Bohlokoa bo Fetisisang ba Thuto ea Molimo
“Ka sebele ke hlile ke boetse ke nka lintho tsohle e le tahlehelo ka lebaka la bohlokoa bo fetisisang ba tsebo ea Kreste Jesu.”—BAFIL. 3:8.
1, 2. Bakreste ba bang ba khethile ho etsa’ng, hona hobane’ng?
ROBERT o ile a ipabola sekolong a sa le monyenyane. Ha a le lilemo li robeli feela, e mong oa matichere a hae o ile a etela habo ka ho khetheha ’me a mo bolella hore a ka fihlela lintho tse khōlō. O ile a mo lakaletsa hore ka le leng la matsatsi e be ngaka. Seo a neng a se finyella lithutong tsa hae sekolong se phahameng, se ne se etsa hore a tšoanelehe hore a ka kena univesithing efe kapa efe ho tse itlhommeng pele naheng ea habo. Empa e le hore Robert e be pula-maliboho oa kamehla, o ile a khetha ho tlohela seo batho ba bangata ba neng ba nka hore ke monyetla oo motho a ke keng a hlola a e-ba le oona bophelong.
2 Joaloka Robert, Bakreste ba bangata—ba banyenyane le ba baholo—ba na le menyetla ea ho tsoela pele tsamaisong ea lintho ea hona joale. Ba bang ba ikhethela hore ba se ke ba sebelisa menyetla eo ka botlalo, e le hore ba phehelle lipakane tsa moea. (1 Bakor. 7:29-31) Ke eng e susumelletsang Bakreste ba kang Robert hore ba ikakhele ka setotsoana mosebetsing oa boboleli? Lebaka le ka sehloohong ke hore ba rata Jehova, empa ho phaella moo, ba boetse ba ananela bohlokoa bo fetisisang ba thuto ea Molimo. Na morao tjee u kile ua ipotsa hore na bophelo ba hao bo ka be bo le joang hoja ha ua ka ua tseba ’nete? Ho nahana ka melemo e meng e hlaheletseng eo re e fumanang ka lebaka la ho rutoa ke Jehova, ho tla re thusa hore re lule re hopola hore litaba tse molemo ke tsa bohlokoa le hore re chesehele ho li bolella ba bang.
Ke Tlotla e Khōlō ho Rutoa ke Molimo
3. Ke hobane’ng ha re ka kholiseha hore Jehova o ikemiselitse ho ruta batho ba sa phethahalang?
3 Kaha Jehova o molemo, o ikemiselitse ho ruta batho ba sa phethahalang. Ha Esaia 54:13 e profeta ka Bakreste ba tlotsitsoeng, e re: “Bara bohle ba hao e tla ba batho ba rutoang ke Jehova, ’me khotso ea bara ba hao e tla ba ngata.” Mantsoe ao a sebetsa ka tsela e sa tobang le ho “linku tse ling” tsa Kreste. (Joh. 10:16) Sena se totobala boprofeteng bo phethahalang mehleng ea rōna. Esaia o ile a bona ka pono batho ba tsoang lichabeng tsohle ba phallela borapeling ba ’nete. O hlalosa hore ba bolellana se latelang: “[A] re nyoloheleng thabeng ea Jehova, ntlong ea Molimo oa Jakobo; o tla re rupela ka litsela tsa hae, ’me re tla tsamaea litseleng tsa hae.” (Esa. 2:1-3) Ke tlotla e kaakang ho rutoa ke Molimo!
4. Jehova o batla hore bao a ba rutang ba etse eng?
4 Re lokela ho etsa’ng e le hore re rutoe ke Molimo? Ntho e ka sehloohong e hlokahalang ke hore motho a ikokobetse ’me a ikemisetse ho ithuta. Mopesaleme Davida o ile a ngola a re: “Jehova o molemo ’me o lokile. . . . O tla ruta ba bonolo tsela ea hae.” (Pes. 25:8, 9) Jesu eena o ile a re: “Ke u rorisa phatlalatsa, Ntate, Morena oa leholimo le lefatše, hobane ka hloko u patetse ba bohlale le ba nang le kelello lintho tsena, ’me u li senoletse bana.” (Luka 10:21) Na ha u ikutloe u rata Molimo eo ea ‘fanang ka mosa o sa tšoanelang ho ba ikokobelitseng’?—1 Pet. 5:5.
