“Bana, le Mamele Batsoali ba Lōna”

“Bana, le mamele batsoali ba lōna bonngoeng le Morena, kaha sena se lokile.”—BAEFESE 6:1.

 1. Ho mamela ho ka u sireletsa joang?

MOHLOMONG hona joale re ntse re phela kahobane re ile ra mamela, ha ba bang bona ba se ba sa phele kahobane ba sa ka ba mamela. Re mamela eng? Ka mohlala, re ka mamela ’mele ea rōna e ‘entsoeng ka mokhoa o hlollang’ ha e re lemosa lintho tse itseng. (Pesaleme ea 139:14) Ha re bona maru a matšo, ’me re utloa sealuma se thoathoaretsang, ’mele ea rōna ea tsitsipana ka lebaka la matla a motlakase a moeeng. Ho batho ba rutiloeng ka kotsi e ka ba hlahelang, matšoao ana a ba lemosa hore ba batle sebaka sa ho itšireletsa sefefong se atamelang se tsamaeang le letolo le sefako, tse ka ’nang tsa beha bophelo ba bona kotsing.

 2. Ke hobane’ng ha bana ba hloka ho lemosoa, hona ke hobane’ng ha ba lokela ho mamela batsoali ba bona?

² Lōna bacha le lokela ho lemosoa ka likotsi tse ka ’nang tsa le hlahela, ’me ke boikarabelo ba batsoali ba lōna hore ba le lemose. Mohlomong u sa hopola ha u ne u bolelloa hore: “U se ke ua tšoara setofo seo. Sea chesa.” “U se ke ua bapalla pel’a letamo. Ho kotsi.” “Pele u tšela ’mila, u qamake ka hohle.” Ka bomalimabe, bana ba bang ba tsoile likotsi kapa esita le ho shoa ka lebaka la ho se mamele. Ho mamela batsoali ba hao ‘ho lokile’—ho nepahetse ebile ho tšoanetse. Hape ke bohlale ho etsa joalo. (Liproverbia 8:33) Temana e ’ngoe ea Bibele e re “sena se khahlisa haholo” ho Morena oa rōna Jesu Kreste. Ha e le hantle, Molimo o u laela hore u mamele batsoali ba hao.—Bakolose 3:20; 1 Bakorinthe 8:6.

Melemo ea Nako e Telele ea ho Mamela

 3. Ho ba bangata ba rōna, “bophelo ba sebele” ke eng, hona bana ba ka ba le tšepo ea ho bo fumana joang?

³ Ho mamela batsoali ba hao ho tla sireletsa ‘bophelo ba hao hona joale,’ empa ho tla boela ho u fa monyetla oa ho thabela bophelo “bo tlang ho tla,” bo bitsoang “bophelo ba sebele.” (1 Timothea 4:8; 6:19) Ho ba bangata ba rōna, bophelo ba sebele e tla ba bophelo bo sa feleng lefatšeng le lecha la Molimo, boo a bo tšepisang ba khomarelang litaelo tsa hae ka botšepehi. Taelo ea bohlokoa haholo litaelong tseo ke e reng: “‘Hlompha ntat’ao le ’m’ao’; e leng taelo ea pele e nang le tšepiso: ‘E le hore u ka tsoella hantle le hore u ka phela ka nako e telele lefatšeng.’” Kahoo, u tla thaba haeba u mamela batsoali ba hao. U tla ba le bokamoso bo tsitsitseng, ’me u tla ba le monyetla oa ho thabela bophelo bo sa feleng lefatšeng la paradeise!—Baefese 6:2, 3.

