U se ke ua Hlokomoloha Molekane oa Hao!

BANYALANI ba bang ba tloha Holong ea ’Muso. Lifahleho tse bososelang tsa monna le mosali li bontša thabo eo ba e thabelang joaloka “nama e le ’ngoe,” ba kopane borapeling ba Molimo oa bona, Jehova. (Mattheu 19:6) Leha ho le joalo, hase ka mehla ba ’nileng ba thabela bonngoe boo kapa ba kopanela tumelo e tšoanang. Ho bile le nako eo ka eona mosali, Atsuko, a neng a ea libokeng a le mong. E be ka mor’a moo o ea hae ho monna ea halefileng ea mo kharumelang ka bohale. Ka nako e ’ngoe monna oa hae, Kazutaka, o ne a halefile hoo a ileng a shakarela tafole ea lijo eaba o e sutumetsa hanngoe feela ’me a qhalla lijo tsohle tsa mantsiboea fatše.

Feela joalokaha Jesu a ile a bolela esale pele, Bokreste ba ’nete bo tlisitse karohano malapeng a mang. (Mattheu 10:34, 35) Empa, joaloka Kazutaka le Atsuko, hona joale ba bang ba thabela bonngoe ba bolumeli le thabo mahaeng a bona. Leha ho le joalo, bonngoe bo joalo ha boa ka ba itlela feela tjee. Ke’ng seo balumeli ba ileng ba se etsa ho hlōla khanyetso le ho tlisa kutloano ea ’nete lelapeng? Pele re hlahloba seo, a re ke re boneng lebaka leo ka lona banyalani ba bang ba hanyetsang.

Ke Hobane’ng ha ba ne ba Hanyetsa?

Atsuko oa bolela: “Ha ke hetla morao, ke hlokomela hore ke ne ke ikela libokeng ho se mohla nkileng ka hlalosetsa monna oa ka litaba.” Ha a siiloe a le mong ka ntle le ho bolelloa letho, Kazutaka o ne a halefa.

Malakabe a khanyetso a ka ’na a boela a phahama ka baka la mōna. Monna e mong ea sa ntsaneng a le mocha, Shigeo, o ile a ba le lipelaelo tse se nang motheo ka metsoalle e mecha ea mosali oa hae. “Ha mosali oa ka a itlotsa ka makeup ’me a ea libokeng, ke ne ke nahana hore o na le monna e mong.” Mosali oa hae Masako oa lumela: “Haele hantle ha ho mohla re ileng ra ba le monyetla oa ho buisana re le ba babeli feela. Ha ho mohla nkileng ka hlalosa takatso ea ka e tlohang botebong ba pelo ea hore le eena a ithute ’nete ea Bokreste.”

Mosali e mong ea sa sebetseng, Toshiko, o ne a ikutloa kamoo Shigeo a neng a ikutloa ka teng. “Ha monna oa ka a qala ho ithuta le Lipaki tsa Jehova, ke ile ka hanyetsa hoo hobane butle-butle o ile a eketsa nako eo a neng a e qeta a e-na le phutheho. Ke ile ka retelehela linong e le hore ke qobe bohloko ba maikutlo ha a tsamaile.”

Tlhaloso ea Toshiko e ile ea bontša lebaka le leng—bolutu. Ke kamoo ba bang bao e neng e le bahanyetsi pele ba neng ba ikutloa ka teng ka mehla ha balekane ba bona ba e-tsoa ba ea libokeng. Monna e mong oa hopola: “Ha ke le mong ka tlung, ke ne ke ikutloa ke lahluoe.” E mong o re: “Ke ne ke ikutloa eka mosali oa ka le bana ba ka baa ntšiea.” Kaha banna ba bangata ba ho fumana ho le thata ho re, “Ke qetoa ke bolutu, ke kōpa u lule hae,” ba bang ba retelehela ho hanyetseng tšebeletso ea bolumeli ea molekane.

