Khaolo ea 17

“Ha ho ea Nang le Lerato le Leholo ho Lena”

1-4. (a) Ho etsahala’ng ha Pilato a hlahisa Jesu ka pel’a mahoohoo a halefileng a khobokaneng ka ntle ho ntlo ea ’musisi? (b) Jesu o etsa’ng ha a tlotlolloa a bile a hlokofatsoa, hona ho hlaha lipotso life tsa bohlokoa?

“BONANG! Monna!” Ka mantsoe ao, ’Musisi oa Moroma ea bitsoang Ponse Pilato o hlahisa Jesu Kreste ka pel’a mahoohoo a halefileng a khobokaneng ka ntle ho ntlo ea ’musisi mesong ea Paseka ka 33 C.E. (Johanne 19:5) Matsatsi a se makae pejana, matšoele a ne a ile a thoholetsa Jesu ha a kena Jerusalema ka tlhōlo e le Morena ea khethiloeng ke Molimo. Empa hona joale, matšoele a tletseng bora a mo talima ka tsela e fapaneng.

² Jesu o apesitsoe seaparo se selelele sa ka holimo se pherese se kang se aparoang ke marena, ’me o roesitsoe moqhaka. Empa seaparo seo, se koahetseng linama tse hlenhlaneng tse qhitsang mali mokokotlong oa hae le moqhaka oo o lohiloeng ka meutloa oa ntan’o khohletsoa hloohong ea hae eo joale e seng e rotha mali, ke pontšo ea hore ba soma borena ba hae. Batho bao ba hlohlelelitsoeng ke baprista ba ka sehloohong ba khesa monna eo ea khakhathiloeng ea emeng ka pel’a bona. Baprista baa hoeletsa, ba re: “Mo khokhothele thupeng! Mo khokhothele thupeng!” Kaha batho bao ba tletse moea oa polao, baa hooa, ba re: “O tšoanela ho shoa.”—Johanne 19:1-7.

³ Ka seriti le ka sebete, Jesu o mamella ho tlotlolloa le ho hlokofatsoa a sa tletlebe.a O ikemiselitse ho shoa. Hamorao hona Letsatsing leo la Paseka, o itlohella hore a shoe lefu le bohloko thupeng ea tlhokofatso.—Johanne 19:17, 18, 30.

⁴ Ka ho nehelana ka bophelo ba hae, Jesu o ile a ipaka e le motsoalle oa sebele ho balateli ba hae. O ile a re: “Ha ho ea nang le lerato le leholo ho lena, hore motho a nehelane ka moea oa hae molemong oa metsoalle ea hae.” (Johanne 15:13) Sena se hlahisa lipotso tsa bohlokoa. Na ho ne ho hlile ho hlokahala hore Jesu a hlokofatsoe ka tsela eo a ntan’o shoa? Ke hobane’ng ha a ile a ikemisetsa ho etsa seo? Joaloka “metsoalle ea hae” le balateli ba hae, re ka etsisa mohlala oo oa hae joang?

Ke Hobane’ng ha ho ne ho Hlokahala Hore Jesu a Hlokofatsoe a be a Shoe?

 5. Ho tlile joang hore Jesu a tsebe liteko tse tobileng tse neng li tlil’o mo hlahela?

⁵ Joaloka Mesia ea tšepisitsoeng, Jesu o ne a tseba seo a lokelang ho se lebella. O ne a tseba boprofeta bo bongata bo ka Mangolong a Seheberu bo boletseng esale pele hore Mesia o tla hlokofatsoa a be a shoe. (Esaia 53:3-7, 12; Daniele 9:26) O ile a bolella barutuoa ba hae ka makhetlo esale pele ka liteko tse neng li tlil’o mo hlahela. (Mareka 8:31; 9:31) Ha ba le tseleng e eang Jerusalema moo a neng a il’o tšoara Paseka ea hae ea ho qetela teng, o ile a bolella baapostola ba hae ka ho toba, a re: “Ho tla nehelanoa ka Mor’a motho ho baprista ba ka sehloohong le bangoli, ba tla mo ahlolela lefu ’me ba tla nehelana ka eena ho batho ba lichaba, ’me ba tla mo fetola litšeho ’me ba tla mo tšoela ka mathe le ho mo shapa ’me ba mo bolaee.” (Mareka 10:33, 34) Seo e ne e le ’nete. Joalokaha re se re bone, Jesu o ile a fela a tšehuoa, a tšoeloa ka mathe, a shapuoa a ba a bolaoa.

