Hanyetsa Satane, ’me o Tla Baleha!

“Ipeheng tlas’a Molimo; empa le hanyetse Diabolose, ’me o tla le balehela.”—JAKOBO 4:7.

1, 2. (a) Ho bontšoa tšobotsi efe ea Diabolose phatlalatsong e tlalehiloeng ho Esaia khaolo ea 14? (b) Re tla tšohla lipotso life?

DIABOLOSE ke mohlala o mobe ka ho fetisisa oa moikakasi. Boikhohomoso ba hae bo bonahala mantsoeng a ileng a tlalehoa ke moprofeta oa Molimo, Esaia. Lilemo tse fetang lekholo pele Babylona e e-ba ’muso o matla oa lefatše, ka tšoantšetso batho ba Jehova ba ile ba phatlalatsa sena khahlanong le “morena oa Babylona”: “U itse ka pelong ea hao, ‘Ke tla nyolohela maholimong. Ke tla phahamisetsa terone ea ka holim’a linaleli tsa Molimo [e leng marena a leloko la Davida] . . . ke tla iketsa hore ke tšoane le Ea Phahameng ka ho Fetisisa.’” (Esaia 14:3, 4, 12-15; Numere 24:17) Boikhohomoso ba “morena oa Babylona” bo ne bo tšoana le boikutlo boo Satane a nang le bona, e leng “molimo oa tsamaiso ena ea lintho.” (2 Bakorinthe 4:4) Empa boikakaso ba Satane bo tla fella ka tlokotsi, feela joalokaha leloko la borena la Babylona le ile la qetella ka mokhoa o hlabisang lihlong.

² Empa hafeela Diabolose a ntse a le teng, re ka ’na ra nahana ka lipotso tse kang tsena: Na re lokela ho tšaba Satane? Ke hobane’ng ha a susumelletsa batho hore ba hlorise Bakreste? Re ka qoba ho qhekelloa ke Diabolose joang?

Na re Lokela ho Tšaba Diabolose?

3, 4. Ke hobane’ng ha Bakreste ba tlotsitsoeng le metsoalle ea bona ba sa tšabe Diabolose?

³ Bakreste ba tlotsitsoeng ba matlafatsoa haholo ke mantsoe ana a Jesu Kreste a reng: “U se ke ua tšaba lintho tseo u leng haufi le ho utloisoa bohloko ke tsona. Bona! Diabolose o tla ’ne a lahlele ba bang ba lōna chankaneng e le hore le ka lekoa ka ho feletseng, le hore le ka ba le matšoenyeho ka matsatsi a leshome. U tšepahale esita le ho isa lefung, ’me ke tla u fa moqhaka oa bophelo.” (Tšenolo 2:10) Batlotsuoa hammoho le metsoalle ea bona e nang le tšepo ea ho phela lefatšeng ha ba tšabe Diabolose. Ho se mo tšabe hona ha ho bakoe ke hobane e le batho ba sebete ka tlhaho. Ha ba mo tšabe kahobane ba tšaba Molimo ka tsela e nang le tlhompho ’me ‘ba tšabela moriting oa mapheo a hae.’—Pesaleme ea 34:9; 36:7.

⁴ Barutuoa ba pele ba Jesu Kreste ba neng ba se na tšabo ba ile ba tšepahala ho isa lefung ho sa tsotellehe lintho tse neng li ba utloisa bohloko. Ha baa ka ba inehella ho tšaba seo Satane Diabolose a neng a ka se etsa, kaha ba ne ba tseba hore le ka mohla Jehova o ne a ke ke a lahla ba neng ba bontšitse hore baa tšepahala ho Eena. Ka ho tšoanang, ha Bakreste ba tlotsitsoeng le metsoalle ea bona e inehetseng ba thulana le mahloriso mehleng ea kajeno, ba ikemiselitse hore ba se ke ba senya botšepehi ba bona ho Molimo. Leha ho le joalo, moapostola Pauluse o ile a bontša hore Diabolose a ka baka lefu. Na seo ha sea lokela ho re tšosa?

 5. Re ithuta’ng ho Baheberu 2:14, 15?

⁵ Pauluse o ile a re Jesu o bile le ‘kabelo maling le nameng’ e le hore “ka lefu la hae a ka etsa lefeela ea nang le mokhoa oa ho baka lefu, ke hore, Diabolose; le hore a ka lokolla bohle bao ka ho tšaba lefu ba neng ba le tlas’a bokhoba bophelong bohle ba bona.” (Baheberu 2:14, 15) Kaha Satane ke eena “ea nang le mokhoa oa ho baka lefu,” o ile a laola Judase Iskariota ’me a sebelisa le baeta-pele ba Bajuda le Baroma hore ba bolaee Jesu. (Luka 22:3; Johanne 13:26, 27) Leha ho le joalo, ka lefu la hae la sehlabelo, Jesu o lokolla batho ba baetsalibe taolong ea Satane ’me o etsa hore re khone ho fumana bophelo bo sa feleng.—Johanne 3:16.

