Le Tsoele Pele ho Etsa se Molemo
“Le tsoele pele . . . ho etsa se molemo.”—LUKA 6:35.
1, 2. Ke hobane’ng ha hangata ho le thata ho etsetsa batho ba bang se molemo?
HO KA ’na ha e-ba thata ho etsetsa batho ba bang se molemo. Batho bao re ba bontšang lerato ba ka ’na ba se ke ba re bontša lona. Le hoja re etsa sohle se matleng a rōna ho thusa batho ka ho leka ho ba bolella “litaba tse molemo tse khanyang tsa Molimo ea thabileng” le Mora oa hae, ba ka ’na ba iphapanya kapa ba se ke ba leboha. (1 Tim. 1:11) Batho ba bang ba bontša hore ke “lira tsa thupa ea tlhokofatso ea Kreste” tse nang le lehloeo. (Bafil. 3:18) Kaha re Bakreste, re lokela ho ba tšoara joang?
2 Jesu Kreste o ile a re ho barutuoa ba hae: “Le tsoele pele ho rata lira tsa lōna le ho etsa se molemo.” (Luka 6:35) Joale, a re ke re hlahlobisiseng keletso ena. Re tla boela re rue molemo lintlheng tse ling tseo Jesu a ileng a li bua mabapi le ho etsetsa ba bang se molemo.
‘Ratang Lira Tsa Lōna’
3. (a) Ka mantsoe a hao, fana ka kakaretso ea polelo ea Jesu e tlalehiloeng ho Matheu 5:43-45. (b) Ke maikutlo afe mabapi le Bajuda le bao e seng Bajuda a ileng a e-ba teng har’a baeta-pele ba bolumeli ba Bajuda ba lekholong la pele la lilemo?
3 Thutong ea hae ea Thabeng e tsebahalang, Jesu o ile a bolella bamameli ba hae hore ba rate lira tsa bona le hore ba rapelle ba ba hlorisang. (Bala Matheu 5:43-45.) Batho ba neng ba le teng ketsahalong eo e ne e le Bajuda, ba neng ba tseba taelo ea Molimo e reng: “U se ke ua iphetetsa kapa ua jara bara ba batho ba heno ka pelo; ’me u rate oa heno joalokaha u ithata.” (Levitike 19:18) Baeta-pele ba bolumeli ba Bajuda ba lekholong la pele la lilemo ba ne ba nka hore “bara ba batho ba heno” le “oa heno” li ne li bua ka Bajuda feela. Molao oa Moshe o ne o hloka hore Baiseraele ba ikarole lichabeng tse ling, empa ho ile ha e-ba le maikutlo a hore bohle bao e seng Bajuda e ne e le lira, tse lokelang ho hlouoa e le batho ka bomong.
4. Barutuoa ba Jesu ba ne ba lokela ho tšoara lira tsa bona joang?
4 Ho fapana le moo, Jesu o ile a re: “Tsoelang pele ho rata lira tsa lōna le ho rapella ba le hlorisang.” (Mat. 5:44) Barutuoa ba hae ba ne ba lokela ho tšoara ka lerato ba ba bontšang lehloeo. Ho ea ka mongoli oa Kosepele Luka, Jesu o ile a re: “Ke re ho lōna ba mametseng, Tsoelang pele ho rata lira tsa lōna, ho etsetsa ba le hloileng se molemo, ho hlohonolofatsa ba le bitsetsang bomalimabe, ho rapella ba le rohakang.” (Luka 6:27, 28) Joaloka batho ba lekholong la pele la lilemo ba ileng ba nka lipolelo tsa Jesu ka botebo, le rōna re “etsetsa ba [re] hloileng se molemo” ka hore ha ba re bontša lehloeo re ba tšoare ka mosa. Re ‘hlohonolofatsa ba re bitsetsang bomalimabe’ ka hore re bue le bona ka mosa. Re ‘rapella ba re hlorisang’ ka ho re hlekefetsa kapa ka ho sebelisa mefuta e meng ea ‘thohako.’ Lithapelo tse joalo ke likōpo tse lerato tsa hore bahlorisi ba mpe ba fetole maikutlo a bona ’me ba etse lintho tseo ka tsona Jehova a tla ba hauhela.
5, 6. Ke hobane’ng ha re lokela ho rata lira tsa rōna?