5. Re thusitsoe ke eng hore re tsebe Molimo?
5 Kaha re bahlanka ba Jehova, na re ka ikotla lifuba ka ho re ke ka bohlale ba rōna hore ebe re tseba ’nete? Che. Ha e le hantle, ka borōna feela, re ne re ke ke ra tseba Molimo. Jesu o ile a re: “Ha ho motho ea ka tlang ho ’na ntle leha a huloa ke Ntate ea nthomileng.” (Joh. 6:44) Ka mosebetsi oa boboleli le ka moea o halalelang, Jehova o hula batho ba kang linku, e leng “lintho tse lakatsehang tsa lichaba tsohle.” (Hag. 2:7) Na ua leboha hore ebe u e mong oa bao Jehova a ba huletseng ho Mora oa hae?—Bala Jeremia 9:23, 24.
Matla a Etsang Hore Batho ba Ntlafatse Bophelo ba Bona
6. Ha batho ba amohela “tsebo ea Jehova,” seo se ka ba susumetsa joang ka tsela e hlollang?
6 Boprofeta ba Esaia bo sebelisa papiso e monate ha bo hlalosa kamoo botho ba batho bo fetohang kateng mehleng ea rōna. Batho ba neng ba le mabifi, ba se ba bōpa khotso. (Bala Esaia 11:6-9.) Batho bao e kileng ea e-ba lira ka lebaka la ho se tšoane ka morabe, sechaba, moloko, kapa mabaka a mang a amanang le tsela eo ba hōlisitsoeng ka eona, ba ithutile ho phela hammoho ka kutloano. Ho joalokaha eka ba ‘teile lisabole tsa bona hore e be mehoma.’ (Esa. 2:4) Ke hobane’ng ha ho e-na le liphetoho tsee tse hlollang? Batho ba amohetse “tsebo ea Jehova” ’me ba e sebelisitse bophelong ba bona. Le hoja bahlanka ba Molimo ba sa phethahala, ke mokhatlo oa ’nete oa machaba oa bara ba motho. Kaha litaba tse molemo li khahla batho ba mefuta eohle ’me li hlahisa litholoana tse molemo, seo ke sesupo sa hore thuto ea Molimo ke ea bohlokoa ka ho fetisisa.—Mat. 11:19.
7, 8. (a) Tse ling tsa “lintho tse metseng ka matla” tseo thuto ea Molimo e thusang batho hore ba li phethole ke life? (b) Ke eng e bontšang hore thuto ea Molimo e etsa hore Jehova a rorisoe?
7 Moapostola Pauluse o ile a tšoantša mosebetsi o etsoang ke bahlanka ba Molimo oa ho paka le ntoa ea moea. O ile a ngola a re: “Lihlomo tsa ntoa ea rōna hase tsa nama, empa li matla ka Molimo bakeng sa ho phethola lintho tse metseng ka matla. Etsoe re phethola menahano le ntho e ’ngoe le e ’ngoe e phahameng e phahamisoang khahlanong le tsebo ea Molimo.” (2 Bakor. 10:4, 5) Tse ling tsa “lintho tse metseng ka matla” tseo thuto ea Molimo e lokollang batho ho tsona ke life? Ke bokhoba ba lithuto tsa bohata, litumela-khoela le lifilosofi tsa batho, ha re bolela tse seng kae. (Bakol. 2:8) Ho rutoa ke Molimo ho thusa batho hore ba lahle mekhoa e mebe ’me ba loanele ho ba le litšobotsi tse khahlisang Molimo. (1 Bakor. 6:9-11) Ho ntlafatsa bophelo ba lelapa. Ho bile ho fa ba se nang tšepo morero oa sebele oa ho phela. Thuto ea mofuta ona ke eona e hlokahalang kajeno.
