Haufinyane ’Muso oa Molimo o Tla re Lopolla!
“’Muso oa hao o ke o tle. Thato ea hao e ke e etsahale lefatšeng, joalokaha e etsahala leholimong.”—MAT. 6:10.
1. Thuto ea Jesu e ka sehloohong e ne e le efe?
HA Jesu Kreste a ne a fana ka Thuto ea hae ea Thabeng, o ile a kopanyelletsa thapelo ea mohlala e neng e akaretsa thuto ea hae e ka sehloohong. O ile a ruta balateli ba hae ho rapela Molimo: “’Muso oa hao o ke o tle. Thato ea hao e ke e etsahale lefatšeng, joalokaha e etsahala leholimong.” (Mat. 6:9-13) Jesu o ile “a qala ho tsamaea ho tloha motseng o mong ho ea ho o mong le ho tloha motsaneng o mong ho ea ho o mong, a bolela ’me a phatlalatsa litaba tse molemo tsa ’muso oa Molimo.” (Luka 8:1) Kreste o ile a khothatsa balateli ba hae: ‘Le ’ne le batle ’muso pele le ho loka ha Molimo.’ (Mat. 6:33) Ha u ntse u ithuta sehlooho sena, batla litsela tseo ka tsona u ka sebelisang boitsebiso bona tšebeletsong ea hao. Ka mohlala, nahana kamoo u ka ’nang ua araba lipotso tsena kateng: Molaetsa oa ’Muso ke oa bohlokoa hakae? Batho ba lokela ho lopolloa ho eng? Hona ’Muso oa Molimo o tla lopolla batho joang?
2. Molaetsa oa ’Muso ke oa bohlokoa hakae?
2 Jesu o ile a bolela esale pele: “Litaba tsena tse molemo tsa ’muso li tla boleloa lefatšeng lohle leo ho ahiloeng ho lona hore e be bopaki ho lichaba tsohle; joale e ntan’o ba hona bofelo bo tla tla.” (Mat. 24:14) Litaba tsena tse molemo tsa ’Muso oa Molimo ke tsa bohlokoa ka ho fetisisa. Ka sebele ke molaetsa oa bohlokoahali lefatšeng! Liphuthehong tse fetang 100- 000 tsa Lipaki Tsa Jehova lefatšeng lohle, bahlanka ba Molimo ba ka bang limilione tse supileng ba etsa mosebetsi oa boboleli oo ho seng o tšoanang le oona, ba bolella batho ba bang hore ’Muso o hlomiloe. Ho hlongoa ha oona ke litaba tse molemo hobane ho bolela hore Molimo o thehile puso leholimong e tla tsamaisa litaba tsa lefatše ka botlalo. Tlas’a puso ea ’Muso oo, thato ea Jehova e tla etsoa lefatšeng joalokaha e etsoa leholimong.
3, 4. Ho tla etsahala’ng ha thato ea Molimo e etsoa lefatšeng?
3 Ho tla etsahala’ng ka batho ha thato ea Molimo e etsoa lefatšeng? Jehova o tla “hlakola meokho eohle mahlong a bona, lefu ha le sa tla hlola le e-ba teng, ’me ho siama kapa ho bokolla kapa bohloko ha li sa tla hlola li e-ba teng.” (Tšen. 21:4) Batho ha ba na ho kula kapa ho shoa ka lebaka la sebe seo ba se futsitseng le ho se phethahale. Bafu ba khopolong ea Molimo ba tla ba le monyetla oa ho phela ka ho sa feleng, hobane Bibele ea tšepisa: “Ho tla ba le tsoho ea ba lokileng le ba sa lokang.” (Lik. 24:15) Ho ke ke ha hlola ho e-ba le ntoa, ho kula, kapa tlala, ’me lefatše le tla fetoloa paradeise. Esita le liphoofolo tse kotsi hona joale li tla phelisana ka khotso li be li phele ka khotso le batho.—Pes. 46:9; 72:16; Esa. 11:6-9; 33:24; Luka 23:43.
4 Ka lebaka la mahlohonolo ao a hlollang a tla tlisoa ke puso ea ’Muso, ha ho makatse hore ebe boprofeta ba Bibele bo bua ka bophelo ba nakong eo ka mantsoe ana a khothatsang: “Ba bonolo ba tla rua lefatše, ka sebele ba tla fumana thabo e phethehileng khotsong e ngata.” Empa ho thoe’ng ka ba bakang likhathatso? Mangolo a bolela esale pele: “Ho setse nakoana e seng kae, ’me ea khopo ha a sa tla hlola a e-ba teng.” Leha ho le joalo, “ba tšepang Jehova ke bona ba tla rua lefatše.”—Pes. 37:9-11.