5 Ke hobane’ng ha re lokela ho rata lira tsa rōna? Jesu o ile a re: “E le hore le ka ba bara ba Ntat’a lōna ea leng maholimong.” (Mat. 5:45) Haeba re mamela keletso eo, re ba “bara” ba Molimo ka hore re etsisa Jehova, ea ‘chabisetsang batho ba khopo le ba molemo letsatsi la hae le ea nesetsang batho ba lokileng le ba sa lokang pula.’ Joalokaha tlaleho ea Luka e bolela, Molimo “o mosa ho ba se nang teboho le ba khopo.”—Luka 6:35.
6 Ha Jesu a hatisa bohlokoa ba hore barutuoa ba hae ba ‘tsoele pele ho rata lira tsa bona,’ o ile a re: “Haeba le rata ba le ratang, le na le moputso ofe? Na le babokelli ba lekhetho ha ba etse ntho e tšoanang? Hape haeba le lumelisa barab’abo lōna feela, le etsa ntho efe e fetang e tloaelehileng? Na le batho ba lichaba ha ba etse ntho e tšoanang?” (Mat. 5:46, 47) Haeba re ne re rata ba re etsang hantle feela, sena se ne se ke ke sa tšoaneloa ke hore re fumane “moputso” leha e le ofe o tsoang ho Molimo. Esita le babokelli ba lekhetho, bao hangata ba neng ba khesoa, ba ne ba rata batho ba neng ba ba rata.—Luka 5:30; 7:34.
7. Ke hobane’ng ha re ne re tla be re sa etse ntho e fetang e tloaelehileng haeba re ne re ka lumelisa “barab’abo” rōna feela?
7 Tumeliso e tloaelehileng ea Sejuda e ne e akarelletsa lentsoe “khotso.” (Baahl. 19:20; Joh. 20:19) Ena e ne e le tsela e sa tobang ea ho lakaletsa motho ea lumelisoang bophelo bo botle, boiketlo le nala. Re ne re tla be re sa etse ntho ‘e fetang e tloaelehileng’ haeba re ne re ka lumelisa feela bao re nkang hore ke “barab’abo” rōna. Joalokaha Jesu a boletse, “batho ba lichaba” ba ne ba etsa se tšoanang.
8. Jesu o ne a khothalletsa bamameli ba hae hore ba etse’ng ha a ne a re: “Le phethahale”?
8 Sebe seo re se futsitseng se ne se etsa hore ho se ke ha khoneha hore barutuoa ba Kreste e be ba hlokang sekoli, le ba phethahetseng. (Bar. 5:12) Leha ho le joalo, Jesu o ile a phetha karolo ena ea puo ea hae ka ho re: “Tumellanong le hoo, le phethahale, joalokaha Ntat’a lōna oa leholimo a phethahetse.” (Mat. 5:48) Ka tsela eo o ne a khothalletsa bamameli ba hae hore ba etsise ‘Ntate oa bona oa leholimo,’ Jehova, ka ho etsa hore lerato la bona e be le phethahetseng ka ho rata lira tsa bona. Ho lebeletsoe hore le rōna re etse se tšoanang.
Ke Hobane’ng ha re Lokela ho Tšoarela?
9. Mantsoe a reng: “U re tšoarele melato ea rōna” a bolela’ng?
9 Re tsoela pele re etsa se molemo ha re bontša mohau ka ho tšoarela motho ea re siteloang. Ha e le hantle, karolo ea thapelo ea Jesu ea mohlala e na le mantsoe ana: “U re tšoarele melato ea rōna, joalokaha le rōna re tšoaretse ba nang le melato ho rōna.” (Mat. 6:12) Ha e le hantle, sena ha se bue ka melato ea chelete. Kosepele ea Luka e bontša hore “melato” eo Jesu a neng a nahanne ka eona ke libe, hobane e re: “U re tšoarele libe tsa rōna, kaha le rōna re tšoarela e mong le e mong ea nang le molato ho rōna.”—Luka 11:4.
