Na Ua Tšoaneleha Bakeng sa ho Sebeletsa?

“Ho tšoaneleha ha rōna ka ho lekaneng ho hlaha ho Molimo.”—2 BA-KORINTHE 3:5, “NW.”

 1. Phutheho ea Bokreste ha e na sebaka sa batho ba mofuta ofe?

JEHOVA MOLIMO le Jesu Kreste ke basebetsi. Jesu o ile a re: “Ntate o sa sebetsa le joale, le ’na kea sebetsa.” (Johanne 5:17) Molimo ha o amohele batho ba hanang ho sebetsa; leha e le hona hore o amohela ba batlang boikarabelo e le hore ba be le matla holim’a ba bang. Phutheho ea Bokreste ha e na sebaka sa batho ba botsoa kapa ba hahamallang lipakane ka boikhabi.—Mattheu 20:25-27; 2 Ba-Thessalonika 3:10.

 2. Ke hobane’ng ha hona joale ho e-na le tlhokahalo e khōlō ea hore banna ba jare boikarabelo ka phuthehong ea Bokreste?

² Lipaki tsa Jehova li na le ‘ho hongata hoo li ka ho etsang mosebetsing oa Morena,’ haholo-holo hona joale kaha batho ba bangata haholo ba phallela “thabeng” ea borapeli ba ’nete. (1 Ba-Korinthe 15:58, NW; Esaia 2:2-4) Ho na le tlhokahalo e khōlō ea hore banna ba tšoanelehang moeeng ba jare boikarabelo ka phuthehong. Kaha ha ba susumetsoe ke pakane ea boikhabi, banna ba joalo ha ba itlotlise, empa ba tlotlisa Jehova. (Liproverbia 8:13) Baa tseba hore Molimo o ba thusa hore ba tšoanelehele mesebetsi ka phuthehong, joalokaha o ‘etsa hore basebeletsi ba selekane se secha ba tšoanelehe ka ho lekaneng.’—2 Ba-Korinthe 3:4-6, NW.

 3. Ha e le hantle, boikarabelo bo fapa-fapaneng ba baholo le bahlanka ba sebeletsang ke bofe?

³ Kajeno, ho tšoana le ho Bakreste ba pele, banna ba khethoa ke moea o halalelang esita le ka tokisetso ea mokhatlo o hlophisitsoeng oa Jehova hore ba sebeletse e le baholo le bahlanka ba sebeletsang. (Liketso 20:28, NW; Ba-Filippi 1:1; Tite 1:5) Baholo ba alosa mohlape oa Molimo moeeng, ba fana ka tsamaiso e sireletsang. Ba thusoa ke bahlanka ba sebeletsang, bao mesebetsi ea bona e sa akarelletseng bolebeli ba moea ka ho toba. (1 Petrose 5:2; bapisa le Liketso 6:1-6.) Joaloka Mora oa Molimo, ea neng a tletse ho sebeletsa, banna ba joalo ba khethiloeng ba lakatsa ho sebeletsa balumeli-’moho le bona. (Mareka 10:45) Haeba u monna oa Mokreste, na u na le moea oo?

Litšoaneleho Tseo Kaofela ba Nang le Tsona

 4. Ke hokae ka ho khethehileng moo re fumanang mathathamo a litšoaneleho tsa ba tšepetsoeng boikarabelo ka phuthehong?

⁴ Ka ho khetheha lintho tse hlokahalang ho ba tšepetsoeng boikarabelo ka phuthehong li boletsoe ka ho hlaka ke moapostola Pauluse ho 1 Timothea 3:1-10, 12, 13 le Tite 1:5-9. Ha re ntse re hlahloba litšoaneleho tsena, tseo tse ling tsa tsona li sebetsang ho baholo hammoho le bahlanka ba sebeletsang, ha rea lokela ho li talima ho latela litekanyetso tsa lefatše. Ho e-na le hoo, re lokela ho li talima boemong boo li tlalehiloeng tlas’a bona lekholong la pele la lilemo e bile e le tse sebetsang har’a batho ba Jehova. Ho finyella litlhokahalo tsena ha ho hloke phetheho, hobane haeba ho ne ho le joalo ho ne ho se motho ea ka tšoanelehang. (1 Johanne 1:8) Empa haeba u monna oa Mokreste, ho sa tsotellehe hore na hona joale u na le mesebetsi e itseng ka phuthehong kapa che, ke hobane’ng ha u sa hlahlobisise litšoaneleho tsa hao tsa botho?

