Saule o Kopana le Bao e Neng e le Metsoalle ea Hae le Bao e Neng e le Lira Tsa hae

E TLAMEHA ebe Saule, eo hamorao a ileng a bitsoa moapostola Pauluse, o ne a batla a tšohile ha a khutlela Jerusalema ka lekhetlo la pele ka mor’a ho sokolohela Bokresteng.a Ho ne ho se ho fetile lilemo tse tharo a tlohile motseng oo a tletse tšokelo le polao khahlanong le barutuoa ba Jesu. O ne a lumeletsoe ho tšoara Mokreste leha e le ofe oa bona eo a neng a ka mo fumana Damaseka.—Liketso 9:1, 2; Bagalata 1:18.

Hang hoba Saule e be Mokreste, o ile a bolela ka sebete hore o lumela ho Mesia ea tsositsoeng. Ka lebaka leo, Bajuda ba Damaseka ba ne ba batla ho mo bolaea. (Liketso 9:19-25) Na ebe ruri o ne a ka lebella hore Bajuda ba Jerusalema bao e neng e le metsoalle ea hae ba mo amohele ka mofuthu? Ho sa tsotellehe seo, ntho ea bohlokoa ho Saule e ne e le ho kopana le balateli ba Kreste ba Jerusalema. Empa ho ne ho tla ba thata.

“Ha a fihla Jerusalema a etsa boiteko ba ho ikopanya le barutuoa; empa kaofela ba ne ba mo tšaba, hobane ba ne ba sa lumele hore ke morutuoa.” (Liketso 9:26) Ha ho makatse hore ebe ba ne ba ikutloa ka tsela eo, etsoe ba ne ba mo qetetse e le mohlorisi ea se nang mohau. E ka ’na eaba ba ile ba nahana hore ha a re ke Mokreste, leo e mpa e le leqheka la ho khukhunela phutheho. Kahoo, Bakreste ba Jerusalema ba ne ba batla ho mo qoaea.

Leha ho le joalo, e mong oa bona o ile a thusa Saule. Bibele e re bolella hore Barnabase o ile a isa mohlorisi enoa oa mehleng “ho baapostola,” bao ho hlakileng hore e ne e le Petrose (Kefase) le Jakobo, mor’abo Morena, a ba tsebisa ka ho sokoloha ha Saule le ka boboleli ba hae Damaseka. (Liketso 9:27; Bagalata 1:18, 19) Ha hoa hlalosoa hore na ho tlile joang hore Barnabase a tšepe Saule. Na ebe bobeli ba bona ba ne ba tsebana, e leng se ileng sa etsa hore Barnabase a hlahlobisise Saule a be a pake hore o sokolohile e le kannete? Na ebe Barnabase o ne a tseba Bakreste ba Damaseka ’me a utloetse ka ho sokoloha ha Saule? Ho sa tsotellehe hore na boemo e ne e le bofe, Barnabase o ile a etsa hore ba khobe matšoafo mabapi le Saule. Ka lebaka leo, Saule o ile a lula le moapostola Petrose ka matsatsi a 15.

O Lula le Petrose ka Matsatsi a 15

Saule o ile a fuoa mosebetsi oa hae ke Jesu ka ho toba ho sa hlokahale tumello ea motho leha e le ofe, joalokaha a ile a totobatsa seo ha a ngolla Bagalata. (Bagalata 1:11, 12) Empa ha ho tikatiko hore Saule o ne a elelloa hore ke habohlokoa hore a ithute haholoanyane ka tšebeletso ea Jesu. Ho lula le Petrose ho ne ho tla fa Saule monyetla o lekaneng oa ho ba le tsebo eo. (Luka 24:12; 1 Bakorinthe 15:3-8) Ho ne ho e-na le lintho tse ngata tseo Saule a neng a ka li botsa Petrose le Jakobo, ’me le bona ba ne ba e-na le lipotso tseo ba ka li botsang Saule mabapi le pono le thōmo ea hae.

O Pholositsoe Joang Liatleng Tsa Bao e Neng e le Metsoalle ea Hae?

Setefane o ’nile a bitsoa moshoela-tumelo oa pele oa Mokreste. Pejana Setefane o ne a ile a phehisana le bao “ho thoeng ke Synagoge ea Banna ba Lokolotsoeng, le ho Bacyrene le Baalexandria le ho ba tsoang Silisia le Asia.” Joale Saule o ne “a phehisana le Bajuda ba buang Segerike,” a ba pakela ka sebete. Eaba ba nka bohato bofe? Ba ne ba batla ho mo bolaea.—Liketso 6:9; 9:28, 29.