 6, 7. Satane o na le mokhoa o matla hakae oa ho baka lefu?

⁶ Diabolose o na le mokhoa o matla hakae oa ho baka lefu? Ha e le hantle, ho tloha ha Satane a qala liketso tsa hae tse khopo, mashano a hae le tšusumetso ea hae li ’nile tsa baka lefu har’a batho. Ho bile joalo hobane Adama o ile a etsa sebe ’me ka tsela eo a fetisetsa sebe le lefu ho batho bohle. (Baroma 5:12) Ho phaella moo, bahlanka ba Satane ba lefatšeng ba ’nile ba hlorisa barapeli ba Jehova, ’me ka linako tse ling ho fihlela ba e-shoa, feela joalokaha ba ile ba bolaea Jesu Kreste.

⁷ Leha ho le joalo, ha rea lokela ho nahana hore Diabolose a ka baka lefu la motho leha e le ofe feela eo a batlang ho mo bolaea. Molimo o sireletsa batho ba Hae ’me ha ho mohla a tla lumella Satane hore a felise barapeli bohle ba ’nete lefatšeng. (Baroma 14:8) Ke ’nete hore Jehova o lumella hore batho bohle ba hae ba hlorisoe, ebile o lumella hore ba bang ba rōna ba shoe ka lebaka la litlhaselo tsa Diabolose. Empa Mangolo a re fa tšepo e babatsehang ea tsoho bakeng sa ba leng ‘bukeng ea Molimo ea khopotso’—’me ha ho letho leo Diabolose a ka le etsang ho thibela tsosoloso eo ea bophelo!—Malakia 3:16; Johanne 5:28, 29; Liketso 24:15.

Ke Hobane’ng ha Satane a re Hlorisa?

 8. Ke hobane’ng ha Diabolose a hlorisa bahlanka ba Molimo?

⁸ Haeba re bahlanka ba tšepahalang ba Molimo, ho na le lebaka la bohlokoa leo Diabolose a re hlorisang ka lona. Sepheo sa hae ke ho re khelosa tumelong. Re na le kamano ea bohlokoa le Ntate oa rōna oa leholimo, ’me Satane o batla ho e senya. Sena ha sea lokela ho re makatsa. Serapeng sa Edene, Jehova o ile a bolela esale pele hore ho ne ho tla ba le bora pakeng tsa “mosali” oa hae oa tšoantšetso le “noha” le pakeng tsa “peō” ea mosali le “peō” ea noha. (Genese 3:14, 15) Mangolo a tsebahatsa Diabolose e le eena “noha ea pele” ebile a senola hore joale nako ea hae e se e le khutšoanyane ’me o halefile haholo. (Tšenolo 12:9, 12) Ha bora pakeng tsa “peō” ea mosali le “peō” ea noha bo ntse bo tsoela pele, ba sebeletsang Jehova ka botšepehi ba ka lebella hore ba hlorisoe. (2 Timothea 3:12) Na u tseba lebaka la sebele la hore ebe Satane o ba hlorisa joalo?

 9, 10. Diabolose o hlahisitse tseko efe, hona boitšoaro ba batho bo amana joang le eona?

⁹ Diabolose o hlahisitse tseko ea bobusi ba bokahohleng. Satane o boetse o hlahisitse taba e amanang le tseko eo, e leng ea ho belaella botšepehi ba batho ho ’Mōpi oa bona. Satane o ile a hlorisa Jobo, monna ea lokileng. Hobane’ng? E le hore a senye botšepehi ba Jobo ho Jehova. Mosali oa Jobo hammoho le ‘batšelisi ba hae ba likhathatso ba bararo’ ba ile ba phetha morero oa Diabolose ka nako eo. Joalokaha ho bontšitsoe bukeng ea Jobo, Diabolose o ile a phephetsa Molimo, a bolela hore ha ho motho ea neng a tla lula a tšepahala ho Eena haeba Satane a ne a ka lumelloa ho leka motho eo. Empa Jobo o ile a tšoarella ka tieo botšepehing ba hae, ka tsela eo a shanofatsa Satane. (Jobo 1:8–2:9; 16:2; 27:5; 31:6) Kajeno Diabolose o hlorisa Lipaki Tsa Jehova e le ha a leka ho senya botšepehi ba tsona le ho netefatsa phephetso ea hae.

