Hopola?
Na u thabetse ho bala litokollo tsa morao-rao tsa Molula-Qhooa? Koana, ak’u bone haeba u ka arabela lipotso tse latelang:
◻ Kaha mangeloi a sa utloeng a ile a ahloleloa ho ea Tartaruse, hona ho ile ha bolela eng bakeng sa oona? (2 Petrose 2:4, NW)
Ha a sa na sebaka ka hare ho mokhatlo o hlophisitsoeng o halalelang oa Jehova ’me joale a khaotsoe leseling la bomolimo. Leha ho le joalo, a ntse a sebetsa tlas’a tataiso ea Satane ’me a tsoela pele ho boloka kopano e haufi-ufi le batho, a leka ka matla ho laola banna, basali, esita le bana. (Tšenolo 12:12, 17)—4/15 leqephe 14.
◻ Ke hobane’ng ha e le habohlokoa ho “hloea bobe” mahlong a Jehova? (Pesaleme ea 97:10)
Ba hloileng bobe ba ke ke ba batla litsela tsa ho inehela litakatsong tsa bona. Ka lehlakoreng le leng, batho ba sa bo hloeang ba ka ’na ba bo qoba ponahalong ea mahlo empa likelellong ba lakatsa eka ba ka be ba kopanela linthong tse mpe.—4/15, leqephe 21.
◻ Setšoantšong sa Jesu sa litalenta, ho fanoa ka thuto efe e tebileng bakeng sa bohle ba ipolelang e le balateli ba Kreste? (Mattheu 25:14-30)
Ba tlameha ho sebeletsa ho eketsa letlotlo la Morena oa bona oa leholimo ka ho kopanela ka botlalo mosebetsing oa boboleli. Ke feela ha ba etsa joalo ba ka tiisetsoang hore ba tla fumana pabatso le moputso tse tsoang ho Jesu. Ka hona ba qoba ho lahleloa lefifing ka ntle le timetsong e felletseng.—5/1, leqephe 9.
◻ Jesu o ne a bolela eng ha a bolella barutuoa ba hae ho rapela hore: “U se ke ua re isa molekong”? (Mattheu 6:13)
Mantsoe ana ha a fane ka maikutlo a hore Jehova o re leka hore re etse sebe. Ho e-na le hoo, rōna ha e le hantle, re ka kōpa Jehova hore a se ke a re lumella ho inehela ha re lekoa kapa ha re hatelloa hore re se ke ra mo utloa. Re ka ipiletsa ho Ntate oa rōna hore a tataise mehato ea rōna e le hore ho se be moleko o ka tlang tseleng ea rōna o moholo haholo bakeng sa rōna hore re ka o mamella. (1 Ba-Korinthe 10:13)—5/15, leqephe 19.
◻ Na ho loketse hore Mokreste a amohele ente ea karolo ea mali a arotsoeng, joaloka globulin kapa albumin tse sireletsang mafung?
Ba arabela molaong oa Molimo, Bakreste ha ba amohele litšelo tsa mali tsa metsoako ea ’ona ea sehlooho—karolo e mokeli-keli e se nang ’mala oa mali, lisele tse khubelu tsa mali, lisele tse tšoeu tsa mali, kapa li-platelet. Leha ho le joalo, ba bang ba Lipaki tsa Jehova, ka baka la letsoalo ba ikutloile hore ba ka khona ho amohela liente tsa lihaha-’mele tsa karolo ena e mokeli-keli e se nang ’mala oa mali. Ka ho thahasellisang, tse ling tsa lihaha-’mele tsena ka tlhaho li feta phallong ea mali ea mosali oa moimana ho ea tsamaisong ea mali e arohaneng ea lesea la hae le ka popelong.—6/1, maqephe 30, 31.
◻ Ho hlatsoa ha Jesu maoto a barutuoa ba hae nakong ea Paseka ea ho qetela ea sebele ho sebelelitse morero ofe?
Jesu o ne a ruta barutuoa ba hae thuto ea boikokobetso. Ha ho ea lokelang ho batla sebaka sa pele, a nahana hore o bohlokoa. Ho e-na le hoo, bohle ba lokela ho latela mohlala oa Jesu ’me ba ikemisetse ho sebeletsana ntle ho khethollo, ho sa tsotellehe hore na mosebetsi e ka ’na ea ba o tlaase kapa o sa thabiseng hakae. (Johanne 13:12-17)—6/15, leqephe 9.
◻ Ke ka kutloisiso efe Bajode ba Berea ba ileng ba ‘hlahlobisisa’ Mangolo? (Liketso 17:11, NW)
Hase hore Baberea ba ne ba na le pelaelo ka Pauluse le ka molaetsa oo a neng a ba tliselitse oona, empa ba ile ba etsa patlisiso ho paka hore Jesu e ne e le Messia. Hore e be ba bangata ba bona ba ile ba fetoha balumeli ho bontša hore sepheo sa bona e ne e le sa sebele. (Liketso 17:12)—6/15, leqephe 18.
◻ “Buka ea Lintoa tsa Jehova” e ne e le eng? (Numere 21:14, NW)
Ena e ne e le histori e tšepahalang ea lintoa tsa Molimo molemong oa batho ba oona. Mohlomong e ile ea qala ka ho hlōla ha Abrahama bafutuhi ba hlometseng ba Lefatše la Pallo joalokaha ho tlalehiloe ho Genese khaolo 14. Qetello e hlollang ea buka e tla ba “ntoeng ea letsatsi le leholo la Molimo o matla ’ohle” ka Harmagedone. (Tšenolo 16:14, 16)—7/1, maqephe 20, 22.
◻ Lentsoe la Molimo, Bibele, le re thusa joang ho mamella bohloko?
Bibele e re bolella lebaka la ho lumella ha Jehova bohloko, ’me e boetse e re tiisetsa hore haufinyane bohloko bo tla fela. (Ba-Roma 5:12; Tšenolo 21:1-5)—7/15, maqephe 4, 5.
◻ Batho ba Molimo kajeno ba ka “bonahatsa khanya ea Jehova joaloka liipone” joang? (2 Ba-Korinthe 3:18, NW)
Khanya ea Molimo e khanya ka “litaba tse molemo tse khanyang tse mabapi le Kreste, eo e leng setšoantšo sa Molimo.” Lipaki tsa Jehova li bonahatsa khanya ena ka ho bua ka khanya ea Jehova le khanya ea ’Muso oa hae ka Mora oa hae. (2 Ba-Korinthe 4:4-6, NW)—7/15, maqephe 15, 16.
◻ Motho o lokela ho kolobetsoa neng?
Kolobetso ke mohato oo motho a o nkang ha a se a entse boinehelo bo felletseng, a sa itšiele letho, le bo sa itšetlehang ka maemo a itseng ho Jehova ka Kreste Jesu ho etsa thato ea Molimo.—8/1, leqephe 14.