Ho Sebetsa le Jehova ka Botšepehi
“Molimo, u nthutile ho tloha bocheng ba ka, ’me ho fihlela joale ke ntse ke tumisa limakatso tsa hao.”—PESALEME EA 71:17, “TLP.”
1. Ke hobane’ng ha re ka bolela hore mosebetsi ke mpho e tsoang ho Jehova?
MOSEBETSI ke e ’ngoe ea limpho tseo Molimo o li fileng motho. Ha a bua le batsoali ba rōna ba pele, Adama le Eva, Jehova o ile a re: “Le tlale lefatšeng, le rene holim’a lona.” Eo e ne e le kabelo ea mosebetsi e phephetsang empa ba ne ba ka e khona. Ho sebelisa ’mele le kelello ho ne ho tla eketsa thabo ea bona ea ho phela, ho feta eng kapa eng e thabeloang ke liphoofolo tse neng li kopanetse lehae la bona la lefatše le bona.—Genese 1:28.
2, 3. (a) Ho ba bangata mosebetsi o se o fetohile eng, hona hobane’ng? (b) Ke monyetla ofe oa ho etsa mosebetsi o khethehileng oo ho hlokahalang hore re o hlahlobe?
2 Esita le boemong ba rōna ba ho se phethahale, “mosebetsi o thata” o tlisang “molemo” ke “mpho ea Molimo,” joalokaha monna ea bohlale Salomone a ngotse. (Moeklesia 3:13, NW) Motho o sa ntsane a hloka ho sebelisa matla a hae a kelello le a ’mele. Ho lula u sa sebetse hoa tepelletsa. Leha ho le joalo, hase mosebetsi oohle o motle kapa o putsang. Ho ba bangata, mosebetsi ke ntho e tenang, eo ba e etsang hobane feela ba tlameha ho iphelisa.
3 Leha ho le joalo, ho na le mosebetsi o putsang kannete oo bohle ba memeloang ho kopanela ho oona. Empa ho na le bahanyetsi ba bangata le mathata a lokelang ho hlōloa ke ba kopanelang ho oona. Ke hobane’ng ha e le habohlokoa hore re tšoanelehe bakeng sa mosebetsi oo? Re ka etsa hoo joang? Pele re arabela lipotso tsena, a re ke re hlahlobeng pele hore:
Re Sebeletsa Mang?
4. Ke mosebetsi oa mofuta ofe o neng o tlisetsa Jesu thabo le khotsofalo?
4 Jesu Kreste o itse: “Sejo sa ka ke ho etsa thato ea ea nthomileng, le ho phetha mosebetsi oa hae.” (Johanne 4:34) Ho sebeletsa Jehova ka botšepehi ho ne ho tlisetsa Jesu thabo le khotsofalo tse khōlō. Ho ne ho mo fa morero bophelong, ’me qetellong ea tšebeletso ea hae ea lilemo tse tharo le halofo, ka sebele o ne a ka re ho Ntat’ae oa leholimo: “Ke u tlotlisitse lefatšeng, ke phethile mosebetsi oo u nong u ’neile oona hore ke o etse.” (Johanne 17:4) Feela joalokaha lijo tsa sebele li matlafatsa, kahoo mosebetsi oo e leng oa bohlokoa moeeng le oona oa matlafatsa. Jesu o ile a hatella sena ka lekhetlo le leng ha a lemosa: “Se sebeletseng lijo tse felang, empa le sebeletse lijo tse tla ba teng le bophelong bo sa feleng.” (Johanne 6:27) Ho fapana le hoo, mosebetsi o sa beheng litholoana ka tsela ea moea o tlisa ho nyahama le lefu.