10. Re ka etsisa Molimo joang tabeng ea ho tšoarela?
10 Re lokela ho etsisa Molimo, ea tšoarelang ka bolokolohi baetsalibe ba bakileng. Moapostola Pauluse o ile a ngola: “Le bontšane mosa, le be le qenehelo e bonolo, le tšoarelane ka bolokolohi feela joalokaha Molimo le eena ka Kreste a ile a le tšoarela ka bolokolohi.” (Baef. 4:32) Mopesaleme Davida o ile a bina: “Jehova o mohau ’me o mosa, o lieha ho halefa ’me o tletse mosa o lerato. . . . Ha aa re etsa ho ea ka libe tsa rōna; leha e le hore o re tliselitse se re tšoanelang ho ea ka liphoso tsa rōna. . . . Joalokaha bochaba-tsatsi bo le hōle le bophirima-tsatsi, ka ho tšoanang o suthiselitse litlōlo tsa rōna hōle le rōna. Joalokaha ntate a bontša mohau ho bara ba hae, Jehova o bontšitse mohau ho ba mo tšabang. Etsoe o tseba sebōpeho sa rōna hantle, oa hopola hore re lerōle.”—Pes. 103:8-14.
11. Jehova o tšoarela bo-mang?
11 Batho ba ka tšoareloa ke Molimo hafeela ba se ba tšoaretse ba ba sitetsoeng. (Mar. 11:25) Ha a hatisa ntlha ena, Jesu o ile a phaella ka ho re: “Etsoe haeba le tšoarela batho litšito tsa bona, Ntat’a lōna oa leholimo le eena o tla le tšoarela; athe haeba le sa tšoarele batho litšito tsa bona, le Ntat’a lōna a ke ke a le tšoarela litšito tsa lōna.” (Mat. 6:14, 15) Ka sebele, Molimo o tšoarela feela ba tšoarelang ba bang ka bolokolohi. Tsela e ’ngoe ea ho tsoela pele re etsa se molemo ke ka ho mamela keletso ea Pauluse: “Esita le joalokaha Jehova a ile a le tšoarela ka bolokolohi, le etse joalo le lōna.”—Bakol. 3:13.
“Khaotsang ho Ahlola”
12. Jesu o ile a fana ka keletso efe mabapi le ho ahlola ba bang?
12 Tsela e ’ngoe ea ho etsa se molemo e ile ea boleloa Thutong ea Thabeng ha Jesu a ne a bolella bamameli ba hae hore ba khaotse ho ahlola batho ba bang eba ka mor’a moo, o etsa papiso e matla ho hatisa ntlha ena. (Bala Matheu 7:1-5.) A re ke re tšohleng hore na Jesu o ne a bolela’ng ha a ne a re: “Khaotsang ho ahlola.”
13. Bamameli ba Jesu ba ne ba lokela hore ba ‘’ne ba lokolle’ joang?
13 Kosepeleng ea Matheu ho qotsoa mantsoe a Jesu ha a re: “Khaotsang ho ahlola e le hore le se ke la ahloloa.” (Mat. 7:1) Ho ea ka Luka, Jesu o ile a re: “Le khaotse ho ahlola, ’me ho hang le ke ke la ahloloa; hape khaotsang ho nyatsa, ’me ho hang le ke ke la nyatsuoa. Le ’ne le lokolle, ’me le tla lokolloa.” (Luka 6:37) Bafarisi ba lekholong la pele la lilemo ba ne ba ahlola ba bang ka thata ba itšetlehile ka litloaelo tse sa thehoang Mangolong. Leha e le bafe ba bamameli ba Jesu ba neng ba etsa sena ba ne ba lokela hore ba “khaotse ho ahlola.” Ho e-na le hoo, ba ne ba lokela hore ba ‘’ne ba lokolle,’ ke hore, ba tšoarele ba bang mefokolo ea bona. Moapostola Pauluse o ile a fana ka keletso e tšoanang mabapi le ho tšoarela, joalokaha ho boletsoe ka holimo.
14. Ha barutuoa ba Jesu ba ne ba tšoarela, ba ne ba tla susumelletsa batho ba bang hore ba etse’ng?
14 Ha barutuoa ba Jesu ba tšoarela, ba ne ba tla susumelletsa batho ba bang hore le bona ba tšoarele. Jesu o ile a re: “Kahlolo eo le ahlolang ka eona, le tla ahloloa ka eona; ’me tekanyo eo le lekanyang ka eona, ba tla le lekanyetsa ka eona.” (Mat. 7:2) Mabapi le tsela eo re tšoarang ba bang ka eona, re kotula seo re se jalang.—Bagal. 6:7.