5. Ho tla etsahala’ng ka tsamaiso ea hona joale ea lintho?
5 E le hore lintho tsena kaofela li etsahale, tsamaiso ea hona joale ea lintho e nang le mebuso, malumeli le litsamaiso tsa khoebo tse loantšanang, e tla lokela ho felisoa. Puso ea leholimo e tla etsa sona seo hantle. Moprofeta Daniele o ile a bululeloa hore a bolele esale pele: “Matsatsing a marena ao [a ntseng a le teng hona joale] Molimo oa leholimo o tla emisa ’muso [leholimong] o ke keng oa senngoa le ka mohla. ’Muso oo o ke ke oa fetisetsoa ho batho leha e le bafe ba bang. O tla silakanya o felise mebuso ena [ea hona joale] kaofela, ’me o tla ema ho isa linakong tse sa lekanyetsoang.” (Dan. 2:44) ’Muso oa Molimo—e leng puso ea leholimo e ncha—o tla busa mokhatlo oa lefatše le lecha. Ho tla ba le “maholimo a macha le lefatše le lecha . . . ’me ho loka ho tla aha ho tsona.”—2 Pet. 3:13.
Hona Joale Topollo e Hlokahala Haholo
6. Bibele e hlalosa bobe ba lefatše lee le khopo joang?
6 Ha Satane, Adama le Eva ba ne ba fetohela Molimo, ba batla ho iketsetsa qeto ka se nepahetseng le se fosahetseng, lelapa la motho le ile la qala ho tobana le mathata a tšabehang. Pele ho Moroallo oa lefatše lohle, hoo e ka bang lilemo tse fetang 1 600 hamorao, “bobe ba motho [bo ne bo le] bongata lefatšeng ’me tšekamelo eohle ea menahano ea pelo ea hae e [le] mpe feela ka linako tsohle.” (Gen. 6:5) Hoo e ka bang lilemo tse 1 300 ka mor’a moo, Solomone o ile a bona maemo a le mabe hoo a ileng a ngola: “Ke ile ka lebohela ba neng ba se ba ntse ba shoele ho e-na le ba neng ba ntse ba phela. Kahoo ea molemo ho ba feta ka bobeli ke ea sa ntseng a e-s’o be teng, ea sa bonang mosebetsi oa tlokotsi o ntseng o etsoa tlas’a letsatsi.” (Moek. 4:2, 3) Lilemo tse ling tse ka bang 3 000, li re fihlisa mehleng ea rōna e leng nakong eo ka eona bobe bo ntseng bo hakala.
7. Ke hobane’ng ha hona joale ho hlokahala haholo hore batho ba lopolloe ke Molimo?
7 Le hoja e le ’nete hore khale bobe bo le teng, hona joale, re hloka hore ’Muso oa Molimo o re lopolle ho feta leha e le neng pele. Lilemong tse 100 tse fetileng maemo a bile mabe ho feta kamoo a kileng a e-ba kateng, ’me a ntse a tsoela pele ho senyeha le ho feta. Ka mohlala, Worldwatch Institute ea tlaleha: “Palo ea batho ba ileng ba bolaoa lekholong la [bo20] la lilemo e feta hararo palo ea batho ba ileng ba bolaoa lintoeng tsohle ho tloha lekholong la pele la lilemo AD ho fihlela ka 1899.” Ho tloha ka 1914 ho shoele batho ba fetang limilione tse 100! Encyclopedia e ’ngoe e hakanya hore Ntoeng ea II ea Lefatše ho shoele batho ba ka bang limilione tse 60. Kaha hona joale lichaba tse ling li hlometse ka libetsa tsa nyutlelie, batho ba na le matla a ho felisa karolo e khōlō ea baahi ba lefatše. Esita leha ho entsoe tsoelo-pele litabeng tsa saense le tsa meriana, selemo le selemo tlala e ntse e bolaea bana ba ka bang limilione tse hlano.—Sheba khaolo ea 9 bukeng ea Ha e le Hantle ke Eng Seo Bibele e se Rutang?