5. Ke bo-mang ba neng ba hanyetsa mosebetsi o motle oa Jesu, hona hobane’ng?
5 “Ntate o sa sebetsa le joale, le ’na kea sebetsa.” Jesu o ne a lebisitse polelo ena ho Bajode ba neng ba mo nyatsa ka lebaka la hore o ile a phekola monna ea neng a kutse ka lilemo tse 38 ka letsatsi la Sabbatha. (Johanne 5:5-17) Le hoja Jesu a ne a etsa mosebetsi oa Jehova, bahanyetsi ba bolumeli ba ne ba hana ho lumela ’nete eo ’me ba ile ba etsa eng kapa eng eo ba ka e khonang ho mo thiba. Hobane’ng? Hobane ba ne ba tsoa ho ntat’a bona, Satane Diabolose, eo ka mehla a ’nileng a hanyetsa mosebetsi oa Jehova. (Johanne 8:44) Kaha Satane a ka ‘ikhakanya ka sebopeho se kang sa lengeloi la leseli,’ a sebelisa “mefuta eohle ea lithetso tsa bokhopo,” re hloka temoho ea moea le monahano o hlaphohileng bakeng sa ho hlokomela mesebetsi ea hae ka sebōpeho sa eona sa ’nete. Ho seng joalo, re ka ’na ra iphumana re etsa mosebetsi o khahlanong le Jehova.—2 Ba-Korinthe 11:14; 2 Ba-Thessalonika 2:9, 10, TLP.
Bahanyetsi Ba Kene Mosebetsing
6. Ke hobane’ng ha bakoenehi e le “basebetsi ba mano”? Bontša.
6 Ba bang, joaloka bakoenehi ba bang ba itseng kajeno, ka ho se tšepahale ba sebetsa e le mahlahana a Satane bakeng sa ho fokolisa tumelo ea litho tsa phutheho ea Bokreste tse sa tsoa qala ho kopanela. (2 Ba-Korinthe 11:13) Ho fapana le hore feela ba sebelise Bibele e le motheo oa lithuto tsa ’nete, ba shebana le ho leka ho nyefola New World Translation of the Holy Scriptures, joalokaha eka Lipaki tsa Jehova li itšetlehile ka eona feela bakeng sa ho fumana tšehetso. Empa ha ho joalo. Karolong e khōlō ea lekholo lena la lilemo, Lipaki li ne li sebelisa haholo-holo King James Version, Douay Version ea Roma e K’hatholike, kapa liphetolelo life kapa life tse neng li fumaneha ka puo ea tsona, bakeng sa ho ithuta ’nete ka Jehova le merero ea hae. ’Me li ile tsa sebelisa liphetolelo tsena tse ling tsa khale bakeng sa ho phatlalatsa seo e leng ’nete ka boemo ba bafu, kamano ea Molimo le Mora oa oona, le hore na ke hobane’ng ha e le mohlatsoana feela o eang leholimong. Batho ba nang le tsebo le bona baa hlokomela hore Lipaki tsa Jehova li ntse li tsoela pele ho sebelisa liphetolelo tse ngata tsa Bibele mosebetsing oa tsona oa ho bolela evangeli lefatšeng ka bophara. Leha ho le joalo, ho tloha ka 1961 li boetse li thabetse ho sebelisa New World Translation, ka phetolelo ea eona e nchafalitsoeng, e nepahetseng e bileng e balehang hantle esita le ka mokhoa o bonolo.
7. (a) Ke hobane’ng ha Jesu a latola ba bangata ba bolelang hore ba lumela ho eena? (b) Ke hobane’ng ha e le habohlokoa ho utloa keletso e ho 1 Johanne 4:1 (NW)?
7 Jesu o ile a re o ne a tla latola ba bangata ba bolelang hore ba lumela ho eena. O ile a lumela hore ba ka ’na ba profeta, ba leleka bademona, ’me ba “etsa mehlolo e mengata” ka lebitso la hae. Ho ntse ho le joalo, o tsebahatsa ena e le mesebetsi ea “bokhopo.” (Mattheu 7:21-23) Hobane’ng? Hobane ha ba etse thato ea Ntat’ae oa leholimo ’me ha ba na thuso ho ea kamoo Jehova Molimo a talimang litaba ka teng. Kajeno mesebetsi e sa tloaelehang, esita le e bonahalang e le ea mohlolo, e ntse e ka ’na ea e-ba e tsoang ho mothetsi e moholo, Satane. Moapostola Johanne, ha a ngola lengolo la hae le akaretsang lilemong tse fetang 60 ka mor’a lefu la Jesu le tsoho ea hae, o ile a eletsa Bakreste hore ba “se lumele polelo e ’ngoe le e ’ngoe e bululetsoeng, empa ba leke lipolelo tse bululetsoeng ho bona hore na li hlaha ho Molimo.” Ho hlokahala hore re etse se tšoanang.—1 Johanne 4:1, NW.
