Senotlolo sa Bokreste ba ’Nete ke Sefe?
KAJENO, batho ba ipolelang hore ke litho tsa bolumeli ba Bokreste ba bangata ho feta ba ipolelang hore ke litho tsa sehlopha sa bolumeli leha e le bofe bo bong. Empa litumelo tsa batho bana ba ipolelang hore ke Bakreste lia ikhanyetsa, ha ba bonngoeng, ’me ka linako tse ling ba bile baa bolaeana. Ho hlakile hore ba bangata hase Bakreste ba ’nete. Jesu o ile a re mehleng ena ea rōna, ba bangata ba ne ba tla re ho eena, “Morena! Morena!” Ka mantsoe a mang, ba tla ipolela hore ke Bakreste, le hoja a tla re ho bona: “Ha kea ka ka le tseba le mehla; ntloheleng, lōna ba sebetsang bokhopo.” (Mattheu 7:21, 23) Ke ’nete hore ha ho lea mong oa rōna ea neng a ka rata ho ba har’a bona! Kahoo re ka tseba joang hore re Bakreste ba ’nete?
’Nete ke hore ho hlokahala lintho tse ngata e le hore re ka ba Bakreste ba ’nete. Mokreste oa ’nete o lokela ho ba le tumelo e matla hobane “tumelo ha e le sieo, ha ho kamoo Molimo o ka khahlisoang.” (Ba-Heberu 11:6) Tumelo eo e matla e lokela ho tsamaea le mesebetsi e loketseng. Morutuoa Jakobo o ile a re hlokomelisa hore “tumelo, ha e se na mesebetsi, e shoele.” (Jakobo 2:26) Ho phaella moo, Mokreste o lokela ho hlokomela tataiso ea “mohlanka ea khabane, ea bohlale.” (Mattheu 24:45-47) Empa senotlolo sa Bokreste ba ’nete ke ntho e ’ngoe hape ho ekelletsa linthong tsena.
Senotlolo seo ke sefe? Moapostola Pauluse o ile a se hlalosetsa Bakorinthe lengolong la hae la pele: “Leha nka bua lipuo tsa batho le tsa mangeloi, ha ke se na lerato, ke joale ka koporo e llang, leha e le symbala e molumo o moholo. ’Me leha nka ba le neo ea boprofeta, kapa leha nka tseba liphiri tsohle le bohlale bohle, leha nka ba le tumelo eohle, ka ba ka falatsa le lithaba, ha ke se na lerato, ha ke letho. ’Me leha nka aba maruo a ka ’ohle, ka fana ka ’ona, kapa leha nka tela ’mele oa ka hore o chesoe, ha ke se na lerato, tseo ha li nthuse letho.”—1 Ba-Korinthe 13:1-3.
Kahoo lerato ke senotlolo sa Bokreste ba ’nete. Tumelo, mesebetsi, le litloaelano tse ntle lia hlokahala, ke tsa bohlokoa. Empa ka ntle ho lerato, bohlokoa ba tsona ha bo bonahale. Ke hobane’ng ha ho le joalo?
Ha e le hantle, ke ka baka la hore na Molimo oo re o rapelang ke oa mofuta ofe. Moapostola Johanne o ile a hlalosa Jehova, Molimo oa Bokreste ba ’nete, ka mantsoe ana: “Molimo ke lerato.” (1 Johanne 4:8, NW) Jehova Molimo o na le litšoaneleho tse ling tse ngata, tse kang matla, toka, le bohlale, empa kaha ka ho khethehileng ke Molimo o lerato, o rata hore barapeli ba hae e be batho ba mofuta ofe? Ka sebele, o batla hore batho ba mo etsise ’me ba hlaolele lerato.—Mattheu 5:44, 45; 22:37-39.