8 E ’ngoe ea litšobotsi tseo Jehova a thusang batho hore ba be le tsona ke botšepehi, joalokaha ketsahalo e latelang e bontša. (Baheb. 13:18) Mosali e mong oa India o ile a lumela ho ithuta Bibele ’me ka mor’a nako o ile a tšoaneleha hore e ka ba mohoeletsi ea sa kolobetsoang. Ka letsatsi le leng ha a khutlela hae ka mor’a ho sebetsa moo ho neng ho hahuoa Holo ea ’Muso, o ile a thola sekhama sa khauta se ka jang liranta tse likete tse robeli haufi le seemelo sa libese. Le hoja e ne le mofutsana, o ile a isa sekhama seo sepoleseng hore se batlisoe mong’a sona. Ofisiri ea sepolesa e neng e le moo e ile ea tšoha! Hamorao, ofisiri e ’ngoe e ile ea mo botsa: “Ke hobane’ng ha u sa inkela sona?” O ile a hlalosa a re, “Thuto ea Bibele e mphetotse, kahoo hona joale kea tšepahala.” Ofisiri eo e ile ea bua e hloletsoe le moholo oa Mokreste ea neng a felehelitse mosali eo ha a tla sepoleseng ea re: “Ho na le batho ba fetang limilione tse 38 profinseng ena. Haeba le ka thusa batho ba leshome hore ba tšoane le mosali enoa, le tla be le sebelitse haholo.” Ruri ha re nahana ka batho ba limilione ba fetotsoeng ke thuto ea Molimo, re na le mabaka a mangata a ho rorisa Jehova!
9. Ke eng e thusang batho hore ba etse liphetoho tse khōlō bophelong ba bona?
9 Matla a fetolang a Lentsoe la Molimo, hammoho le thuso eo Jehova a fanang ka eona ka moea oa hae o halalelang, a thusa batho hore ba etse liphetoho tse khōlō bophelong ba bona. (Bar. 12:2; Bagal. 5:22, 23) Bakolose 3:10 e re: “Le ikapese botho bo bocha, boo ka tsebo e nepahetseng bo ntseng bo nchafatsoa ho ea ka setšoantšo sa Ea bo bōpileng.” Molaetsa o ka Lentsoeng la Molimo, Bibele, o na le matla a ho senola seo motho a hlileng a leng sona botebong, ’me o ka fetola tsela eo a nahanang ka eona esita le kamoo a ikutloang kateng. (Bala Baheberu 4:12.) Ha motho a e-ba le tsebo e nepahetseng ea Mangolo a bile a etsa hore bophelo ba hae bo lumellane le melao ea Jehova e lokileng, e ka ba motsoalle oa Molimo, a ba a ba le tšepo ea ho phela ka ho sa feleng.
Jehova o re Lokisetsa Bokamoso
10. (a) Ke hobane’ng ha e le Jehova feela ea boemong bo ikhethang ba ho re lokisetsa bokamoso? (b) Ke liphetoho life tse khōlō tse tla tloha li ama lefatše lohle?
10 Ke Jehova feela ea ka re thusang ho lokisetsa bokamoso hobane o tseba se tla tloha se etsahala. Ke eena ea rerang hore na bokamoso ba batho e tla ba bofe. (Esa. 46:9, 10) Boprofeta ba Bibele bo bolela hore “letsatsi le leholo la Jehova le haufi.” (Sof. 1:14) Mabapi le letsatsi leo, mantsoe a Liproverbia 11:4 a tla phethahala ha e re: “Lintho tsa bohlokoa e tla ba tse se nang molemo letsatsing la khalefo, empa ho loka ho tla lopolla lefung.” Ha ho fihla nako ea hore Jehova a ahlole lefatše la Satane, ntho ea bohlokoa ka ho fetisisa e tla ba hore Molimo a re amohele. Chelete e tla be e se na thuso. Ha e le hantle, Ezekiele 7:19 e re: “Ba tla lahlela silevera ea bona literateng, ’me khauta ea bona e tla fetoha ntho e nyonyehang.” Ho tseba sena esale pele ho ka re thusa hore re etse liqeto tse bohlale hona joale.