15. Jesu o ile a bontša joang hore ho nyatsa ba bang ka ho feteletseng ho fosahetse?
15 Hopola hore e le hore a bontše hore na ho nyatsa ba bang ka ho feteletseng ho fosahetse hakae, Jesu o ile a botsa: “Joale, ke hobane’ng ha u sheba lehlokoa le ka leihlong la mor’eno, empa u sa nahane ka leballo le ka leihlong la hao? Kapa ke joang u ka reng ho mor’eno, ‘Ntumelle ke ntše lehlokoa ka leihlong la hao’; athe, bona! leballo le ka leihlong la hao?” (Mat. 7:3, 4) Motho ea itloaelitseng ho nyatsa motho e mong o bona phoso e fokolang e ka “leihlong” la mor’abo. Motho eo ea nyatsang o fana ka maikutlo a hore mor’abo ha a bone litaba hantle. Le hoja phoso e fokola—joaloka lehlokoa—motho ea nyatsang o ithaopela ho ‘ntša lehlokoa’ leo. Ka boikaketsi o ithaopela ho thusa mor’abo hore a bone litaba hantle.
16. Ke hobane’ng ha ho ka thoe Bafarisi ba ne ba e-na le “leballo” ka leihlong la bona?
16 Baeta-pele ba bolumeli ba Bajuda ke bona bao ka ho khetheha ba neng ba nyatsa batho ba bang haholo. Ka mohlala: Ha monna e mong ea foufetseng ea neng a phekotsoe ke Kreste a bolela hore e tlamehe ebe Jesu o tsoa ho Molimo, Bafarisi ba ile ba araba ka bohale: “U tsoaletsoe libeng ka ho feletseng, ’me leha ho le joalo na ua re ruta?” (Joh. 9:30-34) Mabapi le ho ahlola litaba ka tšoanelo ho ea ka pono ea Jehova, Bafarisi ba ne ba e-na le “leballo” ka leihlong la bona ’me ba ne ba foufetse ka ho feletseng. Kahoo Jesu o ile a bua ka matla a re: “Moikaketsi! Ntša leballo le ka leihlong la hao pele, joale u tla bona ka ho hlaka kamoo u ka ntšang lehlokoa ka leihlong la mor’eno.” (Mat. 7:5; Luka 6:42) Haeba re ikemiselitse ho etsa se molemo, le ho tšoara batho ba bang hantle, re ke ke ra ba batho ba nyatsang ba bang ka bohale, ba lulang ba batla liphoso ho se etsoang ke barab’abo rōna. Ho e-na le hoo, re tla lumela hore ha rea phethahala ’me ka lebaka leo re qobe ho ahlola le ho nyatsa balumeli-’moho le rōna.
Re Lokela ho Tšoara ba Bang Joang?
17. Ho ea ka Matheu 7:12, re lokela ho tšoara batho ba bang joang?
17 Thutong ea Thabeng, Jesu o ile a bolela hore Molimo o bontša maikutlo a hore ke ntate oa bahlanka ba Hae ka ho araba lithapelo tsa bona. (Bala Matheu 7:7-12.) Ke habohlokoa hore ebe Jesu o ile a fana ka molao ona oa boitšoaro: “Lintho tsohle tseo le batlang hore batho ba le etse tsona, le lōna ka ho tšoanang le ba etse tsona.” (Mat. 7:12) Ke feela ha re tšoara batho ba bang ka tsela ena re ka bontšang hore re balateli ba ’nete ba Jesu Kreste.
18. “Molao” o ile oa bontša joang hore re lokela ho tšoara ba bang ka tsela eo re batlang hore ba re tšoare ka eona?
18 Ka mor’a ho bolela hore re lokela ho tšoara batho ba bang ka tsela eo re batlang hore ba re tšoare ka eona, Jesu o ile a phaella ka ho re: “Ha e le hantle, sena ke se boleloang ke Molao le Baprofeta.” Ha re tšoara batho ba bang ka tsela eo Jesu a e laetseng, re etsa se tumellanong le morero oa “Molao”—e leng mangolo a bōpang libuka tsa Bibele ho tloha ho Genese ho isa ho Deuteronoma. Ntle le ho senola morero oa Jehova oa ho hlahisa peō e neng e tla felisa bobe, libuka tsena li hlalosa Molao oo Molimo a ileng a o fa sechaba sa Iseraele ka Moshe ka 1513 B.C.E. (Gen. 3:15) Tse ling tsa lintho tseo Molao o ileng oa li hlakisa ke hore, Baiseraele ba ne ba lokela ho etsa lintho ka toka, ba se ke ba e-ba leeme le hore ba ne ba lokela ho etsetsa ba hlorileng le bajaki se molemo.—Lev. 19:9, 10, 15, 34.