Tšusumetso e Nepahetseng
E, lerato le etsa hore Bakreste ba tšoane le Molimo oo ba o rapelang. Sena se bolela hore merero ea bona e tšoana le ea Molimo. Ke eng se ileng sa susumetsa Jehova Molimo hore a romele Jesu lefatšeng e le hore a re fe monyetla oa ho fumana bophelo bo sa feleng? Lerato. “Molimo o ratile lefatše hakalo, o bile oa le nea Mora oa oona ea tsoetsoeng a ’notši; hore e mong le e mong ea lumelang ho eena, a se ke a timela, a mpe a be le bophelo bo sa feleng.” (Johanne 3:16) Ka hona, ke’ng se lokelang ho re susumelletsa ho etsa thato ea Molimo? E ntse e le lona lerato. “Hobane ho rata Molimo, ke ha re boloka litaelo tsa oona.”—1 Johanne 5:3.
Na ho ka etsahala hore motho a sebeletse Molimo ka morero o fosahetseng? E. Pauluse o ile a bua ka ba bang ba mehleng ea hae ba neng ba sebeletsa Molimo ka baka la mōna le tlhōlisano. (Ba-Filippi 1:15-17) Seo se ka re etsahalla. Lefatše lena le tletse moea oa tlhōlisano, ’me moea oo o ka re ama. Re ka ’na ra ikhohomosa ka baka la ho nahana hore re libui tsa phatlalatsa tse molemo ho feta ba bang kapa re khona ho tsamaisa lingoliloeng tse ngata ho feta ba bang. Re ka ’na ra bapisa litokelo tsa tšebeletso tseo re nang le tsona le tse thabeloang ke e mong osele ’me ra inka re le ba bohlokoa—kapa ra ba mōna. Moholo a ka ’na a boulela boemo boo a leng ho bona, ho isa bohōleng boo a ka sitisang mohlankana ea tšoanelehang hore a tsoele pele. Takatso ea ho ithuela molemo e ka ’na ea re susumelletsa ho hlaolela setsoalle le Bakreste ba ruileng ’me ra hlokomoloha ba futsanehileng.
Lintho tsena li ka etsahala hobane ha rea phethahala. Leha ho le joalo, haeba—joaloka Jehova—re etsa hore lerato e be lona le re susumetsang, re tla loantša litšekamelo tse joalo. Boithati, takatso ea ho ithorisa, kapa ho ikhohomosa li ka tapisa lerato, kahoo re ke ke ‘ra fumana molemo ho hang.’—Liproverbia 11:2; 1 Ba-Korinthe 13:3.
Lerato Lefatšeng le Tletseng Boithati
Jesu o ile a re balateli ba hae e ne e sa tl’o ba “ba lefatše.” (Johanne 17:14) Ke joang re ka qobang ho susumetsoa ke lefatše le re potolohileng? Lerato le tla re thusa. Ka mohlala, kajeno batho ke “ba ratang menate ea nama, e seng Molimo.” (2 Timothea 3:4) Johanne o ile a re hlokomelisa hore re se ke ra ba joalo. O itse: “Se rateng lefatše, leha e le tse lefatšeng; ekare ha motho a rata lefatše, lerato la Ntate ha le eo ho eena. Hobane tsohle tse lefatšeng, takatso ea nama, le takatso ea mahlo, le boikhantšo joa bophelo, ha li tsoe ho Ntate, empa li tsoa lefatšeng.”—1 Johanne 2:15, 16.
Leha ho le joalo, ha ho bonolo ho furalla “takatso ea nama” le “takatso ea mahlo” ka ho felletseng. Lintho tsena lia ratoa, haholo-holo hobane li ipiletsa nameng ea rōna. Ho phaella moo, ho na le menyaka e eketsehileng le e sa tšoaneng e fumanehang kajeno ho feta e neng e le teng mehleng ea Johanne, kahoo haeba takatso ea mahlo e ne e le bothata ka nako eo, kajeno ke bothata bo boholoanyane.