Ka linako tse ling khatello e tsoang ho metsoalle le beng ka motho e ka lebisa ho hanyetsoeng ke molekane eo ka tloaelo e leng ea utloisisang. Ho boleloa hore Linaheng tsa Bochabela ka tloaelo mosali “o amoheloa ka lelapeng ho e-na le ho kopanngoa le monna oa hae.” Khatello e tsoang ho beng ka bona e ka hlahisa phapang habonolo. Mosali oa Mokreste oa Takashi o ne a hana ho kopanela borapeling aletareng ea lelapa ea Buddha. Takashi oa hlalosa: “Ho neng ho thatafatsa litaba le ho feta ke hore re ne re phela haufi le baheso. ’Mè oa ka o ile a ntlisetsa khatello, kahoo ke ile ka sokela mosali oa ka ka ba ka sebelisa pefo.”

Ho se utloisisane, ho butsoetsoeng ke puisano e fokolang, mōna, bolutu, kapa khatello e tsoang ho beng ka motho, ho ka fetoha pefo. Monna ea neng a tloaetse ho otla mosali oa hae oa lumela: “Ke ne ke sa batle ho lahleheloa ke lelapa la ka ka baka la bolumeli.” E mong o re: “Ke ne ke hloile ho tla hae ntlong e se nang batho.” Mohlomong ba ne ba beha lebaka tjena, ‘Haeba mantsoe a sa felise cheseho ena ea bolumeli, litebele tse seng kae li tla e felisa.’

Ka thabo, banyalani bohle ba boletsoeng ka holimo mona hamorao ba ile ba kopana borapeling. Hona joale liphihlelo tsa bona tse hlomolang ke tsa nako e fetileng. Empa ka ho feta ho tsona, ba boemong bo botle ba ho fana ka litlhahiso tse sebetsang tse ka thusang ho fokotsa maemo a ka qhomang ’me mohlomong tsa hlahisa borapeli bo kopaneng malapeng a sa ntsaneng a arohane ntlheng ena.

Khomarela ’Nete

Ha u nanabetsa letsoho la hao ho hulela motho ea khangoang ke metsi ka ntle ho metsi, u tlameha ho setlela hantle ka bouena. Haeba u sa etse joalo, le uena u ka ’na ua qetella u le ka metsing. Ka mokhoa o tšoanang, senotlolo sa ho thusa molekane oa hao ke ho tšoara ’nete e pholosang bophelo ka tieo uena ka bouena. Motho e mong eo pele a neng a hanyetsa o re: “Nakong eo ke neng ke hanyetsa ka ho fetisisa, mosali oa ka o ne a ntse a tšoara bana ka letsoho a ea le bona libokeng. Hoja o ile a khoehlisa, nka be ke ile ka belaela hore na tumelo ea hae ke ea ’nete na.”

Kazutaka, ea ileng a phethola tafole, o senola se ileng sa fetola boikutlo ba hae ha a bolela karolo e setseng ea pale ea hae: “Qetellong, ke ile ka hana ho fa Atsuko chelete ea ho palama. Ho ntse ho le joalo, o ne a ea libokeng tsohle a bile a ea le bana. Ho etsa joalo, o ile a rekisa lintho tsa hae tsa botho, butle-butle. Ke ile ka ikutloa ke le sethoto eaba ke felloa ke matla a ho mo hanyetsa. Ho e-na le hoo, ke ile ka qala ho bala limakasine tseo a neng a li siea pooaneng hore ke li bone.”