8. Ntle ho pelaelo, lilemo tse likete tseo motho a busitseng ka tsona li bontšitse eng?
8 Boiteko ba batho ba ho thibela bobe bo hlōlehile. Tsamaiso ea lefatše lena ea lipolotiki, ea khoebo le ea bolumeli ha ho mohla li kileng tsa phethahatsa litlhoko tsa motheo tsa batho bakeng sa khotso, nala le bophelo bo botle. Ho e-na le ho rarolla mathata a maholo a batho, li ekelitse mathata ao. Ka sebele, ka lilemo tse likete tseo motho a busitseng ka tsona ho bonahetse bonnete ba mantsoe ana: “Tsela ea motho oa lefatše ha e matleng a hae. Ha ho matleng a motho ea tsamaeang hore a tsamaise mehato ea hae.” (Jer. 10:23) Ruri ‘motho o busitse motho ho mo ntša kotsi.’ (Moek. 8:9) Ho feta moo, “pōpo eohle e ntse e tsoela pele ho bobola hammoho le ho ba bohlokong hammoho.”—Bar. 8:22.
9. Ke maemo afe ao Bakreste ba ’nete ba lebeletseng ho a bona ‘matsatsing aa a ho qetela’?
9 Mabapi le mehla ea rōna, Bibele e ile ea bolela esale pele: “Matsatsing a ho qetela ho tla ba le linako tse mahlonoko.” Ka mor’a ho hlalosa maemo a neng a tla ba teng matsatsing a ho qetela a puso ea motho, boprofeta bona bo re: “Batho ba khopo le baikhakanyi ba tla tsoela pele ho tloha bobeng ho ea bobeng bo fetisisang.” (Bala 2 Timothea 3:1-5, 13.) Ke sona seo Bakreste ba se lebeletseng, hobane “lefatše lohle le rapaletse matleng a ea khopo,” e leng Satane. (1 Joh. 5:19) Leha ho le joalo, litaba tse molemo ke hore haufinyane Molimo o tla lopolla ba mo ratang. Ba tla lopolloa lefatšeng lena leo ka potlako le ntseng le tloha bobeng ho ea bobeng bo fetisisang.
Eo e Leng Feela ea ka Tšepeloang ho Fana ka Topollo
10. Ke hobane’ng ha Jehova e le eena feela ea ka tšepeloang ho fana ka topollo?
10 Ha u ntse u bolela litaba tse molemo, hlalosetsa batho hore Jehova ke eena feela ea ka tšepeloang ho fana ka topollo. Ke eena feela ea nang le matla le takatso ea ho lopolla bahlanka ba hae boemong leha e le bofe bo bobe. (Lik. 4:24, 31; Tšen. 4:11) Re ka kholiseha hore kamehla Jehova o tla lopolla batho ba hae a be a phethahatse merero ea hae, etsoe o ikanne a re: “Ka sebele feela joalokaha ke rerile, ho tla etsahala.” Lentsoe la hae “le ke ke la khutlela ho [eena] le se na litholoana.”—Bala Esaia 14:24, 25; 55:10, 11.
11, 12. Molimo o tiiselitse bahlanka ba hae eng?
11 Jehova o tiiselitse bahlanka ba hae hore o tla ba lopolla ha a ahlola ba khopo. Ha a ne a roma moprofeta Jeremia hore a e’o bua ka sebete le baetsalibe ba feteletseng, Molimo o ile a re: ‘U se ke ua tšoha.’ Hobane’ng? Hobane “ke na le uena ho u lopolla.” (Jer. 1:8) Ka ho tšoanang, ha Jehova a ne a le haufi le ho timetsa metse e khopo ea Sodoma le Gomora, o ile a romela mangeloi a mabeli hore a sireletse Lota le lelapa la hae ha a ba ntša sebakeng seo. “Joale Jehova a nesa sebabole le mollo . . . holim’a Sodoma le holim’a Gomora.”—Gen. 19:15, 24, 25.
12 Esita le haeba ho ameha lefatše kaofela, Jehova a ka lopolla ba etsang thato ea hae. Ha a ne a timetsa lefatše la boholo-holo le khopo ka Moroallo, o ile a “sireletsa Noe, ’moleli oa ho loka, hammoho le ba bang ba supileng.” (2 Pet. 2:5) Jehova o tla boela a lopolle ba lokileng ha a timetsa lefatše la hona joale le khopo. Kahoo Lentsoe la hae le re: “Le batle Jehova, lōna bohle ba bonolo ba lefatše . . . Batlang ho loka, le batle bonolo. Mohlomong le ka patoa letsatsing la bohale ba Jehova.” (Sof. 2:3) Ka lebaka la timetso eo ea lefatše lohle, ‘ba lokileng ke bona ba tla lula lefatšeng, empa ba khopo, ba tla tlosoa ho lona.’—Liprov. 2:21, 22.