 5. Ho ba ea sa nyatsoeng ka letho ho bolela’ng?

⁵ Ea sa nyatsoeng ka letho; ea pakoang hantle ke batho ba ka ntle; eo ho seng seo a nģosoang ka sona. (1 Timothea 3:2, 7, 8, 10, NW; Tite 1:6, 7, NW) Ha ba khethoa le ha ba ntse ba sebeletsa, bahlanka ba sebeletsang le baholo ba tlameha ho ba ba sa nyatsoeng ka letho, ke hore, ba se behoe molato oa letho ’me ho se ke ha hlokahala hore ba lauoe ka lebaka la qoso e loketseng ea boitšoaro kapa thuto e fosahetseng. Liqoso tsa bohata tse etsoang ke “baena ba bohata” kapa ba bang ha li etse hore monna e be ea nyatsuoang. Hore monna ea itseng a tlosoe ho sebeletseng phutheho ka lebaka la ho se tšoanelehe, qoso e tlameha hore e se be ea bosaoana, ’me e tlameha ho pakoa ka tsela e lumellanang le litekanyetso tsa Mangolo. (2 Ba-Korinthe 11:26, NW; 1 Timothea 5:19) Ea khethiloeng ka phuthehong “o lokela hore a boele a be le bopaki bo botle bo tsoang ho batho ba ka ntle, e le hore a se oele thohakong le lerabeng la Diabolose.” Haeba monna ea itseng a entse sebe se tebileng nakong e fetileng, a ka khethoa feela haeba ka boitšoaro bo botle a se a tlositse thohako leha e le efe ’me a iketselitse botumo bo botle.

 6. Ho ba monna oa mosali a le mong ho bolela eng?

⁶ Monna oa mosali a le mong. (1 Timothea 3:2, 12; Tite 1:6) Sena ha se bolele hore ke banna ba nyetseng feela bao e ka bang bahlanka ba sebeletsang le baholo. Leha ho le joalo, haeba a nyetse, monna eo o tlameha ho ba le mosali a le mong feela ea ntseng a phela ’me a tšepahale ho eena. (Ba-Heberu 13:4) Ho fapana le banna ba bangata ba lekholong la pele la lilemo bao e neng e se Bakreste, a ke ke a nyala sethepu.a

 7. (a) Na ke ho ba moholo lilemong ho etsang hore monna a tšoanelehe ho ba moholo? (b) Ho okamela lelapa ka mokhoa o motle ho akarelletsa eng?

⁷ Ea okametseng lelapa la hae ka mokhoa o motle, ea nang le bana ba laolehang. (1 Timothea 3:4, 5, 12, NW; Tite 1:6) Ba bang ba ka ’na ba ikutloa hore baholo ba tlameha hore bonyane ba be lilemo li 30, empa Bibele ha e behe moeli oa lilemo. Leha ho le joalo, motho eo o tlameha ho itšoara joaloka monna ea hōlileng ka kutloisiso ea moea. Bahlanka ba sebeletsang le baholo e lokela ho ba ba hōlileng ka ho lekaneng hore ba ka ba le bana. Haeba a nyetse, monna eo ha a tšoanelehe haeba a itšoara ka tsela ea bomolimo ha a le kae-kae empa e le mohatelli lapeng. O tlameha hore a be a se a hapile tlhompho ka lebaka la ho okamela lelapa la hae ho latela melao-motheo ea Bibele, ’me sepheo sa hae e lokela ho ba ho fumana katleho moeeng ho setho se seng le se seng sa lelapa. Ka kakaretso, moholo ea nang le bana o lokela hore bana ba hae ba banyenyane lilemong e be ba itšoereng hantle le “ba lumelang.” Ba tlameha hore e be ba etsa tsoelo-pele ho leba boinehelong ho Molimo kapa hore e be ba se ba kolobelitsoe ho ba Lipaki tsa Jehova. Monna ea sa khoneng ho haha tumelo ka hare ho bana ba hae ha ho bonolo hore a ka etsa joalo ho ba bang.