 6. Ke hobane’ng ha ho ne ho hlokahala hore Jesu a hlokofatsoe a be a shoe?

⁶ Joale ke hobane’ng ha ho ne ho hlokahala hore Jesu a hlokofatsoe a be a shoe? Ho na le mabaka a ’maloa a bohlokoa a seo. La pele ke hore haeba Jesu a ne a lula a tšepahala o ne a tla paka hore o tšehetsa bobusi ba Jehova le hore oa bo emela. U hopole hore Satane o buile leshano la hore batho ba sebeletsa Molimo ka lebaka la boithati feela. (Jobo 2:1-5) Jesu o ile a fana ka karabo e totobetseng ka ho fetisisa qosong eo e se nang motheo ea Satane ka hore a lule a tšepahala “ho isa lefung . . . thupeng ea tlhokofatso.” (Bafilipi 2:8; Liproverbia 27:11) Lebaka la bobeli, ho hlokofatsoa ha Mesia le ho shoa ha hae ho ne ho tla koahela libe tsa ba bang. (Esaia 53:5, 10; Daniele 9:24) Jesu o fane ka “moea oa hae hore e be thekollo e le phapanyetsano bakeng sa ba bangata,” a re bulela tsela ea hore re be le kamano e amohelehang le Molimo. (Matheu 20:28) Lebaka la boraro, ka ho mamella mathata a mefuta ena kaofela le ho hlokofatsoa, Jesu o ile a ‘lekoa ka litsela tsohle joaloka rōna.’ Kahoo ke Moprista ea Phahameng ea nang le qenehelo, ea khonang ho “utloela mefokolo ea rōna bohloko.”—Baheberu 2:17, 18; 4:15.

Ke Hobane’ng ha Jesu a ne a Ikemiselitse ho Tela Bophelo ba Hae?

 7. Jesu o ile a tela eng ha a tla lefatšeng?

⁷ Ho hlakisa seo Jesu a neng a ikemiselitse ho se etsa, ak’u nahane ka sena: Ke mang ea neng a ka siea lelapa la hae le ntlo ea hae eaba o fallela naheng e ’ngoe haeba a ne a tseba hore baahi ba bangata ba moo ba ne ba sa tl’o mo amohela, ba ne ba tla mo tšoara ka tsela e se nang seriti le hore ba ne ba tla mo hlokofatsa ’me qetellong ba mo bolaee? Joale ak’u nahane ka seo Jesu a se entseng. Pele a tla lefatšeng, o ne a le boemong bo ikhethang maholimong a e-na le Ntate oa hae. Leha ho le joalo, Jesu o ile a ithaopela ho tlohela lehae la hae la leholimo ’me a tla lefatšeng e le motho. O tlohile moo a tseba hore ba bangata ba ne ba sa tl’o mo amohela le hore o ne a tlil’o tšoaroa ka tsela e sehlōhō e se nang seriti, a be mahlomoleng a maholo a be a shoe lefu le bohloko. (Bafilipi 2:5-7) Ke’ng se ileng sa susumelletsa Jesu hore a itele ka tsela e joalo?

8, 9. Jesu o ile a susumetsoa ke eng hore a tele bophelo ba hae?