 4. Bana ba ka hlompha Molimo joang ’me ka tsela eo ba rue molemo?

⁴ Ha u hlompha batsoali ba hao ka ho ba mamela, u boetse u hlompha Molimo kaha ke eena ea u laelang hore u ba mamele. Ka nako e tšoanang, le uena u rua molemo. Bibele e re: “’Na, Jehova, ke Molimo oa hao, ke ’na Ea u rutang hore u itsoele molemo.” (Esaia 48:17; 1 Johanne 5:3) Ho mamela ho u tsoela molemo joang? Ho thabisa ’mè oa hao le ntate oa hao, ’me le bona, ka sebele ba tla batla ho bontša khotsofalo ea bona ka litsela tse tla u thabisa haholoanyane bophelong. (Liproverbia 23:22-25) Empa habohlokoa le ho feta, ha u mamela u thabisa Ntate oa hao oa leholimo, ’me o tla u putsa ka litsela tse babatsehang! A re boneng hore na Jehova o ile a hlohonolofatsa Jesu joang a ba a mo sireletsa, ’me Jesu o ile a re: “Kamehla ke etsa lintho tse mo khahlisang.”—Johanne 8:29.

Jesu e ne e le Sekhothali

 5. Re na le mabaka afe a ho lumela hore Jesu e ne e le sekhothali?

⁵ Jesu e ne e le eena letsibolo la Maria, ’mè oa hae. Ntate oa hae oa mohōlisi, e leng Josefa, e ne e le ’metli oa mapolanka. Jesu le eena e ile ea e-ba ’metli oa mapolanka, ’me kamoo ho bonahalang kateng o ile a ithuta mosebetsi oo ho Josefa. (Matheu 13:55; Mareka 6:3; Luka 1:26-31) U nahana hore Jesu e ne e le ’metli oa mapolanka oa mofuta ofe? Ha a ntse a le leholimong, e le bohlale bo mothofalitsoeng, pele ’mè oa hae oa moroetsana a mo emola ka mohlolo, o ile a hlalosa: “Ke ile ka ba mabapa le [Molimo] ke le mosebetsi ea hloahloa, ’me ka ba eo a neng a mo rata ka ho khethehileng letsatsi le letsatsi.” Molimo o ne a khahloa ke Jesu, eo ha a le leholimong e neng e le sekhothali. Na u nahana hore ha Jesu e sa le ngoana lefatšeng moo o ne a ntse a leka ka matla hore e be mosebetsi ea hloahloa, ’metli oa mapolanka ea ipabolang?—Liproverbia 8:30; Bakolose 1:15, 16.

 6. (a) Ke hobane’ng ha u nahana hore mohlomong Jesu o ne a sebetsa lapeng ha e sa le ngoana? (b) Bana ba ka etsisa Jesu ka litsela life?

⁶ Ha ho pelaelo hore ha Jesu e sa le ngoana, ka linako tse ling o ne a bapala, joalokaha Bibele e bolela hore bana ba ne ba bapala linakong tseo tsa pele. (Zakaria 8:5; Matheu 11:16, 17) Empa, u ka kholiseha hore kaha e ne e le eena ngoana e moholo lelapeng le leholo le batlang le futsanehile, o ne a lokela ho etsa mesebetsi e itseng ea lapeng, ho phaella tabeng ea hore Josefa o ne a mo koetlisa hore e be ’metli oa mapolanka. Hamorao, Jesu e ile ea e-ba ’moleli ’me a ikakhela ka setotsoana tšebeletsong ea hae hoo a ileng a itela. (Luka 9:58; Johanne 5:17) Na u lemoha litsela tseo u ka etsisang Jesu ka tsona? Na batsoali ba hao ba u kōpa hore u hloekise kamore ea hao kapa u etse mesebetsi e meng ea lapeng? Na ba u khothalletsa hore u kopanele borapeling ba Molimo ka hore u ee libokeng tsa Bokreste le hore u bolelle ba bang lintho tseo u li lumelang? U nahana hore ha Jesu a sa le monyenyane o ne a tla etsa joang ha a kōptjoa hore a etse lintho tsee?

Seithuti se Khothetseng sa Bibele le Mosuoe

 7. (a) E ka ’na eaba Jesu o ne a ile moketeng oa Paseka le bo-mang? (b) Jesu o ne a le hokae ha ba bang ba qala leeto la ho khutlela hae, hona o ne a le moo ka lebaka lefe?