¹⁰ Ho tseba hore Diabolose o re hlorisa hobane a nyoretsoe ho senya botšepehi ba rōna ho Molimo, ka sebele ho ka re thusa hore re be sebete ’me re be matla. (Deuteronoma 31:6) Molimo oa rōna ke eena ’Musi oa Bokahohle, ’me o tla re thusa hore re boloke botšepehi. E se eka kamehla re ka batla ho thabisa pelo ea Jehova ka hore re boloke botšepehi, re mo fe mokhoa oa ho araba mosomi e moholo, e leng Satane Diabolose.—Liproverbia 27:11.

“Re Lopolle ho ea Khopo”

11. Ho boleloa eng ka kōpo e reng, “U se ke ua re kenya molekong”?

¹¹ Ho boloka botšepehi hase papali; ho hloka hore motho a rapele ka tieo. Mantsoe a thapelo ea mohlala a molemo haholo tabeng ena. Har’a tse ling, Jesu o ile a re: “U se ke ua re kenya molekong, empa u re lopolle ho ea khopo.” (Matheu 6:13) Jehova ha a re leke hore re etse sebe. (Jakobo 1:13) Leha ho le joalo, ka linako tse ling Mangolo a re o etsa lintho kapa oa li baka, empa ha e le hantle, a li lumella feela. (Ruthe 1:20, 21) Kahoo, ha re rapela ka tsela eo Jesu a e boletseng, re tla be re kōpa hore Jehova a se ke a re tlohela hore re oele molekong. Ka sebele o tla re utloa, kaha Mangolo a re tiisetsa tjena: “Molimo oa tšepahala, ’me a ke ke a le tlohela hore le lekoe ho feta seo le ka se jarang, empa hammoho le moleko o tla boela a le bulele tsela ea ho tsoa e le hore le khone ho o mamella.”—1 Bakorinthe 10:13.

12. Ke hobane’ng ha re rapela re re: “U re lopolle ho ea khopo”?

¹² Ka mor’a hore a bue ka moleko thapelong eo ea mohlala, ka nepo Jesu o ile a re: “U re lopolle ho ea khopo.” Liphetolelo tse ling tsa Bibele li re: “U re lopolle bobeng” (Bibele—Phetolelo e Ncha; Revised Standard Version) kapa “U re sireletse bobeng.” (Contemporary English Version) Leha ho le joalo, ka Mangolong poleloana e reng ‘lopolla ho’ e sebelisoa haholo-holo ha ho buuoa ka batho, ’me Kosepele ea Matheu e bolela hore Diabolose ke “Moleki,” e leng motho. (Matheu 4:3, 11) Kahoo ke habohlokoa hore re rapelle ho lopolloa ho “ea khopo,” e leng Satane Diabolose. O leka ho re laola hore re siteloe Molimo. (1 Bathesalonika 3:5) Ha re kōpa hore, “U re lopolle ho ea khopo,” re kōpa Ntate oa rōna oa leholimo hore a re tataise ’me a re thuse e le hore Diabolose a se ke a re qhekella.

U se ke Ua Qhekelloa ke Diabolose

13, 14. Ke hobane’ng ha Bakorinthe ba ne ba lokela ho fetola tsela eo ba sebetsanang le monna ea neng a entse boitšoaro bo bobe ka phuthehong?

¹³ Ha Pauluse a ne a khothalletsa Bakreste ba Korinthe hore ba tšoarele ba bang, o ile a ngola a re: “Ntho leha e le efe eo ka mosa le e tšoarelang leha e le mang, le ’na kea e tšoarela. Ha e le hantle, ha e le ’na, eng kapa eng eo ka mosa ke e tšoaretseng, haeba ka mosa ke tšoaretse ntho leha e le efe, e bile ka lebaka la lōna mahlong a Kreste; e le hore re se ke ra qhekelloa ke Satane, kaha re tseba merero ea hae.” (2 Bakorinthe 2:10, 11) Diabolose a ka re qhekella ka litsela tse sa tšoaneng, empa ke hobane’ng ha Pauluse a ile a bua mantsoe aa a qetang ho qotsoa?