Buisana le Molekane oa Hao

Mosali oa Kazutaka, Atsuko o re: “Ke ne ke lokela hore e be ke ile ka mema monna oa ka hore a kopanele le ’na le ho mo tsebisa hore ke batla hore re ithute Bibele hammoho. O ne a khathatseha ka ’na le lelapa. Puisano e molemo e ka be e ile ea etsa ho hongata ho fokotsa ho khathatseha ha hae.” E, puisano e molemo ke senotlolo sa kutloisiso. Bibele ea eletsa: “Ho ba le ho ferekanngoa ha merero moo ho seng puisano ea lekunutu.” (Liproverbia 15:22, NW) Moelelong ona, “puisano ea lekunutu” le molekane oa hao mabapi le mesebetsi ea hao ea bolumeli e lokela ho nahanisisoa ka hloko ’me e tšoaroe ka masene. Bibele e re: “Pelo ea motho ea bohlale e nepisa molomo oa hae hlalefong, e hlophisa lipuo tsa hae ka thuto.” (Liproverbia 16:23) Ke habohlokoa ka ho tšoanang ho ba masene ho khetheng nako e loketseng ea ho bua.—Moeklesia 3:7.

Mohlomong mokhoa oo u buang ka oona ke oa bohlokoa joaloka seo u se bolelang. Moapostola Pauluse oa eletsa: “Le polelo tsa lōna e be tse molemo ka mehla, tse nokiloeng ka letsoai, le tle le tsebe kamoo le tšoanetseng ho araba e mong le e mong.” (Ba-Kolosse 4:6) Ha u bua ka mosa, ka mokhoa o motle, molekane oa hao a ke ke a ba le tšekamelo e kaalo ea ho ithiba litsebe mabapi le seo u se bolelang.

Banna ba bangata ba fumana ho le thata ho rutoa ke basali ba bona. Kahoo ho hlokahala hore basali e be ba khonang ho sebetsana le maemo a joalo ka katleho. Kikuyo o ile a sebelisa hamolemo likhatiso tsa Mokhatlo oa Watch Tower. O re: “Hang ha Tsoha! e ne e fihla ka poso, ke ne ke e hlahloba ke sheba lihlooho tse neng li tla hapa thahasello ea monna oa ka. Joale ke ne ke ee ke rapelle monyetla oa ho kopanela lihlooho tseo le eena.” Mosali o ne a ee a siee makasine ka kamoreng ea ho tola ’me a hlahlobe maqephe letsatsi le leng le le leng ho bona hore na monna o balile sehlooho se seng. Ha ho ne ho bonahala eka ha a sa bala ho ea pele, mosali o ne a fetola makasine oo. Hona joale monna oa Kikuyo ke mohlanka ea sebeletsang e bile ke pula-maliboho.

Matla a Boitšoaro bo Botle

Empa ho thoe’ng haeba molekane oa hao a sa rate ho buisana ka bolumeli le uena? Ho tloaelana le Bakreste ba bang ho ka felisa khanyetso e matla ea molekane oa hao ’me ha mo susumelletsa ho ithuta Bibele. Masao, eo hona joale e seng e le moholo, ka nako e ’ngoe o kile a thibela Lipaki tsa Jehova ho ea ha hae. Oa hopola: “Qetellong ke ile ka lumela ho ithuta Bibele le Lipaki ka mor’a hore mosali oa ka a nkōpe ka phehello hore ke e’o thusa kahong ea Holo ea ’Muso. Ke ile ka angoa maikutlo ke ho bona bohle ba sebetsa hammoho ka thabo—ka ntle ho tefo ea letho.”

U ka etsa’ng haeba molekane oa hao a hana ho buisana ka bolumeli le mang kapa mang? Moapostola Petrose oa khothatsa: “Leha ba bang ba ka ba teng ba sa lumeleng lentsoe, ba mpe ba hapuoe, leha e ke ke ea e-ba ka lentsoe, e be ka metsamao ea basali [balekane] ba bona.” Ka mohlala, ke boitšoaro ba mofuta ofe ho mosali oa Mokreste bo ka hapang monna oa hae? Petrose o re: “Metsamao ea lōna e hloekileng, e nang le hlompho” e senolang “motho ea ka sephiring, e leng oa pelo, ka khabo e sa senyeheng ea moea o mosa, o bonolo.”—1 Petrose 3:1-4.