 8. Pele monna ea nang le lelapa e ka ba moholo, o tlameha ho ithuta ho etsa’ng?

⁸ Pele monna ea nang le lelapa e ka ba moholo ea khonang ho fana ka bolebeli ba moea ka phuthehong, o tlameha ho ithuta ho tsamaisa lelapa la hae. ‘Haeba monna ofe kapa ofe a sa tsebe ho okamela lelapa la hae, o tla hlokomela phutheho ea Molimo joang?’ (1 Timothea 3:5, NW) Ke ’nete hore monna a ka ’na a hanyetsoa ke mosali ea sa lumelang. (Mattheu 10:36, NW; Luka 12:52) Kapa e mong oa bana ba hae a ka ’na a ba molato oa sebe se tebileng, le hoja ba bang ba tsoela pele hantle moeeng. Ho ntse ho le joalo, haeba monna eo a entse sohle se ka lebelloang, ’me haholo-holo haeba a fumane katleho moeeng ho ba bang ba lelapa la hae, hore e be setho se seng sa lelapa se hana tsamaiso ea hae e ntle ho ne ho ke ke ha etsa hore a se tšoanelehe ho ba mohlanka ea sebeletsang kapa moholo.

 9. Ke eng seo moholo kapa mohlanka ea sebeletsang a tlamehang ho se ela hloko mabapi le lino tse tahang?

⁹ E se be motho ea leqhōkō oa letahoa kapa ea inehelletseng veine e ngata. (1 Timothea 3:3, 8, BPN; Tite 1:7) Mohlanka ea sebeletsang kapa moholo o tlameha hore a se noe lino tse tahang ka tsela e tlōlisang. Ho li lemalla ho ka fella ka hore a hlōlehe ho laola menahano le maikutlo, e leng ho ka lebisang leqhōkōng la botahoa kapa lintoeng. Ha aa lokela ho ‘inehella veine e ngata’ kapa ho tuma ka ho ba le tloaelo ea ho noa kapa ho noa ho tlōlisa. (Liproverbia 23:20, 21, 29-35) Ho ka ba bohloko hakaakang haeba ketelo ea bolisa e ka senngoa ke ho noa ho tlōlisa! Haeba moena a e-noa, ha aa lokela ho noa ha a ea libokeng, tšebeletsong ea tšimo, kapa tšebeletsong e ’ngoe e halalelang.—Levitike 10:8-11; Ezekiele 44:21.

10. Ke hobane’ng ha batho ba ratang chelete kapa ba meharo ea ho fumana moruo ka ho se tšepahale ba sa tšoanelehe hore e be baholo kapa bahlanka ba sebeletsang?

¹⁰ E se be motho ea ratang chelete kapa ea meharo ea ho fumana moruo ka ho se tšepahale. (1 Timothea 3:3, 8, NW; Tite 1:7) Batho ba ratang chelete ba kotsing moeeng, ’me “batho ba meharo” ba ke ke ba rua ’Muso oa Molimo. Kahoo, banna ba joalo ha ba tšoanelehe hore e ka ba baholo kapa bahlanka ba sebeletsang. (1 Ba-Korinthe 6:9, 10, NW; 1 Timothea 6:9, 10) Motso oa lentsoe la Segerike le fetoletsoeng e le “ho se tšepahale” ha e le hantle le bolela “ho nyeliseha,” ’me lentsoe le fetoletsoeng e le “moruo” le bolela mofuta ofe kapa ofe oa phaello kapa tsoala. (Ba-Filippi 1:21; 3:4-8) Ho hlakile hore monna eo tšekamelo ea hae e bontšang hore o ne a tla tšoara “linku” tsa Molimo ka tsela e sa tšepahaleng ha a tšoanelehe bakeng sa boikarabelo ka phuthehong. (Ezekiele 34:7-10; Liketso 20:33-35; Juda 16) Tlhokahalo ea ho ba seli ha ho etsoa lipuello e totobala ha re hlokomela hore hang ha monna a se a khethiloe, a ka ’na a tšepeloa ho tšoara chelete ’me a ba tekong ea ho utsoa chelete e ’ngoe.—Johanne 12:4-6.