Mesebetsi e sa Putseng
8. Re lokela ho ba le boikutlo bofe ka mesebetsi ea nama?
8 Esita le haeba ha rea kenella mosebetsing o re thibelang ho beha litholoana moeeng, mosebetsi oa rōna ha o na thuso haeba o tsoela pele ho fepa litakatso tsa nama e bolileng. Moapostola Petrose o boletse hore re qetile nako e telele ka ho lekaneng re ntse re phetha “ho ratoang ke bahedene . . . re itsamaela ka bootsoa, le ka litakatso, le ka botahoa, le ka meharo ea lijo le ea lino, le ka tšebeletso e manyala ea melimo ea bohata.” (1 Petrose 4:3, 4) Ka ho hlakileng, sena ha se bolele hore bohle bao hona joale e leng Bakreste ba inehetseng ba ne ba kenelletse linthong tse joalo, empa se bolela hore boikutlo ba ba ’nileng ba etsa joalo bo lokela hore e be bo ile ba fetoha ka potlako ha pono ea bona ea moea e ntse e hōla. Lefatše le tla ba nyefola ka lebaka la ho sokoloha ha bona; seo se lokela ho lebelloa. Leha ho le joalo, ba tlameha ho fetoha hore e tle e be basebetsi ba tšepahalang tšebeletsong ea Jehova.—1 Ba-Korinthe 6:9-11.
9. Re ithuta eng phihlelong ea Paki e ileng ea qala ho ikoetlisetsa ho ba sebini sa ’mino oa liletsa o binoang litšoantšisong?
9 Jehova o re file limpho tse ngata hore re li thabele, ’mino ke e ’ngoe ea tsona. Leha ho le joalo, kaha “lefatše lohle le rapaletse ka tlase ho e mobe,” Satane Diabolose, na see ha se akarelletse lefatše la ’mino? (1 Johanne 5:19) E, ’mino e ka ba leraba le ipatileng, joalokaha Sylvana a ile a hlokomela. O ile a ba le monyetla oa ho koetlisoa Fora hore e be sebini sa ’mino oa liletsa litšoantšisong. Oa hlalosa: “Ke ne ke ntse ke e-na le takatso e matla ea ho sebeletsa Jehova. Ke ne ke ntse ke thabela bopula-maliboho bo thusang ke bile ke tšepile ho kopanya lintho tsena tse peli bophelong ba ka. Empa bothata ba pele boo ke ileng ka lokela ho talimana le bona ho hahamalleng pakane ea ka e ne e le boitšoaro bo bobe. Qalong, metsoalle ea ka e ne e ntalima ke koalehile ha ke sa kopanele le eona puong ea eona le mohlaleng oa eona oa boitšoaro bo bobe. Hamorao, tikoloho ena e silafetseng e ile ea qala ho nketsa ea sa tsotelleng, ea etsa hore ke mamelle lintho tseo Jehova a li hloileng. E mong oa matichere a ka o ile a ’na a mphehella hore ke fetole ho bina ha ka ntho ea bohlokoa ka ho fetisisa, ’me ke ile ka rutoa ho ba mabifi ha ke le sethaleng le ho nahana hore ke phahametse motho e mong le e mong. Sena sohle se ile sa etsa hore ke ikutloe ke nyahame haholo. Qetellong, ke ile ka lokela ho itokisetsa ho ea tlhōlisanong ea teko e khethehileng. Ke ile ka rapela Jehova hore a mpontše ka ho hlakileng hore na ke lokela ho nka tsela efe. Le hoja ke ile ka bina hantle ka ba ka ikutloa ke e-na le kholiseho, ha kea ka ka ba har’a ba ileng ba khethoa. Ka mor’a moo, ke ile ka tseba lebaka—liphetho li ne li reriloe ka sekhukhu pele ho tlhōlisano. Empa ke ne ke fumane karabelo e hlakileng thapelong ea ka ’me ke ile ka etsa qeto ea ho tlohela ho bina sethaleng sa ’mino oa liletsa o binoang litšoantšisong ho ea ruta ’mino ke le hae.” Hamorao khaitseli enoa o ile a nyaloa ke moholo ka phuthehong ea Bokreste, moo hona joale ka bobeli ba sebeletsang ka botšepehi ho ntšetseng lithahasello tsa ’Muso pele.