11. Tsela e ’ngoe eo thuto ea Molimo e re thusang ka eona ho lokisetsa bokamoso ke efe?
11 Tsela e ’ngoe e ikhethang eo thuto ea Molimo e re lokisetsang ho tla ha letsatsi la Jehova ka eona, ke ka ho re thusa hore re etse hore lintho tsa bohlokoa e be tsona tse tlang pele. Moapostola Pauluse o ile a ngolla Timothea a re: “Fana ka litaelo ho ba ruileng tsamaisong ea hona joale ea lintho hore ba se ke ba iphahamisa, le hore ba se ke ba beha tšepo ea bona maruong a sa tsitsang, empa ba e behe ho Molimo.” Esita le haeba re se barui, re ka rua molemo keletsong ena e bululetsoeng ke Molimo. E akarelletsa eng? Ho e-na le ho bokella matlotlo, re lokela ho loanela ho ‘sebetsa se molemo’ le ho ‘rua mesebetsing e metle.’ Ha re etelletsa tšebeletso ea Jehova pele bophelong ba rōna, re ‘ipolokela ka mokhoa o sireletsehileng motheo o motle bakeng sa ka moso.’ (1 Tim. 6:17-19) Bophelo boo ba boitelo, bo bontša hore motho o bohlale, hobane, joalokaha Jesu a ile a bolela, “ho tla ba le molemo ofe ha motho a rua lefatše lohle empa a lahleheloa ke moea oa hae?” (Mat. 16:26, 27) Ka lebaka la hore letsatsi la Jehova le haufi, ke hantle hore e mong le e mong oa rōna a ipotse: ‘Ke boloka matlotlo hokae? Na ke lekhoba la Molimo kapa la Maruo?’—Mat. 6:19, 20, 24.
12. Ke hobane’ng ha re sa lokela ho nyahama ha batho ba bang ba khella boboleli ba rōna fatše?
12 Mosebetsi oa bohlokoa ka ho fetisisa har’a ‘mesebetsi e metle’ e boletsoeng Lentsoeng la Molimo bakeng sa Bakreste, ke mosebetsi o pholosang bophelo oa ho bolela ka ’Muso le ho etsa barutuoa. (Mat. 24:14; 28:19, 20) Joalokaha ho ne ho etsahala lekholong la pele la lilemo, ba bang ba ka ’na ba khella boboleli ba rōna fatše. (Bala 1 Bakorinthe 1:18-21.) Empa seo ha se fetole bohlokoa ba molaetsa oa rōna, ebile ha se fokotse bohlokoa ba ho fa motho e mong le e mong monyetla oa ho o lumela ha nako e sa ntse e le teng. (Bar. 10:13, 14) Re tla fumana mahlohonolo a mangata, ha re ntse re thusa ba bang hore ba rue molemo thutong ea Molimo.
Oa re Hlohonolofatsa ha re Itela
13. Moapostola Pauluse o ile a etsa boitelo bofe molemong oa litaba tse molemo?
13 Pele moapostola Pauluse e e-ba Mokreste, o ne a koetlisetsoa ho atleha tsamaisong ea lintho ea Sejuda. Mohlomong o ne a ka ba le lilemo tse 13 ha a tloha motseng oa habo oa Tarsase a e-ea Jerusalema ho ea rutoa ke mosuoe ea hlomphuoang oa Molao, e leng Gamaliele. (Lik. 22:3) Ha nako e ntse e e-ea, Pauluse o ile a qala ho ipabola har’a lithaka tsa hae, ’me hoja a tsoela pele ka tsela eo, mohlomong a ka be a ile a tuma haholo bolumeling ba Sejuda. (Bagal. 1:13, 14) Ha a amohela litaba tse molemo ’me a qala mosebetsi oa boboleli, o ile a nyahlatsa lintho tseo kaofela. Na Pauluse o ile a ikoahlaela khetho ea hae? Che. Ha e le hantle, o ile a ngola a re: “Ka sebele ke hlile ke boetse ke nka lintho tsohle e le tahlehelo ka lebaka la bohlokoa bo fetisisang ba tsebo ea Kreste Jesu Morena oa ka. Ka lebaka la hae ke amohetse tahlehelo ea lintho tsohle ’me ke li nka e le lithōle tse ngata.”—Bafil. 3:8.