11. Ke hobane’ng ha “monna ea sa tsoa sokoloha” a sa lokela ho buelloa bakeng sa boikarabelo ka phuthehong?

¹¹ E se be ea sa tsoa sokoloha; a lekoe hore na oa tšoaneleha. (1 Timothea 3:6, 10, NW) Motho ea sa tsoa kolobetsoa ha a e-s’o fumane nako ea ho paka hore o tla hlokomela mesebetsi eo a e abetsoeng ka botšepehi. A ka ’na a haelloa ke kutloelo-bohloko ho ba mahlomoleng kapa a haelloa ke bohlale bo hlokahalang bakeng sa ho thusa barapeli-’moho ’me a ka ba a khella ba bang fatše. Ka hona, pele a buelloa hore e be mohlanka ea sebeletsang ’me haholo-holo hore e be moholo, monna o lokela ho ‘lekoa hore na oa tšoaneleha’ ’me o lokela ho paka hore o na le boahloli bo botle le hore a ka tšeptjoa. Ha ho nako e behiloeng bakeng sa ho lekoa hona, ’me batho ka bomong baa fapa-fapana tseleng eo ba hōlang ka eona moeeng. Empa baholo ha baa lokela ho potlakela ho buella monna e mocha “ka ho tšaba hore a ka ’na a tlala boikhohomoso ’me a oela kahlolong eo Diabolose a ahlotsoeng ka eona.” Monna eo ha a ke a bontše boikokobetso bo kang ba Kreste.—Ba-Filippi 2:5-8, NW.

Ho Lekola Bahlanka ba Sebeletsang

12. Na litlhokahalo tse thathamisitsoeng bakeng sa bahlanka ba sebeletsang li lokela ho finyelloa ke bona feela?

¹² Ho thathamisitsoe litlhokahalo tse ling bakeng sa bahlanka ba sebeletsang. Leha ho le joalo, hoja baholo le bona ba ne ba sa finyelle litlhokahalo tse joalo, ba ne ba ke ke ba tšoaneleha bakeng sa ho sebeletsa. Joaloka monna oa Mokreste, na ua tšoaneleha lintlheng tsee?

13. Ho nka litaba ka ho teba ho bolela’ng?

¹³ Ea nkang litaba ka ho teba. (1 Timothea 3:8, NW) Monna ea tšoanelehang bakeng sa ho sebeletsa e le mohlanka ea sebeletsang ha aa lokela ho nka boikarabelo habobebe. O tšoanela ho itšoara ka tsela e nang le seriti le e hapang tlhompho. Le hoja ho soasoa ka linako tse ling ho amoheleha, o ne a ke ke a tšoaneleha haeba nako le nako a ne a etsa lintho ka tsela ea papali.

14. (a) Ho se be maleme a mabeli ho bolela’ng? (b) Ho ba le letsoalo le hloekileng ho hloka eng?

¹⁴ E se be ea maleme a mabeli; e be ea nang le letsoalo le hloekileng. (1 Timothea 3:8, 9) Bahlanka ba sebeletsang (le baholo) ba lokela ho bua ’nete, e se be basebi kapa ba bomene-mene. Kaha ba lokela hore ba se be maleme a mabeli, ba tlameha hore ba se bue ntho e itseng ka boikaketsi ho motho e mong e be ba bua ntho e fapaneng ho e mong. (Liproverbia 3:32, NW; Jakobo 3:17, NW) Banna bana ba tlameha hore hape e be batšehetsi ba tšepahalang ba ’nete e senotsoeng, “ba boloke sephiri sa tumelo ka letsoalo le hloekileng.” Ka pel’a Molimo, letsoalo la monna ea joalo le lokela ho paka hore o lokile ’me ha a etse letho le tsoileng tseleng kapa le silafatsang. (Ba-Roma 9:1; 2 Ba-Korinthe 1:12; 4:2; 7:1) Ha ho motho ea ka tšoanelehang bakeng sa ho sebeletsa mohlape oa Molimo ha a sa khomarele ’nete le melao-motheo ea bomolimo.