10. U fihlela qeto efe ka mantsoe a Jesu a ho Johanne 3:19-21?
10 Jesu o itse: “E mong le e mong ea etsang bobe, o hloile leseli, ’me ha a tle leseling, mesebetsi ea hae e tle e se ke ea khalemeloa.” Ka lehlakoreng le leng, “ea etsang ’nete, o tla leseling, mesebetsi ea hae e tle e bonahatsoe hore e etselitsoe Molimo.” (Johanne 3:19-21) Ho sebetsa tumellanong le thato le morero tsa Jehova ke tlhohonolofatso e khōlō hakaakang! Empa ho etsa hoo ka katleho, re tlameha hore ka mehla re lumelle hore mesebetsi ea rōna e hlahlobisisoe leseling la Lentsoe la Molimo. Ha ho mohla re seng re hōlile haholo ebile ha ho mohla e seng e le morao haholo hore re ka fetola bophelo ba rōna le ho amohela memo ea ho etsa tšebeletso ea Jehova e putsang.
Ho Etsa “Mesebetsi e Metle” Kajeno
11. Ke eng eo ba bangata ba e phehellang joaloka “mesebetsi e metle,” hona ke hobane’ng ha hoo ho ka tlisa ho nyahama?
11 Kajeno mosebetsi o putsang o tlameha ho bontša ho potlaka ha linako tsa rōna. Batho ba bangata ba tobang ’nete ba lumellana le mesebetsi eo hangata e hlalosoang e le “mesebetsi e metle” ebile ba ipoloka ba tšoarehile ka eona mesebetsi eo, e etsoang molemong oa batho ka kakaretso kapa ka lebaka le itseng ka ho khethehileng. Leha ho le joalo, mosebetsi oa mofuta ona e ka ba o nyahamisang hakaakang! Brithani, CAFOD (Catholic Fund for Overseas Development [Letlōle la K’hatholike la Ntlafatso Mose ho Maoatle]), ha e tlaleha ka phutuho ea eona ea liphallelo bakeng sa ho felisa tlala, e itse: “Lilemong tse tharo tse fetileng . . . ho ile ha bokelloa liranta tse limillione bakeng sa liphallelo. Ho ile ha pholosoa bophelo ba batho ba likete. Hona joale bophelo ba batho bao bo kotsing hape . . . Empa hobane’ng? Phoso e hlahile hokae?” Ha e tsoela pele ka tlaleho ea eona, CAFOD Journal e hlalosa hore ha ho mohla mathata a nako e telele a kileng a rarolloa le hore “lichelete tse hlokahalang ka tieo bakeng sa ntlafatso bathong li ’nile tsa sebelisoa ho butsoela khohlano [ntoa ea lehae].” Ntle le pelaelo, u ’nile ua utloa maikutlo a tšoanang le ao a boleloa ke mekhatlo e thusang bahloki e kenelletseng mosebetsing o tšoanang le oo.
12. Karabelo feela mathateng ao lefatše le talimaneng le ’ona kajeno ke efe?
12 Tlala ke bothata bo hlokang thuso e potlakileng. Leha ho le joalo, ke bo-mang ba tsebahatsang mahlomola a kajeno a tlala le ntoa e le a phethahatsang boprofeta ba Jesu Kreste, bo supang bofelo ba tsamaiso ea lintho ea hona joale? (Mattheu 24:3, 7) Ke mang ea phatlalalitseng bopaki bo hokahanyang liketsahalo tsee le ho kalla ha bakalli ba bane ba lipere ba bontšitsoeng ka ho hlaka bukeng ea Bibele ea Tšenolo, khaolo 6? Lipaki tsa Jehova li ’nile tsa etsa joalo ka botšepehi koranteng ena li sa khaotse. Hobane’ng? Ho bontša hore ho hlahisa pheko leha e le efe ea nako e telele hase hoo motho a ka ho finyellang. Sena ha se bolele hore Bakreste ba iphapanyetsa mathata a lefatše. Ho hang ha ho joalo. Ba na le kutloelo-bohloko ’me ba tla etsa sohle seo ba ka se khonang ho kokobetsa bohloko. Ho ntse ho le joalo, ka ho talima litaba ka tsela ea sebele ba toba ’nete ea hore ntle le hore Molimo o kenelle, le ka mohla mathata a lefatše a ke ke a rarolloa. Joaloka bafutsana, mathata ana a tla lula a le teng hafeela Satane a ntse a lumelletsoe ho tsoela pele e le ’musi oa lefatše lena.—Mareka 14:7; Johanne 12:31, TLP.