⁸ Ka holim’a tsohle, Jesu o ne a susumetsoa ke lerato le tebileng leo a ratang Ntate oa hae ka lona. Ho mamella ha Jesu e ne e le pontšo ea hore o rata Jehova. Lerato leo le ne le etsa hore Jesu a amehe ka lebitso le botumo ba Ntate oa hae. (Matheu 6:9; Johanne 17:1-6, 26) Habohlokoa le ho feta, Jesu o ne a batla hore ho tlosoe thohako e ’nileng ea phaelloa lebitsong la Ntate oa hae. Kahoo Jesu o ne a nka hore ha a hlokofatsoa ka lebaka la ho loka, seo ke tlotla e phahameng ka ho fetisisa, kaha o ne a tseba hore haeba a tšepahala o tla ba le seabo ho halaletseng lebitso la Ntate oa hae le hlomphehang le le babatsehang.—1 Likronike 29:13.

⁹ Jesu o ne a e-na le lebaka le leng le ileng la etsa hore a tele bophelo ba hae—e leng lerato leo a ratang batho ka lona. O ratile batho ho tloha khale tšimolohong. Ha Bibele e senola tsela eo Jesu a neng a ikutloa ka eona nako e telele pele a tla lefatšeng, e re: “Lintho tseo ke neng ke li rata li ne li le ho bara ba batho.” (Liproverbia 8:30, 31) Lerato la hae le ile la bonahala ka ho hlaka ha a le lefatšeng. Joalokaha re bone likhaolong tse tharo tse fetileng tsa buka ena, Jesu o ile a bontša ka litsela tse ngata hore o rata batho ka kakaretso le hore o rata balateli ba hae ka tsela e khethehileng. Empa ka la 14 Nisane, 33 C.E., o ile a ithaopela ho re tella bophelo ba hae. (Johanne 10:11) Ka sebele, ho ne ho se na tsela e ’ngoe e fetang eo ea ho re bontša hore oa re rata. Na re lokela ho mo etsisa ntlheng ee? E. Ha e le hantle, re fuoe taelo ea hore re mo etsise.

“Le Ratane . . . Joalokaha ke le Ratile”

10, 11. Jesu o file balateli ba hae taelo efe e ncha, e akarelletsa eng, hona ke hobane’ng ha e le habohlokoa hore re e mamele?

¹⁰ Bosiung ba pele Jesu a bolaoa, o ile a re ho barutuoa ba hae ba haufi-ufi: “Ke le fa taelo e ncha, hore le ratane; le lōna le ratane feela joalokaha ke le ratile. Bohle ba tla tseba ka sena hore le barutuoa ba ka, haeba le e-na le lerato har’a lōna.” (Johanne 13:34, 35) Ke hobane’ng ha taba ea hore “le ratane” e le “taelo e ncha”? Molao oa Moshe o ne o se o ntse o fane ka taelo e reng: “U rate oa heno [kapa, moahelani oa hao] joalokaha u ithata.” (Levitike 19:18) Empa taelo e ncha e hloka lerato le fetang leo, lerato le tla re susumelletsa ho tella ba bang bophelo ba rōna. Jesu o ile a hlakisa sena ha a re: “Ena ke taelo ea ka, hore le ratane feela joalokaha ke le ratile. Ha ho ea nang le lerato le leholo ho lena, hore motho a nehelane ka moea oa hae molemong oa metsoalle ea hae.” (Johanne 15:12, 13) Ha e le hantle, taelo e ncha e re: “U se ke ua rata ba bang joalokaha u ithata, empa u ba rate ho feta kamoo u ithatang kateng.” Ka sebele Jesu o bontšitse lerato leo ka tsela eo a phetseng ka eona le eo a shoeleng ka eona.