Mang le mang o ne a tla etsa seo Saule a neng a batla ho se etsa, e leng ho hlalosetsa bao e neng e le metsoalle ea hae ka phetoho e khōlō e etsahetseng bophelong ba hae le ho ikitlaelletsa ho ba ruta ka Mesia. Empa eitse ha Bajuda bana ba buang Segerike ba utloa seo, ba ile ba halefela monna enoa eo ba neng ba nka hore ke lehlaba-phio.

Na Saule o ne a hlokomela hore o kotsing e tebileng hakae? Re bala hore ha a ntse a rapela ka tempeleng, o ile a hapeha kelellong kapa a ba le pono ’me a bona Jesu ea ileng a re ho eena: “Potlaka ’me u tsoe Jerusalema kapele, hobane ba ke ke ba lumellana le bopaki ba hao malebana le ’na.” Saule o ile a mo araba tjena: “Morena, ba tseba hantle hore ke ne ke kenya ba lumelang ho uena chankaneng le ho ba shapa synagogeng e ’ngoe ka mor’a e ’ngoe; ’me ha mali a Setefane paki ea hao a ntse a tšolloa, le ’na ke ne ke eme haufi ’me ke lumellana le seo.”—Liketso 22:17-20.

Ba bang ba nka hore karabo ea Saule e bontša hore o ne a utloisisa hore ho hobe. Ba bang ba nahana hore o ne a re: ‘Ke ne ke le mohlorisi joaloka bona, ’me ba tseba taba eo. Ka sebele ba lokela ho nka tšokoloho ea ka ka ho teba. Mohlomong nka ba thusa ho utloisisa ’nete.’ Leha ho le joalo, Jesu o ne a tseba hore Bajuda bao ba ne ba ke ke ba mamela bopaki ba motho eo ba neng ba nka hore ke “mokoenehi.” O ile a re ho Saule: “Tsamaea, hobane ke tla u romela lichabeng tse hōle.”—Liketso 22:21, 22.

Eitse ha Bakreste-’moho le Saule ba elelloa hore o maqakabetsing, ba mo theolela ka potlako boema-kepeng ba Cesarea ’me ba mo romela motseng oa habo oa Tarsase o bohōle ba lik’hilomithara tse 500. (Liketso 9:30) Ho ile ha feta lilemo tse ’maloa pele Saule a khutlela Jerusalema.

Mohlomong ho tsamaea ha hae ka potlako ho ile ha sireletsa phutheho ea Bokreste. Ho ne ho ka ’na ha lubeha ka lebaka la boteng ba mohlorisi enoa oa mehleng. Ha Saule a se a tsamaile, “phutheho ho pholletsa le Judea le Galilea le Samaria kaofela ea kena nakong ea khotso, e ntse e hahoa; ha e ntse e tsamaea tšabong ea Jehova le matšelisong a moea o halalelang ea ’na ea tsoela pele ho ata.”—Liketso 9:31.

Ho Ithuta ho ba Seli

Joaloka lekholong la pele la lilemo, kajeno ho ka ’na ha hlaha maemo ao ho ’ona re lokelang ho ba seli. Ha ho hlokahale hore re belaelle motho e mong le e mong eo re sa mo tsebeng. Leha ho le joalo, linokoane li ’nile tsa leka ho tsoa batho ba Jehova tlaase, e le hore li ithuise ka bona kapa ka morero oa ho senya phutheho. Kahoo, re ba seli e le hore re se ke ra qhekelloa ke baikhakanyi.—Liproverbia 3:27; 2 Timothea 3:13.

Tsela eo Saule a ileng a itšoara ka eona mabapi le ho bolela litaba tse molemo Jerusalema e bontša tsela e ’ngoe eo Bakreste ba ka bang seli ka eona. Ho paka libakeng tse ling kapa ho pakela batho ba bang, ho akarelletsa le bao e neng e le metsoalle ea rōna ho ka ba kotsi—nameng, moeeng esita le boitšoarong. Ho loketse hore motho a nke mehato e itseng ea ho itšireletsa, e kang ho ba seli hore na motho o paka neng le hokae.—Liproverbia 22:3; Matheu 10:16.

Re ka kholiseha hore litaba tse molemo tsa ’Muso oa Molimo li tla boleloa pele bofelo ba tsamaiso ena e khopo ea lintho bo fihla. Saule o ile a beha mohlala o motle hakaakang ntlheng ee, “a bua ka sebete ka lebitso la Morena” esita le ho bao e neng e le metsoalle ea hae le bao e neng e le lira tsa hae!—Liketso 9:28.

[Mongolo o botlaaseng ba leqephe]

[Setšoantšo se leqepheng la 16]

Ha Saule a fihla Jerusalema, ka sebete o ile a pakela Bajuda ba buang Segerike