Mosebetsi oa Bohlokoa ka ho Fetisisa
13. Mosebetsi o potlakileng ka ho fetisisa ke ofe kajeno, ’me ke bo-mang ba o etsang?
13 Tlhokahalo e potlakileng ka ho fetisisa kajeno ke ho bolela litaba tse molemo tsa hore haufinyane ’Muso oa Jehova Molimo o tla nkela mebuso eohle ea lefatše sebaka ’me o tlise topollo e laba-labeloang ke batho ba tšabang Molimo. (Daniele 2:44; Mattheu 24:14) Jesu Kreste o ile a etsa hore ho bolela ka ’Muso oa leholimo e be oona morero oa hae o moholo bophelong, le hoja a ne a bolela naheng ea Palestina feela. Kajeno, ho bolela hona ho akaretsa lefatše lohle, feela joalokaha Jesu a ne a boletse hore ho tla ba joalo. (Johanne 14:12; Liketso 1:8) Ho ba le kabelo mosebetsing oa Molimo, esita le e nyenyane feela, ke tokelo eo ho seng e ka bapisoang le eona. Banna le basali, ba hōlileng le ba banyenyane ka ho tšoanang, bao ka nako e ’ngoe ba neng ba sa nahane hore le ka mohla e ka ba baboleli ba litaba tse molemo ke bona ba ka pele-pele mosebetsing oa ho bolela evangeli o phethoang ke Lipaki tsa Jehova kajeno. Joaloka Noe le lelapa la hae, ka botšepehi ba etsa mosebetsi oa Molimo tlas’a thōmo e tsoang ho Oona, ka hona ba o etsa ka matla a Oona, e le selelekela sa bofelo ba tsamaiso ena ea lintho.—Ba-Filippi 4:13, NW; Ba-Heberu 11:7.
14. Ke joang boboleli bo pholosang bophelo ’me ebile e le tšireletso ka nako e tšoanang?
14 Mosebetsi oa ho paka o etsoang ke Lipaki tsa Jehova mehleng ena ea qetello o pholosa bophelo ba ba utloang le ba nkang khato ka litaba tse molemo tseo ba li utloang. (Ba-Roma 10:11-15) Ke tšireletso hape ho ba bolelang. Ka ho ba le thahasello e tiileng ea ho thusa batho ba nang le mathata a fetang a rōna, mohlomong ha re na ho ameha ho tlōlisa ka mathata ao re nang le ’ona. Rea hlokomela hore lefatše lena leo litekanyetso tsa lona li ntseng li theoha le ne le tla lakatsa ho etsa hore re ipapise le litsela tsa lona. Kahoo ho tlatsa likelello tsa rōna mehopolo ea Molimo nakong ea boboleli ba rōna ha ho matlafatse tumelo feela; ho tla re tlisetsa molemo o fetisisang. Ho joalokaha Paki e ’ngoe e hlalositse: “Haeba ke sa leke ho fetola batho bao ke kopanang le bona, ba ka fetola ’na!”—Bapisa le 2 Petrose 2:7-9.
Ho Sebetsa le Phutheho
15. Ke boikarabelo bofe bo holim’a balisa ba tlaasana kajeno, ’me batho ba batona ka phuthehong ba lokela ho ba le boikutlo bofe ha ba nahana ka 1 Timothea 3:1?
15 Ha batho ba sa tsoa thahasella ba e-tla ka phuthehong, ba kena tlas’a tlhokomelo ea Molisa e Moholo, Jehova Molimo, le Molisa oa hae ea Molemo, Jesu Kreste. (Pesaleme ea 23:1; Johanne 10:11) Lefatšeng mona Balisa bana ba leholimo ba emetsoe ke balisa ba tlaasana ba mohlape ba tšepahalang, banna ba khethiloeng ka har’a liphutheho. (1 Petrose 5:2, 3) Ho ba boemong bo joalo ba tšebeletso ke tokelo ea bohlokoa ka ho fetisisa mehleng ena ea qetello. Mosebetsi oa molisa o boima, kaha ha o akarelletse feela ho etella pele ho ruteng phutheho le ho boleleng evangeli empa hape o akarelletsa ho sireletsa mohlape linthong tse ka o ntšang kotsi moeeng le bohaleng ba moea o kang sefefo oa lefatše leo re phelang ho lona. Ha ho mosebetsi o mong oa bohlokoa oo batho ba batona ka phuthehong ba ka o hahamallang ho feta oa ho thusa ho hlokomela boiketlo ba moea ba litho tsa phutheho ea Bokreste e ntseng e hōla.—1 Timothea 3:1; bapisa le Esaia 32:1, 2.