¹¹ Ke hobane’ng ha e le habohlokoa hore re mamele taelo e ncha? Hopola hore Jesu o ile a re: “Bohle ba tla tseba ka sena [lerato le nang le boitelo] hore le barutuoa ba ka.” E, lerato le nang le boitelo lea re khetholla hore re Bakreste ba ’nete. Re ka ’na ra bapisa lerato lena le beche ea boitsebahatso. Ba eang likopanong tsa Lipaki Tsa Jehova tse tšoaroang selemo le selemo ba qhoaela libeche. Beche eo e tsebahatsa motho ea e qhoaetseng, e na le lebitso la hae le la phutheho ea habo. Ho ratana ka lerato le nang le boitelo ho tšoana le ho qhoaela “beche” e khethollang Bakreste ba ’nete. Ka mantsoe a mang, tsela eo re bontšanang lerato ka eona e lokela ho totobala hoo e bang letšoao, kapa beche e bolellang bashebelli hore re fela re le balateli ba ’nete ba Kreste. E mong le e mong oa rōna o lokela ho ipotsa, ‘Na “beche” ea lerato le nang le boitelo e totobetse bophelong ba ka?’

Lerato le Nang le Boitelo—Le Akarelletsa Eng?

12, 13. (a) Re lokela ho ikemisetsa ho bontšana lerato ho isa bohōleng bofe? (b) Ho itela ho bolela’ng?

¹² Kaha re balateli ba Jesu, re lokela ho ratana joalokaha a re ratile. Sena se bolela ho ikemisetsa ho itella balumeli-’moho le rōna. Re lokela ho itella bona ho isa bohōleng bofe? Bibele e re: “Ka sena re tseba lerato, hobane eo o ile a nehelana ka moea oa hae bakeng sa rōna; ’me re tlamehile ho nehelana ka meea ea rōna bakeng sa barab’abo rōna.” (1 Johanne 3:16) Joaloka Jesu, re lokela ho ikemisetsa ho shoelana haeba ho hlokahala. Linakong tsa mahloriso, re ka mpa ra tela bophelo ba rōna ho e-na le hore re tsoe barab’abo rōna ba moea tlaase ’me ka ho etsa joalo re ba behe kotsing. Linaheng tseo ho tsona ho nang le lintoa tsa merabe, re ka mpa ra ipeha kotsing e le hore re sireletse barab’abo rōna, ho sa tsotellehe hore na ke ba morabe ofe kapa ke ba sechaba sefe. Ha lichaba li loantšana, re ikemiselitse ho ea chankaneng kapa hona ho bolaoa ho e-na le ho loantša balumeli-’moho le rōna—kapa hona ho loantša motho leha e le ofe.—Johanne 17:14, 16; 1 Johanne 3:10-12.

¹³ Ho ikemisetsa ho shoela barab’abo rōna hase eona feela tsela eo re ka bontšang lerato le nang le boitelo ka eona. Etsoe ke ba seng bakae feela ba rōna bao ho tla ke ho hlokahale hore ba itele ka tsela eo. Empa haeba re rata barab’abo rōna hoo re ka ba shoelang, na ha rea lokela ho ikemisetsa ho itella bona linthong tse nyenyane, re ikitlaelletse ho ba thusa hona joale? Ho itela ho bolela ho intša sehlabelo ka seo u nang le sona kapa ka ho tlohela tsela e mabothobotho eo u phelang ka eona molemong oa batho ba bang. Re etelletsa pele seo ba se hlokang le boiketlo ba bona ka pele ho ba rōna esita le haeba ho etsa seo ho se bonolo. (1 Bakorinthe 10:24) Re ka bontša lerato le nang le boitelo ka litsela life tse sebetsang?

Ka Phuthehong le ka Lapeng

14. (a) Ho hlokahala hore baholo ba itele ka litsela life? (b) U ikutloa joang ka baholo ba sebetsang ka thata ba phuthehong ea heno?