¹⁴ Pauluse o ile a khalemela Bakorinthe ka matla hobane ba ne ba lumeletse monna ea boitšoaro bo bobe hore a ’ne a lule ka phuthehong. E tlameha ebe seo se ile sa thabisa Satane, kaha thohako e ile ea tlela phutheho ka lebaka la ho lumella ‘bohlola bo neng bo se teng leha e le har’a lichaba.’ Qetellong, mofosi eo o ile a khaoloa. (1 Bakorinthe 5:1-5, 11-13) Hamorao monna eo o ile a baka. Haeba Bakorinthe ba ne ba ka hana ho tšoarela monna eo le ho mo khutlisetsa ka phuthehong, Diabolose o ne a tla ba qhekella ka tsela e ’ngoe. Joang? Ba ne ba tla ba sehlōhō ’me ba hloke mohau joaloka Satane. Haeba monna eo ea bakileng a ne a ka “sithabetsoa ke ho hlomoha ka ho fetisisa” eaba o tlohela ho rapela Molimo ka ho feletseng, baholo ke bona bao ka ho khetheha ba neng ba tla jara boikarabelo bo itseng ka sena ka pel’a Molimo ea mohau, Jehova. (2 Bakorinthe 2:7; Jakobo 2:13; 3:1) Ho hlakile hore ha ho Mokreste oa ’nete ea neng a ka batla ho etsisa Satane ka hore a be khopo, a be sehlōhō ’me a hloke mohau.

Ho Sireletsoa ke Lihlomo Tse Tsoang ho Molimo

15. Re loana ntoa ea mofuta ofe, hona tlhōlo ea rōna e itšetlehile ka eng?

¹⁵ Hore re tle re lopolloe ho Diabolose, re lokela ho loana ntoa ea moea le makhotla a meea e khopo. Hore re hlōle meea e khopo joalo e bileng e leng matla, ho itšetlehile ka hore re apare “lihlomo tse feletseng tsa ntoa tse tsoang ho Molimo.” (Baefese 6:11-18) Lihlomo tsena li akarelletsa “tšireletso ea sefuba ea ho loka.” (Baefese 6:14) Morena Saule oa Iseraele ea boholo-holo ha aa ka a mamela Molimo ’me o ile a lahleheloa ke moea o halalelang. (1 Samuele 15:22, 23) Empa haeba re sebelisa ho loka ’me re apara lihlomo tsohle tsa moea, re tla fumana moea o halalelang oa Molimo re be re fumane tšireletso eo re e hlokang khahlanong le Satane hammoho le mangeloi a hae a khopo, e leng bademona.—Liproverbia 18:10.

16. Ke ka tsela efe re ka tsoelang pele re sirelelitsoe makhotleng a meea e khopo?

¹⁶ Hore re ’ne re tsoele pele re sirelelitsoe makhotleng a meea e khopo, lintho tse ling tseo re lokelang ho li etsa ke ho bala le ho ithuta Lentsoe la Molimo kamehla, re sebelise hamolemo lingoliloeng tse lokiselitsoeng ke “motsamaisi ea tšepahalang.” (Luka 12:42) Ka tsela eo re tla be re tlatsa likelello tsa rōna ka litaba tsa moea tse hahang, tumellanong le keletso ea Pauluse e reng: “Barab’eso, lintho life kapa life tsa ’nete, lintho life kapa life tseo ho amehoang ka tsona ka botebo, lintho life kapa life tse lokileng, lintho life kapa life tse hloekileng, lintho life kapa life tse ratehang, lintho life kapa life tse buuoang hantle, bokhabane bofe kapa bofe le ntho efe kapa efe e lokeloang ke thoriso, le tsoele pele ho nahana ka lintho tsena.”—Bafilipi 4:8.

17. Ke’ng e tla re thusa hore re be baboleli ba atlehang ba litaba tse molemo?

¹⁷ Jehova o re nolofalletsa hore re ‘roale lihlomo tsa litaba tse molemo tsa khotso maotong a rōna.’ (Baefese 6:15) Ho kopanela kamehla libokeng tsa Bokreste ho re hlomella hore re bolele litaba tse molemo tsa ’Muso oa Molimo. Re thaba hakaakang ha re thusa ba bang hore ba ithute ’nete ea Molimo ’me ba lokolohe moeeng! (Johanne 8:32) “Sabole ea moea, ke hore, lentsoe la Molimo,” ke ea bohlokoa haholo hore re itšireletse lithutong tsa bohata le “ho phethola lintho tse metseng ka matla.” (Baefese 6:17; 2 Bakorinthe 10:4, 5) Ho sebelisa Lentsoe le ngotsoeng la Molimo, e leng Bibele, ka tsela e masene ho re thusa hore re rute ’nete ebile ho re sireletsa hore re se ke ra hlōloa ke maqiti a Diabolose.