⁷ Banna bohle le bashanyana malapeng a Baiseraele ba ne ba laeloa hore ba nyolohele tempeleng ho ea rapela Jehova nakong ea mekete e meraro ea Bajuda. (Deuteronoma 16:16) Ha Jesu a le lilemo li 12, e ka ’na eaba lelapa lohle labo le ile la kena leetong la ho ea Jerusalema moketeng oa Paseka. Ho ka etsahala hore ebe banab’abo ka ’mè oa bona, le bona ba ne ba ile. Leha ho le joalo, mohlomong lelapa labo Jesu le ne le tsamaisana tsela le Salome, eo ho ka etsahalang hore ebe e ne e le ngoan’abo Maria, hammoho le monna oa hae Zebedea le bara ba bona, e leng Jakobo le Johanne, bao hamorao e ileng ea e-ba baapostola.a (Matheu 4:20, 21; 13:54-56; 27:56; Mareka 15:40; Johanne 19:25) Ha ba khutla leetong leo, e ka ’na eaba Maria le Josefa ba ile ba nka hore Jesu o ne a e-na le beng ka bona ba bang, kahoo qalong ha baa ka ba lemoha hore ha a eo. Ka mor’a matsatsi a mararo, ha Maria le Josefa ba qetella ba fumane Jesu, o ne a le ka tempeleng, “a lutse har’a mesuoe ’me a e mamela le ho e botsa.”—Luka 2:44-46.

 8. Jesu o ne a etsa’ng ka tempeleng, hona ke hobane’ng ha batho ba ne ba maketse?

⁸ Jesu o ne a “botsa” mesuoe ka tsela efe? Ho ka etsahala hore ebe tsela eo a neng a botsa ka eona e ne e se feela hore a khotsofatse tabatabelo ea ho tseba kapa hore feela a fumane litaba tse itseng. Lentsoe la Segerike le sebelisitsoeng mona le bolela ho botsa ho sebelisoang ha ho hlongoa motho lipotso litabeng tsa boahloli ’me ka lebaka leo e ka ’na eaba o ne a hlile a ba botsa letoto la lipotso. Ka sebele, le hoja Jesu a ne a sa le mocha, e ne e se e le seithuti sa Bibele se hatetseng pele se ileng sa makatsa mesuoe e rutehileng ea bolumeli! Bibele e re: “Bohle ba neng ba mo mametse ba ne ba makatsoa ka nako eohle ke kutloisiso ea hae le likarabo tsa hae.”—Luka 2:47.

 9. U ka latela mohlala oa Jesu joang tabeng ea ho ithuta Bibele?

⁹ U nahana hore ha Jesu a sa ntse a le mocha o ne a khona joang hore a makatse esita le mesuoe e nang le phihlelo ka tsebo eo a neng a e-na le eona ea Bibele? Ho hlakile hore o ne a hlohonolofalitsoe ka batsoali ba tšabang Molimo ba ileng ba mo rupela ka tsela ea Molimo ho tloha boseeng. (Exoda 12:24-27; Deuteronoma 6:6-9; Matheu 1:18-20) Re ka kholiseha hore ha Jesu a sa le monyenyane, Josefa o ne a e-ea le eena synagogeng hore a il’o utloa ha ho baloa Mangolo a bile a tšohloa. Na le uena u hlohonolofalitsoe ka batsoali ba ithutang Bibele le uena le ba eang le uena libokeng tsa Bokreste? Na u nka boiteko boo ba bo etsang e le ba bohlokoa, feela joalokaha Jesu a ne a ananela boiteko ba batsoali ba hae? Na joaloka Jesu, u bolella ba bang seo u ithutang sona?

Jesu o ne a Ikokobetsa

10. (a) Ke hobane’ng ha batsoali ba Jesu ba ne ba lokela ho tseba moo ba neng ba ka mo fumana teng? (b) Jesu o behetse bana mohlala ofe o motle?