Ho Lekola Litšoaneleho Tsa Baholo

15. Joale ho hlahlojoa litšoaneleho tsa bo-mang, ’me litšoaneleho tsee li akarelletsa eng ka ho khethehileng?

¹⁵ Litšoaneleho tse itseng li sebetsa ka ho khethehileng ho baholo ’me li amana haholo-holo le mosebetsi oa bona joaloka balisa le matichere. Joaloka monna oa Mokreste, na u finyella litlhokahalo tsee?

16. (a) Ho hlokahala eng bakeng sa ho ba le mekhoa e itekanetseng? (b) Moholo a ka boloka boitšoaro joang?

¹⁶ Ea nang le mekhoa e itekanetseng; ea nang le boitšoaro. (1 Timothea 3:2, NW; Tite 1:8) Moholo o lokela ho ba ea leka-lekaneng, a se ke a lemalla mekhoa e mebe. Ha a talimane le liteko, Molimo o tla mo thusa ho boloka ho leka-lekana haeba a rapela joalokaha mopesaleme a ile a rapela: “Felisa matšoenyeho a pelo ea ka, u ’ntše maqakabetsing a ka.” (Pesaleme ea 25:17, BPN) Hape molebeli o lokela ho rapella moea oa Molimo ’me a bontše litholoana tsa oona, ho akarelletsa boitšoaro. (Luka 11:13; Ba-Galata 5:22, 23) Ho ithiba menahanong, puong, le liketsong ho etsa hore moholo a khone ho qoba ho ba ea fetelletsang litaba ha a fana ka tataiso ea moea bakeng sa phutheho.

17. Ho hlaphoheloa kelellong ho akarelletsa eng?

¹⁷ Ea hlaphohileng kelellong. (1 Timothea 3:2, NW) Moholo e tlameha ho ba motho ea hlaphohileng kelellong, ea bontšang boahloli bo bohlale, le ea masene. E lokela ho ba motho ea nang le boikemisetso le ea nang le kutloisiso puong le liketsong. Monahano oa hae oa boikokobetso, o leka-lekaneng o theiloe bohlaleng ba bomolimo le lithutong tse molemo tsa Lentsoe la Jehova, leo a lokelang ho ithuta lona ka mafolo-folo.—Ba-Roma 12:3, NW; Tite 2:1.

18. Ho ba le tlhophiso ho hloka eng ho moholo?

¹⁸ Ea nang le tlhophiso. (1 Timothea 3:2, NW) Lentsoe la Segerike le sebelisitsoeng mona le fetoletsoe e le “hlophisitsoeng hantle” ho 1 Timothea 2:9. (NW) Kahoo moholo o lokela ho ba le mokhoa oa bophelo o hlomphehang, o hlophisitsoeng hantle. Ka mohlala, e lokela ho ba motho ea etsang lintho ka nako. Ho bonahala eka Bakreste ba lekholong la pele la lilemo ba ne ba sa nke ho boloka litlaleho e le taba ea bohlokoa haholo, ’me kajeno ha ho hlokahale hore moholo e be setsebi sa ho boloka litlaleho tsa lichelete kapa litlaleho tse ling. Bahlanka ba sebeletsang ba ka ’na ba hlokomela lintho tse hlokahalang lintlheng tsena. Empa lentsoe la Segerike le emelang ‘ho ba le tlhophiso’ le ka bolela boitšoaro bo botle, ’me ka sebele monna o ne a ke ke a tšoaneleha ho ba moholo haeba a sa laolehe kapa a se na tlhophiso.—1 Ba-Thessalonika 5:14; 2 Ba-Thessalonika 3:6-12; Tite 1:10.

19. Ka lebaka la hore o rata ho amohela baeti, moholo o etsa’ng?

¹⁹ Ea ratang ho amohela baeti. (1 Timothea 3:2; Tite 1:8) Moholo ‘o latela mohlala oa ho rata ho amohela baeti.’ (Ba-Roma 12:13, NW; Ba-Heberu 13:2) Lentsoe la Segerike le emelang “ho rata ho amohela baeti” ha e le hantle le bolela “ho rata batho bao motho a sa ba tsebeng.” Ka hona, moholo ea ratang ho amohela baeti o amohela batho ba bacha libokeng tsa Bokreste, o bontša thahasello ho ba hlokang ka tsela e tšoanang le eo a e bontšang ka eona ho ba atlehileng linthong tse bonahalang. O amohela ba leng mosebetsing oa ho tsamaela lithahasello tsa Bokreste ’me o ba felehetsa “ka mokhoa o tla khahlisa Molimo.” (3 Johanne 5-8, BPN) Ka sebele, moholo o bontša hore o rata ho amohela baeti haholo-holo ho balumeli-’moho ho latela litlhokahalo tsa bona le kamoo maemo a hae a mo lumellang ka teng.—Jakobo 2:14-17.

