“Molimo o Rata Mofani ea Nyakaletseng”

JEHOVA ke mothofatso oa ho fana ka seatla se bulehileng. Ka sebele, Bibele e bolela hore ke Mofani oa “mpho e ’ngoe le e ’ngoe e molemo le neo e ’ngoe le e ’ngoe e phethahetseng.” (Jakobo 1:17) Ka mohlala, nahana ka lintho tseo Molimo a li bōpileng. O entse lijo tse hlabosang, eseng tse bosula; lipalesa tse mebala, eseng tse thōkoa; ho likela ha letsatsi ho hlollang, eseng ho sa ipiletseng. E, tšobotsi e ’ngoe le e ’ngoe ea pōpo ea Jehova e fana ka bopaki ba lerato la hae le ho fana ka seatla se bulehileng. (Pesaleme ea 19:1, 2; 139:13, 14) Ho feta moo, Jehova ke Mofani ea nyakaletseng. O thabela ho etsetsa bahlanka ba hae se molemo.—Pesaleme ea 84:11; 149:4.

Baiseraele ba ile ba laeloa hore ba bonahatse ho fana ha Molimo ka seatla se bulehileng litšebelisanong tsa bona. Moshe o ile a ba bolella: “U se ke ua thatafatsa pelo ea hao, ’me u se fupare liatla tsa hao pel’a ngoan’eno ea fumanehileng. U mo fe hle, ’me pelo ea hao e se belaele ha u mo fa.” (Deuteronoma 15:7, 10) Kaha ho fana ho ne ho lokela ho tsoa pelong, Baiseraele ba ne ba lokela ho thabela liketso tsa ho fana ka seatla se bulehileng.

Bakreste ba ile ba fuoa keletso e tšoanang. Ka sebele, Jesu o ile a bolela hore ho na le ‘thabo ho faneng.’ (Liketso 20:35) Barutuoa ba Jesu ba ile ba beha mohlala oa ho fana ka nyakallo. Ka mohlala, Bibele e tlaleha hore Jerusalema ba ileng ba fetoha balumeli ba ile “ba qala ho rekisa matlotlo le thepa tsa bona ’me ba abela bohle chelete eohle ea tse rekisitsoeng, hantle feela kamoo mang kapa mang a neng a hloka kateng.”—Liketso 2:44, 45.

Empa hamorao Bajudea bana ba fanang ka seatla se bulehileng ba ile ba futsaneha. Bibele ha e bolele ka ho hlakileng hore na boemo bona ba bona bo ile ba bakoa ke eng. Liithuti tse ling li bolela hore e ka ’na eaba tlala ea sekoboto eo ho buuoang ka eona ho Liketso 11:28, 29 e ne e le sona sesosa. Leha ho le joalo, Bakreste ba Bajudea ba ne ba le maqakabetsing, ’me Pauluse o ne a batla ho tiisa hore litlhoko tsa bona li ne li tla hlokomeloa. O ne a tla etsa seo joang?

Koleke Bakeng sa ba Hlokang

Pauluse o ile a batla thuso ho liphutheho tse hōle haholo joaloka Macedonia, ’me o ile a lokisetsa hore ho ntšoe koleke molemong oa Bakreste ba futsanehileng ba Judea. Ha a ngolla Bakorinthe, Pauluse o ile a re: “Feela joalokaha ke ile ka fana ka litaelo ho liphutheho tsa Galatia, le etse ka tsela eo le lōna. Letsatsi le leng le le leng la pele la beke e mong le e mong oa lōna tlung ea hae a a behelle ka thōko ho hong ho bolokiloeng kamoo ebang o atleha kateng.”a—1 Bakorinthe 16:1, 2.