18. Re ka ‘ema re tiile joang khahlanong le maqiti a Diabolose’?

¹⁸ Ha Pauluse a bua ka lihlomo tsa rōna tsa moea o ile a qala ka ho re: “Le tsoele pele ho fumana matla Moreneng le bonatleng ba matla a hae. Aparang lihlomo tse feletseng tsa ntoa tse tsoang ho Molimo e le hore le ka khona ho ema le tiile khahlanong le maqiti a Diabolose.” (Baefese 6:10, 11) Lentsoe la Segerike le fetoletsoeng e le “ho ema le tiile” le amana le ha lesole le ema sebakeng sa lona. Re ema re tiile ntoeng ea rōna ea moea, le hoja Satane a sebelisa liketso tse sa tšoaneng tse bolotsana e le ha a leka ho senya bonngoe ba rōna, ho silafatsa lithuto tsa rōna kapa ho senya botšepehi ba rōna ho Molimo. Empa litlhaselo tsa Diabolose ha li e-s’o atlehe ho fihlela joale—ebile ha ho mohla li tla atleha!a

Hanyetsa Diabolose, ’me o Tla Baleha

19. Tsela e ’ngoe eo re ka nkang khato e matla ea ho hanyetsa Diabolose ka eona ke efe?

¹⁹ Re ka atleha ntoeng ea rōna ea moea khahlanong le Diabolose hammoho le makhotla a meea e khopo a laoloang ke eena. Ha ho na lebaka la hore re tlakasele ke ho tšaba Satane, etsoe morutuoa Jakobo o ile a ngola a re: “Ipeheng tlas’a Molimo; empa le hanyetse Diabolose, ’me o tla le balehela.” (Jakobo 4:7) Tsela e ’ngoe ea hore re hle re hanyetse Satane ka matla hammoho le libōpuoa tsa moea tse khopo tse entseng setlamo le eena ke hore re khaohane ka ho feletseng le mekhoa ea boloi kapa boselamose esita le batho ba sebelisang lintho tseo. Mangolo a bontša ka ho hlaka hore bahlanka ba Jehova ba lokela ho hana ho batla lipontšo tsa se tlang kapa ho ba le seabo bonoheng ba linaleli, ho laola le ho sebelisana le meea. Haeba re tšoarehile ka mesebetsi ea moea ebile re le matla moeeng, ha ho hlokahale hore re tšohe hore motho e mong a ka re loea.—Numere 23:23; Deuteronoma 18:10-12; Esaia 47:12-15; Liketso 19:18-20.

20. Re ka hanyetsa Diabolose joang?

²⁰ Re ‘hanyetsa Diabolose’ ka ho khomarela litekanyetso tsa Bibele le linnete tsa eona le ka ho ema re tiile khahlanong le eena. Lefatše le lumellana le Satane kaha ke eena molimo oa lona. (2 Bakorinthe 4:4) Ka hona, re hana mekhoa ea lefatše, e kang boikhohomoso, boithati, boitšoaro bo bobe, pefo le ho rata lintho tse bonahalang. Rea tseba hore Diabolose o ile a baleha ha Jesu a hanyetsa tlhaselo ea hae ka ho sebelisa Mangolo nakong eo a neng a leka Jesu lefeelleng. (Matheu 4:4, 7, 10, 11) Ka ho tšoanang, Satane o tla ‘re balehela’ a hlōtsoe haeba re ikokobeletsa Jehova ka ho feletseng ebile re itšetleha ka Eena ka thapelo. (Baefese 6:18) Ha re tšehelitsoe ke Jehova Molimo le Mora oa hae ea ratoang, ha ho motho ea ka re lematsang ka ho sa feleng—esita le eena Diabolose a ke ke a atleha!—Pesaleme ea 91:9-11.

[Mongolo o botlaaseng ba leqephe]

U ka Araba Joang?

• Na re lokela ho tšaba Satane Diabolose?

• Ke hobane’ng ha Satane a hlorisa Bakreste?

• Ke hobane’ng ha re rapella hore re lopolloe ho “ea khopo”?

• Re ka atleha joang ntoeng ea rōna ea moea?

[Setšoantšo se leqepheng la 26]

Balateli ba pele ba Kreste ba se nang tšabo ba ile ba tšepahala ho isa lefung

[Setšoantšo se leqepheng la 27]

Diabolose a ke ke a thibela hore ba mohopolong oa Jehova ba tsohe bafung

[Setšoantšo se leqepheng la 28]

Na u rapella hore u ‘lopolloe ho ea khopo’?

[Setšoantšo se leqepheng la 29]

Na u apere “lihlomo tse feletseng tsa ntoa tse tsoang ho Molimo”?