13. Bahlanka ba Jehova ba shoeleng ba tla lopolloa joang?
13 Leha ho le joalo, bahlanka ba bangata ba Molimo ba se ba shoele ka lebaka la ho kula, mahloriso le mabaka a mang. (Mat. 24:9) Joale, batho baa kaofela ba tla lopolloa joang? Joalokaha ho boletsoe pejana, “ho tla ba le tsoho ea ba lokileng.” (Lik. 24:15) Ho khothatsa hakaakang ho tseba hore ha ho letho le ka thibelang Jehova hore a lopolle bahlanka ba hae!
Puso ea ho Loka
14. Ke hobane’ng ha re kholisehile hore ’Muso oa Molimo ke puso ea ho loka?
14 Ha u le tšebeletsong, u ka hlalosa hore ’Muso oa Jehova oa leholimo ke puso ea ho loka. Sena ke ’nete hobane e bonahatsa litšobotsi tse babatsehang tsa Molimo, tse kang toka, ho loka le lerato. (Deut. 32:4; 1 Joh. 4:8) Molimo o file Jesu Kreste ’Muso, eena ea tšoanelehang ka ho fetisisa hore a ka busa lefatše. Jehova o boetse o rerile hore Bakreste ba tlotsitsoeng ba 144 000 ba nkoe lefatšeng ’me ba tsosetsoe ho ea phela leholimong e le majalefa-’moho le Kreste a busang lefatše hammoho le eena.—Tšen. 14:1-5.
15. Bontša phapang pakeng tsa puso ea ’Muso oa Molimo le puso ea batho.
15 Puso ea Jesu le ba 144 000 e tla fapana haholo hakaakang le ea batho ba sa phethahalang! Hangata babusi ba tsamaiso ena ea lintho ba ’nile ba e-ba sehlōhō ba ba ba isa bafo ba bona lintoeng, e leng ho ileng ha fella ka hore ho bolaoe batho ba limilione. Hase feela Mangolo a re eletsang hore re se ke ra tšepa motho “eo ho seng poloko ho eena”! (Pes. 146:3) Empa Kreste eena o tla busa ka lerato le lekaakang! Jesu o ile a re: “Tloong ho ’na, lōna bohle ba sehlang le ba imetsoeng, ’me ke tla le khatholla. Jarang joko ea ka ’me le ithute ho ’na, kaha ke na le maikutlo a bonolo ’me ke ikokobelitse pelong, ’me le tla fumanela meea ea lōna khatholoho. Etsoe joko ea ka e mosa le mojaro oa ka o bobebe.”—Mat. 11:28-30.
Matsatsi a ho Qetela a Tla Tloha a Fela!
16. Matsatsi aa a ho qetela a tla fela joang?
16 Lefatše lena le bile matsatsing a ho qetela, kapa ‘qetellong ea tsamaiso ea lintho,’ ho tloha ka selemo sa 1914. (Mat. 24:3) Haufinyane, ho tla etsahala seo Jesu a itseng ke “matšoenyeho a maholo.” (Bala Matheu 24:21.) Matšoenyeho ao, ao ho seng a tšoanang le ’ona, a tla felisa lefatše lohle la Satane. Empa matšoenyeho a maholo a tla qaleha joang? Hona a tla fela joang?
17. Bibele e re’ng ka ho qaleha ha matšoenyeho a maholo?
17 Matšoenyeho a maholo a tla qala ka tšohanyetso. Ka sebele, “letsatsi la Jehova” le tla tla ka mokhoa o sa lebelloang “neng kapa neng ha ba re: ‘Khotso le tšireletseho!’” (Bala 1 Bathesalonika 5:2, 3.) Matšoenyeho a boletsoeng esale pele a tla qala ha lichaba li nahana hore li se li le haufi haholo le ho rarolla a mang a mathata a tsona a maholo. Ho timetsoa ka tšohanyetso ha “Babylona e Moholo,” e leng ’Muso oa bolumeli ba bohata o laolang lefatše lohle, ho tla makatsa lefatše. Marena hammoho le batho ba bang ba tla makala ha ho ahloloa Babylona e Moholo.—Tšen. 17:1-6, 18; 18:9, 10, 15, 16, 19.