19. “Baprofeta” ba bontša joang hore re lokela ho etsa se molemo?
19 Ha Jesu a ne a bua ka “Baprofeta” o ne a nahanne ka libuka tsa boprofeta tsa Mangolo a Seheberu. Li na le boprofeta bo buang ka Mesia bo phethahetseng ho Kreste ka boeena. Mangolo ao a boetse a bontša hore Molimo o hlohonolofatsa batho ba hae ha ba etsa se nepahetseng mahlong a hae ’me ba tšoara batho ba bang hantle. Ka mohlala, boprofeta ba Esaia bo ile ba fa Baiseraele keletso ena: “Sena ke seo Jehova a se boletseng: ‘Bolokang toka, ’me le etse se lokileng. . . . Ho thaba motho ea shoang ea etsang sena, le mora oa moloko oa batho ea tšoarellang ho sona, . . . ea thibang letsoho la hae e le hore a se ke a etsa bobe ba mofuta leha e le ofe.’” (Esa. 56:1, 2) Ka sebele, Molimo o lebeletse hore batho ba hae ba ’ne ba etse se molemo.
Etsa se Molemo ho Batho ba Bang Kamehla
20, 21. Bongata bo ile ba etsa’ng ha bo utloa Thuto ea Jesu ea Thabeng, hona ke hobane’ng ha u lokela ho nahanisisa ka eona?
20 Re tšohlile lintlha tse seng kae feela har’a lintlha tse ngata tsa bohlokoa tseo Jesu a ileng a li bua Thutong ea hae ea Thabeng e fanoeng ka bokhabane. Leha ho le joalo, re ka utloisisa habonolo hore na ba ileng ba utloa seo a ileng a se bua ketsahalong eo ba ile ba itšoara joang. Tlaleho e bululetsoeng e re: “Joale ha Jesu a qeta lipolelo tsena, phello ea e-ba hore bongata bo ile ba hlolloa ke tsela ea hae ea ho ruta; kaha o ne a ba ruta joaloka motho ea nang le matla, eseng joaloka bangoli ba bona.”—Mat. 7:28, 29.
21 Ha ho pelaelo hore Jesu Kreste e ne e le “Moeletsi ea Hlollang” ea boletsoeng esale pele. (Esa. 9:6) Thuto ea Thabeng ke mohlala o ka sehloohong o bontšang hore Jesu o ne a tseba hore na Ntate oa hae oa leholimo o sheba litaba joang. Ho phaella lintlheng tseo re li tšohlileng, puo eo e na le lintho tse ngata tseo e buang ka tsona ka thabo ea sebele, kamoo re ka qobang boitšoaro bo bobe kateng, kamoo re ka etsang se lokileng kateng, seo re lokelang ho se etsa e le hore re be le bokamoso bo thabisang le bo sireletsehileng le lintlha tse ling tse ngata. Ke hobane’ng ha u sa bale Matheu khaolo ea 5 ho ea ho 7 hape ka hloko le ka thapelo? Nahanisisa ka keletso ea Jesu e hlollang e tlalehiloeng moo. Bophelong ba hao u sebelise seo Kreste a se boletseng Thutong ea hae ea Thabeng. Ha u etsa joalo, u tla ba boemong bo molemo ba ho khahlisa Jehova, ho tšoara ba bang hantle le ho tsoela pele u etsa se molemo.
U Tla Araba Joang?
• Re lokela ho tšoara lira tsa rōna joang?
• Ke hobane’ng ha re lokela ho tšoarela?
• Jesu o ile a re’ng ka ho ahlola batho ba bang?
• Ho ea ka Matheu 7:12, re lokela ho tšoara batho ba bang joang?
[Ntlha e Qolotsoeng e leqepheng la 10]
Na ua tseba hore na ke hobane’ng ha Jesu a ile a re: “Khaotsang ho ahlola”?
[Setšoantšo se leqepheng la 8]
Ke hobane’ng ha re lokela ho rapella ba re hlorisang?
[Setšoantšo se leqepheng la 10]
Na kamehla u tšoara batho ba bang ka tsela eo u batlang hore ba u tšoare ka eona?