¹⁰ U nahana hore Maria le Josefa ba ile ba ikutloa joang ha ba qetella ba fumana Jesu a le ka tempeleng ka mor’a matsatsi a mararo? Ha ho pelaelo hore ba ile ba imoloha haholo. Leha ho le joalo, Jesu eena o ile a makalla hore ebe batsoali ba hae ba ne ba sa tsebe moo a neng a le teng. Bobeli ba bona ba ne ba tseba ka tsoalo ea mohlolo ea Jesu. Ho phaella moo, le hoja ba ne ba sa tsebe lintlha tsohle tse amehang, ba ne ba lokela ho tseba ho itseng mabapi le karolo eo a neng a tla e phetha nakong e tlang ha e le Mopholosi le ’Musi ’Musong oa Molimo. (Matheu 1:21; Luka 1:32-35; 2:11) Ka lebaka leo, Jesu o ile a ba botsa a re: “Ke hobane’ng ha le ne le lokela ho tsamaea le mpatla? Na le ne le sa tsebe hore ke tla ba ka tlung ea Ntate?” Leha ho le joalo, ka lebaka la ho ba utloa, Jesu o ile a tsamaea le batsoali ba hae ’me a khutlela lapeng Nazaretha. Bibele e re: “A tsoela pele ho ipeha tlas’a bona.” Ho feta moo, “’m’ae a boloka ka hloko lipolelo tsena kaofela ka pelong ea hae.”—Luka 2:48-51.

11. U ka ithuta eng ho Jesu tabeng ea ho mamela?

¹¹ Na u utloa ho le bonolo ho etsisa Jesu, ka hore u mamele batsoali ba hao kamehla? Kapa na u nahana hore hangata ha ba utloisise tsela eo ho pheloang ka eona mehleng ee le hore uena u tseba lintho tse ngata ho ba feta? Ke ’nete hore e ka ’na eaba u tseba lintho tse itseng ho ba feta—tse kang ho sebelisa cell phone, k’homphieutha kapa thepa e ’ngoe ea morao-rao. Empa ak’u nahane ka Jesu, ea ileng a makatsa mesuoe e nang le phihlelo ka “kutloisiso ea hae le likarabo tsa hae.” Mohlomong u tla lumela hore uena ha u bapisoa le Jesu, ha u tsebe letho. Empa Jesu o ne a ikokobeletsa batsoali ba hae. Hase hakaalo hore kamehla o ne a lumellana le liqeto tsa bona. Leha ho le joalo, o ile “a tsoela pele ho ipeha tlas’a bona”—nakong eohle ea bocha ba hae. U nahana hore u ka ithuta eng mohlaleng oa hae?—Deuteronoma 5:16, 29.

Ho Mamela ke Phephetso

12. Ho mamela ho ka pholosa bophelo ba hao joang?

¹² Ho mamela ha ho bonolo kamehla, joalokaha ho ile ha bonahala lilemong tse seng kae tse fetileng ha bananyana ba babeli ba ne ba le mothating oa ho tšela ’mileng o moholo o nang le litselana tse tšeletseng, ho e-na le hore ba tšele ka borokho ba maoto bo tsamaeang ka holimo. Ha motsoalle oa bona a leba tseleng ena e tsamaeang ka holimo, ba ile ba mo phehella ba re: “Tloo le rōna John. Ua tla, akere?” Ha a ntse a tsilatsila, ngoanana e mong o ile a mo soma a re, “Uena u lekoala!” Le hoja John a ne a sa tšoha, o ile a re, “Ke tlameha ho mamela ’mè oa ka.” Metsotsoana e se mekae hamorao, ha John a le tseleng eo e tsamaeang ka holimo, o ile a utloa ho lla thaere eare ha a sheba fatše a bona banana bao ba chaisoa ke koloi. Ngoanana e mong o ile a shoa ’me e mong a lemala hampe hoo a ileng a tlameha ho pongoa leoto. ’Mè oa banana bao, ea neng a ba laetse hore ba tšele ka tsela e tsamaeang ka holimo, hamorao o ile a re ho ’mè oa John: “Ruri ke lakatsa eka ba ka be ba mametse joaloka mor’a hao.”—Baefese 6:1.