14, 15. Re fumana mahlohonolo afe re le “basebetsi-’moho le Molimo”?
14 Joaloka Pauluse, kajeno Bakreste baa itela e le hore ba bolele litaba tse molemo. (Mar. 10:29, 30) Na ka lebaka la boitelo boo rea haelloa? Robert, ea boletsoeng sethathong, o bua seo e leng maikutlo a batho ba bangata ha a re: “Ha ke ikoahlaee ka letho. Ke fumana thabo le khotsofalo ka lebaka la tšebeletso ea nako e tletseng, ebile ke fumane sebaka sa ho ‘latsoa le ho bona hore Jehova o molemo.’ Neng le neng ha ke ne ke tela lintho tse bonahalang e le hore ke hahamalle tšebeletso ea Jehova, kamehla o ne a ntlhohonolofatsa ka lintho tse ngata ho feta seo ke neng ke se tetse. Ho joalokaha eka ke ne ke hlile ke sa tela letho. Ke ruile molemo feela!”—Pes. 34:8; Liprov. 10:22.
15 Haeba e se e le nakoana joale u kopanela mosebetsing oa ho bolela le ho ruta, ha ho pelaelo hore le uena u bile le menyetla ea ho latsoa le ho bona hore Jehova o molemo. Na ho na le linako tse ling tseo ka tsona u ileng ua utloa hore moea oa hae oa u thusa ha u ntse u bolela litaba tse molemo? Na u ’nile ua bona ha lifahleho tsa batho ba bang li ela ha Jehova a bula lipelo tsa bona hore ba mamele molaetsa oa hae? (Lik. 16:14) Na Jehova o u thusitse hore u hlōle litšitiso, mohlomong a u bulela monyetla oa hore u eketse tšebeletso ea hao? Na o u tšehelitse linakong tsa mathata, a u thusa hore u tsoele pele u mo sebeletsa ha u ne u ikutloa hore u felloa ke matla? (Bafil. 4:13) Ha re hlokomela hore Jehova oa re thusa ha re etsa tšebeletso ea rōna, e ba oa sebele e le kannete ho rōna ’me re ikutloa re e-na le kamano e haufi-ufi le eena. (Esa. 41:10) Na ho ba e mong oa “basebetsi-’moho le Molimo” mosebetsing o moholo oa thuto ea Molimo hase tlhohonolofatso?—1 Bakor. 3:9.
16. U ikutloa joang ka boiteko le boitelo boo u bo etsang mabapi le thuto ea Molimo?
16 Batho ba bangata ba labalabela hore bophelong ba bona ba finyelle se seng seo e tla ba sa bohlokoa ka nako e telele. Re bone hore esita le lintho tse hlaheletseng tse finyelloang lefatšeng la kajeno, hangata li lebaloa kapele. Leha ho le joalo, ha ho pelaelo hore mesebetsi ea mehleng ena eo Jehova a e finyellang mabapi le ho halaletsoa ha lebitso la hae, e tla bolokoa tlalehong e ke keng ea lebaloa ea histori ea puso ea Molimo. E tla hopoloa ka ho sa feleng. (Liprov. 10:7; Baheb. 6:10) E se eka re ka nka tlotla ea ho ruta ba bang ka Jehova e le ea bohlokoa, e le mosebetsi o ke keng oa lebaloa.
U ka Araba Joang?
• Jehova o batla hore bao a ba rutang ba etse eng?
• Thuto ea Molimo e ntlafatsa bophelo ba batho joang?
• Re hlohonolofatsoa ka litsela life ha re thusa batho ba bang hore ba rue molemo thutong ea Molimo?
[Setšoantšo se leqepheng la 23]
Batho ba rutoang ke Jehova ke mokhatlo oa ’nete oa machaba oa bara ba motho
[Setšoantšo se leqepheng la 24]
Na hase tlhohonolofatso ho ba e mong oa “basebetsi-’moho le Molimo”?