Hoa thahasellisa hore ebe menyaka e mengata ea kajeno eo lefatše le fanang ka eona ha ea fosahala ka boeona. Ha ho phoso ho ba le ntlo e khōlō, koloi e ntle, thelevishene, kapa sea-le-moea sa stereo. Ho nka maeto a thahasellisang le nako ea phomolo e thabisang le hona hase ho tlōla molao oa Bibele. Joale ntlha e phahamisoang ke temoso ea Johanne ke efe? Ha e le hantle, haeba lintho tse joalo li fetoha tsa bohlokoa haholo ho rōna, li re kenya moea oa boithati, oa ho etelletsa pele lintho tse bonahalang, le oa boikhohomoso. ’Me boiteko bo etsoang bakeng sa ho fumana chelete ea ho li reka, bo ka ’na ba re sitisa tšebeletsong ea rōna ho Jehova. Hape, ho thabela lintho tse joalo ho hloka nako, ’me le hoja boikhathollo bo leka-lekaneng bo khatholla, nako ea rōna e lekanyelitsoe, ha re nahana ka boikarabelo ba rōna ba ho ithuta Bibele, ho kopanela borapeling le Bakreste-’moho, le ho bolela litaba tse molemo tsa ’Muso.—Pesaleme ea 1:1-3; Mattheu 24:14; 28:19, 20; Ba-Heberu 10:24, 25.
Mehleng ena eo batho ba etelletsang lintho tse bonahalang pele, ho ‘beha ’Muso oa Molimo pele’ le ho hana ho ‘sebelisa lefatše ka botlalo’ ho hloka boiteko. (Mattheu 6:33; 1 Ba-Korinthe 7:31) Tumelo e matla e tla re thusa. Empa ka ho khethehileng, lerato la sebele ho Jehova le ho baahelani ba rōna le tla re matlafatsa hore re hanele litakatso tseo, le hoja li sa fosahala ka botsona, li ka re sitisang ho ‘phetha tšebeletso ea rōna ka ho felletseng.’ (2 Timothea 4:5) Ha re se na lerato le joalo, ho bonolo hore re etse tšebeletso ea rōna ka tloaelo feela.
Lerato ka Phuthehong
Jesu o ile a bontša bohlokoa ba lerato ha a re: “Seo bohle ba tla tseba hobane le barutuoa ba ka ka sona, ke ha le ratana.” (Johanne 13:35) Ke hobane’ng ha baholo ba ne ba ka sebelisa nako e ngata hakaale ho lisa le ho thusa Bakreste-’moho haeba ba ne ba sa ba rate? Ke hobane’ng ha litho tsa phutheho li ne li ka mamella mefokolo ea litho tse ling—ho akarelletsa le baholo—haeba e ne e se ka baka la lerato? Lerato le susumetsa Bakreste hore ba thusane nameng ha ba utloa hore ba bang baa hloka. (Liketso 2:44, 45) Nakong ea mahloriso, Bakreste baa sireletsana esita le ho shoelana. Hobane’ng? Ka baka la lerato.—Johanne 15:13.
Ka linako tse ling lerato le matla ka ho fetisisa le bontšoa ka lintho tse nyenyane. Moholo e mong, ea seng a ntse a imetsoe ke mosebetsi o boima, a ka ’na a atameloa ke Mokreste-’moho ea hlahisang pelaelo e itseng hape eo ho bonahalang e se ea bohlokoa ho moholo. Na moholo eo o lokela ho halefa? Ho e-na le hore a lumelle sena hore se fetohe sesosa sa karohano, o sebetsana le moena oa hae ka mamello le ka mosa. Ba buisana ka taba eo hammoho, ’me e matlafatsa setsoalle sa bona. (Mattheu 5:23, 24; 18:15-17) Ho e-na le hore e mong le e mong a tsitlallele ho fumana litokelo tsa hae, bohle ba lokela ho leka ho hlaolela mamello eo Jesu a ileng a e khothalletsa, ba ikemiselitse ho tšoarela baena ba bona ka “makhetlo a mashome a supileng a metso e supileng.” (Mattheu 18:21, 22, NW) Kahoo, Bakreste ba leka ka matla ho apara lerato, “e leng tlamo ea phetheho.”—Ba-Kolosse 3:14.