Pauluse o ne a rerile hore ka potlako chelete ena e fetisetsoe ho barab’abo rōna ba Jerusalema, empa Bakorinthe ba ile ba lieha ho arabela litaelong tsa Pauluse. Hobane’ng? Na ba ne ba sa nahanele maqakabetsi a barab’abo bona ba Judea? Che, etsoe Pauluse o ne a tseba hore Bakorinthe ba ne ba “ateloa ke ntho e ’ngoe le e ’ngoe, tumelong le lentsoeng le tsebong le ho tieeng hohle.” (2 Bakorinthe 8:7) Mohlomong, ba ne ba tšoarehile haholo ka ho hlokomela lintho tse ling tsa bohlokoa tseo Pauluse a ileng a li bolela lengolong la hae la pele leo a neng a ba ngoletse lona. Empa joale boemo bo ne bo potlakile Jerusalema. Kahoo Pauluse o ile a bua ka taba ena lengolong la hae la bobeli le eang ho Bakorinthe.

Ho Ipiletsa Tabeng ea ho Fana ka Seatla se Bulehileng

Pele, Pauluse o ile a bolella Bakorinthe ka Bamacedonia, bao tsela eo ba ileng ba arabela ka eona mosebetsing oa liphallelo e bileng mohlala. Pauluse o ile a ngola: “Nakong ea teko e khōlō tlas’a mahloreho bongata ba thabo ea tsona le bofutsana bo tebileng ba tsona li ile tsa atisa maruo a ho fana ha tsona ka seatla se bulehileng.” Ho ne ho sa hlokahale hore Bamacedonia ba qhoqhoe. Ho fapana le moo, Pauluse o ile a bolela hore “ka ho rata ha tsona li ’nile tsa re kōpa ka kōpo e tiileng haholo tokelo ea ho fana ka mosa.” Ho fana ha Bamacedonia ka nyakallo ka seatla se bulehileng ke ho tsotehang haholo ha re nahana hore bona ka bobona ba ne ba le ka har’a “bofutsana bo tebileng.”—2 Bakorinthe 8:2-4.

Ha a rorisa Bamacedonia, na Pauluse o ne a leka ho tsosa moea oa tlhōlisano har’a Bakorinthe? Ho hang, etsoe o ne a tseba hore ena e ne e se tsela e loketseng ea ho susumetsa. (Bagalata 6:4) Ho feta moo, o ne a tseba hore ho ne ho sa hlokahale hore Bakorinthe ba hlabisoe lihlong e le hore ba etse ntho e nepahetseng. Ho e-na le hoo, o ne a kholisehile hore ka sebele Bakorinthe ba ne ba rata barab’abo bona ba Judea ’me ba ne ba lakatsa ho etsa monehelo mosebetsing oa liphallelo. O ile a ba bolella: “Ho se ho fetile selemo le qalile eseng feela ho etsa empa le ho batla ho etsa.” (2 Bakorinthe 8:10) Ka sebele, litšobotsing tse ling tsa mosebetsi oa liphallelo, Bakorinthe ka bobona ba ne ba beha mohlala. Pauluse o ile a re ho bona: “Ke tseba ho itokisa ha lōna likelellong hoo ke ithorisang ka hona ho ba Macedonia mabapi le lōna,” ’me a eketsa: “Cheseho ea lōna e hlohlellelitse bongata ba bona.” (2 Bakorinthe 9:2) Leha ho le joalo, joale ho ne ho hlokahala hore Bakorinthe ba fetole cheseho ea bona le boikemisetso ba bona ba kelello hore e be ketso.

Kahoo, Pauluse o ile a ba bolella: “E mong le e mong a a etse feela joalokaha a entse qeto e tiileng pelong ea hae, eseng ka lekhonono kapa ka ho qobelloa, kaha Molimo o rata mofani ea nyakaletseng.” (2 Bakorinthe 9:7) Kahoo, sepheo sa Pauluse e ne e se ho hatella Bakorinthe, etsoe motho e ke ke ea e-ba mofani ea nyakaletseng haeba a qobelloa. Ka ho hlakileng, Pauluse o ne a nka hore tšusumetso e loketseng e ne e se e ntse e le teng, hore e mong le e mong o ne a se a ntse a ikemiselitse ho fana. Ho phaella moo, Pauluse o ile a ba bolella: “Haeba ho itokisa ho le teng pele, ho amoheleha ka ho khethehileng ho ea ka seo motho a nang le sona, eseng ho ea ka seo motho a se nang sona.” (2 Bakorinthe 8:12) E, ha boikemisetso bo le teng—ha motho a susumetsoa ke lerato—seo a fanang ka sona e tla ba se amohelehang ho Molimo, ho sa tsotellehe hore na se bonahala se le senyenyane hakae.—Bapisa le Luka 21:1-4.