Mosali e mong oa Mokreste o ile a sebelisa molao-motheo ona ha monna oa hae ea hanyetsang a ne a kenelletse boitšoarong bo lihlong. Le hoja hoo ho ile ha tlisetsa monna sekhobo har’a baahisani hammoho le ho senyeheloa ke chelete, ha aa ka a utloa lentsoe leha le le leng la tletlebo le tsoang ho mosali oa hae kapa le tsoang ho bana ba hae. Monna enoa o ile a lumela: “Ke ile ka tseba hore boitšoaro ba bona bo ikhethang bo bile teng ka baka la ho ithuta ha bona Bibele.” Ka mor’a ho hanyetsa ka lilemo-lemo, o ile a qala ho bala Bibele. Banna ba bang bao hamorao ba ileng ba fetoha Lipaki baa bolela: “Ke ne ke le monna ea laoloang ke mosali, empa ka tšohanyetso mosali oa ka o ile a ntlhompha joaloka hlooho ea lelapa.” “Ha metsoalle ea ka ea khoebo e ne e tla ha rōna, mosali oa ka o ne a e amohela ka mofuthu. Ke ne ke rata seo.”

Boitšoaro bo botle ba bana, le bona bo ka nolofatsa lipelo tsa bahanyetsi. Ha a botsoa hore na ke’ng se fetotseng boikutlo ba hae, ntate eo pele a neng a hanyetsa mosali oa hae o itse: “Ha mora oa ka ea lilemo li peli le halofo a ne a hlokomela hore ke lekhatheng la ho halefa, o ne a bokolla ka lentsoe le phahameng ’me a pheta ka hlooho mantsoe ana: ‘Lerato lea mamella ’me le mosa.’” (1 Ba-Korinthe 13:4-7, NW) Moshanyana enoa ea rutiloeng hantle o ile a susumelletsa ntat’ae ho hlahloba Bibele. Bo-ntate ba bangata ba ile ba etsa qeto ea ho hlahloba Bibele hobane bana ba bona ba ile ba ba kōpa ka phehello hore ba ithute.

Qetellong, ho atamela molekane ka thabo le ho soasoa ho ka ba le phello e makatsang boikutlong ba molekane oa hao. Monna e mong o ile a bolella mosali oa hae ea lumetseng hore a nke eng kapa eng eo a e batlang ’me a tsoe, a se k’a b’a hlola a khutla. Mosali oa hae o ile a arabela: “Ha ke batle leha e le ngoana oa ka, kapa chelete, kapa lintho tse bonahalang.” Eaba o ala furoshiki (lesela le sebelisoang Japane ho phuthela le ho nka lintho) e khōlō ’me a re: “Ha ho letho la bohlokoa ka ho fetisisa ho ’na ho feta uena. Uena kena ka har’a furoshiki! Ke batla ho tsamaea ka uena.” Monna enoa o ile a khaotsa ho hanyetsa, a qala ho ithuta Bibele, ’me hona joale o sebeletsa e le moholo.

Haeba u khomarela ’nete, u boloka puisano e molemo, u fana ka botsoalle bo molemo, ’me u itšoara ka mokhoa o motle, u ka ’na ua khona ho thusa molekane oa hao ho ba molumeli. Motho eo e neng e le mohanyetsi pele o re: “Esita le haeba ho sa utloahale eka molekane oa hao o fetoha molumeli, e ka ’na eaba o ntse a fetoha pelong.” Kahoo u se ke ua nyahama. Nka ka ho teba khothatso ea moapostola Pauluse e lebileng ho bohle ba nang le balekane ba sa lumelang: “Mosali, u tseba ka’ng hobane u tla pholosa monna oa hao na? Le uena monna, u tseba ka’ng hobane u tla pholosa mosali oa hao na?”—1 Ba-Korinthe 7:16.