Ho Hōlisa Lerato la Rōna e Mong ho e Mong
E, lerato ke lebaka le nepahetseng le lokelang ho re susumelletsa ho sebeletsa Jehova. Lerato le tla re matlafaletsa hore re lule re arohile lefatšeng, ’me le tla etsa hore phutheho e be ea Bokreste e le kannete. Le hoja le ke ke la tlosa tlhokomelo tabeng ea ho etsa lintho ka nepo, le tla thusa ba boholong hore ba se ke ba ameha haholo ka ho nepahala ha lintho hoo ba lebalang mosa le bonolo ha ba sebetsana le ba bang. Lerato le re thusa kaofela hore re ‘utloe balisa ba rōna, ’me re ipehe ka tlase ho bona.’—Ba-Heberu 13:17.
Moapostola Petrose o ile a re phehella hore re be le “lerato le matla” e mong ho e mong hobane “lerato le koahela libe tse ngata.” (1 Petrose 4:8, NW) Re ka etsa sena joang? Motho o bōpiloe ka setšoantšo sa Molimo ka hona o na le matla a tlhaho a ho rata. Empa mofuta oa lerato oo re buang ka ’ona mona o hloka ho hong ho eketsehileng. Ha e le hantle, ke tholoana e ka sehloohong ea moea oa Molimo. (Ba-Galata 5:22) Kahoo, e le hore re ka hlaolela lerato, re lokela ho ipepesetsa moea oa Molimo. Joang? Ka ho ithuta Bibele, e bululetsoeng ke moea oa Molimo. (2 Timothea 3:16) Ka ho rapella moea oa Jehova hore o hahe lerato la rōna ho Jehova le ho baena ba rōna. Le ka ho kopanela phuthehong ea Bokreste, moo moea ona o phallang ka bolokolohi.
Hape ho hlokahala hore re itlhahlobe e le hore re ka hlokomela liketso kapa menahano e se nang lerato. Hopola, lerato le tloha pelong, ’me “pelo e mano ho fetisa tsohle, e bolile hampe.” (Jeremia 17:9) Ho sa tsotellehe thuso eohle eo Jehova a re fang eona, ka linako tse ling re tla etsa lintho tse bontšang ho hloka lerato. Re ka ’na ra halefela Bakreste-’moho ho sa hlokahale, kapa re ka ’na ra sosobanya lifahleho le ho khopeha ka baka la ntho e ’ngoe e buuoang. Kahoo, re etsa hantle ha re rapela joaloka Davida ha a ne a re: “Molimo, u ntlhohlotse, u lekole pelo ea ka; u nteke, u tsebe mehopolo ea ka, u talime hoba a tsela ea bokhopo e teng ho ’na na, ’me u ntsamaise tseleng e isang bophelong bo sa feleng.”—Pesaleme ea 139:23, 24.
Joalokaha Bibele e bolela, “lerato ha le ka ke la timela le ka mohla o le mong.” (1 Ba-Korinthe 13:8) Haeba re ithuta ho ratana, le ka mohla re ke ke ra hloka letho linakong tsa teko. Lerato le teng har’a batho ba Molimo le tlatsetsa haholo paradeiseng ea moea e teng kajeno. Ke feela ba ratanang ka matla ho tloha pelong ba tla fumana thabo ea ho phela lefatšeng le lecha. Kahoo, etsisa Jehova ka ho bontša lerato le joalo ’me ka ho etsa joalo u tla be u matlafatsa tlamo ea bonngoe. Hlaolela lerato, ’me u be le senotlolo sa Bokreste ba ’nete.