20. Moholo o tlameha ho tšoaneleha ka litsela life bakeng sa ho ruta?

²⁰ Ea tšoanelehang bakeng sa ho ruta. (1 Timothea 3:2, NW) Matla a moholo joaloka tichere ea moea ha a tlisoe ke matla a tlhaho a kelello kapa bohlale ba lefatše. (1 Ba-Korinthe 2:1-5, 13) A tlisoa ke hore o “itšoarellelitse ka tieo lentsoeng le tšepahalang mabapi le botsebi ba hae [kapa mokhoa] ba ho ruta, e le hore a ka khona ho khothatsa ka matla ka thuto e phelisang le ho laea ba hanyetsang.” (Tite 1:9, NW; bapisa le Liketso 20:18-21, 26, 27.) O tlameha hore e be ea khonang ho ‘ruta ka bonolo ba hanyetsang.’ (2 Timothea 2:23-26) Esita le haeba moholo hase sebui se molemohali sa phatlalatsa ka phuthehong, e lokela ho ba seithuti se setle sa Lentsoe la Molimo hoo a ka bang hloahloa ka ho lekaneng ho ruta le ho laea balumeli, ba ithutang Bibele ka ho tšoanang. (2 Ba-Korinthe 11:6, NW) O tlameha ho tšoaneleha bakeng sa ho fana ka “thuto e phelisang” e thusang malapa le batho ka bomong ho phela bophelo ba bomolimo.—Tite 2:1-10, NW.

21. (a) Ke hobane’ng ha ho ka boleloa hore moholo hase ea otlang? (b) Ho ba ea itekanetseng ho bolela’ng? (c) Ho se rate ntoa ho bolela’ng?

²¹ E se be ea otlang, empa e be ea itekanetseng, e seng ea ratang ntoa. (1 Timothea 3:3, NW; Tite 1:7) Kaha o rata khotso, moholo ha a otle batho ’meleng kapa ho ba buisa lipolelo tse nyefolang kapa tse hlabang. (Bapisa le 2 Ba-Korinthe 11:20.) (Polelo e boletsoeng pele ea hore hase ‘motho ea leqhōkō oa letahoa’ e bontša hore o qoba tšebeliso e mpe ea tahi eo hangata e lebisang khohlanong.) Kaha o “itekanetse” (kapa “oa tenyetseha”), hase ’mampoli kapa eo ho leng thata ho mo khahlisa, ha a phehe khang ka litaba tse nyenyane. (1 Ba-Korinthe 9:12; Ba-Filippi 4:5, NW; 1 Petrose 2:18) Kaha moholo ha a rate ntoa, kapa likhang, o qoba liphehisano ’me ha ‘a halefe kapele.’—Tite 3:2, BPN; Jakobo 1:19, 20.

22. ’Nete ea hore moholo o tlameha hore e se be moithati e bontša eng?

²² Hase moithati. (Tite 1:7) Ha e le hantle, sena se bolela “ho se ikhahlise.” (Bapisa le 2 Petrose 2:10, NW) Moholo o tlameha hore e se be ea hatellang empa o lokela ho talima matla a hae ka boikokobetso. Kaha ha a nahane hore o etsa lintho hamolemo ho feta bohle, ka boikokobetso o arolelana boikarabelo le ba bang ’me o ananela baeletsi ba bangata.—Numere 11:26-29; Liproverbia 11:14; Ba-Roma 12:3, 16.

23. (a) U ne u tla hlalosa ‘motho ea ratang molemo’ joang? (b) Ho ba ea lokileng ho bolela’ng?