13. (a) Ke hobane’ng ha u lokela ho mamela batsoali ba hao? (b) Ke neng ho tla beng ho loketse hore ngoana a se ke a etsa seo motsoali a mo laelang hore a se etse?

¹³ Ke hobane’ng ha Molimo a re: “Bana, le mamele batsoali ba lōna”? Ha u mamela batsoali ba hao, u mamela Molimo. Ntle ho moo, batsoali ba hao ba na le phihlelo ho u feta. Ka mohlala, lilemo tse hlano feela pele ho etsahala kotsi e hlalositsoeng ka holimo, ngoana oa motsoalle oa ’mè oa John o ile a bolaoa ke koloi ha a ne a leka ho tšela ’mileng ona oo! Ke ’nete hore hase kamehla ho ka bang bonolo ho mamela batsoali ba hao, empa Molimo o re u lokela ho ba mamela. Ka lehlakoreng le leng, haeba batsoali ba hao—kapa batho ba bang—ba re u bue leshano, u utsoe kapa u etse ntho leha e le efe eo Molimo a sa e rateng, u lokela ho “mamela Molimo e le ’musi ho e-na le batho.” Ke ka lebaka leo ha Bibele e qeta ho re u ‘mamele batsoali ba hao,’ e phaellang ka ho re, “bonngoeng le Morena.” Sena se akarelletsa ho mamela batsoali ba hao linthong tsohle tse lumellanang le melao ea Molimo.—Liketso 5:29.

14. Ke hobane’ng ha ho le bonolo haholo hore motho ea phethahetseng a mamele, empa ke hobane’ng ha a ne a tla lokela ho ithuta hona?

¹⁴ Na u nahana hore hoja u ne u phethahetse—ke hore u ‘sa silafala, u arohile ho baetsalibe,’ joaloka Jesu—ho ne ho tla ba bonolo kamehla hore u mamele batsoali ba hao? (Baheberu 7:26) Hoja u ne u phethahetse, u ne u ke ke ua sekamela bobeng, joalokaha u sekametse bobeng hona joale. (Genese 8:21; Pesaleme ea 51:5) Leha ho le joalo, esita le Jesu o ile a tlameha ho ithuta lintho tse itseng mabapi le ho mamela. Bibele e re: “Le hoja [Jesu] e ne e le Mora, o ile a ithuta ho mamela linthong tseo a ileng a utloisoa bohloko ke tsona.” (Baheberu 5:8) Ho utloa bohloko ho ile ha thusa Jesu joang hore a ithute ho mamela, e leng thuto eo ho neng ho se mohla a kileng a lokela ho ithuta eona ha a le leholimong?

15, 16. Jesu o ile a ithuta ho mamela joang?

¹⁵ Jehova o ile a tataisa Maria le Josefa hore ba sireletse Jesu kotsing ha e sa ntse e le ngoana. (Matheu 2:7-23) Leha ho le joalo, qetellong Molimo o ne a se a sa sireletsa Jesu ka mohlolo. Jesu o ile a utloa bohloko haholo kelellong le ’meleng hoo Bibele e bolelang hore o “ile a nyehela lithapeli le likōpo tse matla . . . ka mehoo e matla le meokho.” (Baheberu 5:7) See se ile sa etsahala neng?

¹⁶ Sena se ile sa etsahala haholo-holo lihoreng tsa ho qetela tsa bophelo ba Jesu lefatšeng ha Satane a ne a leka ka matla ho senya botšepehi ba Hae. Ho hlakile hore Jesu o ile a utloa bohloko haholo ha a nahana kamoo lefu la hae leo ho neng ho nkoa hore ke la moetsalibe le neng le ka senya botumo ba Ntate oa hae, hoo eitseng ha “a tsoela pele ho rapela [serapeng sa Gethesemane] mofufutso oa hae [o ileng oa] e-ba joaloka marotholi a mali a rothelang fatše.” Lihora tse seng kae hamorao, mokhoa oo a ileng a shoa ka oona thupeng ea tlhokofatso o ne o utloisa bohloko hoo Jesu a ileng a ntša “mehoo e matla le meokho.” (Luka 22:42-44; Mareka 15:34) Kahoo “o ile a ithuta ho mamela linthong tseo a ileng a utloisoa bohloko ke tsona” ’me ka tsela eo a thabisa pelo ea Ntate oa hae. Hona joale Jesu o leholimong, empa o re utloela bohloko kaha hangata re loanela ho mo mamela.—Liproverbia 27:11; Baheberu 2:18; 4:15.