Bafani ba Nyakaletseng Kajeno

Mosebetsi oa liphallelo o molemong oa Bakreste ba Judea ke mohlala o ikhethang bakeng sa mehla ea rōna. Lipaki tsa Jehova li qalile phutuho ea lefatše lohle ea boboleli, li tlisa lijo ho ba limilione ba qetiloeng ke tlala moeeng. (Esaia 65:13, 14) Li etsa sena ka lebaka la ho mamela taelo ea Jesu: “Ka hona e-eang ’me le etse batho ba lichaba tsohle barutuoa, le ba kolobetsa . . . le ba ruta ho boloka lintho tsohle tseo ke le laetseng tsona.”—Matheu 28:19, 20.

Ho phethahatsa thōmo ena ha ho bonolo. Ho akarelletsa ho hlokomela mahae a baromuoa le mehaho ea lekala e fetang lekholo lefatšeng lohle. Ho boetse ho akarelletsa ho haha Liholo tsa ’Muso le Liholo tsa Kopano e le hore barapeli ba Jehova ba tle ba be le libaka tse tšoanelehang tseo ba kopanelang ho tsona le bakeng sa ho khothatsana. (Baheberu 10:24, 25) Ka linako tse ling, Lipaki tsa Jehova li fana ka liphallelo libakeng tse harasoantsoeng ke koluoa ea tlhaho.

Nahana hape ka litšenyehelo tse ngata haholo tsa khatiso. Beke e ’ngoe le e ’ngoe, ka karolelano, ho hatisoa likopi tse 22 000 000 tsa Molula-Qhooa kapa likopi tse ka bang 20 000 000 tsa Tsoha! Ho phaella phepelong ena ea kamehla ea lijo tsa moea ho na le libuka tse limilione, libukana, lik’hasete tse hlahisang molumo feela, le lik’hasete tsa video tse hlahisoang selemo le selemo.

Mosebetsi ona oohle o tšehetsoa joang? Ka menehelo ea boithatelo. Menehelo ena ha e etsoe bakeng sa mponeng kapa ka sepheo sa boithati, empa e etsoa bakeng sa ho ntšetsa pele borapeli ba ’nete. Kahoo, ho fana ho joalo ho tlisetsa mofani thabo, hammoho le tlhohonolofatso ea Molimo. (Malakia 3:10; Matheu 6:1-4) Esita le bana har’a Lipaki tsa Jehova ba bontša hore ke bafani ba seatla se bulehileng, ba nyakaletseng. Ka mohlala, ka mor’a ho utloa ka tšenyo e bakiloeng ke leholiotsoana karolong e ’ngoe ea United States, Allison ea lilemo li ’nè o ile a etsa monehelo oa $2 (R12). O ile a ngola: “Ena ke chelete eohle eo ke nang le eona kotikoting eo ke bolokang chelete ho eona. Kea tseba hore bana ba lahlehetsoe ke lintho tsohle tsa bona tsa ho bapala le libuka le lipopi. Mohlomong le ka sebelisa chelete ena ho rekela ngoanana ea lekanang le ’na buka.” Maclean, ea lilemo li robeli, o ile a ngola hore o thabetse hore ebe ha ho le ea mong oa barab’abo rōna ea bolailoeng ke sefefo. O ile a phaella: “Ke fumane $17 [R107] ha ke ntse ke rekisa likoahelo tsa mabili a likoloi le Ntate. Ke ne ke ikemiselitse ho reka ntho e ’ngoe ka chelete ea ka, empa joale ke ile ka nahana ka barab’eso.”—Bona le lebokose le ka holimo.