18. Jehova o etsa joang ha Satane a hlasela batho ba Hae?
18 Ha ho fihla nako e itseng ea bohlokoa, ho tla ba le “lipontšo letsatsing le khoeling le linaleling,” ’me “pontšo ea Mor’a motho e tla bonahala leholimong.” Ka nako eo re ka ‘ema tsoee! hobane topollo ea rōna e atametse.’ (Luka 21:25-28; Mat. 24:29, 30) Satane, kapa Gogo, o tla hlasela batho ba Molimo ka mabotho a hae. Empa mabapi le ba hlaselang bahlanka ba tšepahalang ba hae, Jehova o re: “Ea le amang o ama leihlo la ka.” (Zak. 2:8) Kahoo, boiteko ba Satane ba ho ba timetsa bo ke ke ba atleha. Hobane’ng? Hobane ’Musi Morena Jehova o tla nka khato ka potlako e le hore a lopolle bahlanka ba hae.—Ezek. 38:9, 18.
19. Ke hobane’ng ha re ka kholiseha hore makhotla a Molimo a lihang kahlolo a tla felisa tsamaiso ea Satane?
19 Ha Molimo a nka khato khahlanong le lichaba, ‘li tla tseba hore ke eena Jehova.’ (Ezek. 36:23) O tla romela makhotla a hae a lihang kahlolo—e leng limiriade tsa libōpuoa tsa moea tse etelletsoeng pele ke Kreste Jesu—ho timetsa karolo e setseng ea tsamaiso ea Satane e lefatšeng. (Tšen. 19:11-19) Ha re hopola hore ka lekhetlo le leng lengeloi le le leng feela le ile la nka bosiu bo le bong feela ho ‘bolaea lira tsa Molimo tse likete tse lekholo le mashome a robeli a metso e mehlano,’ re ka kholiseha hore ha matšoenyeho a maholo a fihla sehlohlolong ka Armagedone, lekhotla la leholimo le tla timetsa habonolo feela karolo e ’ngoe le e ’ngoe e saletseng ea tsamaiso ea Satane e lefatšeng. (2 Mar. 19:35; Tšen. 16:14, 16) Satane le bademona ba hae ba tla koalloa ka mohohlong ka lilemo tse sekete. Qetellong, ba tla timetsoa.—Tšen. 20:1-3.
20. Jehova o tla finyella eng a sebelisa ’Muso?
20 Kahoo ho tla be ho felisitsoe bokhopo lefatšeng, ’me batho ba lokileng ba tla phela ka ho sa feleng lefatšeng lena. Jehova o tla be a bontšitse hore ke Molopolli e Moholo. (Pes. 145:20) A sebelisa ’Muso, o tla tlosa qoso bobusing ba hae, a halaletse lebitso la hae le halalelang, a be a phethahatse morero oa hae o moholo ka lefatše. E se eka u ka thabela tšebeletso ea hao haholo ha u ntse u bolela litaba tsena tse molemo le ho thusa ba ‘nang le tšekamelo e nepahetseng bakeng sa bophelo bo sa feleng’ hore ba hlokomele hore haufinyane ’Muso oa Molimo o tla re lopolla!—Lik. 13:48.
Na U sa Hopola?
• Jesu o ile a totobatsa bohlokoa ba ’Muso joang?
• Ke hobane’ng ha hona joale ho hlokahala hore ’Muso oa Molimo o re lopolle ho feta leha e le neng pele?
• Ke liketsahalo life tseo re ka li lebellang nakong ea matšoenyeho a maholo?
• Jehova o bontša joang hore ke Molopolli e Moholo?
[Litšoantšo tse leqepheng la 12, 13]
Lentsoe la Molimo le ile la bolela esale pele ka mosebetsi oa ho bolela lefatšeng lohle oo ho seng o tšoanang le oona o neng o tla etsoa mehleng ea rōna
[Setšoantšo se leqepheng la 15]
Joalokaha Jehova a ile a lopolla Noe le lelapa la hae, le rōna A ka re lopolla
[Setšoantšo se leqepheng la 16]
Jehova o tla “hlakola meokho eohle . . . ’me lefu ha le sa tla hlola le e-ba teng.”—Tšen. 21:4