¹⁴ Baholo ba phutheho ba itela ka litsela tse ngata e le hore ba ‘lise mohlape.’ (1 Petrose 5:2, 3) Ho phaella tabeng ea hore ba hlokomela malapa a bona, ba ka ’na ba lokela ho qeta nako e itseng mantsiboea kapa mafelo-beke ba hlokomela litaba tsa phutheho, ho akarelletsa ho lokisetsa lipuo, ho etsa maeto a bolisa le ho sebetsana le litaba tsa boahloli. Baholo ba bangata ba itela ka litsela tse ling hape, ba sebetsa ka thata likopanong tse khōlō le tse nyenyane, ba sebeletsa e le litho tsa Likomiti Tsa Bohokahanyi le Lipetlele, litho tsa Lihlopha Tse Etelang Bakuli le litho tsa Likomiti Tsa Kaho Tsa Libaka. Baholo, lulang le hopola hore ho sebeletsa ha lōna ka boikemisetso—le qeta nako ea lōna, matla a lōna le matlotlo a lōna le lisitse mohlape—ho bontša hore le na le lerato le nang le boitelo. (2 Bakorinthe 12:15) Jehova o ananela boiteko boo le bo etsang ka ho hloka boithati ’me le phutheho eo le e lisitseng e bo ananela haholo.—Bafilipi 2:29; Baheberu 6:10.

15. (a) Litsela tse ling tseo basali ba baholo ba itelang ka tsona ke life? (b) U ikutloa joang ka basali ba tšehetsang banna ba bona ka ho tela nako ea ho ba ’moho le bona e le hore banna ba bona ba sebeletse phutheho ea heno?

¹⁵ Ho thoe’ng ka basali ba baholo—na basali baa ba tšehelitseng banna ba bona le bona ha ba itele e le hore banna ba bona ba hlokomele mohlape? Ka sebele mosali oa itela ha monna oa hae a lokela ho sebelisa nako eo a ka beng a e qeta le lelapa la hae hore a hlokomele litaba tsa phutheho. Nahana hape ka basali ba balebeli ba tsamaeang le kamoo ba itelang kateng ha ba ntse ba tsamaea le banna ba bona ba etela liphutheho le lipotoloho. Ba tela ho ba le lehae ebile mohlomong ba lokela ho robala libetheng tse sa tšoaneng beke e ’ngoe le e ’ngoe. Basali ba ithaopelang ho etelletsa mesebetsi ea phutheho ka pele ho seo bona ba se thahasellang ba lokela ho babatsoa kaha ba bontša lerato leo le nang le boitelo ka seatla se bulehileng.—Bafilipi 2:3, 4.

16. Batsoali ba Bakreste ba itela ka litsela life molemong oa bana ba bona?

¹⁶ Re ka bontša lerato le nang le boitelo joang ka lapeng? Batsoali, le itela ka litsela tse ngata ha le ntse le hlokometse bana ba lōna ’me le ba hōlisa “ka taeo le kelello e laoloang ke Jehova.” (Baefese 6:4) E ka ’na eaba le qeta lihora tse ngata le sebetsa ka thata e le hore feela le fumanele malapa a lōna lijo le ho tiisa hore bana ba na le liaparo tse lekaneng le bolulo. Le bile le tela lintho tse itseng e le hore feela bana ba lōna ba be le lintho tseo ba li hlokang bophelong. Le boetse le ikitlaelletsa ho ithuta le bana ba lōna, le ea le bona libokeng tsa Bokreste le bile le sebetsa le bona tšebeletsong ea tšimo. (Deuteronoma 6:6, 7) Lerato la lōna le nang le boitelo le thabisa Moqapi oa bophelo ba lelapa ebile le ka etsa hore bana ba lōna ba fumane bophelo bo sa feleng.—Liproverbia 22:6; Baefese 3:14, 15.

17. Banna ba Bakreste ba etsisa tsela e se nang boithati ea Jesu joang?

¹⁷ Banna, le ka etsisa Jesu joang tabeng ea ho bontša lerato le nang le boitelo? Bibele e re: “Banna, le tsoele pele le rata basali ba lōna, feela joalokaha Kreste le eena a ile a rata phutheho ’me a inehela bakeng sa eona.” (Baefese 5:25) Joalokaha re se re bone, Jesu o ratile balateli ba hae hoo a bileng a ba shoela. Monna oa Mokreste o etsisa tsela e se nang boithati ea Jesu, ‘ea sa kang a ikhahlisa.’ (Baroma 15:3) Monna ea joalo o ithaopela ho etelletsa seo mosali oa hae a se hlokang le seo a se thahasellang ka pele ho seo eena a se hlokang le seo a se thahasellang. Ha a tsitlelle hore lintho li etsoe ka tsela eo a bonang ka eona, empa o bontša hore o ikemiselitse ho tenyetseha ha ho se ntlha ea Mangolo e amehang tabeng eo. Monna ea bontšang lerato le nang le boitelo oa amoheleha ho Jehova ’me mosali oa hae le bana ba hae baa mo rata ba bile baa mo hlompha.