²³ Ea ratang molemo; ea lokileng. (Tite 1:8) Hore a tšoanelehe ho ba moholo, monna o tlameha ho rata molemo ’me e be ea lokileng. Motho ea ratang molemo o rata se setle mahlong a Jehova, o etsa liketso tse mosa le tse thusang, ’me o bontša kananelo bakeng sa molemo oa ba bang. (Luka 6:35; bapisa le Liketso 9:36, 39; 1 Timothea 5:9, 10.) Ho ba ea lokileng ho bolela ho ipapisa le melao le litekanyetso tsa Molimo. Har’a tse ling, monna ea joalo o hloka leeme ’me o lula a hopotse lintho tse lokileng, tse hloekileng, le tse khabane. (Luka 1:6; Ba-Filippi 4:8, 9; Jakobo 2:1-9) Kaha molemo o fapane le ho loka ka hore oona o fetela ka ’nģane ho seo toka e se hlokang, motho ea ratang molemo o etsetsa ba bang ho hongata ho feta se lebelletsoeng ho eena.—Mattheu 20:4, 13-15; Ba-Roma 5:7.

24. Ho ba ea tšepahalang ho hloka eng?

²⁴ Oa tšepahala. (Tite 1:8, NW) Monna ea tšoanelehang ho ba moholo o boloka boinehelo bo ke keng ba senngoa ho Molimo ’me o khomarela molao oa bomolimo, ho sa tsotellehe hore na botšepehi ba hae bo lekoa joang. O etsa seo Jehova a se lebelletseng ho eena, ’me sena se akarelletsa ho sebeletsa e le ’moleli ea tšepahalang oa ’Muso.—Mattheu 24:14; Luka 1:74, 75, NW; Liketso 5:29; 1 Ba-Thessalonika 2:10, NW.

Ho Finyella Litšoaneleho

25. Litšoaneleho tse sa tsoa hlalosoa li hlokoa ho bo-mang, ’me litšoaneleho tse joalo li ka finyelloa joang?

²⁵ Boholo ba litšoaneleho tse sa tsoa hlalosoa li akarelletsa lintho tse hlokahalang ho Paki e ’ngoe le e ’ngoe ea Jehova ’me li ka fumanoa ka hore Molimo o hlohonolofatse thuto, boiteko, botsoalle bo molemo, le thapelo tsa motho ka mong. Batho ka ho fapana ba ka ’na ba e-ba matla haholoanyane litšoanelehong tse ling ho feta ho tse ling. Empa ka tekanyo e itekanetseng, bahlanka ba sebeletsang le baholo ba tlameha ho finyella litlhokahalo tsohle bakeng sa tokelo ea bona e khethehileng.

26. Ke hobane’ng ha banna ba Bakreste ba itlhahisa bakeng sa boikarabelo ka phuthehong?

²⁶ Lipaki tsa Jehova kaofela li lokela ho batla ho etsa ntho e ’ngoe le e ’ngoe e ka etsoang tšebeletsong ea Molimo. Moea ona o susumelletsa banna ba Bakreste ho itlhahisa bakeng sa boikarabelo ka phuthehong. Na u monna ea inehetseng, ea kolobelitsoeng? Haeba ho joalo, hahamalla litokelo ’me u etse boiteko bohle ba ho tšoaneleha bakeng sa ho sebeletsa!

[Mongolo o botlaaseng ba leqephe]

U ne u Tla Arabela Joang?

◻ Ke hobane’ng ha hona joale ho e-na le tlhokahalo e khōlō ea hore banna ba kolobelitsoeng ba amohele boikarabelo ka phuthehong?

◻ Tse ling tsa litšoaneleho tseo bahlanka ba sebeletsang ba tlamehang ho li finyella ke life?

◻ Tse ling tsa litšoaneleho tseo baholo ba tlamehang ho li finyella ke life?

◻ Ke hobane’ng ha moholo a tlameha hore a tsebe ho okamela lelapa la hae hantle?

◻ Ke eng e susumelletsang banna ba Bakreste ho itlhahisa bakeng sa mesebetsi ka phuthehong?

[Setšoantšo se leqepheng la 24, 25]

Baholo le bahlanka ba sebeletsang ba lokela ho okamela malapa a bona ho latela melao-motheo ea Bibele