16. Ke ka litsela life balebeli ba Bakreste e leng batlatsi e mong ho e mong?
16 Leha ho le joalo, le ka mohla re se lebale hore balisa ba joalo ke batho, ba na le botho le mefokolo e fapaneng joaloka litho tse ling kaofela tsa mohlape. Le hoja e mong a ka ’na a hlahella tšobotsing e itseng ea bolisa, limpho tsa e mong li tla tsoela phutheho molemo ntlheng e ’ngoe. Mesebetsi ea bona e le baholo ba Bakreste e tlatsetsa o mong ho oa e mong ho matlafatseng phutheho. (1 Ba-Korinthe 12:4, 5) Le ka mohla moea oa tlhōlisano ha oa lokela ho kena har’a bona. Ha ba le ’moho ba sebeletsa ho sireletsa le ho ntšetsa pele lithahasello tsa ’Muso, “ba phahamisa matsoho a tšepahalang” ho rapela Jehova, ba batla tlhohonolofatso le tataiso tsa hae boikitlaetsong le liqetong tsohle tsa bona.—1 Timothea 2:8, NW.
17. (a) Re na le tlamo efe? (b) Ho hlokahala hore re qobe lintho life e le hore re tle re phethahatse tlamo ea rōna ka tsela e loketseng?
17 Hona joale mosebetsi oa ho bolela o ntse o fetoha o potlakileng ka ho eketsehileng ha bofelo ba ’muso oa Satane bo atamela. Re tšoere ’nete ea Lentsoe la Jehova Molimo, joaloka Lipaki tsa hae, re tlameha ho hasa litaba tse molemo ha monyetla o mong le o mong o hlaha. Mosebetsi o teng hona joale o mongata haholo bakeng sa ho re boloka re tšoarehile, ho fihlela qetellong. Re tlameha hore le ka mohla re se itumelle ho faposoa ke ho batla menyaka ea boitšoaro bo bobe, e seng e fetohile seo batho ba se phelelang kapa ho imeloa ke lerato la lintho tse bonahalang. Ha rea lokela ho kenella monahanong oa likhakanyo tse etsoang ka bohlale ba batho, ho phehisana khang ka mantsoe, hobane sena se ka ipaka e le se se nang molemo le se senyang nako. (2 Timothea 2:14, TLP; Tite 1:10; 3:9) Ha barutuoa ba botsa Jesu, “Morena, na u re, e se e le joale u tla tsosa ’muso oa Iseraele na?” Jesu o ile a lebisa monahano oa bona mosebetsing oa bohlokoa o neng o le teng ka nako eo, a re: “Le tla ba lipaki tsa ka Jerusalema, le naheng eohle ea Judea, le ea Samaria, le ho isa pheletsong ea lefatše.” Thōmo eo e sa ntsane e tsoela pele le kajeno.—Liketso 1:6-8.
18. Ke hobane’ng ha ho sebetsa le Jehova e le ho putsang hakaale?
18 Ho sebetsa le Jehova, ho bolela hammoho le phutheho ea hae ea lefatše lohle kajeno, ho tlisa thabo, khotsofalo, le morero oa sebele bophelong ba rōna. Ke monyetla oa hore e mong le e mong ea ratang Jehova a bontše boinehelo le botšepehi ho eena. Mosebetsi ona ka litšobotsi tsa oona tse ngata o ke ke oa hlola o phetoa. Re talimile tebellong ea bophelo bo sa feleng e larileng ka ho hlaka ka pele, e se eka re ka tsoela pele ka botšepehi ho “nehelana ka tšebeletso e halalelang ho Molimo ka tšabo ea bomolimo le thothomelo,” ho mo tlotlisa le hore rōna ka borōna re bolokehe.—Ba-Heberu 12:28, NW.
Karabelo ea Hao ke Efe?
◻ Ke mosebetsi ofe oo Jesu a neng a fumana thabo le khotsofalo ho oona?
◻ Ke bo-mang ba hanyetsang mosebetsi oa Jehova, hona hobane’ng?
◻ “Mesebetsi e metle” ea lefatše e ka bapisoa joang le ho bolela litaba tse molemo tsa ’Muso oa Molimo?
[Setšoantšo se leqepheng la 18]
Jesu o ile a fa barutuoa ba hae thōmo ea hore ba tsoele pele ho bolela