Ho Ithuta ho Mamela

17. Re lokela ho ikutloa joang ha re fuoa taeo?

¹⁷ Ha ’mè oa hao le ntate oa hao ba u laea, ba bontša hore ba u batlela se molemohali, hore baa u rata. Bibele ea botsa: “Ke mora ofe eo ntat’ae a sa mo laeeng?” Na u ne u ke ke ua utloa bohloko haeba batsoali ba hao ba ne ba sa u rate hoo ba sa ipheng nako ea ho u khalemela le ho leka hore ba u khalemele? Ka ho tšoanang, Jehova oa u khalemela kaha oa u rata. “Ke ’nete, ha ho taeo eo hona joale e bonahalang e thabisa, empa e baka mesarelo; leha ho le joalo ka mor’a moo ho ba koetlisitsoeng ke eona e beha litholoana tsa khotso, e leng, ho loka.”—Baheberu 12:7-11.

18. (a) Taeo e lerato e bontša eng? (b) Taeo e joalo e susumelitse batho ka litsela life tse molemo tseo u li boneng?

¹⁸ Morena e mong oa Iseraele ea boholo-holo, eo Jesu a ileng a bua ka eena ka lebaka la bohlale ba hae bo boholo, o ile a bua ka hore batsoali ba lokela ho khalemela ka lerato. Solomone o ile a ngola a re: “Ea sa sebeliseng thupa o hloile mora oa hae, empa ea mo ratang o mo batla ka taeo.” Solomone o bile a bolela hore motho ea amohelang khalemelo a ka etsa hore moea oa hae o lopolloe lefung. (Liproverbia 13:24; 23:13, 14; Matheu 12:42) Mosali e mong oa Mokreste o hopola ha e sa ntse e le ngoana hore ha a ne a itšoara ka tsela e sa lokelang libokeng tsa Bokreste, ntate oa hae o ne a mo bolella hore o il’o mo shapa ha a fihla lapeng. Hona joale o hopola ntate oa hae ka kameho e lerato ka hore ebe o ile a mo fa taeo e lerato e ileng ea mo susumetsa ka tsela e molemo bophelong.

19. U lokela ho mamela batsoali ba hao haholo-holo ka lebaka lefe?

¹⁹ U lokela ho ba motlotlo haeba u na le batsoali ba u ratang hoo ba iphang nako ’me ba leka ho u laea ka lerato. Ba mamele, feela joalokaha Jesu Kreste, Morena oa rōna a ne a mamela batsoali ba hae, e leng Maria le Josefa. Empa u lokela ho ba mamela haholo-holo hobane Ntate oa hao oa leholimo, Jehova Molimo, a u laela hore u ba mamele. Ka tsela eo, u tla itsoela molemo ’me “u ka tsoella hantle le hore u ka phela ka nako e telele lefatšeng.”—Baefese 6:2, 3.

[Mongolo o botlaaseng ba leqephe]

U ka Araba Joang?

• Bana ba ka fumana melemo efe ha ba mamela batsoali ba bona?

• Ha Jesu e sa ntse e le ngoana, o ile a beha mohlala joang tabeng ea ho mamela batsoali ba hae?

• Jesu o ile a ithuta ho mamela joang?

[Setšoantšo se leqepheng la 24]

Ha Jesu a le lilemo li 12, o ne a tseba Mangolo hantle

[Setšoantšo se leqepheng la 26]

Ke ka tsela efe Jesu a ileng a ithuta ho mamela ka ho utloa bohloko?