U Tla Etsa’ng?

18. Ke’ng e re susumelletsang ho latela taelo e ncha ea hore re ratane?

¹⁸ Ha ho bonolo ho mamela taelo e ncha ea hore re ratane, empa re na le lebaka le matla le re susumelletsang ho e mamela. Pauluse o ile a ngola, a re: “Lerato leo Kreste a nang le lona lea re qobella, hobane sena ke seo re se ahlotseng, hore motho a le mong o ile a shoela bohle . . . , o ile a shoela bohle e le hore ba phelang ba se ke ba hlola ba iphelela, empa ba phelele ea ileng a ba shoela ’me a tsosoa.” (2 Bakorinthe 5:14, 15) Kaha Jesu o re shoetse, na ha rea lokela ho ikutloa re tlamehile ho mo phelela? Re ka etsa seo ka ho latela mohlala oa hae oa ho bontša lerato le nang le boitelo.

19, 20. Jehova o re file mpho efe ea bohlokoahali, hona re ka bontša joang hore rea e amohela?

¹⁹ Jesu o ne a sa fetelletse taba ha a ne a re: “Ha ho ea nang le lerato le leholo ho lena, hore motho a nehelane ka moea oa hae molemong oa metsoalle ea hae.” (Johanne 15:13) Ho ikemisetsa ha hae ho nehelana ka bophelo ba hae molemong oa rōna ke pontšo e khōlō ka ho fetisisa ea lerato leo a re ratang ka lōna. Empa ho na le motho e mong ea re bontšitseng lerato le tebileng le ho feta. Jesu o ile a re: “Molimo o ratile lefatše haholo hoo a ileng a fana ka Mora oa hae ea tsoetsoeng a ’notši, e le hore e mong le e mong ea bontšang tumelo ho eena a se ke a timetsoa empa a be le bophelo bo sa feleng.” (Johanne 3:16) Molimo o re rata hoo a faneng ka Mora oa hae e le thekollo, a re bulela tsela ea ho lokolloa sebeng le lefung. (Baefese 1:7) Thekollo ke mpho ea bohlokoahali e tsoang ho Jehova, empa ha a re qobelle hore re e amohele.

²⁰ Ke rōna ba lokelang ho ikhethela hore na re amohela mpho eo ea Jehova. Joang? Ka ‘ho bontša tumelo’ ho Mora oa hae. Empa tumelo hase taba ea ho bua ka molomo feela. E bontšoa ka liketso, ka tsela eo re phelang ka eona. (Jakobo 2:26) Re bontša tumelo ea rōna ho Jesu Kreste ka ho mo latela letsatsi ka leng. Ho etsa seo ho tla re tlisetsa litlhohonolofatso tse enneng hona joale le nakong e tlang, joalokaha khaolo e qetellang ea buka ena e tla hlalosa.

[Mongolo o botlaaseng ba leqephe]

U ka Latela Jesu Joang?

● Jesu o laetse balateli ba hae hore ba latele tsela efe e se nang boithati?—Matheu 16:24-26.

● Ke hobane’ng ha e le habohlokoa ho phela ka tsela ea ho itela?—Mareka 10:23-30.

● Jesu o ipakile e le Molisa ea Khabane joang, hona baholo ba Bakreste ba ka ithuta eng mohlaleng oa hae?—Johanne 10:11-15.

● Re ka etsisa Jesu tabeng ea ho bontša lerato le nang le boitelo ka litsela life tse sebetsang?—1 Johanne 3:17, 18.

[Setšoantšo se tletseng leqephe la 173]