Ka sebele, pelo ea Jehova e thabela ho bona ba banyenyane le ba baholo ba beha lithahasello tsa ’Muso oa hae pele ka ho mo ‘tlotlisa ka lintho tsa bona tsa bohlokoa.’ (Liproverbia 3:9, 10, NW) Ho hlakile hore, ha ho motho eo ha e le hantle a ka ruisang Jehova, kaha lintho tsohle ke tsa hae. (1 Likronike 29:14-17) Empa ho tšehetsa mosebetsi ke tokelo e fang morapeli monyetla oa ho bontša lerato la hae ho Jehova. Re leboha e mong le e mong eo pelo ea hae e mo susumelitseng ka tsela e joalo.

[Lebokose le leqepheng la 25]

Litsela Tseo ba Bang ba Khethang ho Fana ka Tsona Menehelo Bakeng sa Mosebetsi oa Lefatše ka Bophara

Ba bangata ba behella ka thōko kapa ba lekanyetse esale pele chelete eo ba e kenyang mabokoseng a monehelo. Khoeli e ’ngoe le e ’ngoe liphutheho li fetisetsa chelete ena ntlo-khōlō ea lefatše e Brooklyn, New York, kapa ofising ea lekala e haufi.

Menehelo ea boithatelo ea chelete e ka boela ea romeloa ka ho toba ho Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, kapa ofising ea Mokhatlo e sebeletsang naha ea heno. Mabenyane kapa lintho tse ling tsa bohlokoa le tsona li ka neheloa. Lengolo le lekhutšoanyane le bolelang hore lintho tse joalo ke mpho e tobileng le lokela ho tsamaea le menehelo ena.

Tokisetso ea Menehelo e Fanoang Tlas’a Maemo a Itseng

Chelete e ka fuoa Mokhatlo oa Watch Tower ka tokisetso e khethehileng ea hore haeba ho hlaha se etsang hore ea faneng ka eona a e hloke, chelete eo e tla khutlisetsoa ho eena. Bakeng sa boitsebiso bo eketsehileng, ka kōpo ikopanye le Accounting Office atereseng e bontšitsoeng leqepheng le latelang.

Ho Fana ho Reriloeng

Ho phaella limphong tse tobileng tsa chelete le menehelo ea chelete e fanoang tlas’a maemo a itseng, ho na le mekhoa e meng ea ho fana e ka tsoelang mosebetsi oa ’Muso lefatšeng ka bophara molemo. Ena e akarelletsa:

Inshorense: Mokhatlo oa Watch Tower o ka ngolisoa e le mojalefa oa inshorense ea bophelo kapa oa tokisetso ea ho tlohela mosebetsi/penshene.

Li-Stock le Li-Bond: Li-stock le li-bond li ka ’na tsa fuoa Mokhatlo oa Watch Tower e le mpho e tobileng kapa ka ho etsa tokisetso ea hore mofani a ’ne a lefshoe chelete eo li e kenyang.

Litša le Mehaho: Litša le mehaho tse ka rekisoang li ka ’na tsa fuoa Mokhatlo oa Watch Tower ebang ke ka ho li etsa mpho e tobileng kapa ho li boloka ho mong’a tsona, ea ka tsoelang pele a lula ho tsona nakong ea ha a sa phela. Motho o lokela ho tsebisa Mokhatlo pele a ngolisa setša sefe kapa sefe kapa mohaho ka lebitso la Mokhatlo.

Likabo Tsa Lefa: Thepa kapa chelete e ka ’na ea fuoa Mokhatlo oa Watch Tower e le lefa ka lengolo la kabo ea lefa le entsoeng ka molao.

Accounting Office e lokela ho tsebisoa le ho fuoa kopi ea tokomane leha e le efe e amanang le litokisetso tsena. Ba nang le thahasello ho leha e le efe ea litokisetso tsena tsa ho fana ho reriloeng ba lokela ho ikopanya le Accounting Office, ka lengolo kapa ka thelefono, atereseng e ngotsoeng mona tlaase kapa ofising ea Mokhatlo e sebeletsang naha ea heno.

ACCOUNTING OFFICE

Watch Tower Bible and Tract Society of Pennsylvania

Private Bag X2067,

Krugersdorp, 1740,

South Africa

Thelefono: (011) 761-1000

[Mongolo o botlaaseng ba leqephe]

[Setšoantšo se leqepheng la 25]

Mesebetsi ea Lipaki tsa Jehova e tšehetsoa ka menehelo ea boithatelo